1. Hadia duma-duma nibeʼe Yesu khö ndra soloʼö khönia, ba hewisa woloʼöra duma-dumania andrö? (Faigi gambara ba guli majalah.)

SAGÖTÖ feʼaso Yesu ba gulidanö, lö tebulö manuriaigö ia si fao faʼowölö-ölö, ba omasi ia na simane daʼö göi ndra soloʼö khönia. (Yoh. 4:35, 36) Me fao Yesu khö ndra nifahaʼönia, terou sibai dödöra weʼamöi manuriaigö. (Luk. 10:1, 5-11, 17) Hizaʼi, me no muraʼu ba mubunu Yesu, taya waʼaterou dödöra ba wanuriaigö. (Yoh. 16:32) Me no aefa tesusugi Yesu, ifarou ira enaʼö laʼosambuaʼö dödöra ba wanuriaigö. Ba me no manahae ia ba zorugo, lafalua halöwö fanuriaigö si fao faʼaterou dödö, irege lamane ira si faʼudu khöra, ”No mifönui Yeruzalema famahaʼömi.”​—Hal. 5:28.

2. Hewisa wamahowuʼö Yehowa halöwö fanuriaigö?

² Yesu zameʼe fanuturu lala khö ndra niha Keriso me abad siföföna ba wamalua halöwö fanuriaigö, ba ifahowuʼö ira Yehowa irege ato niha sanemaʼö turia nifaʼemara. Duma-dumania, me Fendrakose 33 M, so mato 3.000 niha nibayagö idanö. (Hal. 2:41) Iʼotarai me luo daʼö, itugu tedou waʼato ndra nifahaʼö. (Hal. 6:7) Ba no ifaʼeleʼö Yesu wa hasambalö itugu ato niha sanemaʼö turia somuso dödö ba ngaluo safuria.​—Yoh. 14:12; Hal. 1:8.

3-4. Hana wa abua wamalua halöwö fanuriaigö ba zi hauga banua, ba hadia nitutunöda ba artikel daʼa?

³ Fefu ita moguna taforege enaʼö lö tebulö manuriaigö ita si fao faʼowölö-ölö. Ba zi hauga banua, aoha wamalua daʼö. Hadia mbörö? Börö me ato niha sadöni tödö ba wamahaʼö yaʼira ba Zura Niʼamoniʼö irege so ösa ba gotaluara zi lö fakhamö lafahaʼö ira sanuriaigö. Hizaʼi, ba mbanua tanö böʼö, abölö abua wamalua halöwö fanuriaigö börö me ha fawaraö so niha ba nomo ba lö ato zadöni tödö ba Zura Niʼamoniʼö.

⁴ Na abua wamalua halöwö fanuriaigö ba mbanua si toröi yaʼugö, tola möi fanolomö wanuturu lala si so ba artikel daʼa.  Tatutunö dania hadia manö nifalua ndra talifusöda enaʼö itugu ato niha nifalukhaisira ba wanuriaigö. Ba tatutunö göi hewisa enaʼö lö tebulö manuriaigö ita si fao faʼowölö-ölö, he na lafondrondrongo duria nifaʼemada hegöi na löʼö.

5. Hadia manö daha-taha nitaögö ndra Samaduhuʼö Yehowa ba wanuriaigö?

⁵ Itugu abua khö ndra Samaduhuʼö Yehowa ba wamalukhaisi niha ba nomo. Ba mbanua si toröi yaʼira, oya apartemen mazui kompleks perumahan si no muhaogö fozago. Ba nahia simane daʼö, te so zanarogö mazui satpam, ba lö latehegö na so zi möi ba daʼö na tenga nikaoni zokhö omo. Ba mbanua böʼö, aoha khö ndra Samaduhuʼö Yehowa weʼamöi manuriaigö ba nomo-omo, hizaʼi sasesenia lö hadöi niha ba nomo. So göi ndra talifusöda si möi manuriaigö ba mbanua sagaröu ba lö ato niha si toröi ba daʼö. Tola manö aröu danö nitöröra ha ba wamalukhaisi si samösa niha, ba lö tatu na so ia ba nomo! Na alua khöda zimane daʼö, böi taböhöli wanuriaigö. Hadia zinangea tafalua enaʼö lö tobali taha-tahada fefu daʼö ba itugu ato niha nifalukhaisida ba wanuriaigö?

6. Hana wa tola muʼamaedolagö ndra sanuriaigö simane niha si fagai?

⁶ Iʼamaedolagö halöwö fanuriaigö Yesu simane fogaini iʼa. (Mrk. 1:17) Te so niha si möi fagai ba zi hauga hari faʼara, hizaʼi lö ahulu ira. Hewaʼae simanö, lö laböhöli fagai. Lafaböʼöni ginötö, nahia, mazui lala niʼogunaʼöra ba wogaini iʼa. Tola göi tafalua zimane daʼö ba wanuriaigö. Nehegö atö wanuturu lala andre.

7. Hadia mbuania na manuriaigö ita ba ginötö si faböʼö-böʼö?

⁷ Falua wanuriaigö ba ginötö si faböʼö-böʼö. Tola itugu ato niha nifalukhaisida na manuriaigö ita ba ginötö so ira ba nomo. Alio ara, hasambalö mangawuli ira ba nomo! Ato ndra talifusöda si möi manuriaigö ba zi tanö owi mazui ba zi bongi, börö me ato niha ba nomo ba ginötö simane daʼö. Baero daʼö, tola manö no lalau molombase ira sokhö omo ba omasi ira fahuhuo. Mazui, tola ötandraigö öfalua hadia niwaʼö zi samösa satua sokubaloi sotöi David. Na so ösa nomo si lö niha-niha me manuriaigö ia hegöi awönia ba zi sambua banua, hadia nifaluara? Latandraigö lafuli ira ba nomo no mege na no manuriaigö ira ba mbanua andrö mato sambua mazui dombua za. Imane, ”Tokea sibai ndraʼo börö me ato zokhö omo si so ba nomo me mafuli ndraʼaga ba daʼö ba zi mendrua kali.” *

8. Na möi ita manuriaigö, hewisa wamaluada mene-mene si so ba Zangombakha 11:6?

⁸ Böi tebulö taforege ba wamalukhaisi niha ba nomo. Daʼö wamahaʼö si tola tahalö moroi ba ayati si tobali tuho artikel daʼa. (Baso Zangombakha 11:6.) Daʼö nifalua David, si no mututunö moroi yawa. Me no hauga kali itandraigö ba wanuriaigö ba zi sambua omo, ba gafuriata tola falukha ia khö zokhö omo. Adöni dödö ndra matua andrö ba wamahaʼö yaʼia ba Zura Niʼamoniʼö ba imane, ”No toröi ndraʼo ba daʼa ba zi walu fakhe faʼara, hizaʼi lö irai möi ba nomogu ndra Samaduhuʼö Yehowa.” Imane David, ”Na no mofozu ita ba wamalukhaisi niha ba zi sambua omo, si toʼölönia omasi ira lafondrondrongo duria nifaʼemada.”

9. Hadia nifalua ndra Samaduhuʼö Yehowa enaʼö tola falukha ira ba niha si tebai lafalukhaisi ba nomo?

⁹ Falua wanuriaigö ba nahia si faböʼö-böʼö. Na abua ba wamalukhaisi niha ba nomo, so ösa ndra sanuriaigö sombulöʼö nahiara  wanuriaigö. Duma-dumania, na manuriaigö ita ba nahia sasese latörö niha ba taʼogunaʼö naha mbuku si so gaolo-gaolo, tola falukha ita ba niha si tebai tafalukhaisi ba apartemen börö me lö latehegö khöda manuriaigö ba daʼö. Baero daʼö, ato ndra sanuriaigö sorasoi wa abölö omasi niha fahuhuo mazui ba wanemaʼö publikasida na manuriaigö ita khöra ba taman, fasa, hegöi nahia bisnis. Imane samösa satua samasui sotöi Floiran, si toröi ba Bolivia, ”Möiga ba fasa hegöi nahia bisnis iʼotarai bözi satu irugi bözi tölu tanö owi börö me lö ato zowöli ba ginötö simane daʼö. Si toʼölönia, tola fahuhuo ndraʼaga khö ndra sogale ba mabörögö wamahaʼö ba Zura Niʼamoniʼö.”

10. Hadia lala tanö böʼö si tola öfalua ba wanuriaigö?

¹⁰ Falua wanuriaigö ba lala si faböʼö-böʼö. Te no asese ötandraigö ba wamalukhaisi si samösa niha. No öfaböʼö-böʼöni ginötöu wamalukhaisi yaʼia, hizaʼi lö hadöi yaʼia ba nomo. Hadia so lala tanö böʼö si tola öfalua ba wanuriaigö khönia? Imane Katarína, ”Ufaʼoheʼö zura ba niha si lö irai falukha khögu ba nomo, ba ututunö khönia hadia zinangea uwaʼö na falukha ndraʼaga menaʼö.” Hadia wamahaʼö si tola öhalö? Enaʼö tola öfaʼema duria somuso dödö ba niha fefu si so ba nahiamö wanuriaigö, tandraigö falua wanuriaigö ba lala si faböʼö-böʼö.

11. Hana wa so ösa niha si lö adöni tödö ba duria nifaʼemada?

¹¹ So ösa niha si lö adöni tödö ba duria nifaʼemada. Lawaʼö tödöra wa lö moguna lafahaʼö ira sanandrösa khö Lowalangi mazui  Sura Niʼamoniʼö. Lö faduhu dödöra khö Lowalangi börö me laʼila wa oya sibai gabula dödö ba gulidanö andre. Lö adöni dödöra ba Zura Niʼamoniʼö börö me laʼila waminisa tödö nifalua ndra sondröniaʼö ba agama, sangumaʼö wa no laʼoʼö niwaʼö ba Zura Niʼamoniʼö. So göi zarörö ba halöwöra, ösi nomora, mazui ba gabula dödö salua khöra, ba lö laʼila hewisa wa tola itolo ira Sura Niʼamoniʼö. Hewisa enaʼö lö tebulö tarasoi waʼomuso dödö hewaʼae na lö laʼameʼegö tödö duria nifaʼemada?

12. Na möi ita manuriaigö, hewisa wa tola möi fanoloda wehede nisura ba Wilifi 2:4?

¹² Ameʼegö tödö niha böʼö. Ba wamobörö, tola manö lö adöni dödö niha ba duria nifaʼemada. Hizaʼi ba gafuriata, börö me larasoi wa taʼameʼegö tödö ira, omasi ira latemaʼö duria somuso dödö. (Baso Wilifi 2:4.) Duma-dumania, imane David, si no mututunö moroi yawa, ”Na so niha sangumaʼö wa lö adöni dödönia, mafuli ba tasima Zura Niʼamoniʼö mazui publikasida ba mamane khönia, ’Hadia tola maʼila hana wa örasoi zimane daʼö?’” Tola larasoi niha na taʼameʼegö tödö ira. Tola manö olifu ira hadia niwaʼöda khöra, hizaʼi lö olifu ira me taforomaʼö wa taʼameʼegö tödö ira. Hewaʼae na so zokhö omo si lö manehegö khöda fahuhuo, tola taforomaʼö wa taʼameʼegö tödö ira moroi ba gamuatada hegöi sikhalada.

13. Hadia zi tola tafalua enaʼö adöni dödö zokhö omo ba duria nifaʼemada?

¹³ No taforomaʼö wa taʼameʼegö tödö niha böʼö na tafaudugö duria nifaʼemada ba zoguna hegöi ba zadöni dödö zokhö omo. Duma-dumania, hadia tola taʼila dandra-tandra sangoromaʼö wa so ndraono side-ide ba nomo andrö? Tola manö adöni dödö zatuara ba mene-mene Zura Niʼamoniʼö sanandrösa ba wangebuaʼö iraono mazui ba wanöndra faʼohahau dödö yomo ba nomo. Mazui, hadia oya mbua rate ba mbawandruhö nomora? Te tola tatutunö khöra sanandrösa ba waʼalösökhi hegöi ngawalö zi möi fametaʼu niha ba gulidanö andre. Tola manö omuso sibai dödö zokhö omo na irongo wa hasambalö aheta waʼalösökhi moroi ba gulidanö andre. Ero na falukha ndraʼugö ba niha somasi mamondrongo, forege ba wanolo yaʼira enaʼö aboto ba dödöra hewisa wa tola möi fanolora mene-mene si so ba Zura Niʼamoniʼö. Imane Katarína, si no mututunö moroi yawa, ”Ufasugi ba dödögu hewisa wa tola itugu sökhi waʼaurigu me no ufahaʼö ndraʼo ba zindruhu.” Buania, tola fahuhuo Katarína si fao faʼafaduhu dödö, ba tola larasoi daʼö ira niha si fahuhuo khönia.

14. Moloʼö Amaedola 27:17, hewisa wa tola itolo ita awöda ba wanuriaigö?

¹⁴ Tema wanolo moroi ba niha böʼö. Me abad siföföna, iʼombakhaʼö Faulo khö  Dimoteo hewisa lala ba wanuriaigö hegöi ba wamahaʼö niha. Ifarou göi dödö Dimoteo ba wangogunaʼö lala si no ifatunö andrö ba wanolo niha böʼö. (1 Ko. 4:17) Simane Timoteo, tola tafahaʼö ita khö ndra talifusöda si no toʼölö ba wanuriaigö. (Baso Gamaedola 27:17.) Nehegö atö duma-duma dalifusöda ira matua sotöi Shawn. No irai mangai halöwö ia tobali perintis ba mbanua side-ide, ba ato niha ba daʼö si lö omasi mamondrongo famahaʼö moroi ba agama tanö böʼö. Hewisa enaʼö lö taya waʼomuso dödönia? Imane, ”Na tola, uʼohe awögu samösa dalifusöda. Sagötö fofanöma numalö ba nomo tanö böʼö, faoma matolo nawöma ba wondrouʼö faʼonekhema ba wamahaʼö. Duma-dumania, matutunö hadia niwaʼö zokhö omo mege ba hewisa wameʼema fanema li. Aefa daʼö, matutunö hadia wanema li si tefaudu sinangea mawaʼö na so zui zokhö omo sangumaʼö simane daʼö.”

15. Hana wa moguna mangandrö ita fatua lö tafalua halöwö fanuriaigö?

¹⁵ Andrö wanolo khö Yehowa. Ero na möiʼö manuriaigö, moguna öʼandrö wanuturu lala moroi khö Yehowa. Na lö itolo ita ehehania niʼamoniʼö safönu faʼabölö, zaya-zaya gölö wamorege nifaluada. (Si. 127:1; Luk. 11:13) Na mangandrö ndraʼugö khö Yehowa, zara-zara wanutunö hadia wanolo niʼandröu khönia. Duma-dumania, andrö khönia wanuturu lala enaʼö tola ösöndra niha somasi mamondrongo ba somasi mamahaʼö yaʼia sanandrösa khö Yehowa. Aefa daʼö, falua zi tefaudu ba wangandröu. Eluahania, forege wanuriaigö gofu haniha manö zi falukha khöu.

16. Enaʼö tola mofozu ita ba wanuriaigö, hana wa moguna tafalua wamahaʼö samösa?

¹⁶ Beʼe ginötöu ba wamalua famahaʼö samösa. Imane Taromali Lowalangi, ”Mitimba tödömi zomasi Lowalangi, soʼahonoa ba sangomusoiʼö tödönia.” (Rom. 12:2) Na faduhu dödöda wa no taʼila zindruhu sanandrösa khö Lowalangi, tola fahuhuo ita ba niha si fao faʼafaduhu dödö. Imane Katarína, si no mututunö moroi yawa, ”Barö-barö daʼa, aboto ba dödögu wa moguna uʼaroʼö wamatigu sanandrösa ba dane-dane wamahaʼö si so ba Zura Niʼamoniʼö. Börö daʼö, uhaogö ufahaʼö ndraʼo ba dandra-tandra sangoromaʼö wa so Zomböi yaʼita, wa Sura Niʼamoniʼö andrö Taromali Lowalangi, ba ufahaʼö göi ndraʼo wa so organisasi Lowalangi sosalahini yaʼia ba götöda andre.” Itutunö Katarína wa teʼaroʼö wamatinia ba itugu omuso dödönia wanuriaigö börö me ifalua wamahaʼö samösa.

17. Hana wa lö tebulö manuriaigö Yesu si fao faʼowölö-ölö?

¹⁷ Hewaʼae na so niha si lö omasi mamondrongo turia nifaʼemania, lö tebulö manuriaigö Yesu si fao faʼowölö-ölö. Hadia mbörö? Börö me aboto ba dödönia wa moguna sibai laʼila zindruhu ira niha sato ba omasi ia itolo fefu niha. Aboto göi ba dödönia wa so ösa niha somasi manemaʼö turia nifaʼemania, hewaʼae na lö omasi ira lafondrondrongo duria andrö ba wamobörö. Angeragö atö hadia zalua ba nösi nomonia. Sagötö famaluania halöwö fanuriaigö ba zi tölu fakhe a matonga faʼara, samösa lö hadöi ba gotalua ndra talifusönia si tobali nifahaʼönia. (Yoh. 7:5) Hizaʼi, me no aefa tesusugi ia, tobali ira niha Keriso.​—Hal. 1:14.

18. Hana wa lö taböhöli wanuriaigö?

¹⁸ Lö taʼila sibai haniha dania zi tobali samosumange Yehowa. So zalio mamahaʼö yaʼira ba zindruhu, ba so göi zara. Hewaʼae na lö omasi ira lafondrondrongo duria nifaʼemada, tola manö ”lasuno Lowalangi” na laʼila mbua-bua hegöi amuatada si sökhi.​—1 Fe. 2:12.

19. Moloʼö 1 Korindro 3:6, 7, hadia zinangea tatörö tödöda?

 ¹⁹ Hewaʼae na yaʼita zananö ba sombuwui, moguna tatörö tödöda wa Lowalangi zamanöi tanömö zindruhu andrö. (Baso 1 Korindro 3:6, 7.) Imane samösa talifusöda ira matua sotöi Getahun, sangai halöwö ba Etiopia, ”Ba zi töra 20 fakhe faʼara, ha yaʼo-yaʼo Zamaduhuʼö Yehowa si toröi ba mbanua andre. Hizaʼi iadaʼa, so 14 zanuriaigö. So 13 ba gotaluara zi no tebayagö idanö, farahu ba daʼö woʼomogu hegöi iraonoma si datölu. So mato 32 niha sangondrasi angowuloa ero migu.” Omuso sibai dödö Getahun börö me lö iböhöli wanuriaigö gasa-gasa wombaloinia Yehowa ba wondröni niha satulö tödö ba organisasinia!​—Yoh. 6:44.

20. Hana wa muʼamaedolagö ita simane ngawawa nifatenge ba wangefaʼö niha si no teʼuʼu?

²⁰ Ba wamaigi Yehowa, no sebua böli waʼauri fefu niha. Ibeʼe khöda döi si sökhi tobali si falulu fohalöwö khö Nononia ba wangowuloi niha moroi ba ngawalö soi fatua lö tohare gamozua götö danö andre. (Hag. 2:7) Na tafalua halöwö fanuriaigö, tola muʼamaedolagö ita simane ngawawa nifatenge ba wangefaʼö niha si no teʼuʼu bakha ba mbaho. Fefu niha si fao ba halöwö andrö, no lafalua halöwö si sökhi hewaʼae na lö ato ba gotaluara zanöndra niha sinangea muʼefaʼö. Simanö göi halöwö fanuriaigö nifaluada. Lö taʼila sibai hawaʼato niha si tola taʼefaʼö moroi ba gulidanö nifatörö Zatana andre. Hizaʼi, tola iʼogunaʼö Yehowa gofu haniha manö moroi ba gotaluada ba wanolo yaʼira. Imane Andreas, si toröi ba Bolivia, ”Aboto ba dödögu wa tola ifahaʼö ia si samösa niha ba Zura Niʼamoniʼö ba tebayagö ia idanö börö me ato zi falulu fohalöwö ba wanolo yaʼia.” Yalötebulö manuriaigö ita si fao faʼowölö-ölö. Na tafalua daʼö, hasambalö ifahowuʼö ita Yehowa ba tobali umbu waʼomuso dödöda halöwö fanuriaigö.