Moguna ”Lö Tebulö Waʼoya Mbuami”
”Tefolakhömi Namagu na lö tebulö waʼoya mbuami ba miforomaʼö wa nifahaʼögu ami.”—YOHANE 15:8.
1, 2. (a) Hadia nitutunö Yesu khö ndra nifahaʼönia ba mbongi fatua lö mate ia? (Faigi gambara ba wamobörö wamahaʼö.) (b) Hana wa moguna tatörö tödöda hadia mbörö wa talau manuriaigö? (c) Hadia nitutunöda ba wamahaʼö daʼa?
BA MBONGI fatua lö mate Yesu, ara fahuhuo ia khö ndra sinengenia. Ifatunö wa iʼomasiʼö sibai ira. Ifatunö göi khöra gamaedola sanandrösa ba zinanö agu si no tafatunö ba wamahaʼö si oföna. Ifarou ndra nifahaʼönia enaʼö ’lö tebulö waʼoya mbuara’, eluahania moguna anau gölöra ba wanuriaigö turia sanandrösa ba Wamatörö Lowalangi.—Yohane 15:8.
2 Hizaʼi, tenga ha asala ifatunö Yesu khö ndra nifahaʼönia hadia zinangea lafalua, tobali ifatunö göi hana wa moguna lafalua daʼö. Ifatunö khöra hadia manö zi tobali tani wa moguna böi laböhöli wanuriaigö. Moguna göi khöda daʼa enaʼö tatörö tödöda hadia mbörö wa lö taböhöli wanuriaigö. Na taʼangeragö daʼa tola terou dödöda irege so khöda waʼanau gölö ba ’wamaduhuʼö ba ngawalö soi’. (Mataiʼo 24:13, 14) Ba Zura Niʼamoniʼö, so öfa mbörö wa talau manuriaigö ba tatutunö ia ba wamahaʼö daʼa. Aefa daʼö, tatutunö öfa ngawalö mbuala nibeʼe Yehowa ba wanolo yaʼita enaʼö lö aetu mowua.
TAFOLAKHÖMI YEHOWA
3. (a) Moloʼö Yohane 15:8, hadia mbörö wa manuriaigö ita? (b) Hadia niʼamaedolagö mbua nagu ba gamaedola Yesu, ba hana wa tefaudu daʼö?
3 Tani sabölö tohude wa manuriaigö ita yaʼia daʼö börö me omasi tafolakhömi Yehowa ba taʼamoniʼö döinia. (Baso Yohane 15:1, 8.) Ba gamaedola Yesu sanandrösa ba zinanö agu, iʼamaedolagö Yehowa tobali sohalöwö ba kabu nagu. Iwaʼö Yesu wa yaʼia samösa döla nagu ba no amaedola daha zoloʼö khönia. (Yohane 15:5) Ba gamaedola daʼö, bua nagu andre eluahania hadia ia niʼowua ndra nifahaʼö Yesu, mazui halöwö fanuriaigö nifaluara. Imane Yesu khö ndra sinengenia, ”Tefolakhömi Namagu na lö tebulö waʼoya mbuami.” Na iʼasogö mbua si sökhi sinanö agu andrö, tola tefolakhömi zohalöwö. Simanö göi, na taforege wamalua sabölö sökhi ba wanuriaigö turia sanandrösa ba Wamatörö Lowalangi, no tasuno mazui tafolakhömi Yehowa.—Mataiʼo 25:20-23.
Na tafalua zabölö sökhi ba wanuriaigö turia sanandrösa ba Wamatörö Lowalangi, no tafolakhömi Yehowa
4. (a) Hewisa wangamoniʼöda töi Lowalangi? (b) Hewisa dödömö me öʼokhögö döi sebua ba wangamoniʼö töi Lowalangi?
4 No teʼamoniʼö döi Lowalangi. Lö hadöi si tola tafalua enaʼö itugu teʼamoniʼö döinia. Hizaʼi, hewisa wangamoniʼöda töi Lowalangi ba ginötö manuriaigö ita? Nehegö hadia niwaʼö zamaʼeleʼö sotöi Yesaya, ”Yehowa ngahönö andrö miʼamoniʼö.” (Yesaya 8:13) Taʼamoniʼö döi Lowalangi, Yehowa, na so ba wangera-ngerada wa ha töinia wondrege zalawa moroi ba döi böʼö, hegöi ba ginötö tatolo niha enaʼö aboto ba dödöra wa no niʼamoniʼö döinia andrö. (Mataiʼo 6:9) Duma-dumania, ba ginötö tafahaʼö niha ba zindruhu sanandrösa ba mbua-bua si sökhi niʼokhögö Yehowa hegöi ohitö dödönia ba niha gulidanö enaʼö auri ira sagötö faʼara ba Waradaiso, tatolo niha enaʼö laʼila wa lö atulö niböbögö Zatana sanandrösa ba ngawölö zi lö sökhi khö Yehowa. (1 Moze 3:1-5) Tola göi taʼamoniʼö döi Lowalangi na tatolo niha enaʼö laʼila wa Yehowa andre ’no sinangea manema sumange, lakhömi ba faʼabölö’. (Famaʼeleʼö 4:11) Imane Rune si no merintis ba zi 16 fakhe faʼara, ”Uʼandrö saohagölö me no tebeʼe khögu ginötö ba wamaduhuʼö Somböi banua si yawa awö danö. Daʼö zamarou yaʼo enaʼö lö aetu manuriaigö.”
TAʼOMASIʼÖ YEHOWA HEGÖI ONONIA
5. (a) Simane nisura ba Yohane 15:9, 10, hadia mbörö wa manuriaigö ita? (b) Hewisa Yesu wanolo ira nifahaʼönia enaʼö laʼila wa moguna anau gölöra?
5 Baso Yohane 15:9, 10. Tani si dua wa taturiaigö duria sanandrösa ba Wamatörö Lowalangi yaʼia daʼö börö me taʼomasiʼö Yehowa hegöi Yesu. (Mareko 12:30; Yohane 14:15) Iwaʼö Yesu khö ndra nifahaʼönia enaʼö ’lö tebulö ira ba waʼomasinia’. Hana wa iwaʼö daʼö Yesu? Börö me iʼila wa moguna waʼanau gölö khö ndra soloʼö khönia enaʼö lö mamalö lafaudugö waʼaurira tobali niha Keriso sindruhu. Ba Yohane 15:4-10, taʼila wa asese iʼogunaʼö Yesu ngawua wehede ”lö tebulö”, ba wanolo ira nifahaʼönia enaʼö laʼila wa moguna anau gölöra.
6. Hewisa wangoromaʼöda wa lö tebulö so ita ba waʼomasi Keriso?
6 Hewisa wangoromaʼöda wa lö tebulö so ita ba waʼomasi Keriso ba taʼomusoiʼö dödönia? Yaʼia daʼö moloʼö ita khönia. Tenga ha asala iʼandrö khöda Yesu ba wamalua yaʼia, hizaʼi ibeʼe khöda duma-duma. Imane, ”Simane yaʼo me ufalua goroisa Nama ba lö tebulö ndraʼo ba waʼomasinia.” No ibeʼe khöda duma-duma Yesu.—Yohane 13:15.
7. Hewisa woloʼö andrö moʼamakhaita ia ba waʼomasi?
7 Itutunö Yesu wa foloʼö andrö moʼamakhaita ia ba waʼomasi me imane, ”Dozi sanemaʼö oroisagu ba samalua yaʼia, daʼö niha sangomasiʼö yaʼo.” (Yohane 14:21) Oroisa Yesu andrö moroi khö Namania. Ba ginötö taʼoʼö goroisania weʼamöi manuriaigö, no taʼoromaʼö wa taʼomasiʼö Yehowa. (Mataiʼo 17:5; Yohane 8:28) Ba ginötö taforomaʼö waʼomasida khö Yehowa hegöi khö Yesu, lö aetu laʼomasiʼö ita.
TAFANGELAMA NIHA
8, 9. (a) Hadia dani tanö böʼö wa manuriaigö ita? (b) Hewisa wa möi famarou dödöda wehede Yehowa si so ba Hezekieli 3:18, 19 ba 18:23 enaʼö lö aetu manuriaigö ita?
8 Tani si tölu wa manuriaigö ita yaʼia daʼö börö me omasi tabeʼe wamangelama ba niha sanandrösa ba waʼatohare luo Yehowa. Ba Zura Niʼamoniʼö, lafotöi Noakhi samösa ”sanuriaigö”. (Baso 2 Fetero 2:5.) Fatua lö tohare Molö Sabölö-bölö, ifangelama niha Noakhi sanandrösa ba waʼatekiko si lö ara tö alua. Hezo taʼila daʼö? Imane Yesu, ”Fatua lö alua Molö Sabölö-bölö, arörö niha ba wemanga-manga hegöi ba wamadu-madu, lafangowalu ndra matua ba labeʼe nihalö ndra alawe irege möi Noakhi ba nowo. Lö labeʼe dödöra irege alua Molö Sabölö-bölö ba ahori ira fefu. Simane daʼö göi zalua dania na tohare Nono niha.” (Mataiʼo 24:38, 39) Hewaʼae ato niha si lö mamondrongo nifaʼema Noakhi, lö ibato wanuriaigö turia wamangelama nitemania moroi khö Yehowa.
9 Ba ginötö andre, taturiaigö duria Wamatörö Lowalangi enaʼö tebeʼe ginötö ba niha ba wamahaʼö yaʼira sanandrösa Hezekieli 18:23) Ba ginötö manuriaigö ita ba nomo-omo hegöi ba nahia sato niha, tafangelama niha sato wa lö ara tö tohare Wamatörö Lowalangi ba ihori gulidanö si lö sökhi andre.—Hezekieli 3:18, 19; Danieli 2:44; Famaʼeleʼö 14:6, 7.
ba nifalua Lowalangi ba niha gulidanö ba zi so miföna. Simane Yehowa, sindruhu-ndruhu omasi ita na latema duria nifaʼemada ba lasöndra waʼauri. (TAʼOMASIʼÖ NIHA
10. (a) Simane nitutunö ba Mataiʼo 22:39, hadia mbörö wa manuriaigö ita? (b) Hewisa Waulo hegöi Sila wanolo samösa sozago kurunga si so ba Wilifi?
10 Tani si öfa wa lö aetu-aetu manuriaigö ita yaʼia daʼö börö me taʼomasiʼö niha. (Mataiʼo 22:39) Faʼomasi daʼa zanolo yaʼita ba wanuriaigö börö me taʼila wa tola manö faböʼö gamuata niha na faböʼö zalua ba waʼaurira. Duma-dumania, göna folohi Waulo hegöi Sila me möi ira ba mbanua Wilifi ba labeʼe ira ba gurunga. Hizaʼi me talu mbongi, alua ndruru danö sabölö-bölö irege teboka mbawandruhö gurunga andrö. Ataʼu sibai zozago kurunga börö me iwalinga no moloi niha gurunga ba edöna ibunu ia. Hizaʼi, itegu ia Faulo ba imane, ”Böi bunuʼö!” Manofu zozago kurunga andrö, ”Hadia nifaluagu enaʼö teʼorifi ndraʼo?” Imane khönia Faulo hegöi Sila, ”Faduhusi tödö Zoʼaya Yesu, enaʼö teʼorifi ndraʼugö.”—Halöwö Zinenge 16:25-34.
Manuriaigö ita börö me taʼomasiʼö Yehowa, Yesu hegöi niha böʼö (Faigi ngenoli si-5, 10)
11, 12. (a) Hadia wamahaʼö nihalöda ba niha sozago kurunga sanandrösa ba halöwö fanuriaigö? (b) Hadia mbörö wa lö taböhöli wanuriaigö?
11 Hadia wamahaʼö nihalöda ba niha sozago kurunga sanandrösa ba halöwö fanuriaigö? Me no aefa alua ndruru danö iʼanemaiʼö ifaböʼöni gamuatania sozago gurunga ba iʼandrö wanolo. Simanö göi, so ösa niha si lö omasi manemaʼö turia moroi ba Zura Niʼamoniʼö, hizaʼi te tola tebulö ira ba laʼalui wanolo ba ginötö alua gabula dödö ba waʼaurira. Duma-dumania, so ösa zabu tödö börö me laheta ira ba halöwöra mazui alua wabalisa. Tanö böʼönia so zabu tödö börö me göna ira fökhö sabölö-bölö mazui mate niha niʼomasiʼöra. Na alua zimane daʼö, te ibörögö manofu-nofu ira sanandrösa ba waʼauri, si lö irai tumbu ba dödöra ba zilalö. Tola manö göi manofu ira, ’Hadia nifaluagu enaʼö teʼorifi ndraʼo?’ Ba gafuriatania tola manö awena adöni dödöra ba duria nifaʼemada sanandrösa ba dötönafö.
12 Na lö taböhöli wanuriaigö, tola tehenaigö ita ba wameʼe fondrara dödö na inötö so niha somasi mamondrongo. (Yesaya 61:1) Imane Charlotte si no merintis ba zi 38 fakhe, ”No elungu niha iadaʼa. Moguna tebeʼe khöra ginötö ba wamondrondrongo turia somuso dödö.” Imane göi Ejvor si no merintis ba zi 34 fakhe, ”Iadaʼa, ato niha zaetu fanötöna. Omasido sibai utolo ira. Daʼö zamarou tödögu ba wanuriaigö.” Ba daʼa oroma wa faʼomasi zamarou tödöda irege lö taböhöli wanuriaigö!
BUALA SI TOLA MAMEʼE KHÖDA FAʼANAU GÖLÖ
13, 14. (a) Hadia mbuala nitutunö ba Yohane 15:11? (b) Hewisa enaʼö taʼokhögö waʼowua-wua dödö simane Yesu? (c) Hewisa waʼowua-wua dödö möi fanoloda ba wanuriaigö?
13 Ba mbongi fatua lö mate Yesu, itutunö mbuala si tola manolo ira sinengenia
enaʼö lö aetu mowua ira. Hadia mbuala andrö, ba hewisa wa tola möi fanoloda daʼö iadaʼa?14 Buala faʼowua-wua dödö. Hadia no tobali abula dödöda wanuriaigö andrö? Löʼö. Me no aefa itutunö Yesu gamaedola sanandrösa ba zinanö agu, iwaʼö wa tola tasöndra waʼowua-wua dödö ba ginötö manuriaigö ita. (Baso Yohane 15:11.) Hewisa wa tola? Törö tödöu gamaedola nibeʼe Yesu, iʼamaedolagö ia töla nagu ba no amaedola daha ndra nifahaʼönia. Moguna böi aheta ndraha moroi ba döla nagu enaʼö isöndra nidanö hegöi önia. Simanö göi, tola tarasoi waʼowua-wua dödö simane nirasoi Yesu ha na lö faröi ita khönia ba tahaogö wanara lahenia. Taʼokhögö waʼowua-wua dödö simane niʼokhögönia börö wamalua somasi Lowalangi. (Yohane 4:34; 17:13; 1 Fetero 2:21) Imane Hanne si no merintis ba zi töra 40 fakhe, ”Usöndra waʼowua-wua dödö na no aefa möido manuriaigö. Daʼa zamarou tödögu enaʼö lö aetu ufosumange Yehowa.” Faʼowua-wua dödö andre zameʼe khöda faʼabölö enaʼö lö aetu talau manuriaigö hewaʼae ato niha si lö omasi mamondrongo.—Mataiʼo 5:10-12.
15. (a) Hadia mbuala nitutunö ba Yohane 14:27? (b) Hewisa waʼohahau dödö möi fanoloda enaʼö lö mamalö mowua?
15 Buala faʼohahau dödö. (Baso Yohane 14:27.) Ba mbongi fatua lö mate Yesu, imane khö ndra sinengenia, ”Ubeʼe khömi waʼohahau dödögu.” Hewisa waʼohahau dödö moroi khö Yesu möi fanolo enaʼö lö aetu manuriaigö ita? Na lö aetu manuriaigö ita, tola tasöndra waʼohahau dödö börö me taʼila wa no taʼomusoiʼö dödö Yehowa hegöi Yesu. (Zinunö 149:4; Roma 5:3, 4; Kolose 3:15) Imane Ulf si no merintis ba zi 45 fakhe, ”Erege dödögu na no aefa manuriaigö, hizaʼi usöndra waʼohahau dödö sindruhu ba uʼila wa moʼeluaha waʼaurigu.” Taʼandrö saohagölö börö me tola taʼokhögö waʼohahau dödö sagötö faʼara!
16. (a) Hadia mbuala nitutunö ba Yohane 15:15? (b) Hewisa enaʼö lö mamalö tobali si fahuwu khö Yesu ndra sinengenia?
16 Buala fahuwusa. Me no aefa iwaʼö khö ndra sinengenia Yesu wa omasi ia na laʼokhögö waʼowua-wua dödö, itutunö hana wa moguna sibai laforomaʼö waʼomasi soroi ba dödö. (Yohane 15:11-13) Aefa daʼö imane, ”Ukaoni ami si fahuwu.” No sambua buala sebua böli na tobali si fahuwu khö Yesu! Hizaʼi, hewisa enaʼö lö mamalö tobali si fahuwu khönia ndra sinengenia? Itutunö Yesu, ”Ufataro ami enaʼö lö tebulö waʼoya mbuami.” (Baso Yohane 15:14-16.) Eluahania, böi aetu manuriaigö ira. Dua fakhe fatua lö iwaʼö daʼö, imane khö ndra sinengenia, ”Miʼaeʼe ba mituriaigö, ’No ahatö Wamatörö Lowalangi ba zorugo.’” (Mataiʼo 10:7) Ba mbongi fatua lö mate ia, ifarou ndra nifahaʼönia enaʼö anau gölöra ba halöwö fanuriaigö. (Mataiʼo 24:13; Mareko 3:14) Aboto ba dödö Yesu wa lö aoha wamalua niwaʼönia. Hizaʼi, tola lafalua daʼö ba lö mamalö tobali ira si fahuwu khönia. Hewisa wa tola? So mbuala tanö böʼö si tola manolo.
17, 18. (a) Hadia mbuala nitutunö ba Yohane 15:7? (b) Hewisa wa tola tobali fanolo khö ndra nifahaʼö Yesu mbuala andrö? (c) Hadia mbuala sanolo yaʼita iadaʼa?
17 Buala fanema li moroi ba wangandröda. Imane Yesu, ”Miʼandrö gofu hadia zomasi ami ba tebeʼe khömi.” (Yohane 15:7, 16) Sindruhu-ndruhu möi famarou dödö ndra sinenge Yesu zi no ifabuʼu! * (Faigi nisura ba gahe zura.) Lö laʼila ira sinenge wa lö ara tö mate Yesu. Hizaʼi, tenga daʼö geluahania wa lö khöra fanolo na no aefa mate ia. Hasambalö ifondrondrongo wangandröra Yehowa ba itolo ira ba halöwö fanuriaigö. Ba ifalua daʼö. Lö ara me no aefa mate Yesu, laʼandrö ira sinenge khö Yehowa enaʼö so khöra waʼabarani, ba ifondrondrongo wangandröra Yehowa.—Halöwö Zinenge 4:29, 31.
Tola faduhu dödöda wa hasambalö ifondrondrongo wangandröda Yehowa ba wanolo yaʼita (Faigi ngenoli si-18)
18 Alua göi zimane daʼö iadaʼa. Na anau gölöda ba halöwö fanuriaigö, lö mamalö tobali ita si fahuwu khö Yesu. Tola faduhu dödöda wa ifondrondrongo wangandröda Yehowa ba ginötö taʼandrö khönia wanolo na abua khöda wamalua fanuriaigö. (Filifi 4:13) Taʼandrö sibai saohagölö me ifondrondrongo wangandröda Yehowa ba tobali ita si fahuwu khö Yesu. Buala moroi khö Yehowa andre zameʼe khöda faʼabölö enaʼö lö aetu mowua ita.—Yakobo 1:17.
19. (a) Hana wa lö aetu manuriaigö ita? (b) Hadia zanolo yaʼita ba wangasiwai halöwö nibeʼe Lowalangi?
19 Ba wamahaʼö daʼa, no tafahaʼö ita öfa ngawalö dani hana wa lö aetu talau manuriaigö: ba wamolakhömi Yehowa hegöi ba wangamoniʼö töinia, ba wangoromaʼö faʼomasida khö Yehowa hegöi khö Yesu, ba wamangelama niha, hegöi ba wangoromaʼö faʼomasida ba niha. No tafahaʼö göi ita ba zi öfa ngawua mbuala yaʼia daʼö: faʼowua-wua dödö, faʼohahau dödö, fahuwusa hegöi fanema li moroi ba wangandröda. Buala andrö zameʼe khöda faʼabölö ba wangasiwai halöwö si no ibeʼe khöda Lowalangi. Omuso sibai dödö Yehowa na iʼila wa taforege ’enaʼö lö tebulö waʼoya mbuada’!
^ par. 17 Sagötö fahuhuo Yesu khö ndra sinengenia, asese ifasugi ba dödöra wa hasambalö ifondrondrongo wangandröra Yehowa.—Yohane 14:13; 15:7, 16; 16:23.