ARTIKEL WAMAHAʼÖ 22
Douʼö ba Wamahaʼö Yaʼugö Samösa!
”Mitatugöi hadia zabölö moguna”—FIL. 1:10.
SINUNÖ 35 Tatugöi Zabölö Moguna
NITUTUNÖ *
1. Hana wa so ösa niha sambö terou tödö ba wamahaʼö yaʼira?
IADAʼA ato niha sangodödögö wohalöwö ba wangalui kefe. Ato ndra talifusöda so halöwö ero maʼökhö ba wombönökhi soguna ba nösi nomora. Ato göi zangohorigö inötöra ero maʼökhö ha ba weʼamöi ba naha wohalöwö hegöi mangawuli ba nomo. Ato göi zamalua halöwö sabua. Daʼö mbörö wa erege sibai dödöra na no larugi nomo! Lö saʼae faʼabölöra ba wamahaʼö yaʼira.
2. Hezo ginötö niʼogunaʼöu ba wamahaʼö yaʼugö?
2 Sindruhunia, moguna tabeʼe ginötöda ba wamahaʼö yaʼita ba Daromali Lowalangi hegöi ba publikasida, börö me ba daʼö teʼodaligö wahuwusada khö Yehowa hegöi faʼauri si lö aetu! (1 Tim. 4:15, 16) So ösa zahulö maoso ero si hulö wongi ba ifahaʼö ia ba ginötö lö nini-nini, ba ohahau wangera-ngerara börö me no mörö ira ba zi bonginia. Tanö böʼönia, so zameʼe inötönia ba wamahaʼö hegöi ba woʼangerönusi Zura Niʼamoniʼö hegöi publikasida ba zi bongi, ba ginötö lö nini-nini.
3-4. Hadia wombulöʼö nitemada sanandrösa ba nibaso, ba hadia mbörö?
3 Tatu fao dödöu wa moguna sibai wameʼe inötö ba wamahaʼö samösa. Hizaʼi hadia niʼogunaʼöda ba wamahaʼö yaʼita? Tola manö ömane, ’Oya sibai zinangea mubaso, hizaʼi lö sagu khögu.’ So ösa ndra talifusöda si tola mombaso fefu pubilkasida hegöi ba wamaigi fefu video nitemada si teʼodane-dane ba Zura Niʼamoniʼö. Hizaʼi, ato göi ndra talifusöda abua khöra ba wameʼe inötö ba wamalua yaʼia. Aboto ba dödö ndra Boto Solohe zalua andre. Börö daʼö, lahalö gangetula enaʼö laʼalösi ba wameʼe khöda informasi nicetak hegöi ba Internet.
Fil. 1:10) Datatutunö hewisa enaʼö tola ötatugöi hadia zabölö moguna ba hadia mbuania na öfahaʼö ndraʼugö samösa ba Zura Niʼamoniʼö.
4 Duma-dumania, lö saʼae lafazökhi Buku Tahunan Saksi-Saksi Yehuwa, börö me oya waö-waö waʼauri si möi famarou dödö si no tefaʼanö ba jw.org® hegöi program JW Broadcasting®. Majalah Manuriaigö edisi umum hegöi Sadarlah! ha tölu kali lafazökhi ba zi döfi. So wombulöʼö daʼa tenga enaʼö tahorigö ginötöda ba wamalua si lö moʼamakhaita ba wamosumange Yehowa. Ohitö dödö ba wameʼe fombulöʼö daʼa yaʼia daʼö enaʼö tola teʼosambuaʼö dödöda ba ”zabölö moguna”. (TATUGÖI HADIA ZABÖLÖ MOGUNA
5-6. Hadia manö publikasi sinangea tafahaʼö yaʼita?
5 Hadia zinangea taʼofönaiʼö? Moguna tabeʼe ginötöda ba wamahaʼö yaʼita ba Daromali Lowalangi ero maʼökhö. No muʼalösi waʼoya ayati nibaso nifaʼanö ba wombaso Sura Niʼamoniʼö barö migu ba gangowuloa, enaʼö oya ginötö niʼogunaʼöda ba woʼangerönusi hadia zi no tabaso ba tafalua riset. Ohitö dödöda tenga ha ba wombaso fefu ayati si no mutatugöi, hizaʼi enaʼö tofakha ba dödöda nösi Zura Niʼamoniʼö ba itugu ahatö ita khö Yehowa.—Zin. 19:15.
6 Hadia nasa zinangea tafahaʼö yaʼita? Tatu manö, moguna tafaʼanö Wamahaʼö Manuriaigö hegöi Famahaʼö Zura Niʼamoniʼö ba Gangowuloa ba tanö böʼönia si no mufaʼanö ba gangowuloa barö migu. Moguna göi tabaso ero so edisi Manuriaigö hegöi Sadarlah!
7. Hadia moguna ide-ide dödöda na tebai tabaso mazui tafaigi fefu zi no mufaʼanö ba situs Webda hegöi ba JW Broadcasting?
7 Tola manö ömane, ’Lau. Hizaʼi, hewisa göi artikel hegöi video si so ba situs Webda, jw.org ba tanö böʼönia si so ba JW Broadcasting? Oya sibai daʼö!’ Nehegö duma-duma daʼa: Ba zi sambua restoran, so ngawalö gö sami si no mufaʼanö ba dete meza, ba tola lafili samösa niha sowöli hezo zomasi ira. Hizaʼi, niha sowöli tebai latandraigö ngawalö gö si no lahenaigö. Ha maʼifu gö zi tola lafili ba gö si no lahenaigö andrö. Simanö göi, na tebai öbaso ba öfaigi fefu zi no mufaʼanö ba elektronik, böi ide-ide dödöu. Baso mazui faigi zi sagu khöu. Datatutunö hadia gunania na tafahaʼö ita ba hadia zinangea tafalua enaʼö tobali fanolo khöda ba ginötö tafahaʼö ita samösa.
MOGUNA WANGODÖDÖGÖ BA WAMALUA FAMAHAʼÖ!
8. Hadia manö nifaluada ba ginötö tafaʼanö majalah Manuriaigö, ba hewisa enaʼö tola tatema mbuania?
8 Ba ginötö öfahaʼö ndraʼugö, osambuaʼö dödöu ba zi no öbaso enaʼö tola ösöndra wamahaʼö sabölö moguna. Na öfahaʼö ndraʼugö, böi alio-liokö wombaso ba tenga ha asala ökhoi wanema linia. Ba ginötö öfaʼanö Wamahaʼö Manuriaigö, si oföna baso nitutunö si so ba wamobörö wamahaʼö. Aefa daʼö, baso ba angeragö duho sebua si so ba wamahaʼö, tuho side-idenia hegöi fanofu famuli furi. Aefa daʼö haogö ba wombaso wamahaʼö andrö. Nehegö ngawua wehede sangoromaʼö hadia nitutunö ba zi sambua ngenoli. Si toʼölönia, no tefaʼanö ia ero ba wamobörö zi sambua ngenoli. Sasesenia ngawua wehede daʼö zanolo yaʼugö ba wangiʼila hadia nitutunö ba ngenoli andrö. Ba ginötö öbaso zi sambua famahaʼö, angeragö wa fefu ngenolinia möi fotuhini duho side-ide hegöi tuho sebua ba wamahaʼö andrö. Sura ngawua wehede sambö aboto ba dödöu hegöi somasi öriset.
9. (a) Ba ginötö tafahaʼö ita ba Manuriaigö, hana wa moguna sibai tanehegö fefu ayati si no mufaʼanö, ba hewisa wamaluada daʼö? (b) Moloʼö Yosua 1:8, hadia zinangea tafalua ba ginötö tabaso ayati?
9 Famahaʼö Manuriaigö nifalua ba gangowuloada, tobali fanolo khöda enaʼö aboto ba dödöda Zura Niʼamoniʼö. Börö daʼö, nehegö fefu ayati si no mufaʼanö ba wamahaʼö, mendrua manö na mubaso ia ba ginötö mututunö wamahaʼö daʼö ba gangowuloa. Angeragö ngawua wehede si so ba ayati si tobali rahu-rahu ba zi sambua ngenoli andrö. Aefa daʼö, angerönusi ayati nibasou ba hewisa wamalua yaʼia ba waʼauriu.—BasoSatua, fahaʼö ndraonomö hewisa lala ba wamahaʼö samösa (Faigi ngenoli si-10) *
10. Moloʼö Heberaiʼo 5:14, hana wa moguna laʼogunaʼö ginötö Wamahaʼö zi Sambua Omo ira satua, ba wamahaʼö iraonora hewisa lala ba wamahaʼö yaʼira samösa hegöi ba wamalua riset?
10 Tatu omasi zatua na so waʼomuso dödö ba ndraonora ba ginötö mufalua Wamahaʼö zi Sambua Omo ero migu. Börö daʼö, moguna lafaʼanö hadia zinangea mufatunö ba Wamahaʼö zi Sambua Omo. Ato nösi nomo zomuso tödö ba ginötö lafalua halöwö si tohude simane ba wamazökhi owo Noakhi. Hizaʼi, lö moguna lafalua ero migu wamahaʼö simane daʼö. Tola göi lafaigi program JW Broadcasting. Tenga ha daʼö manö zi tola mufalua, moguna göi khö ndra satua ba wamahaʼö iraonora hewisa lala ba wamahaʼö yaʼira samösa. Duma-dumania, moguna lafahaʼö ira hewisa lala ba wamaʼanö bua gera-erara ba gangowuloa mazui ba wamalua riset ba ginötö so gabula dödöra ba zekola. (Baso Heberaiʼo 5:14.) Na labeʼe ginötöra ba wamahaʼö yaʼira ba nomo, tola itugu alio aboto ba dödöra hadia nifaʼema ba gangowuloa hegöi ba kebaktian, hewaʼae na lö hadöi video. Tatu manö, satua zotatugöi hawaʼoya ginötö niʼogunaʼö ba wamahaʼö iraonora, teʼodaligö ba ndröfi hegöi amuata ndraonora.
11. Hana wa moguna tafahaʼö niha nifahaʼöda ba Zura Niʼamoniʼö lala ba wondrouʼö wamahaʼö yaʼira samösa?
11 Moguna göi laʼila niha nifahaʼöda ba Zura Niʼamoniʼö hewisa lala ba wamahaʼö yaʼira samösa. Me awena lafahaʼö ira ba Zura Niʼamoniʼö, tatu omuso dödöda ba ginötö lakhoi wanema li ba ginötö lafaʼanö wamahaʼö ba Zura Niʼamoniʼö mazui soguna ba gangowuloa. Hizaʼi moguna tatolo niha nifahaʼöda ba Zura Niʼamoniʼö ba wamalua riset hegöi lala enaʼö itugu ladouʼö ba wamahaʼö yaʼira samösa. Irege ba ginötö so gabula dödöra, lö moguna manofu ira khö ndra talifusö tanö böʼö si so ba gangowuloa hadia zinangea lafalua. Aboto ba dödöra, hewisa lala ba wangalui samösa mene-mene moroi ba publikasida si tobali fanolora.
OKHÖGÖ GOHITÖ DÖDÖ BA GINÖTÖ ÖFAHAʼÖ NDRAʼUGÖ
12. Hadia gohitö dödöda ba ginötö tafahaʼö ita?
12 Na lö omasi ndraʼugö ba wamahaʼö yaʼugö samösa, tola manö öwaʼö tödöu wa lö irai öʼomasiʼö daʼö. Sindruhunia tola. Ba wamobörö böi araʼö ginötöu ba wamalua yaʼia, ba aefa daʼö özara-zara ba wondrouʼö ginötöu. Tatu manö ohitö dödöda si oföna yaʼia daʼö enaʼö itugu ahatö ita khö Yehowa. Tola manö so gohitö dödö somasi takhamö ba wamalua famahaʼö, simane ba wameʼe fanema li ba wanofu niha mazui ba wangalui informasi ba gabula dödö nitaögöda.
13. (a) Tutunö hadia zinangea ifalua si samösa si bohou ebua ba wanutunö hadia nifaduhusinia tödö ba zekola. (b) Hewisa wamaluau mene-mene si so ba Kolose 4:6?
13 Duma-dumania, hadia sekola nasa ndraʼugö? Tola manö lafalua ulang tahun ira awömö ba kelas. Tola manö omasi ötutunö khö ndra awöu hadia mbörö wa lö fao ndraʼugö khöra ba wamalua daʼö, hizaʼi ataʼu ndraʼugö ba wanutunö yaʼia. Daʼa zangoromaʼö wa moguna öfahaʼö ndraʼugö! So dombua gohitö dödö si tola öʼokhögö: (1) enaʼö faduhu dödömö wa lö möi fangomusoiʼö dödö Lowalangi ulang tahun andrö, ba (2) enaʼö tola itugu sökhi ba wanutunömö sindruhu. (Rom. 1:20; 1 Fet. 3:15) Si oföna, moguna öʼangeragö daʼa, ’Hadia niwaʼö ndra awögu si tobali dane-dane khöra wa lafalua ulang tahun?’ Aefa daʼö, haogö ba wamalua riset ba publikasida. Tola manö lö abua ba wanutunö hadia nifaduhusiu tödö simane nikhalaigöu. Ato niha samalua ulang tahun ha börö me lafalua daʼö niha böʼö. Ba ginötö ösöndra sambua mazui dombua zi tobali fanema li, tola ötolo nawöu somasi mangila hadia zindruhu.—Baso Kolose 4:6.
DOUʼÖ WAʼOMASIMÖ BA WAMAHAʼÖ
14-16. (a) Hadia zi tola öfalua ba wamahaʼö yaʼugö sanandrösa ba mbuku sambö aboto ba dödöu si so ba Zura Niʼamoniʼö? (b) Tutunö hewisa ayati niʼogunaʼöu tobali fanolo khöu enaʼö itugu aboto ba dödöu mbuku Gamosi. (Faigi göi kotak ” Okhögö Waʼaboto ba Dödö ba Niha si So ba Zura Niʼamoniʼö!”)
14 Khalaigö atö na duma-dumania ba gangowuloa mifönada, labaso ba latutunö sambua mbuku moroi ba Zura Niʼamoniʼö nisura ndra samaʼeleʼö side-ide, * tola manö ambö aboto ba dödöu mbuku daʼö. Enaʼö tola öʼila daʼö, douʼö waʼomasimö ba wangiʼila hadia nisura zamaʼeleʼö andrö. Hewisa enaʼö tola omasi ndraʼugö ba wamalua yaʼia?
15 Si oföna, sofu khöu samösa, ’Hadia niʼilagu sanandrösa ba niha sanura mbuku andre? Haniha ia, hezo toröi ia, hadia halöwönia?’ Ba ginötö tadouʼö ba wamahaʼö yaʼita sanandrösa ba niha sanura andrö, itugu aboto ba dödöda hadia mbörö wa iʼogunaʼö ngawua wehede mazui duma-duma. Ba ginötö öbaso Zura Niʼamoniʼö, faigi ngawua wehede sanolo yaʼugö ba wokhalaigö hewisa niha sanura andrö.
16 Aefa daʼö, alui hamega tesura mbuku andrö. Enaʼö aoha khöu ba wangiʼila yaʼia faigi ba ”Daftar Buku-Buku Alkitab” si no tesura ba gamaudu tanö furi ba Kitab Suci Terjemahan Dunia Baru. Tola öfaigi nasa ba mbuku Fanuturu Lala ba Wamahaʼö Taromali Lowalangi ba ngaʼörö 14-17 sanutunö ndra samaʼeleʼö hegöi razo-razo. Na buku nifahaʼöu yaʼugö si so ba Zura Niʼamoniʼö manandrösa ba wamaʼeleʼö, moguna öʼila hadia zalua ba götö zanura mbuku andrö. Simane, hadia manö zi lö sökhi nifalua niha irege lafatenge khöra zamaʼeleʼö ba wanolo yaʼira enaʼö latimbagö daʼö? Haniha zauri ba götö andrö si fagölö khönia? Enaʼö itugu aboto ba dödöu moguna öfaigi mbuku tanö böʼö si so ba Zura Niʼamoniʼö. Duma-dumania, enaʼö itugu aboto ba dödömö hadia zalua ba götö zamaʼeleʼö sotöi Amosi, moguna öbaso mbuku 2 Razo hegöi 2 Ngaʼötö si no so ba referensi silang ba Gamosi 1:1. Aefa daʼö faigi nisura Hosea, yaʼia zauri ba götö Gamosi. Na öʼogunaʼö fefu daʼö, tola tobali fanolo khöu ba wangiʼila hewisa waʼauri niha ba götö Gamosi.—2 Raz. 14:25-28; 2 Nga. 26:1-15; Hos. 1:1–2:2; Gamo 1:1.
TÖNGÖNI NGAWALÖ ZIDE-IDE
17-18. Ba duma-duma si so ba ngenoli daʼa mazui duma-duma nisöndramö samösa, tutunö hewisa informasi side-ide tola tobali fanolo khöu enaʼö omasiʼö ba wamahaʼö samösa.
17 Ba ginötö tabaso Zura Niʼamoniʼö, no si sökhi na tadouʼö waʼomasida ba wamahaʼö yaʼita samösa. Duma-dumania, khalaigö wa öbaso hadia nifaʼeleʼö Zakharia ba faza 12 sanandrösa ba waʼamate Mesia. (Zakh. 12:10) Ba ginötö öfaigi ayati 12, so ngawua wehede nibasou, ”maʼuwu Natano”, mege-ege ira börö me mate Mesia. Moroi na öʼaliokö ba wombaso yaʼia, baga na öbato sabata ba öʼangeragö, ’Hadia gamakhaita maʼuwu Natano khö Mesia? Hezo tola muʼila sanandrösa khöra?’ Moguna öfalua riset. Duma-dumania, tola öfaigi referensi silang si so ba Kitab Suci Terjemahan Dunia Baru. Ba Zakharia 12:12 so dombua referensi silang. Referensi silang si öföna manandrösa ia ba 2 Zamueli 5:13, 14, tola öʼila wa Natano samösa ngaʼötö moroi khö Razo Dawido. Referensi silang si dua manandrösa ba Luka 3:23, 31, sanutunö wa Yesu ngaʼötö Natano moroi khö Maria. (Faigi wp16.3 9 ngenoli 1-3.) Ba zi lö ödöna-döna adöni dödöu! Aboto ba dödöu wa no mufaʼeleʼö Yesu moroi ba ngaʼötö Dawido. (Mat. 22:42) Hizaʼi, töra 20 nono matua khö Dawido. Hadia lö möi faʼahöli-höli dödö waʼatefaudu wangombakha Zakharia wa laʼeʼesi waʼamate Yesu ira maʼuwu Natano?
18 Nehegö duma-duma tanö böʼö. Ba faza sara moroi ba mbuku Luka, tabaso wa möi malaʼika Gaberieli ba wamalukhaisi Maria ba imane sanandrösa ba nono si tumbu khönia dania, ”Tobali ia dania sebua ba lafotöi ia Ono moroi khö Wondrege Zalawa. Ibeʼe khönia Lowalangi Yehowa dadaoma duania Dawido, ba tobali ia Razo ba ngaʼötö Yakobo sagötö faʼara.” (Luk. 1:32, 33) Si toʼölönia, ha ba ngawua wehede si oföna taʼosambuaʼö dödöda ba niwaʼö Gaberieli yaʼia daʼö mufotöi khö Yesu ’Fondrege Zalawa’. Hizaʼi, ifaʼeleʼö göi Gaberieli wa tobali ”razo” Yesu. Börö daʼö, moguna tasofu khöda samösa, hadia niʼangeragö Maria sanandrösa ba niwaʼö Gaberieli. Hadia so ba wangera-ngerania wa fehede Gaberieli andrö, zanutunö wa Yesu dania zosalahini Razo Herode mazui tefarahu ia ba gotalua zanohugö famatörö ndraono Gizaraʼeli? Na tobali Yesu razo, tatu lafotöi khö Maria ina razo ba toröi nösi nomonia ba gödo razo. Hizaʼi lö nisura wa itutunö Maria khö Gaberieli sanandrösa ba daʼö. Lö irai tabaso wa iʼandrö Maria dadaoma si sökhi ba Wamatörö simane niʼandrö ndra nifahaʼö Yesu si darua. (Mat. 20:20-23) Daʼa zamaduhuʼö khöda wa Maria andrö ira alawe sangokhögö fangide-ngideʼö!
19-20. Simane niwaʼö Yakobo 1:22-25 hegöi 4:8, hadia gohitö dödöda wa tafahaʼö ita?
19 Böi olifu ita hadia gohitö dödöda wa tafahaʼö ita ba Daromali Lowalangi hegöi publikasida yaʼia daʼö enaʼö itugu ahatö khö Yehowa. Omasi göi taʼila ’hewisa zikhalada saʼae’ ba hadia zinangea tabulöʼö enaʼö omuso dödö Yehowa. (Baso Yakobo 1:22-25; 4:8.) Ero tafahaʼö ita, taʼandrö khö Yehowa enaʼö ibeʼe khöda gehehania. Taʼandrö göi khönia wanolo enaʼö tola tasöndra mbua moroi ba zi no tafahaʼö yaʼita ba taʼila hadia zinangea tabulöʼö.
20 Fefu ita tola muʼamaedolagö simane niha si lö faröi khö Lowalangi simane nisura zanura zinunö, ”Sameʼe faʼomuso dödönia oroisa Yehowa ba sangalui eluaha goroisania, bongi maʼökhö. . . . Ba hadia ia nifazökhinia, ba mofozu.”—Zin. 1:2, 3.
SINUNÖ 88 Ombakhaʼö Khögu Lalamö
^ par. 5 Si fao faʼoböwö ibeʼe khöda Yehowa zoguna ba nifaigi, ba nibaso hegöi ba wamahaʼö. Ba wamahaʼö daʼa, itolo ndraʼugö enaʼö tola öhalö gangetula ba wamahaʼö samösa hegöi buania na öfahaʼö ndraʼugö.
^ par. 14 ELUAHA NGAWUA WEHEDE: Ngawua wehede ”Samaʼeleʼö Side-ide” asese manandrösa khö ndra samaʼeleʼö sanura buku Hosea irugi Maleakhi.
^ par. 62 ELUAHA GAMBARA: Lafahaʼö ndraonora ira satua hewisa lala ba wamaʼanö Famahaʼö Manuriaigö ero migu.
^ par. 64 ELUAHA GAMBARA: Samösa dalifusöda ira matua samalua riset sanandrösa khö Gamosi samösa sanura Zura Niʼamoniʼö. Gambara tanö furinia zangoromaʼö hadia nikhalaigönia ba ginötö iʼangerönusi ayati Zura Niʼamoniʼö nibasonia.