Imane talifusöda ira alawe sotöi Sara, * ”Niha saila-aila ndraʼo, ba ambö faduhu dödögu ba khögu samösa. Andrö wa ambö omasido fariawö ba niha si faduhu tödö ba khönia samösa hegöi ba niha si lö moʼangenanöi fehedenia. Abölö omasido fariawö ba niha si lö alio mofönu hegöi sangokhögö fangide-ngideʼö. Simane daʼö fefu zi fahuwu khögu. Andrö wa itugu aoha khögu ba wanutunö ösi dödögu hegöi abula dödögu.”

Moroi ba wehede Sara, tola tawaʼö wa omasi niha fariawö khöda na taʼokhögö mbua-bua falöʼalio mofönu. Baero daʼö, omuso dödö Yehowa na taʼokhögö daʼö. Iʼamenesi ita Sura Niʼamoniʼö enaʼö ’tafalua . . . walöʼalio mofönu’. (Kol. 3:12) Hadia geluahania falöʼalio mofönu? Hewisa wangoromaʼö Yesu falöʼalio mofönu? Ba hana wa tola taʼokhögö waʼowua-wua dödö na so khöda mbua-bua daʼa?

Falöʼalio mofönu no bua-bua niforomaʼö niha sangokhögö faʼahono dödö. Niha si lö alio mofönu, sökhi gamuatania ba niha böʼö ba iʼokhögö wanaha tödö hewaʼae na alua khönia zi lö sökhi.

Ba Zura Niʼamoniʼö, ngawua wehede Yunani nifoʼeluaha tobali ”falöʼalio mofönu” muʼogunaʼö ia ba woʼamaedolagö kudo si no mufauwu. Hewaʼae na no mauwu ia, lö tebulö wa abölö kudo daʼö. Hizaʼi, no tefomaha ia enaʼö tola ifatörö mbotonia. Simane daʼö göi niha sangokhögö mbua-bua falöʼalio mofönu, tenga niha si lö faʼabölö ia. Tola ifatörö fefu mbua-buania si lö sökhi ba irorogö waʼatulö ba gotalua niha böʼö.

Tola manö tamane tödöda, ’tenga niha si lö alio mofönu ndraʼo’. Baero daʼö, börö me ato niha si lö sökhi hegöi si lö mangokhögö faʼebolo dödö ba zi fasuida, tola manö abua khöda ba wangoromaʼö falöʼalio mofönu. (Rom. 7:19) Andrö, moguna wamorege enaʼö tola taʼokhögö mbua-bua falöʼalio mofönu. Hizaʼi, tola itolo ita eheha niʼamoniʼö moroi khö Yehowa enaʼö lö awuwu ita ba wamalua yaʼia. (Gal. 5:22, 23) Hana wa moguna taforege ba wangokhögö mbua-bua falöʼalio mofönu?

Na taʼokhögö mbua-bua falöʼalio mofönu, hasambalö wa omasi niha tobali si fahuwu khöda. Simane nitutunö Sara ba wamobörö artikel andre, tatu manö omasi ita fariawö ba niha sangokhögö mbua-bua falöʼalio mofönu. Duma-duma niha sangokhögö mbua-bua falöʼalio mofönu hegöi faʼasökhi dödö, yaʼia daʼö Yesu. (2 Kor. 10:1) Iraono side-ide manö, omasi ira fahuwu khö Yesu hewaʼae na lö aboto ba dödöra haniha Yesu andrö. Si toʼölönia, lö omasi fahuwu ndraono ba niha si lö laʼila.​—Mrk. 10:13-16.

Na taʼokhögö mbua-bua falöʼalio mofönu, so mbuania ba waʼaurida samösa hegöi ba niha si so ba  zi fasuida. Hana? Na taʼokhögö mbua-bua daʼa, lö alio abao dödöda mazui talau fakara-kara. (Gamd. 16:32) Daʼö mbörö wa lö taʼafökhöiʼö dödö niha böʼö hegöi niha niʼomasiʼöda. Baero daʼö, lö moguna tatahigö ita samösa börö me lö irai taʼafökhöiʼö dödö niha böʼö.

Hewaʼae na oya halöwö nifalua Yesu hegöi noro dödö sebua niʼokhögönia, lö mamalö iforomaʼö mbua-bua falöʼalio mofönu. Ato niha si tosasa hegöi si göna abula dödö ba götö Yesu. Moguna khöra wangokafu dödö. Tobali, terara sibai dödöra me iwaʼö khöra Yesu, ”Miʼaine khögu, . . . börö me no sebolo tödö ndraʼo ba si lö fayawa.”​—Mat. 11:28, 29.

Hewisa enaʼö tobali ita niha sangokhögö mbua-bua falöʼalio mofönu simane Yesu? Moguna tafahaʼö ita ba Daromali Lowalangi enaʼö taʼila hewisa gamuata Yesu ba niha böʼö hegöi hadia nifaluania na alua khönia waʼatosasa. Aefa daʼö, na tarasoi wa abua khöda ba wangoromaʼö falöʼalio mofönu, moguna taforege ba woloʼö duma-duma Yesu. (1 Fet. 2:21) Datatutunö tölu ngawalö zi tola manolo Yesu ba wangoromaʼö falöʼalio mofönu.

Iʼokhögö wangide-ngideʼö Yesu. Imane Yesu, ”No sebolo tödö ndraʼo ba si lö fayawa.” (Mat. 11:29) Itötöi Sura Niʼamoniʼö zi dombua gamuata andre ba ginötö si fagölö börö me moʼamakhaita sibai walöʼalio mofönu ba wangide-ngideʼö. (Ef. 4:1-3) Hadia gamakhaita zi dombua gamuata andre?

Na so khöda wangide-ngideʼö, lö alio tetutu dödöda mazui mofönu ita ba wehede niha böʼö. Hadia nifalua Yesu me so niha sangumaʼö wa ”oluʼa-luʼa ba tuka mabu” ia? Iforomaʼö Yesu ba gamuatania wa lö atulö niböbögö khönia andrö. Si fao falöʼalio mofönu, iwaʼö Yesu wa ”oroma waʼatua-tua niha moroi ba ngawalö zatulö nifaluania”.​—Mat. 11:19.

Na afökhö dödömö börö wehede zi samösa niha sanandrösa ba jenis kelamin, mado, mazui waö-waö waʼaurimö, forege ba wameʼe fanema li si fao falöʼalio mofönu. Imane samösa zatua sokubaloi ba Afrika Selatan sotöi Peter, ”Na abao dödögu börö wehede zi samösa niha, usofu khögu samösa, ’Hadia nifalua Yesu na khönia alua daʼa?’” Imane nasa, ”Ufahaʼö ndraʼo enaʼö lö alio tetutu dödögu.”

Aboto ba dödö Yesu wa lö moʼahonoa niha gulidanö. Omasi ndra nifahaʼö Yesu ba wamalua satulö. Hizaʼi, börö me lö moʼahonoa ira, itaria abua khöra ba wamalua yaʼia. Duma-dumania, ba mbongi fatua lö mate Yesu, no lalau mörö ira Fetero, Yakobo hegöi Yohane, hewaʼae na no iʼandrö khöra Yesu enaʼö böi mörö ira. Hizaʼi, aboto ba dödö Yesu hadia mbörö wa mörö ira. Imane, ”Aoha sa gölö dödö, ba no ambö faʼabölö nösi.” (Mat. 26:40, 41) Börö me aboto ba dödö Yesu hewisa zalua khö ndra sinangeania, lö abao dödönia khöra.

Ba mböröta, omasi sibai dalifusöda ira alawe sotöi Mandy ba wamato-matou niha böʼö. Hizaʼi iadaʼa, iforege sibai ba wangokhögö bua-bua falöʼalio mofönu simane nifalua Yesu. Imane, ”Uforege sibai enaʼö aboto ba dödögu wa lö moʼahonoa fefu niha. Uforege göi ba woloʼö bua-bua Yehowa enaʼö tola uʼosambuaʼö dödögu ba mbua-bua si sökhi niʼokhögö niha böʼö.” Na taʼoʼö Yesu ba woʼangeragö hadia zalua ba niha böʼö, tola taforomaʼö khöra mbua-bua falöʼalio mofönu.

Sindruhu-ndruhu wa faduhu dödö Yesu khö Lowalangi ba ngawalö hadia ia. Me so Yesu ba gulidanö, asese lafalua khönia zi lö atulö. Ato niha sangokhögö lala wangera-ngera si fasala sanandrösa khönia. Fatiu dödö niha khönia ba lafakao ia. Hewaʼae simanö, lö mamalö iforomaʼö walöʼalio mofönu börö me ”itouʼö fefu ba danga zanguhuku satulö” yaʼia daʼö Yehowa. (1 Fet. 2:23) Aboto ba dödö Yesu, hasambalö itolo ia Amania ba zorugo enaʼö anau gölönia, ba hasambalö ihuku niha samalua si lö sökhi.

Na mofönu ita me lafalua khöda zi lö atulö, tola itugu lö sökhi zalua. Fefu ita lö moʼahonoa. Andrö, hewaʼae na so dane-dane wa mofönu ita, tola manö tafalua gamuata si fasala. Börö daʼö, ifasugi khöda Sura Niʼamoniʼö wa ”fönu niha andrö, lö iʼasogö waʼatulö ba wamaigi Lowalangi”.​—Yak. 1:20.

Imane samösa dalifusöda ira alawe moroi ba Jerman sotöi Cathy, ”Ba zilalö, imane tödögu wa moguna fatandro ndraʼo börö me lö niha böʼö sangoʼawögö yaʼo.” Ba gafuriata, iforege talifusöda Cathy ba wamaduhusi tödö Yehowa, ba tebulö gamuatania. Imane, ”Iadaʼa, lö moguna fatandro ndraʼo. Tola uforomaʼö walöʼalio mofönu, börö me aboto ba dödögu wa hasambalö iheta fefu zi lö sökhi ba gulidanö andre Yehowa.” Na no irai lafalua khöu zi lö atulö, moguna faduhu dödömö khö Yehowa simane nifalua Yesu. Na öfalua daʼö, tola lö tebulö öforomaʼö walöʼalio mofönu.

No irai iwaʼö Yesu, ”Yaʼahowu niha sangide-ngideʼö yaʼia.” (Mat. 5:5) Andrö, iforomaʼö khöda na omasi tarasoi waʼomuso dödö, moguna taforomaʼö mbua-bua falöʼalio mofönu. Hadia mbua nitemada na taforomaʼö walöʼalio mofönu? Datatutunö ösa duma-dumania.

Na alua waʼafaehu mbua gera-era ba zi sambua fongambatö, tola larorogö waʼatulö na laforomaʼö walöʼalio mofönu. Imane samösa dalifusöda moroi ba Australia sotöi Robert, ”Ba ginötö mofönu ndraʼo, itaria uwaʼö wehede sangafökhöi dödö woʼomogu, hewaʼae na tenga daʼö gohitö dödögu. Hizaʼi, tebai saʼae ufuli furi wehedegu andrö. Maniasado sibai börö me no uʼafökhöiʼö dödönia.”

Fefu ita, asese fasala na mohede, ba tola manö tekiko wahuwusada khö woʼomoda börö wehede sangafökhöiʼö tödö. (Yak. 3:2) Andrö, na so waʼafaehu bua wangera-ngerada khö woʼomoda, moguna lö mamalö taforomaʼö waʼahono dödö ba tazago wehededa.​—Gamd. 17:27.

Iforege Robert enaʼö lö mamalö iforomaʼö waʼahono dödö ba izago wehedenia. Hadia mbuania? Imane, ”Iadaʼa, na alua khöma waʼafaehu mbua wangera-ngera, uforege enaʼö uhaogö ba wamondrongo hegöi ba wahuhuosa, ba lö alio mofönu ndraʼo. Itugu sökhi wahuwusagu khö woʼomogu.”

Na taʼokhögö mbua-bua walöʼalio mofönu, tola taʼokhögö wahuwusa si sökhi ba niha böʼö. Si toʼölönia, lö ato zi fahuwu ba niha salio tetutu dödö. Tobali, na taʼokhögö mbua-bua walöʼalio mofönu, tola tarorogö ”wamaböbö faʼatulö andrö”. (Ef. 4:2, 3) Imane Cathy nitutunö no mege, ”Na uforomaʼö walöʼalio mofönu, tola fariawö ndraʼo gofu haʼökhö manö, hewaʼae na itaria abua ba wamalua yaʼia.”

Na taʼokhögö mbua-bua falöʼalio mofönu, tola tarasoi waʼohahau dödö. Iwaʼö Sura Niʼamoniʼö wa ”faʼatua-tua siʼotarai moroi yawa” tola möi fanoloda ba wangokhögö bua-bua falöʼalio mofönu hegöi ba worasoi faʼohahau dödö. (Yak. 3:13, 17) Na so khöda walöʼalio mofönu, tola taʼokhögö ’waʼebolo dödö’. (Gamd. 14:30) So samösa dalifusöda sotöi Martin, no iforege ba wangoromaʼö bua-bua falöʼalio mofönu. Imane, ”Iadaʼa, lö ufaso niha enaʼö lafalua hadia zomasi dödögu, ba urasoi wa itugu ebua waʼohahau dödögu hegöi faʼomuso dödögu.”

Sindruhu sa, itaria abua khöda ba wangoromaʼö bua-bua falöʼalio mofönu. Ifaduhuʼö samösa dalifusöda ira matua, ”Sindruhunia, irugi iadaʼa, itaria urasoi wa tebai saʼae utaha wönugu.” Hizaʼi, moguna tatörö tödöda wa Yehowa zangandrö khöda ba wangoromaʼö bua-bua falöʼalio mofönu. Andrö wa hasambalö itolo ita ba wamalua daʼö. (Yes. 41:10; 1 Tim. 6:11) Hasambalö wa tola ’iʼasiwai wamahaʼö yaʼita’, ba tola ”iʼabölöʼö” ita. (1 Fet. 5:10) Ba gafuriata, simane sinenge sotöi Faulo, tola tobali ita niha sangokhögö ”faʼasökhi dödö ba falöʼalio mofönu simane Keriso”.​—2 Kor. 10:1.