1, 2. (a) Hadia halöwö sabölö moguna ba waʼauri Yesu, ba hadia mbörö? (b) Hadia zinangea tafalua enaʼö mofozu ita tobali ’si falulu fohalöwö khö Lowalangi’?

YESU KERISO samösa tuka geu, hizaʼi ba gafuriata tobali ia samahaʼö. (Mareko 6:3; Yohane 13:13) Moʼahonoa wamaluania si dombua halöwö andre. Börö me tuka geu ia, ifomaha ia wangogunaʼö fakake ba wamazökhi gama-gama moroi ba geu. Me tobali ia samahaʼö, iʼogunaʼö waʼaboto ba dödö niʼokhögönia ba wanolo niha sato enaʼö laʼila zindruhu ba Daromali Lowalangi. (Mataiʼo 7:28; Luka 24:32, 45) Me 30 fakhe ndröfi Yesu, tenga saʼae tuka geu ia. Tobali ia sanuriaigö börö me iʼila wa daʼa halöwö sabölö moguna sinangea ifalua. Iwaʼö wa halöwö fanuriaigö turia somuso dödö sanandrösa ba Wamatörö Lowalangi no sambua mbörö wa ifatenge ia Lowalangi ba gulidanö. (Mataiʼo 20:28; Luka 3:23; 4:43) Iʼosambuaʼö dödönia ba wanuriaigö turia somuso dödö, ba omasi ia na tafalua daʼö.​—Mataiʼo 9:35-38.

² Ato ba gotaluada tenga tuka geu, hizaʼi fefu ita sanuriaigö, samahaʼö turia somuso dödö ba niha böʼö. Moguna sibai halöwö daʼa börö me moʼamakhaita ia khö Lowalangi. Sindruhunia, lafotöi ita ’si falulu fohalöwö khö Lowalangi’. (1 Korindro 3:9; 2 Korindro 6:4) Tatu fao dödöda ba niwaʼö zanura sinunö andre, ’Taromalimö andrö zindruhu.’  (Zinunö 119:159, 160) Fehede Yehowa no sindruhu. Ba wanuriaigö moguna tatatugöi ’wangogunaʼö taromali sindruhu ba zi tefaudu’. (Baso 2 Timoteo 2:15.) Andrö dataforege enaʼö itugu atua-tua ita wangogunaʼö Sura Niʼamoniʼö, fakake niʼogunaʼöda ba wamahaʼö niha böʼö sanandrösa khö Yehowa, Yesu hegöi Famatörö Lowalangi. Enaʼö mofozu wanuriaigö nifaluada, so fakake tanö böʼö nibeʼe organisasi Yehowa, ba moguna taʼila lala wangogunaʼö yaʼia. Mufotöi ia Fakake Niʼogunaʼöda ba Wamahaʼö.

3. Hadia zinangea taʼosambuaʼö dödöda ba wanuriaigö, ba hewisa Halöwö Zinenge 13:48 möi fanoloda ba wamalua daʼö?

³ Te manofu-nofu dödömö hana wa tafotöi ia Fakake Niʼogunaʼöda ba Wamahaʼö tenga Fakake Niʼogunaʼöda ba Wanuriaigö. ”Manuriaigö”eluahania mamaʼema turia. Hizaʼi ”mamahaʼö” eluahania itutunö duria andrö irege aboto ba dödö niha hadia nirongonia ba tefarou dödönia ba wamalua daʼö. Börö me no ahatö ginötö, moguna taʼosambuaʼö dödöda wamörögö ba wamahaʼö niha ba Zura Niʼamoniʼö ba tafahaʼö ira ba zindruhu enaʼö tobali nifahaʼö Keriso. Eluahania, moguna owölö-ölö ita wangalui niha ”si sökhi amuata somasi manöndra faʼauri si lö aetu” ba tatolo ira enaʼö labörögö lafosumange Yehowa.​—Baso Halöwö Zinenge 13:44-48.

4. Hewisa enaʼö tola tasöndra niha ”si sökhi amuata somasi manöndra faʼauri si lö aetu”?

⁴ Hewisa enaʼö tasöndra niha ”si sökhi amuata somasi manöndra faʼauri si lö aetu”? Ba niha Keriso siföföna, lafalua wanuriaigö enaʼö falukha ira ba niha. Imane Yesu khö ndra nifahaʼönia, ”Ba mbanua sebua mazui ba mbanua side-ide si möi ami, alui niha sotemaʼö yaʼami.” (Mataiʼo 10:11) Moguna göi tafalua daʼö iadaʼa. Tatu manö na falukha ita ba niha si lö mangokhögö faʼatulö dödö, sasiliyawa mazui si lö moʼameʼegö tödö Lowalangi, lö tatötöna wa latemaʼö duria somuso dödö. Hizaʼi, taʼalui niha satulö tödö, sangokhögö fangide-ngideʼö, ba somasi mangila sindruhu. Halöwö daʼa tola mufagölösi ia simane nifalua Yesu me tobali ia tuka geu. Si oföna ifalua Yesu yaʼia daʼö iʼalui geu si sökhi, aefa daʼö iʼogunaʼö fakake hegöi faʼatua-tuania ba wamazökhi ngawalö gama-gama, bawandruhö, kalo mbagi mazui tanö böʼönia. Simanö göi ita, moguna oföna taʼalui niha satulö tödö. Aefa daʼö, taʼogunaʼö fakake hegöi faʼatua-tuada ba wanolo yaʼira enaʼö tobali nifahaʼö.​—Mataiʼo 28:19, 20.

5. Hana wa moguna taʼila Fakake Niʼogunaʼöda ba Wamahaʼö? Beʼe duma-duma. (Faigi gambara ba wamobörö wamahaʼö.)

⁵ Ero sambua fakake so gunania. Duma-dumania, angeragö wakake niʼogunaʼö Yesu me tobali ia tuka geu. * (Faigi nisura ba gahe zura.) So wakake niʼogunaʼönia ba wanuʼa, ba wotandrai, ba wanaba, ba wanölaʼö hegöi ba wangehaogö eu. So göi niʼogunaʼö ba wamagölösi eu enaʼö tola mufatohu ia ba geu tanö böʼö. Simanö göi Fakake Niʼogunaʼöda ba Wamahaʼö, no faböʼö-böʼö gunania. Daʼö mbörö wa moguna taʼila lala wangogunaʼö yaʼia.

6, 7. (a) Hewisa wangogunaʼömö kartu kontak? (b) Hadia gohitö dödöda ba wameʼe undranga?

⁶ Kartu Kontak. Hewaʼae no ide-ide, moguna sibai wakake daʼa. Kartu andre  zanutunö haniha ita ba samarou niha enaʼö labokai situs Web jw.org. Ba situs Webda, tola lafahaʼö ira sanandrösa khöda ba tola laʼandrö wamahaʼö ba Zura Niʼamoniʼö. Töra 400.000 niha sangandrö famahaʼö ba Zura Niʼamoniʼö moroi ba jw.org, ba töra ngaotu niha ero maʼökhö! Böi mamalö ohe kartu daʼa ba tola öbeʼe ia ba niha si falukha khömö.

⁷ Undranga. Ba undranga weʼamöi ba gangowuloada so wehede, ”Makaoniʼö ba wamahaʼö ba Zura Niʼamoniʼö khö ndra Samaduhuʼö Yehowa.” Iwaʼö göi ba undranga daʼö wa tola lafahaʼö ira niha ba Zura Niʼamoniʼö ”ba gangowuloama” mazui ”khö zi samösa zamahaʼö”. Undranga daʼa zanutunö ba niha haniha ita ba takaoni göi niha ”soʼameʼegö tödö soguna ba wamati” enaʼö lafahaʼö ira khöda ba Zura Niʼamoniʼö. (Mataiʼo 5:3) Tatu manö, hewaʼae lö nifahaʼö ira ba Zura Niʼamoniʼö tola möi ira ba gangowuloada. Na laʼondrasi gangowuloada, tola laʼila hadia manö zinangea lafahaʼö ira ba Zura Niʼamoniʼö.

8. Hana wa moguna sibai möi niha ba gangowuloada? Beʼe duma-duma.

⁸ Moguna sibai takaoni niha ba wangondrasi angowuloada. Hadia mbörö? Na möi ira ba gangowuloada, tola laʼila wa sindruhu moroi ba Zura Niʼamoniʼö nifahaʼö ndra Samaduhuʼö Yehowa ba omasi latolo niha ba wangokhögö faʼaboto ba dödö khö Lowalangi. Lö lafalua daʼö agama sofaya. (Yesaya 65:13) Duma-dumania, sambua fongambatö ba Amerika Serikat sotöi Ray hegöi Linda, laʼila samösa gamaehuta daʼa ba zi hauga fakhe silalö. Faduhu dödöra khö Lowalangi ba omasi ira enaʼö itugu aboto ba dödöra ia. Andrö wa lahalö gangetula ba wangondrasi fefu gereja si so ba mbanuara. Fatua lö fao ira ba zi sambua gereja, so dombua nitatugöira. Si oföna, so wamahaʼö si tola lahalö moroi ba nifahaʼö gereja daʼö. Si dua, niha si fao ba gereja daʼö laʼogunaʼö nukha soadu ba wangoromaʼö wa samosumange Lowalangi ira. Ba zi no hauga fakhe, oya gereja si no laʼondrasi. Hizaʼi, afatö sibai dödöra. Lö hadöi famahaʼö si tola lahalö, ba niha si fao ba daʼö lö laʼogunaʼö nukha soadu. Me no aefa laʼondrasi gereja safuria si so ba daftar nihaogöra, möi mohalöwö Linda ba mangawuli Ray ba nomo. Me mangawuli Ray, iʼila Balai Mbanua Lowalangi. Imane tödönia, ’Damöido bakha ba wamaigi hadia zalua ba daʼö.’ Daʼa zabölö sökhi moroi ba danö böʼö si no irai iʼondrasi! Fahuwu fefu niha si so ba daʼö, baga lagura ba moadu wonukhara. Modadao Ray tanö föna, ba omasi ia hadia zi no ifahaʼö ia! Daʼa zamasugi ba dödöda sanandrösa ba niha nitutunö zinenge sotöi Faulo sawena möi ba gangowuloada sangumaʼö, ”Sindruhu wa so Lowalangi ba gotaluami.” (1 Korindro 14:23-25) Iʼotarai daʼö, möi Ray ba gangowuloa ero hari Migu. Ba gafuriata, fao ia göi ba gangowuloa barö migu. Ba ibörögö fao göi Linda weʼamöi ba gangowuloa. Hewaʼae no 70-an ndröfira, lafahaʼö ira ba Zura Niʼamoniʼö ba lafabayagöʼö ira idanö.

9, 10. (a) Hana wa aoha sibai wangogunaʼö risalah? (b) Tutunö hewisa wangogunaʼö risalah Hadia Mbanua Lowalangi Andrö?

⁹ Risalah. So walu ngawua risalah si tobali fakakeda. Aoha sibai wangogunaʼö yaʼia ba wamörögö fahuhuosa. Risalah  siföföna mufazökhi me 2013. No lacetak ia arakhagö lima miliar! Fefu risalah fagölö wamazökhi yaʼia. Tobali, na öʼila lala wangogunaʼö si sambua risalah, tola öʼila öʼogunaʼö fefu risalah andrö! Hewisa lala wangogunaʼö risalah ba wamörögö fahuhuosa?

¹⁰ Na omasi ndraʼugö öʼogunaʼö risalah Hadia Mbanua Lowalangi Andrö? Foromaʼö wanofu si so tanö föna ba sofu khönia, ”Hadia no irai manofu-nofu ndraʼugö hadia Mbanua Lowalangi andrö? Moloʼö yaʼugö . . . ?” Andrö khönia enaʼö ifili fazambua moroi ba zi tölu wanema li si no tehenaigö. Moroi na öfatunö hadia atulö mazui löʼö wanema li nibeʼenia, bokai risalah andrö ba faosatö ”Hadia Niwaʼö Daromali Lowalangi”. Baso khönia ayati si so ba daʼö, Danieli 2:44 hegöi Yesaya 9:6. Aefa daʼö, beʼe khönia wanofu ba faosatö ”Si Nangea Muʼangeraigö”: ”Hadia dania howu-howu nitema nono mbanua Lowalangi andrö?” Tola öbeʼe wanema linia na öfuli öfalukhaisi ia. Ogunaʼö wamahaʼö si-7 moroi ba brosur Turia Somuso Dödö moroi khö Lowalangi! Daʼa no sambua fakake niʼogunaʼöda ba wamörögö famahaʼö ba Zura Niʼamoniʼö.

11. Hewisa wamazökhi majalahda enaʼö adöni dödö niha, ba hadia zinangea taʼila sanandrösa ba daʼö?

¹¹ Majalah. Majalah sabölö oya mufazökhi hegöi mufoʼeluaha ba zi sagörö ulidanö yaʼia daʼö Manuriaigö hegöi Sadarlah! Börö me ato niha moroi ba ngawalö soi sombaso yaʼia, muhaogö mufazökhi duho nibeʼe ba guli majalah andre enaʼö adöni dödö niha fefu. Moguna taʼogunaʼö majalah daʼa ba wanolo niha enaʼö laʼosambuaʼö dödöra ba ngawalö zabölö moguna ba waʼauri. Hizaʼi si oföna, moguna taʼila haʼökhö manandrösa majalah daʼa.

12. (a) Haʼökhö mufazökhi Sadarlah! ba hadia gohitö dödö majalah daʼa? (b) Barö-barö daʼa, hadia zi sökhi si no irai alua khömö me öʼogunaʼö fakake daʼa?

¹² Mufazökhi Sadarlah! soguna ba niha si lö faʼaboto ba dödö mazui ha maʼifu zaboto ba dödöra Zura Niʼamoniʼö. Te lö laʼila sanandrösa ba wamahaʼö niha Keriso, lö faduhu dödöra ba agama, mazui lö laʼila wa tola itolo ira Sura Niʼamoniʼö ba waʼauri. Ohitö dödö si oföna Sadarlah! yaʼia daʼö ba wamaduhuʼö tödö zombaso wa so Lowalangi. (Roma 1:20; Heberaiʼo 11:6) Daʼa göi zanolo yaʼira enaʼö faduhu dödöra wa ”sindruhunia fehede Lowalangi” Zura Niʼamoniʼö andrö. (1 Tesalonika 2:13) So tölu ngawua zi no mufazökhi ba ndröfi 2018 tuhonia: ”Apa Kebahagiaan Sejati Itu?”, ”12 Kunci Keluarga Bahagia” hegöi ”Bantuan bagi yang Berduka”.

13. (a) Haʼökhö moguna wa mufazökhi Manuriaigö edisi umum? (b) Barö-barö daʼa, hadia zi sökhi si no irai alua khömö me öʼogunaʼö fakake daʼa?

¹³ Ohitö dödö wa mufazökhi majalah Manuriaigö edisi umum yaʼia daʼö ba wanutunö famahaʼö Zura Niʼamoniʼö ba niha soʼameʼegö tödö Lowalangi hegöi Sura Niʼamoniʼö. Te so ösa zi no laʼila sanandrösa ba Zura Niʼamoniʼö, hizaʼi lö aboto sibai ba dödöra hadia wamahaʼönia. (Roma 10:2; 1 Timoteo 2:3, 4) So tölu ngawua zi no mufazökhi ba ndröfi 2018 sameʼe fanema li moroi ba wanofu-nofu  daʼa: ”Hadia Moguna Zura Niʼamoniʼö ba Ginötö Daʼa?”, ”Hewisa Waʼaurida ba zi So Miföna?” ba ”Hadia Iʼameʼegö Tödö Ndraʼugö Lowalangi?”

14. (a) Hadia zi öfa video si so ba Fakake Niʼogunaʼöda ba Wamahaʼö? (b) Hadia zi sökhi si no irai alua khömö me öforomaʼö video-video daʼa?

¹⁴ Video. Ba götö Yesu, ha fakake tanga niʼogunaʼö tuka geu. Iadaʼa, laʼokhögö fakake listrik si tola laʼogunaʼö ba wogaragazini, ba wotölaʼö hegöi ba wangalösöini eu. Simanö na möi ita manuriaigö, tenga ha publikasi tercetak niʼokhögöda. Iadaʼa taʼokhögö göi ngawalö video si sökhi niforomaʼöda ba niha. Öfa moroi ba gotalua fakake niʼogunaʼöda: Hana Wa Moguna Tafahaʼö Ita ba Zura Niʼamoniʼö?, Hewisa Halöwö Famahaʼö ba Zura Niʼamoniʼö Nifaluama?, Hadia manö nifalua ba nahia Gorahua Mbanua Lowalangi?, ba Haniha Ndra Samaduhuʼö Yehowa? Video sadogo-dogo sambö dua menit tola muʼogunaʼö ia na awena falukha ita ba niha. Video sanau tola muʼogunaʼö ia na tafuli tafalukhaisi ira hegöi na falukha ita ba niha soya inötö. Video-video daʼa tola möi famarou dödö ba niha enaʼö lafahaʼö ira ba Zura Niʼamoniʼö hegöi weʼamöi ba gangowuloa.

15. Hadia mbuania na so niha samaigi video ba li niʼogunaʼöra? Beʼe duma-duma.

¹⁵ Duma-dumania, so samösa dalifusöda ira alawe sanuriaigö khö zi samösa ira alawe sawena findra moroi ba Mikronesia. Ha li Yap niʼila ndra alawe andrö. Iforomaʼö khönia talifusöda video Hana Wa Moguna Tafahaʼö Ita ba Zura Niʼamoniʼö? ba li Yap. Imane ira alawe andrö me awena tebörögö video, ”Li niʼogunaʼögu daʼa. Ahöli-höli sibai dödögu! Ba lagu wehedenia, uʼila wa moroi ba hulo si toröi ndraʼo so ia. Mohede ia ba li niʼogunaʼögu!” Aefa daʼö, iwaʼö wa omasi ia ibaso ba ifaigi video si so ba jw.org si no tefaʼanö ba linia. (Fatimbaisi Halöwö Zinenge 2:8, 11.) Duma-duma tanö böʼö yaʼia daʼö samösa dalifusöda ira alawe moroi ba Amerika Serikat. So nono dalifusönia si toröi ba soi böʼö. Ikirim link video Hana Wa Moguna Tafahaʼö Ita ba Zura Niʼamoniʼö? ba li niʼogunaʼö nono daʼö. Ifaigi video daʼö ba ikirim e-mail, ”Omasido faosatö sanandrösa ba waʼabölö si lö sökhi samatörö ulidanö daʼa. Uʼandrö enaʼö lafahaʼödo ba Zura Niʼamoniʼö.” Ahöli-höli dödöda börö me sindruhunia lö latehegö halöwö ndra Samaduhuʼö Yehowa ba soi si toröi ia!

16. Tutunö hadia guna brosur daʼa: (a) Fondro-ndrongo Li Lowalangi Enaʼö Ösöndra Waʼauri Si lö Aetu. (b) Turia Somuso Dödö moroi khö Lowalangi! (c) Haniha Zamalua Somasi Yehowa ba Ginötö Andre?

¹⁶ Brosur. Hewisa enaʼö tola tafahaʼö zindruhu ba niha si lö onekhe mombaso mazui na lö hadöi buku si teʼodane-dane ba Zura Niʼamoniʼö ba lira? Tola taʼogunaʼö brosur Fondro-ndrongo Li Lowalangi Enaʼö Ösöndra Waʼauri Si lö Aetu. * (Faigi nisura ba gahe zura.) Ba wamörögö famahaʼö ba Zura Niʼamoniʼö, ogunaʼö brosur Turia Somuso Dödö moroi khö Lowalangi! Foromaʼö khönia 14 duho si so ba guli tanö furi, ba andrö khönia enaʼö ifili sambua zadöni dödönia. Börögö wamahaʼö yaʼia ba  duho nifilinia. Hadia no öfalua daʼa ba ginötö öfuli öfalukhaisi ia? Brosur si tölu moroi ba fakakeda yaʼia daʼö Haniha Zamalua Somasi Yehowa ba Ginötö Andre? Mufazökhi daʼa ba wamahaʼö niha nifahaʼöda ba Zura Niʼamoniʼö sanandrösa ba organisasida. Enaʼö öʼila lala wangogunaʼö yaʼia ero öfalua wamahaʼö ba Zura Niʼamoniʼö, faigi Faʼauri Niha Keriso ba Fanuriaigö—Waö-Waö Halöwö ba Gangowuloa, Baŵa si Tölu 2017.

17. (a) Hadia gohitö dödö ero zi sambu-sambua mbuku niʼogunaʼöda ba wamahaʼö? (b) Hewaʼae no tebayagö ia idanö, hadia nasa zinangea tafalua ba hadia mbörö?

¹⁷ Buku. Na no öbörögö wangogunaʼö brosur ba wamahaʼö si samösa niha, tola öfalalini ia faoma buku Hadia Nifahaʼö Zura Niʼamoniʼö Khöda? gofu hawaʼara zomasiʼö. Fakake daʼa zanolo niha enaʼö itugu laʼila dane-dane wamahaʼö Zura Niʼamoniʼö. Na tedou ia ba wamati ba no awai miʼogunaʼö mbuku daʼö, tola ötohugö wamahaʼö faoma mbuku Lala Enaʼö Lö Tebulö Iʼomasiʼö Ita Lowalangi. Fakake daʼa zanolo niha nifahaʼöda ba wamalua goi-goi Zura Niʼamoniʼö ba waʼaurinia. Hewaʼae no tebayagö ia idanö, moguna öfahaʼö ia irege awai miʼogunaʼö zi dombua mbuku andre. Daʼa zanolo yaʼia ba wangokhögö famati saro khö Yehowa hegöi ba wondrorogö faʼalöfaröinia.​—Baso Kolose 2:6, 7.

18. (a) Moloʼö 1 Timoteo 4:16, hadia zinangea tafalua ba hadia mbuania? (b) Hadia gohitö dödöda ba wangogunaʼö Fakake Niʼogunaʼöda ba Wamahaʼö?

¹⁸ Börö me Samaduhuʼö Yehowa ita, taʼokhögö noro dödö ba wamahaʼö niha sanandrösa ba ”duria somuso dödö moroi ba zindruhu” enaʼö lasöndra waʼauri si lö aetu. (Kolose 1:5; baso 1 Timoteo 4:16.) Enaʼö tola tafalua daʼö, no taʼokhögö Fakake Niʼogunaʼöda ba Wamahaʼö si tola taʼogunaʼö. (Faigi kotak ” Fakake Niʼogunaʼöda ba Wamahaʼö”.) Datahaogö wangogunaʼö yaʼia. Fefu ita tola tatatugöi samösa hadia fakake somasi taʼogunaʼö ba hawaʼara taʼogunaʼö ia. Hizaʼi, moguna tatörö tödöda wa ohitö dödöda tenga ha ba wameʼe publikasi, ba lö tabeʼe publikasida ba niha si lö manemaʼö turia nifaʼemada. Ohitö dödöda yaʼia daʼö ba wombaliʼö niha tobali nifahaʼö. Taʼalui niha satulö tödö, sangide-ngideʼö ba somasi mangokhögö faʼaboto ba dödö khö Lowalangi. Yaʼira ”niha si sökhi amuata somasi manöndra faʼauri si lö aetu”.​—Halöwö Zinenge 13:48; Mataiʼo 28:19, 20.