1-2. (a) Hadia gangombakhata nifaʼema ngawalö soi ba zi lö ara tö? (b) Hadia manö wanofu-nofu sinangea tabeʼe wanema li?

KHALAIGÖ na awena lafaʼema ngawalö soi angombakhata ”no atulö, no ahono” simane si no mufaʼeleʼö andrö. Tola manö lawaʼö wa no atulö gulidanö andre. Laforege ba wamaduhuʼö ba niha wa no laʼasiwai gabula dödö ba gulidanö. Hizaʼi, tebai lafatörö hadia zalua aefa daʼö! Hadia mbörö? Moloʼö nifaʼeleʼö Zura Niʼamoniʼö wa ”izumaigö ikhamö ira faʼatekiko andrö ba zi lö mudöna-döna . . . ba tebai aefa ira”.​—1 Tes. 5:3.

² So wanofu sabölö moguna sinangea tafatunö: Hadia zalua sagötö ”wamakao sabölö-bölö”? Hadia zomasi Yehowa tafalua ba ngaluo daʼö? Ba hewisa enaʼö tola tafaʼanö ita iadaʼa irege lö faröi ita sagötö wamakao sabölö-bölö?​—Mat. 24:21.

3. Moloʼö Famaʼeleʼö 17:5, 15-18, hewisa dania Lowalangi ba wamakiko ”Babilona Sebua”?

³ Baso Famaʼeleʼö 17:5, 15-18. Tefakiko dania ”Babilona sebua”! Simane nitutunö moroi yawa, tebai lafatörö ngawalö soi hadia zalua dania. Hadia mbörö? Börö me ”Lowalangi zameʼe ba dödöra wamalua ohitö dödönia.” Hadia gohitö dödönia? Yaʼia daʼö ba wamakiko agama sofaya ba zi sagörö ulidanö, farahu ba daʼö Agama-Agama Niha Keriso. * Iʼogunaʼö ”tandru si fulu rozi” Lowalangi moroi ba ”gurifö samuʼi soyo si hulö hola-hola galitö” ba  wamalua ohitö dödönia. ’Urifö samuʼi’ eluahania Perserikatan Bangsa-Bangsa, ba na ”si fulu tandru” eluahania fefu kuaso politik sotuhini yaʼia. (Fam. 17:3, 11-13; 18:8) Ba ginötö alua daʼö, ibörögö alua wamakao sabölö-bölö. Faʼalua daʼö dania zameʼe tokea dödö niha ba zi sagörö ulidanö, ba oi ataʼu ira.

4. (a) Hadia manö dania zi tobali dane-dane ba ngawalö soi ba wanuwö Babilona Sebua? (b) Hadia dania nifalua niha si no irai tobali soloʼö ba agama sofaya?

⁴ Lö taʼila hadia dania niwaʼö ngawalö soi ba wanutunö hadia mbörö wa lasuwö Mbabilona Sebua. Tola manö lawaʼö wa agama si so ba zi sagörö ulidanö zi tobali daha-taha ba wamalua faʼatulö, ba börö me lö tebulö agama fao ba politik. Mazui lamane wa no ebua gokhöta hegöi harato si no ihöna agama. (Fam. 18:3, 7) Ba ginötö lasuwö dania Babilona Sebua ngawalö soi, nifaluara dania ba wangohori fefu agama, tenga ba wangohori fefu soloʼö ba agama andrö. Na lö hadöi saʼae dania fefu agama daʼö, aboto ba dödö ndra soloʼö khönia wa no afatö dödöra labeʼe ira sondröniaʼö ba agama. Börö daʼö, tola manö dania lamane wa lö irai fao ira ba agama daʼö.

5. Hadia nifabuʼu Yehowa sanandrösa ba wamakao sabölö-bölö, ba hadia mbörö?

⁵ Lö niʼombakhaʼö ba Zura Niʼamoniʼö ofeta hawaʼara faʼatekiko Mbabilona Sebua. Hizaʼi, aboto ba dödöda wa lö arara waʼalua daʼö. (Fam. 18:10, 21) No ifabuʼu Yehowa wa ”iʼadogoiʼö ginötö” wamakao sabölö-bölö enaʼö lö tehori agama sindruhu hegöi ’niha nifilinia’. (Mrk. 13:19, 20) Na no mubörögö wamakao sabölö-bölö ba fatua lö alua wasuwöta Hamagedo, hadia zomasi Yehowa tafalua?

6. Na no taheta ita moroi ba Mbabilona sebua, hadia nasa zinangea tafalua?

⁶ Simane si no tatutunö ba wamahaʼö si no aefa, iʼandrö ba nono mbanuania Yehowa enaʼö laheta ira moroi ba Mbabilona  Sebua. Hizaʼi, so nasa sinangea tafalua nasa. Moguna tahalö gangetula enaʼö lö tebulö ita ba wamosumange Yehowa. Datafaigi dombua lala sinangea tafalua.

7. (a) Hewisa enaʼö lö tebulö ita ba woloʼö goi-goi Yehowa sanandrösa ba gamuata? (b) Moloʼö Heberaiʼo 10:24, 25, hana wa moguna sibai weʼamöi ba gangowuloa mendrua manö ba ginötö iadaʼa?

⁷ Si oföna, moguna böi tebulö ita ba woloʼö goi-goi Yehowa sanandrösa ba gamuata. Tebai taʼoʼö gamuata niha ba gulidanö daʼa. Duma-dumania, lö fao dödöda ba ngawalö soʼamakhaita ba wohorö simane fangowalu ba gotalua ira matua faoma ira matua mazui ira alawe faoma ira alawe, hegöi lala waʼauri homoseksual tanö böʼö. (Mat. 19:4, 5; Rom. 1:26, 27) Si dua, böi tebulö möi ita ba gangowuloa wefao khö ndra talifusöda, he nifalua ba Balai Mbanua Lowalangi, ba nomo-omo, mazui ba nahia si tobini. Gofu hadia zalua, böi taböhöli weʼamöi ba gangowuloa. Moguna möi ita ba gangowuloa ”mendrua manö me taʼila wa no ahatö ginötö andrö”.​—Baso Heberaiʼo 10:24, 25.

8. Hewisa wa tola manö dania faböʼö duria nifaʼemada?

⁸ Sagötö wamakao sabölö-bölö, tola manö dania faböʼö duria nifaʼemada. Iadaʼa, tafaʼema turia somuso dödö sanandrösa ba Wamatörö Lowalangi ba taforege ba wombaliʼö nifahaʼö Keriso. Hizaʼi, tola manö dania turia sabeʼe nifaʼemada. Iʼamaedolagö daʼö Sura Niʼamoniʼö simane teu esi segebua. (Fam. 16:21) Tola manö dania turia nifaʼemada yaʼia daʼö, wa ba zi lö ara tö tehori gulidanö nifatörö Zatana. Ba ginötönia dania, taʼila dania hadia nösi turia nifaʼemada ba hewisa lalada wamaʼema yaʼia. Tola manö lala niʼogunaʼöda ba wanuriaigö, simane si no taʼogunaʼö ba zi töra otu fakhe. Mazui, tola manö so lala tanö böʼö niʼogunaʼöda. Gofu hewisa lala niʼogunaʼöda, no töi sebua khöda ba wamaʼema turia wanguhuku moroi khö Yehowa!​—Hez. 2:3-5.

9. Hadia zi tola manö ifalua ngawalö soi ba ginötö tafaʼema duriada, hizaʼi hadia nifaduhusida tödö?

⁹ Tola manö dania börö duria nifaʼemada sameʼe ngawalö soi ba wombatogö halöwö fanuriaigöda sagötö faʼara. Tobali, moguna taʼodaligö Yehowa dania simane wangodaligöda yaʼia na möi ita manuriaigö iadaʼa. Faduhu dödöda wa hasambalö ibeʼe khöda Yehowa faʼabölö ba wamalua ohitö dödönia.​—Mi. 3:8.

10. Simane nifaʼeleʼö ba Luka 21:25-28, hewisa dödö niha sato sagötö wamakao sabölö-bölö?

¹⁰ Baso Luka 21:25-28. Sagötö wamakao sabölö-bölö, oi zara tokea niha wamaigi ngawalö zi tekiko, börö me lawalinga aro daʼö fefu sagötö faʼara. So khöra waʼaombö dödö ba ataʼu sibai ira na mate, börö me ngaluo daʼö dania ”baŵa waʼatosasa” si lö irai alua sandrohu waʼauri niha ba gulidanö. (Zef. 1:14, 15) Ba luo daʼö dania, basaki sibai waʼauri nono mbanua Yehowa. Börö me tenga tana niha gulidanö ita, tola manö tataögö ngawalö abula dödö. Tola manö lö hadöi ngawalö zoguna khöda.

11. (a) Na no tehori agama sofaya, hadia mbörö wa lafaigi-faigi sibai dania ndra Samaduhuʼö Yehowa ira niha sato hegöi ira sondröniaʼö ba gulidanö? (b) Hana wa moguna lö ataʼu ita sagötö wamakao sabölö-bölö?

¹¹ Alio ara, tola manö dania abao dödö agama si no tehori andrö, börö me lö labato nasa ira Samaduhuʼö Yehowa wamalua halöwöra ba wamati. Duma-dumania,  tola manö dania laʼogunaʼö media sosial ba wangoromaʼö faʼabao dödöra. Ngawalö soi hegöi samatörö yaʼira, Satana, fatuwu ira khöda börö me hatö agamada zi toröi. Lö sofozu ira ba wamakiko fefu agama ba gulidanö. Börö daʼö, lafaigi-faigi sibai ita dania. Laʼosaraʼö dödöra ngawalö soi, ba lahorigö waʼabölöra ba wanuwö nono mbanua Yehowa. Ba luo daʼö dania lafotöi ira Gogi moroi ba Magogi. * (Hez. 38:2, 14-16) Tola manö so khöda waʼataʼu na taʼangeragö hadia zalua sagötö wamakao sabölö-bölö, mendrua manö börö me lö taʼila sibai hadia manö zalua dania ba luo daʼö. Hizaʼi, moguna böi ataʼu ita. Ibeʼe khöda Yehowa fanuturu lala si tola mangorifi yaʼita. (Zin. 34:20) Ba ginötö daʼö dania ’mosindro ita ba tafaöga mbawada’ börö me aboto ba dödöda ’lö ara tö ginötö wangefaʼö yaʼita’. *

12. Hewisa ”zawuyu si lö faröi ba satua-tua” ba wamaʼanö yaʼita ba wanaögö ngawalö salua ba zi so miföna?

¹² No lafaʼanö ita ira ’sawuyu si lö faröi ba satua-tua’ enaʼö lö faröi sagötö wamakao sabölö-bölö. (Mat. 24:45) Ngawalö lala si no lafalua. Sambua duma-dumania, laʼogunaʼö kebaktian regional me döfi 2016-2018. Fefu kebaktian daʼa, tobali fanolo khöda ba wangokhögö mbua-bua soguna khöda me no itugu ahatö ngaluo Yehowa. Datatutunö mbua-bua andrö.

13. Hadia zinangea tafalua enaʼö itugö aro waʼalöfaröida khö Yehowa, ba hadia mbörö wa moguna tafalua daʼö iʼotarai iadaʼa?

¹³ Faʼalöfaröi: Tuho kebaktian regional me döfi 2016, yaʼia daʼö ”Böi Faröi khö Yehowa!” Ba kebaktian daʼa, ifahaʼö ita wa tola lö faröi ita khö Yehowa, na taʼokhögö wahuwusa saro khönia. Lafasugi ba dödöda wa tola ahatö ita khö Yehowa na lö tebulö tafahaʼö ita ba Daromalinia ba mangandrö ita soroi ba dödö. Na tafalua daʼö, tola tataögö gofu hadia ia zalua khöda. Börö me itugu ahatö wamakao sabölö-bölö, itugu tetandraigö waʼalöfaröida khö Lowalangi hegöi Famatörönia. Tola manö lö tebulö niha sato ba wangoʼaya yaʼita. (2 Fet. 3:3, 4) Tola alua daʼa, börö me lö tatuhini nifatörö Zatana si so ba gulidanö. Börö daʼö, moguna iʼotarai iadaʼa taʼaroʼö waʼalöfaröida khö Yehowa enaʼö lö faröi ita dania ba wamakao sabölö-bölö.

14. (a) Hadia manö waʼatebulö salua khö ndra talifusö sondröniaʼö ono mbanua Lowalangi ba gulidanö? (b) Hana wa moguna lö faröi ita sagötö wamakao sabölö-bölö?

¹⁴ Sagötö wamakao sabölö-bölö, fefu niha Keriso nibayoini si so ba gulidanö, teʼowuloi dania ba zorugo börö me fao ira dania ba wasuwöta Hamagedo. (Mat. 24:31; Fam. 2:26, 27) Ba luo daʼö, ira talifusöda nibayoini si tobali Boto Solohe, lö saʼae ladöniaʼö ono mbanua Lowalangi si so ba gulidanö. Hizaʼi, lö tebulö dania laʼorganisasi ngawawa sato. Ira talifusöda nituyu moroi ba mbiri-biri tanö böʼö, yaʼira dania sondröniaʼö ono mbanua Lowalangi. Moguna taforomaʼö waʼalöfaröida khö Yehowa na fao ita ba wotuhini ndra  talifusöda andre ba taʼoʼö wanuturu lala si no latema moroi khö Lowalangi. Na omasi teʼorifi ita, moguna taʼoʼö wanuturu lala nibeʼera!

15. Hadia zinangea tafalua enaʼö lö tebulö so khöda waʼanau gölö, ba hadia mbörö wa moguna tafalua ia iʼotarai iadaʼa?

¹⁵ Faʼanau gölö: Tuho kebaktian regional me döfi 2017 yaʼia daʼö ”Böi Awuwu!” Kebaktian daʼa sangaroʼö gangetulada, enaʼö itugu anau gölöda ba wanaögö ngawalö wanandraigö. Ifahaʼö ita wa na sindruhu-ndruhu taʼodaligö Yehowa, tola anau gölöda gofu hadia ia zalua khöda. (Rom. 12:12) Böi irai olifu ita hadia zi no ifabuʼu Yesu, ”Sanau ölö irugi gamozua daʼö niʼorifi.” (Mat. 24:13) Eluahania, moguna anau gölöda gofu hadia ia zalua khöda. Na anau gölöda ba wanaögö fanandraigö salua iadaʼa, tola itugu aro wamatida fatua lö tebörögö wamakao sabölö-bölö.

16. Hadia zameʼe khöda faʼabarani, ba hewisa wa tola itugu barani ita?

¹⁶ Faʼabarani: Tuho kebaktian regional me döfi 2018, yaʼia daʼö ”Böi Ataʼu!” Kebaktian daʼa samasugi ba dödöda, wa faʼabaranida lö teʼodaligö ba waʼabölöda samösa. Simane faʼanau gölö, tola taforomaʼö waʼabarani sindruhu na taʼodaligö Yehowa. Hadia zinangea tafalua enaʼö itugu taʼodaligö Yehowa? Moguna tabaso Daromalinia ero maʼökhö ba taʼangerönusi hewisa Yehowa ba wangorifi ono mbanuania me götö föna. (Zin. 68:21; 2 Fet. 2:9) Lasuwö ita dania ngawalö soi ba ginötö wamakao sabölö-bölö. Ba ginötö daʼö dania, moguna sibai taʼokhögö wamati saro hegöi faʼabarani, töra moroi ba zilalö. (Zin. 112:7, 8; Heb. 13:6) Na iʼotarai iadaʼa taʼodaligö Yehowa, tola tataögö dania si fao faʼabarani na isuwö ita Gogi. *

17. Hana wa moguna lö ataʼu ita na so Hamagedo? (Faigi gambara ba guli majalah.)

¹⁷ Simane nitutunö ba wamahaʼö si no aefa, ato ba gotaluada zi tumbu ba ngaluo safuria. So khöda wanötöna wa teʼorifi  ita ba wamakao sabölö-bölö. Teʼasiwai ngaluo safuria faoma Hamagedo sahöli-höli dödö. Hizaʼi, böi so khöda waʼataʼu. Hadia mbörö? Börö me Yehowa si fasuwö khöda. (Gamd. 1:33; Hez. 38:18-20; Zakh. 14:3) Ba ginötö ibeʼe Yehowa fareta, Yesu Keriso dania zondröniaʼö saradadu Lowalangi ba wasuwöta. Fao khö Yesu niha Keriso nibayoini si no möi ba zorugo hegöi ngafulu ribu ndra malaʼika. Fefu ira dania möi lasuwö Zatana, malaʼika si lö sökhi, hegöi saradadunia si so ba gulidanö.​—Dan. 12:1; Fam. 6:2; 17:14.

18. (a) Hadia zi no ifabuʼu Yehowa? (b) Hana wa tola faduhu dödöu ba niwaʼö Famaʼeleʼö 7:9, 13-17 sanandrösa ba zi so miföna?

¹⁸ No ifabuʼu Yehowa, ”Fefu wangöna, nibago ba wamakiko yaʼugö, ba si lö boto.” (Yes. 54:17) ”Teʼorifi moroi ba wamakao sabölö-bölö” dania ono mbanua Yehowa si lö faröi yaʼia daʼö ”ngawawa zato sibai”! Ba lö tebulö ira ba wamosumange Yehowa. (Baso Famaʼeleʼö 7:9, 13-17.) Na tabaso hadia zi no ifabuʼu ba Zura Niʼamoniʼö, tola faduhu dödöda wa hasambalö teʼorifi ita ba zi so miföna! Aboto ba dödöda wa ”irorogö Yehowa zi lö faröi andrö”. (Zin. 31:24) Ba zi so miföna, fefu niha sangomasiʼö hegöi sanuno Yehowa, hasambalö so khöra waʼomuso dödö börö me no muʼamoniʼö döi Yehowa.​—Hez. 38:23.

19. Hadia wanötöna sahöli-höli dödö si lö ara tö alua?

¹⁹ Khalaigö hadia niwaʼö ba 2 Timoteo 3:2-5 na ayati daʼö sanutunö gamuata niha ba gulidanö si bohou, si lö hadöi saʼae fondrönisi dödö moroi khö Zatana. (Faigi kotak ” Hewisa Gamuata Niha ba Gulidanö si Bohou?”) Imane dalifusöda George Gangas * si no irai tobali Boto Solohe, ”Ba zi so miföna, fefu niha ba zi sagörö ulidanö yaʼia daʼö talifusöda si sara lala wamati, salua ba daʼö tatu si möi faʼomuso dödöda! Ba zi lö ara tö, tebeʼe khömö ginötö si tohude auri ba gulidanö si bohou. Anau nosomö simane Yehowa. Auri ita sagötö faʼara.” Fanötöna daʼa no sahöli-höli dödö!