1. (a) Hadia zi fagölö nifalua Yefita hegöi Khana? (Faigi gambara ba wamobörö wamaha’ö.) (b) Hadia manö wanofu-nofu nibe’eda fanema li ba wamaha’ö da’a?

YEFITA, samösa sondrönia’ö hegöi saradadu si lö fa’ata’u. Khana, samösa ira alawe si so fangide-ngide’ö sondrorogö fo’omonia hegöi omonia. Ya’ira andre samosumange Yehowa. Hiza’i, so zi fagölö nifaluara. No fabu’u li Yefita hegöi Khana khö Yehowa, ba lö faröi ira ba mbu’usa li andrö. Ya’ira andre duma-duma si sökhi ba niha si no fabu’u li khö Yehowa. Iada’a, datatutunö wanema li moroi ba zi tölu wanofu andre: Hadia geluahania mbu’usa li? Hana wa tenga si famai-mai na fabu’u li ita khö Lowalangi? Hadia wamaha’ö si tola tahalö moroi khö Yefita hegöi Khana?

2, 3. (a) Hadia geluaha mbu’usa li? (b) Hadia niwa’ö Zura Ni’amoni’ö sanandrösa ba wamazökhi fawu’usa li khö Lowalangi?

² Ba Zura Ni’amoni’ö, bu’usa li andre no sambua zazi si tohude nifaluada khö Lowalangi. Duma-dumania, samösa niha si no fazazi khö Yehowa wa so nifaluania, ibe’e mbuala, ihalö halöwö ba wamati, mazui so ni’aröu’önia ya’ia. Tola ta’oguna’ö mbuala ni’okhögöda ba wamazökhi mbu’usa li. Lö hadöi niha nifaso ba wamazökhi bu’usa li. Hiza’i, ba  ginötö ifili zi samösa niha wa fabu’u li ia, ba wamaigi Yehowa bu’usa linia andrö no sambua zazi sebua si lö tola lö’ö i’ame’egö tödö ba ifalua. Ba Zura Ni’amoni’ö, bu’usa li fagölö wa’atohudenia ba hölu. Hölu ya’ia da’ö zazi niwa’ö zi samösa niha wa so nifaluania mazui si lö ifalua. (I Moze 14:22, 23; Heberai’o 6:16, 17) Hadia niwa’ö Zura Ni’amoni’ö sanandrösa ba wa’atohude na fabu’u li ita khö Lowalangi?

³ Ba Goroisa Moze, tabaso ba da’ö wa niha si no fabu’u li khö Yehowa, ”lö tola ifuli linia, yamutörö sibai niwa’önia andrö”. (IV Moze 30:3) Isura göi Zelomo, ”Na öfabu’u hadia ia khö Lowalangi, ba böi arörö’ö wanörö, lö’ö sa omasi ia zambö tödö; hadia nifabu’umö, ba öfalua göi.” (Zangombakha 5:3) Ifaha’ö ita Yesu wa tohude sibai na fabu’u li khö Lowalangi. Imane, ”No mirongo göi, wa no muwa’ö khö ndra tua: ’Böi ae ba hölu, na si lö duhu, ba ötörö khö Zo’aya ba zi möi’ö ba hölu.’”—Matai’o 5:33.

4. (a) Hewisa wa’atohudenia na no fabu’u li khö Lowalangi? (b) Hadia wamaha’ö nitutunöda moroi khö Yefita hegöi Khana?

⁴ Da’a zangoroma’ö wa moguna sibai ta’ame’egö tödö hadia zi no tazazi khö Yehowa. Lala wamaluada hadia zi no tafabu’u, molua-lua ia ba wahuwusada khönia. Itutunö da’a Dawido me imane, ”Haniha zi tola möi yawa ba hili Yehowa andrö, ba haniha zi tola mangiagö naha ni’amoni’ö andrö khönia?” Aefa da’ö, ibe’e wanema li me imane wa itema’ö Yehowa niha ”si lö möi ba hölu, na faya”. (Zinunö 24:3, 4) Hadia mbu’usa li nifazökhi Yefita hegöi Khana? Hadia aoha khöra wamalua hadia zi no lafabu’u andrö?

5. Hadia zi no ifabu’u Yefita? Hadia lua-luania?

⁵ No fazazi Yefita khö Yehowa me möi ia fasuwö ba wolawa ndraono Gamoni, si no tobali udu nono mbanua Lowalangi. (Zanguhuku 10:7-9) I’andrö wa’amöna Yefita khö Yehowa ba ifabu’u, ”Na sindruhu öbe’e ba dangagu ndraono Gamoni andrö, ba khö Yehowa ziföföna mamaondragö ya’o baewali khögu, na mangawulido moroi ba ndraono Gamoni lö hadia ia, ba ube’e sumange nitunu.” Itema li wangandrö Yefita Yehowa ba itolo ena’ö möna ia ba wasuwöta. Me mangawuli Yefita ba nomo, i’ondrasi ia ononia alawe ni’omasi’önia. Ya’ia andrö si tobali ”sumange nitunu” khö Yehowa. (Zanguhuku 11:30-34) Hadia geluahania da’ö khö nono Yefita?

6. (a) Hadia aoha khö Yefita hegöi khö nononia alawe ba wamalua hadia zi no ifabu’u khö Lowalangi? (b) Hadia wamaha’ö si tola tahalö sanandrösa ba mbu’usa li ba V Moze 23:22, 24 hegöi Zinunö 15:4?

⁶ Ba wamalua hadia zi no ifabu’u amania, möi nono Yefita ono alawe ba nose Lowalangi ba wamosumange Yehowa safönu  inötö. Hadia ihalö gangetula Yefita fatua lö i’angeraigö da’ö? Lö’ö. Sindruhunia, te i’ila Yefita wa ononia alawe dania zi oföna sibai möi mamaondragö ya’ia. Hiza’i, hewa’ae i’ila da’ö mazui lö’ö, hasambalö abua khö Yefita hegöi khö nononia alawe ba wamalua hadia zi no ifabu’u andrö. Me i’ila wa ononia alawe zangondrasi ya’ia, iwa’ö wa abu sibai dödönia. Möi nononia alawe ba ”wange’esi fa’ono’alawe” andrö khönia. Hadia mbörö? Lö hadöi ono matua khö Yefita, ba iada’a tebai mangowalu nononia alawe si hasambua ba tebai mo’ono ia. Lö hadöi nga’ötö Yefita sanohugö töinia. Hiza’i, aboto ba dödö Yefita hegöi ononia alawe wa so zabölö moguna moroi ba nirasoira. Imane Yefita, ”Noa sa numalö ligu khö Yehowa, ba tebai ufuli!” Imane göi ononia alawe, ”Lau khögu niwa’öu andrö.” (Zanguhuku 11:35-39) Yefita hegöi ononia alawe, tobali ira niha si lö faröi ba wamalua hadia zi no lafabu’u khö Lowalangi, hewa’ae na abua wamalua ya’ia.—Baso V Moze 23:22, 24; Zinunö 15:4.

7. (a) Hadia mbu’usa li Khana, ba hadia mbörö? Hadia mbuania? (b) Hadia geluaha mbu’usa li Khana khö Zamueli? (Faigi nisura ba gahe zura.)

⁷ Fabu’u li Khana khö Yehowa me afönu gabula dödö wa’aurinia. Abu sibai dödönia börö me tebai mo’ono ia hegöi me i’o’aya ba ifanöi-nöi dödönia Fenina. (I Zamueli 1:4-7, 10, 16) Itutunö khö Yehowa hadia nirasoinia, ba fazazi ia. Imane, ”He Yehowa ngahönö! Na öfaigi lala ba wa’abu dödö genoniu andre, na itörö tödöu ndra’odo, na lö olifu’ö genoniu andre, wame’e ono matua khönia, ba khö Yehowa ufuli ia, sagötö ya’ia, ba böi tefatörö ba högönia wanöwö!” * (Faigi nisura ba gahe zura.) (I Zamueli 1:11) Ifondro-ndrongo Yehowa wangandrö Khana, tumbu khönia nono matua sotöi Samueli. Omuso sibai dödö Khana! Hiza’i, lö olifu ia hadia mbu’usa linia khö Lowalangi. Me tumbu khönia nono matua andrö, imane Khana: ”Me ni’andrögu khö Lowalangi.”—I Zamueli 1:20.

8. (a) Hadia aoha khö Khana ba wamalua hadia zi no ifabu’u? (b) Hewisa wa tobali fanörö tödö khömö Zinunö 61 sanandrösa ba duma-duma si sökhi nibe’e Khana?

⁸ Me awena tölu fakhe ndöfi Zamueli, ifalua Khana hadia zi no ifabu’u khö Yehowa. Ibe’e Zamueli khö Gere Sebua sotöi Eli ba nose Lowalangi ba Zilo. Imane, ”Ono andre ni’andrögu ba no ifondro-ndrongo Yehowa wangandrögu, no ibe’e khögu ni’andrögu. Ba ya’o, ba ube’e niwawalö Yehowa göi [nono]; sagötö ya’ia, ba ya niwawalö Yehowa!” (I Zamueli 1:24-28) I’otarai da’ö, toröi Zamueli ba nose Lowalangi. Imane Sura Ni’amoni’ö wa ”Samueli, ba si tedou-dou ba da’ö, khö Yehowa”. (I Zamueli 2:21) Hewa’ae  simanö, lö aoha khö Khana ba wamalua hadia zi no ifabu’u. Tebai falukha ia ero ma’ökhö khö nononia sabölö i’omasi’ö, tuho dödönia. Lö i’ila hewisa waö-waö wa’ebua nononia. Hiza’i, i’ame’egö tödö sibai Khana hadia zi no ifabu’u khö Yehowa. Itehegö fefu hadia ia zabölö sökhi ba wa’aurinia ba wamalua hadia zi no ifabu’u khö Lowalangi.—I Zamueli 2:1, 2; baso Zinunö 61:2, 6, 9.

9. Hadia nasa nidunö-dunöda?

⁹ Iada’a, aboto ba dödöda wa tohude sibai na fabu’u li ita khö Yehowa. Börö da’ö, datatutunö wanofu-nofu andre: Hadia manö zi tola tafabu’u? Hewisa ena’ö tola ta’osambua’ö dödöda ba wamalua hadia zi no tafabu’u?

10. Hadia mbu’usa li si tohude nifalua zi samösa niha Keriso? Hadia geluahania da’ö?

¹⁰ Bu’usa li sabölö tohude nifalua zi samösa niha Keriso ya’ia da’ö ba wolulu fa’aurinia khö Yehowa. Ba wangandrönia samösa, ifabu’u wa i’oguna’ö wa’aurinia ba wamosumange Lowalangi sagötö fa’ara, gofu hadia zalua. Imane Yesu wa moguna ’ta’ositengagö’ ita. Eluahania, tafabu’u wa sabölö ta’ofönai’ö ya’ia  da’ö Yehowa, tenga fa’aurida. (Matai’o 16:24) I’otarai da’ö, tana ”khö Zo’aya ita”. (Roma 14:8) Talulu wa’aurida soroi ba dödö. Tarasoi hadia nirasoi zanura zinunö me imane, ”He’uwisa wanulöni khö Yehowa si sökhi andrö fefu, nilaunia khögu? Ubu’a khö Yehowa gamabu’ula ligu andrö, ba zi so mbanuania fefu.”—Zinunö 116:12, 14.

11. Hadia niforoma’ömö ba niha ba ginötö tebayagö ndra’ugö idanö?

¹¹ Hadia ölulu wa’aurimö khö Yehowa ba öforoma’ö da’ö ba wamayagö’ö ya’ugö idanö? Sökhi sibai na öfalua da’ö! Hadia itörö tödömö me ibe’e wanofu talifusöda sangolohesi huhuo, hadia no ölulu wa’aurimö khö Yehowa ba aboto ba dödömö wa ”ba wolulu fa’auri hegöi wombayagö idanö, tefotöi ndra’ugö Samaduhu’ö Yehowa”? Ba ginötö öbe’e wanema li ”ya”, fefu niha sangondrasi la’ila wa no ölulu wa’aurimö ba no öfalua fefu hadia nitötöna ba niha samosumange Yehowa irege tola tebayagö idanö ndra’ugö. Omuso sibai dödö Yehowa ba gangetulamö andrö!

12. (a) Hadia manö wanofu-nofu sinangea tasofu khöda samösa? (b) Hadia mbua-bua ni’o’ou Wetero ena’ö ta’okhögö?

¹² Ba ginötö tebayagö ndra’ugö idanö, öfabu’u khö Yehowa wa ö’oguna’ö wa’aurimö ba wamosumange ya’ia ba öfalua fefu hadia zi tola öfalua ba wolo’ö goi-goinia. Hiza’i, famayagö idanö awena famobörönia da’ö. Na no aefa tebayagö idanö, fefu ita moguna böi aetu tafareso wa’aurida samösa. Tola tasofu khöda samösa: ’Hewisa wa’atedou wahuwusagu khö Yehowa i’otarai me tebayö ndra’o idanö? Hadia lö mamalö-malö ufosumange ia soroi ba dödö? (Kolose 3:23) Hadia asese ulau mangandrö? Hadia ubaso Zura Ni’amoni’ö ero ma’ökhö? Hadia owölö-ölö ndra’odo we’amöi ba gangowuloa mbanua niha Keriso? Hadia asese möido manuriaigö? Mazui, hadia no alö wa’amohi’a dödögu ba wamalua da’a fefu?’ Ifangelama ita sinenge sotöi Fetero wa tola tobali de’ala na taröi halöwö ba wamati ba wamosumange Yehowa. Tola tatimbagö da’a na taforege ba wondrou’ö famati, fa’atua-tua, fa’anau gölö, ba fangata’ufida Lowalangi.—Baso II Fetero 1:5-8.

13. Hadia zinangea aboto ba dödö zi samösa niha Keriso si no molulu fa’aurinia ba si no mubayagö idanö?

¹³ Na no fabu’u li ita ba wamosumange Yehowa, tebai sa’ae tafuli furi da’ö. Niha si no aföli wamosumange Yehowa mazui tobali niha Keriso, tebai iwa’ö wa tenga soroi ba dödönia wolulu fa’aurinia khö Lowalangi hegöi wa tenga sinangea labayagö ia idanö. * (Faigi nisura ba gahe zura.) Na so niha si no molulu fa’aurinia khö Yehowa si no mamalua horö sebua, ibu’a föna Yehowa da’ö hegöi föna mbanua niha Keriso. (Roma 14:12) Lö irai omasi ita tobali simane niha niwa’ö Yesu, me imane, ”No öböhöli wa’omasiu ba mböröta.” Hiza’i, omasi ita na iwa’ö khöda Yesu, ”No u’ila mbua-buau andrö, ba fa’omasi andrö, ba famati andrö, ba fanolou andrö, ba fanaha tödö andrö, awö wa tedou mbua-buau safuria andrö, moroi ba ziföföna.” (Fama’ele’ö 2:4, 19) Taforoma’ö wa omasi ita ta’omusoi’ö  dödö Yehowa na talulu wa’aurida simane si no tafabu’u.

14. Hadia mbu’usa li si dua sabölö tohude nifalua zi samösa niha? Hadia mbörö?

¹⁴ Bu’usa li si dua sabölö tohude nifalua zi samösa niha Keriso ya’ia da’ö bu’usa li ba wongambatö. Te’amoni’ö sibai wongambatö. Ba wamaigi Yehowa tenga si famai-mai mbu’usa li ba wongambatö. Me fabu’u li zi darua niha andrö, eluahania no fabu’u li ira föna Yehowa hegöi föna niha sato sangondrasi falöwara. Si to’ölönia lafabu’u wa la’omasi’ö, la’osinangegö, ba lafosumange nawöra sagötö fa’aurira ba gulidanö, simane si no ifakhoi Lowalangi ba Zura Ni’amoni’ö. Lö fefu niha la’oguna’ö ngawua wehede da’a, hiza’i hasambalö fabu’u li ira föna Lowalangi. Me no fabu’u li ira, tobali sa’ae ira fo’omo ira matua ba fo’omo ira alawe. Fongambatö eluahania lö faröi ira khö nawöra sagötö fa’aurira. (I Moze 2:24; I Korindro 7:39) Imane Yesu, ”Hadia ni’orudugö Lowalangi sa’ae, ba böi yamufabali niha.” Niha si no mongambatö, böi so ba dödöra wa tola fabali auri ira khö ngambatöra na lö khöra fa’owua-wua dödö.—Mareko 10:9.

15. Hana wa tebai fagölö lala wangera-ngera niha Keriso moroi ba niha gulidanö sanandrösa ba wongambatö?

¹⁵ Tatu manö, börö me niha si lö mo’ahonoa ira, lö göi mo’ahonoa wongambatöra. Da’ö mbörö wa itutunö khöda Sura Ni’amoni’ö wa fefu niha si no mongambatö itaria ”falukha sa wamakao”. (I Korindro 7:28) Ba gulidanö iada’a, ato niha zi lö mo’ame’egö tödö fongambatöra. Ba wamaigira, na lö owua-wua dödöra ba wongambatö, tola fabali ira. Hiza’i, tenga simane da’ö wamaigi niha Keriso sanandrösa ba wongambatö. Aboto ba dödöra wa föna Lowalangi no fabu’u li ira ba wongambatö. Na lö lafalua hadia zi no lafabu’u, no falimo ira khönia, ba fatuwu sibai khö Lowalangi niha samalua simane da’ö. (III Moze 19:12; Gamaedola 6:16-19) Niha Keriso si no mongambatö, moguna latörö tödöra wehede zinenge sotöi Faulo. Imane, ”Na no faböbö ndra’ugö ba ndra alawe, ba böi alui wangefa’ö ya’ugö.” (I Korindro 7:27) Sinangea iwa’ö da’ö Faulo börö me i’ila wa fatuwu sibai Yehowa na so zi fabali auri.—Maleakhi 2:13-16.

16. Hadia niwa’ö Zura Ni’amoni’ö sanandrösa na fabali auri hegöi na fasambua?

¹⁶ Ifaha’ö ita Yesu wa hasambua dani ba Zura Ni’amoni’ö si tobali dane-dane ena’ö tola fabali auri, ya’ia da’ö na so ba gotaluara zi no mohorö ba lö ibe’e aefa zalania andrö ngambatönia. (Matai’o 19:9; Heberai’o 13:4) Hewisa göi na fasambua? No itutunö Sura Ni’amoni’ö da’a. (Baso I Korindro 7:10, 11.) Hewa’ae, lö itutunö Sura Ni’amoni’ö hadia manö dani irege tola fasambua zi sambua ngambatö. Hiza’i, itaria so zalua irege so ba dödö zi samösa niha Keriso wa moguna fasambua ia khö ngambatönia. Duma-dumania, na la’ila wa tola te’ala wa’aurira hegöi fahuwusara khö Yehowa na lö fasambua ira khö ngambatöra samu’i mazui si no mondröi sindruhu. * (Faigi nisura ba gahe zura.)

17. Hadia manö zi tola lafalua ira niha Keriso ena’ö aro wongambatöra?

 ¹⁷ Na la’andrö mene-mene moroi khö zatua sokubaloi ba mbanua niha Keriso sanandrösa ba lala sinangea lafalua ena’ö tola ifuli sökhi wongambatöra, tola la’andrö khöra ira satua sokubaloi ba wamaigi video Apa Itu Cinta Sejati? hegöi famaha’ö ba brosur Tola Ohahau Dödömi Yomo ba Nomo. Ba da’a itutunö goi-goi Zura Ni’amoni’ö si tola manga’aro’ö fongambatö. Lamane sambua fongambatö, ”I’otarai me mafaha’öga ba brosur da’a, itugu ohahau dödöma ba wongambatö.” No irai so ba wangera-ngera samösa dalifusöda ira alawe si no mangowalu 22 fakhe wa’ara, wa arakhagö aetu dalu wongambatöra. Aefa da’ö, ifaigi video andrö. Imane, ”Faoma no tebayagö ndra’aga idanö, hiza’i fabö’ö lala wa’aurima. Tefaudu sibai video andre! Iada’a, oya mafalua zi sökhi ba wongambatöma.” Ba da’ö oroma wa tola ohahau dödö wo’omo ira matua ba ira alawe na lafalua goi-goi Yehowa ba wongambatöra, ba tola itugu aro wahuwusara.

18, 19. (a) Hadia manö nifalua zatua si no tobali niha Keriso? (b) Hadia mbu’usa li nifalua niha sohalöwö safönu inötö?

¹⁸ Ba wamobörö wamaha’ö, no tadunö-dunö mbu’usa li Yefita hegöi Khana. Ono alawe khö Yefita hegöi ono matua khö Khana, la’oguna’ö wa’aurira ba wamosumange Yehowa ba lala si tohude börö mbu’usa li andrö. Ato zatua si no tobali niha Keriso iada’a, lafarou ndraonora ba wangai halöwö safönu inötö ba la’osambua’ö dödöra ba wamosumange Lowalangi. Ba fefu ita, tola tafarou ndra sagawuyu-wuyu ena’ö lö faröi ira ba wamalua halöwö safönu inötö.—Zanguhuku 11:40; Zinunö 110:3.

¹⁹ Iada’a, so mato 67.000 niha si tefarahu ba Ordo Pelayan Sepenuh-Waktu Khusus Saksi-Saksi Yehuwa Sedunia. So ösa zohalöwö ba Mbetieli, ba konstruksi mazui ba halöwö wamasui. Tanö bö’önia tobali instruktur lapangan, perintis istimewa, utusan injil, hamba Balai Kebaktian, mazui hamba fasilitas sekolah Alkitab. Ya’ira andre fefu, lafazökhi ”Ikrar Ketaatan dan Kesahajaan”. Ba da’ö, lafabu’u wa laforege wohalöwö gofu hadia manö halöwö nitemara ba wamosumange Yehowa, la’öna-önai’ö wa’aurira, ba lö lafalua halöwö tanö bö’ö ba wangalui kefe baero na no latehegö khöra. Si tohude ya’ia da’ö halöwöra, tenga nihania. La’osambua’ö dödöra ba la’okhögö wangide-ngide’ö ba wamalua mbu’usa lira sagötö lahalö halöwö safönu inötö.

20. Hewisa zinangeania wamaigida mbu’usa lida khö Lowalangi? Hadia mbörö?

²⁰ Ba wamaha’ö da’a, no tadunö-dunö tölu ngawalö mbu’usa li si tola tafalua khö Lowalangi. Te so moroi ba mbu’usa li da’a zi no öfabu’u. Ta’ila wa moguna sibai ta’ame’egö tödö mbu’usa lida ba tafalua gofu hadia manö ba wamalua ya’ia. (Gamaedola 20:25) Na lö tafalua hadia zi no tafabu’u khö Yehowa, oya lua-lua si lö sökhi nitemada. (Zangombakha 5:5) Andrö, omasi ita simane sanura zinunö sanguma’ö khö Yehowa, ”Usuno döimö andrö si lö mamalö-malö, wamu’a amabu’ula ligu andrö ero ma’ökhö.”—Zinunö 61:8.