ARTIKEL WAMAHAʼÖ 18
Faʼomasi ba Faʼatulö ba Mbanua Niha Keriso
”Faoma miʼonoro noro dödö nawömi zamösana. Na mifalua daʼö, no miʼoʼö goroisa Keriso.”—GAL. 6:2.
SINUNÖ 12 Lowalangi Fondrege Zebua, Yehowa
NITUTUNÖ *
1. Hadia zi dombua ngawalö zameʼe khöda faʼafaduhu dödö?
IʼOMASIʼÖ nono mbanuania Lowalangi Yehowa. So khönia waʼomasi, ba lö tebulö ia ba wangoromaʼö daʼö. Ba iʼokhögö göi waʼatulö. (Zin. 33:5) So dombua ngawalö zameʼe khöda faʼafaduhu dödö: (1) Afökhö dödö Yehowa ba ginötö lafalua zi lö atulö ba nono mbanuania. (2) Ifabuʼu ba nono mbanuania wa lö saʼae dania lataögö walöʼatulö andrö, ba ihuku dania niha samalua daʼö. Ba wamahaʼö si oföna moroi ba seri daʼa, * tafahaʼö ita wa Oroisa Lowalangi nifaʼema Moze ba ndraono Gizaraʼeli, teʼodane-dane ia ba waʼomasi. Daʼa zameʼe famarou dödö ba niha maʼafefu enaʼö so khöra waʼatulö, mendrua manö ba niha si tebai molumöʼö faʼaurinia samösa. (5 Moz. 10:18) Oroisa andre zangoromaʼö wa iʼameʼegö tödö sibai nono mbanuania Yehowa.
2. Hadia wanofu-nofu nitutunöda?
2 Me 33 M, lö saʼae laʼogunaʼö Goroisa Moze ba ginötö lafasindro mbanua niha Keriso. Hadia lö saʼae laʼogunaʼö niha Keriso goroisa si teʼodane-dane ba waʼomasi hegöi faʼatulö? Löʼö! Börö me no laʼokhögö goroisa si bohou niha Keriso. Ba wamahaʼö daʼa, tatutunö hadia goroisa si bohou andrö. Aefa daʼö, tabeʼe wanema li moroi ba zinofu-nofu daʼa: Hana wa tola tawaʼö wa oroisa andrö teʼodane-dane ba waʼomasi? Hana göi wa tola tawaʼö wa oroisa andrö zotuhini faʼatulö? Moroi ba goroisa andre, hewisa zinangeania niha sebua faka ba woʼameʼegö tödö niha böʼö?
HADIA GELUAHA ”GOROISA KERISO”?
3. Simane nisura ba Galatia 6:2, hadia geluahania ”goroisa Keriso”?
3 Baso Galatia 6:2. Barö ”goroisa Keriso” so niha Keriso. Lö izara-zara ba wanura oroisa andrö Yesu khö ndra nifahaʼönia, hizaʼi ibeʼe khöra wanuturu lala, fareta hegöi goi-goi. Tobali, eluaha ”goroisa Keriso” yaʼia daʼö fefu wamahaʼö Yesu. Enaʼö itugu aboto ba dödöda, oya nasa zinangea tafahaʼö yaʼita dania sanandrösa ba goroisa ba ngenoli aefa daʼa.
4-5. Hadia lala niʼogunaʼö Yesu ba wamahaʼö, ba hamega mamahaʼö ia?
4 Hadia lala niʼogunaʼö Yesu ba wamahaʼö? Si oföna, iʼogunaʼö wehedenia ba wamahaʼö niha. Mofaʼabölö wehedenia andrö börö me ifaʼema zindruhu sanandrösa khö Lowalangi, ifahaʼö hadia zindruhunia lua-lua waʼauri ba ifahaʼö wa ha Famatörö Lowalangi zi tola mangeheta niha moroi ba waʼabu dödö. (Luk. 24:19) Si dua, ibeʼe Yesu wamahaʼö moroi ba duma-dumania. Ba lala waʼaurinia, iforomaʼö khö ndra soloʼö yaʼia hewisa lala waʼauri si sökhi andrö.—Yoh. 13:15.
5 Hamega mamahaʼö Yesu? Mamahaʼö ia sagötö weʼasonia ba gulidanö. (Mat. 4:23) Lö ara me no tesusugi ia, ifahaʼö göi ndra nifahaʼönia. Duma-dumania, iforomaʼö ia khö ndra nifahaʼönia si töra 500 me owulo ira ba ibeʼe khöra fareta enaʼö ’labaliʼö nifahaʼö’ niha. (Mat. 28:19, 20; 1 Kor. 15:6) Börö me Yesu zi tobali högö ba mbanua niha Keriso, lö tebulö ia ba wameʼe fanuturu lala khö ndra nifahaʼönia hewaʼae no mangawuli ia ba zorugo. Duma-dumania me döfi 96 M, iʼandrö Yesu khö zinengenia sotöi Yohane enaʼö ibeʼe wehede famarou dödö hegöi mene-mene ba niha Keriso nibayoini.—Kol. 1:18; Fam. 1:1.
6-7. (a) Hezo tesura wamahaʼö Yesu? (b) Hewisa woloʼöda goroisa Keriso?
6 Hezo tesura wamahaʼö Yesu? Fehede Yesu hegöi nifaluania ba gulidanö no tesura ia ba zi öfa Injil. Itolo ita Buku Niʼamoniʼö Yunani Niha Keriso, enaʼö itugu aboto ba dödöda lala wangera-ngera Yesu börö me sanura yaʼia no tebeʼe khöra geheha niʼamoniʼö ba laʼokhögö lala ”wangera-ngera Keriso”.—1 Kor. 2:16.
7 Famahaʼö: Famahaʼö Yesu moʼamakhaita ia ba waʼauri. Tobali, manandrösa goroisa Keriso ba nifaluada ba nomo, ba naha wohalöwö mazui ba zekola, hegöi ba mbanua niha Keriso. Tola tafahaʼö ita ba goroisa andre na tabaso Buku Niʼamoniʼö Yunani Niha Keriso ba taʼangerönusi ia. No taʼoʼö Yoh. 8:28.
goroisa andrö na tafaudugö lala waʼaurida ba wanuturu lala, fareta hegöi goi-goi si so ba Mbuku Niʼamoniʼö Yunani Niha Keriso. Ba ginötö taʼoʼö goroisa Keriso, no moloʼö ita khö Lowalangida sebua faʼomasi sotöi Yehowa, börö me moroi khö Yehowa fefu wamahaʼö Yesu.—OROISA SI TEʼODANE-DANE BA WAʼOMASI
8. Hadia dane-dane goroisa Keriso?
8 Na sökhi wamazökhi zi sambua omo ba aro wondrasinia, tola teʼorifi ba ohahau dödö niha sangiagö yaʼia. Simanö göi, na sökhi wamazökhi zi sambua oroisa ba aro dane-danenia, tola teʼorifi ba ohahau dödö zamalua yaʼia. Oroisa Keriso teʼodane-dane ba wondrasi sabölö sökhi, yaʼia daʼö faʼomasi. Hana wa tola tawaʼö zimanö?
No taʼoʼö ”goroisa Keriso” ba ginötö taforomaʼö waʼomasi ba niha böʼö (Faigi ngenoli si-9-14) *
9-10. Beʼe duma-duma sangoromaʼö wa faʼomasi zamarou Yesu, ba hewisa woloʼöda yaʼia?
9 Si oföna, faʼomasi zamarou Yesu ba wamalua fefu hadia ia. Börö me iʼomasiʼö niha böʼö, asese iforomaʼö khöra Yesu waʼahakhö dödö. Daʼa zamarou Yesu ba wamahaʼö niha sato, ba wamadöhö niha sofökhö, ba wameʼe gö niha solofo hegöi ba wanusugi niha si no mate. (Mat. 14:14; 15:32-38; Mrk. 6:34; Luk. 7:11-15) Hewaʼae oya ahori ginötö hegöi faʼabölönia ba wamalua daʼö, itehegö ifalua daʼö börö me iʼofönaiʼö zoguna ba niha böʼö moroi ba zoguna khönia samösa. Hizaʼi, iforomaʼö waʼomasinia sabölö ebua me itehegö nosonia soguna ba niha böʼö.—Yoh. 15:13.
10 Famahaʼö: Tola taʼoʼö duma-duma Yesu ba ginötö taʼofönaiʼö zoguna ba niha böʼö moroi ba zoguna khöda samösa. Tola göi taʼoʼö duma-dumania ba ginötö tadouʼö waʼahakhö dödö ba niha si so ba zi fasuida. Daʼa zamarou yaʼita weʼamöi manuriaigö hegöi ba wamahaʼö turia somuso dödö. Na tafalua daʼö, no taʼoʼö goroisa Keriso.
11-12. (a) Hadia zangoromaʼö wa iʼameʼegö tödö ita Yehowa? (b) Hewisa woloʼöda waʼomasi Yehowa?
11 Si dua, iforomaʼö Yesu wa no sebua faʼomasi Namania. Sagötö wamaluania halöwönia, iforomaʼö Yesu wa iʼameʼegö tödö sibai nono mbanuania Yehowa. Duma-dumania, ifahaʼö Yesu wa: Fefu ita ebua sibai mbölida khö Namada si so ba zorugo. (Mat. 10:31) Omuso dödö Yehowa ba ginötö mangawuli mbiri-birinia si taya, samalalini era-era hegöi somasi mangawuli ba mbanua niha Keriso. (Luk. 15:7, 10) Iforomaʼö Yehowa waʼomasinia ba ginötö ibeʼe Nononia tobali höli khöda.—Yoh. 3:16.
12 Famahaʼö: Hewisa woloʼöda waʼomasi Yehowa? (Ef. 5:1, 2) Ba wamaigida ebua mböli ndra talifusöda ba omuso dödöda ba ginötö mangawuli khö Yehowa ”biri-biri si suna”. (Zin. 119:176) Na tatehegö ginötö hegöi faʼabölöda ba wanolo ira talifusöda mendrua manö na moguna khöra, no taforomaʼö wa taʼomasiʼö ira. (1 Yoh. 3:17) No taʼoʼö goroisa Keriso, na tafalua waʼomasi ba niha böʼö.
13-14. (a) Moloʼö Yohane 13:34, 35, hadia fareta nibeʼe Yesu khö ndra soloʼö yaʼia sinangea laforomaʼö, ba hana wa lafotöi daʼa fareta si bohou? (b) Hewisa woloʼöda fareta si bohou andre?
13 Si tölu, ibeʼe Yesu fareta khö ndra soloʼö yaʼia ba wangoromaʼö faʼomasi ba wotehegö hadia ia. (Baso Yohane 13:34, 35.) Fareta Yesu andre, no fareta si bohou börö me ifarou ba wangoromaʼö faʼomasi si lö irai so barö mbawa Goroisa nibeʼe Lowalangi ba ndraono Gizaraʼeli: Taforomaʼö waʼomasi khö ndra talifusöda simane nifalua Yesu khöda. Eluahania, taforomaʼö waʼomasi ba wotehegö hadia ia. * Taʼomasiʼö ndra talifusöda töra moroi ba wangomasiʼöda yaʼita samösa. Taʼomasiʼö sibai ira irege tatehegö waʼaurida khöra simane nifalua Yesu khöda.
14 Famahaʼö: Hewisa woloʼöda fareta si bohou andre? Tola taʼoʼö daʼö na tatehegö hadia ia ba wanolo ndra talifusöda. Tenga ha tatehegö nosoda khöra, hizaʼi moguna göi tafalua ngawalö zide-ide soguna khöra. Duma-dumania, moguna tatolo ndra talifusöda si no alawa ndröfi ba weʼamöi ba gangowuloa mazui tatehegö lö tafalua hadia ia zomasi ita enaʼö omuso dödöra. Mazui taʼandrö ita ba halöwöda enaʼö tola fao ita ba wameʼe fanolo ba waʼaniha. Na tafalua daʼö, no taʼoʼö goroisa Keriso. Moguna göi fao ita ba wangaʼasogö faʼahono dödö hegöi faʼohahau dödö bakha ba mbanua niha Keriso.
OROISA ANDRÖ MÖI FOTUHINI WAʼATULÖ
15-17. (a) Hewisa wangoromaʼö Yesu waʼatulö? (b) Hewisa woloʼöda Yesu?
15 Ngawua wehede ”faʼatulö” niʼogunaʼö ba Zura Niʼamoniʼö, eluahania mamalua hadia zatulö moloʼö somasi Lowalangi ba lö ebua zambuana. Hana wa tola tawaʼö wa ituhini waʼatulö goroisa Keriso?
Iforomaʼö Yesu waʼasökhi dödö ba ndra alawe ba ifosumange ira, simane khö ndra alawe sebua horö (Faigi ngenoli si-16) *
16 Si oföna, nehegö nifalua Yesu ba wangoromaʼö wa ituhini waʼatulö. Ba götönia, fatuwu ndra sondröniaʼö niha Yahudi ba niha si tenga Yahudi, laʼaohasi ba dödö niha Yahudi si lö sekola ba agama, ba lö lafosumange ndra alawe. Hizaʼi, tenga simane daʼö Yesu, iforomaʼö waʼatulö ba lö ebua dödö zambuana ia ba niha fefu. Itemaʼö niha si tenga Yahudi samati khönia. (Mat. 8:5-10, 13) Lö khönia fanahö-nahö tödö ba ginötö möi ia manuriaigö ba niha fefu, he si kayo hegöi si numana. (Mat. 11:5; Luk. 19:2, 9) Lö irai ifalua gamuata si lö sökhi ba ndra alawe mazui iʼoʼaya. Hizaʼi, ifosumange ba sökhi gamuatania ba ndra alawe, duma-dumania ba ndra alawe sebua horö.—Luk. 7:37-39, 44-50.
17 Famahaʼö: Tola taʼoʼö Yesu ba ginötö lö ebua dödö zambuana ita ba niha böʼö ba manuriaigö ita ba niha fefu somasi mamondrongo, he si kayo mazui si numana mazui gofu hadia agamania. Moguna göi laʼoʼö duma-dumania ira matua niha Keriso ba wamosumange ira alawe. Ba ginötö tafalua daʼö, no taʼoʼö goroisa Keriso.
18-19. Hadia wamahaʼö nibeʼe Yesu sanandrösa ba waʼatulö, ba hadia wamahaʼönia khöda?
18 Si dua, angeragö wamahaʼö Yesu sanandrösa ba waʼatulö. Ifahaʼö ndra soloʼö khönia sanandrösa ba goi-goi si tola manolo yaʼira ba wangoromaʼö faʼatulö ba niha böʼö. Duma-dumania sanandrösa ba Huku Anaʼa. (Mat. 7:12) Fefu ita omasi na lafalua khöda zatulö. Börö daʼö, moguna tafalua waʼatulö ba niha böʼö. Na tafalua daʼö, tefarou göi dödöra ba wamalua khöda faʼatulö. Hizaʼi, hewisa na lafalua khöda zi lö atulö? Ifahaʼö göi ndra nifahaʼönia Yesu enaʼö faduhu dödöra khö Yehowa wa ”hasambalö iʼasogö waʼatulö ba niha nifilinia Lowalangi, si lö mamöhöli feʼao khönia bongi maʼökhö”. (Luk. 18:6, 7) Fehede daʼö no sambua mbuʼusa li: Aboto ba dödö Lowalangi wamakao nitaögöda ba ginötö safuria andre, ba hasambalö ibeʼe khöda waʼatulö ba ginötönia.—2 Tes. 1:6.
19 Famahaʼö: Ba ginötö taʼoʼö goi-goi nifahaʼö Yesu, tola tafalua waʼatulö ba niha böʼö. Na tefakao ita börö walöʼatulö ba gulidanö Zatana andre, tola terara dödöda börö me taʼila wa ifalua dania khöda waʼatulö Yehowa.
HEWISA ZINANGEANIA GAMUATA NIHA SANGOKHÖGÖ KUASO BA NIHA BÖʼÖ?
20-21. (a) Hewisa zinangeania gamuata niha sangokhögö kuaso ba niha böʼö? (b) Hewisa woʼomo ira matua ba wotehegö hadia ia ba hewisa zinangeania gamuata zi samösa ama khö ndraononia?
20 Moloʼö oroisa Keriso, hewisa zinangeania gamuata niha sangokhögö kuaso ba niha böʼö? Börö me faʼomasi zi tobali dane-dane ba goroisa andrö, moguna ba niha
sangokhögö kuaso enaʼö iʼameʼegö tödö ba iʼomasiʼö niha böʼö. Moguna latörö tödöra wa omasi Keriso na lö taböhöli ba wamalua faʼomasi.21 Ba nösi nomo. Foʼomo ira matua moguna iʼomasiʼö woʼomonia ”simane nifalua Keriso ba mbanuania”. (Ef. 5:25, 28, 29) Foʼomo ira matua moguna iʼoʼö waʼomasi Keriso ba wotehegö hadia ia. Abölö iʼofönaiʼö zoguna khö woʼomonia moroi ba zoguna khönia samösa. So ösa woʼomo ira matua, abua khöra ba wangoromaʼö faʼomasi simane daʼö, tola manö börö me teʼebuaʼö ira ba gotalua niha si lö mangoromaʼö faʼatulö ba faʼomasi. Tola manö abua khöra ba wombulöʼö si lö baga si toʼölö lafalua, hizaʼi moguna labulöʼö daʼö börö me omasi laʼoʼö goroisa Keriso. Na iforomaʼö waʼomasi ba itehegö hadia ia foʼomo ira matua, tola ifosumange ia foʼomonia. Samösa ama, tatu iʼomasiʼö ndraononia ba lö iʼafökhöiʼö dödöra moroi ba wehede mazui ba nifaluania. (Ef. 4:31) Na ifalua daʼö, no iforomaʼö waʼomasi ba ndraononia irege larasoi waʼohahau dödö ba faʼahono dödö. Na daʼö nifalua zi samösa ama, hasambalö laʼomasiʼö ba faduhu dödö ndraononia khönia.
22. Simane niwaʼö ba 1 Fetero 5:1-3, haniha zokhö ”mbiri-biri” ba hewisa zinangeania wondrorogö yaʼira?
22 Ba mbanua niha Keriso. Moguna latörö tödöra ira satua sokubaloi wa tenga okhötara ”mbiri-biri”. (Yoh. 10:16; baso 1 Fetero 5:1-3.) Ngawua wehede ’biri-biri Lowalangi’, ”föna Lowalangi”, hegöi ”ono mbanua Lowalangi” zi tobali famasugi ba dödö khö ndra satua sokubaloi wa biri-biri andrö okhöta Yehowa. Omasi ia na laʼomasiʼö ba lahaogö-haogö khö mbiri-birinia. (1 Tes. 2:7, 8) Moguna laforomaʼö waʼomasi ira satua sokubaloi ba ginötö lafalua noro dödöra, enaʼö omuso dödö Yehowa khöra. Na lafalua daʼö, hasambalö laʼomasiʼö ba lafosumange ndra satua sokubaloi andrö ira talifusöra.
23-24. (a) Hadia noro dödö ndra satua sokubaloi ba ginötö so zamalua horö sebua? (b) Hadia zinangea latörö tödöra ba ginötö laʼasiwai gabula dödö simane daʼö?
* Simane ba wameʼe dandro mazui lakuru niha samalua sala.—Rom. 13:1-4.
23 Hadia noro dödö niʼokhögö ndra satua sokubaloi ba ginötö so zamalua horö sebua? Faböʼö halöwöra ba halöwö zanguhuku hegöi sondröniaʼö si so barö mbawa Goroisa nibeʼe Lowalangi ba ndraono Gizaraʼeli me föna. Barö mbawa Goroisa, niha si no mutuyu tenga ha ö ba wamati niʼasogönia, hizaʼi moguna göi laʼasiwai na so gabula dödö si lö moʼamakhaita ba wamati. Hizaʼi, barö mbawa goroisa Keriso, halöwö zatua sokubaloi ha ba wangasiwai zoʼamakhaita ba wamati. Aboto ba dödöra wa so ndra samatörö nifataro Lowalangi ba wangasiwai abula dödö soʼamakhaita ba kasus pidana hegöi perdata.24 Hadia noro dödö ndra satua sokubaloi ba ginötö so zamalua horö sebua ba gotalua nono mbanua niha Keriso? Laʼogunaʼö Daromali Lowalangi ba wamareso hegöi ba wangai angetula. Moguna latörö tödöra wa faʼomasi zi tobali dane-dane ba goroisa Keriso. Faʼomasi zamarou yaʼira ba woʼangeragö daʼa: Hadia zinangea mufalua ba wanolo dalifusö si so ba gorahua sorasoi lua-lua ba zala nifalua niha samalua horö? Sanandrösa ba niha samalua sala, faʼomasi zamarou ndra satua sokubaloi ba woʼangeragö: Hadia no ifalalini gera-erania? Hadia zi tola mafalua enaʼö tola ifuli fahuwu ia khö Yehowa?
25. Hadia wamahaʼö nitutunöda aefa daʼa?
25 Moguna taʼandrö saohagölö me so ita barö mbawa goroisa Keriso! Ba ginötö taʼodödögö ba woloʼö yaʼia, no fao ita fefu ba wangaʼasogö faʼatulö ba mbanua niha Keriso, larasoi waʼomasi, laʼameʼegö tödö ba so waʼohahau dödö. Iadaʼa, toröi ita ba gulidanö safönu ”niha si lö sökhi” ba ”itugu monönö waʼalösökhi”. (2 Tim. 3:13) Andrö, moguna mangelama ita. Hewisa niha Keriso ba wamalua faʼatulö Lowalangi ba ginötö alua pelecehan seksual ba ndraono? Fanema linia, so ba wamahaʼö fönada.
SINUNÖ 15 Suno Nono Siaʼa khö Yehowa!
^ par. 5 Ba wamahaʼö daʼa hegöi ba zi dombua famahaʼö aefa daʼa no faosatö moroi ba seri artikel sanutunö hana wa faduhu dödöda wa Yehowa andrö Lowalangi safönu faʼomasi ba faʼatulö. Omasi ia na latema waʼatulö ono mbanuania ba ibeʼe wondrara dödö ba niha si göna falöʼatulö ba gulidanö si lö sökhi andre.
^ par. 1 Faigi artikel ”Faʼomasi hegöi Faʼatulö ba Götö Ndraono Gizaraʼeli Me Föna” ba Manuriaigö Baŵa si Dua 2019.
^ par. 13 ELUAHA NGAWUA WEHEDE: Faʼomasi ba wotehegö hadia ia zamarou yaʼita ba wangofönaiʼö soguna ba niha böʼö moroi ba zoguna khöda samösa irege tatehegö hadia ia niʼokhögöda mazui taya hadia ia khöda ba wanolo niha böʼö mazui tabeʼe zoguna khöra.
^ par. 23 Kasus pidana yaʼia daʼö, kasus soʼamakhaita ba zanawö huku simane managö, morabu mazui mamunu niha. Kasus perdata yaʼia daʼö, kasus soʼamakhaita ba zi darua niha, ba ginötö telimo zi samösa niha irege rugi ia. Duma-dumania, amadöniwa danö, sanandrösa ba mbuʼusa li ba bisnis mazui soʼamakhaita ba woʼömö.
^ par. 61 ELUAHA GAMBARA: No mate nono lakha mbanua ono matua ba inehegö ia Yesu. Faʼahakhö dödö zamarou Yesu ba wanusugi nono andrö.
^ par. 63 ELUAHA GAMBARA: Manga Yesu ba nomo zi samösa niha Farizaiʼo sotöi Simoni. Samösa ndra alawe sohorö-horö, isasai gahe Yesu faoma tawa hörönia, iʼosi faoma mbunia, ba ibeʼe wanikha ba gahenia. Lö fao dödö Zimoni ba nifalua ndra alawe andrö, hizaʼi iʼoʼawögö ia Yesu.