1, 2. (a) Ha’ökhö zi oföna sibai tefaudu ngawua wehede Yesu si so ba Matai’o 24:12? (b) Hewisa wangoroma’ö mbuku Halöwö Zinenge wa ato niha Keriso ba götö siföföna zondrorogö ena’ö lö mamalö aro wa’omasira? (Faigi gambara ba wamobörö wamaha’ö.)

ME SO Yesu ba gulidanö, itutunö ba niha hadia manö ’dandra wa’atua danö’. Ba gotaluania, ifa’ele’ö wa ”ato zi taya fa’omasi”. (Matai’o 24:3, 12) Niha Yahudi ba götö siföföna, lawa’ö wa ya’ira andre ono mbanua Lowalangi, hiza’i itugu taya wa’omasira khö Lowalangi.

² Hewa’ae simanö, ato niha Keriso ba götö da’ö zangokhögö mbua-bua si fabö’ö. Owölö-ölö ira ba wanuriaigö ’turia somuso dödö sanandrösa khö Keriso’ ba laforoma’ö wa’omasi khö Lowalangi, ba niha si sara lala famati khöra, hegöi ba niha si lö mangila sindruhu. Ya’ira andre niha Keriso sondrorogö ena’ö lö mamalö aro wa’omasira khö Lowalangi. (Halöwö Zinenge 2:44-47; 5:42) Hiza’i, so ösa niha Keriso siföföna si taya fa’omasi. Hana wa tola ta’ila da’a?

3. Hadia manö mbörö wa tola taya wa’omasi niha Keriso?

³ Imane Yesu khö ndra niha Keriso siföföna si toröi ba Efeso, ”No öböhöli wa’omasiu ba mböröta andrö.” (Fama’ele’ö  2:4) Tola manö, ladönisi dödöra ira niha si so ba zifasuira somasi mangomusoi’ö tödöra samösa. (Efeso 2:2, 3) Efeso andre, sambua banua si kayo, irege niha si so ba da’ö la’ofönai’ö wangalui fa’ohahau dödö ba fa’akayo moroi ba danö bö’ö. Ato zamalua amuata fohorö ba mbanua andrö ba lö la’ame’egö tödö goi-goi Lowalangi. Abölö la’ofönai’ö wangalui tana khöra moroi na laforoma’ö wa’omasi khö Lowalangi hegöi ba niha bö’ö.

4. (a) Hewisa wa tola taya wa’omasi ba götöda iada’a? (b) Hadia manö zi tölu ngawalö wa’omasi sinangea tarorogö ena’ö böi taya?

⁴ Fehede Yesu sanandrösa ba wa’omasi si taya, alua ia ba götöda iada’a. Ato niha si taya fa’omasi khö Lowalangi. Moroi na la’odaligö Lowalangi ba wangasiwaisi abula dödö salua ba gulidanö, zuta niha sangodaligö organisasi nifazökhi niha. Da’ö mbörö wa itugu taya wa’omasira. Tola göi taya wa’omasi niha samosumange Yehowa simane salua ba mbanua niha Keriso ba Efeso ba götö siföföna. Andrö, datatutunö tölu ngawalö wa’omasi sinangea tarorogö ena’ö böi taya: (1) fa’omasi khö Yehowa, (2) fa’omasi ba zindruhu ba Zura Ni’amoni’ö, ba (3) fa’omasi khö ndra talifusöda.

5. Hana wa moguna ta’omasi’ö Lowalangi?

⁵ Haniha zabölö ta’omasi’ö? Imane Yesu, ”’Omasi’ö Zo’aya ya’ugö, Lowalangiu andrö, moroi si’aikö ba dödöu, nosou ma’asambua zangomasi’ö ya’ia. Ba öhorigö gera-erau, wangomasi’ö ya’ia.’ Da’ö zebua goroisa, da’ö ziföföna.” (Matai’o 22:37, 38) Fa’omasida khö Lowalangi möi fanoloda ba wolo’ö oroisania, ena’ö anaugölöda, ba tatimbagö zi lö sökhi. (Baso Zinunö 97:10.) Hiza’i, Satana hegöi ulidanönia lafalua gofu hadia manö ena’ö tola awuwu ba tekiko wa’omasida khö Lowalangi.

6. Hadia lua-luania na taya wa’omasi niha khö Lowalangi?

⁶ No aröu faehu wamaigi niha gulidanö sanandrösa ba wa’omasi. Moroi na la’omasi’ö Lowalangi, ato niha ”ha tana khöra la’alui”. (II Timoteo 3:2) La’osambua’ö wangera-ngerara ha ba ’wa’omasi nösi niha, ba he fa’omasi hörö, ba he fayawasa andrö, ba gana’a’. (I Yohane 2:16) No ifangelama ita sinenge sotöi Faulo hadia zalua na ta’ofönai’ö wangomusoi’ö tödöda samösa. Imane, ”Era-era nösi niha sa, ba no fa’amate.” Hadia mbörö? Börö me niha samalua simane da’ö tobali udu Lowalangi. (Roma 8:6, 7) Niha sangosambua tödöra ba wangalui kefe mazui somasi mamalua amuata fohorö, göna ira abula dödö.—I Korindro 6:18; I Timoteo 6:9, 10.

7. Hadia mbua wangera-ngera si fasala si tola mondrönisi dödö niha Keriso iada’a?

⁷ Ato niha ateis, agnostik (niha si faduhu tödö wa tebai aboto ba dödöda Lowalangi) hegöi niha si faduhu tödö ba evolusi, lafarou dödö niha bö’ö ena’ö lö la’omasi’ö Lowalangi mazui ena’ö lö lafaduhusi tödö wa so Lowalangi. La’asogö ba wangera-ngera niha wa ha niha si bodo mazui si lö hadöi sekola zi faduhu tödö khö Zomböi. Aefa da’ö, ato niha zo’ame’egö tödö ndra ilmuwan moroi na la’ame’egö tödö Zomböi. (Roma 1:25) Tola manö tedönisi dödö niha Keriso ba wangera-ngera simane da’ö. Lua-luania lö aro wahuwusada khö Yehowa ba taya wa’omasida khönia.—Heberai’o 3:12.

8. (a) Hadia manö zalua si tola manga’asogö fa’ide-ide dödö ba nono mbanua Yehowa? (b) Hewisa wa tola möi fondrara dödöda Zinunö 136?

 ⁸ Börö me toröi ita ba gulidanö si lö sökhi nifatörö Zatana, andrö wa oya manö dani zi tola manga’asogö khöda fa’afatö dödö. (I Yohane 5:19) Hiza’i, na tatehegö afatö dödöda, tola alö wa’aro wamatida ba taya wa’omasida khö Lowalangi. Duma-dumania, tola manö tataögö gabula dödö börö wökhö, fa’ambö zoguna mazui börö me no alawa ndröfida. Tola göi ide-ide dödöda börö me tebai tafalua hadia ia simane ba zomasi ita. Tola afatö dödöda na lö alua hadia nitötönada. Gofu hadia wanandraigö nitaögöda, böi irai so ba wangera-ngerada wa iröi ita Yehowa. Tola ta’angeraigö ngawua wehede sondrara tödöda ba Zinunö 136:23, ”Sanörö tödö ya’ita ba wa’anumanada, me no si lö aetu wa’ebua dödönia andrö!” Tola faduhu dödöda wa ifondro-ndrongo ’wangandröda’ Yehowa ba ibe’e wanema li.—Zinunö 116:1; 136:24-26.

9. Hadia mbörö wa tola aro wa’omasi Waulo khö Lowalangi?

⁹ Ihaogö i’angerönusi Faulo hewisa wanolo Yehowa ya’ia, ba da’a zanolo ya’ia ena’ö lö mamalö aro wamatinia. Isura, ”So’aya zanolo ya’o, lö ata’u ndra’o. Hadia nilau niha khögu?” (Heberai’o 13:6) Börö me i’odaligö Yehowa, da’a zanolo ya’ia ba wangasiwaisi abula dödö ba wa’aurinia. Lö mamalö faduhu dödönia khö Yehowa hewa’ae so ia ba ginötö si basaki. Me so ia ba gurunga, ifa’ohe’ö zura ba mbanua niha Keriso ba wanga’aro’ö niha Keriso si sara lala wamati khönia. (Efeso 4:1; Filifi 1:7; Filemo 1) Hewa’ae so wanandraigö nitaögö Waulo, lö mamalö irorogö ena’ö aro wa’omasinia khö Yehowa. I’odaligö ”Lowalangi wondrara dödö, fefu, sondrara tödöma”. (II Korindro 1:3, 4) Hewisa wolo’öda Waulo?

10. Hewisa wondrorogöda ena’ö lö mamalö aro wa’omasida khö Yehowa?

¹⁰ Itutunö Faulo sambua lala si tola tafalua ba wondrorogö ena’ö lö mamalö aro wa’omasida khö Lowalangi. Isura, ”Böi  aetu-aetu wangandrömi.” Aefa da’ö isura nasa, ”Böi mifamalö-malö wangandrö.” (I Tesalonika 5:17; Roma 12:12) Hana wa möi fangahatö’öda khö Lowalangi na mangandrö? Ba ginötö mangandrö ita, fahuhuo ita khö Yehowa. Da’a zanolo ya’ita ba wangokhögö fahuwusa si sökhi khönia. (Zinunö 86:3) Ba ginötö tatutunö khö Namada ba zorugo hadia nirasoida hegöi ni’angeraigöda, tola itugu ahatö ita khönia. (Zinunö 65:3) Itugu ta’omasi’ö göi Yehowa na ta’ila hewisa wame’enia fanema li ba wangandröda andrö. Tola faduhu dödöda wa ”ahatö Yehowa, ba zi angaröfi li ya’ia, fefu”. (Zinunö 145:18) Fa’afaduhu dödöda ba wa’omasi hegöi fanuhini moroi khö Yehowa, da’a zanolo ya’ita ba wangasiwaisi fefu gabula dödö nitaögöda iada’a hegöi ba zi so miföna.

11, 12. Hewisa ena’ö tola itugu ta’omasi’ö zindruhu ba Zura Ni’amoni’ö?

¹¹ Ya’ita niha Keriso, ta’omasi’ö zindruhu. Sindruhu andre so ia ba Daromali Lowalangi. Imane Yesu khö Namania, ”Taromalimö zi duhu.” (Yohane 17:17) Ena’ö ta’omasi’ö zindruhu ba Zura Ni’amoni’ö moguna ta’ila hadia nösi Zura Ni’amoni’ö. (Kolose 1:10) Hiza’i, tenga ha da’ö. Moguna göi ta’angeraigö hadia nisura ba Zinunö 119 sanolo ya’ita ena’ö aboto ba dödöda hadia nasa zinangea tafalua. (Baso Zinunö 119:97-100.) Ba halöwöda ero ma’ökhö, moguna ta’angerönusi hadia zi no tabaso ba Zura Ni’amoni’ö. Na ta’angerönusi hadia mbua nitemada na tafalua hadia zindruhu moroi ba Zura Ni’amoni’ö, tola itugu ta’omasi’ö zindruhu.

¹² Imane sanura zinunö, ”Wa’ami ba lelagu gamabu’ula limö andrö; ami moroi ba wewani ba mbawagu!” (Zinunö 119:103) Publikasi si te’odane-dane ba Zura Ni’amoni’ö nifa’anö organisasi Lowalangi, no amaedola gö sami. Ba ginötö ta’a gö somasi ita, tatu tabe’e ginötöda ba worasoi fa’aminia. Simanö göi moguna tabe’e ginötöda ba ginötö tafaha’ö ita irege tola tarasoi ”wehede omasiö” ba zindruhu, ba tola aoha khöda ba wanörö tödö hadia zi no tabaso ba tola ta’oguna’ö ba wanolo niha bö’ö.—Zangombakha 12:10.

13. Hadia zanolo Yeremia ba wangomasi’ö wehede niwa’ö Lowalangi? Ba hadia lua-luania khönia?

¹³ Sama’ele’ö sotöi Yeremia i’omasi’ö wehede niwa’ö Lowalangi. Imane, ”Falukhado daromali khöu, ba no amaedola gögu, ba tobali fa’omuso dödögu daromaliu andrö, ba fa’owua-wua dödögu, no töimö mbörö wamotöi ya’odo, ya’ugö Yehowa, Lowalangi ngahönö.” (Yeremia 15:16) Ihaogö i’angerönusi Yeremia ngawua wehede Lowalangi si sökhi sibai, ba i’omasi’ö da’ö. I’ame’egö tödö halöwönia tobali sosalahini Yehowa ba sama’ema turia moroi khö Yehowa. Na ta’omasi’ö zindruhu ba Zura Ni’amoni’ö, tola aboto ba dödöda wa tohude sibai tobali Samaduhu’ö Yehowa hegöi ba wanuriaigö turia sanandrösa ba Mbanua Lowalangi ba ginötö safuria andre.

14. Hadia nasa zi tola tafalua ena’ö itugu ta’omasi’ö zindruhu ba Zura Ni’amoni’ö?

¹⁴ Hadia nasa zanolo ya’ita ena’ö itugu ta’omasi’ö zindruhu ba Zura Ni’amoni’ö? Moguna lö mamalö möi ita ba gangowuloa mbanua niha Keriso börö me ba da’ö ifaha’ö ita Yehowa. Famaha’ö ba Zura Ni’amoni’ö ero migu ba majalah  Manuriaigö, no sambua lala ba wamaha’ö ya’ita. Ena’ö tola tatema mbua moroi ba gangowuloada, moguna tahaogö wama’anö ya’ia. Duma-dumania, tola tabaso fefu ayati si no tesura ba wamaha’ö da’ö. Iada’a, tola aoha khöda ba wombaso mazui ba wo-download majalah Manuriaigö andre ba wakake elektronik börö me no tehenaigö ia ba ngawalö li ba situs Web jw.org hegöi ba aplikasi JW Library. So ösa format elektronik si no tehenaigö irege alio khöda ba wanöndra ayati. Gofu hadia lala ni’oguna’öda, tola itugu ta’omasi’ö Zura Ni’amoni’ö na tahaogö tabaso ayatinia ba ta’angerönusi da’ö.—Baso Zinunö 1:2.

15, 16. (a) Molo’ö Yohane 13:34, 35, hadia goroisa nibe’e Yesu khöda? (b) Hewisa wa’omasida khö ndra talifusöda, mo’amakhaita ba wa’omasida khö Lowalangi hegöi ba Zura Ni’amoni’ö?

¹⁵ Ba mbongi fatua lö mate ia, imane Yesu khö ndra nifaha’önia, ”Oroisa si bohou ube’e khömi, ena’ö mi’omasi’ö nawömi; simane fa’omasigu ami, ena’ö ya’ami göi, faoma mi’omasi’ö nawömi. Ba da’ö aboto ba dödö niha fefu, wa no nifaha’ögu ami, na so khömi wa’omasimi nawömi.”—Yohane 13:34, 35.

¹⁶ Fa’omasida khö ndra talifusöda mo’amakhaita ia ba wa’omasida khö Yehowa. Na lö ta’omasi’ö Lowalangi, tebai ta’omasi’ö ndra talifusöda. Ba na lö ta’omasi’ö ndra talifusöda, tebai ta’omasi’ö Lowalangi. Isura zinenge sotöi Yohane, ”Si lö mangomasi’ö talifusönia sa, ni’ila hörönia, ba tebai omasi ia Lowalangi, si lö i’ila hörönia.” (I Yohane 4:20) Fa’omasida khö Yehowa hegöi khö ndra talifusöda mo’amakhaita ia ba wa’omasida ba Zura Ni’amoni’ö. Hadia mbörö? Na ta’omasi’ö hadia wamaha’ö moroi ba Zura Ni’amoni’ö, tola ta’o’ö goi-goi ba wangomasi’ö Lowalangi hegöi ira talifusöda.—I Fetero 1:22; I Yohane 4:21.

17. Hadia manö zi tola tafalua ba wangoroma’ö fa’omasi?

¹⁷ Baso I Tesalonika 4:9, 10. Hadia  manö zi tola tafalua ba wangoroma’ö wa ta’omasi’ö ndra talifusöda ba mbanua niha Keriso? Te so ndra talifusöda si no alawa ndröfi moguna latolo ira ba wangalui lalara ba we’amöi ba gangowuloa mbanua niha Keriso. Te so göi zinangea mu’ehaogö ba nomo dalifusöda lakha mbanua. (Yakobo 1:27) Moguna ta’ame’egö tödö, tafarou, ba tabe’e wondrara dödö khö ndra talifusöda safatö tödö, soya noro dödö hegöi si göna abula dödö tanö bö’ö. (Gamaedola 12:25; Kolose 4:11) Tola taforoma’ö wa ta’omasi’ö zi ”sara lala wamati” khöda moroi ba wehede hegöi ba nifaluada.—Galatia 6:10.

18. Hadia zi tola manolo ya’ita na fatiti li ita khö ndra talifusöda?

¹⁸ Imane Sura Ni’amoni’ö wa ba ”götö safuria” ba gulidanö si lö sökhi andre, ato niha sangalui tana khönia ba somasi ana’a. (II Timoteo 3:1, 2) Ya’ita niha Keriso, moguna taforege ba wondrorogö fa’omasida khö Yehowa, Taromalinia, hegöi ba niha bö’ö. Börö me lö mo’ahonoa ita, tola manö fatiti li ita khö ndra talifusöda. Hiza’i, börö me ta’omasi’ö ira, lö taradö-radö ba wangasiwaisi zalua andrö, ba si fao fa’omasi ta’atulö’ö ita. (Efeso 4:32; Kolose 3:14) Böi tatehegö taya wa’omasida! Böi mamalö-malö ta’omasi’ö Yehowa, Taromalinia hegöi ira talifusöda.