1, 2. Me no aefa fagai ira ba zi sara wongi, hadia wamaha’ö nihalö Wetero?

SO DAFITU nifaha’ö Yesu zi fagai sara wongi ba Nasi Galilaia. Hiza’i, sara lö lasöndra gi’a. Ba zihulö wonginia, Yesu si no tesusugi mozizio ia ba zinga nasi ba wamaigi-maigi ya’ira. Aefa da’ö imane khöra, ’”Ba gambölö dundraha milau giri, ba misöndra.” Awena lafazaewe, ba tebai sa’ae lasöbi, ba wa’oya gi’a.’—Yohane 21:1-6.

² Ihenaigö gö ndra nifaha’önia Yesu ya’ia da’ö roti ba gi’a. Ba isofu khö Simoni Fetero, ’He Simoni, ono Yohane, hadia, abölö ö’omasi’ö ndra’o, moroi ba wa’omasimö da’a fefu?’ I’ila Yesu wa omasi Fetero fagai. Isofu da’ö Yesu khö Wetero te ena’ö i’ila hadia abölö i’omasi’ö ia Fetero hegöi famaha’önia moroi ba halöwönia ba wogaini gi’a. Imane Fetero khö Yesu, ”E Tua, ö’ila, omasido ndra’ugö.” (Yohane 21:15) I’otarai da’ö, iforoma’ö Fetero hadia geluaha niwa’önia andrö. Oya i’oguna’ö ginötönia ba wamalua halöwö fanuriaigö, ba  i’okhögö halöwö si tohude ba mbanua niha Keriso. Ifalua da’a ba wangoroma’ö fa’omasinia khö Keriso.

3. Hadia manö zinangea i’angelamaisi niha Keriso?

³ Hadia wamaha’ö si tola tahalö moroi ba wehede Yesu khö Wetero? Moguna tahaogö ta’angelamaisi ena’ö lö awuwu wa’omasida khö Keriso. I’ila Yesu wa oya gabula dödö, fa’aombö dödö hegöi fanandraigö nitaögöda börö me toröi ita ba gulidanö da’a. Ba gamaedolania sanandrösa ba zamazaewe tanömö, iwa’ö Yesu wa ato niha zanema’ö ”turia Mbanua andrö” si fao fa’amohi’a dödö. Hiza’i aefa da’ö, ’fa’abu dödö ba gulidanö andre, awö wamaelungu andrö ba gana’a’ hasambalö ”ibunu Daromali” irege ato niha zi taya fa’amohi’a dödö. (Matai’o 13:19-22; Mareko 4:19) Na lö tahaogö ta’angelamaisi, fa’aombö-aombö dödö ba zoguna khöda ero ma’ökhö, tola möi daha-tahada da’ö ba wamosumangeda Yehowa. Andrö wa ifangelama nifaha’önia Yesu. Imane, ”Ba mi’angelama, faböi arörö dödömi ba wemanga-manga ba ba wemabu-mabu ba ba wa’abu dödö ba mbalazo, ba i’ozumagö ikhamö ami baŵa da’ö.”—Luka 21:34.

4. Hadia zanolo ya’ita ba wamaigi hawa’aro wa’omasida khö Keriso? (Faigi gambara ba wamobörö wamaha’ö.)

⁴ Simane Fetero, tola taforoma’ö wa ta’omasi’ö Keriso na ta’ofönai’ö halöwö fanuriaigö ba wa’aurida. Hewisa wa tola aro dödöda wa lö taböhöli wamalua da’a? Tola tasofu khöda samösa, ’Hadia zabölö u’omasi’ö ba wa’aurigu? Hadia abölö owua-wua dödögu ba wamosumange Yehowa moroi ba wamalua halöwö tanö bö’ö?’ Ena’ö tola ta’ila wanema linia, datatutunö tölu ngawalö zame’e taya wa’omasida khö Keriso. Ya’ia da’ö: halöwö, rekreasi, ba fangalui okhöta.

5. Hadia halöwö ni’okhögö niha si tobali högö yomo ba nomo?

⁵ Fagai Wetero tenga ha börö me omasi ia. Da’a no halöwönia ba wombönökhi zoguna ba nösi nomonia. Iada’a, ibe’e halöwö Yehowa ba niha si tobali högö yomo ba nomo ba wombönökhi zoguna ba nösi nomora. (I Timoteo 5:8) Moguna laforege wohalöwö ba wamalua da’a. Hiza’i, halöwö ba götö safuria andre tola manga’asogö ngawalö gabula dödö.

6. Hana wa tola i’asogö gabula dödö fohalöwö?

⁶ Iada’a, abölö ato niha zangalui halöwö moroi ba halöwö si so. Lua-luania, ato niha zamadöni halöwö. So zanguma’ö wa moguna ladou’ö ginötöra ba wohalöwö hewa’ae na no ide-ide gazi. Oya perusahaan zomasi manga’asogö produk soya hiza’i omasi ira na lö ato la’oguna’ö zohalöwö. Andrö wa ato zohalöwö si so abula dödö, marase, hegöi mofökhö. Ato niha zata’u na taya halöwö ni’okhögöra, andrö wa lafalua gofu hadia manö ni’andrö gafalora.

7, 8. (a) Ha’ökhö abölö lö faröi ita? (b) Hadia wamaha’ö si sökhi nihalö dalifusöda moroi ba Thailand sanandrösa ba halöwönia?

⁷ Ya’ita niha Keriso, abölö lö faröi ita  khö Yehowa moroi ba niha bö’ö, simane khö gafaloda. (Luka 10:27) Tola te’asogö zoguna khöda börö halöwöda ba da’ö zanuhini ya’ita ba wanuriaigö. Hiza’i, na lö tahaogö ta’angelamaisi noro dödöda ba wohalöwö, tola möi daha-taha da’ö ba lala wamosumangeda Yehowa. Tola tafaha’ö ita moroi ba zi no irai alua khö dalifusöda ira matua si so ba Thailand. Imane, ”Omasido sibai halöwögu ba wangehaogö komputer, hiza’i oya ginötö ni’oguna’ögu ba wohalöwö. Lua-luania, arakhagö lö hadöi inötögu ba wamalua halöwö ba wamati. Ba gafuriatania aboto ba dödögu wa moguna ufabö’öni halöwögu ena’ö tola u’ofönai’ö ba wangalui Mbanua Lowalangi.” Hadia nifalua dalifusöda andre?

⁸ Itutunö, ”Me no uhaogö u’angeraigö hadia nifaluagu ba zi döfi, uhalö gangetula ba wogale es krim ba zinga lala. Ba wamobörö, ide-ide usöndra ba abu dödögu. Me falukhado khö nawögu wohalöwö, la’o’aya ndra’o ba lasofu hadia sibai mbörö wa ulau mogale es krim irege uhetado ba halöwögu ba wangehaogö komputer ba nahia si so AC. Ulau mangandrö khö Yehowa ena’ö ibe’e khögu wanaha tödö hegöi ena’ö tola ukhamö gohitö dödögu ba wangoguna’ö inötögu ba wamalua halöwö ba wamati. Lö ara aefa da’ö, itugu sökhi wa’aurigu. U’ila hadia zomasi niha, ba itugu onekhe ndra’odo ba wangehaogö es krim. Hasambalö ahori es krim nifamawagu ero ma’ökhö. Sindruhunia, abölö ebua gefe nisöndragu ba wogale es krim moroi me mohalöwödo ba wangehaogö komputer. Omuso sibai dödögu börö me lö sa’ae oya noro dödögu ba lö khögu fa’aombö-aombö dödö ba halöwögu iada’a. Sabölö tohudenia, urasoi wa iada’a itugu ahatö ndra’o khö Yehowa.”—Baso Matai’o 5:3, 6.

9. Hewisa ena’ö lö mamalö ta’okhögö lala wangera-ngera satulö sanandrösa ba halöwö?

⁹ I’ame’egö tödö Yehowa na taforege ba wohalöwö, ba so mbuania da’ö. (Gamaedola 12:14) Hiza’i, moguna ta’angelamaisi ena’ö böi tobali abölö tohude halöwöda moroi ba wamosumangeda Yehowa. Sanandrösa ba zoguna khöda, imane Yesu, ”Mi’ofönai’ö wangalui Banua Lowalangi andrö, awö wa’atulö dödö andrö khönia, ba tebe’e nönö-nönö dania khömi da’ö fefu.” (Matai’o 6:33) Hiza’i, hewisa ena’ö tola ta’ila wa tefaudu lala wangera-ngerada sanandrösa ba halöwö? Datasofu khöda samösa, ’Hadia abölö owua-wua dödögu ba wamalua halöwögu moroi ba wamosumange Lowalangi?’ Na ta’angeraigö wanofu da’a, tola ta’ila hadia zabölö ta’omasi’ö.

10. Hadia wamaha’ö si sökhi nifaha’ö Yesu?

¹⁰ Ifaha’ö ita Yesu hadia zinangea ta’ofönai’ö ba wa’aurida. Ba zi sambua inötö, möi ia ba nomo Maria ba Marata. Me luo da’ö, i’anemai’ö ifa’anö Marata gö Yesu, hiza’i no modadao Maria ba ngai Yesu ba ifondro-ndrongo wamaha’ö nibe’enia. Mokökö-kökö Marata börö me lö itolo ia  Maria. Imane Yesu khö Marata, ”No ituyu khönia zi sökhi andrö Maria, lö laheta khönia da’ö.” (Luka 10:38-42) Ba zalua andre, ibe’e khöda wamaha’ö si sökhi Yesu. Ena’ö tola taforoma’ö wa’omasida khö Keriso hegöi ena’ö lö mangoloi wangera-ngerada börö zoguna khöda samösa, moguna tafili ”zi sökhi andrö”. Eluahania, fahuwusada khö Yehowa, da’ö zabölö tohude ba wa’aurida.

11. Hadia niwa’ö Zura Ni’amoni’ö sanandrösa ba wolombase hegöi ba wemörö?

¹¹ Börö me oya halöwöda ero ma’ökhö, andrö wa moguna khöda ginötö wolombase hegöi ba wemörö. Imane Sura Ni’amoni’ö, ”Awai zi sökhi ba niha: femanga-manga ba famadu-madu hadia ia ba na i’omusoi’ö dödönia ba wamakaonia andrö.” (Zangombakha 2:24) I’ila Yesu wa moguna molombase ndra nifaha’önia. Duma-dumania, me no aefa laforege wohalöwö ba wanuriaigö, imane khöra Yesu, ”Mitabu, ya’ami andrö, ba zi ha ya’ita, ba zi lö niha-niha, ba mi’olombase ma’ifu.”—Mareko 6:31, 32.

12. Hana wa moguna mangelama ita sanandrösa ba hiburan hegöi rekreasi? Be’e duma-duma.

¹² Hiburan hegöi rekreasi tola möi fanoloda ena’ö so ginötöda ba wolombase hegöi ba wemörö. Hiza’i, moguna tahaogö ta’angelamaisi ena’ö lö ta’ofönai’ö da’ö ba wa’aurida. Ba götö siföföna, ato zangokhögö fangera-ngera simane da’a: ”Datalau manga-manga ba datalau mamadu-madu hadia ia, mahemolu mate sa’atö ita.”(I Korindro 15:32) Iada’a, ato göi zangokhögö fangera-ngera simane da’ö. Duma-dumania, so samösa ndra matua si bohou ebua si so ba Eropa tanö ba Gaekhula sawena mangondrasi angowuloa niha Keriso. Hiza’i, börö me abölö i’omasi’ö hiburan, iböhöli wahuwusania khö ndra Samaduhu’ö Yehowa. Lö ara aefa da’ö, aboto ba dödönia wa oya gabula dödö nitaögönia börö me i’osambua’ö wangera-ngerania ba hiburan. Ifuli ifaha’ö ia ba Zura Ni’amoni’ö. Ba gafuriata, tola möi ia manuriaigö turia somuso dödö. Me no aefa labayagö ia idanö imane, ”Maniasa sibai ndra’odo börö me no uhorigö ginötögu ba zi lö eluaha. Awena aboto ba dödögu wa abölö omuso dödögu ba wamosumange Yehowa moroi ba hiburan si so ba gulidanö da’a.”

13. (a) Be’e duma-duma zangoroma’ö wa lö tefaudu na talafo oya ginötö ni’ogunaöda ba rekreasi hegöi ba hiburan. (b) Hadia zanolo ya’ita ena’ö ta’okhögö wangera-ngera satulö sanandrösa ba hiburan hegöi rekreasi?

¹³ Ohitö dödöda na möi ita rekreasi ya’ia da’ö ena’ö tola tasöndra wolombase ba ifuli abölö ita wohalöwö. Hiza’i, hawa’oya ginötö nibe’eda ba rekreasi? Ena’ö ta’ila wanema linia, tola ta’angeraigö zalua andre. Ato niha somasi manga gö sami-ami simane kue. Hiza’i, ta’ila wa tola mofökhö ita na asese ta’a gö simane da’ö. Na lö omasi ita mofökhö, moguna ta’a gö si sökhi. Simane da’ö göi, na tahorigö ginötöda ba hiburan hegöi rekreasi, tola tekiko wahuwusada khö Yehowa. Hewisa ena’ö tola ta’ila wa ta’okhögö wangera-ngera si tefaudu sanandrösa ba rekreasi? Lalania ya’ia da’ö, tasura hawa’oya ginötö nibe’eda khö Yehowa ba zi samigu simane ba we’amöi ba gangowuloa niha Keriso, halöwö fanuriaigö, hegöi famaha’ö ba Zura Ni’amoni’ö. Aefa da’ö, tasura hawa’oya ginötö ni’oguna’öda ba rekreasi, simane fa’olahraga, mamaigi TV, mazui  video game. Na no aefa tafaehusi ginötö ni’oguna’oda, hadia wamaha’ö si tola tahalö? Hadia zinangea tabulö’ö?—Baso Efeso 5:15, 16.

14. Hadia zi tola manolo ya’ita ba wamili rekreasi hegöi hiburan si sökhi?

¹⁴ Itehegö khöda Yehowa ba wamili rekreasi somasi ita. Niha si tobali högö yomo ba nomo, tola göi ifili hadia rekreasi si tefaudu ba nösi nomonia. Ba Zura Ni’amoni’ö, ibe’e khöda Yehowa goi-goi so’amakhaita ba lala wangera-ngerania. Goi-goi da’a zanolo ya’ita ba wangai angetula si sökhi. * (Faigi nisura ba gahe zura.) Rekreasi si sökhi ”no buala Lowalangi”. (Zangombakha 3:12, 13) Sindruhusa wa fabö’ö-bö’ö hiburan nifili zi samösa niha. (Galatia 6:4, 5) Hiza’i, moguna ta’angelamaisi gofu hadia hiburan nifilida. Imane Yesu, ”Ba zi so girö-girö khöu sa, ba da’ö göi so dödöu dania.” (Matai’o 6:21) Na ta’omasi’ö Yesu si no tobali Razoda, taforoma’ö ba lala wangera-ngerada, fehededa, hegöi nifaluada wa abölö tohude Mbanua Lowalangi moroi ba danö bö’ö.—Filifi 1:9, 10.

15, 16. (a) Hana wa tola tobali fama’ala na ta’omasi’ö gana’a? (b) Hadia mene-mene si sökhi nibe’e Yesu sanandrösa ba harato?

¹⁵ Iada’a, ato niha zanguma’ö wa moguna la’okhögö nukha si bohou, HP, komputer ba tanö bö’önia. Alua da’a börö me  so khöra wa’omasi ba gana’a, ba abölö la’ofönai’ö harato hegöi kefe sebua ba wa’aurira moroi ba danö bö’ö. Ya’ita niha Keriso, hadia zabölö ta’ofönai’ö? Sofu khöu samösa, ’Hadia uhorigö ginötögu ba wo’angeraigö moto hegöi nukha si bohou moroi na ufa’anödo ba gangowuloa mbanua niha Keriso? Hadia uhorigö ginötögu ba wamalua halöwö si ero ma’ökhö irege lö hadöi inötögu ba wangandrö hegöi ba wombaso Sura Ni’amoni’ö?’ Na lö ta’angelamaisi da’a, tola abölö ta’omasi’ö harato moroi khö Keriso. Moguna ta’angeraigö wehede Yesu me imane, ”Mi’angelamaisi wa’omasi gana’a fefu.” (Luka 12:15) Hana wa iwa’ö da’a?

¹⁶ Imane Yesu wa ”tebai enoni zi darua niha”. Imane nasa, ”Tebai enoni Lowalangi ami ba enoni Gana’a göi.” Tebai tabe’e zabölö sökhi khö Yehowa na ta’osambua’ö dödöda ba wangalui harato. Itutunö Yesu wa tola manö ’fa’udu ita ba zi samösa ba ta’omasi’ö zi samösa’ mazui ’molemba ita ba zi samösa, ba ta’ositengagö zi samösa’. (Matai’o 6:24) Börö me lö mo’ahonoa ita, moguna lö mamalö tatimbagö ”wangisö nösida”, simane fa’omasi ba gana’a.—Efeso 2:3.

17. (a) Hana wa so ösa niha zi lö mangokhögö fangera-ngera satulö sanandrösa ba gokhöta? (b) Hadia zanolo ya’ita ba wanimbagö fa’omasi ba gana’a?

¹⁷ Ato niha iada’a la’osambua’ö dödöra ba zomasi hegöi ba zohahau dödöra samösa, irege abua khöra ba wangokhögö fangera-ngera satulö sanandrösa ba gokhöta. (Baso I Korindro 2:14.) Lua-luania, abua khöra ba wamaehusi hadia zatulö hegöi si sala. (Heberai’o 5:11-14) Itugu ebua wa’omasira ba gana’a. Ba na no oya gana’a ni’okhögöra, omasi ira nasa la’okhögö zabölö oya moroi ba da’ö. (Zangombakha 5:10) Hiza’i, so zi tola tafalua ba wanimbagö lala wangera-ngera simane da’ö. Moguna lö mamalö tabaso Zura Ni’amoni’ö irege da’ö zanga’aro’ö ya’ita ba wanimbagö fa’omasi ba gana’a. (I Fetero 2:2) I’angerönusi Yesu wa’atua-tua Yehowa, ba da’a zanolo ya’ia ba wanimbagö fefu wanandraigö moroi khö Gafökha. (Matai’o 4:8-10) Iada’a, na omasi ita tatimbagö wa’omasi ba gana’a, moguna ta’okhögö wa’atua-tua Yehowa ba wa’aurida. Da’a zangoroma’ö wa abölö ta’omasi’ö Yesu moroi ba gokhöta.

18. Hadia zi lö mamalö öfalua?

¹⁸ Me isofu Yesu khö Wetero, ’Hadia, abölö ö’omasi’ö ndra’o, moroi ba wa’omasimö da’a fefu?’, ifaha’ö Fetero wa moguna i’osambua’ö dödönia ba wamosumange Yehowa ba wa’aurinia. Sadöni dödöda, eluaha döi Wetero ya’ia da’ö ”Kara Saro”. Oroma da’a börö me i’okhögö mbua-bua si sökhi Fetero simane kara saro. (Halöwö Zinenge 4:5-20) Iada’a, moguna ta’osambua’ö dödöda ba wangomasi’ö Keriso. Andrö, böi ta’ofönai’ö halöwö, rekreasi hegöi ba wangalui okhöta ba wa’aurida. Na ta’o’ö da’ö, tola tawa’ö wehede simane niwa’ö Wetero, ”E Tua, ö’ila, omasido ndra’ugö.”