1, 2. Hadia halöwö sebua niʼokhögö Yosua me no mate Moze?

IMANE Yehowa khö Yosua, ”No mate genonigu Moze andrö, ba labu saʼae, ötö Yoridano andrö, yaʼugö ba banuagu andrö fefu, misawa danö andrö, nibeʼegu khöra.” (Yosua 1:1, 2) No faʼatebulö sebua daʼa khö Yosua, si no arakhagö 40 fakhe tobali sangai halöwö khö Moze!

² No ngaotu fakhe idöniaʼö ndraono Gizaraʼeli Moze. Iadaʼa, Yosua zondröniaʼö yaʼira. Hizaʼi, te so khönia waʼaombö dödö hadia latemaʼö ia tobali sondröniaʼö. (5 Moze 34:8, 10-12) Sanandrösa ba Yosua 1:1, 2, itutunö sambua buku referensi Zura Niʼamoniʼö wa abua zalua ba tola manö so deʼala na tefalalini zondröniaʼö, he ba götö föna mazui iadaʼa.

3, 4. Hewisa Lowalangi wamahowuʼö Yosua börö me faduhu dödönia, ba hadia wanofu-nofu si tola tumbu ba dödöda?

³ Sinangea na so waʼaombö dödö khö Yosua. Hizaʼi, ifaduhusi  tödö Yehowa ba iʼanemaiʼö iʼoʼö wanuturu lala nibeʼe khönia. (Yosua 1:9-11) Andrö wa ifahowuʼö ia Lowalangi ba ifatenge malaʼikania ba wameʼe fanuturu lala khö Yosua hegöi ba ndraono Gizaraʼeli. Malaʼika nifatenge khönia te Ono siaʼa Lowalangi, nifotöi Taromali.​—2 Moze 23:20-23; Yohane 1:1.

⁴ Me awena tobali sondröniaʼö Yosua, itolo ndraono Gizaraʼeli Yehowa ba wamaudugö faʼaurira ba ngawalö zi tebulö. Iadaʼa, oya göi waʼatebulö sebua si no alua. Te manofu ita, ’Börö me itugu tedou organisasi Lowalangi, hadia tola tafaduhusi tödö Yesu si tobali Sondröniaʼö si no mufataro?’ (Baso Mataiʼo 23:10.) Ba wameʼe fanema linia, datatutunö hewisa wondröniaʼö Yehowa ono mbanuania ba götö föna na so zalua si tebulö.

5. Me ahatö ba mbanua Yerikho, hadia zalua sahöli-höli dödö khö Yosua? (Faigi gambara ba wamobörö wamahaʼö.)

⁵ Lö ara me no laʼötö Nidanö Yoridano iraono Gizaraʼeli, alua zahöli-höli dödö khö Yosua. Me ahatö ba mbanua Yerikho, falukha Yosua khö ndra matua solohe föda. Manofu khönia Yosua, ”Hadia, awöma ndraʼugö, ma awö nemalima?” Tokea Yosua me imane ira matua daʼö wa yaʼia ’zolohe sanuwö andrö, khö Yehowa’, samösa malaʼika solumöʼö ono mbanua Lowalangi. (Baso Yosua 5:13-15.) Hewaʼae ba ayati tanö böʼö iwaʼö wa Yehowa zi fahuhuo khö Yosua, hizaʼi iʼogunaʼö malaʼika ba wahuhuosa khönia simane sasese ifalua ba zilalö.​—2 Moze 3:2-4; Yosua 4:1, 15; 5:2, 9; Halöwö Zinenge 7:38; Galatia 3:19.

6-8. (a) Na ba wamaigi niha, hana wa so ösa wanuturu lala nibeʼe malaʼika andrö sambö tefaudu? (b) Hana taʼila wa no fanuturu lala satua-tua daʼö ba mubeʼe ia ba ginötö si tefaudu? (Faigi nisura ba gahe zura.)

⁶ No ihaogö ifatunö malaʼika hadia zinangea ifalua Yosua ba wokalaisi Yerikho. Ba wamobörö, so ösa wanuturu lala sambö tefaudu na ba wamaigi niha. Duma-dumania, iwaʼö malaʼika khö Yosua enaʼö lasuna fefu zaradadu. Na lafalua daʼö, tebai fasuwö ira ba zi hauga hari. Hadia inötö si tefaudu khöra ba wamalua daʼö?​—1 Moze 34:24, 25; Yosua 5:2, 8.

⁷ Tola manö tumbu ba wangera-ngera ndra saradadu, ’Hewisa wa tola malumöʼö nösi nomoma na so nudu sanuwö?’ Hizaʼi so zalua si lö mudöna-döna! Ataʼu niha Yerikho ba wanuwö iraono Gizaraʼeli. Tabaso, ”No laduhö mbawa göli Yerikho, no mukusi föna ndraono Gizaraʼeli, lö si möi baero ba lö si möi miyomo.” (Yosua 6:1) Ba zalua andre itugu faduhu dödö ndraono Gizaraʼeli ba wanuturu lala nibeʼe Lowalangi!

⁸ Iwaʼö malaʼika khö Yosua enaʼö böi lasuwö Yerikho. Hizaʼi moguna lafaʼoli ira ba wamasui banua andrö sakali maʼökhö ba zi önö hari. Ba ngaluo si fitu moguna lafasui mbanua andrö fitu kali. Te so ba wangera-ngera ndra saradadu, ’Sangohori inötö hegöi faʼabölö daʼa!’ Hizaʼi, Yehowa si tobali Sondröniaʼö iraono Gizaraʼeli, iʼila hadia zabölö sökhi! Na laʼoʼö wanuturu lala nibeʼenia tola aro wamati ndraono Gizaraʼeli ba lö moguna fasuwö ira ba wolawa saradadu Yerikho.​—Yosua  6:2-5; Heberaiʼo 11:30. * (Faigi nisura ba gahe zura.)

9. Hana wa moguna taʼoʼö fefu wanuturu lala nitemada moroi ba organisasi Lowalangi? Beʼe duma-duma.

⁹ Hadia wamahaʼö nihalöda ba zalua andre? Itaria so zi bohou nifalua organisasi Yehowa ba tola manö lö aboto ba dödöda hana wa mufalua ia. Duma-dumania, te ba wamobörö lö fao dödöda ba wangogunaʼö perangkat elektronik ba wamalua famahaʼö samösa, ba wanuriaigö mazui ba gangowuloa. Hizaʼi, taʼila hadia mbuania iadaʼa. Na taʼila hadia mbua si sökhi moroi ba nibulöʼö andrö, itugu aro wamatida ba itugu taʼokhögö wahasara dödö ba gotalua ndra talifusöda.

10. Haniha zindruhunia zotatugöi wa moguna owulo mboto solohe ba Yeruzalema ba wangasiwai abula dödö sanandrösa ba wosuna?

¹⁰ Te 13 fakhe me no aefa tobali niha Keriso Konelio, so ösa niha Keriso Yahudi sangumaʼö wa moguna lasuna fefu niha Keriso. (Halöwö Zinenge 15:1, 2) Ba mbanua Gandriokhia, fabuaʼa-buʼa ndra talifusöda sanandrösa ba daʼö. Andrö wa laʼandrö khö Waulo ira satua sokubaloi enaʼö möi ia ba Yeruzalema ba wanofu khö ndra boto solohe. Hizaʼi, haniha zindruhunia zangoʼou yaʼia? Itutunö Faulo, ”Möi ndraʼo ba daʼö börö me so nifaʼeleʼö Zoʼaya.” Ba daʼö oroma wa Keriso  zangalui lala enaʼö boto solohe zangasiwai abula dödö andrö.​—Galatia 2:1-3.

11. (a) Hadia nasa nifaduhusi tödö niha Keriso Yahudi sanandrösa ba wosuna? (b) Hewisa wangoromaʼö Waulo wa si fao fangide-ngideʼö ituhini halöwö ndra satua sokubaloi ba Yeruzalema? (Faigi nisura ba gahe zura.)

¹¹ Ibeʼe Keriso wanuturu lala khö ndra boto solohe wa lö moguna lasuna niha Keriso si tenga niha Yahudi. (Halöwö Zinenge 15:19, 20) Hizaʼi, ba zi hauga fakhe aefa daʼö, ato niha Keriso Yahudi lö mamalö lasuna ndraonora. Aefa daʼö, larongo ira satua sokubaloi ba Yeruzalema wa no iʼosiwawöi Faulo Goroisa Moze. Daʼö mbörö wa laʼandrö khö Waulo enaʼö iforomaʼö wa iʼameʼegö tödö Goroisa Moze. * (Faigi nisura ba gahe zura.) (Halöwö Zinenge 21:20-26) Laʼandrö khönia enaʼö iʼohe daöfa ndra matua ba gosali, irege laʼila niha wa iʼameʼegö tödö Goroisa andrö Faulo. Tola manö imane khöra Faulo, ’Lö tefaudu daʼö! Hana wa miʼandrö khögu ba wamalua daʼa? Si sala yaʼia daʼö niha Keriso Yahudi si lö mangokhögö faʼaboto ba dödö sanandrösa ba wosuna.’ Hizaʼi, aboto ba dödö Waulo wa omasi ndra satua sokubaloi na so wahasara dödö ba gotalua niha Keriso, andrö wa si fao fangide-ngideʼö iʼoʼö fefu wanuturu lala nibeʼera. Tola manö manofu-nofu ita, hana wa itehegö Yesu manganau manö gabula dödö sanandrösa ba wosuna, hewaʼae na sindruhunia lö saʼae moguna Goroisa Moze me no aefa mate Yesu.​—Kolose 2:13, 14.

12. Hana wa itehegö Keriso ara numalö ginötö ba wangasiwai abula dödö sanandrösa ba wosuna?

¹² Moguna ginötö ba wanemaʼö faʼaboto ba dödö si bohou. So ösa niha Keriso Yahudi moguna khöra ginötö ba wanemaʼö sindruhu wa tenga barö Goroisa so ira. (Yohane 16:12) So ba wangera-ngerara wa fosuna no tobali tandra wa laʼokhögö wahuwusa si tohude khö Lowalangi. (1 Moze 17:9-12) Tanö böʼönia so khöra waʼataʼu na laʼuduni ira börö me faböʼö moroi ba niha Yahudi tanö böʼö. (Galatia 6:12) Hizaʼi ba ginötönia, oya wanuturu lala nibeʼe Keriso khöra, no ihenaigö daʼö ba zura nibeʼe Waulo.​—Roma 2:28, 29; Galatia 3:23-25.

13. Hadia zanolo yaʼita ba wanuhini lala nifalua Keriso ba wondröniaʼö yaʼita iadaʼa?

¹³ Lö mamalö Keriso Zondröniaʼö banua niha Keriso iadaʼa. Andrö, na so zi tebulö nibeʼe organisasi si lö aboto ba dödömö, angeragö hadia nifalua Keriso ba wondröniaʼö ono mbanua Lowalangi me götö föna. Ba götö Yosua mazui ba götö ndra sinenge, ibeʼe wanuturu lala satua-tua Keriso ba wolumöʼö ono mbanua Lowalangi, ba wangaʼaroʼö famatira hegöi  ba wanolo yaʼira enaʼö laʼokhögö wahasara dödö.​—Heberaiʼo 13:8.

14-16. Hana wa tola tawaʼö wa fanuturu lala moroi khö ndra ’sawuyu si lö faröi ba satua-tua’ no tandra wa omasi itolo ita Keriso ba wangaʼaroʼö famatida?

¹⁴ Iadaʼa, labeʼe khöda wanuturu lala ira ’sawuyu si lö faröi ba satua-tua’ ba ginötö moguna khöda daʼö. (Mataiʼo 24:45) Daʼa zangoromaʼö wa iʼameʼegö tödö ita Yesu. Imane Marc si daöfa ono, ”Isaisi Satana zi sambu-sambua omo enaʼö lö fahasara dödö ba mbanua niha Keriso. Hizaʼi iadaʼa, labeʼe khöda wamarou dödö ba wamalua famahaʼö zi sambua omo ero migu. Daʼa dandra wa moguna ilumöʼö nösi nomonia satua si tobali högö yomo ba nomo!”

¹⁵ Na taʼila hewisa wondröniaʼö Keriso ita, tola aboto ba dödöda wa omasi ia itolo ita ba wangaʼaroʼö famatida. Duma-dumania, imane satua sokubaloi sotöi Patrick, ”Ba wamobörö so ösa niha si lö omasi na mufalua gangowuloa si ide-ide fatua lö möi manuriaigö ba luo satu hegöi migu.” Hizaʼi, iwaʼö wa fombulöʼö daʼa zangoromaʼö hewisa woʼameʼegö tödö Yesu fefu zi so ba mbanua niha Keriso. Duma-dumania, so ösa ndra talifusöda saila mazui si lö asese möi manuriaigö larasoi wa moguna sibai weʼasora. Daʼa zangaʼaroʼö famatira.

¹⁶ Itolo göi ita Keriso enaʼö taʼosambuaʼö dödöda ba halöwö fanuriaigö, halöwö sabölö moguna ba gulidanö andre. (Baso Mareko 13:10.) Samösa satua sokubaloi si bohou sotöi André, lö mamalö iʼoʼö wanuturu lala si bohou moroi ba organisasi Yehowa. Imane, ”Me laheta ösa zohalöwö ba gödo ndraha, daʼö zamasugi ba dödöda wa no itugu ahatö ginötö andrö ba moguna taʼosambuaʼö dödöda, faʼabölöda ba wamalua halöwö fanuriaigö.”

17, 18. Hana wa moguna taʼangeragö mbua nitemada na tafaudugö waʼaurida ba zi no mubulöʼö?

¹⁷ Fanuturu lala moroi khö Yesu Keriso, Razo si no mufataro, daʼö zanolo yaʼita iadaʼa hegöi ba zi so miföna. Angeragö hadia manö mbua nitemamö börö me no öfaudugö waʼaurimö ba zi no mubulöʼö barö-barö daʼa. Ba wamahaʼö si sambua omo, tola ötutunö hewisa zi no mubulöʼö ba gangowuloa mazui ba wanuriaigö möi fanolo nösi nomomö.

¹⁸ Na tatörö tödöda wa oya mbua si sökhi na taʼoʼö wanuturu lala ba organisasi Yehowa, aoha khöda ba woloʼö fanuturu lala andrö ba itugu ohahau dödöda. Duma-dumania, tola taʼiröʼö gefe börö me lö saʼae oya lacetak publikasi simane ba zilalö. Börö me taʼogunaʼö göi teknologi si bohou, tola itugu ato niha samondrongo turia somuso dödö. Hadia tola nasa tadouʼö wangogunaʼö publikasi elektronik hegöi audio ba video? Daʼa sambua lala si tola tafalua ba wanuhini Keriso, somasi na taʼogunaʼö hadia zi no ihenaigö organisasi si fao faʼatua-tua.

19. Hana wa moguna taʼoʼö wanuturu lala nibeʼe Keriso?

¹⁹ Na taʼoʼö wanuturu lala moroi khö Keriso, no tatolo ndra talifusöda ba wangokhögö famati saro hegöi enaʼö so wahasara dödö. Imane André sanandrösa ba wangalösi niha sohalöwö ba Mbetieli ba zi sagörö ulidanö, ”Börö me latemaʼö wombulöʼö daʼö ira niha Mbetieli si fao faʼaoha gölö, andrö wa itugu tefarou dödögu ba wangosinangegö yaʼira hegöi ba wangokhögö famati ba wanuturu lala nibeʼe Keriso. Laʼoʼö wofanö gureta Yehowa, lafalua fefu halöwö nibeʼe khöra si fao faʼomuso dödö.”

20, 21. (a) Hana wa moguna tafaduhusi tödö Keriso, Sondröniaʼö yaʼita? (b) Hadia wanofu nitutunöda ba wamahaʼö aefa daʼa?

²⁰ Ba zi lö ara tö, Sondröniaʼö yaʼita Yesu Keriso, ’ikalaisi nudunia irege möna ia’. (Famaʼeleʼö 6:2; Zinunö 45:5) Hizaʼi, moguna tafaʼanö ita iadaʼa ba waʼauri hegöi wohalöwö ba gulidanö si bohou dania. Ba daʼö dania tafahaʼö niha nisusugi ba tatolo ira ba wombaliʼö faradaiso gulidanö andre.

²¹ Na tafaduhusi tödö Zondröniaʼö yaʼita hegöi Razoda gofu hadia zalua, ibeʼe khöda wanuturu lala weʼamöi ba gulidanö si bohou. (Baso Zinunö 46:2-4.) Iadaʼa, tola manö abua khöda na so zi tebulö, mendrua manö na molua-lua ia ba waʼaurida ba zi lö tadöna-döna. Na alua daʼö, hewisa enaʼö tola tarasoi waʼahono dödö hegöi famati saro khö Yehowa? Tatutunö ia ba wamahaʼö aefa daʼa.