1, 2. (a) Hadia manö nifalua niha enaʼö lasöndra wangefa? (b) Hadia manö lua-luania?

IADAʼA, ato niha ba zi sagörö ulidanö sodunö-dunö hak hegöi fangefa niʼokhögöra. So ösa niha somasi na aheta ira ba walöʼatulö, ba wanahö-nahö tödö hegöi ba waʼanumana. Tanö böʼönia, omasi ira na lawaʼö-waʼö manö zomasi dödöra, lafili zomasi ira ba omasi ira auri moloʼö lalara samösa. Fefu niha omasi ira na tola lafalua zomasi-masi dödöra.

² Enaʼö tola lafalua zomasi-masi dödöra, ato niha samalua demo ba laʼandrö enaʼö so wamohouni. Hizaʼi, hadia sindruhu-ndruhu lasöndra zomasi dödöra andrö? Löʼö. Si toʼölönia, itugu oya gabula dödö ba faʼamate. Atulö niwaʼö Razo Zelomo ba Zangombakha 8:9, ”Ibaliʼö ia samatörö awönia niha, ba wangalani yaʼia.”

3. Hadia zinangea tafalua enaʼö tasöndra waʼomuso dödö sindruhu hegöi faʼahono dödö?

³ Itutunö khöda Sura Niʼamoniʼö hadia zinangea tafalua enaʼö tasöndra waʼomuso dödö sindruhu hegöi faʼahono dödö. Imane Yakobo, ”Niha sangosisiʼö oroisa soʼahonoa soʼamakhaita ba wangefa ba si lö mamöhöli wamalua yaʼia . . . omuso dödönia börö me ifalua.” (Yakobo 1:25) Moroi  khö Yehowa goroisa soʼahonoa andrö, ba iʼila fefu hadia ia zinangea taʼogunaʼö enaʼö tasöndra waʼomuso dödö sindruhu hegöi faʼahono dödö. Ibeʼe wangefa sindruhu khö Gadamo ba Khawa Yehowa hegöi fefu niʼogunaʼöra enaʼö lasöndra waʼohahau dödö.

4. Hadia wangefa niʼokhögö Gadamo hegöi Khawa? (Faigi gambara ba wamobörö wamahaʼö.)

⁴ Na tabaso 1 Moze faza 1 ba 2, ba daʼö taʼila wa so khö Gadamo ba Khawa wangefa si lö laʼokhögö niha ba ginötö andre. Oi so fefu niʼogunaʼöra, lö khöra faʼataʼu ba lö samalua khöra si lö atulö. Lö göi khöra faʼaombö dödö ba gö, ba halöwö, fökhö hegöi faʼamate. (1 Moze 1:27-29; 2:8, 9, 15) Hizaʼi, hadia lö ola wangefa niʼokhögöra andrö? Datatutunö.

5. Hadia zinangea laʼokhögö niha enaʼö lö taha-tahara ba wamalua hadia ia?

⁵ Ato niha sangumaʼö, na so khöra wangefa sindruhu tola lafalua hadia ia zomasi dödöra ba lö laʼabusi tödö lua-luania. Itutunö buku The World Book Encyclopedia wa fangefa yaʼia daʼö ”fa’atola ba wamili hadia ia ba hasambalö ifalua”. Hiza’i, iwa’ö göi ba daʼö wa tola manö lafalua zomasi-masi dödöra niha na lö hadöi ola nibeʼe ndra samatörö ba lala si lö atulö, abe’e mazui lö ikhamö fangera-ngerada. Eluahania, moguna ösa nola-ola andrö irege fefu niha tola lafalua zomasi-masi dödöra. Hizaʼi, haniha zinangea motatugöi hadia atulö, moguna ba tefaudu nola-ola andrö?

6. (a) Hana wa ha Yehowa zangokhögö fangefa si lö ola? (b) Hadia wangefa si tola laʼokhögö niha gulidanö ba hadia mbörö?

⁶ Moguna tatörö tödöda wa ha Lowalangi Yehowa zangokhögö fangefa sindruhu ba si lö ola. Hana? Börö me yaʼia zamazökhi fefu hadia ia ba Samatörö banua si yawa awö danö. (1 Timoteo 1:17; Famaʼeleʼö 4:11) Iʼogunaʼö ngawua wehede si sökhi Razo Dawido ba wanutunö dadaoma Yehowa. (Baso 1 Ngaʼötö 29:11, 12.) Ba daʼa taʼila, wa fangefa niʼokhögö niha gulidanö hegöi ira mala’ika so nola-olania. Moguna tefaudu wangogunaʼö fangefa andre. Omasi Lowalangi Yehowa na aboto ba dödöda wa ha yaʼia zi tola motatugöi hadia nola-ola satulö, soguna ba si tola ikhamö fangera-ngerada. Iʼotarai ba wamobörö, no ibeʼe nola-ola Yehowa ba niwöwöinia.

7. Hadia manö nifaluada si tola mameʼe khöda faʼomuso dödö?

⁷ Hewaʼae no tebeʼe khö Gadamo ba Khawa mbuala ba wangai angetula samösa, hizaʼi so nola-olania. No sinangea khöra daʼö. Duma-dumania, enaʼö tola auri ira, moguna mohanu-hanu, manga ba mörö. Hadia daʼö geluahania wa tebai lafalua hadia ia? Tenga. Sindruhunia, ibeʼe daʼö Yehowa enaʼö so khöra waʼomuso dödö. (Zinunö 104:14, 15; Zangombakha 3:12, 13) Tola tahofo nangi si sökhi, taʼa gö somasi ita ba tola tarasoi wolombase ba zi bongi. Lö hadöi nola-olania ba wamalua daʼö fefu. Daʼö göi nirasoi Gadamo ba Khawa.

8. Hadia goroisa nibeʼe Lowalangi khö Gadamo ba Khawa, hadia mbörö?

⁸ No ibeʼe goroisa khö Gadamo ba Khawa Yehowa enaʼö moʼono ira, lafönui  gulidanö ba larorogö daʼö fefu. (1 Moze 1:28) Hadia tebai saʼae lafalua hadia ia börö goroisa daʼö? Tola! Laʼokhögö ginötö ba wombaliʼö ulidanö andre tobali faradaiso ba labaliʼö nahiara waʼatoröi hegöi nahia ndraonora so’ahonoa sagötö fa’ara. Daʼa gohitö dödö Lowalangi. (Yesaya 45:18) Iadaʼa, na so niha si lö mangowalu mazui si lö omasi moʼono, tenga daʼö geluahania wa lö moloʼö ira khö Lowalangi. Hewaʼae simanö, so niha somasi mangowalu ba laʼokhögö ndraono hewaʼae so gabula dödö. (1 Korindro 7:36-38) Hana? Börö me omasi ira na lasöndra waʼomuso dödö hegöi faʼahono dödö. (Zinunö 127:3) Na moloʼö Gadamo ba Khawa khö Yehowa, tola lasöndra waʼomuso dödö ba wongambatö hegöi ba nösi nomora sagötö faʼara.

9. Hana wa atulö, moguna mazui ikhamö fangera-ngerada goroisa Lowalangi si so ba 1 Moze 2:17?

⁹ Ibeʼe göi goroisa tanö böʼö khö Gadamo ba Khawa Yehowa, ba ifatunö hadia lua-luania na lö moloʼö ira. Imane, ”Ba bua geu famotokhi ba dödö si sökhi ba si lö sökhi, ba lö tola öʼa; öʼa siʼaikö daʼö, ba mate ndraʼugö.” (1 Moze 2:17) Hadia lö atulö goroisa andrö, lö moguna mazui lö ikhamö fangera-ngerara? Hadia tebai saʼae lafalua hadia ia börö goroisa andrö? Löʼö. Sindruhunia, ato ndra sagatua-tua ba Zura Niʼamoniʼö sangumaʼö wa tefaudu sibai goroisa Lowalangi ba alio aboto ba dödöda. So samösa moroi ba gotaluara zangumaʼö wa oroisa andre zamahaʼö yaʼita ”wa ha Lowalangi zangila hadia zi sökhi . . . ba niha, ba ha Lowalangi zangila hadia zi lö sökhi . . . ba niha. Enaʼö lasöndra zi ’sökhi’, moguna faduhu dödöra khö Lowalangi ba moloʼö ira khönia. Na lö khöra foloʼö, yaʼira samösa zotatugöi hadia zi sökhi. . . ba si lö sökhi.” Abua ba niha gulidanö ba wamalua daʼö.

10. Hana wa fangai angetula samösa lö fagölö ia ba wotatugöi si sökhi hegöi si lö sökhi?

¹⁰ So ösa niha sangumaʼö wa lö nitehegö Yehowa khö Gadamo ba wamalua somasi-masi dödönia. Hizaʼi, lö aboto ba dödöra wa fangai angetula mazui hadia zinangea lafalua, lö fagölö ia ba wotatugöi hadia zi sökhi ba si lö sökhi. Tola lafili ira Adamo ba Khawa hadia moloʼö ira khö Lowalangi mazui löʼö. Hizaʼi, ha Yehowa zinangea motatugöi hadia zi sökhi ba si lö sökhi. ”Eu famotokhi ba dödö si sökhi ba si lö sökhi”, no sambua tandra khö Gadamo ba Khawa wa atulö daʼö. (1 Moze 2:9) Lö ahori aboto ba dödöda hadia lua-lua gangetula nihalöda ba tebai tatötöna wa hasambalö sökhi lua-luania. Daʼö mbörö wa asese taʼila niha sangai angetula si fao faʼasökhi dödö hizaʼi lua-luania famakao, bencana mazui fangabu dödö. (Gamaedola 14:12) Sindruhu sa, wa so  zi tebai lafalua niha. Oroisa nibeʼe Yehowa khö Gadamo ba Khawa enaʼö böi laʼa mbua geu, daʼa zamahaʼö yaʼira wa moguna moloʼö ira khönia enaʼö lasöndra wangefa sindruhu. Hadia gangetula nihalö Gadamo ba Khawa?

11, 12. Hana wa tola alua gabula dödö ba gangetula nihalö Gadamo ba Khawa? Beʼe duma-duma.

¹¹ Hizaʼi, lö moloʼö Gadamo ba Khawa khö Yehowa. Abölö ifondrondrongo Khawa wehede Zatana me ifabuʼu, ”Teboka hörömi, ba tobali simane Lowalangi ami, saboto ba dödö si sökhi ba si lö sökhi.” (1 Moze 3:5) Ba gangetula nihalö Gadamo ba Khawa, hadia itugu owua-wua dödöra simane niwaʼö Zatana? Tatu löʼö. Börö me latimbagö wanuturu lala moroi khö Yehowa, alua khöra wangabu dödö. (1 Moze 3:16-19) Hadia mbörö? Lö nibeʼe Yehowa ba niha gulidanö kuaso ba wotatugöi hadia zi sökhi ba si lö sökhi.​—Baso Gamaedola 20:24; Yeremia 10:23.

¹² Tola mu’amaedolagö ia simane solohe köfa sihombo. Enaʼö tola irugi gohitö dödönia, moguna itörö lala si no mutatugöi ba iʼogunaʼö gama-gama navigasi si so ba göfa sihombo ba fahuhuo ia ba zohalöwö samaigi-maigi lalu lintas udara. Hizaʼi, na lö iʼoʼö wanuturu lala solohe köfa sihombo andrö ba möi ia ba zomasi dödönia, tola alua deʼala. Omasi Gadamo ba Khawa ba wamalua somasi-masi dödöra samösa. Latimbagö wanuturu lala moroi khö Lowalangi. Hadia lua-luania? Alua wangabu dödö! Börö gangetula nihalöra, teʼasogö  khöra horö ba faʼamate hegöi ba ngaʼötöra. (Roma 5:12) Lö sa’ae la’okhögö wangefa ira Adamo ba Khawa, börö me no lahalö gangetula ba wotatugöi hadia zi sökhi ba si lö sökhi. Taya khöra wangefa sindruhu si no ibeʼe Yehowa.

13, 14. Hewisa enaʼö tafuli taʼokhögö wangefa sindruhu?

¹³ So ösa niha sangumaʼö wa sökhi na lö hadöi nola-ola ba wangai angetula samösa. Hadia sindruhu daʼö? Hewaʼae oya gunania ba wangai angetula samösa, hizaʼi hadia tola ökhalaigö hadia zalua ba gulidanö andre na tola lafalua zomasi-masi dödöra niha? Imane The World Book Encyclopedia, abua ba wamalua goi-goi si no mutatugöi ero sambua banua börö me moguna lalumöʼö nono mbanua ba labe’e göi nola-ola ba wangefa niʼokhögöra. Andrö wa oya mufazökhi goi-goi ba moguna ato ndra pengacara hegöi ira sanguhuku ena’ö tola latutunö ba lafalua da’ö.

¹⁴ Itutunö Yesu Keriso hewisa enaʼö tola taʼokhögö wangefa sindruhu. Imane, ”Na mitöngöni wehedegu, sindruhu-ndruhu wa nifahaʼögu ami, ba aboto ba dödömi zindruhu, ba sindruhu andrö zangefaʼö yaʼami.” (Yohane 8:31, 32) Enaʼö tola taʼokhögö wangefa sindruhu, so dombua zinangea tafalua. Si oföna, moguna tatema wamahaʼö nibeʼe Yesu. Si dua, moguna tobali ita nifahaʼönia. Na tafalua daʼö, tola  taʼokhögö wangefa sindruhu. Hadia wangefa andrö? Imane Yesu, ”Sawuyu horö niha samalua horö.” Imane nasa, ”Na iʼefaʼö ami Ono, sindruhu-ndruhu no teʼefaʼö ami.”​—Yohane 8:34, 36.

15. Ba wangefa nifabuʼu Yesu, hana wa ’sindruhu-ndruhu teʼefaʼö’ ita?

¹⁵ Abölö sökhi wangefa nifabuʼu Yesu khö ndra nifahaʼönia moroi ba wangefa somasi laʼokhögö niha iadaʼa. Me imane Yesu, ”Na iʼefaʼö ami Ono, sindruhu-ndruhu no teʼefaʼö ami”, eluahania teʼefaʼö ita moroi ba wangosawuyu horö, fangosawuyu fondrege waʼalösökhi nirasoi niha gulidanö. Hezo oroma wa no tobali ita sawuyu horö? Oroma daʼö börö me tafalua zi lö sökhi. Tola möi fanaisida daʼö ba wamalua satulö mazui ba wamalua si sökhi. Lua-luania, alua wa’afawuka wangera-ngera, faʼafökhö, famakao hegöi faʼamate. (Roma 6:23) No irasoi sinenge sotöi Faulo hewisa waʼafökhö börö me tobali ia sawuyu horö. (Baso Roma 7:21-25.) Tola tafuli ta’okhögö wangefa si no irai la’okhögö ira Adamo ba Khawa, ha na no sindruhu-ndruhu aheta ita ba horö.

16. Hewisa enaʼö sindruhu-ndruhu teʼefaʼö ita?

¹⁶ Na omasi tatema wangefa moroi khö Yesu, moguna so nifaluada. Tola taʼila daʼö me imane ”mitöngöni wehedegu”. Hadia daʼö? Simane folulu faʼauri nifalua niha Keriso, no taʼositengagö waʼaurida ba tatema goi-goi si no itatugöi Yesu khö ndra nifahaʼönia. (Mataiʼo 16:24) Simane nifabuʼu Yesu, tola tarasoi wangefa sindruhu ba zi so miföna ba ginötö tatema mbua moroi ba höli si no ibeʼe.

17. (a) Hewisa enaʼö sindruhu-ndruhu tarasoi waʼowua-wua dödö ba faʼahono dödö? (b) Hadia nitutunöda ba wamahaʼö aefa daʼa?

¹⁷ Enaʼö sindruhu-ndruhu tarasoi waʼowua-wua dödö ba faʼahono dödö, moguna taʼoʼö wamahaʼö Yesu simane ira nifahaʼönia. Na tafalua daʼö, sindruhu-ndruhu teʼefaʼö ita moroi ba wangosawuyu horö hegöi faʼamate. (Baso Roma 8:1, 2, 20, 21.) Ba wamahaʼö aefa daʼa, tatutunö hewisa wangogunaʼöda fangefa niʼokhögöda iadaʼa ba lala si tefaudu. Buania, tola tafosumange Yehowa sagötö faʼara, Lowalangi sangokhögö fangefa sindruhu.