1-2. Hadia manö gabula dödö nitaögö ndra Samaduhuʼö Yehowa?

IFAROU dödö Dimoteo Faulo enaʼö ifalua wondrege zi sökhi ba halöwö fanuriaigö. (2 Ti. 4:5) Fefu ita, taʼameʼegö tödö sibai mene-mene Waulo andrö. Hizaʼi, itaria abua wamalua daʼö. Moguna sibai laforege ira talifusöda ba wolawa faʼataʼu ba wamalua halöwö fanuriaigö. (2 Ti. 4:2) Duma-dumania, angeragö atö ndra talifusöda si toröi ba soi si lö manehegö halöwö fanuriaigö nifaluada. Lö tebulö möi ira manuriaigö hewaʼae na laʼila wa tola manö labeʼe dania ira ba gurunga!

² Oya gabula dödö salua ba nono mbanua Yehowa irege larasoi waʼide-ide dödö. Duma-dumania, ato zamorege fohalöwö ba wombönökhi soguna ba nösi nomora. Omasi ira na oya zi tola lafalua ba wanuriaigö, hizaʼi lö saʼae faʼabölöra ba ngaluo Satu mazui Migu. Lö göi oya zi tola lafalua ira talifusöda tanö böʼö börö me no göna ira fökhö sabölö-bölö mazui no numalö ndröfira, ba tola manö tebai mofanö ira moroi ba nomo. Baero daʼö, so göi zorasoi wa lö eluahara föna Yehowa. Imane talifusöda Mary, * si toröi ba Timur Tengah, ”Erege sibai dödögu me uforege ba wolawa faʼide-ide dödögu. Aefa daʼö, urasoi wa itahi-tahigö ndraʼo tödögu börö me no ahori ginötögu hegöi faʼabölögu ba daʼö irege tebai ufalua halöwö fanuriaigö.”

3. Hadia nitutunöda ba artikel daʼa?

³ Gofu hadia gabula dödö salua khöda, hasambalö ibeʼe khöda waʼabölö Yehowa enaʼö lö tebulö tafalua wondrege zi sökhi ba wamosumange yaʼia. Fatua lö tatutunö hewisa lala Yehowa ba wanolo yaʼita, datatutunö hewisa lalania ba wangabölöʼö Faulo hegöi Timoteo enaʼö tola lafalua halöwö fanuriaigö hewaʼae na oya gabula dödöra.

4. Hadia manö gabula dödö nitaögö Waulo?

⁴ Oya gabula dödö nitaögö Waulo. Moguna sibai khönia wanolo moroi khö Yehowa, mendrua manö me laböbözi ia, latebu ia kara, ba labeʼe ia ba gurunga. (2 Ko. 11:23-25) Ifaduhuʼö Faulo wa itaria moguna ilawa waʼide-ide dödö. (Rom. 7:18, 19, 24) Baero daʼö, so göi ’ndroi bakha ba mbotonia’, ba omasi sibai ia na iheta daʼö Lowalangi.​—2 Ko. 12:7, 8.

5. Hadia manö zi no ikhamö Faulo hewaʼae na oya gabula dödö nitaögönia?

⁵ Ibeʼe Yehowa waʼabölö khö Waulo ba wamalua halöwö fanuriaigö hewaʼae na oya gabula dödö nitaögönia. Nehegö atö hadia manö zi no ikhamö Faulo. Duma-dumania, me lakuru ia ba nomo si so ba Roma, terou sibai dödönia wanuriaigö khö ndra sondröniaʼö niha Yahudi hegöi ba niha salawa faka. (Hal. 28:17; Fil. 4:21, 22) Manuriaigö göi ia khö ndra Sanaro Omo Razo hegöi ba niha sangondrasi yaʼia. (Hal. 28:30, 31; Fil. 1:13) Me luo daʼö göi, iʼogunaʼö Waulo Lowalangi ba wanura sura soguna ba niha Keriso me götö föna hegöi iadaʼa. Baero daʼö, teʼabölöʼö ndra talifusöda ba mbanua niha Keriso si so ba Roma börö duma-duma nibeʼe Waulo, irege ”itugu barani ira wangombakha taromali Lowalangi, ba lö khöra faʼataʼu”. (Fil. 1:14) Hewaʼae na oya daha-taha nitaögö Waulo me luo daʼö, iforege wamalua fondrege zi sökhi, ba daʼö zi tobali ”fondrouʼö duria somuso dödö”.​—Fil. 1:12.

6. Moloʼö 2 Korindro 12:9, 10, hadia zanolo Faulo ba wamalua halöwö fanuriaigö?

⁶ Aboto ba dödö Waulo wa tenga börö waʼabölönia samösa wa tola ifalua halöwö fanuriaigö, hizaʼi börö waʼabölö moroi khö Lowalangi. Itutunö Faulo wa ’moʼahonoa waʼabölö Lowalangi khönia me ambö faʼabölönia’. (Baso 2 Korindro 12:9, 10.) Iʼogunaʼö gehehania niʼamoniʼö Yehowa ba wameʼe faʼabölö khö Waulo enaʼö tola ifalua halöwö fanuriaigö hewaʼae na göna ia folohi, labeʼe ia ba gurunga, ba itaögö gabula dödö tanö böʼö.

7. Hadia manö gabula dödö nitaögö Dimoteo?

⁷ Simanö göi zi bohou ebua si fao khö Waulo sotöi Timoteo, moguna iʼodaligö waʼabölö moroi khö Lowalangi ba wamalua halöwö fanuriaigö. Fao Dimoteo khö Waulo ba wamalua halöwö tobali utusan injil ba mbanua saröu. Ifatenge göi ia Faulo ba wangondrasi hegöi ba wameʼe famarou dödö khö ndra talifusöda ba mbanua niha Keriso misa. (1 Ko. 4:17) Tola manö irasoi Timoteo wa tenga sinangea ifalua halöwö nibeʼe  khönia. Te daʼö mbörö wa imane khönia Faulo, ”Böi tehegö so zangosiwawöi yaʼugö börö me awuyu nasa ndraʼugö.” (1 Ti. 4:12) Baero daʼö, so göi ndroi ba mbotonia, yaʼia daʼö ’asese mofökhö’ ia. (1 Ti. 5:23) Hizaʼi, aboto ba dödö Dimoteo wa hasambalö iʼabölöʼö ia eheha niʼamoniʼö moroi khö Yehowa, enaʼö tola ituriaigö duria somuso dödö ba ifalua halöwö soguna khö ndra talifusönia.​—2 Ti. 1:7.

8. Hewisa lala Yehowa ba wangabölöʼö ono mbanuania ba götöda andre?

⁸ Ba götöda andre, ibeʼe Yehowa ’waʼabölö sahöli-höli dödö’ ba nono mbanuania enaʼö lö tebulö lafosumange ia si fao faʼalöfaröi. (2 Ko. 4:7) Datatutunö zi öfa ngawalö nihenaigö Yehowa ba wangabölöʼö hegöi ba wanolo yaʼita enaʼö lö faröi ita khönia, yaʼia daʼö: fangandrö, Sura Niʼamoniʼö, fariawösa khö ndra talifusöda, hegöi halöwö fanuriaigö.

9. Hadia mbuania na mangandrö ita?

⁹ Tatema waʼabölö na mangandrö ita. Simane nitutunö ba Efeso 6:18, ifarou ita Faulo enaʼö mangandrö ita khö Lowalangi ”ero inötö”. Na tafalua daʼö, hasambalö iʼabölöʼö ita Lowalangi. No irasoi daʼö talifusöda ira matua sotöi Jonnie, si toröi ba Bolivia, me alua khönia ngawalö gabula dödö. Fendronga sibai me göna woʼomonia hegöi ira satuania fökhö sabölö-bölö. Abua sibai khö Jonnie ba wondrorogö yaʼira si datölu andrö. Ba gafuriata, mate mamania, ba ara sibai döhö woʼomonia hegöi bapania. Imane Jonnie ba wanutunö hadia nifaluania, ”Me abu sibai dödögu, usöndra waʼabölö me mangandrö ndraʼo khö Yehowa ba uzara-zara wanutunö khönia ösi dödögu.” Ibeʼe Yehowa waʼabölö khö Jonnie enaʼö anau gölönia. Nehegö zalua khö dalifusöda Ronald, samösa satua sokubaloi si toröi ba Bolivia. No göna mamania fökhö kanker, ba sara waŵa aefa daʼö, mate mamania. Hadia zanolo Ronald ba wanaögö abula dödönia andrö? Imane, ”Na mangandrö ndraʼo khö Yehowa, ututunö khönia fefu nösi dödögu hegöi nirasoigu. Aboto ba dödögu wa yaʼia zabölö mangila haniha ndraʼo sindruhunia, töra moroi ba niʼilagu samösa.” Itaria tarasoi wa tebai saʼae tataögö gabula dödö salua khöda, ba lö taʼila hadia zinangea taʼangandröi. Hizaʼi, no ikaoni ita Yehowa enaʼö mangandrö ita khönia, hewaʼae na lö taʼila tatatugöi ngawua wehede si tefaudu ba wanutunö hadia niʼera-erada hegöi nirasoida.​—Rom. 8:26, 27.

10. Simane nitutunö ba Heberaiʼo 4:12, hana wa moguna sibai tabaso ba taʼangerönusi Zura Niʼamoniʼö?

¹⁰ Tatema waʼabölö na tabaso ba taʼangerönusi Zura Niʼamoniʼö. Simane Faulo, tola göi taʼodaligö Zura Niʼamoniʼö ba wangabölöʼö yaʼita hegöi ba wondrara tödöda. (Rom. 15:4) Na tabaso ba taʼangerönusi Daromali Lowalangi, tola iʼogunaʼö gehehania Yehowa ba wanolo yaʼita enaʼö taʼila hewisa lala ba wangasiwai abula dödö salua khöda moloʼö Sura Niʼamoniʼö. (Baso Heberaiʼo 4:12.) Imane Ronald, si no mutötöi moroi yawa, ”Omuso sibai dödögu börö me no uforege ba wombaso Sura Niʼamoniʼö ero bongi. Oya zi tola uʼangerönusi sanandrösa ba gamuata Yehowa hegöi faʼomasi niforomaʼönia ba nono mbanuania. Daʼö zangabölöʼö yaʼo.”

11. Hewisa wangabölöʼö Zura Niʼamoniʼö si samösa talifusöda ira alawe me irasoi waʼabu dödö?

¹¹ Na taʼangerönusi Daromali Lowalangi, tola taʼokhögö lala wangera-ngera si tefaudu sanandrösa ba gabula dödö salua khöda. Nehegö atö hadia mbua nitema zi samösa talifusöda ira alawe moroi ba Zura Niʼamoniʼö, me irasoi waʼabu dödö börö me no mate woʼomonia. Iʼombakhaʼö khönia si samösa satua sokubaloi wa oya wamahaʼö si tola ihalö na ibaso mbuku Yobi. Me ifalua daʼö, iʼanemaiʼö fatuwu ia ba lala wangera-ngera  si fasala niʼokhögö Yobi. Imane bakha ba dödönia, ”He Yobi! Böi ha abula dödöu manö niʼera-erau!” Hizaʼi ba gafuriata, aboto ba dödönia wa fagölö lala wangera-ngerania khö Yobi. Daʼa zanolo yaʼia ba wangatulöʼö lala wangera-ngerania hegöi ba wanaögö faʼafökhö me no mate woʼomonia.

12. Hewisa lala Yehowa ba wangogunaʼö ira talifusöda ba wangabölöʼö yaʼita?

¹² Tatema waʼabölö na fariawö ita khö ndra talifusöda. Lala tanö böʼö niʼogunaʼö Yehowa ba wangabölöʼö yaʼita yaʼia daʼö fariawösa khö ndra talifusöda si sara lala wamati. Isura Faulo wa omasi sibai ia falukha khö ndra talifusönia ba wamati enaʼö tola ’lafarou dödö nawöra zamösana’. (Rom. 1:11, 12) Itutunö Mary, si no mutötöi moroi yawa, wa omasi sibai ia fariawö khö ndra talifusönia ba wamati. Imane, ”Hewaʼae na lö laʼila ira talifusöda hadia gabula dödö salua khögu, iʼogunaʼö ira Yehowa ba wanolo yaʼo. Terou sibai dödögu ba wehede nifaʼemara mazui ba zura nibeʼera khögu, ba tefaudu sibai daʼö ba zoguna khögu. Daʼö zanolo yaʼo ba wanutunö abula dödögu khö ndra talifusöda ira alawe tanö böʼö si no irai manaögö abula dödö simane daʼö, ba tola uhalö wamahaʼö moroi ba zi no irai alua khöra. Baero daʼö, lö tebulö latolo ndraʼo ira satua sokubaloi enaʼö tola urasoi wa laʼomasiʼö ndraʼo ira talifusöda ba mbanua niha Keriso.”

13. Hewisa lalada ba wangabölöʼö ira talifusöda na mufalua gangowuloa?

¹³ Sambua nahia fondrege zi sökhi ba wamarou tödö nawöda zamösana yaʼia daʼö angowuloa nifalua ba mbanua niha Keriso. Ba gangowuloa, tola öʼabölöʼö ndra talifusöda moroi ba wehede nifaʼemamö, na ötutunö wa öʼomasiʼö ira ba öʼandrö saohagölö ba ngawalö zi no lafalua. Nehegö atö duma-duma zi samösa talifusöda ira alawe. Tenga Samaduhuʼö Yehowa woʼomonia. Fatua lö mufalua gangowuloa, imane khönia si samösa satua sokubaloi sotöi Peter, ”Tefarou sibai dödögu me uʼila ndraʼugö ba daʼa. Lö tebulö öhaogö wamonukha iraonou si daönö ba ötolo ira wameʼe bua gera-erara.” Moʼala hörö dalifusöda andrö, ba iʼandrö sibai saohagölö khö Peter börö me no ibeʼe khönia wamarou dödö ba ginötö si tefaudu.

14. Hadia mbuania na tafalua halöwö fanuriaigö?

¹⁴ Tatema waʼabölö na tafalua halöwö fanuriaigö. Na tafatunö ba niha böʼö zindruhu moroi ba Zura Niʼamoniʼö, hasambalö tarasoi waʼohahau dödö, he na latemaʼö duria nifaʼemada mazui löʼö. (Amd. 11:25) No irai irasoi talifusöda ira alawe sotöi Stacy wa tola möi fangabölönia halöwö fanuriaigö. Me so nösi nomonia niʼefasi moroi ba mbanua niha Keriso, abu sibai dödönia. Lö tebulö iwaʼö tödönia wa moguna menaʼö iforege nasa ba wanolo ösi nomonia andrö. Ha daʼö-daʼö manö niʼera-erania. Hadia zanolo Stacy ba wanaögö abula dödönia andrö? Halöwö fanuriaigö! Me möi ia manuriaigö, tola iʼosambuaʼö dödönia ba wanolo niha nifalukhaisinia ba wanuriaigö. Imane, ”Me luo daʼö, itolo ndraʼo Yehowa ba wanöndra si samösa niha nifahaʼö ba Zura Niʼamoniʼö salio sibai tedou ba wamati. Sindruhu-ndruhu wa tobali famarou dödögu daʼö. Fanolo fondrege zebua nitemagu yaʼia daʼö halöwö fanuriaigö.”

15. Hadia wamahaʼö si tola öhalö moroi ba nitutunö Mary?

¹⁵ Börö ngawalö zalua ba waʼaurira, te so ösa zorasoi wa lö oya zi tola lafalua ba wanuriaigö. Na daʼö nirasoimö, törö tödöu wa omuso dödö Yehowa na öfalua wondrege zi sökhi. Fuli nehegö atö duma-duma Mary. Me findra ia ba mbanua niha Keriso sangogunaʼö li böʼö, lö oya zi tola ifalua. Imane, ”Ba wamobörö, ha fameʼe bua gera-era sadogo-dogo mazui fombaso ayati zi tola ufalua ba gangowuloa, ba ha risalah zi tola ufaehagö ba wanuriaigö.” Irasoi waʼide-ide dödö börö me ifaedo-faedogö ia ba niha sonekhe fahuhuo  ba li daʼö. Hizaʼi ba gafuriata, iʼatulöʼö lala wangera-ngerania. Imane Mary, ”Alio aboto ba dödöda niwaʼö Zura Niʼamoniʼö, ba tola ibulöʼö lala waʼauri niha.” Börö daʼö, ibörögö faduhu dödönia wa tola iʼogunaʼö ia Yehowa hewaʼae na lö onekhe ia fahuhuo ba li daʼö.

16. Na so zomasi manuriaigö hizaʼi tebai mofanö ira moroi ba nomo, hadia zi tola manolo yaʼira?

¹⁶ Aboto ba dödö Yehowa wa so ösa ba gotaluada zomasi möi manuriaigö, hizaʼi tebai mofanö ita moroi ba nomo. Börö daʼö, itolo ita Yehowa ba wanuriaigö ba niha sondrorogö yaʼita mazui khö ndra matiri. Na tafaedo-faedogö nifaluada iadaʼa ba zi tola tafalua ba zilalö, tola manö ide-ide dödöda. Hizaʼi, na aboto ba dödöda hewisa lala Yehowa ba wanolo yaʼita iadaʼa, hasambalö tasöndra waʼabölö irege tola tataögö gabula dödö salua khöda si fao faʼomuso dödö.

17. Moloʼö Sangombakha 11:6, hana wa lö tebulö manuriaigö ita hewaʼae na lö iʼanemaiʼö taʼila mbuania?

¹⁷ Moroi ba gotalua danömö zindruhu si no tatanö, lö taʼila hezo dania zauri ba si tedou. (Baso Zangombakha 11:6.) Nehegö atö duma-duma dalifusöda ira alawe sotöi Barbara. No töra 80 fakhe ndröfinia, ba asese iʼogunaʼö telefo hegöi sura ba wanuriaigö. Ba zi sambua sura nifaʼoheʼönia, ifaogö majalah Menara Pengawal 1 Mbaŵa si Tölu 2014, tuhonia ”Apa yang Allah Beri untuk Anda”. Lö iʼila wa no ifaʼoheʼö zura khö zi sambua fongambatö si no muʼefasi moroi ba mbanua niha Keriso. Labaso majalah daʼö mato hauga kali. Irasoi foʼomo ira matua andrö wa hulö no fahuhuo khönia Yehowa. Aefa daʼö, ibörögö laʼondrasi gangowuloa. Ba gafuriata, me no muʼefasi ira ba zi töra 27 fakhe faʼara, ifuli latemaʼö ira tobali Samaduhuʼö Yehowa. Tatu tefarou sibai dödö Barbara ba teʼabölöʼö ia me iʼila mbua si sökhi moroi ba zi sagörö sura nifaʼoheʼönia!

18. Hadia zinangea tafalua enaʼö tola iʼabölöʼö ita Lowalangi?

¹⁸ Oya zi no ihenaigö khöda Yehowa ba wameʼe faʼabölönia sahöli-höli dödö. Duma-dumania, fangandrö, Sura Niʼamoniʼö, fariawösa khö ndra talifusöda, hegöi halöwö fanuriaigö. Na taʼogunaʼö fefu daʼö, no taforomaʼö wa faduhu dödöda wa so khö Yehowa waʼabölö ba faʼedöna ba wanolo yaʼita. Yalötebulö taʼodaligö Namada si so ba zorugo, ’somasi mangoromaʼö faʼabölönia salahi niha samosumange yaʼia soroi ba dödö’.​—2 Ng. 16:9.