1-2. Hadia nitutunöda ba artikel daʼa?

IADAʼA, no oya dandra si no taʼila wa no auri ita ba gamozua ngaluo safuria. Ba zi lö ara tö, fao Yehowa hegöi Yesu ba wamakiko fefu wamatörö solawa Famatörö Lowalangi. Fatua lö alua daʼö, lö aetu faʼudu razo tanö yöu hegöi razo tanö raya ba lafakao göi nono mbanua Lowalangi.

² Ba artikel daʼa, tatutunö wamaʼeleʼö nisura ba Danieli 11:40–12:1. Taʼalui haniha zi tobali razo tanö yöu ba götöda iadaʼa. Tatutunö göi hadia mbörö wa lö moguna ataʼu ita ba ngawalö hadia ia zi lö ara tö alua.

3-4. Haniha razo tanö yöu si bohou? Tutunö.

³ Me no mufakiko Uni Soviet me döfi 1991, ’falukha wanolo side-ide, fangorifira’ ba nono mbanua Lowalangi si no irai so barö wamatörönia. (Dan. 11:34) Eluahania, laʼokhögö wangefa ba ginötö si lö arara, ba lö taha-tahara ba wamalua halöwö fanuriaigö. Buania, lö ara aefa daʼö, tedou waʼato zanuriaigö irugi ngaotu ribu ba soi si no irai so barö wamatörö Uni Soviet. Hizaʼi ba gafuriata, ifuli so razo tanö yöu si bohou, yaʼia daʼö Rusia hegöi soi sotuhini yaʼia. Simane si no mututunö ba artikel silalö, famatörö si no tobali razo tanö yöu hegöi razo tanö raya, lafalua zi tölu ngawalö andre: (1) lafakao nono mbanua Lowalangi, (2) moroi ba gamuatara laforomaʼö wa fatuwu ira khö Yehowa hegöi ba nono mbanuania, ba (3) faʼudu ira khö nawöra.

⁴ Andrö, tola tawaʼö wa no razo tanö yöu Rusia hegöi soi sotuhini yaʼia, börö zi tölu dane-dane andre: (1) Lasuwö nono mbanua Lowalangi, yaʼia me lö latehegö wamalua halöwö fanuriaigö ba lafakao ndra talifusöda si ngaotu ribu faʼato si toröi ba mbanua si so  barö wamatöröra. (2) Bua-buara andrö zangoromaʼö wa fatuwu ira khö Yehowa hegöi ba nono mbanuania. (3) Laforege enaʼö abölö ebua kuasora moroi ba razo tanö raya, yaʼia daʼö Kuaso Gulidanö Inggris-Amerika. Iadaʼa, datatohugö ba wanutunö hadia nifalua Rusia hegöi soi sotuhini yaʼia, sangoromaʼö wa yaʼia zi tobali razo tanö yöu.

5. Hadia nifaʼeleʼö ba Danieli 11:40-43?

⁵ Baso Danieli 11:40-43. Ösi ayati andre zamaʼeleʼö hadia zalua ba ngaluo safuria. Ibeʼe khöda khala-khala wahindrisa ba gotalua razo tanö yöu hegöi razo tanö raya. Iwaʼö Danieli wa ba ngaluo safuria, faoma ”fatandra faʼabölö” razo tanö yöu hegöi razo tanö raya.​—Dan. 11:40.

6. Hadia dandra zangoromaʼö wa fahindri razo tanö yöu hegöi razo tanö raya?

⁶ Faoma fahindri razo tanö yöu hegöi razo tanö raya ba wamadöni haniha zamatörö sabölö tohude ba gulidanö. Duma-dumania, nehegö hadia zalua me no aefa Wasuwöta Gulidanö II, oya soi ba Eropa nifatörö Uni Soviet. Ba wolawa razo tanö yöu, fawuʼu li razo tanö raya ba soi tanö böʼö, ba wangosambuaʼö faʼabölöra. Lahaogö sambua organisasi nifotöi NATO. Fahindri göi ira ba wangowuloi saradadu ba oya lahorigö gefe ba daʼö. Baero daʼö, ilawa razo tanö raya razo tanö yöu, yaʼia me ituhini nudu razo tanö raya ba wasuwöta, ba simane daʼö göi nifalua razo tanö raya. Alua daʼa ba Afrika, Amerika Latin, hegöi Asia. Ba zi hauga fakhe safuria, itugu ebua kuaso Rusia hegöi soi sotuhini yaʼia. Lasuwö göi razo tanö raya ba Internet. Faoma laböbögö zi lö duhu khö nawöra, lawaʼö wa so ba gotaluara zangogunaʼö program komputer ba wamakiko sistem ekonomi hegöi politik ba soi si fatuwu khönia. Ba simane nifaʼeleʼö Danieli, lö aetu isuwö nono mbanua Lowalangi razo tanö yöu.​—Dan. 11:41.

7. Hadia ’danö si sökhi’ andrö?

⁷ Ba Danieli 11:41, iwaʼö wa möi razo tanö yöu ba ’danö si sökhi’. Hadia danö si sökhi andrö? Me föna, eluahania yaʼia daʼö tanö Gizaraʼeli nifotöi ”fondrege zi sökhi danö”. (Hez. 20:6) Hizaʼi, sabölö tohude ba danö andrö yaʼia daʼö börö me lafosumange Yehowa niha si toröi ba daʼö. Iʼotarai me Fendrakose 33 M, lö saʼae manandrösa geluaha ’danö’ ba zi sambua nahia si so ba gulidanö andre. Tefaudu daʼö, börö me oi mozawili misa nono mbanua Yehowa ba zi sagörö ulidanö. Iadaʼa, eluaha ’danö si sökhi’ manandrösa ia ba waradaiso ba wamati nirasoi nono mbanua Yehowa. Tefarahu ba daʼö wamaluara famosumange, simane feʼamöi ba gangowuloa hegöi fanuriaigö.

8. Hewisa razo tanö yöu weʼamöi bakha ba ’danö si sökhi’?

⁸ Sagötö ngaluo safuria, no hauga kali möi razo tanö yöu bakha ba ’danö si sökhi’. Duma-dumania, me tobali razo tanö yöu Nazi Jerman, möi ia ba ’danö si sökhi’ yaʼia me ifakao ba ibunu ndraono mbanua Lowalangi, mendrua manö me alua wasuwöta gulidanö si mendrua. Aefa daʼö, me tobali razo tanö yöu Uni Soviet me no awai Wasuwöta Gulidanö II, möi ia ba ’danö si sökhi’ yaʼia  me ifakao nono mbanua Lowalangi ba itiboʼö ira ba nahia si fandröndröu.

9. Barö zi hauga fakhe andre, hewisa lala Rusia hegöi soi sotuhini yaʼia ba weʼamöi ba ’danö si sökhi’?

⁹ Barö zi hauga fakhe andre, hewisa lala Rusia hegöi soi sotuhini yaʼia ba weʼamöi ba ’danö si sökhi’? Me 2017, lö itehegö razo tanö yöu na lafalua halöwöra iraono mbanua Yehowa ba so ösa ndra talifusöda nikurunia. Lö itehegö so publikasida, farahu ba daʼö Sura Niʼamoniʼö Famoʼeluaha Gulidanö si Bohou. Baero daʼö, ihalö gödo ndraha niʼokhögöda si so ba Rusia, awö Balai Mbanua Lowalangi hegöi Balai Kebaktian. Börö daʼö, me döfi 2018, hasara dödö Mboto Solohe ba wangumaʼö wa no razo tanö yöu Rusia hegöi soi sotuhini yaʼia. Hewaʼae tefakao nono mbanua Yehowa, lö lalawa ndra samatörö mazui laʼalui lala enaʼö tebohouni lala ba wamatörö. Hizaʼi, laʼoʼö mene-mene Zura Niʼamoniʼö enaʼö mangandrö ira salahi ’ndra samatörö fefu’, mendrua manö na so gangetula sedöna laʼetuʼö ira samatörö si tola molua-lua ba lala wamosumangeda.​—1 Tim. 2:1, 2.

10. Hadia mofozu razo tanö yöu ba wanuwö razo tanö raya? Tutunö.

¹⁰ Nitutunö Danieli 11:40-45, soyania manandrösa ba zedöna ifalua razo tanö yöu. Hadia daʼö geluahania wa mofozu razo tanö yöu ba wanuwö razo tanö raya? Tenga. Lö tebulö so razo tanö raya irugi waʼatohare Yehowa hegöi Yesu, ba wodudugö fefu wamatörö niha gulidanö ba wasuwöta Hamagedo. (Fam. 19:20) Hezo tola taʼila daʼö? Datatutunö hadia nifaʼeleʼö mbuku Danieli hegöi buku Wamaʼeleʼö sanandrösa ba daʼö.

11. Hadia geluaha nitutunö Danieli 2:43-45? (Faigi gambara ba guli majalah.)

¹¹ Baso Danieli 2:43-45. Itutunö Danieli sanandrösa ba zi sambua nadu sebua, sangokhögö ndroto-ndroto moroi ba loga si faböʼö-böʼö. Ero sambua ndroto-ndroto, daʼö zoʼamaedolagö famatörö sangokhögö kuaso si tola molua-lua ba nono mbanua Lowalangi. Faböʼö-böʼö ginötö wamatöröra. Tefazökhi gahe nadu andrö moroi ba ziʼöli hegöi tambu laʼuri. Manandrösa daʼa ba wamatörö safuria, yaʼia daʼö Kuaso Gulidanö Inggris hegöi Amerika Serikat. Famaʼeleʼö andrö zangoromaʼö wa lö tebulö so Kuaso Gulidanö Inggris-Amerika irege mofozu Wamatörö Lowalangi ba wodudugö fefu wamatörö niha gulidanö.

12. Hadia niʼamaedolagö högö si fitu moroi ba gurifö samuʼi, ba hana wa moguna aboto ba dödöda daʼö?

¹² Ifaʼeleʼö sinenge sotöi Yohane sanandrösa khö ndra samatörö sangokhögö kuaso si tola molua-lua ba nono mbanua Yehowa. Ba wamaʼeleʼönia, muʼamaedolagö fefu wamatörö simane urifö samuʼi si fitu högö. Högö si fitu moroi ba gurifö samuʼi andrö, yaʼia daʼö Kuaso Gulidanö Inggris-Amerika. Moguna aboto ba dödöda daʼa, börö me lö hadöi saʼae högö tanö böʼö baero högö si fitu andrö. Börö daʼö, lö aetu mamatörö högö si fitu ba gurifö samuʼi andrö irugi tohare Yesu hegöi ira saradadunia ba wodudugö yaʼia hegöi fefu ndroto-ndrotonia tanö böʼö. *—Fam. 13:1, 2; 17:13, 14.

13-14. Haniha ’Gogi ba danö Magogi’, ba hadia mbörö wa edöna isuwö nono mbanua Lowalangi?

¹³ Famaʼeleʼö nisura Hezekieli, itutunö sanandrösa ba zalua fatua lö tehori razo tanö yöu hegöi razo tanö raya. Na tafaigi wamaʼeleʼö si tesura ba Hezekieli 38:10-23; Danieli 2:43-45; 11:44–12:1; hegöi ba Wamaʼeleʼö 16:13-16, 21, ba daʼö itutunö sanandrösa ba ginötö hegöi salua si fagölö. Na sindruhu simane daʼö, te daʼa zalua dania ba ginötö daʼö.

¹⁴ Lö ara me no tebörögö wamakao sabölö-bölö, owulo ndra ”razo ba zi sagörö ulidanö” ba tobali ira si sambua ngawawa. (Fam. 16:13, 14; 19:19) Ifotöi ngawawa andre Sura Niʼamoniʼö ’Gogi ba danö Magogi’. (Hez. 38:2) Ngawawa andre zanuwö ono mbanua Lowalangi ba laforege ba wangohori yaʼira. Hadia mbörö wa terou dödöra ba wanuwö nono mbanua Lowalangi? Me ifaʼeleʼö sinenge sotöi Yohane sanandrösa ba ginötö andrö, iwaʼö wa so deu esi segebua sohawui nudu Lowalangi. Teu esi andrö tola manö manandrösa ia ba duria fanguhuku sabölö-bölö nifaʼema nono mbanua Yehowa. Te daʼa mbörö wa edöna Gogi moroi ba danö Magogi ba wangohori ono mbanua Lowalangi.​—Fam. 16:21.

15-16. (a) Hadia zalua nitutunö ba Danieli 11:44, 45? (b) Hadia zalua khö razo tanö yöu hegöi famatörö tanö böʼö si farahu ba Gogi moroi ba danö Magogi?

¹⁵ Halöwö nifalua nono mbanua Lowalangi ba wamaʼema turia fanguhuku hegöi fanuwö safuria nifalua nudu Lowalangi, hulö fagölö daʼö ba zalua nitutunö ba Danieli 11:44, 45. (Baso.) Ba ayati andrö, iwaʼö Danieli wa ”so dania duria moroi ba gatumbukha luo ba moroi yöu” irege lö faʼahono dödö khö razo tanö yöu, ba mofanö ia si fao fönu. Edöna razo tanö yöu ”enaʼö ato ifakiko ba ihori” niha, te manandrösa daʼa ba nono mbanua Yehowa. * Börö daʼö, nitutunö Danieli andre hulö manandrösa ia  ba wanuwö safuria si göna ba nono mbanua Lowalangi.

¹⁶ Me isuwö nono mbanua Lowalangi razo tanö yöu hegöi famatörö tanö böʼö si fao khönia, mofönu sibai Lowalangi, ba ibörögö alua wasuwöta Hamagedo. (Fam. 16:14, 16) Na luo daʼö, ihori fefu wamatörö andrö Yehowa, yaʼia daʼö Gogi moroi ba danö Magogi, ”ba lö sangorifi yaʼia”.​—Dan. 11:45.

17. Haniha Mikhaʼeli mazui ”salawa malaʼika” nitötöi ba Danieli 12:1, ba hadia zi lö ara tö ifalua?

¹⁷ Baso Danieli 12:1. Ba ayati daʼa, itutunö khöda nasa sanandrösa ba wangohori razo tanö yöu hegöi famatörö tanö böʼö. Itutunö göi hewisa wa tola teʼorifi ita. Hadia geluaha ayati daʼa? Mikhaʼeli, no töi tanö böʼö niʼokhögö Razoda, Yesu Keriso. Iʼotarai me döfi 1914, me tobali ia Razo ba Wamatörö Lowalangi ba zorugo, ibörögö ’ifaigi-faigi’ nono mbanua Lowalangi. Ba zi lö ara tö, ihori fefu nudunia ba wasuwöta Hamagedo. Fasuwöta andrö zangasiwai inötö nifotöi Danieli ”götö wamakao” sabölö abua sagötö waö-waö waʼauri niha. Ba wamaʼeleʼö Yohane si so ba mbuku Wamaʼeleʼö, mufotöi ia ’famakao sabölö-bölö’.​—Fam. 6:2; 7:14.

18. Hana wa lö moguna ataʼu ita ba ngawalö zi lö ara tö alua?

¹⁸ Lö moguna ataʼu ita ba ngawalö zi lö ara tö alua börö me no iʼombakhaʼö Danieli hegöi Yohane wa hasambalö iʼorifi nono mbanuania Yehowa hegöi Yesu ba wamakao sabölö-bölö. Iwaʼö Danieli wa na ”no mutanö ba zura” döi zi samösa niha, hasambalö teʼefaʼö ia moroi ba wamakao sabölö-bölö. (Dan. 12:1) Hadia zinangea tafalua enaʼö tesura döida ba zura andrö? Moguna taforomaʼö wa mamati ita khö Yesu, Ono Mbiri-biri andrö khö Lowalangi. (Yoh. 1:29) Moguna talulu waʼaurida khö Lowalangi ba tebayagö idanö. (1 Fet. 3:21) Moguna göi tatuhini Wamatörö Lowalangi, yaʼia na tatolo niha ba wamahaʼö yaʼira sanandrösa khö Yehowa.

19. Hadia zinangea tafalua, ba hadia mbörö?

¹⁹ Iʼotarai iadaʼa, moguna taʼaroʼö waʼafaduhu dödöda khö Yehowa hegöi organisasinia. Moguna göi tatuhini Wamatörö Lowalangi. Na tafalua fefu daʼö, tola teʼorifi ita ba ginötö tohare Wamatörö Lowalangi ba wangohori razo tanö yöu hegöi razo tanö raya.