1, 2. (a) Hadia manö gabula dödö nitaögö ndraono niha imigran? (b) Hadia wanofu-nofu nitutunöda ba wamaha’ö da’a?

IMANE Joshua,”I’otarai me ide-idedo, fahuhuo ndra’o ba li si to’ölö la’oguna’ö ira satuagu na so ndra’o ba nomo hegöi ba mbanua niha Keriso. Hiza’i, me no möido sekola, ibörögö omasido ba wangoguna’ö li sasese ni’oguna’ö ba mbanua andrö. Ba zi hauga fakhe aefa da’ö, ha li da’ö ni’oguna’ögu na fahuhuodo. Lua-luania, ambö aboto ba dödögu hadia nifa’ema ba gangowuloa, ba lö u’ila sibai hadia zi to’ölö lafalua ira satuagu.” Hadia nirasoi Joshua andrö no asese alua.

² Iada’a, töra 240.000.000 niha si lö toröi ba soi si tumbu ya’ira. Na ya’ugö satua imigran (si findra moroi ba soi bö’ö), hewisa wame’emö inötö si sökhi ba ndraonomö ena’ö lafaha’ö ira ba wangomasi’ö Yehowa ba ”latörö lala zindruhu”? (III Yohane 4) Ba hadia wanolo si tola labe’e niha bö’ö?

3, 4. (a) Hewisa wame’e zatua duma-duma si sökhi ba ndraonora? (b) Hadia zi tebai latötöna ira satua ba ndraonora?

³ Satua, moguna sibai mibe’e duma-duma ba ndraonomi na omasi ami la’okhögö wahuwusa si sökhi khö Yehowa ba fa’auri si lö aetu. Na la’ila iraonomö wa ”mi’ofönai’ö wangalui  Banua Lowalangi”, tola lafaha’ö ira ba wangodaligö Yehowa ba zoguna khöra ero ma’ökhö. (Matai’o 6:33, 34) Ofönai’ö wamosumange Yehowa moroi ba wangalui kefe sebua. Mi’öna-önai’ö wa’aurimi ba böi mi’o’ömö. Fangalui ”girö-girö ba zorugo” ya’ia da’ö hadia zomasi Yehowa, abölö sökhi ia moroi ba wangalui kefe mazui ’sumange ba niha’.—Baso Mareko 10:21, 22; Yohane 12:43.

⁴ Böi mihorigö ginötömi ba wohalöwö irege lö inötömi ba ndraonomi. Foroma’ö khöra wa omuso dödömi na lahalö gangetula ba wangofönai’ö Yehowa moroi ba wangalui töi sebua mazui kefe, he soguna khöra samösa mazui khömi. Böi so ba wangera-ngerami wa hasambalö labe’e wa’auri si sökhi khö zatuara iraono. Törö tödömö wa ”tenga sa iraono zangalui ana’a khö ndra amara, ama zangalui ana’a ba ndraono”.—II Korindro 12:14.

5. Hana wa moguna asese latutunö ira satua sanandrösa khö Yehowa ba ndraonora?

⁵ Simane si no mufa’ele’ö, ato niha moroi ba ’ngawalö li ba soi’ möi ba organisasi Yehowa. (Zakharia 8:23) Hiza’i, na lö sindruhu-ndruhu aboto ba dödö ndraonomö li ni’oguna’ömö, tola manö abua khömö ba wamaha’ö ya’ira ba zindruhu. Ya’ira andre niha nifaha’ömö ba Zura Ni’amoni’ö sabölö tohude moroi ba danö bö’ö, ba tola lasöndra wa’auri si lö aetu na ”aboto ba dödöra” sanandrösa khö Yehowa. (Yohane 17:3) Ena’ö aboto ba dödöra wamaha’ö moroi khö Yehowa, moguna asese ’öfahuo-huosi khöra da’ö’.—Baso V Moze 6:6, 7.

6. Hadia mbua nitema ndraonomö na lafaha’ö ira ba li ni’oguna’ömö? (Faigi gambara ba wamobörö wamaha’ö.)

⁶ Te moroi ba zekola mazui ba niha bö’ö, lafaha’ö ira iraonomö ba li sasese mu’oguna’ö ba mbanua da’ö. Hiza’i, tola lafaha’ö ira ba li ni’oguna’ömö na asese fahuhuo ndra’ugö khöra. Na fahuhuo ndraonomö ba li ni’oguna’ömö, tola aoha khöra ba wahuhuosa khömö hegöi ba wamatunö hadia nirasoira. Hiza’i, so mbua tanö bö’ö. Na tola fahuhuo ndraonomö ba li tanö bö’ö, tola itugu tedou lala wangera-ngerara ba tola aboto ba dödöra lala wangera-ngera niha bö’ö. Tola göi tebe’e khöra ginötö ba wondrou’ö halöwöra ba wanuriaigö. Imane Carolina, satuania imigran, ”Owua-wua dödöda na so ita ba mbanua niha Keriso sangoguna’ö li bö’ö, ba sökhi sibai na fao ita ba wanolo mbanua niha Keriso si lö ato sanuriaigö.”

7. Hadia nifaluamö na tobali abula dödö ba nösi nomomö sanandrösa ba li?

⁷ Hiza’i, börö me lafaha’ö ira ba li hegöi ba zasese alua ba mbanua da’ö, so ösa ba gotalua ndraono imigran si lö omasi hegöi si lö mangila fahuhuo ba li ni’oguna’ö zatuara. Satua, na da’ö zalua ba ndraonomi, hadia mifaha’ö ami ba li ni’oguna’ö ba mbanua da’ö? Tola aoha khömö ba wangebua’ö iraonomö tobali niha Keriso na aboto ba dödömö hadia niwa’öra, hiburan somasi ira, halöwö ba zekola hegöi na fahuhuo ndra’ugö khö ndra  gurura. Sindruhusa wa moguna tabe’e ginötö, taforege ba moguna wangide-ngide’ö na tafaha’ö ita ba li si bohou. Hiza’i, so mbuania. Duma-dumania, na so ndraonomö si lö hede, tatu omasi’ö öfaha’ö ndra’ugö ba li isyarat ena’ö tola fahuhuo ami. Simane da’ö göi, na so ndraonomö sonekhe fahuhuo ba li bö’ö, hadia omasi’ö öfaha’ö ndra’ugö ba li da’ö? *—Faigi nisura ba gahe zura.

8. Hewisa wanolomö iraonomö na ambö aboto ba dödömö li ni’oguna’ö ba mbanua da’ö?

⁸ Tola abua khö ndra satua imigran fahuhuo ba li si bohou ni’oguna’ö ndraonora. Moguna laforege ira satua ba wanolo ndraonora ena’ö aboto ba dödöra ”Zura Ni’amoni’ö”. (II Timoteo 3:15) Na da’a zalua khömö, tola ötolo ndraonomö ena’ö la’ila ba la’omasi’ö Yehowa. Imane satua sokubaloi sotöi Shan, ”Ambö aboto ba dödö zatuama ira alawe hadia li sabölö aboto ba dödöma, ba ya’odo hegöi talifusögu alawe, ambö aboto ba dödöma li ni’oguna’önia. Hiza’i, me ma’ila wa ifaha’ö ia, ilau mangandrö, ba ifalua zabölö sökhi ba wamaha’ö zi sambua omo ero migu, aboto ba dödöma wa moguna sibai ma’okhögö wa’atua-tua sanandrösa khö Yehowa.”

9. Hadia nifalua zatua ba wanolo ndraonora samaha’ö ya’ira ba zi dombua li?

⁹ So ösa ndraono moguna lafaha’ö ira sanandrösa khö Yehowa ba zi dombua li. Hadia mbörö? Börö me sambua li ni’oguna’öra ba zekola, ba sambua göi li ni’oguna’öra ba nomo. Börö da’ö, so ösa zatua sangoguna’ö mbuku, rekaman audio, hegöi video ba zi dombua li andre. Moguna laforege ira satua imigran ba wanolo iraonora ena’ö tola ahatö khö Yehowa.

10. (a) Haniha zangai angetula ba wotatugöi mbanua niha Keriso sangoguna’ö li hadia fao ira? (b) Hadia zinangea ifalua niha si tobali högö yomo ba nomo fatua lö ihalö gangetula?

¹⁰ Ba ginötö aröu gotalua ’niha si fatewu’ moroi khö ndra Samaduhu’ö tanö bö’ö sangoguna’ö lira, moguna fariawö ira ba mbanua niha Keriso sangoguna’ö li sasese mu’oguna’ö ba mbanua da’ö. (Zinunö 146:9) Hiza’i, na ahatö mbanua niha Keriso sangoguna’ö lira, moguna ihalö gangetula si sökhi satua si tobali högö yomo ba nomo ba wotatugöi mbanua niha Keriso sangoguna’ö li hadia fao ira. Fatua lö ihalö gangetula, moguna ihaogö wo’angeraigö ba i’ohe ba wangandrö da’ö. Moguna göi ifahuhuosi khö wo’omonia hegöi ba ndraononia. (I Korindro 11:3) Hadia zinangea i’angeraigö? Hadia goi-goi Zura Ni’amoni’ö sanolo ya’ia ba wangai angetula?

11, 12. (a) Hadia lua-luania ba ndraono li ni’oguna’ö ba gangowuloa? (b) Hana wa so ösa ndraono si lö omasi mamaha’ö ya’ira ba li zatuara?

¹¹ Moguna la’angeraigö ira satua hadia zabölö moguna ba ndraonora. Ena’ö  aboto ba dödöra zindruhu moroi ba Zura Ni’amoni’ö, moguna abölö oya la’oguna’ö ginötö iraonora ba wamondro-ndrongo fanuturu lala moroi ba Zura Ni’amoni’ö, tenga ha ba zi hauga za ero migu ba gangowuloa. Hiza’i, angeraigö da’a: Tola latema mbua si sökhi iraono na so ira ba gangowuloa nifalua ba li sabölö aboto ba dödöra, ba tola manö oya wamaha’ö nihalöra töra moroi ba ni’angeraigö zatuara. Lö alua da’a na lö aboto ba dödö ndraonora li ni’oguna’ö ba da’ö. (Baso I Korindro 14:9, 11.) Li ni’oguna’önia ba wa’ide-ide, tola manö lö tofakha ba dödö hegöi fangera-ngerania sagötö fa’ara. So ösa ndraono si tola mamaha’ö ya’ia ba wame’e mbua gera-era, famadumaisi, hegöi fahuhuo ba li zatuara, hiza’i tenga soroi ba dödö hegöi fangera-ngerara da’ö.

¹² Tenga ha li zi tola mondrönisi dödö ndraono. Da’ö zalua khö Joshua, nitutunö ba wamobörö. Imane talifusönia alawe sotöi Esther, ”Ba ndraono side-ide, lafaha’ö ira ba li, si to’ölö lafalua, hegöi ba agama zatuara ba ginötö si fagölö.” Na lö fao dödö ndraono ba wamalua hadia zi to’ölö lafalua ira satuara, tola manö lö omasi ira ba wamaha’ö ya’ira ba li hegöi ba agama zatuara. Hadia zi tola ifalua satua imigran?

13, 14. (a) Hana wa findra zi sambua ösi nomo imigran ba mbanua niha Keriso sangoguna’ö li sasese mu’oguna’ö ba mbanua da’ö? (b) Hadia nifalua zatua ba wangaro’ö fahuwusara khö Yehowa?

¹³ Ira satua si no tobali niha Keriso, moguna la’ofönai’ö zoguna ba ndraonora moroi ba zoguna khöra samösa. (I Korindro 10:24) Imane bapa Joshua hegöi Esther sotöi Samuel, ”Ya’odo hegöi fo’omogu, mahaogö manehegö hadia li si tola mondrou’ö famati ndraonoma, ba ma’andrö wa’atua-tua. Fanema linia, tenga balazi somasi ndra’aga samösa. Hiza’i, me ma’ila wa lö oya mbua nitemara ba gangowuloa ba li ni’oguna’öma, mahalö gangetula findra ba mbanua niha Keriso sangoguna’ö li sasese mu’oguna’ö ba mbanua da’ö. Asese fao ndra’aga ba we’amöi ba gangowuloa hegöi ba wanuriaigö. Itaria makaoni ndra talifusöda ba mbanua da’ö ena’ö fao ira khöma wemanga ba manörö-nörö. Da’a zanolo iraonoma ena’ö la’ila fefu ndra talifusöda si so ba da’ö ba aboto ba dödöra sanandrösa khö Yehowa, tenga ha si tobali Lowalangira hiza’i Ama hegöi si Fahuwu khöra. Na ba wamaigima, abölö tohude da’a moroi na onekhe ira ba li ni’oguna’öma.”

¹⁴ Imane nasa Samuel, ”Ena’ö lö aetu aro wamatima, ya’odo hegöi fo’omogu itaria ma’ondrasi gangowuloa ba li ni’oguna’öma. Hewa’ae marase ba oya halöwöma, hiza’i ma’andrö saohagölö khö Yehowa, börö me ifahowu’ö famorege nifaluama hegöi hadia zi no matehegö. Fefu ndraonoma si datölu lahalö halöwö safönu inötö ba wamosumange Yehowa.”

15. Hana wa so ba dödö dalifusöda sotöi Kristina wa tola ifalua zabölö sökhi na so ia ba gangowuloa sangoguna’ö li sasese mu’oguna’ö ba mbanua da’ö?

¹⁵ Me itugu ebua-bua ndraono, tola manö aboto ba dödöra wa abölö sökhi na lafosumange Yehowa ba mbanua niha Keriso sangoguna’ö li sabölö aboto ba dödöra. Na simane da’ö, böi so ba wangera-ngera zatua wa latimbagö ira iraonora. Itörö tödö Kristina, imane, ”U’ila ma’ifu li zatuagu, hiza’i ambö aboto ba dödögu  li ni’oguna’ö ba gangowuloa. Me 12 fakhe ndröfigu, möido ba kebaktian sangoguna’ö li ni’oguna’ö ba zekolagu. Ba da’ö awena sindruhu-ndruhu aboto ba dödögu wa sindruhu hadia nirongogu andrö! So mbua tanö bö’ö me ubörötaigö mangandrö ba li ni’oguna’ö ba zekolagu. Tola fahuhuo ndra’o khö Yehowa soroi ba dödö!” (Halöwö Zinenge 2:11, 41) Me 18 fakhe ndröfi Kristina, itutunö da’a khö ndra satuania ba ihalö gangetula findra ba mbanua niha Keriso sangoguna’ö li sasese la’oguna’ö ba mbanua andrö. Imane, ”Tedönisi dödögu ba wamalua si sökhi me ufaha’ö ndra’o sanandrösa khö Yehowa ba li ni’oguna’ö ba zekolagu.” Lö ara aefa da’ö, tobali perintis biasa Kristina ba isöndra wa’owua-wua dödö.

16. Hana wa omuso dödö Nadia toröi ba mbanua niha Keriso sangoguna’ö li bö’ö?

¹⁶ Ya’ami si bohou ebua, hadia so ba wangera-ngerami ba wangai halöwö ba mbanua niha Keriso sangoguna’ö li sasese mu’oguna’ö ba mbanua andrö? Na simanö, sofu khöu samösa hadia mbörö. Hadia findra ndra’ugö ba mbanua niha Keriso ena’ö itugu ahatö ndra’ugö khö Yehowa? (Yakobo 4:8) Mazui, börö me lö omasi’ö na la’ila ira satuamö hadia manö nifaluamö mazui börö me lö omasi’ö öfalua gofu hadia ia? Imane Nadia si no mohalöwö ba Mbetieli iada’a, ”Me itugu ebua-bua ndra’odo hegöi ira talifusögu, omasi ndra’aga findra ba mbanua niha Keriso sangoguna’ö li sasese la’oguna’ö ba mbanua da’ö.” Hiza’i, la’ila ira satuania wa hadia nifaluara andrö lö möi fanga’aro’ö wahuwusara khö Yehowa. ”Iada’a, ma’andrö sibai saohagölö khö zatuama börö me ba ginötö da’ö lö latehe khöma wefao ba mbanua niha Keriso sangoguna’ö li bö’ö hegöi me laforege ba wamaha’ö ya’aga ba li ni’oguna’öra. Owua-wua sibai dödöma ba tola madou’ö ginötöma ba wanolo niha bö’ö ena’ö aboto ba dödöra sanandrösa khö Yehowa.”

17. (a) Ha’ökhö ibe’e halöwö Yehowa ba wangebua’ö iraono? (b) Hadia nifalua zatua ena’ö aboto ba dödö ndraonora zindruhu?

¹⁷ Ibe’e halöwö Yehowa khö zatua ba wamaha’ö iraonora ba zindruhu. Tenga khö kakera, nenera mazui ba niha bö’ö tebe’e halöwö da’a. (Baso Gamaedola 1:8; 31:10, 27, 28.) Hiza’i, na so zatua si lö mangila li sasese mu’oguna’ö ba mbanua da’ö, moguna khöra wanolo ena’ö tofakha ba dödö ndraonora hadia nifaha’öra. Ba ginötö la’andrö wanolo ira satua, tenga da’ö geluahania wa latimbagö halöwö nibe’e khöra ba wangebua’ö iraonora. Hiza’i, da’a zanolo ya’ira ba wangebua’ö iraonora ba ’wame’e fotu hegöi famarou dödö moroi khö Yehowa’. (Efeso 6:4) Duma-dumania, tola la’andrö wanolo ira satua khö ndra satua sokubaloi ba mbanua niha Keriso hewisa lala si sökhi ba wamalua famaha’ö zi sambua omo hegöi ba wangalui niha si sökhi amuata si fahuwu ba ndraonora.

18, 19. (a) Hadia zi tola lafalua ira talifusöda niha Keriso tanö bö’ö ba wanolo zi bohou ebua? (b) Hadia zi lö tola lö’ö lafalua ira satua?

¹⁸ Ba wanolo iraonora, tola lakaoni nösi nomo niha bö’ö ira satua ba wefao khöra na lafalua wamaha’ö zi sambua omo. Ato göi zi bohou ebua zamaha’ö ya’ira khö ndra talifusöda niha Keriso na fao ira manuriaigö hegöi na fao ira ba wamalua hadia ia. (Gamaedola 27:17) Imane Shan nitutunö ba wamobörö, ”Itörö tödögu ndra talifusö sondrorogö ya’o.  Me latolo ndra’o ba wama’anö faosatö ni’olohesigu ba gangowuloa, itugu oya wamaha’ö nihalögu. Owua-wua dödögu me fao ndra’aga ba wamalua rekreasi.”

¹⁹ Tatu manö, niha nifili zatua ba wanolo iraonora hasambalö lafarou ndraono andrö ena’ö la’ame’egö tödö zatuara. Tola lafalua da’a na latutunö hadia manö zi sökhi sanandrösa khö zatua ba lö lahalö halöwö zatua ba wangebua’ö iraonora. Moguna göi la’angenanöi gamuatara ena’ö lö manahö-nahö dödö niha si so ba mbanua niha Keriso mazui niha si so ba zifasuira. (I Fetero 2:12) Hewa’ae la’andrö wanolo ba niha bö’ö ira satua, hasambalö ya’ira zangokhögö halöwö ba wamaha’ö iraonora ba zindruhu. Moguna lafaigi-faigi wanolo nibe’e ndra talifusöda niha Keriso tanö bö’ö.

20. Hadia nifalua zatua ba wanolo iraonora ena’ö tobali ira samosumange Yehowa si lö faröi?

²⁰ Satua, andrö wanolo khö Yehowa ba wangandrö ba falua zabölö sökhi. (Baso II Nga’ötö 15:7.) Ofönai’ö wahuwusa ndraonomö khö Yehowa moroi ba zoguna khömö samösa. Falua gofu hadia zi tola öfalua ena’ö tofakha ba dödö ndraonomö Daromali Lowalangi. Böi mamalö faduhusi tödö wa tola tobali samosumange Yehowa ndraonomö. Ba ginötö la’o’ö Daromali Lowalangi hegöi duma-duma si sökhi nibe’emö, tola örasoi hadia nirasoi zinenge sotöi Yohane sanandrösa ba ndraono. Imane ba ndraononia ba wamati, ”Fondrege wa’omuso dödögu da’ö, na urongo, latörö lala zindruhu iraono khögu.”—III Yohane 4.