1-2. Moloʼö Zinunö 40:6, hadia manö mbuala nibeʼe Yehowa khöda, ba hana wa moguna tatutunö daʼa?

YEHOWA no Lowalangi soböwö sibai. Oya mbuala si no ibeʼe khöda. Duma-dumania, ibeʼe khöda nahia waʼatoröi si sökhi, yaʼia daʼö ulidanö andre. Ifazökhi göi guto niha ba lala sahöli-höli dödöda, irege tola mangera-ngera ba fahuhuo ita. Baero daʼö, no ibeʼe khöda Daromalinia, Sura Niʼamoniʼö. Buania, tola tasöndra wanema li moroi ba wanofu-nofu sabölö moguna sanandrösa ba waʼauri.​—Baso Zinunö 40:6.

² Ba artikel daʼa, tatutunö zi tölu ngawalö mbuala andrö. Na taʼangerönusi fefu mbuala Yehowa, tola itugu taʼameʼegö tödö mbuala nibeʼenia. Tola göi itugu tahalö gangetula ba wangomusoiʼö dödö Yehowa, Somböi yaʼita safönu faʼomasi. (Fam. 4:11) Baero daʼö, tola itugu taʼokhögö waʼatua-tua ba wameʼe fanema li ba niha si no mufaelungu ba wamahaʼö evolusi.

3. Hana wa no sahöli-höli dödöda gulidanö andre?

³ Ifazökhi gulidanö andre Yehowa ba lala sahöli dödöda. Daʼa zangoromaʼö wa atua-tua sibai Lowalangi. (Rom. 1:20; Heb. 3:4) Tenga ha planetda zamasui luo. Hizaʼi, no faböʼö gulidanö andre moroi ba danö böʼö. Hadia mbörö? Börö me ha ba gulidanö andre tola terorogö waʼauri niha.

4. Hewisa gulidanö andre ba wangoromaʼö faʼatua-tua Lowalangi sahöli-höli dödö? Beʼe duma-duma.

⁴ Ulidanö andre, tola mufagölösi ia simane köfa safönu niha si so ba dalu nasi sebolo. Hizaʼi, so ösa waʼafaehu. Khalaigö atö daʼa: Hadia zalua na duma-dumania fefu niha si so yawa ba göfa andrö moguna lafazökhi samösa göra, idanö,  hegöi oksigen, ba tebai göi latiboʼö zasao baero ba göfa? Hasambalö mate fefu niha si so ba yawa göfa daʼö. Hizaʼi, tenga simane köfa daʼö gulidanö si toröi yaʼita. Ulidanö andre tola iʼasogö zoguna ba waʼauri niha si miliaran faʼato. Tola iʼasogö oksigen, ö, hegöi idanö si tola taʼogunaʼö, ba lö irai ahori fefu daʼö. Sasao si so ba gulidanö andre, lö latiboʼö baero ba luar angkasa. Hewaʼae simanö, lö tebulö wa no nahia waʼatoröi si sökhi gulidanö andre. Hadia mbörö? Börö me no itatugöi Yehowa enaʼö tola alua siklus daur ulang ba gulidanö andre. Datatutunö dombua duma-duma siklus daur ulang zangoromaʼö faʼatua-tua Yehowa, yaʼia daʼö siklus oksigen hegöi siklus nidanö.

5. Hadia siklus oksigen andrö, ba hadia zoroma ba siklus daʼa?

⁵ Moguna oksigen ba niha hegöi urifö enaʼö tola auri ira. Si löʼö-löʼönia, so otu miliar ton oksigen niʼogunaʼö fefu zonoso ero röfi. Hizaʼi, lö irai ahori oksigen ba gulidanö. Baero daʼö, fefu zonoso ba gulidanö andre, latiboʼö baero gas nifotöi karbon dioksida. Hewaʼae simanö, lö irai talafo oya karbon dioksida si so ba atmosfer. Hadia mbörö? Börö me no ifazökhi ngawalö zinanö Yehowa, iʼotarai zinanö side-ide irugi döla geu segebua. Fefu zinanö andrö, lahofo karbon dioksida ba latiboʼö baero oksigen. Siklus oksigen andre zangoromaʼö wa Yehowa ”zameʼe faʼauri ba niha [hegöi] hanu-hanu”.​—Hal. 17:24, 25.

6. Hadia siklus nidanö, ba hadia zoroma moroi ba daʼö? (Faigi göi kotak ” Siklus Nidanö No Buala moroi khö Yehowa”.)

⁶ Lö baku ba lö ogöʼö nidanö si so ba gulidanö, börö me tefaudu sibai waʼaröu gotalua gulidanö ba luo. Na ahatö sibai gotalua gulidanö ba luo, tola ogöʼö nidanö si so ba gulidanö. Tobali nahia saukhu sibai gulidanö, oköli, ba tebai toröi niha. Hizaʼi, na fandröndröu maʼifu gotalua gulidanö ba luo, hasambalö wa tobali esi fefu nidanö, ba afönu gulidanö andre salju hegöi esi. Andrö wa tefaudu sibai nahia nitatugöi Yehowa ba gulidanö andre, irege tola alua siklus nidanö ba terorogö waʼaurida. Börö waʼaukhu zino, möi miyawa nidanö si so ba nasi hegöi si so ba dete danö, ba tobali lawuo. Ero röfi, oya sibai nidanö si möi miyawa, töra moroi ba waʼoya nidanö si so ba danau ba zi sagörö ulidanö. Aefa daʼö, tetaha nidanö yawa ba atmosfer mato fulu hari, aefa daʼö atoru ia tou tobali teu mazui salju. Ba gafuriata, ifuli numalö nidanö andrö ba nasi mazui ba nungo nidanö, ba ifuli zui alua siklus nidanö. Ifazökhi siklus daʼa Yehowa enaʼö lö irai ahori nidanö ba gulidanö. Daʼa zangoromaʼö wa ebua sibai waʼatua-tua hegöi kuaso niʼokhögö Yehowa.​—Yob. 36:27, 28; Zango. 1:7.

7. Hadia zi tola tafalua ba wangoromaʼö wa taʼameʼegö tödö mbuala si no mututunö ba Zinunö 115:16?

⁷ Hadia zi tola tafalua enaʼö itugu taʼameʼegö tödö gulidanö sahöli-höli dödöda andre, hegöi ngawalö zi sökhi niʼasogönia? (Baso Zinunö 115:16.) Sambua lala si tola tafalua, yaʼia daʼö taʼangerönusi fefu niwöwöi Yehowa. Daʼö zamarou tödöda ba wangandrö saohagölö khö Yehowa ero maʼökhö ba ngawalö zi sökhi si no ibeʼe khöda. Ba tola taforomaʼö wa taʼameʼegö tödö gulidanö andre na tarorogö enaʼö lö taʼunö nahia si toröi yaʼita.

8. Hadia zangoromaʼö wa mufazökhi gutoda andre si fao faʼahöli-höli dödö?

⁸ Mufazökhi guto niha si fao faʼahöli-höli dödö. Me so ita bakha ba dalu ninada, tedou gutoda simane faʼatedou nitatugöi Yehowa, ba so ngahönö sel si bohou tefazökhi ero menit. Moloʼö niha sagatua-tua, so arakhagö 100 miliar sel si tohude nifotöi  neuron ba guto niha si no ebua-bua. Teʼorudugö sel andre tobali utoda, ba faʼabuania te mato 1,5 kilogram. Datatutunö hadia manö zi tola ifalua uto niha sahöli-höli dödö famazökhi andre.

9. Hana wa faduhu dödöda wa no buala moroi khö Yehowa wa tola fahuhuo ita?

⁹ No sahöli-höli dödö me tola fahuhuo ita. Angeragö hadia zalua ba ginötö talau fahuhuo. Na tatötöi zi sambua fehede, so mato 100 ndroto-ndroto si so ba lelada, tölö-tölöda, beweda, simbida, hegöi tötöʼada, nifaliwa gutoda. Moguna maliwa fefu ndroto-ndroto andrö ba ginötö si tefaudu enaʼö tola aboto ba dödö niha böʼö ngawua wehede niwaʼöda. Baero daʼö, ato niha sagatua-tua si faduhu tödö wa so waʼatua-tua ba niha iʼotarai me tumbu ba wangiʼila hegöi ba wamahaʼö yaʼira ba li si bohou. So sambua penelitian si no mufaʼanö me döfi 2019, zanuhini faʼatua-tua si no musöndra andrö. Moloʼö penelitian daʼö, tola laʼila ngawua wehede nirongora iraono sawena tumbu ba aboto ba dödöra daʼö. Daʼa zangoromaʼö wa no buala moroi khö Yehowa me tola fahuhuo ita.​—2 Moz. 4:11.

10. Me no buala moroi khö Yehowa wa tola fahuhuo ita, hewisa wangoromaʼöda wa taʼameʼegö tödö daʼö?

¹⁰ Me no buala moroi khö Yehowa wa tola fahuhuo ita, hewisa wangoromaʼöda wa taʼameʼegö tödö daʼö? Sambua lala si tola tafalua yaʼia daʼö tatutunö hadia nifaduhusida tödö sanandrösa khö Lowalangi ba niha si faduhu tödö ba evolusi. (Zin. 9:2; 1 Fet. 3:15) Moloʼö yaʼira, tenga börö Lowalangi wa so gulidanö andre hegöi ngawalö zonoso si so ba daʼö, hizaʼi tewöwöi samösa. Na taʼogunaʼö ayati Zura Niʼamoniʼö hegöi ngawalö nitutunö ba artikel daʼa, tola taʼoʼawögö Namada si so ba zorugo. Na so niha somasi mamondrongo, tola tatutunö khönia hadia mbörö wa faduhu dödöda wa Yehowa Zomböi banua si yawa hegöi ulidanö.​—Zin. 102:26; Yes. 40:25, 26.

11. Hadia sambua mbörö wa no sahöli-höli dödö wamazökhi utoda andre?

¹¹ No sahöli dödö me tola tatöngöni zi no numalö. Me föna, so samösa zanura buku zangumaʼö wa uto niha andre tola itöngöni informasi simane faʼoya nösi mbuku si 20 zuta ngawua. Hizaʼi iadaʼa, faduhu dödö niha sagatua-tua wa sindruhunia abölö oya nasa informasi si tola tatöngöni. Hadia zi tola tafalua börö waʼatua-tuada sahöli-höli dödö andre?

12. Hadia gemaehutada ba zi so noso tanö böʼö si so ba gulidanö?

¹² Moroi ba gotalua zi so noso si so ba gulidanö, ha niha zangokhögö faʼatua-tua ba wamahaʼö yaʼira ba zi no irai alua khöra. Buania, tola tabulöʼö lala wangera-ngera hegöi faʼaurida, ba tobali ita niha sabölö sökhi. (1 Kor. 6:9-11; Kol. 3:9, 10) Tola göi tafomaha dödöda side-ide enaʼö tola tafaehusi hezo zatulö hegöi si fasala. (Heb. 5:14) Tola tafahaʼö ita ba wangoromaʼö faʼomasi, faʼasökhi dödö, hegöi faʼahakhö dödö. Ba tola taforege ba woloʼö faʼatulö Yehowa.

13. Simane nitutunö ba Zinunö 77:12, 13, hewisa zinangeania ita ba wangogunaʼö faʼatua-tuada ba wanöngöni?

 ¹³ Hadia dandra wa taʼameʼegö tödö waʼatua-tuada ba wanöngöni? Sambua lalania, yaʼia daʼö na tatöngöni fefu zi no irai ifalua khöda Yehowa ba wanolo hegöi ba wangabölöʼö yaʼita. Na tafalua daʼö, tola faduhu dödöda wa lö mamalö itolo ita. (Baso Zinunö 77:12, 13; 78:4, 7) Lala tanö böʼö si tola tafalua yaʼia daʼö tatöngöni zi sökhi nifalua niha böʼö khöda ba taʼandrö khöra saohagölö. Moloʼö penelitian, abölö owua-wua dödö niha sangoromaʼö fangandrö saohagölö. So nasa dandra tanö böʼö zangoromaʼö wa taʼameʼegö tödö waʼatua-tuada ba wanöngöni. Moguna taʼoʼö Yehowa si lö irai manöngöni sala si no irai tafalua. Hewaʼae na moʼahonoa ia ba wanöngöni, omasi iʼefaʼö ba iʼolifugö zala nifaluada na sindruhu-ndruhu tabulöʼö gera-erada. (Zin. 25:7; 130:3, 4) Omasi göi ia na tafalua zimane daʼö na so niha zangandrö faʼebolo dödö börö me no iʼafökhöiʼö dödöda.​—Mat. 6:14; Luk. 17:3, 4.

14. Hewisa wangoromaʼöda wa taʼameʼegö tödö guto si no ibeʼe khöda Yehowa?

¹⁴ Utoda andre, no buala sahöli-höli dödö moroi khö Yehowa. Tola taforomaʼö wa taʼameʼegö tödö mbuala andrö na taʼogunaʼö ia ba wamolakhömi Yehowa. So niha sangogunaʼö utora ba wotatugöi samösa hezo zi sökhi hegöi si lö sökhi. Hizaʼi, börö me Yehowa zomböi yaʼita, abölö alawa nasa goi-goinia moroi ba goi-goi nitatugöida samösa. (Rom. 12:1, 2) Na taʼoʼö goi-goi Yehowa, itugu tarasoi waʼahono dödö ba waʼauri. (Yes. 48:17, 18) Baero daʼö, taʼokhögö gohitö dödö ba waʼauri si no tatu, yaʼia daʼö ba wangomusoiʼö dödö Yehowa ba tafolakhömi ia börö me yaʼia Zomböi ba Amada.​—Gamd. 27:11.

15. Me ibeʼe khöda Zura Niʼamoniʼö, hewisa wangoromaʼö Yehowa wa sindruhu-ndruhu iʼomasiʼö ita?

¹⁵ So ösa ndra matua niʼogunaʼö Yehowa ba wanura Sura Niʼamoniʼö börö me iʼomasiʼö sibai ita. Iʼogunaʼö Zura Niʼamoniʼö, ba  wameʼe khöda fanema li ba wanofu-nofu sabölö tohude simane: Hezo moroi niha gulidanö? Hadia lua-lua waʼauri andre? Ba hewisa waʼaurida ba zi so miföna? Omasi Yehowa na fefu ita taʼila wanema linia. Andrö, so ösa niha niʼogunaʼönia ba wamoʼeluaha Sura Niʼamoniʼö ba li si faböʼö-böʼö. Iadaʼa, no mufoʼeluaha Zura Niʼamoniʼö he si no awai tefazökhi mazui si lö awai nasa, ba zi töra 3.000 ngawalö li! Sagötö sejarah, Sura Niʼamoniʼö no buku sabölö oya mufoʼeluaha hegöi mufazaewe. Gofu hezo toröi niha mazui gofu hadia li niʼogunaʼöra, ato niha si tola mombaso Sura Niʼamoniʼö ba li niʼogunaʼöra samösa.​—Faigi kotak ” Mufoʼeluaha Zura Niʼamoniʼö ba Ngawalö Li si So ba Afrika”.

16. Moloʼö Mataiʼo 28:19, 20, hewisa wangoromaʼöda wa taʼameʼegö tödö Zura Niʼamoniʼö?

¹⁶ Tola taʼoromaʼö wa taʼameʼegö tödö Zura Niʼamoniʼö na tabaso ia ero maʼökhö, taʼangerönusi nösinia, ba taforege ba wamalua zi no tafahaʼö yaʼita. Baero daʼö, taforege göi ba wamaʼema turia somuso dödö moroi ba Zura Niʼamoniʼö enaʼö abölö ato niha samondrongo yaʼia. Na tafalua daʼö, no taforomaʼö wangandrö saohagölö khö Lowalangi.​—Zin. 1:1-3; Mat. 24:14; baso Mataiʼo 28:19, 20.

17. Hadia manö mbuala si no tatutunö ba artikel daʼa, ba hadia nitutunöda ba artikel aefa daʼa?

¹⁷ Ba artikel andre, no tatutunö hadia manö mbuala si no ibeʼe khöda Yehowa. No ibeʼe khöda gulidanö si tobali nahia waʼatoröida, uto sahöli dödö famazökhi, hegöi Taromalinia, Sura Niʼamoniʼö. Hizaʼi, no ibeʼe göi khöda Yehowa mbuala tanö böʼö si tebai taʼila mazui tababaya. Tatutunö ngawalö mbuala andrö ba artikel aefa daʼa.