1, 2. (a) Hana wa tefarou dödöda na so ndra talifusöda si lö aetu manuriaigö ba mbanuara hewaʼae ato zi lö mamondrongo? (Faigi gambara ba wamobörö wamahaʼö.) (b) Hadia niwaʼö Yesu sanandrösa ba wanuriaigö ”ba mbanuania”? (Faigi nisura ba gahe zura.)

SERGIO HEGÖI OLINDA, sambua fongambatö si no tobali perintis ba Amerika Serikat. Töra 80 fakhe ndröfira. Barö-barö daʼa, agafökhö gahera na mofanö. Simane si toʼölö lafalua ba zi hauga fakhe, ero bözi fitu sihulö wongi latörö tanö weʼamöi ba nahia sato niha si so ba mbanuara. Mozizio ira ahatö ba nahia waʼatebato bus ba labeʼe publikasi ba niha sanörö lala. Ato niha si lö omasi, hizaʼi Sergio hegöi Olinda lö aetu laboho mbawa ba niha samaigi yaʼira. Ba zi laluo, latörö tanö zui wangawuli ba nomo. Mahemolunia bözi fitu sihulö wongi, ifuli möi ira ba nahia waʼatebato bus. Ba zi hauga fakhe, lö mamalö manuriaigö ira önö kali ba zi samigu ero sihulö wongi.

² Simane Sergio hegöi Olinda, ato ndra talifusöda si lö faröi ba wanuriaigö ba mbanuara samösa ba zi hauga fakhe,  hewaʼae ato niha si lö omasi mamondrongo. Te simanö göi nirasoimö. Masuno ndraʼugö börö me so khöu waʼanau gölö ba lö mamalö manuriaigö ndraʼugö hewaʼae abua wamalua yaʼia. * (Faigi nisura ba gahe zura.) Ato ndra talifusöda si teʼaroʼö börö duma-dumamö hewaʼae no ara ira ba wamati. Nehegö hadia niwaʼö ndra satua samasui, ”Ba ginötö falulu fohalöwö ndraʼo khö ndra talifusöda si lö faröi ba wanuriaigö, itugu teʼaroʼö ndraʼo ba duma-dumara.” ”Faʼalöfaröira zamarou yaʼo enaʼö so khögu waʼanau gölö hegöi faʼabarani ba wanuriaigö.” ”Duma-dumara andre zameʼe khögu faʼowua-wua dödö.”

3. Hadia tölu wanofu-nofu nitutunöda, ba hadia mbörö?

³ So tölu wanofu-nofu nitutunöda ba wamahaʼö daʼa: Hana wa itaria ide-ide dödöda? Hadia geluahania mowua? Hadia zi tola manolo yaʼita enaʼö mowua irege anau gölö? Na taʼila wanema li ba wanofu daʼa, tola anau gölöda ba wamalua halöwö fanuriaigö si no ibeʼe khöda Yesu.

4. (a) Hewisa dödö Waulo me ato niha Yahudi si lö omasi mamondrongo turia nifaʼemania? (b) Hana wa irasoi zimane daʼö Faulo?

⁴ Hadia no irai so khöu waʼide-ide dödö börö me so niha ba mbanuamö si lö omasi mamondrongo turia nifaʼemamö sanandrösa ba Wamatörö Lowalangi? Na noa, tola aboto ba dodöu nirasoi zinenge sotöi Faulo. No manuriaigö ia mato 30 fakhe ba ato niha si no itolo tobali niha Keriso. (Halöwö Zinenge 14:21; 2 Korindro 3:2, 3) Hizaʼi, lö ato niha Yahudi si no itolo tobali niha Keriso. Ato ba gotaluara zi lö omasi mamondrongo turia nifaʼema Waulo, ba so ösa zamakao yaʼia. (Halöwö Zinenge 14:19; 17:1, 4, 5, 13) Hewisa dödö Waulo ba nifaluara andrö? Imane, ”Abu sibai dödögu ba lö aetu-aetu tefakao ndraʼo.” (Roma 9:1-3) Hana wa irasoi zimane daʼö? Börö me iʼomasiʼö niha hegöi halöwö fanuriaigö. Sindruhu-ndruhu iʼameʼegö tödö niha Yahudi Faulo ba abu dödönia me lö omasi latema waʼahakhö dödö Lowalangi.

5. (a) Hadia zamarou tödöda ba wamalua hölöwö fanuriaigö? (b) Hana wa no sinangea na itaria ide-ide dödöda?

⁵ Simane Faulo, manuriaigö ita ba niha börö me taʼameʼegö tödö ira ba omasi ita wanolo yaʼira. (Mataiʼo 22:39; 1 Korindro 11:1) No tarasoi samösa wa fangaʼi halöwö khö Yehowa no sambua lala sabölö sökhi ba waʼauri. Ba omasi tatolo niha enaʼö larasoi zimane daʼö! Daʼö mbörö wa lö aetu-aetu tafarou dödöra enaʼö lafahaʼö ira ba zindruhu sanandrösa khö Yehowa hegöi ohitö dödönia ba niha gulidanö. Hulö no amaedola tabeʼe khöra mbuala si sökhi ba tamane khöra, ’Tema mbuala andre.’ Na lö latema, no sinangea ’abu sibai dödöda’ simane nirasoi Waulo. Na abu dödöda, tenga daʼö geluahania wa no alö wamatida, hizaʼi börö me sindruhu-ndruhu taʼomasiʼö niha. Böi taböhöli wanuriaigö hewaʼae itaria ide-ide dödöda. Te fao dödöda khö Elena si no töra 25 fakhe merintis me imane, ”Abua khögu halöwö fanuriaigö. Hewaʼae simanö, daʼö halöwö sabölö omasido.”

6. Hadia wanofu nitutunöda iadaʼa?

⁶ Hana wa faduhu dödöda wa tola mofozu wanuriaigöda gofu hezo manuriaigö ita? Enaʼö tola taʼila wanema linia, datatutunö dombua gamaedola Yesu me iwaʼö wa moguna ”mowua” ita. (Mataiʼo 13:23) Amaedola si oföna yaʼia daʼö sanandrösa ba zinanö agu.

7. (a) Ba gamaedola nibeʼe Yesu, haniha niʼamaedolagö ’sohalöwö’, ’töla nagu’, ba ’daha’? (b) Hadia wanofu sinangea tabeʼe fanema li?

⁷ Baso Yohane 15:1-5, 8. Ba gamaedola daʼa, itutunö Yesu wa Yehowa ”zohalöwö”, Yesu samösa ”döla nagu”, ba ira nifahaʼönia zi tobali ’daha’. * (Faigi nisura ba gahe zura.) Aefa daʼö, imane Yesu khö ndra sinengenia, ”Tefolakhömi Namagu na lö tebulö waʼoya mbuami ba miforomaʼö wa nifahaʼögu ami.” Na simanö, hadia geluahania mowua? Ba gamaedola nibeʼenia, lö nifatunö Yesu hadia mbua geu andrö hizaʼi ibeʼe khöda wanuturu lala enaʼö taʼila wanema li ba wanofu daʼö.

8. (a) Ngawua wehede ”mowua” ba gamaedola Yesu, hadia daʼö geluahania enaʼö tatolo niha irege tobali nifahaʼö Yesu? (b) Hadia zindruhunia niʼandrö Yehowa khöda?

⁸ Imane Yesu sanandrösa khö Namania, ”Itiboʼö fefu ndraha si lö mowua.” Eluahania, tola tobali ita samosumange Yehowa ha na mowua ita. (Mataiʼo 13:23; 21:43) Ba gamaedola daʼa, mowua andre tenga daʼö geluahania wa tabaliʼö niha tobali nifahaʼö. (Mataiʼo 28:19) Na daʼö geluahania, tola muʼamaedolagö ndra Samaduhuʼö si lö faröi tobali daha si lö mowua börö me lö aʼozu ira ba wanolo niha irege tobali nifahaʼö Yesu. Tatu lö tefaudu daʼö! Hadia mbörö? Börö me tebai tafaso niha enaʼö tobali ira nifahaʼö. Yehowa andrö no faʼomasi. Lö irai iʼandrö khöda zi tebai tafalua, ha si tola tafalua.​—5 Moze 30:11-14.

9. (a) Hewisa enaʼö tola mowua ita? (b) Hadia gamaedola nitutunöda aefa daʼa?

⁹ Na simanö hadia geluaha mowua? Daʼö halöwö si tola tafalua maʼafefu. Hadia halöwö nibeʼe Yehowa ba nono mbanuania maʼafefu? Manuriaigö turia somuso dödö sanandrösa ba Wamatörö Lowalangi. * (Faigi nisura ba gahe zura.) (Mataiʼo 24:14) Oroma daʼö ba gamaedola Yesu sanandrösa ba zamazaewe tanömö. Datatutunö gamaedola daʼö.

10. (a) Hadia geluaha danömö hegöi tanö ba gamaedola Yesu? (b) Hadia niʼasogö döla gandru?

¹⁰ Baso Luka 8:5-8, 11-15. Ba gamaedola Yesu sanandrösa ba zamazaewe tanömö, itutunö wa tanömö zinanö yaʼia daʼö ’taromali Lowalangi’ mazui turia sanandrösa ba Wamatörö Lowalangi. Tanö, eluahania tödö zi samösa niha. Tanömö saekhu ba danö si sökhi, tola mowaʼa, moliwiö ba tobali sinanö. Aefa daʼö ”mowua ia 100 winaeta”. Na sinanö andrö töla gandru, hadia niʼowuania? Hadia töla gandru side-ide? Tatu tenga, iʼasogö danömö si tola tedou ba tobali töla gandru. Ba gamaedola daʼa,  sambua tanömö tola iʼasogö 100 danömö. Hadia wamahaʼö si tola tahalö ba daʼa sanandrösa ba wanuriaigö?

11. (a) Ba halöwö fanuriaigö nifaluada, hadia wamahaʼö nihalöda ba gamaedola sanandrösa ba zamazaewe tanömö? (b) Hewisa enaʼö tola taʼasogö danömö si bohou?

¹¹ Me awena lafahaʼö ita ira satuada si no tobali niha Keriso mazui ira Samaduhuʼö tanö böʼö sanandrösa ba Wamatörö Lowalangi, no amaedola latanö danömö ba danö si sökhi. Omuso sibai dödöra me laʼila wa tatema duria andrö. Daʼö no amaedola danömö si tumbu ba tedou irege mowua. Simane daha gandru nitutunöda no mege, lö iʼasogö ndraha si bohou, hizaʼi tanömö si bohou. Simanö göi ita, lö taʼasogö nifahaʼö si bohou, hizaʼi tanömö si bohou. * (Faigi nisura ba gahe zura.) Hewisa wamaluada daʼö? Ero tafatunö ba niha böʼö sanandrösa ba Wamatörö Lowalangi, no amaedola taʼoyaʼö ba tafazaewe danömö si so ba dödöda. (Luka 6:45; 8:1) Na lö aetu-aetu taturiaigö duria sanandrösa ba Wamatörö Lowalangi, tola ’mowua ita irege anau gölö’.

12. (a) Hadia wamahaʼö nihalöda ba gamaedola Yesu sanandrösa ba nagu hegöi samazaewe tanömö? (b) Hewisa dödömö ba wamahaʼö daʼa?

¹² Hadia wamahaʼö nihalöda ba gamaedola Yesu sanandrösa ba nagu hegöi samazaewe tanömö? No tafahaʼö ita wa tenga balazi lafondrondrongo niha duria nifaʼemada awena tola ”mowua”. Hizaʼi, tola mowua ita na lö taböhöli wanuriaigö. Imane Faulo, ”Latema sa luora zamösana balazi halöwöra.” (1 Korindro 3:8) Ifahowuʼö ita Yehowa börö halöwö nifaluada, tenga börö mbua moroi ba halöwöda. Imane Matilda si no merintis ba zi 20 fakhe, ”Omuso dödögu börö me uʼila wa ifahowuʼö nifaluada Yehowa.”

13, 14. Moloʼö Roma 10:1, 2, hadia mbörö wa lö aetu manuriaigö Waulo?

¹³ Hadia zanolo yaʼita enaʼö ’mowua irege anau gölö’? Datahaogö tatutunö duma-duma Waulo. No taʼila wa so khö Waulo waʼide-ide dödö börö me lö latema  ira niha Yahudi duria nifaʼemania sanandrösa ba Wamatörö Lowalangi. Hewaʼae simanö, lö mamalö manuriaigö ia khöra. Itutunö hewisa dödönia sanandrösa ba niha Yahudi me imane, ”Somasi dödögu ba angandröwagu khö Lowalangi enaʼö teʼorifi ira. Ufaduhuʼö wa owölö-ölö ira ba wangai halöwö Lowalangi, hizaʼi tenga moloʼö faʼaboto ba dödö si tefaudu sanandrösa khö Lowalangi.” (Roma 10:1, 2) Na simanö, hadia mbörö wa lö mamalö manuriaigö Waulo?

¹⁴ Si oföna, iwaʼö Faulo wa terou dödönia manuriaigö ba niha Yahudi börö me ’somasi dödönia’. Omasi sibai ia enaʼö teʼorifi ira. (Roma 11:13, 14) Si dua, iwaʼö wa no ’angandröwania khö Lowalangi’. Iʼandrö Faulo khö Yehowa enaʼö ifarou dödö niha Yahudi ba wanemaʼö turia sanandrösa ba Wamatörö Lowalangi. Si tölu, imane Faulo, ”Owölö-ölö ira ba wangai halöwö Lowalangi.” Iʼila Faulo mbua-bua si sökhi niʼokhögö zi samösa niha ba wamosumange Yehowa. Aboto ba dödönia wa owölö-ölö niha Yahudi irege tola tobali ira nifahaʼö Keriso sowölö-ölö simane yaʼia.

15. Hewisa woloʼöda Faulo? Beʼe duma-duma.

¹⁵ Hewisa woloʼöda Faulo? Si oföna, moguna taʼalui niha ”somasi manöndra faʼauri si lö aetu”. Si dua, taʼandrö khö Yehowa enaʼö itolo niha satulö tödö ba  wamondrondrongo hadia nituriaigöda. (Halöwö Zinenge 13:48; 16:14) Daʼö nifalua Silvana si no arakhagö 30 fakhe tobali perintis. Imane, ”Fatua lö möido ba zi sambua omo si so ba mbanuagu, ulau mangandrö khö Yehowa enaʼö ibeʼe khögu gera-era si sökhi.” Tola göi mangandrö ita enaʼö latolo ita ira malaʼika ba wanöndra niha somasi mamondrongo turia nifaʼemada. (Mataiʼo 10:11-13; Famaʼeleʼö 14:6) Imane Robert si no merintis ba zi töra 30 fakhe faʼara, ”Sindruhu-ndruhu owua-wua dödögu me falulu fohalöwö khö ndra malaʼika börö me aboto ba dödöra hadia zalua ba zi sambua omo.” Si tölu, moguna tafaigi hadia gamuata si sökhi niʼokhögö niha ba tatötöna enaʼö tobali ira samosumange Yehowa. Imane Carl samösa satua sokubaloi si no tebayagö idanö ba zi töra 50 fakhe, ”Uʼalui gamuata si sökhi fondrege zide-ide ba zi samösa niha simane na iboho mbawa, faʼafahuwunia mazui fanofunia soroi ba dödö.” Na tafalua zimane daʼö tola ’mowua ita irege anau gölöda’ simane Faulo.

16, 17. (a) Hadia wamahaʼö si tola tahalö ba Zangombakha 11:6? (b) Hewisa wa tola möi fanolo ba niha böʼö halöwö fanuriaigö nifaluada?

¹⁶ Böi olifu ita wa halöwö fanuriaigö nifaluada tola möi fanolo ba niha böʼö, hewaʼae na ba wamaigida hulö lö hadöi niha somasi mamondrongo. (Baso Zangombakha 11:6.) Lanehe-nehegö ita niha moroi ba lagu wonukhada si sökhi, fangosinangegöda niha böʼö hegöi faʼafahuwuda ba niha. Tola manö adöni dödöra ba ibörögö laʼokhögö lala wangera-ngera si sökhi sanandrösa khöda hewaʼae ba zilalö lö omasi ira khöda. No larasoi daʼö ira Sergio hegöi Olinda.

¹⁷ Imane Sergio, ”Börö me mofökhöga, hauga kali lö si möiga ba nahia sato niha. Me mafuli möi, lamane khöma niha sanörö lala, ’Hadia zalua? No ara lö niʼilama ami.’” Inönö wangombakha Olinda ba iboho mbawa, ”Ladada ndraʼaga solohe bus ba so göi zolohe bus zoʼao moroi ba bus imane, ’Sökhi sibai halöwömi!’ Laʼandrö göi khöma majalah.” Tokea sibai Sergio hegöi Olinda me so samösa ndra matua sangondrasi yaʼira me lazago nahia mbuku si so gaolo-gaolo ba ibeʼe khöra mbunga, ba iʼandrö saohagölö ba halöwö si no lafalua.

18. Hadia mbörö wa öhalö gangetula enaʼö ’mowua irege anau gölömö’?

¹⁸ Sagötö lö ’öböda dangau’ ba wangombakha ba niha böʼö sanandrösa ba Wamatörö Lowalangi, öʼokhögö halöwö si sökhi ba wamaʼema ”famaduhuʼö ba ngawalö soi”. (Mataiʼo 24:14) Tola ösöndra waʼomuso dödö sabölö ebua börö me no öʼomusoiʼö dödö Yehowa. Iʼomasiʼö fefu niha ’sowua irege anau gölö’!