1. Hewisa wa tola möi fanoloda 2 Korindro 3:1-3, enaʼö aboto ba dödöda wa no töi si sökhi na tola tatolo zi samösa niha irege tebayagö idanö? (Faigi gambara ba guli majalah.)

HEWISA dödöu na tebayagö idanö niha nifahaʼö ba Zura Niʼamoniʼö si farahu ba mbanua niha Keriso si so yaʼugö? Tatu omuso dödömö. (Mat. 28:19) Tobali, na yaʼugö zondröniaʼö famahaʼö ba Zura Niʼamoniʼö khönia, hasambalö owua-wua sibai dödömö ba ginötö tebayagö ia idanö! (1 Tes. 2:19, 20) Tola tedou ia ba wamati ba tebayagö idanö börö me no öforege ba wanolo yaʼia, ba lafalua göi zimane daʼö ira talifusöda ba mbanua niha Keriso. Börö daʼö, na tebayagö idanö zi samösa nifahaʼö, tola mufotöi ia ’sura wanuno’ khö zamahaʼö yaʼia hegöi ba mbanua niha Keriso.​—Baso 2 Korindro 3:1-3.

2. (a) Hadia wanofu si tohude sinangea taʼangeragö, ba hadia mbörö? (b) Hadia wamahaʼö ba Zura Niʼamoniʼö andrö? (Faigi nisura ba gahe zura.)

² Barö zi öfa fakhe andre, so mato 10.000.000 wamahaʼö ba Zura Niʼamoniʼö * nifalua ba zi sagörö ulidanö, si no musura ba laporan dinas ero waŵa. Baero daʼö, so mato 280.000 niha nibayagö idanö ero röfi. Börö me so nasa niha tanö böʼö nifahaʼö ba Zura Niʼamoniʼö si zuta faʼato, hewisa lalada ba wanolo yaʼira enaʼö tebayagö idanö? Ibeʼe nasa ginötö ba niha Yehowa enaʼö tola tobali ira nifahaʼö Keriso. Börö daʼö, tafalua zabölö sökhi ba wanolo niha nifahaʼö ba Zura Niʼamoniʼö enaʼö itugu tedou ira ba wamati, ba tebayagö ira idanö ba waʼalio. No arakhagö ahori  ginötö ba wamalua daʼö!​—1 Kor. 7:29a; 1 Fet. 4:7.

3. Hadia nitutunöda ba artikel daʼa?

³ Aboto ba dödö ndra Boto Solohe wa mangaösö sibai halöwö ba wombaliʼö nifahaʼö. Börö daʼö, laʼandrö mbua gera-era moroi ba gödo ndraha irege tola laʼila hewisa lala enaʼö itugu ato niha nifahaʼö ba Zura Niʼamoniʼö si tola tatolo ba tebayagö idanö. Ba artikel andre hegöi ba artikel aefa daʼa, tatutunö mbua gera-era moroi khö ndra perintis, utusan injil, hegöi satua samasui si so ba ngawalö soi. * (Gamd. 11:14; 15:22) Ira sanuriaigö si no ara mamalua halöwö ba wamati andre, latutunö hadia manö zinangea lafalua ira samahaʼö Sura Niʼamoniʼö hegöi niha nifahaʼöra, enaʼö tola mofozu wamahaʼö nifaluara. Ba artikel daʼa, tatutunö lima ngawalö zinangea ifalua niha nifahaʼö enaʼö itugu tedou ia ba wamati ba tebayagö idanö, hegöi lala sinangea tafalua ba wanolo yaʼia.

4. Hana wa lö obönö na ha maʼifu ginötö niʼogunaʼö ba wamalua famahaʼö ba Zura Niʼamoniʼö?

⁴ Ato ndra talifusöda sondröniaʼö famahaʼö ba Zura Niʼamoniʼö föna mbawandruhö zokhö omo. Sindruhu sa, tola muʼogunaʼö lala simane daʼö enaʼö itugu adöni dödö niha nifahaʼöda. Hizaʼi si toʼölönia, lö agarara wamaluada famahaʼö simane daʼö, ba tenga ero migu mufalua ia. Enaʼö itugu adöni dödöra ba wamahaʼö yaʼira, so ösa zanuriaigö sangandrö numero telefo niha nifahaʼöra. Na lafalua daʼö, tola latelefo mazui lafaʼoheʼö khöra sms ba wanutunö ngawalö wamahaʼö si sökhi moroi ba Zura Niʼamoniʼö. Tola manö no lafalua wamahaʼö si lö agarara andrö ba zi hauga waŵa faʼara. Hewaʼae simanö, na ha maʼifu iʼogunaʼö ginötö niha nifahaʼö andrö ba wamahaʼö yaʼia, hadia tola tedou ia ba wamati ba tebayagö idanö? Tola manö löʼö.

5. Hewisa wa tola möi fanoloda wehede Yesu nisura ba Luka 14:27-33 ba wombaliʼö nifahaʼö?

⁵ No irai itutunö Yesu hadia manö zinangea ifalua si samösa niha enaʼö tola tobali ia soloʼö Keriso. Itutunö gamaedola sanandrösa khö zi samösa niha somasi mangehaogö malige, hegöi sanandrösa khö razo sedöna möi fasuwö. Niha somasi mamazökhi malige andrö, moguna ”modadao ia sakali wangerai hadia ibönö gefenia”. Simanö göi razo sedöna möi fasuwö, moguna ”modadao ia sakali ba wangandrö fanuturu lala” enaʼö iʼila hadia tola möna zaradadunia ba wasuwöta. (Baso Luka 14:27-33.) Aboto ba dödö Yesu wa na omasi tobali nifahaʼönia zi samösa niha, moguna iʼila hadia manö zinangea ifalua dania na no tobali ia  nifahaʼö Yesu. Enaʼö tola iʼila fefu daʼö, moguna ifahaʼö ia ba Zura Niʼamoniʼö ero migu. Hewisa wameʼeda khönia famarou dödö ba wamalua daʼö?

6. Hadia manö zi tola tafalua enaʼö tola itugu tedou ba wamati niha nifahaʼöda ba Zura Niʼamoniʼö?

⁶ Si oföna, tola öforege enaʼö tedou waʼoya ginötö niʼogunaʼömi ba wanutunö Sura Niʼamoniʼö. Ero na öfalukhaisi ia, te tola ötutunö khönia duho tanö böʼö, baero duho nitutunömi. Na no toʼölö ia ba wamalua famahaʼö sabölö ara, sofu khönia hadia tola modadao ami yomo ba nomo, ba wanohugö famahaʼö ba duho nitutunömi. Fanema linia zangoromaʼö hadia sindruhu-ndruhu omasi ia ba wamahaʼö yaʼia ba Zura Niʼamoniʼö. Na omasi itohugö ba wamahaʼö yaʼia, tola göi ösofu khönia hadia fao dödönia na dua kali samigu mifalua wamahaʼö, enaʼö itugu alio waʼate dounia ba wamati. Hizaʼi, baero ba wamalua famahaʼö ba Zura Niʼamoniʼö sakali mazui dua kali samigu, so danö böʼö nasa zinangea tafalua.

7. Hewisa lalamö ba wamaʼanö yaʼugö fatua lö ödöniaʼö wamahaʼö ba Zura Niʼamoniʼö?

⁷ Börö me samahaʼö ndraʼugö, moguna öfalua wamaʼanö fatua lö ödöniaʼö wamahaʼö ba Zura Niʼamoniʼö. Si oföna, baso duho sedöna mitutunö, ba bokai ayatinia. Forege enaʼö aboto ba dödöu hadia manö zabölö mutandrösaigö ba wamahaʼö andrö. Haogö angeragö duhonia, tuho side-ide, fanofu ngenoli, ayati sinangea mubaso, gambarania, hegöi video si tola muʼogunaʼö ba wanutunö famahaʼö andrö. Aefa daʼö, angeragö hewisa wanutunöu famahaʼö andrö ba lala salio muʼila eluaha, enaʼö tola aboto ba dödö niha nifahaʼöu, ba tola ifalua daʼö ba waʼaurinia.​—Neh. 8:8; Gamd. 15:28a.

8. Moroi ba wehede Waulo si so ba Kolose 1:9, 10, hadia wamahaʼö si tola tahalö sanandrösa ba wolohe niha nifahaʼöda ba wangandrö?

⁸ No tefarahu wangandrö ba wamalua famaʼanö. Börö daʼö, ohe ba wangandrö niha nifahaʼöu hegöi famahaʼö soguna khönia. Andrö wanolo moroi khö Yehowa enaʼö tola öfalua wamahaʼö ba Zura Niʼamoniʼö ba lala salio tofakha ba dödönia. (Baso Kolose 1:9, 10.) Angeragö hadia manö zi lö alio aboto ba dödö niha nifahaʼöu mazui si lö fatema ba dödönia. Böi olifuʼö hadia gohitö dödömö, yaʼia daʼö ba wanolo yaʼia enaʼö tedou ba wamati ba tebayagö idanö.

9. Hewisa wanoloda niha nifahaʼöda ba Zura Niʼamoniʼö ba wamalua famaʼanö? Tutunö.

⁹ Na no ifalua wamahaʼö ba Zura Niʼamoniʼö ero migu, tatötöna wa tola tobali fanolonia daʼö ba woʼameʼegö tödö nifalua Yehowa hegöi Yesu, ba omasi nasa idouʼö waʼaboto ba dödönia.  (Mat. 5:3, 6) Ba ginötö mufalua wamahaʼö, moguna iʼosambuaʼö dödönia niha nifahaʼöda enaʼö tola sindruhu-ndruhu itema mbua moroi ba wamahaʼö andrö. Börö daʼö, fatunö khönia wa moguna ifaʼanö ia fatua lö mifalua wamahaʼö ba Zura Niʼamoniʼö. Moguna ibaso wamahaʼö sedöna mitutunö, ba iʼangeragö hadia gamakhaita wamahaʼö andrö ba waʼaurinia. Hadia zi tola öfalua ba wanolo yaʼia? Mifao ba wamalua famaʼanö enaʼö aboto ba dödönia hewisa wamalua daʼö. * Fatunö khönia hewisa lala ba wangalui fanema li ba wanofu si no muhenaigö, hegöi ba wotandrai ösa ngawua wehede si tola manolo yaʼia ba wotöngöni fanema linia. Aefa daʼö, andrö khönia enaʼö iʼogunaʼö mbua gera-erania samösa ba wameʼe fanema li. Ba ginötö örongo wanema li nibeʼenia, tola öʼila hadia sindruhu-ndruhu aboto ba dödönia zi no ifahaʼö yaʼia andrö. Hizaʼi, so danö böʼö nasa zinangea öfalua baero ba wanolo yaʼia ba wamalua famaʼanö.

10. Hana wa moguna ibaso Zura Niʼamoniʼö ero maʼökhö niha nifahaʼöda, ba hewisa lala enaʼö tola sindruhu-ndruhu itema mbuania?

¹⁰ Baero ba wamalua famahaʼö ba Zura Niʼamoniʼö ero migu, so nasa zinangea ifalua ero maʼökhö niha nifahaʼöda. Moguna fahuhuo ia khö Yehowa ero maʼökhö, ba ifondrondrongo wehedenia. Tola ifondrondrongo Yehowa na ibaso Zura Niʼamoniʼö ero maʼökhö. (Yos. 1:8; Zin. 1:1-3) Tutunö khönia hewisa lala ba wangogunaʼö ”Inötö Wombaso Sura Niʼamoniʼö” si so ba jw.org. * Enaʼö tola sindruhu-ndruhu itema mbua moroi ba wombaso Sura Niʼamoniʼö, farou dödönia ba woʼangerönusi zi no ifahaʼö yaʼia sanandrösa khö Yehowa, ba hewisa lala enaʼö tola ifalua daʼö ba waʼaurinia.​—Hal. 17:11; Yak. 1:25.

11. (a) Hadia zi tola manolo niha nifahaʼöda ba Zura Niʼamoniʼö enaʼö tola ifaʼema wangandrö ba lala si tefaudu? (b) Hana wa moguna mangandrö ia khö Yehowa ero maʼökhö?

¹¹ Farou dödö niha nifahaʼömö enaʼö ilau mangandrö ero maʼökhö. Moguna mangandrö ami fatua lö mibörögö hegöi na no miʼasiwai wamahaʼö ba Zura Niʼamoniʼö. Faʼema wangandrö soroi ba dödö, ba tötöi döinia ba wangandrö nifaʼemamö. Ba ginötö irongo daʼö, tola iʼila hewisa wamalua fangandrö soroi ba dödö. Aboto göi ba dödönia wa moguna itandrösaigö wangandrönia khö Lowalangi Yehowa, ba ifaʼema daʼö ba döi Yesu Keriso. (Mat. 6:9; Yoh. 15:16) Khalaigö atö, na ero maʼökhö ibaso Zura Niʼamoniʼö niha nifahaʼömö (ifondrondrongo Yehowa) ba ilau mangandrö (fahuhuo  khö Yehowa), tatu itugu aro wahuwusania khö Yehowa! (Yak. 4:8) Na ifalua daʼö ero maʼökhö, daʼö zanolo yaʼia enaʼö itugu tedou ba wamati ba tebayagö idanö. Hadia nasa zi tola manolo yaʼia?

12. Hewisa wanoloda niha nifahaʼöda ba Zura Niʼamoniʼö enaʼö tola tobali ia si fahuwu khö Yehowa?

¹² Omasi ita tatolo niha nifahaʼöda ba Zura Niʼamoniʼö enaʼö aboto ba dödönia zi no ifahaʼö yaʼia. Hizaʼi, lö obönö daʼö. Moguna tofakha sibai ba dödönia wamahaʼö si no itema, irege tola terou dödönia ba wamalua hadia zi no ifahaʼö yaʼia. Oya wamahaʼö nifaʼema Yesu, ba adöni dödö niha ba wamondrondrongo famahaʼö nifaʼemania andrö. Hizaʼi, tola terou dödöra ba woloʼö Yesu börö me tofakha ba dödöra wamahaʼö nifaʼemania khöra. (Luk. 24:15, 27, 32) Enaʼö tola tobali si fahuwu khö Yehowa niha nifahaʼömö, moguna aboto ba dödönia wa tola ibaliʼö Amania Yehowa, Lowalanginia, ba si Fahuwu khönia. (Zin. 25:5, 6) Ba ginötö ödöniaʼö wamahaʼö ba Zura Niʼamoniʼö, tutunö khönia mbua-bua si sökhi niʼokhögö Yehowa. (2 Moz. 34:5, 6; 1 Fet. 5:6, 7) Tola öfalua daʼö gofu hadia duho nitutunömi. Tolo ia ba wangiʼila faʼomasi, faʼasökhi dödö, hegöi faʼahakhö dödö niʼokhögö Yehowa. Iwaʼö Yesu wa oroisa ”si oföna ba sabölö ebua” yaʼia daʼö: ”Omasiʼö Yehowa Lowalangiu.” (Mat. 22:37, 38) Börö daʼö, forege ba wanolo niha nifahaʼömö enaʼö sindruhu-ndruhu iʼomasiʼö Yehowa.

13. Beʼe duma-duma si tola tafalua ba wanolo niha nifahaʼöda enaʼö tola iʼila mbua-bua Yehowa.

¹³ Fatunö khönia hadia manö zamarou tödöu ba wangomasiʼö Yehowa. Te tola möi fanolonia daʼö enaʼö iʼila wa moguna iforege ba wangokhögö fahuwusa khö Yehowa ba iʼomasiʼö ia. (Zin. 73:28) Duma-dumania, hadia so ngenoli wamahaʼö mazui ayati Zura Niʼamoniʼö si tofakha ba dödöu, börö me so ba daʼö ngawua wehede sangoromaʼö faʼomasi, faʼatua-tua, faʼatulö, mazui kuaso Yehowa? Fatunö khönia daʼö ba ginötö mitutunö ngenoli mazui ayati andrö. Fatunö khönia wa daʼö sambua dane-dane wa öʼomasiʼö sibai Namada si so ba zorugo. Hadia nasa zinangea ifalua niha nifahaʼöda ba Zura Niʼamoniʼö enaʼö tedou ia ba wamati ba tebayagö idanö?

14. Moloʼö Heberaiʼo 10:24, 25, hana wa abölö alio tedou ba wamati niha nifahaʼö ba Zura Niʼamoniʼö na möi ia ba gangowuloa?

¹⁴ Omasi ita fefu na tedou ba wamati niha nifahaʼöda ba tebayagö idanö. Börö daʼö, moguna sibai tafarou dödönia weʼamöi ba gangowuloa. Latutunö ira talifusöda si no ara mangai halöwö tobali samahaʼö, wa abölö alio tedou ba wamati niha nifahaʼö ba Zura Niʼamoniʼö, na iʼanemaiʼö  möi ia ba gangowuloa. (Zin. 111:1) So ösa zamahaʼö sanutunö ba niha nifahaʼöra wa oya wamahaʼö si tola itema ba gangowuloa, si lö isöndra ba wamahaʼö Zura Niʼamoniʼö nifalua ba nomo. Baso Heberaiʼo 10:24, 25 ba niha nifahaʼöu ba Zura Niʼamoniʼö, ba tutunö khönia hadia manö mbua si tola itema na möi ia ba gangowuloa. Futa khönia video Hadia Manö Nifalua ba Nahia Gorahua Mbanua Lowalangi? * Tolo ia enaʼö iʼila wa tohude sibai weʼamöi ba gangowuloa, irege terou dödönia ba wangondrasi angowuloa nifalua ero migu.

15. Hadia zi tola tafalua enaʼö terou dödö niha nifahaʼöda ba wangondrasi angowuloa nifalua ero migu?

¹⁵ Hadia zi tola öfalua na so niha nifahaʼöu ba Zura Niʼamoniʼö si lö irai mangondrasi, mazui si lö asese möi ba gangowuloa? Moroi na ha ökaoni ia weʼamöi ba gangowuloa, tandraigö fatunö khönia si fao faʼaterou dödö sanandrösa ba zi bohou öfahaʼö yaʼugö ba gangowuloa barö-barö daʼa. Na öfalua daʼö, tola manö terou dödönia weʼamöi ba gangowuloa. Beʼe khönia majalah Manuriaigö mazui Waö-Waö Halöwö ba Gangowuloa Faʼauri ba Fanuriaigö nitutunö ba migu daʼö. Foromaʼö hadia manö nitutunö ba gangowuloa andrö dania, ba sofu khönia hadia faosatö sabölö adöni dödönia. Tatu ahöli dödönia na awena iʼondrasi gangowuloa. Abölö sökhi niʼilania mazui nirongonia ba gangowuloada moroi ba gangowuloa tanö böʼö si no irai iʼondrasi. (1 Kor. 14:24, 25) Hasambalö falukha ia ba niha si tola tobali duma-duma khönia, hegöi sanolo yaʼia enaʼö tedou ba wamati ba tebayagö idanö.

16. Hadia manö zi tola tafalua enaʼö tedou ba wamati niha nifahaʼöda ba Zura Niʼamoniʼö ba tebayagö idanö, ba hadia nitutunöda ba artikel aefa daʼa?

¹⁶ Hadia manö zi tola tafalua enaʼö tedou ba wamati niha nifahaʼöda ba Zura Niʼamoniʼö ba tebayagö idanö? Tola tafarou dödönia ba wamalua famahaʼö ero migu, ba ifaʼanö ia fatua lö mufalua wamahaʼö. Na tafalua daʼö, tola iʼila wa tohude sibai wamahaʼö ba Zura Niʼamoniʼö nifaluania. Tafarou göi dödönia enaʼö fahuhuo ia khö Yehowa ero maʼökhö ba ifondrondrongo wehedenia. Moguna göi iforege enaʼö tobali ia si fahuwu khö Yehowa. Baero daʼö, omasi göi ita na terou dödönia weʼamöi ba gangowuloa. (Faigi kotak, ” Sinangea Ifalua Niha Nifahaʼö ba Zura Niʼamoniʼö Enaʼö Tedou ba Wamati ba Tebayagö Idanö”.) Ba artikel aefa daʼa, tatutunö lima lala tanö böʼö sinangea tafalua enaʼö tola tedou ba wamati niha nifahaʼöda ba tebayagö idanö.