1. Hana wa no sinangea itema Yehowa fangalulu moroi khöda?

YEHOWA andrö Somböi yaʼita ba Sameʼe Faʼauri. Andrö, wa ha khönia manö mangalulu ita. (Fam. 4:11) Hizaʼi, so zinangea taʼangelamaisi. Hewaʼae taʼomasiʼö ba tafosumange Yehowa, tola manö abölö moguna ngawalö tanö böʼö irege tenga ha khö Yehowa saʼae mangalulu ita. Moguna aboto ba dödöda hana wa tola alua zimane daʼö. Hizaʼi, si oföna datatutunö hadia geluahania wa ha khö Yehowa mangalulu ita.

2. Moloʼö Mataiʼo 4:10, hadia zinangea tafalua na ha khö Yehowa mangalulu ita?

² Na ha khö Yehowa manö mangalulu ita, eluahania wa ha yaʼia nifosumangeda. Moloʼö Sura Niʼamoniʼö, niha sangalulu khö Lowalangi eluahania sindruhu-ndruhu iʼomasiʼö Lowalangi. Lö tatehegö gofu haniha manö mazui gofu hadia ia zamabali Yehowa ba dödöda.​—Baso Mataiʼo 4:10.

3. Hadia manö si tobali dane-dane khöda wa ha khö Yehowa manö mangalulu ita?

³ Oya dane-dane saro khöda irege wa ha khö Yehowa manö mangalulu ita. Omasi ita mangalulu ha khö Yehowa börö me no tafahaʼö ita sanandrösa khönia. Ahöli-höli dödöda ba gamuatania si sökhi. Aboto ba dödöda hadia zomasi ia hegöi si fatuwu ia, ba hadia nirasoida fagölö simane nirasoinia. Aboto ba dödöda gohitö dödönia ba niha gulidanö ba tatuhini daʼö. No sambua töi sebua khöda, börö me itehegö khöda tobali si fahuwu khönia. (Zin. 25:14) Fefu ngawalö nifahaʼöda sanandrösa ba Zomböi yaʼita, sameʼe yaʼita ahatö khönia.​—Yak. 4:8.

4. (a) Hadia niʼogunaʼö Gafökha enaʼö tenga ha khö Yehowa manö mangalulu ita? (b) Hadia nitutunöda ba wamahaʼö daʼa?

⁴ Samatörö ulidanö andre yaʼia daʼö Afökha. Iforege ba  wangogunaʼö ulidanö andre enaʼö taʼofönaiʼö zomasi-masi dödöda si toʼölö moroi ba gohitö dödö Yehowa. Iforege göi enaʼö abua khöda ba wotimbagö gisö-isö dödö si fasala. (Ef. 2:1-3; 1 Yoh. 5:19) Hadia gohitö dödönia? Omasi Gafökha enaʼö dua-dua dödöda, irege tenga ha khö Yehowa manö mangalulu ita. Datatutunö dombua lala niʼogunaʼönia. Si oföna, idönisi dödöda enaʼö tagohi waʼakayo. Si dua, ifarou ita enaʼö tafili hiburan si lö baga.

5. Hana wa moguna mangelama ita enaʼö lö tabörögö ba wangomasiʼö kefe?

⁵ Tatu omasi ita fefu na tebönökhi zoguna khöda, nukha hegöi nahia waʼatoröida si möi faʼohau-hau dödö. Hizaʼi, moguna sibai mangelama ita enaʼö lö taʼoʼö simane nifalua niha sato ba gulidanö andre, ”sangomasiʼö anaʼa” hegöi ngawalö hadia ia si tola muʼöli faoma kefe. (2 Tim. 3:2) Aboto ba dödö Yesu wa tola manö tedönisi dödö soloʼö khönia ba wangomasiʼö kefe. Imane Yesu, ”Tebai möi sawuyu zi darua zi samösa niha. Fatuwu ia khö zi samösa ba iʼomasi’ö zi samösa. Mazui, lö faröi ia khö zi samösa ba iʼaohasi ba dödö zi samösa. Tebai tobali ami sawuyu Lowalangi ba sawuyu Ganaʼa göi.” (Mat. 6:24) Na so samösa niha ifosumange Yehowa, hizaʼi ihorigö ginötönia hegöi faʼabölönia enaʼö tobali kayo, hulö no tobali ia sawuyu zi darua niha. Lö afönu fangalulunia khö Yehowa.

6. Hadia wamahaʼö nihalöda moroi ba wehede Yesu ba mbanua niha Keriso Laodikia?

⁶ Ba gangohorita abad siföföna M, lamane ira talifusö ba mbanua niha Keriso si so ba Laodikia, ”Kayo ndraʼo ba oya gokhötagu. Lö hadöi soʼamböta ndraʼo.” Hizaʼi, ba wamaigi Yehowa hegöi Yesu wa yaʼira andrö niha ’si tosasa, sabu tödö,  numana, auʼa ba lö nukha’. Iʼamenesi ira Yesu tenga börö me kayo ira, hizaʼi börö me abölö laʼomasiʼö waʼakayora irege tekiko gamakhaitara khö Yehowa. (Fam. 3:14-17) Na ibörögö aboto ba dödöda wa abölö taʼomasiʼö kefe, moguna taʼanemaiʼö tabulöʼö lala wangera-ngerada. (1 Tim. 6:7, 8) Na lö tafalua daʼö, tola dua-dua dödöda ba itimbagö famosumangeda Yehowa. Omasi Yehowa na taʼomasiʼö ia ’moroi siʼaikö ba dödöda’. (Mrk. 12:30) Hewisa wa kefe andrö tobali zabölö moguna ba waʼaurida?

7-9. Hadia wamahaʼö nihalöda moroi ba duma-duma zi samösa satua sokubaloi sotöi David?

⁷ Nehegö duma-duma David, samösa zatua sokubaloi sowölö-ölö ba Amerika Serikat. Itutunö wa me mböröta owölö-ölö sibai ia ba nahia wohalöwönia. Börö daʼö, tedou fakania ba nahia wohalöwönia. Lawaʼö nasa wa yaʼia samösa sohalöwö si sökhi ba soinia. Imane David, ”Me luo daʼö, uwalinga waʼamofozugu andrö no howu-howu moroi khö Yehowa.” Hizaʼi, hadia sindruhu daʼö?

⁸ Ibörögö aboto ba dödö David wa halöwönia möi famakiko gamakhaitania khö Yehowa. Imane, ”Ba ginötö so ndraʼo ba gangowuloa hegöi na möido manuriaigö, sasese uʼangeragö, yaʼia daʼö abula dödö salua ba nahia wohalöwögu. Ebua gazigu, hizaʼi itugu ara itugu fawuka wangera-ngeragu, ba ibörögö so abula dödö ba wongambatöma.”

⁹ Aboto ba dödö David wa moguna ifareso mangawuli hadia zabölö moguna ba waʼaurinia. Imane, ”Uhalö gangetula ba wombulöʼö zalua khögu.” Omasi David ba wombulöʼö inötö wohalöwönia, ba ifaʼema gangetula nihalönia andrö  khö gafalonia. Hadia mbuania? Laʼefasi David ba nahia wohalöwönia! Hadia nifaluania? Imane, ”Mahemolunia, uʼanemaiʼö ufasuraʼö döigu tobali perintis ekstra.” Enaʼö tebönökhi zoguna khöra, David hegöi foʼomonia labörögö lafalua halöwö wangehao. Aefa daʼö, ibörögö merintis biasa, ba gafuriata fao khönia woʼomonia merintis. Lahalö halöwö si lö eluaha ba wamaigi niha sato, hizaʼi tenga daʼö niʼofönaiʼöra ba waʼaurira. Hewaʼae gazira iadaʼa ha sambua niʼofulu moroi ba gazira me mböröta, no tobönö daʼö ba wombönökhi soguna khöra ero waŵa. Abölö laʼofönaiʼö Yehowa ba waʼaurira, ba sindruhu-ndruhu larasoi wa ibönökhi Yehowa zoguna ba niha sangofönaiʼö Famatörö Lowalangi.​—Mat. 6:31-33.

10. Hewisa lalada ba wondrorogö tödöda?

¹⁰ Gofu hawaʼebua gefe niʼokhögöda, moguna tarorogö tödöda. Hewisa lalania? Angelama enaʼö lö öʼomasiʼö faʼakayo. Ba böi tehegö halöwö nifaluamö, sabölö öʼofönaiʼö ba waʼaurimö moroi ba wangai halöwö khö Yehowa. Hewisa enaʼö tola öʼila hadia alua göi khöu zimane daʼö? Angeragö ösa wanofu-nofu daʼa: ’Ba ginötö so ndraʼo ba gangowuloa mazui na möi manuriaigö, hadia asese uʼangeragö sanandrösa ba halöwö? Hadia asese so khögu waʼaombö dödö na lö tebönökhi zoguna khögu ba zi so miföna? Hadia kefe mazui harato sangaʼasogö abula dödö ba wongambatögu? Hadia aoha gölögu wamalua halöwö side-ide mazui halöwö si lö eluaha ba wamaigi niha enaʼö itugu oya ginötögu ba wangai halöwö khö Yehowa?’ (1 Tim. 6:9-12) Ba ginötö öʼangeragö wanofu daʼö, törö tödömö wa iʼomasiʼö ita Yehowa ba no ifabuʼu ba niha sangalulu khönia, ”Lö manö uröi ndraʼugö ba lö uʼositengagö ndraʼugö.” Andrö wa isura Faulo, ”Böi miʼomasiʼö gefe.”​—Heb. 13:5, 6.

11. Hadia lua-lua hiburan ba zi samösa niha?

¹¹ Omasi Yehowa na owua-wua dödöda. Iwaʼö ba Daromali Lowalangi wa ”awai zi sökhi ba niha: femanga-manga ba famadu-madu hadia ia ba na iʼomusoiʼö dödönia ba wamakaonia andrö”. (Zango. 2:24) Sambua moroi ba gotalua si tola mameʼe omuso dödöda yaʼia daʼö hiburan. Hizaʼi ba gulidanö iadaʼa, oya hiburan si tola mondrönisi dödöda ba zi lö sökhi. Hiburan simane daʼö, tola ibörögö fao ba dödö  niha ba wamalua ngawalö zi fatuwu khö Yehowa ba labörögö laʼomasiʼö daʼö.

12. Moloʼö 1 Korindro 10:21, 22, hana wa moguna mangelama ita ba wamili hiburan?

¹² Na ha khö Yehowa manö mangalulu ita, lö manga ita ba ”meza Yehowa” hegöi ba ”meza malaʼika si lö sökhi”. (Baso 1 Korindro 10:21, 22.) Si toʼölönia, na fao ba wemanga zi samösa niha, daʼö dandra wa fahuwu ira. Na tafili hiburan sanuhini si lö sökhi, elemu, amuata wohorö, mazui amuata tanö böʼö hegöi gisö-isö dödö tanö böʼö si fasala, hulö omuso dödöda ba wemanga ö nifaʼanö nudu Lowalangi ba fao ita khöra ba wemanga. Lua-luania, no taʼalimagösi waʼaurida ba tekiko wahuwusada khö Lowalangi.

13-14. Moloʼö Yakobo 1:14, 15, hana wa moguna mangelama ita ba wamili hiburan? Beʼe duma-duma.

¹³ Hadia waʼafagölö hiburan hegöi ö? Ba ginötö manga ita, tola tafili hadia zinangea tabeʼe ba mbawada. Hizaʼi na no tatölö gö mege no, tebai tafili hadia lua-luania ba mbotoda. Na sökhi gö niʼada, lö alio göna ita fökhö. Ba na lö baga ö niʼada, tola mofökhö ita. Tola manö lö iʼanemaiʼö oroma lua-luania. Hizaʼi, arara manö dania, ba daʼö tola oroma ia.

¹⁴ Simane daʼö göi ba ginötö tafili hiburan, tola tafili hadia zinangea tabeʼe ba wangera-ngerada. Hizaʼi aefa daʼö, tebai tafatörö lua-lua hiburan nifilida ba wangera-ngerada hegöi tödöda. Hiburan si sökhi tola sökhi lua-luania ba waʼaurida, na hiburan si lö sökhi tola teʼala waʼaurida. (Baso Yakobo 1:14, 15.) Tola manö lö iʼanemaiʼö oroma hadia lua-lua hiburan si lö sökhi andrö khöda, hizaʼi arara manö hasambalö oroma ia. Börö daʼö, ifasugi ba dödöda Sura Niʼamoniʼö, ”Böi elungu ami. Lö ibeʼe niʼoʼaya ia Lowalangi. Hadia nitaru niha sa, daʼö göi nibasinia dania. Niha sanaru ba nösi, ba itema dania waʼatekiko ba nösinia.” (Gal. 6:7, 8) Moguna tatimbagö fefu hadia ia hiburan si möi faʼomuso dödö niha ba ngawalö niʼogorofi Yehowa!​—Zin. 97:10.

15. Hadia mbuala nibeʼe Yehowa khöda?

¹⁵ Ato nono mbanua Yehowa somasi wamaigi JW Broadcasting^®, si so ba stasiun TV Internetda. Imane samösa dalifusöda ira alawe sotöi Marilyn, ”Börö wanolo JW Broadcasting, itugu so khögu waʼomuso dödö. Ahori ufaigi fefu nösinia börö me sökhi lua-luania ba waʼaurigu. Ba ginötö ha yaʼo-yaʼo mazui ide-ide dödögu, ufaigi huhuo sebua mazui acara Ibadah Pagi si tobali fangabölöʼögu. Daʼa sangahatöʼö yaʼo khö Yehowa hegöi organisasinia. Fefu nifaʼanö ba JW Broadcasting sindruhu-ndruhu ibulöʼö waʼaurigu.” Hadia no öʼogunaʼö mbuala nibeʼe Yehowa? Tenga ha acara ero waŵa si so ba JW Broadcasting, oya sibai göi video, rekaman audio hegöi sinunö si möi fangabölöʼöda. Fefu daʼö tola lafaigi ba lafondrondrongo gofu hawaʼara manö.

16-17. Hana wa moguna tatatugöi hawaʼoya ginötö niʼogunaʼöda ba hiburan, ba hewisa wamaluada daʼö?

¹⁶ Tenga ha ba wamili ngawalö hiburan niʼangelamaisida, moguna göi tatatugöi hawaʼoya ginötö niʼogunaʼöda ba daʼö. Na lö tafalua daʼö, tola manö tahorigö ginötöda ba wamalua hiburan moroi na tafosumange Yehowa. Ato niha, abua khöra ba wotatugöi hawaʼoya ginötö niʼogunaʼöra ba hiburan. Imane samösa dalifusöda ira alawe sotöi Abigail, 18 fakhe ndröfinia, ”Na no oya halöwö nifaluagu ba zi maʼö-maʼökhö daʼö, si toʼölönia ulau modadao ba ufaigi TV. Hizaʼi, na lö mangelama  ndraʼo, tola manö uhorigö ginötö ba zi hauga za ba wamaigi TV.” Imane samösa dalifusöda ira matua si bohou ebua sotöi Samuel, ”Itaria, oya video sadogo-dogo nifaigigu. Ba wamobörö, ha sambua video nifaigigu, hizaʼi arörödo manö irege ahori ginötögu irugi tölu za mazui öfa za.”

¹⁷ Hewisa wotatugöimö hawaʼoya ginötö niʼogunaʼömö ba hiburan? Si oföna, moguna öʼila hawaʼoya ginötö niʼogunaʼömö ba wamalua daʼö. Tandraigö ba wanura ba garate nifaluamö ba zi samigu. Ösura hawaʼoya ginötö niʼogunaʼömö ba wamaigi TV, ba wamaigi Internet, hegöi famai game ba HP mazui tablet. Na örasoi wa no oya ginötö niʼogunaʼömö ba daʼö, tandraigö ba wamazökhi jadwal. Ofönaiʼö ba wotatugöi inötö sanandrösa ba ngawalö zabölö moguna, awena dania beʼe ginötömö ba hiburan. Aefa daʼö, andrö wanolo moroi khö Yehowa enaʼö lö tebulö ndraʼugö ba woloʼö jadwal daʼö. Na no öfalua daʼö, itugu oya ginötömö hegöi faʼabölömö ba wamalua famahaʼö samösa, famahaʼö zi sambua omo, feʼamöi ba gangowuloa hegöi fanuriaigö. Ba tola itugu omuso dödömö ba wangogunaʼö inötö ba wamalua hiburan, börö me no öʼofönaiʼö Yehowa ba waʼaurimö.

18-19. Hewisa wangoromaʼöda wa ha khö Yehowa mangalulu ita?

¹⁸ Imane Fetero me no aefa isura wa lö ara tö tehori gulidanö Satana, ba tohare ulidanö si bohou, ”Yaʼami ira talifusö niʼomasiʼö, börö me midöna-döna daʼa, miforege enaʼö lö mosinegu ami föna Lowalangi, lö taʼunö, ba sökhi wahuwusami khönia.” (2 Fet. 3:14) Na taʼoʼö mene-mene daʼö ba taforege enaʼö lala waʼaurida hegöi famosumangeda tefaudu ba zomasi Yehowa, no taforomaʼö wa ha khö Yehowa mangalulu ita.

¹⁹ Lö tebulö Zatana hegöi ulidanönia ba wondrönisi yaʼita, enaʼö abölö taʼofönaiʼö ngawalö tanö böʼö moroi na khö Yehowa. (Luk. 4:13) Hizaʼi, gofu hadia manö wanandraigö nitaögöda, lö tatehegö gofu haniha manö mazui gofu hadia ia zamabali Yehowa ba dödöda. Datahalö gangetula ba wameʼe khö Yehowa hadia zinangea itema moroi khöda, yaʼia daʼö fangaluluda soroi ba dödö!