1, 2. (a) Hana wa fangosawuyu hegöi fangefa, asese mudunö-dunö ba götö zinenge sotöi Faulo? (b) Haniha Gumbu wangefa nitutunö Waulo?

NIHA Keriso siföföna auri ira barö Wamatörö Romawi. Ira niha Romawi lasuno-suno sibai huku si so ba mbanuara, lala wamatörö hegöi fangefa niʼokhögöra. Hizaʼi, aro wamatörö andrö börö me laʼodaligö ndra sawuyu ba wamalua halöwö sabua. Me luo daʼö, te 1 moroi ba zi da 3 niha ba Wamatörö Romawi no tobali sawuyu. Da’ö mbörö wa fangosawuyu ba fangefa andre, asese ladunö-dunö ira niha si so ba daʼö hegöi ira niha Keriso.

² Sinenge sotöi Faulo, asese isura sanandrösa ba wangefa. Hiza’i, tenga daʼö geluahania wa iforege ba wangasiwai fefu abula dödö salua ba gulidanö andre, simane nifalua niha sato me luo daʼö. Faulo hegöi niha Keriso tanö bö’ö lafalua halöwö fanuriaigö, lafahaʼö niha sanandrösa ba Wamatörö Lowalangi ba latolo niha enaʼö aboto ba dödöra hewisa wa ebua mböli höli nibeʼe Yesu Keriso. Ifatunö Faulo ba niha Keriso hezo lasöndra Gumbu wangefa  sindruhu andrö. Isura, ”Yehowa andrö Eheha, ba hezo so geheha Yehowa ba daʼö so wangefa.”​—2 Korindro 3:17.

3, 4. (a) Hadia nitutunö Waulo ba ayati fatua lö 2 Korindro 3:17? (b) Hadia nifaluada enaʼö taʼokhögö wangefa moroi khö Yehowa?

³ Ba zurania si mendrua ba mbanua niha Keriso si so ba Gorindro, itutunö Faulo hadia zalua khö Moze me mangawuli ia mitou iʼotarai Hili Zinaʼi me no aefa fahuhuo ia khö malaʼika Yehowa. Oroma haga andrö moroi ba zikhalania! Ataʼu ndraono Gizaraʼeli me laʼila zalua khönia, andrö wa iduhö mbawania faoma nukha. (2 Moze 34:29, 30, 33; 2 Korindro 3:7, 13) Itutunö Faulo, ”Hizaʼi, na ifuli ia khö Yehowa si samösa niha, aheta khönia nukha andrö.” (2 Korindro 3:16) Hadia geluaha niwaʼönia?

⁴ Ba wamahaʼö si no tataluʼi, no tafahaʼö ita wa Yehowa andrö Somböi fefu hadia ia, ba ha Yaʼia zangokhögö fangefa si lö ola. Ba zi so Yehowa hegöi ehehania hasambalö so wangefa. Hizaʼi iwaʼö Faulo, enaʼö taʼokhögö wangefa moguna ahatö ita khö Yehowa. Eluahania, moguna taʼokhögö wahuwusa si sökhi khönia. Me so ndraono Gizaraʼeli ba danö si mate, ha lala wangera-ngera niha niʼoʼöra, tenga lala wangera-ngera Yehowa. Hulö so zombalugö fangera-ngera hegöi tödöra. Laʼogunaʼö wangefa niʼokhögöra ba wamalua gisö-isö dödöra.​—Heberaiʼo 3:8-10.

5. (a) Hadia wangefa ni’asogö geheha Yehowa? (b) Hezo taʼila wa niha si no tobali sawuyu mazui si so ba gurunga tola latema wangefa nibeʼe Yehowa? (c) Hadia wanofu sinangea tabeʼe fanema li?

⁵ Fangefa nibeʼe geheha Yehowa tenga ha asala iheta niha moroi ba wangosawuyu. Daʼa zangaʼasogö fangefa sabölö ebua moroi ba wangefa ni’asogö niha gulidanö. Tola iʼefaʼö ita moroi ba wangosawuyu horö, faʼamate, famosumange faya hegöi si toʼölö lafalua niha. (Roma 6:23; 8:2) Sindruhu-ndruhu no fangefa sahöli-höli dödö daʼa! Tola iʼokhögö wangefa andrö niha si no tobali sawuyu hegöi niha si so ba gurunga. (1 Moze 39:20-23) Iʼokhögö göi wangefa simane daʼö talifusöda ira alawe sotöi Nancy Yuen hegöi talifusöda ira matua sotöi Harold King hewaʼae no irai lakuru ira ba zi hauga fakhe börö wamatira. Tola öʼila zalua khöra andre ba JW Broadcasting. (Faigi FANOFU-NOFU HEGÖI SI NO IRAI ALUA > ANAU GÖLÖ BA WANAÖGÖ FAMAKAO.) Iadaʼa, databeʼe wanema li ba zi dombua fanofu andre. Hewisa wangoromaʼöda wa taʼameʼegö tödö wangefa niʼokhögöda? Hewisa wangogunaʼöda fangefa andrö si fao faʼatua-tua?

6. Hewisa wangoromaʼö ndraono Gizaraʼeli wa lö laʼandrö saohagölö ba wangefa nibeʼe Yehowa khöra?

⁶ Ba ginötö tatema mbuala sebua böli, taʼandrö saohagölö ba niha sameʼe  buala andrö. Hizaʼi, lö laʼandrö saohagölö iraono Gizaraʼeli ba wangefa nibeʼe Yehowa khöra. Ha mato hauga waŵa me no iʼefaʼö ira Yehowa moroi ba danö Miserai, ifuli itörö tödöra gö hegöi nibadura me so ira ba danö Miserai. Mukökö-kökö ira ba mana si no iʼasogö Yehowa. Omasi ira mangawuli ba danö Miserai! Moloʼö yaʼira ’laʼizu, iʼa, gamandriki, bawa prei, bawa soyo, bawa safusi’, abölö tohude moroi ba wangefa si no ibeʼe Yehowa khöra enaʼö lafosumange ia. Andrö wa mofönu sibai khöra Yehowa. (4 Moze 11:5, 6, 10; 14:3, 4) No sambua famahaʼö khöda daʼa.

7. Hewisa wamalua Waulo mene-menenia si so ba 2 Korindro 6:1, ba hewisa göi wa tola tafalua daʼö?

⁷ Ifangelama fefu niha Keriso Faulo enaʼö böi mamalö laʼandrö saohagölö ba wangefa nibe’e Yehowa me no i’oguna’ö Nononia Yesu Keriso. (Baso 2 Korindro 6:1.) Lö moʼahonoa Waulo, tobali ia sawuyu horö hegöi faʼamate ba so khönia waʼide-ide dödö. Hizaʼi imane, ”Uʼandrö saohagölö khö Lowalangi,  . .  ba khö Zoʼaya yaʼita Yesu Keriso!” Hana wa iwaʼö daʼö? Itutunö Faulo khö ndra talifusönia, ”Oroisa geheha niʼamoniʼö sameʼe khömi faʼauri si ha sambua ba khö Keriso Yesu, no iʼefaʼö ami moroi ba huku horö ba faʼamate.” (Roma 7:24, 25; 8:2) Simane Faulo, böi irai taʼolifugö wa no iʼefaʼö ita Yehowa moroi ba wangosawuyu horö hegöi faʼamate. Börö höli, tola taʼokhögö dödö side-ide si lö sinegu ba wamosumange Lowalangi ba ibeʼe khöda waʼomuso dödö sindruhu.​—Zinunö 40:9.

8, 9. (a) Hadia wamangelama nibeʼe Wetero sanandrösa ba wangogunaʼöda fangefa andrö? (b) Hewisa wangogunaʼö zi samösa niha fangefa niʼokhögönia ba lala si fasala?

⁸ Tenga ha asala taʼandrö saohagölö khö Yehowa, hizaʼi moguna mangelama ita enaʼö böi fasala wangogunaʼöda  fangefa nibeʼenia. Duma-dumania, ifangelama ita sinenge sotöi Fetero enaʼö böi taʼogunaʼö wangefa niʼokhögöda si tobali tani ba wamalua sala. (Baso 1 Fetero 2:16.) Famangelama daʼa zamasugi ba dödöda hadia zalua ba ndraono Gizaraʼeli me so ira ba danö si mate. Moguna sibai khöda wamangelama andrö mendrua manö ba ginötö iadaʼa. Omasi Zatana iʼogunaʼö gulidanö daʼa ba wondrönisi dödö niha sanandrösa ba wonukha, ba gö, ba nibadu hegöi hiburan. Laʼogunaʼö niha si baga-baga ba wameʼe iklan enaʼö adöni dödöda ba wowöli gama-gama si lö taʼogunaʼö. Aoha ba gulidanö andre ba wolimo yaʼita enaʼö taʼogunaʼö wangefa niʼokhögöda ba lala si fasala.

⁹ Moguna göi mene-mene nibeʼe Wetero andrö ba waʼaurida ba ginötö tahalö gangetula si tohude simane ba wamili sekola, halöwö, mazui ba wotatugöi ohitö dödö. Duma-dumania, ato ndra si bohou ebua iadaʼa zamorege enaʼö latema ira ba sekola salawa. Ato niha zangumaʼö khöra wa tola lasöndra halöwö si sökhi, kefe sebua ba lafosumange ira niha na itugu alawa sekolara. Tola manö lafatunö khöra wa niha si no möi sekola salawa abölö ebua lasöndra gefe moroi ba niha si tama SMA. Sekola salawa andre hulö abölö sökhi khö ndra si bohou ebua ba wanöndra faʼowua-wua dödö ba waʼauri. Hizaʼi, hadia zinangea latörö tödöra hegöi ira satuara?

10. Hadia zinangea tatörö tödöda ba ginötö tahalö gangetula samösa?

¹⁰ So ösa zangumaʼö wa tola lafalua zomasi-masi dödöra asala lö itegu ira tödöra side-ide, börö me moʼamakhaita daʼö ba waʼaurira samösa. Te laʼangeragö wehede Waulo, ”Lö omasido na ihuku ndraʼo tödö niha böʼö.” (1 Korindro 10:29) Hewaʼae tola tahalö gangetula samösa ba wamili sekola hegöi halöwö, moguna tatörö tödöda wa fangefa niʼokhögöda so nola-olania ba fefu gangetula nihalöda so lua-luania. Daʼö mbörö wa imane Faulo, ”Tola mufalua fefu hadia ia ba lö fefu oi moguna. Tola mufalua fefu ba lö fefu möi famarou dödö.” (1 Korindro 10:23) Hewaʼae tola tahalö gangetula samösa, hizaʼi tenga somasi ita zabölö tohude.

11. Hana wa iʼefaʼö ita Yehowa?

¹¹ Ifangelama ita Fetero enaʼö böi taʼogunaʼö wangefa niʼokhögöda ba zi fasala, hizaʼi taʼogunaʼö ia ba lala si tefaudu simane ”sawuyu Lowalangi”. Tani wa iʼogunaʼö Yesu Yehowa ba wangefaʼö yaʼita moroi ba wangosawuyu horö ba faʼamate, yaʼia daʼö enaʼö tola taʼogunaʼö waʼaurida ba wamosumange yaʼia.

12. Hadia duma-duma nibeʼe Noakhi khöda hegöi ösi nomonia?

¹² Lala sabölö sökhi ba wangogunaʼöda fangefa yaʼia daʼö taʼogunaʼö ginötö hegöi faʼabölöda ba wamosumange Yehowa soroi ba dödö. Na tafalua daʼö, lö taʼofönaiʼö ba waʼaurida wangalui ohitö dödö ba gulidanö hegöi gisö-isö dödöda samösa. (Galatia 5:16) Angeragö hadia nifalua Noakhi hegöi ösi nomonia. Auri ira ba gulidanö si lö sökhi  ba safönu amuata fohorö. Hizaʼi, lö adöni dödöra ba gohitö dödö hegöi nifalua niha ba zi fasuira. Lahalö gangetula ba wamalua halöwö si no ibeʼe khöra Yehowa. Lafazökhi nowo, laʼowuloi göra hegöi ö gurifö ba lafangelama niha sanandrösa ba Molö Sebua. ”Ba iʼoʼö sibai Noakhi, dali niwaʼö Lowalangi khönia.” (1 Moze 6:22) Buania, teʼorifi ia hegöi ösi nomonia me alua Molö Sebua.​—Heberaiʼo 11:7.

13. Hadia halöwö si no ibeʼe khöda Yehowa?

¹³ Hadia halöwö nibeʼe Yehowa khöda iadaʼa? Yaʼita nifahaʼö Yesu, taʼila wa no ibeʼe khöda Lowalangi halöwö ba wanuriaigö. (Baso Luka 4:18, 19.) Iadaʼa, no ibalugö Satana hörö niha sato ba lö laʼila wa no tobali ira sawuyu agama faya, harato hegöi sistem politik. (2 Korindro 4:4) Simane Yesu, taʼokhögö döi sebua ba wanolo niha enaʼö aboto ba dödöra ba lafosumange Yehowa, Lowalangi same’e fangefa. (Mataiʼo 28:19, 20) Lö aoha wanuriaigö ba niha böʼö. Ba zi hauga nahia, lö adöni dödö niha sanandrösa khö Lowalangi ba so zofönu khöda na manuriaigö ita khöra. Hizaʼi, no ibeʼe khöda halöwö Yehowa enaʼö manuriaigö ita. Andrö, moguna tasofu khöda samösa, ’Hadia uʼogunaʼö wangefa niʼokhögögu ba wamosumange Yehowa?’

14, 15. Hadia manö gangetula si no lahalö ono mbanua Yehowa? (Faigi gambara ba wamobörö wamahaʼö.)

¹⁴ Omuso sibai dödöda börö me ato nono mbanua Yehowa sangila wa no itugu ahatö wangohori ulidanö daʼa ba lahalö gangetula ba woʼöna-önaiʼö faʼaurira ba lalau merintis. (1 Korindro 9:19, 23) So ösa zi merintis ba mbanuara samösa, tanö böʼönia findra ba mbanua niha Keriso si lö ato sanuriaigö. Ba zi lima fakhe silalö, töra 250.000 zamörögö merintis, ba iadaʼa töra 1.100.000 perintis biasa. Omuso sibai dödöda börö me laʼogunaʼö wangefa niʼokhögöra ba wamosumange Yehowa!​—Zinunö 110:3.

¹⁵ Hadia zanolo yaʼira ba wangogunaʼö fangefa andrö si fao faʼatua-tua? Angeragö John hegöi Judith, si no mangai halöwö ba zi hauga soi ba zi 30 fakhe fa’ara. Latutunö, me mubörögö Sekolah Dinas Perintis me döfi 1977, lafarou dödö zi fao ba sekola andrö enaʼö findra ira ba mbanua sinangea mutolo. Enaʼö tola lakhamö gohitö dödöra, moguna laʼöna-önaiʼö waʼaurira. Daʼö mbörö wa asese ifalalini halöwönia John. Ba gafuriata manuriaigö ira ba soi böʼö. Hadia zanolo yaʼira ba wangasiwai abula dödöra simane ba wamahaʼö yaʼira ba li si bohou, si toʼölö mufalua ba mbanua daʼö hegöi iklim? Mangandrö ira khö Yehowa ba  laʼodaligö ia. Hewisa dödöra me lahalö halöwö khö Yehowa ba zi hauga fakhe andrö? Imane John, ”Moloʼö yaʼo, ha daʼa halöwö sabölö sökhi si no urasoi. Itugu uʼila wa Yehowa andrö ama si so faʼomasi. Iadaʼa, aboto ba dödögu hadia geluaha niwaʼö Yakobo 4:8, ’Miʼondrasi Lowalangi ba iʼondrasi ami.’ No usöndra hadia zi tola mameʼe khögu faʼomuso dödö ba waʼauri.”

16. Hadia gangetula nihalö ndra talifusöda si hauga ribu faʼato?

¹⁶ Simane John hegöi Judith, so ösa zi tola ara merintis. Hizaʼi, so göi zi merintis ha ba zi sabata börö zalua khöra. Hewaʼae simanö, ato zi tobali sukarelawan ba halöwö konstruksi ba zi sagörö ulidanö. Duma-dumania, te 27.000 ndra talifusöda sanolo ba wangehaogö gödo sebua si so ba Warwick, New York. So ösa zi möi ba zi dua migu, ba zi hauga waŵa hegöi ba zi döfi mazui töra. Ato ba gotalua ndra talifusöda andre zanehegö hadia ia niʼokhögöra enaʼö tola mohalöwö ira ba Warwick. Yaʼira andre duma-duma si sökhi sangogunaʼö fangefa niʼokhögöra ba wanuno hegöi ba wamosumange Yehowa, Lowalangi si so fangefa!

17. Hadia howu-howu nitemada na tefaudu wangogunaʼöda fangefa andrö?

¹⁷ Taʼandrö saohagölö me no aboto ba dödöda Yehowa ba taʼokhögö wangefa börö me tafosumange ia. Dataʼoromaʼö ba gangetula nihalöda wa moguna sibai khöda wangefa andrö. Moroi na taʼogunaʼö ia ba lala si fasala, dataʼogunaʼö ia ba wamosumange Yehowa. Tola tarasoi howu-howu nifabuʼu Yehowa me imane, ”Fefu niwöwöinia teʼefaʼö moroi ba wangosawuyu horö ba faʼamate, ba latema wangefa solakhömi simane nitema ndraono Lowalangi.”​—Roma 8:21.