1. Hadia nifahaʼö Daromali Lowalangi khöda?

TOLA tataögö ngawalö gabula dödö börö me Yehowa Lowalangida Samahaʼö Solakhömi. (Yes. 30:20, 21) Moroi ba Daromalinia, ibeʼe ngawalö zoguna khöda enaʼö ”tefaʼanö” ita ”ba wamalua ngawalö halöwö si sökhi”. (2 Tim. 3:17) Na taʼaurifagö nifahaʼö Zura Niʼamoniʼö, itugu atua-tua ita moroi ba niha sangumaʼö wa moguna auri ita moloʼö ”faʼatua-tua niha gulidanö”.​—1 Kor. 3:19; Zin. 119:97-100.

2. Hadia nitutunöda dania ba wamahaʼö daʼa?

² Taʼila dania wa asese manandrösa waʼatua-tua niha gulidanö ba waʼomasi nösi. Andrö, tola manö abua khöda ba wanimbagö lala wangera-ngera hegöi ba wamalua simane nifalua niha gulidanö. Imane Sura Niʼamoniʼö, ”Miʼangelama enaʼö böi so zangosawuyu yaʼami ba wamahaʼö niha gulidanö, hegöi ba waya-faya si lö boto simane si toʼölö lafalua niha.” (Kol. 2:8) Ba wamahaʼö daʼa, tatutunö dania hewisa niha si faduhu tödö ba zi dombua walimosa Zatana. Ba taʼila dania, hana wa no falimosa waʼatua-tua niha gulidanö ba hewisa waʼatua-tua moroi ba Daromali Lowalangi abölö alawa moroi ba nibeʼe gulidanö.

3-4. Hadia zi tebulö ba Amerika Serikat me abad si-20 sanandrösa ba waʼorudu?

³ Ba Amerika Serikat me abad si-20, tebulö sibai lala wangera-ngera niha sanandrösa ba waʼorudu. Me föna, ato niha si faduhu tödö wa ha ba niha si no mangowalu tola lafalua waʼorudu, ba tebai ladunö-dunö daʼö föna niha sato. Hizaʼi, lö saʼae laʼogunaʼö lala wangera-ngera simane daʼö, oi tola-tola manö iadaʼa ba wamaigi niha.

 ⁴ Me döfi 1920-an, no tebulö lala wangera-ngera niha sanandrösa ba waʼorudu mendrua manö me no aefa tefakao ira ba Wasuwöta Gulidanö I. Imane samösa peneliti, ”Laforomaʼö gamuata fohorö ba film, drama, sinunö, buku hegöi iklan.” Ba ndröfi daʼö, so ösa wanari si tola mangaʼasogö ba niha wangera-ngera sanandrösa ba wohorö hegöi lagu wonukha si lö moadu. Simane nifaʼeleʼö Zura Niʼamoniʼö sanandrösa ba ngaluo safuria, niha ba daʼö ”sangomasiʼö isö-isö dödöra”.​—2 Tim. 3:4.

5. Me döfi 1960-an, hadia zalua sanandrösa ba goi-goi woʼamuata niha ba zi sagörö ulidanö?

⁵ Me döfi 1960-an, ato niha si lö sangowalu hizaʼi toröi ira ba zi sambua omo, lafalua homoseksual hegöi fabalisa. Oya hiburan zangoromaʼö amuata fohorö. Hadia lua-luania? Isura samösa niha satua-tua, wa oya lua-lua si lö sökhi ba ginötö lö lafalua saʼae niha goi-goi sanandrösa ba gamuata. Duma-dumania, fabali zi sambua fongambatö mazui iröi nösi nomonia zi samösa satua, afatö dödö mazui sandru ba pornografi. Lua-lua tanö böʼönia yaʼia daʼö oya wökhö si fatöfa börö wamalua amuata fohorö, simane AIDS. Daʼa zangoromaʼö wa faʼatua-tua niha gulidanö no faʼambö era-era.​—2 Fet. 2:19.

6. Simane ba zomasi Zatana, hewisa wamaigi gulidanö sanandrösa ba waʼorudu?

⁶ Tefaudu ba zomasi Zatana lala wamaigi gulidanö iadaʼa sanandrösa ba waʼorudu. Omasi ia na lö tefaudu ba wangogunaʼö niha mbuala nibeʼe Lowalangi, yaʼia daʼö faʼorudu ba laʼosiwawöi mbuala wangowalu moroi khö Lowalangi. (Ef. 2:2) Niha samalua amuata fohorö, lö laʼameʼegö tödö mbuala Lowalangi ba wangokhögö iraono. Tebai lasöndra waʼauri si lö aetu.​—1 Kor. 6:9, 10.

7-8. Hana wa abölö sökhi niwaʼö Zura Niʼamoniʼö sanandrösa ba waʼorudu moroi ba wamaigi gulidanö?

⁷ Niha sanema faʼatua-tua gulidanö, no latimbagö goi-goi Zura Niʼamoniʼö börö me moloʼö yaʼira lö tefaudu daʼö. Tola manö manofu ira, ’Ba ginötö iwöwöi ita Lowalangi, hana wa ibeʼe khöda waʼedöna wamalua faʼorudu hizaʼi iwaʼö khöda wa moguna tataha dödöda wamalua daʼö?’ Labeʼe wanofu andrö börö me lawaʼö tödöra wa na omasi zi samösa niha ba wamalua hadia ia, moguna iʼanemaiʼö ifalua daʼö. Hizaʼi, faböʼö niwaʼö Zura Niʼamoniʼö. Ifahaʼö ita enaʼö tataha dödöda wamalua si lö tefaudu. (Kol. 3:5) No göi itatugöi Yehowa wa famalua faʼorudu,  ha ba niha sangowalu, börö me daʼö no buala moroi khönia si tola mangaʼasogö faʼomuso dödö. (1 Kor. 7:8, 9) Andrö wa tola lafalua waʼorudu zi darua niha si no mongambatö ba lö khöra faniasa hegöi falöʼahono dödö simane nifalua niha samalua amuata fohorö.

⁸ Faʼatua-tua gulidanö iadaʼa no faehu sibai moroi ba nifahaʼö Zura Niʼamoniʼö sanandrösa ba waʼorudu. Iwaʼö ba Zura Niʼamoniʼö, wa famalua faʼorudu tola tobali umbu waʼomuso dödö. (Gamd. 5:18, 19) Hewaʼae simanö, imane göi ba Zura Niʼamoniʼö, ”Fefu ami moguna miʼila hewisa wamatörö botomi enaʼö teʼamoniʼö ba tefolakhömi. Tenga simane soi böʼö si lö faʼaboto ba dödö Lowalangi, si tebai manaha tödöra ba wamalua horö ba lö irai atage ira.”​—1 Tes. 4:4, 5.

9. (a) Hewisa Daromali Lowalangi möi fanolo nono mbanua Yehowa ba mböröta abad si-20? (b) Hadia mene-mene si sökhi si so ba 1 Yohane 2:15, 16? (c) Simane nitutunö ba Roma 1:24-27, hadia gamuata fohorö sinangea tatimbagö?

⁹ Ba wamobörö abad si-20, lö tefaelungu nono mbanua Yehowa ba lala wangera-ngera niha ’si lö ola ba wamalua horö’. (Ef. 4:19) Lahatöʼö ira ba goi-goi Yehowa. Itutunö Watch Tower 15 Mbaŵa si Lima 1926, ”Samösa ndra matua mazui ira alawe, moguna lö taʼunö ba lö raʼiö lala wangera-ngerara hegöi nifaluara, mendrua manö ba wamaigi ndra alawe hegöi ira matua tanö böʼö.” Gofu hadia zalua ba gulidanö ba zi fasuira, lö tebulö nono mbanua Yehowa ba woloʼö faʼatua-tua moroi ba Daromali Lowalangi. (Baso 1 Yohane 2:15, 16.) Taʼandrö sibai saohagölö ba Daromali Lowalangi! Taʼandrö göi saohagölö khö Yehowa me no ibeʼe gö wamati si no ihenaigö organisasinia ba ginötö si tefaudu si tobali fanolo khöda ba wanimbagö faʼatua-tua niha gulidanö sanandrösa ba gamuata fohorö. *—Baso Roma 1:24-27.

10-11. Hadia wamangelama nibeʼe Zura Niʼamoniʼö ba ngaluo safuria?

¹⁰ No ifangelama Sura Niʼamoniʼö wa ba ngaluo safuria, amuata niha ”ha tana khöra laʼalui”. (2 Tim. 3:1, 2) Andrö lö tokea ita na taʼila wa ulidanö daʼa, ifarou dödö niha enaʼö ha tana khöra laʼalui. Imane ensiklopedia, sagötö ba ndröfi 1970-an ”oya mbuku sameʼe mene-mene hewisa lala enaʼö mofozu ba waʼauri”. Moloʼö ensiklopedia daʼö, so ösa mbuku sangumaʼö wa lö moguna ibulöʼö ia si samösa niha mazui lala wangera-ngerania. Duma-dumania, imane zi sambua mbuku, ”Omasiʼö ndraʼugö samösa börö me siga-siga ba adöni dödö niha wamaigi yaʼugö.” Iwaʼö mbuku daʼö wa moguna ba zi samösa niha enaʼö ihalö gangetula sanandrösa ba gamuata, ba tola ifalua hadia ia moloʼö nirasoinia atulö ba tefaudu.

¹¹ Hadia no irai örongo lala wangera-ngera simane daʼö? Simane daʼö göi Zatana ba wamarou Khawa. Iwaʼö Satana khönia wa ’tobali ia simane Lowalangi, saboto ba dödö si sökhi ba si lö sökhi’. (1 Moz. 3:5) Iadaʼa, ato niha sangumaʼö wa abölö baga lala wangera-ngerara moroi ba niha böʼö hegöi khö Lowalangi si tola mangumaʼö khöra hezo zatulö hegöi si fasala. Duma-dumania, oroma daʼa ba lala wangera-ngerara sanandrösa ba wangowalu.

12. Hadia lala wangera-ngera niʼokhögö gulidanö daʼa sanandrösa ba wangowalu?

¹² Ifarou woʼomo ira matua hegöi foʼomo ira alawe Sura Niʼamoniʼö enaʼö faoma  lafosumange ba lafalua mbuʼusa li ba wangowalura. Ifarou ira ba wangai angetula enaʼö lö fabali, imane, ”Andrö iʼerogö ndra amania inania niha, ba molemba ia ba ngambatönia, ba tobali ha sambua boto ira.” (1 Moz. 2:24) No faehu sibai daʼa ba waʼatua-tua niha gulidanö sangumaʼö wa moguna laʼosambuʼö dödöra ha ba zoguna khöra samösa. Iwaʼö zi sambua buku sanandrösa ba wabalisa, wa ba zi hauga soi na mangowalu niha, fawuʼu li ira föna niha sato wa hasambalö fao ira sandrohu faʼauri. Ato niha sombulöʼö mbuʼusa li andrö ba lawaʼö wa lö tebulö fao ira khö ngambatöra ha fatua lö si taya waʼomasi ba gotaluara. Möi famakiko nösi nomo lala wangera-ngera simane daʼa, ba iʼasogö waʼafatö dödö. Lala wangera-ngera si lö mamosumange fangowalu no sambua famahaʼö si lö baga.

13. Hadia mbörö wa fatuwu khö Yehowa niha si fayawa?

¹³ Imane Sura Niʼamoniʼö, ”Dozi niha si fayawa, ba niʼogorofi Yehowa.” (Gamd. 16:5, Terjemahan Dunia Baru.) Hana wa fatuwu khö Yehowa niha si fayawa? Sambua mbörönia yaʼia daʼö, niha simane daʼö no laʼokhögö ba ladou ba wangomasiʼö yaʼira samösa simane niforomaʼö Zatana. Khalaigö, omasi Zatana enaʼö mangalulu khönia Yesu ba ifosumange ia, hewaʼae Yesu andre niʼogunaʼö Lowalangi ba wamazökhi fefu hadia ia! (Mat. 4:8, 9; Kol. 1:15, 16) Niha sangokhögö lala wangera-ngera sanandrösa ba wangofönaiʼö soguna khönia samösa, no tobali tandra wa faʼatua-tua niha gulidanö daʼa no faʼambö era-era ba khö Lowalangi.

14. Hewisa Roma 12:3 ba wanolo yaʼita ba wangokhögö lala wangera-ngera si tefaudu sanandrösa ba wangofönaiʼö soguna khöda samösa?

¹⁴ Itolo ita Sura Niʼamoniʼö ba wangokhögö lala wangera-ngera si tefaudu sanandrösa ba wangofönaiʼö soguna khöda samösa. Itutunö khöda hezo ndrege ba wangomasiʼö yaʼita samösa. Imane Yesu, ”Omasiʼö nawöu simane faʼomasiu ndraʼugö,”  eluahania moguna taʼameʼegö tödö zoguna khöda samösa hizaʼi ba zi tefaudu. (Mat. 19:19) Hizaʼi, lö irai ifahaʼö ita Sura Niʼamoniʼö wa abölö alawa ita moroi ba niha böʼö. Imane, ”Böi mifaʼudu mazui miʼosebua. Si sökhinia miʼide-ideʼö ami, enaʼö alawa niha böʼö miwaʼö tödömi.”​—Fil. 2:3; baso Roma 12:3.

15. Hana wa örasoi abölö sökhi mene-mene Zura Niʼamoniʼö sanandrösa ba wangofönaiʼö soguna khöda samösa?

¹⁵ Iadaʼa, ato niha sagatua-tua sangoʼaya mene-mene Zura Niʼamoniʼö sanandrösa ba wangofönaiʼö soguna khönia samösa. Lawaʼö na öʼofönaiʼö zoguna ba niha böʼö moroi ba khöu samösa, labaliʼö fangaluira ndraʼugö. Hizaʼi, hadia lua-luania na muʼoʼö niwaʼö gulidanö Zatana andre? Hadia zi no öʼila? Hadia omuso dödö niha sangalui tana khönia? Hadia laʼokhögö waʼohahau dödö ba nösi nomora? Hadia laʼokhögö zindruhu si fahuwu? Hadia laʼokhögö wahuwusa khö Lowalangi? Moroi ba zi no öʼila, hezo zabölö sökhi, ba woloʼö faʼatua-tua niha gulidanö daʼa mazui ba woloʼö faʼatua-tua moroi ba Daromali Lowalangi?

16-17. Hadia manö zi tola taʼandrö saohagölö ba hadia mbörö?

¹⁶ Niha soloʼö mene-mene moroi ba waʼatua-tua niha gulidanö, no amaedola niha sanofu khö nawönia ba ginötö elungu ira ba lala. Imane Yesu sanandrösa ba niha ”satua-tua” ba götönia, ”Niha sauʼa ira, sanuturu lala ba nawöra sauʼa. Na iʼohe danga nawönia sauʼa awönia sauʼa, faoma aekhu ira ba goho-koho.” (Mat. 15:14) Sindruhu sa, wa faʼatua-tua niha gulidanö iadaʼa no sambö tödö khö Lowalangi.

¹⁷ Lö tebulö mene-mene moroi ba Zura Niʼamoniʼö sangoromaʼö wa ”moguna ia ba wamahaʼö, ba wangotuʼö, ba wangaʼazökhi, ba wamomaha ba waʼatulö”. (2 Tim. 3:16) Taʼandrö sibai saohagölö khö Yehowa me iʼogunaʼö organisasinia ba wolumöʼö yaʼita moroi ba waʼatua-tua niha gulidanö iadaʼa! (Ef. 4:14) Ibeʼe khöda gö ba wamati si tola mangaroʼö yaʼita enaʼö lö mangiwa ba woloʼö goi-goi si so ba Daromalinia. No ibeʼe khöda Yehowa waʼatua-tua hegöi fanuturu lala si tola muʼodaligö si so ba Zura Niʼamoniʼö, no sahöli-höli dödöda daʼa!