1. Hana wa faduhu dödöda wa no auri ita ba ”ngaluo safuria”?

HADIA me no aefa ndröfi 1914 awena tumbu ndraʼugö? Na yaʼia, eluahania me iʼotarai tumbu no so ndraʼugö ba ”ngaluo safuria”. (2 Tim. 3:1) No ifaʼeleʼö Yesu ngawalö salua sagötö ngaluo safuria. Duma-dumania, fasuwöta, lofo sabölö-bölö, duru danö, ngawalö wökhö, sanawö huku, ba lafakao nono mbanua Yehowa. Fefu ita no irai tarongo daʼö. (Mat. 24:3, 7-9, 12; Luk. 21:10-12) No taʼila göi hewisa gamuata niha iadaʼa, simane si no ifaʼeleʼö Waulo. (Faigi kotak ” Hewisa Gamuata Niha Iadaʼa?”) Yaʼita samosumange Yehowa, faduhu dödöda wa no auri ita ”ba götö safuria”.​—Mi. 4:1.

2. Hadia manö wanofu-nofu nibeʼeda wanema li?

² Börö me no ara sibai numalö ginötö iʼotarai 1914, aboto ba dödöda wa no auri ita ba gamozua ”ngaluo safuria”. Börö me no itugu ahatö gamozua götö danö, moguna taʼila wanema li moroi ba wanofu-nofu daʼa: Hadia manö zalua sagötö amozua ”ngaluo safuria”? Ba sagötö wombaloida salua andrö, hadia zomasi Yehowa tafalua?

3. Moloʼö zi no ifaʼeleʼö ba 1 Tesalonika 5:1-3, hadia gangombakhata nibeʼe ngawalö soi?

³ Baso 1 Tesalonika 5:1-3. Itutunö Faulo sanandrösa ba ”ngaluo Yehowa”. Ba ayati daʼa, tebörögö ”ngaluo Yehowa” ba ginötö tefakiko ”Babilona Sebua”, yaʼia daʼö fefu agama sofaya ba zi sagörö ulidanö, ba amozuania dania Hamagedo. (Fam. 16:14, 16; 17:5) Fatua lö mubörögö ”ngaluo” daʼö, so dania angombakhata moroi ba ngawalö soi, ”No atulö, no ahono!” Itaria laʼogunaʼö ngawua wehede daʼa ira sondröniaʼö ba gulidanö ba ginötö fahuhuo ira sanandrösa ba wondrouʼö hegöi ba wondrorogö amakhaita ba gotalua soi,  hegöi hadia manö zinangea lafalua ba zi so miföna. * Hizaʼi, faböʼö gangombakhata ”no atulö, no ahono” nitutunö ba Zura Niʼamoniʼö. Hadia mbörö? Ba ginötö alua daʼa, tola manö so ba wangera-ngera niha wa no mofozu ira sondröniaʼö ba gulidanö ba wombaliʼö ulidanö nahia faʼahono dödö. Hizaʼi sindruhunia, ibörögö alua ”wamakao sabölö-bölö” ba ”izumaigö ikhamö ira faʼatekiko”.​—Mat. 24:21.

4. (a) Hadia nasa zi lö aboto ba dödöda sanandrösa ba gangombakhata ”no atulö, no ahono”? (b) Hadia manö zi no aboto ba dödöda ba gangombakhata daʼö?

⁴ So ösa niʼilada sanandrösa ba gangombakhata ”no atulö, no ahono”. Hizaʼi, so danö böʼö nasa si lö aboto ba dödöda. Lö aboto ba dödöda hadia mbörö wa lafaʼema gangombakhata daʼö ira sondröniaʼö ba gulidanö, mazui simane hewisa dania gangombakhatania. Ba lö göi aboto ba dödöda hadia ha sambua gangombakhata mazui mato hauga ngawua gangombakhata daʼö. Gofu hadia zalua, tebai lafaelungu ita. Aboto ba dödöda wa tebai laʼasogö ira samatörö faʼatulö ba gulidanö. No ifangelama ita Sura Niʼamoniʼö sanandrösa ba gangombakhata andrö. Daʼö zi tobali tandra wa lö ara tö tebörögö ”ngaluo Yehowa”!

5. Moloʼö 1 Tesalonika 5:4-6, hadia zinangea tafalua enaʼö tefaʼanö ita ba ”ngaluo Yehowa”?

⁵ Baso 1 Tesalonika 5:4-6. Ifatunö khöda Waulo hadia zinangea tafalua enaʼö tefaʼanö ita ba ginötö ”ngaluo Yehowa”. Moguna ”böi mörö ita simane tanö böʼö”. Hizaʼi, moguna ”maoso ita”. Duma-dumania, moguna mangelama ita enaʼö lö ebua dödö zambuana ba politik mazui lö fao ita ba daʼö. Na farahu ita ba daʼö, no ’moroi ba gulidanö ita’. (Yoh. 15:19) Aboto ba dödöda wa ha Famatörö Lowalangi si tola mangaʼasogö faʼatulö ba gulidanö.

6. Hadia zinangea tafalua ba wanolo niha böʼö, ba hadia mbörö?

⁶ Tenga ha wemaoso manö nifaluada, omasi göi ita ba wanolo niha böʼö enaʼö laʼila hadia nifaʼeleʼö Zura Niʼamoniʼö sanandrösa ba zalua ba gulidanö. Böi olifu ita, na tebörögö alua wamakao sabölö-bölö, lö hadöi saʼae tebeʼe ginötö ba niha ba wangoʼawögö Yehowa. Andrö wa moguna sibai taʼogunaʼö ginötö si so, ba wamalua halöwö fanuriaigö! *

7. Hadia zomasi Yehowa tafalua iadaʼa?

⁷ Börö me hatö maʼifu tö ginötö tebörögö ”ngaluo” Yehowa, omasi ia enaʼö owölö-ölö ita ba wanuriaigö. Andrö moguna enaʼö ’owölö-ölö ita ba wangai halöwö Lowalangi’. (1 Kor. 15:58) No ifaʼeleʼö Yesu hadia manö zinangea tafalua. Me fahuhuo ia sanandrösa ba dandra ngaluo safuria, imane nasa, ”Hasambalö teturiaigö duria  somuso dödö ba ngawalö soi.” (Mrk. 13:4, 8, 10; Mat. 24:14) Angeragö atö: Ero möiʼö manuriaigö, no fao ndraʼugö ba wamalua hadia zi no ifaʼeleʼö Sura Niʼamoniʼö!

8. Hezo tola taʼila wa itugu tedou halöwö fanuriaigö?

⁸ Hadia zangoromaʼö wa itugu tedou halöwö fanuriaigö? Ero röfi, ato niha samondrongo turia somuso dödö sanandrösa ba Wamatörö Lowalangi. Duma-dumania, angeragö wa itugu monönö waʼato ndra sanuriaigö ba zi sagörö ulidanö sagötö ngaluo safuria. Me 1914, so 5.155 sanuriaigö ba zi 43 soi. Iadaʼa so mato 8,5 zuta sanuriaigö ba zi 240 soi! Hewaʼae simanö, lö nasa sawai halöwöda. Moguna lö tebulö ita ba wanutunö ba niha, wa ha Famatörö Lowalangi si tola mangeheta fefu gabula dödö niha.​—Zin. 145:11-13.

9. Hana wa moguna böi taböhöli ba wanuriaigö Famatörö Lowalangi?

⁹ Lö taböhöli wamalua halöwö fanuriaigö, irugi iwaʼö Yehowa lö tafalua saʼae halöwö andrö. Hawaʼoya tö ginötö si toröi ba niha enaʼö aboto ba dödöra Yehowa hegöi Yesu Keriso? (Yoh. 17:3) Lö taʼila. Hizaʼi, fatua lö tebörögö wamakao sabölö-bölö, tebeʼe nasa ginötö ba niha ”somasi manöndra faʼauri si lö aetu” ba wanemaʼö turia somuso dödö ba tobali samosumange Yehowa. (Hal. 13:48) Hewisa wanoloda yaʼira fatua so ginötö?

10. Hadia wanolo si no ibeʼe khöda Yehowa enaʼö tola tafahaʼö niha ba zindruhu?

¹⁰ Iʼogunaʼö organisasinia Yehowa ba wameʼe khöda ngawalö zoguna ba wamahaʼö niha ba zindruhu. Duma-dumania, ero migu tatemaʼö wamomaha ba gangowuloa barö migu. Ba gangowuloa daʼa, lafahaʼö ita ba wamalua halöwö fanuriaigö hegöi na tafuli tafalukhaisi ira. Lafahaʼö göi ita hewisa lalada ba wamahaʼö niha ba Zura Niʼamoniʼö. No ihenaigö göi organisasi Yehowa Fakake Niʼogunaʼöda ba Wamahaʼö. Daʼa zi tobali fanolo khöda  . . .

• ba wamörögö fahuhuosa,

• adöni dödö niha ba duria nifaʼemada,

• ba wamarou dödö niha enaʼö itugu oya laʼila sanandrösa ba Zura Niʼamoniʼö,

• ba wamahaʼö zindruhu ba ginötö tafahaʼö niha ba Zura Niʼamoniʼö, hegöi ba

• ba wokaoni niha sadöni tödö ba wamaigi situs Webda hegöi ba weʼamöi ba Balai Mbanua Lowalangi khöda.

 Tatu manö lö tobönö ha ba wangokhögö fakake daʼa. Moguna taʼogunaʼö ia. * Duma-dumania, na fahuhuo ndraʼugö ba niha sadöni tödö. Na öbeʼe khönia risalah mazui majalah, tola ibaso-baso daʼö irugi öfalukhaisi ia mangawuli. Fefu ita moguna taʼonorogö tödö enaʼö owölö-ölö ba wanuriaigö ero waŵa.

11. Hana wa mufazökhi Pelajaran Alkitab Online?

¹¹ Lala tanö böʼö niʼogunaʼö Yehowa ba wanolo niha böʼö enaʼö laʼila zindruhu, yaʼia daʼö Pelajaran Alkitab Online si so ba jw.org^®. * Hana wa mufazökhi wamahaʼö daʼa? Ero waŵa, so ngafulu ribu niha ba zi sagörö ulidanö sangalui ba Internet famahaʼö ba Zura Niʼamoniʼö. Famahaʼö si so ba situs Webda tobali fanolo ba niha wamörögö famahaʼö sanandrösa ba zindruhu si so ba Daromali Lowalangi. Aefa daʼö, niha nifalukhaisida ba wanuriaigö tola manö lö iʼanemaiʼö omasi ia na tafahaʼö ba Zura Niʼamoniʼö. Na daʼö zalua, tola taforomaʼö khöra fitur daʼa si so ba situs Webda mazui takirim khöra link-nia.

12. Hadia manö si tola ifahaʼö zi samösa niha moroi ba Pelajaran Alkitab Online?

¹² Ba Pelajaran Alkitab Online, itutunö sanandrösa ba duho-tuho: ”Alkitab dan Pengarangnya”, ”Tokoh-Tokoh Utama dalam Alkitab”, hegöi ”Harapan yang Dijanjikan dalam Alkitab”. Ba ginötö ifahaʼö ia si samösa niha ba duho-tuho daʼa, aboto ba dödönia:

• Hewisa Zura Niʼamoniʼö ba wanolo si samösa niha

• Haniha Yehowa, Yesu, hegöi ira malaʼika

• Hana wa iwöwöi niha Lowalangi

• Hana wa so wamakao hegöi faʼalösökhi

Ba wamahaʼö daʼö göi itutunö hewisa dania Yehowa . . .

• ba wangeheta famakao hegöi faʼamate,

• ba wanusugi niha si no mate, hegöi

• ba wangeheta famatörö niha gulidanö si lö sökhi ba tefalalini faoma Wamatörö Lowalangi.

13. Hadia tola mugati famahaʼö ba Zura Niʼamoniʼö nidöniaʼö zi samösa niha faoma famahaʼö online? Tutunö.

¹³ Famahaʼö ba Zura Niʼamoniʼö nidöniaʼö samösa Samaduhuʼö Yehowa, tebai mugati faoma famahaʼö online. No ibeʼe khöda Yesu halöwö ba wombaliʼö nifahaʼö ba no töi sebua daʼa khöda. Tatötöna enaʼö adöni dödö niha ba wamokai famahaʼö online, laʼomasiʼö hadia zi no lafahaʼö yaʼira, ba omasi ira enaʼö itugu oya niʼilara. Na alua daʼö, tola manö omasi ira ba wanemaʼö famahaʼö Zura Niʼamoniʼö. Ero gangohorita ba wamahaʼö online, tebeʼe khöra ginötö na omasi laʼandrö famahaʼö ba Zura Niʼamoniʼö nidöniaʼö zi samösa niha. Ero maʼökhö, töra 230 niha sangandrö simane daʼö ba zi sagörö ulidanö! Famahaʼö ba Zura Niʼamoniʼö nidöniaʼö zi samösa niha moguna sibai!

14. Moloʼö fareta Yesu ba Mataiʼo 28:19, 20, hadia zinangea taforege, ba hadia mbörö?

¹⁴ Baso Mataiʼo 28:19, 20. Ba ginötö tafahaʼö niha ba Zura Niʼamoniʼö, moguna taʼodödögö ba ’wombaliʼö nifahaʼö tafahaʼö ira ba woloʼö fefu niwaʼö Yesu’. Moguna tatolo niha enaʼö aboto ba dödöra, wa moguna laʼoʼawögö Yehowa ba latuhini Wamatörönia. Eluahania, moguna tafarou dödöra enaʼö laʼaurifagö ba waʼaurira hadia zi no  lafahaʼö yaʼira, lalulu waʼaurira khö Yehowa, ba labayagö ira idanö. Na lafalua daʼö, tola teʼorifi ira ba ngaluo Yehowa.​—1 Fet. 3:21.

15. Hadia zi tebai tafalua enaʼö lö ahori ginötöda, ba hadia mbörö?

¹⁵ Simane nitutunö ba wamobörö, lö oya tö ginötöda börö ba zi lö ara tö tehori ulidanö andre. Börö daʼö, lö omasi tahorigö ginötöda ba wamahaʼö niha ba Zura Niʼamoniʼö, si lö omasi tobali samosumange Yehowa. (1 Kor. 9:26) Mangaösö sibai halöwö nifaluada! Ato niha nasa sinangea mamondrongo turia Wamatörö Lowalangi fatua so ginötö.

16. Moloʼö Famaʼeleʼö 18:2, 4, 5, 8, hadia zinangea tafalua? (Faigi göi nisura ba gahe zura.)

¹⁶ Baso Famaʼeleʼö 18:2, 4, 5, 8. Ba ayati daʼa itutunö hadia zomasi Yehowa enaʼö lafalua ono mbanuania. Niha Keriso sindruhu moguna lö raʼiö ira ba lö fao ba Babilona Sebua. Fatua lö ifahaʼö ia si samösa niha ba Zura Niʼamoniʼö, tola manö no farahu ia mege ba agama sofaya, ba fao ia ba lala halöwö nifalua ba agama andrö. Mazui ibeʼe dolo-tolonia ba agama daʼö. Fatua lö tobali ia sanuriaigö si lö mubayagö idanö, moguna ba niha nifahaʼö ba Zura Niʼamoniʼö enaʼö iröi fefu soʼamakhaita ba agama sofaya. Moguna ibeʼe zura ba gerejania ba sindruhu-ndruhu iʼetuʼö gamakhaitania ba gereja daʼö mazui ba organisasi tanö böʼö si farahu ba Mbabilona Sebua. *

17. Hadia manö halöwö zinangea nitimbagö niha Keriso, ba hadia mbörö?

¹⁷ Moguna ba niha Keriso sindruhu enaʼö halöwö nifaluania lö moʼamakhaita ba Babilona Sebua. (2 Kor. 6:14-17) Duma-dumania, lö omasi ita mohalöwö tobali sohalöwö ba gereja. Aefa daʼö, na mohalöwö ita ba niha, lö omasi ita mohalöwö ba nahia niʼogunaʼö soʼamakhaita ba agama sofaya. Ba na taʼokhögö bisnis samösa, lö omasi ita ba wanöndra proyek mazui tatema halöwö soʼamakhaita ba Babilona Sebua. Hana wa tebai tafalua daʼö? Börö me lö omasi ita fao ba wotuhini Babilona Sebua, si no raʼiö föna Lowalangi börö me tafaduhuʼö agama sofaya ba talawa fareta Lowalangi.​—Yes. 52:11. *

18. Hewisa zi samösa dalifusöda ba woloʼönia goi-goi Zura Niʼamoniʼö sanandrösa ba halöwö?

 ¹⁸ Ba zi hauga fakhe silalö, so samösa zatua sokubaloi sangokhögö halöwö tobali tuka geu. Ba iʼandrö khönia samösa kontraktor ba wangehaogö gereja si so ba mbanua dalifusöda andrö. Aboto ba dödö kontraktor wa talifusöda daʼö asese iwaʼö wa lö itema halöwö soguna ba gereja. Hizaʼi sakali daʼa, lö iʼila kontraktor haʼökhö nasa iʼandrö tolo. Hewaʼae simane, lö tebulö dalifusöda andrö ba woloʼö goi-goi Zura Niʼamoniʼö ba itimbagö halöwö daʼö. Samigu aefa daʼö, so koran moroi ba mbanua daʼö sangoromaʼö koda niha si fatuka tanö böʼö, samasa röfa ba gosali. Na lö iʼoʼö dalifusöda goi-goi Zura Niʼamoniʼö, tatu kodania soroma ba koran. Khalaigö na alua daʼö, tola tekiko döinia ba gotalua ndra talifusö si sara lala wamati khönia! Khalaigö göi hewisa dödö Yehowa.

19-20. (a) Hadia manö wamahaʼö si no taʼila iadaʼa? (b) Hadia nasa zinangea taʼila?

¹⁹ Moloʼö nifaʼeleʼö Zura Niʼamoniʼö, lö ara tö alua dania angombakhata moroi khö ndra sondröniaʼö ba gulidanö sangumaʼö ”no atulö, no ahono”. Börö me no ifahaʼö ita Yehowa, aboto ba dödöda wa lö mofozu ngawalö soi ba wangaʼasogö faʼatulö ba gulidanö. Hadia zinangea tafalua fatua lö alua gangombakhata daʼö hegöi faʼatekiko ba zi lö mudöna-döna? Iʼandrö khöda Yehowa enaʼö owölö-ölö ita ba wanuriaigö Famatörö Lowalangi ba taforege ba wombaliʼö nifahaʼö. Aefa daʼö, moguna tatimbagö fefu zoʼamakhaita ba agama sofaya. Eluahania, lö omasi ita tobali nono mbanua Babilona sebua ba lö tafalua halöwö soʼamakhaita ba daʼö.

²⁰ So danö böʼö nasa zalua sagötö amozua ”ngaluo safuria”. Ba so göi niʼandrö Yehowa khöda enaʼö tafalua. Hadia manö daʼö, ba hewisa wamaʼanöda yaʼita börö me lö ara tö alua daʼö? Tatutunö ia ba wamahaʼö fönada.