1. Hadia mbörö wa tokea ndraʼugö me awena öfaʼema ba niha böʼö duria moroi ba Zura Niʼamoniʼö?

HADIA lö olifu ndraʼugö me awena sibai aboto ba dödöu wa no ösöndra zindruhu? Alio sibai aboto ba dödöu fefu zi no öfahaʼö yaʼugö ba Zura Niʼamoniʼö ba tefaudu sibai daʼö ba wamaigimö. Tatu öwaʼö tödöu wa hasambalö omasi niha wanemaʼö famahaʼö si no öfaduhusi tödö. Faduhu dödöu wa tola larasoi waʼomuso dödö ba waʼaurira iadaʼa ba lasöndra dötönafö sahöli-höli dödö ba zi so miföna, na lafondrondrongo duria moroi ba Zura Niʼamoniʼö. (Si. 119:105) Daʼö mbörö wa terou sibai dödöu wamaʼema sindruhu khö ndra awö-awöu hegöi ba zi fahatö khöu. Hizaʼi, tatu tokea ndraʼugö me ato niha si lö omasi mamondrongo hadia nifaʼemau.

2-3. Me götö Yesu, hewisa gera-era niha sanandrösa khönia hegöi ba duria nifaʼemania?

² Lö moguna tokea ita na so niha si lö omasi mamondrongo turia nifaʼemada. Me götö Yesu, ato niha sanimbagö yaʼia hewaʼae na ifalua dandra sahöli-höli dödö ba wangoromaʼö wa fao khönia Lowalangi. Duma-dumania, me isusugi Lazaro, tebai laʼosilöʼögö dandra sahöli-höli dödö andrö ira niha sanaisi yaʼia. Hewaʼae simanö, lö faduhu dödö zondröniaʼö niha Yahudi wa Yesu andrö Mesia. Laʼalui lala ba wamunu Yesu hegöi Lazaro!​—Yoh. 11:47, 48, 53; 12:9-11.

³ Iʼila Yesu wa ato niha si lö faduhu tödö wa yaʼia andrö Mesia. (Yoh. 5:39-44) Imane khö ndra nifahaʼö Yohane Samayagö Idanö, ”Yaʼahowu zi lö awuwu * börö ndraʼo.” (Mat. 11:2, 3, 6, nis.) Hana wa ato niha sanimbagö Yesu?

4. Hadia nitutunöda ba artikel daʼa?

 ⁴ Ba artikel daʼa hegöi ba artikel aefa daʼa, tatutunö hadia manö mbörö wa ato niha si lö mamati khö Yesu me abad siföföna. Tatutunö göi dania hadia mbörö wa ato niha ba götö daʼa sanimbagö turia nifaʼemada. Sabölö tohude, tafahaʼö ita dania hewisa enaʼö tola aro wamatida khö Yesu irege lö awuwu ita.

5. Hana wa so ösa zangumaʼö wa tenga Yesu Mesia nifaʼeleʼö andrö?

⁵ Ato niha sawuwu börö waö-waö waʼauri Yesu ba zilalö. Laʼila wa Yesu andrö samahaʼö si sökhi ba no oya ifalua dandra sahöli-höli dödö. Hizaʼi ba wamaigira, yaʼia andrö ha ono duka geu si numana. Baero daʼö, yaʼia moroi ba Nazareta, banua side-ide si lö tehöngö. Natanaʼeli manö, si no tobali nifahaʼö Yesu, imane ba wamobörö, ”Hadia tesöndra zi sökhi moroi ba Nazareta?” (Yoh. 1:46) Te lö adöni dödö Natanaʼeli ba mbanua si toröi Yesu. Mazui, tola manö itörö tödönia wamaʼeleʼö nisura ba Mikha 5:2, sangumaʼö wa tumbu Mesia ba Mbetilekhema, tenga ba Nazareta.

6. Hewisa enaʼö laʼila niha ba götö Yesu wa yaʼia andrö Mesia?

⁶ Hadia niwaʼö Zura Niʼamoniʼö? No ifaʼeleʼö Yesaya wa lö ibeʼe dödö zi faʼudu khö Yesu wangosisiʼö hezo ’mbörötania’ iʼotarai Mesia. (Yes. 53:8) Sindruhunia, no oya zi no mufaʼeleʼö sanandrösa khö Mesia. Na labeʼe ginötöra ba wangosisiʼö waö-waö waʼuri Yesu, tola laʼila wa ba Mbetilekhema tumbu Yesu ba yaʼia andrö maʼuwu Razo Dawido. (Luk. 2:4-7) Börö daʼö, banua si tumbu Yesu, tefaudu ba zi no mufaʼeleʼö ba Mikha 5:2. Na simanö, hana wa lö faduhu dödö niha khö Yesu? Börö me alio sibai lahalö gangetula ba lö laʼosisiʼö fefu waö-waö waʼauri Yesu, andrö wa awuwu ira.

7. Hana wa ato niha zanimbagö ono mbanua Yehowa ba ginötö daʼa?

⁷ Hadia simane daʼö göi zalua iadaʼa? Tatu manö. Ato nono mbanua Yehowa zi numana ba tenga niha si tehöngö ira. Moloʼö famaigi niha sato, yaʼira andrö ”niha si toʼölö manö ba si lö sekola”. (Hal. 4:13) So ösa niha sangumaʼö wa tenga sinangea lafahaʼö niha ba Zura Niʼamoniʼö ira Samaduhuʼö Yehowa, börö me lö si möi ira sekola fandrita. Lafotöi göi ira ”agama Amerika”. Sindruhunia, ato ndra Samaduhuʼö Yehowa zi toröi ba soi böʼö, ba ha 14 persen zi toröi ba Amerika Serikat. So göi zangumaʼö wa lö faduhu dödö ndra Samaduhuʼö Yehowa khö Yesu. Barö zi hauga fakhe, lafotöi ira ”Komunis”, ”ira samauze nifatenge niha Amerika”, hegöi ”ekstremis”. Ato niha si lö omasi tobali ono mbanua Yehowa börö me no lafondrondrongo duria simane daʼö ba lö aboto ba dödöra zindruhu sanandrösa khö nono mbanua Yehowa.

8. Moloʼö Halöwö Zinenge 17:11, hadia zinangea lafalua niha na omasi ira laʼila haniha nono mbanua Lowalangi ba ginötö daʼa?

⁸ Hewisa enaʼö lö awuwu ira? Moguna lafareso hezo zatulö. Daʼö nifalua zi samösa sanura Injil sotöi Luka. Ihaogö wamareso fefu ”ngawalö zalua . . . iʼotarai ba wamobörö”. Omasi ia na aboto ba dödö niha samondrongo yaʼia ”zindruhu” andrö sanandrösa khö Yesu. (Luk. 1:1-4) Simane daʼö göi nifalua niha Mberea me mböröta. Me awena sibai larongo duria somuso dödö sanandrösa khö Yesu, lahaogö wamareso Buku Niʼamoniʼö Heberaiʼo ba wamaigi hadia atulö nirongora andrö mazui löʼö. (Baso Halöwö Zinenge 17:11.) Daʼö göi zinangea lafalua niha ba götöda andre. Moguna lafareso hadia tefaudu nifahaʼö nono mbanua Lowalangi andrö ba Zura Niʼamoniʼö. Moguna göi lafahaʼö ira ba nifalua nono mbanua Yehowa ba ginötö daʼa. Na  lahaogö laʼosisiʼö fefu waö-waönia, lö alio faduhu dödöra ba zi lö atulö niböbögö niha khö ndra samosumange Lowalangi.

9. Hadia zalua me itimbagö Yesu wamalua tandra moroi ba zorugo?

⁹ Me götö Yesu, so ösa niha sangumaʼö wa ambö khöra wamahaʼö nifaʼemania. Omasi ira na ifalua zi töra moroi ba daʼö. Laʼandrö khönia enaʼö ifalua ”dandra moroi ba zorugo” ba wangoromaʼö wa yaʼia andrö Mesia. (Mat. 16:1) Hadia mbörö? Te börö me ambö aboto ba dödöra wehede nisura ba Danieli 7:13, 14. Hizaʼi, tenga daʼö ginötö nitatugöi Yehowa ba wamalua hadia zi no mufaʼeleʼö andrö. Sindruhunia, no ibönö wamahaʼö nifaʼema Yesu ba wangoromaʼö wa yaʼia andrö Mesia. Hewaʼae simanö, me itimbagö Yesu wamalua tandra niʼandröra, awuwu ira.​—Mat. 16:4.

10. Hewisa wamalua Yesu zi no ifaʼeleʼö Yesaya sanandrösa khö Mesia?

¹⁰ Hadia niwaʼö Zura Niʼamoniʼö? Imane Yesaya sanandrösa khö Mesia, ”Lö muʼao ia mazui ebua linia, lö terongo linia ba lala.” (Yes. 42:1, 2) Me ifalua halöwö fanuriaigö Yesu, lö iforege enaʼö ahöli-höli dödö niha khönia. Lö ifasindro gosali sebua, lö ifake nukha si toʼölö laʼogunaʼö ira sondröniaʼö ba agama, ba lö itötöna enaʼö lakaoni ia faoma töi si tohude ba agama. Me edöna laʼetuʼö hukumania, itimbagö Yesu wamalua tandra sahöli-höli dödö ba wangomusoiʼö tödö Razo Herode. (Luk. 23:8-11) Sindruhu sa, ifalua ösa dandra sahöli-höli dödö Yesu. Hizaʼi, sabölö iʼofönaiʼö yaʼia daʼö halöwö fanuriaigö turia somuso dödö. Imane khö ndra nifahaʼönia, ”Daʼö mbörö wa tohare ndraʼo.”​—Mrk. 1:38.

11. Hadia gera-era si fasala niʼokhögö niha ba götöda andre?

¹¹ Hadia simane daʼö göi zalua iadaʼa? Tatu manö. Ba götöda andre, ato niha sahöli-höli dödö ba domosa segebua niʼogunaʼö ngawalö agama hegöi ba gama-gama sebua böli nifaʼanö ba daʼö. Ahöli-höli göi dödöra khö ndra sondröniaʼö ba agama nikaoni faoma töi si tohude. Adöni göi dödöra  wamalua ngawalö gowasa, ba laʼolifugö hezo moroi mbörötania ba hadia geluaha gowasa andrö. Hizaʼi, hadia so wamahaʼö nihalöra sanandrösa khö Lowalangi hegöi ohitö dödönia na laʼondrasi gangowuloa ba agama? Löʼö. Faböʼö sibai ira ba niha sangondrasi angowuloa ndra Samaduhuʼö Yehowa. Tola lafahaʼö ira ba ngawalö niʼandrö Yehowa ba nono mbanuania. Lö taʼunö Balai Mbanua Lowalangi khöda, ba no öna-öna domosania börö me lö hadöi ba daʼö gama-gama sebua böli. Ira sondröniaʼö ba daʼö, lö lafake nukha si faböʼö moroi ba niha böʼö ba lö göi lakaoni ira faoma töi si tohude. Fefu wamahaʼö hegöi nifaduhusida tödö, teʼodane-dane ba Zura Niʼamoniʼö. Hewaʼae simanö, ato niha sawuwu ba ginötö daʼa börö me lö tafalua gowasa segebua simane nifaluara, ba lö tefaudu ba dödöra wamahaʼö nifaʼemada.

12. Simane nitutunö ba Heberaiʼo 11:1, 6, hezo teʼodane-dane wamatida?

¹² Hewisa enaʼö lö awuwu ita? Imane Faulo khö ndra niha Keriso si toröi ba Roma, ”Mamati niha börö me no larongo duria andrö, ba larongo duria andrö börö me so zanuriaigö sanandrösa khö Keriso.” (Rom. 10:17) Börö daʼö, gofu hawaʼomuso dödö niha samalua owasa si lö teʼodane-dane ba Zura Niʼamoniʼö, lö moguna fao ita ba daʼö börö me tenga daʼö zangaʼaroʼö famatida. Enaʼö aro wamatida, moguna tafahaʼö ita ba Zura Niʼamoniʼö irege taʼokhögö waʼaboto ba dödö si tefaudu. Hadia mbörö wa tafalua daʼö? ”Na lö famati, tebai iʼomasiʼö Lowalangi niha”. (Baso Heberaiʼo 11:1, 6.) Lö moguna taʼila dandra sahöli-höli dödö moroi ba zorugo ba wangoromaʼö wa no tasöndra zindruhu. Na tahaogö tafareso wamahaʼö moroi ba Zura Niʼamoniʼö, ibönö khöda daʼö ba wangaʼaroʼö faʼafaduhu dödöda hegöi ba wanayaigö faʼaombö-aombö dödöda.

13. Hadia mbörö wa ato niha sanimbagö Yesu?

¹³ Me götö Yesu, manofu-nofu dödö ndra nifahaʼö Yohane Samayagö Idanö börö me lö fuasö ndra nifahaʼö Yesu. No itutunö  khöra Yesu wa lö moguna fuasö ira sagötö feʼasonia ba gulidanö. (Mat. 9:14-17) Hewaʼae simanö, latimbagö Yesu ira niha Farizaiʼo hegöi niha tanö böʼö sanaisi yaʼia, börö me lö iʼoʼö zi toʼölö lafalua. Mofönu ira me ifadöhö niha sofökhö ba ngaluo Sabato. (Mrk. 3:1-6; Yoh. 9:16) Sindruhu sa, laʼosatulö ira ba wangamoniʼö luo Sabato, hizaʼi lö fatimba khöra na mamawa niha ba gosali. Mofönu sibai ira me iwaʼö Yesu wa fasala nifaluara andrö. (Mat. 21:12, 13, 15) Baero daʼö, mofönu göi niha si no irai ifalukhaisi Yesu ba zinagoga si so ba Nazareta, börö me iʼogunaʼö duma-duma ndraono Gizaraʼeli me föna ba wangoromaʼö wa ebua sibai khöra wakhögusa ba lö hadöi famatira. (Luk. 4:16, 25-30) Ato niha sawuwu börö me lö tefaudu nifalua Yesu ba nitötönara.​—Mat. 11:16-19.

14. Hana wa itimbagö Yesu zi toʼölö lafalua niha gulidanö, si lö tefaudu ba Zura Niʼamoniʼö?

¹⁴ Hadia niwaʼö Zura Niʼamoniʼö? Ifaʼema Yesaya wehede Yehowa andre, ”Ha ba mbewe ahatö ira khögu, lafosumange ndraʼo niha andre faoma bewera ba tödöra no aröu khögu; laʼataʼufi ndraʼo ha börö me laʼoʼö goroisa nifahaʼö niha gulidanö.” (Yes. 29:13) Na so niha sabölö mangofönaiʼö famalua amakhoita hegöi si toʼölö lafalua niha gulidanö moroi na lafalua niwaʼö ba Zura Niʼamoniʼö, no latimbagö Yehowa hegöi Mesia nifatengenia. Daʼö mbörö wa itimbagö Yesu zi toʼölö lafalua niha gulidanö, si lö tefaudu ba Zura Niʼamoniʼö.

15. Hana wa ato niha si fatuwu khö ndra Samaduhuʼö Yehowa iadaʼa?

¹⁵ Hadia simane daʼö göi zalua iadaʼa? Tatu manö. Ato zi fatuwu khö ndra Samaduhuʼö Yehowa börö me lö fao ira ba gowasa si toʼölö mufalua si lö teʼodane-dane ba Zura Niʼamoniʼö, simane fanörö tödö baŵa waʼatumbu hegöi Fanunu Fandru. So göi zofönu khö ndra Samaduhuʼö Yehowa börö me lö fao ira ba gowasa nifalua soira, mazui börö me lö laʼoʼö zi toʼölö mufalua ba wogoʼo niha si no mate si lö tefaudu ba zomasi Lowalangi. Wa tola simane daʼö ira khö ndra Samaduhuʼö Yehowa, te börö me faduhu dödöra wa itema Lowalangi lala wamosumange nifaluara. Hizaʼi, tebai laʼomusoiʼö dödönia na abölö laʼofönaiʼö wamalua si toʼölö mufalua ba gulidanö andre moroi na laʼoʼö wamahaʼö moroi ba Zura Niʼamoniʼö.​—Mrk. 7:7-9.

16. Hadia zinangea tafalua, ba hadia zinangea tatimbagö? (Sinunö 119:97, 113, 163-165)

¹⁶ Hewisa enaʼö lö awuwu ita? Moguna taʼaroʼö waʼomasida ba goroisa hegöi goi-goi Yehowa. (Baso Zinunö 119:97, 113, 163-165.) Na taʼomasiʼö Yehowa, hasambalö tatimbagö zi toʼölö mufalua si lö tefaudu ba zomasi ia. Lö tatehegö na so danö böʼö sabölö tohude moroi ba waʼomasida khö Yehowa.

17. Me götö Yesu, hadia nitötöna niha sato khö Mesia?

¹⁷ Me götö Yesu, so ösa niha somasi na tebulö wamatörö me luo daʼö. Latötöna enaʼö iʼefaʼö ira Mesia moroi ba wamatörö niha Romawi samakao yaʼira. Hizaʼi, me latandraigö wamataro Yesu tobali razora, itimbagö daʼö Yesu. (Yoh. 6:14, 15) Baero daʼö, ataʼu ndra ere hegöi niha tanö böʼö na iforege Yesu ba wombulöʼö famatörö me luo daʼö. Na ifalua daʼö Yesu, hasambalö mofönu niha Romawi ba laheta kuaso si no labeʼe ba danga ndra ere. Börö me laʼaombösi tödö wamatörö me luo daʼö, ato niha sawuwu börö Yesu.

18. Hadia wamaʼeleʼö niʼosilöʼögö niha sato sanandrösa khö Mesia?

¹⁸ Hadia niwaʼö Zura Niʼamoniʼö? Hewaʼae  na oya wamaʼeleʼö sanutunö wa hasambalö ikalaisi fefu nudunia Mesia, so göi wamaʼeleʼö tanö böʼö sanutunö wa lö tola löʼö mate ia sakali ba wohöli horöda. (Yes. 53:9, 12) Na simanö, hana wa fasala nitötöna niha Yahudi sanandrösa khö Mesia? Börö me laʼosilöʼögö wamaʼeleʼö sanandrösa khönia. Sindruhunia, lö hadöi famaʼeleʼö sanutunö wa hasambalö iheta gabula dödöra me luo daʼö.​—Yoh. 6:26, 27.

19. Hadia mbörö wa ato zanimbagö turia somuso dödö nifaʼemada?

¹⁹ Hadia simane daʼö göi zalua iadaʼa? Tatu manö. Ato niha si fatuwu khöda börö me lö faʼawö ita ba politik. Latötöna enaʼö mamili ita ba pemilu. Hizaʼi, na tafili niha gulidanö tobali samatörö yaʼita, eluahania no tatimbagö Yehowa. (1 Sa. 8:4-7) So göi ösa niha sangumaʼö wa moguna tafazökhi zekola hegöi ruma saki, ba fao ita ba kegiatan amal tanö böʼö. Latimbagö duria nifaʼemada börö me abölö taʼofönaiʼö wamalua halöwö fanuriaigö moroi na taʼasiwai gabula dödö salua ba gulidanö.

20. Simane nitutunö Yesu ba Mataiʼo 7:21-23, hadia zinangea taʼofönaiʼö ba waʼaurida?

²⁰ Hewisa enaʼö lö awuwu ita? (Baso Mataiʼo 7:21-23.) Moguna taʼosambuaʼö dödöda wamalua halöwö si no iʼoroisi khöda Yesu. (Mat. 28:19, 20) Böi arörö ita ba wangasiwai abula dödö salua ba gulidanö. Sindruhu sa, taʼomasiʼö niha ba taʼameʼegö tödö gabula dödöra, hizaʼi aboto ba dödöda wa lala fondrege zi sökhi ba wanolo yaʼira yaʼia daʼö na tafahaʼö ira sanandrösa ba Wamatörö Lowalangi ba tatolo ira tobali si fahuwu khö Yehowa.

21. Hadia gangetula sinangea tahalö?

²¹ Ba artikel daʼa, no tatutunö zi öfa ngawalö zi tobali fangawuwu niha sato irege latimbagö Yesu me abad siföföna. Baero daʼö, no tatutunö göi hadia mbörö wa so ösa niha sanimbagö soloʼö khö Yesu ba götöda andre. Hizaʼi, hadia ha daʼö zinangea taʼangenanöi? Tenga. Ba artikel aefa daʼa, tatutunö öfa ngawalö tö zi möi fangawuwu niha. Datahalö gangetula enaʼö lö awuwu ita ba tarorogö enaʼö lö tebulö aro wamatida!