1. Me no aekhu ba horö Gadamo hegöi Khawa, hadia niʼombakhaʼö Yehowa sanandrösa ba nududa?

ABOTO ba dödö Gadamo wa tebai fahuhuo gulö. Ba ginötö fahuhuo gulö khö Khawa, te iʼila Adamo wa no eheha zi fahuhuo andrö. (1 Moze 3:1-6) Lö aboto ba dödö Gadamo hegöi Khawa haniha geheha andrö. Hewaʼae simanö, abölö ifondrondrongo Adamo wehede daʼö ba mamadaö ia khö Namania sebua faʼomasi si so ba zorugo. (1 Timoteo 2:14) Ba ginötö daʼö, ibörötaigö oya niʼombakhaʼö Yehowa sanandrösa ba nudu si lö sökhi andrö ba ifabuʼu wa hasambalö ihori. Hizaʼi fatua lö alua daʼö, ibeʼe Yehowa wamangelama wa eheha si fahuhuo moroi ba gulö hasambalö iʼuduni niha sangomasiʼö Lowalangi.​—1 Moze 3:15.

2, 3. Hadia mbörö wa lö oya niʼombakhaʼö Yehowa sanandrösa khö Zatana fatua lö tohare Mesia?

² Lö irai iʼombakhaʼö khöda Yehowa haniha döi malaʼika samadaö andrö. * (Faigi nisura ba gahe zura.) Me no aefa 2.500 fakhe alua wamadaö ba Gedena, awena iʼombakhaʼö  Yehowa haniha zamadaö andrö. (Yobi 1:6) Lafotöi ia ”Satana”, eluahania ”Samadaö”. Ha tölu mbuku zanutunö Satana ba Mbuku Niʼamoniʼö Heberaiʼo yaʼia daʼö 1 Ngaʼötö, Yobi hegöi Zakharia. Hadia mbörö wa lö oya wangombakha sanandrösa ba nudu andre fatua lö tohare Mesia?

³ Lö izara-zara Yehowa wangombakha ba Mbuku Niʼamoniʼö Heberaiʼo sanandrösa khö Zatana hegöi nifaluania. Börö me ohitö dödö Mbuku Niʼamoniʼö Heberaiʼo yaʼia daʼö ba wanolo niha enaʼö laʼila haniha Mesia ba tobali ira soloʼö khönia. (Luka 24:44; Galatia 3:24) Me no aefa tohare Mesia, iʼogunaʼö ia Yehowa hegöi ira nifahaʼönia ba wangombakha khöda ngawalö hadia ia sanandrösa khö Zatana hegöi khö ndra malaʼika si fao khönia. * (Faigi nisura ba gahe zura.) Tefaudu daʼa börö me iʼogunaʼö Yesu hegöi niha nibayoini Yehowa ba wangohori Satana hegöi soloʼö khönia.​—Roma 16:20; Famaʼeleʼö 17:14; 20:10.

4. Hadia mbörö wa lö moguna ataʼu ita khö Gafökha?

⁴ Iʼamaedolagö Satana Afökha andrö Fetero hulö simane ’singo sindröndrö-ndröndrö’, ba ifotöi göi ia Yohane ’ulö satua’ ba ”naga sebua”. (1 Fetero 5:8; Famaʼeleʼö 12:9) Hizaʼi, lö moguna ataʼu ita khö Gafökha börö me so ndrohu-ndrohu waʼabölönia. (Baso Yakobo 4:7.) Ilumöʼö ita Yehowa, Yesu hegöi ira malaʼikania si lö faröi. Börö wanolo moroi khöra, andrö wa tola talawa nududa. Hizaʼi, moguna taʼila wanema li moroi ba zi tölu fanofu andre: Hawaʼebua kuaso Zatana? Hewisa lala Zatana ba wamaelungu niha? Ba hadia manö zi tebai ifalua? Datatutunö hadia wanema li moroi ba zinofu daʼa ba tafaigi hadia wamahaʼönia khöda.

5, 6. Hana wa tebai iheta fefu gabula dödöda famatörö niha gulidanö?

⁵ Ato malaʼika si fao khö Zatana ba wamadaö khö Lowalangi. Fatua lö alua Molö Sabölö-bölö, so ösa ndra malaʼika nidönisi Zatana ba wamalua faʼorudu ba ndra alawe. Iʼamaedolagö ia Sura Niʼamoniʼö hulö naga satoru moroi ba mbanua si yawa, ba sambua niʼotölu ndröfi si fao khönia. (1 Moze 6:1-4; Yuda 6; Famaʼeleʼö 12:3, 4) Me no laröi nösi nomo Lowalangi ira malaʼika andre, möi ira barö wamatörö Zatana. Yaʼira andre tenga ngawawa si lö toföfö. Ifasindro wamatörönia Satana ba dalu mbanua si fakhili-khili ba Wamatörö Lowalangi. Ibaliʼö ia razo, idöniaʼö malaʼika si lö sökhi, ibeʼe khöra waʼabölö, ba ibaliʼö ira samatörö ulidanö.​—Efeso 6:12.

⁶ Iʼogunaʼö organisasinia Satana ba wondröniaʼö famatörö niha gulidanö.  Tola faduhu dödöda ba daʼö, börö me iforomaʼö khö Yesu ”fefu wamatörö gulidanö”, ba imane, ”Utehegö khöu wamatörö daʼa fefu awö lakhöminia, börö me no tebeʼe ba dangagu ba tola manö ubeʼe ba niha somasido.” (Luka 4:5, 6) Sindruhu sa, oya wamatörö samalua si sökhi ba nono mbanuania, ba so göi zamatörö si sökhi sanolo ono mbanuania. Hizaʼi, lö hadöi famatörö niha gulidanö si tola mangeheta fefu gabula dödöda.​—Zinunö 146:3, 4; Famaʼeleʼö 12:12.

7. Baero wangogunaʼö Zatana famatörö, hewisa göi wangogunaʼönia agama faya hegöi ngawalö lala wangalui kefe ba gulidanö? (Faigi gambara ba wamobörö wamahaʼö.)

⁷ Satana hegöi ira malaʼikania si lö sökhi laʼogunaʼö agama faya hegöi ngawalö lala wangalui kefe ba ’wamaelungu niha ba gulidanö maʼasagörö’, mazui fefu niha. (Famaʼeleʼö 12:9) Iʼogunaʼö agama faya Satana ba wamöbögö si lö duhu sanandrösa khö Yehowa, ba iforege ba wombiniʼö töi Lowalangi. (Yeremia 23:26, 27) Lua-luania so ösa niha si sökhi tödö sangumaʼö wa lafosumange Lowalangi, sindruhunia no malaʼika si lö sökhi nifosumangera. (1 Korindro 10:20; 2 Korindro 11:13-15) Iʼogunaʼö göi ngawalö lala wangalui kefe ba gulidanö andre Satana ba wolimo niha wa kefe hegöi harato zameʼe khöra faʼomuso dödö. (Gamaedola 18:11) Niha si faduhu tödö ba daʼö laʼogunaʼö waʼaurira ba wamosumange ’Anaʼa’ tenga Lowalangi. (Mataiʼo 6:24) Niha si no mangomasiʼö Lowalangi tola manö lö saʼae iʼomasiʼö Lowalangi börö me abölö iʼomasiʼö harato.​—Mataiʼo 13:22; 1 Yohane 2:15, 16.

8, 9. (a) Hadia zi dombua famahaʼö si tola tahalö moroi ba wamadaö Gadamo ba Khawa hegöi khö ndra malaʼika? (b) Hadia gunania khöda me no taʼila wa Satana zamatörö ulidanö andre?

⁸ So dombua wamahaʼö sabölö moguna si tola tahalö moroi ba wamadaö Gadamo ba Khawa hegöi ira malaʼika. Si oföna, tafahaʼö ita wa moguna tatatugöi haʼökhö faʼawö ita, khö Yehowa mazui khö Zatana. (Mataiʼo 7:13) Si dua, tafahaʼö ita wa lö oya mbua nitemada na faʼawö ita khö Zatana. Tola latatugöi samösa ira Adamo ba Khawa hadia zatulö ba si fasala. So göi waʼabölö khö ndra malaʼika si lö sökhi ba wokuasoi famatörö niha gulidanö. (1 Moze 3:22) Hizaʼi, na fao ita khö Zatana hasambalö lö sökhi lua-luania. Maʼifu lö hadöi gunania!​—Yobi 21:7-17; Galatia 6:7, 8.

⁹ Hadia gunania me no taʼila wa Satana zamatörö ulidanö? Daʼa zanolo yaʼita enaʼö taʼokhögö lala wangera-ngera si tefaudu khö ndra samatörö ba tefarou ita ba wanuriaigö turia somuso dödö. Aboto ba dödöda wa omasi Yehowa na tafosumange ndra samatörö. (1 Fetero 2:17) Iʼandrö khöda enaʼö taʼoʼö huku nibeʼe ndra samatörö asala lö fatimba daʼö ba nifakhoinia. (Roma 13:1-4) Hizaʼi, moguna göi tatörö tödöda enaʼö böi faʼawö  ita ba böi tatuhini ngawalö partai politik mazui ira sondröniaʼö ba gulidanö andre. (Yohane 17:15, 16; 18:36) No taʼila wa no iforege Satana ba wombiniʼö töi Yehowa hegöi ba wangobousi töinia. Moguna taforege ba wamahaʼö niha ba zindruhu sanandrösa khö Lowalangida. Omuso dödöda börö me taʼotöigö ba taʼogunaʼö döinia. Abölö sökhi wangomasiʼö Lowalangi moroi ba wangomasiʼö kefe mazui harato.​—Yesaya 43:10; 1 Timoteo 6:6-10.

10-12. (a) Hadia nifalua Zatana ba wondrönisi tödö ndra malaʼika? (b) Hadia wamahaʼö si tola tahalö moroi ba zalua khö ndra malaʼika andre?

¹⁰ Onekhe sibai Zatana ba wamaelungu niha hegöi ira malaʼika. Enaʼö tola lafalua zomasi dödönia, itaria iʼogunaʼö lakhö si möi fondröni dödö ba iʼodödögö ba wamakao yaʼira.

¹¹ Iʼogunaʼö lakhö Satana ba wondrönisi dödö ndra malaʼika sato. Te no ara inehe-nehegö hadia zi tola mondrönisi tödöra. So ösa ndra malaʼika si no tedönisi tödö irege lalau mohorö ba ndra alawe. Tobali niha segebua boto ndraonora ba safaito, ba lafakao niha ba zi fasuira. (1 Moze 6:1-4) Tenga ha fohorö niʼogunaʼö Zatana ba wondrönisi dödö ndra malaʼika andre, hizaʼi te ifabuʼu göi khöra wa tola lafatörö fefu niha gulidanö. Ifalua daʼö enaʼö lö aʼozu zi no ifaʼeleʼö Yehowa sanandrösa ba ’maʼuwu ndra alawe andrö’. (1 Moze 3:15) Hizaʼi, lö itehegö Yehowa alua gohitö dödö Zatana andrö. Iʼasogö Molö Sabölö-bölö enaʼö lö alua gohitö dödö Zatana hegöi ira malaʼikania.

¹² Hadia wamahaʼönia khöda? Moguna mangelama ita enaʼö lö tedönisi dödöda ba wamalua fohorö hegöi faʼasiliyawa. Ira malaʼika si fao khö Zatana andre no ara fao ira khö Lowalangi ba zorugo! Hewaʼae simanö, ato moroi ba gotaluara zi lö manimbagö isö-isö dödöra si fasala, ba itugu abölö wangisöra andrö. Böi olifu ita, tola manö tumbu ba dödöda  gisö-isö dödö si fasala hewaʼae no ara ita ba wamosumange Yehowa. (1 Korindro 10:12) Andrö, moguna asese tafareso hadia zi so ba dödöda ba tatimbagö wangera-ngera si fasala ba wamalua fohorö hegöi faʼasiliawa!​—Galatia 5:26; baso Kolose 3:5.

13. Hadia wondrönisi dödö tanö böʼö niʼogunaʼö Zatana, ba hewisa ita ba wanimbagö daʼö?

¹³ Aboto ba dödö Zatana wa so waʼadöni dödö niha sanandrösa ba wakelemusa. Iadaʼa, iʼogunaʼö agama hegöi hiburan enaʼö adöni dödö niha ba mbekhu. Film, game, hegöi hiburan tanö böʼö, lahaogö wamaehagö fakelemusa, irege na mufaigi ia hulö lö fasala. Hewisa enaʼö lö adöni dödöda ba daʼö? Lö nizara-zara organisasi Lowalangi wanutunö ngawalö hiburan si sökhi ba si lö sökhi. Moguna tafahaʼö dödöda side-ide enaʼö tola tahalö gangetula si sökhi si tefaudu ba goi-goi Yehowa. (Heberaiʼo 5:14) Ba na taʼokhögö waʼomasi si ’lö famini tödö’ khö Lowalangi, tola tahalö gangetula si sökhi. (Roma 12:9) Niha samini tödö, sambua niwaʼönia ba sambua nifaluania. Andrö, ba ginötö tafili hiburan, moguna tasofu khöda samösa, ’Hadia ufalua goi-goi simane nifahaʼögu ba niha? Hadia zi so ba wangera-ngera niha nifahaʼögu ba Zura Niʼamoniʼö mazui niha nifalukhaisigu ba wanuriaigö na laʼila hiburan nifiligu?’ Na tafalua goi-goi si no tafahaʼö ba niha, aoha khöda ba wanimbagö fondrönisi dödö moroi khö Zatana.​—1 Yohane 3:18.

14. Hadia nifalua Zatana ba wamakao yaʼita, ba hewisa enaʼö tola tataögö daʼö?

¹⁴ Iʼalui lala ba wamakao yaʼita Satana ba ifetaʼu enaʼö faröi ita khö Yehowa. Duma-dumania, tola manö ifarou ndra samatörö enaʼö lö latehegö tafalua halöwö fanuriaigö. Iʼogunaʼö göi ndra awöda wohalöwö mazui awöda sekola ba wangoʼaya yaʼita börö me taʼoʼö goi-goi Zura Niʼamoniʼö. (1 Fetero 4:4) Tola göi iʼogunaʼö nosi nomoda si tenga si sara lala wamati ba wanaisi yaʼita weʼamöi ba gangowuloa, hewaʼae sindruhunia sökhi gohitö dödöra. (Mataiʼo 10:36) Hewisa  enaʼö böi awuwu ita ba wamakao nibeʼe Zatana? Böi tokea ita na göna ita folohi, börö me taʼila wa isuwö ita Satana. (Famaʼeleʼö 2:10; 12:17) Aefa daʼö, moguna göi tatörö tödöda: No ifobahulu ita Satana wa tafosumange Yehowa ha na aoha khöda wamalua yaʼia, ba na göna ita fanandraigö taröi Lowalangi. (Yobi 1:9-11; 2:4, 5) Andrö, böi mamalö taʼandrö waʼabölö moroi khö Yehowa. Moguna tatörö tödöda wa lö irai iröi ita Yehowa.​—Heberaiʼo 13:5.

15. Hadia tola ifaso ita Satana ba wamalua si lö omasi ita? Tutunö.

¹⁵ Tebai ifaso niha Satana ba wamalua si lö omasi lafalua. (Yakobo 1:14) Ato niha gulidanö si lö mangila wa no faʼawö ira khö Zatana. Hizaʼi, ba ginötö ifahaʼö ia si samösa niha ba zindruhu, moguna ifili hadia faʼawö ia khö Yehowa mazui khö Zatana. (Halöwö Zinenge 3:17; 17:30) Na tahalö gangetula ba woloʼö khö Lowalangi, tebai isaisi waʼalöfaröida Satana.​—Yobi 2:3; 27:5.

16, 17. (a) Hadia nasa zi tebai ifalua Satana hegöi ira malaʼikania? (b) Hadia mbörö wa lö moguna ataʼu ita ba wangebuaʼö lida na mangandrö ita khö Yehowa?

¹⁶ So danö böʼö si tebai ifalua Satana hegöi ira malaʼikania si lö sökhi. Duma-dumania, lö irai iwaʼö Sura Niʼamoniʼö wa laʼila hadia zi so ba wangera-ngerada mazui ösi dödöda. Ha Yehowa ba Yesu zi tola mangila daʼö. (1 Zamueli 16:7; Mareko 2:8) Börö daʼö, hadia moguna ataʼu ita na taʼebuaʼö lida ba ginötö fahuhuo mazui na mangandrö, börö me tola irongo Afökha hegöi ira malaʼikania si lö sökhi ba laʼogunaʼö daʼö ba wanandraigö yaʼita? Löʼö! Hadia mbörö? Angeragö daʼa: Lö ataʼu ita ba wamalua si sökhi ba wamosumange Yehowa hewaʼae iʼila Afökha daʼö. Simanö göi, lö moguna ataʼu ita ba wangebuaʼö lida ba wangandrö hewaʼae tola irongo Afökha. Itutunö Sura Niʼamoniʼö wa ato zamosumange Lowalangi sangebuaʼö lira ba wangandrö, ba lö irai tabaso wa ataʼu ira wamalua daʼö ha börö me irongo-rongo Afökha. (1 Razo 8:22, 23; Yohane 11:41, 42; Halöwö Zinenge 4:23, 24) Na tafaudugö wehede hegöi nifaluada ba zomasi Lowalangi, tola faduhu dödöda wa lö itehegö Yehowa khö Gafökha ba wamakao yaʼita sagötö faʼara.​—Baso Zinunö 34:8.

¹⁷ Moguna aboto ba dödöda haniha nududa, hizaʼi lö moguna ataʼu ita khönia. Hewaʼae lö moʼahonoa ita, tola takalaisi Zatana börö wanolo moroi khö Yehowa! (1 Yohane 2:14) Na talawa ia, moloi ia khöda. (Yakobo 4:7; 1 Fetero 5:9) Iadaʼa, sabölö igohi Satana yaʼia daʼö ira si bohou ebua. Hewisa enaʼö tola lalawa wanandraigö moroi khö Gafökha andre? Tatutunö dania ba wamahaʼö aefa daʼa.