SAMÖSA niha samaigi-maigi cuaca inehegö gambara moroi ba satelit. Iʼila wa so nangi sabölö-bölö sibai numalö ba nahia zato niha. Börö me ataʼu ia na mate niha, iforege ba wangelama yaʼira fatua so ginötö.

Simane daʼö göi Yehowa, iadaʼa ifangelama niha sanandrösa ba zi sambua ”nangi sabölö-bölö” töra moroi ba nangi sabölö-bölö si no irai tarongo ba ramalan cuaca. Hewisa wamalua Yehowa? Ba hadia mbörö wa tola faduhu dödöda wa no tobönö ginötö nibeʼe Yehowa ba niha samalalini era-erara? Fatua lö tabeʼe wanema li moroi ba zi nofu-nofu andre, datatutunö ösa wamangelama si no irai ibeʼe Yehowa ba götö föna.

Ba götö Zura Niʼamoniʼö, no ihenaigö Yehowa ba wameʼe fangelama fatua lö ibeʼe ngawalö ”nangi sabölö-bölö”, mazui fanguhuku ba niha si lö moloʼö khönia. (Gamd. 10:25; Yer. 30:23) Ero ifangelama niha, lö tebulö ia ba wameʼe ginötö si tobönö enaʼö tola lafalalini gera-erara ba moloʼö ira khönia. Ba ifatunö göi khöra hadia zinangea lafalua. (2 Raz. 17:12-15; Neh. 9:29, 30) Enaʼö terou dödöra ba wamalalini gera-erara, asese iʼogunaʼö enoninia si lö faröi Yehowa si so ba gulidanö ba wangombakha fanguhukunia, ba itolo ira enaʼö aboto ba dödöra wa moguna laʼanemaiʼö lafalalini gera-erara.​—Gamo. 3:7.

Samösa moroi ba gotalua niha niʼogunaʼö Lowalangi ba wangombakha fanguhukunia yaʼia daʼö Noakhi. Lö sökhi ba afaito sibai niha ba götö Noakhi. Ba zi hauga fakhe, lö ataʼu Noakhi ba wangelama yaʼira sanandrösa ba Molö Sabölö-bölö salua ba zi sagörö ulidanö. (1 Moz. 6:9-13, 17) Ba ifatunö göi khöra hadia zinangea lafalua enaʼö tola teʼorifi ira. Börö me lö tebulö Noakhi ba wangombakha daʼa ba niha, ifotöi ia Sura Niʼamoniʼö ”sanuriaigö sindruhu”.​—2 Fet. 2:5.

Hewaʼae no iforege Noakhi, lö omasi niha wamondrongo turia si otarai khö Lowalangi. Daʼa zangoromaʼö wa lö mamati ira. Lua-luania me ”alua Molö Sabölö-bölö ba ahori ira fefu”. (Mat. 24:39; Heb. 11:7) Me alua daʼö, tebai latahigö Lowalangi ba tebai laböbögö khönia wa lö nifangelamania ira.

Itaria, lö ara fatua lö ifalua ”nangi sabölö-bölö” wanguhukunia, ihenaigö ibeʼe Yehowa wamangelama ba niha. Hewaʼae simanö, lö tebulö ia ba wameʼe khöra ginötö enaʼö tola lafalalini gera-erara. Duma-dumania, me ibeʼe Yehowa Fulu Ngawalö Wamakao ba Miserai, lö tebulö Yehowa ba wameʼe khöra wamangelama. Sambua moroi ba gotaluania yaʼia daʼö ifatenge Moze hegöi Aʼaroni Yehowa ba wamangelama Faraʼo hegöi ngoni-ngoninia sanandrösa ba wamakao si fitu, yaʼia daʼö teu kara. Sahari fatua lö salua teu kara, no ifangelama ira Yehowa. Tobali, hadia lö tobönö khöra ginötö ba wangalui nahia wolumöʼö? Imane Sura Niʼamoniʼö, ”Ba ha niha zangataʼufi, ngoni-ngoni Waraʼo andrö, me idaöʼö-daöʼö Yehowa, ba iʼoloiʼö yomo zawuyunia ba urifönia. Ba si lö ba dödö wametaʼu Yehowa yaʼira, ba lö ibulöʼö baero zawuyunia ba urifönia.” (2 Moz. 9:18-21) Oroma wa tobönö ginötö nibeʼe Yehowa khöra irege niha soloʼö niwaʼönia lö göna ira famakao andrö.

Ifangelama Yehowa göi Faraʼo hegöi ngoni-ngoninia fatua lö ibeʼe wamakao si fulu. Hizaʼi, lö labeʼe ba dödöra wamangelama andrö. (2 Moz. 4:22, 23) Lua-luania, mate ziaʼa nono matua khöra. Daʼö no abula dödö sebua! (2 Moz. 11:4-10; 12:29) Hadia tobönö ginötö si no labeʼe khöra ba woloʼö fangelama andrö? Tobönö! Iʼanemaiʼö ifangelama ndraono Gizaraʼeli  Moze sanandrösa ba wamakao si fulu ba ifatunö khöra hadia zinangea lafalua enaʼö teʼorifi nösi nomora. (2 Moz. 12:21-28) Hadauga niha samondrongo wamangelama si no labeʼe? So mato tölu zuta niha, farahu ba daʼö iraono Gizaraʼeli, ba ”ato göi zi fao khöra niha [böʼö]” hegöi niha Miserai si teʼorifi moroi ba wanguhuku Yehowa ba laröi danö Miserai.​—2 Moz. 12:38.

Duma-duma moroi yawa sangoromaʼö wa tobönö ginötö nibeʼe Yehowa ba niha ba woloʼö famangelama nibeʼenia. (5 Moz. 32:4) Hadia zamarou dödö Yehowa ba wamalua daʼö? Itutunö Fetero wa lö omasi Yehowa ”na tefakiko fazamösa. Omasi ia enaʼö dozi lafalalini gera-erara”. (2 Fet. 3:9) Sindruhu sa wa iʼameʼegö tödö fefu niha Lowalangi. Omasi ia na lafalalini gera-erara ba labulöʼö ira fatua lö alua wanguhukunia.​—Yes. 48:17, 18; Rom. 2:4.

Iadaʼa, moguna ba niha ba woloʼö famangelama nifaʼema ba zi sagörö ulidanö. Me so Yesu ba gulidanö, no ifangelama wa ulidanö iadaʼa hasambalö tefakiko dania sagötö ”wamakao sabölö-bölö”. (Mat. 24:21) Izara-zara Yesu ba wanutunö sanandrösa ba ngawalö niʼila hegöi salua khö zoloʼö khönia ba ginötö itugu ahatö gamozua andrö. Iadaʼa, no taʼila ngawalö nifaʼeleʼö Yesu salua ba zi sagörö ulidanö.​—Mat. 24:3-12; Luk. 21:10-13.

Simane si no ifaʼeleʼö Yesu, ifarou dödö niha iadaʼa Yehowa ba wamosumange hegöi ba woloʼö yaʼia. Omasi ia na niha soloʼö khönia latema waʼauri fondrege zi sökhi iadaʼa, ba latema howu-howu ba zi so miföna ba gulidanö si bohou si no ifabuʼu. (2 Fet. 3:13) Enaʼö mamati niha ba nifabuʼu Yehowa ba teʼorifi ira, ifatunö khöra Yehowa ’turia somuso dödö sanandrösa ba Wamatörö Lowalangi’. Simane si no ifaʼeleʼö Yesu, turia somuso dödö andre ’teturiaigö ba zi sagörö ulidanö misa, tobali famaduhuʼö ba ngawalö soi’. (Mat. 24:14) No itolo nono mbanuania Lowalangi ba ’wamaduhuʼö’, mazui ba wanuriaigö turia moroi khö Lowalangi, ba no tefalua daʼa mato 240 soi. Omasi Yehowa enaʼö itugu ato niha somasi wamondrongo fangelama nibeʼenia ba tola teʼorifi ira moroi ba ”nangi sabölö-bölö” fanguhuku satulö khönia si lö ara tö alua.​—Zef. 1:14, 15; 2:2, 3.

Moroi ba daʼa oroma wa lö tebulö Yehowa ba wameʼe ginötö si tobönö ba niha ba woloʼö famangelama nibeʼenia. Hizaʼi, iadaʼa so sambua wanofu sabölö moguna: Hadia omasi niha ba woloʼö famangelama nibeʼe Lowalangi fatua so ginötö? Fefu ita samaʼema turia moroi khö Lowalangi enaʼö lö taböhöli ba wanolo niha, enaʼö itugu ato niha si teʼorifi moroi ba waʼatekiko gulidanö andre.