1. Ba ginötö mamadaö Gadamo ba Khawa, hewisa wameʼe Yehowa famarou dödö hegöi fanötöna ba niha gulidanö?

YEHOWA no Lowalangi sameʼe famarou dödö. No ifalua daʼö iʼotarai me aekhu niha ba horö ba lö saʼae moʼahonoa ira. Lö ara me no aefa mamadaö Gadamo ba Khawa khö Lowalangi, ibeʼe sambua wamaʼeleʼö si tola mangaʼasogö fondrara dödö hegöi dötönafö ba niha. Tesöndra wamaʼeleʼö daʼö ba 1 Moze 3:15 ba no ifabuʼu wa ihori Gafökha Satana hegöi ngawalö halöwönia si lö sökhi.​—1 Yohane 3:8; Famaʼeleʼö 12:9.

2. Hewisa wameʼe Yehowa famarou dödö khö Noakhi?

² Angeragö hewisa wameʼe Yehowa famarou dödö khö Noakhi. Me luo daʼö, ha yaʼia ba ösi nomonia zamosumange Yehowa ba toröi ira ba gotalua niha si lö sökhi ba samalua amuata fohorö. Tola manö so khönia waʼide-ide dödö. (1 Moze 6:4, 5, 11; Yuda 6) Hizaʼi, ibeʼe khönia waʼabarani  Yehowa enaʼö lö faröi ia ba wamosumange ba ifalua hadia ia zatulö. (1 Moze 6:9) Iʼombakhaʼö khö Noakhi wa hasambalö ihori gulidanö si lö sökhi andre ba itutunö hewisa enaʼö tola teʼorifi ia hegöi ösi nomonia. (1 Moze 6:13-18) Yehowa no Lowalangi sameʼe fondrara dödö khö Noakhi.

3. Hewisa wameʼe Yehowa famarou dödö khö Yosua? (Faigi gambara ba wamobörö wamahaʼö.)

³ Aefa daʼö, ibeʼe göi Yehowa wamarou dödö khö zamosumange yaʼia sotöi Yosua börö me iʼokhögö halöwö sabua. Moguna idöniaʼö nono mbanua Lowalangi weʼamöi ba Danö Gamabuʼula ba ikalaisi zaradadu sabölö si so ba daʼö. Aboto ba dödö Yehowa wa so waʼataʼu khö Yosua, andrö wa imane khö Moze, ”Ba khö Yosua, ba öbeʼe li, farou dödönia ba abeʼeʼö; yaʼia sa zolohe miyefo yaʼira andre, ba yaʼia zamaosa khöra tanö andrö, niʼila höröu.” (5 Moze 3:28) Ibeʼe göi Yehowa wamarou dödö khö Yosua imane, ”Tenga no uwaʼö khöu: Yaʼabölö ndraʼugö, yaʼabeʼe dödöu? Böi ataʼu ndraʼugö ba böi mangiwa dödöu, me si fao-fao khöu Yehowa, Lowalangiu, gofu heza ösawa.” (Yosua 1:1, 9) Moloʼö yaʼugö, hewisa dödö Yosua ba wehede daʼö?

4, 5. (a) Hewisa wameʼe Yehowa famarou dödö ba nono mbanuania me götö föna? (b) Hewisa wameʼe Yehowa famarou dödö khö Nononia?

⁴ Ibeʼe göi wamarou dödö ba nono mbanuania Yehowa ba zi sambua ngawawa. Duma-dumania, aboto ba dödö Yehowa wa moguna wamarou dödö ba niha Yahudi si no teʼoloiʼö ba Mbabilona ba ibeʼe göi wamaʼeleʼö si tola mangomusoiʼö tödöra, imane ”Böi busi dödöu; löʼö sa aefado khöu? Böi tokeaʼö, Lowalangiu sa ndraʼodo; Uʼabeʼeʼö ndraʼugö, ba utoloʼö, ugogohe ndraʼugö na tangagu kambölö andre, samalua satulö.” (Yesaya 41:10) Aefa daʼö, ibeʼe göi wamarou dödö ba niha Keriso siföföna ba ifalua göi Yehowa zimane daʼö iadaʼa.​—Baso 2 Korindro 1:3, 4.

⁵ Ibeʼe göi Yehowa wamarou dödö khö Nononia. Me no aefa tebayagö idanö Yesu, terongo li si’ao moroi ba zorugo imane, ”Onogu daʼa, niʼomasiʼögu, waʼomasigu ia.” (Mataiʼo 3:17) Hadia tola ökhalaigö hewisa wehede daʼö möi famarou dödö Yesu me so ia ba gulidanö?

6. Hewisa wa tola möi famarou dödöda duma-duma Yesu sanandrösa ba talenta?

⁶ Iʼoʼö Namania Yesu ba wameʼe famarou dödö ba niha böʼö enaʼö lö faröi ira. Tola taʼila daʼö ba duma-duma nibeʼenia sanandrösa ba talenta, me iwaʼö khö ndra sawuyunia si lö faröi sokhö yaʼira, ”Sökhi sibai, sawuyu si sökhi ndraʼugö ba lö faröi! Lö si faröi ndraʼugö ba wondrorogö si ha maʼifu. Börö daʼö, ufataro ndraʼugö ba wamatörö sabölö oya. Omusoiʼö dödöu ba waʼomuso dödö zokhö yaʼugö.” (Mataiʼo 25:21, 23) Fehede daʼa zamarou dödö ndra nifahaʼö enaʼö lö faröi ira ba wamosumange Yehowa!

7. Hewisa wameʼe Yesu famarou dödö khö ndra sinengenia, mendrua manö khö Wetero?

⁷ Ebolo dödö Yesu khö ndra sinengenia hewaʼae asese lafadöni haniha zabölö ebua ba gotaluara. Ifarou ira enaʼö so khöra wangide-ngideʼö ba tobali ira  enoni niha böʼö moroi na latötöna enaʼö lafosumange ira niha. (Luka 22:24-26) No hauga kali ifalua zala Fetero ba iʼafökhöiʼö dödö Yesu. (Mataiʼo 16:21-23; 26:31-35, 75) Hizaʼi, lö itimbagö Wetero Yesu. Ibeʼe wamarou dödö khö Wetero hegöi halöwö ba wangabölöʼö niha böʼö.​—Yohane 21:16.

8. Hewisa wameʼe Hizikia famarou dödö khö gumandru zaradadu hegöi ba niha Yehuda?

⁸ Fatua lö ibe’e duma-duma Yesu, no aboto ba dödö nono mbanua Yehowa wa moguna lafarou dödö niha böʼö. Törö tödöu Hizikia. Me edöna lasuwö Yeruzalema ira niha Asiria, iʼowuloi gumandru zaradadu ba ifarou dödö nono mbanuania ’ihaogö wehedenia khöra’.​—Baso 2 Ngaʼötö 32:6-8.

9. Hadia wamahaʼö nihalöda moroi khö Yobi ba wameʼe fondrara dödö?

⁹ Tola tafahaʼö ita moroi khö Yobi ba wameʼe famarou dödö. Hewaʼae sindruhunia moguna khönia wamarou dödö, hizaʼi ifahaʼö niha böʼö ba wamalua daʼö. Imane Yobi khö ndra matua si tohare ba wameʼe khönia fondrara dödö, sindruhunia na yaʼia zi möi khöra ba wameʼe fondrara dödö hasambalö ibeʼe wehede si tola mangabölöʼö ba sangohahauʼö tödöra tenga fehede sangafökhöiʼö tödö. (Yobi 16:1-5) Ba gafuriata, itema wondrara dödö Yobi moroi khö Elihu hegöi moroi khö Yehowa.​—Yobi 33:24, 25; 36:1, 11; 42:7, 10.

10, 11. (a) Hadia mbörö wa moguna wamarou dödö khö nono Yefita ono alawe? (b) Haʼökhö manö tola tabeʼe wamarou dödö iadaʼa?

¹⁰ Moguna göi wamarou dödö khö nono Yefita ono alawe. Amania sotöi Yefita samösa Sanguhuku, möi ia fasuwö ba wolawa ndraono Gamoni. No ifabuʼu khö Yehowa na möna ia ba wasuwöta andrö, niha si oföna sibai mamaondragö yaʼia na mangawuli ba nomo, hasambalö tobali sangai halöwö khö Yehowa ba nose Lowalangi. Möna ndraono Gizaraʼeli. Me mangawuli ia, ononia alawe si ha sambua zi oföna sibai mamaondragö yaʼia. Afökhö sibai dödö Yefita. Hizaʼi, ifalua mbuʼusa linia ba ifatenge nononia tobali sangai halöwö ba nose Lowalangi sandrohu faʼaurinia.​—Zanguhuku 11:30-35.

¹¹ Hewaʼae abua zalua andre khö Yefita, hizaʼi abölö abua nasa daʼö khö nononia alawe. Hewaʼae simanö, hasambalö ifalua zi no ifabuʼu amania. (Zanguhuku 11:36, 37) Eluahania, tebai mangowalu ia mazui iʼokhögö ndraono. Aetu ngaʼötöra. Tatu manö, moguna khönia wondrara dödö hegöi famarou dödö. Imane Sura Niʼamoniʼö, ”Ba tobali huku ba ndraono Gizaraʼeli: Ero röfi möi nono Gizaraʼeli alawe, ba wanuno ono Yefita andrö, banua Gileadi, öfa-öfa ngaluo waʼara.” (Zanguhuku 11:39, 40) Salua khö nono Yefita andre, möi famasugi ba dödöda sanandrösa khö ndra talifusöda  si lö sangowalu ena’ö oya labe’e ginötöra ba wangai halöwö khö Yehowa. Hadia tola tasuno ba tafarou dödöra?​—1 Korindro 7:32-35.

12, 13. Hewisa wameʼe Wetero famarou dödö khö ndra talifusöda ba götö siföföna?

¹² Ba mbongi fatua lö mate Yesu, imane khö zinengenia sotöi Fetero, ”He Simoni, he Simoni, faigi! No iʼandrö Satana ba wanafiʼö yaʼami simane gandru. Hizaʼi, no uʼandrö khö Lowalangi börö ndraʼugö, enaʼö lö taya wamatiu. Na no öfalalini gera-erau, abeʼeʼö ndra talifusöu.”​—Luka 22:31, 32.

¹³ Fetero no samösa moroi ba gotalua ndra sondröniaʼö ba mbanua niha Keriso ba götö siföföna. (Galatia 2:9) Ifarou dödö ndra talifusö si fao faʼabarani ba ginötö alua Wendrakose hegöi me no aefa lafalua daʼö. Hauga fakhe aefa da’ö, isura zura khö ndra talifusönia, ”Andrö wa usura zura sadogo-dogo andre ba wangaʼaroʼö yaʼami, ba ufaduhuʼö khömi wa sindruhu waʼasökhi dödö sebua andrö moroi khö Lowalangi. Miʼaroʼö wololohe.”(1 Fetero 5:12) Möi famarou dödö niha Keriso siföföna zura Wetero andrö, ba tefarou göi dödöda ba wombaloi enaʼö alua fefu mbuʼusa li Yehowa!​—2 Fetero 3:13.

14, 15. Hewisa mbuku nisura Yohane andre möi famarou dödöda?

¹⁴ Sinenge sotöi Yohane samösa sondröniaʼö  ba mbanua niha Keriso ba götö siföföna. Isura mbuku Injil sanandrösa ba halöwö fanuriaigö nifalua Yesu. No hauga ngaotu fakhe tefarou dödö niha Keriso ba mbuku Injil andre irugi maʼökhö. Duma-dumania, ha ba mbuku Yohane tabaso niwaʼö Yesu wa faʼomasi andrö no tandra niha Keriso sindruhu.​—Baso Yohane 13:34, 35.

¹⁵ So göi zindruhu sebua böli ba zura Yohane si tölu ngawua. Ba ginötö so khöda wa’ide-ide dödö börö zala si no tafalua, owua-wua dödöda me tabaso wa höli nibeʼe Yesu tola ”iʼefaʼö fefu horöda”. (1 Yohane 1:7) Na lö aetu itegu-tegu ita tödöda, terara dödöda ba ginötö tabaso wa ”abölö ebua Lowalangi moroi ba dödöda”. (1 Yohane 3:20) Ha Yohane zanura ba Zura Niʼamoniʼö wa ”Lowalangi andrö no faʼomasi”. (1 Yohane 4:8, 16) Ba zurania si dua ba si tölu, isuno niha Keriso samorege ba ’wanörö lala sindruhu’.​—2 Yohane 4; 3 Yohane 3, 4.

16, 17. Hewisa Waulo ba wamarou tödö niha Keriso ba götö siföföna?

¹⁶ No sambua duma-duma si sökhi khöda zinenge sotöi Faulo ba wameʼe famarou dödö khö ndra talifusönia. Lö ara me no aefa mate Yesu, ato ndra sinenge si toröi ba Yeruzalema, nahia ndra boto solohe. (Halöwö Zinenge 8:14; 15:2) Niha Keriso si so ba Yudea manuriaigö ira sanandrösa khö Keriso ba niha si no faduhu tödö wa ha samösa Lowalangi. Hizaʼi, ifatenge Waulo  eheha Lowalangi enaʼö manuriaigö ia ba niha Yunani, Romawi hegöi ba niha samosumange lowalangi böʼö.​—Galatia 2:7-9; 1 Timoteo 2:7.

¹⁷ Manuriaigö Waulo ba Yunani, Italia hegöi ba mbanua nifotöi Turki iada’a. Manuriaigö ia ba zi tenga niha Yahudi si so ba mbanua daʼö, ba ifasindro mbanua niha Keriso. Banua niha Keriso sawena mufasindro andre, göna ira folohi ba soira samösa, andrö wa moguna khöra wamarou dödö. (1 Tesalonika 2:14) Te me döfi 50 M, isura zurania Faulo si möi famarou dödö ba mbanua niha Keriso si bohou si so ba Desalonika. Imane, ”Maʼandrö saohagölö khö Lowalangi ero mangandrö ndraʼaga salahimi, föna Lowalangi, Amada, lö olifu ndraʼaga hewisa waʼerege dödömi börö wamati ba faʼomasimi, ba hewisa waʼanau gölömi.” (1 Tesalonika 1:2, 3) Iʼandrö göi khöra enaʼö lafarou dödö nawöra zamösana ba imane, ”Böi miböhöli wangaʼaroʼö hegöi ba wamarou tödö.”​—1 Tesalonika 5:11.

18. Hewisa ndra boto solohe ba götö siföföna ba wameʼe famarou dödö khö Wilifo?

¹⁸ Ba götö siföföna, iʼogunaʼö ndra boto solohe Yehowa ba wangabölöʼö fefu niha Keriso hegöi ira sondröniaʼö ba mbanua niha Keriso. Me manuriaigö Wilifo ba niha Zamaria sanandrösa khö Keriso, latuhini ia ira boto solohe. Lafatenge darua ba gotaluara yaʼia daʼö Fetero faoma Yohane, lalau mangandrö salahi ndra niha Keriso si bohou enaʼö latema geheha niʼamoniʼö. (Halöwö Zinenge 8:5, 14-17) Tefarou sibai dödö Wilifo hegöi ira talifusöda si bohou börö wanuhini si no latema moroi khö ndra boto solohe!

19. Hewisa dödö niha Keriso siföföna me labaso zura moroi khö ndra boto solohe?

¹⁹ Aefa daʼö, moguna lahalö gangetula si tohude ira boto solohe. Hadia moguna lasuna niha Keriso si tenga niha Yahudi simane nifalua niha Yahudi moloʼö Huku Moze? (Halöwö Zinenge 15:1, 2) Me no aefa laʼandrö geheha niʼamoniʼö ba wangandrö, laʼodaligö Zura Niʼamoniʼö ba lahalö gangetula wa lö saʼae moguna lafalua daʼö. Aefa daʼö, lasura gangetula si no lahalö andrö ba lafatenge ndra talifusöda ira matua ba wamaʼema ba mbanua niha Keriso. Me labaso zura andrö ira niha Keriso ”omuso dödöra ba teʼaroʼö wamatira”.​—Halöwö Zinenge 15:27-32.

20. (a) Hewisa ndra Boto Solohe ba wameʼe khöda famarou dödö iadaʼa? (b) Hadia wanofu nitutunöda ba wamahaʼö aefa daʼa?

²⁰ Boto Solohe ndra Samaduhuʼö Yehowa iadaʼa, labeʼe wamarou dödö khö ndra talifusöda sohalöwö ba Mbetieli, khö ndra sohalöwö safönu inötö ba wanuriaigö hegöi khöda maʼafefu. Simane ira talifusöda ba götö siföföna, tatu omuso dödöda ba wamarou dödö si no labeʼe! Lafarou göi dödö niha si no mondröi sindruhu enaʼö mangawuli ira khö Yehowa. Me döfi 2015, no lahaogö brosur Kembalilah kepada Yehuwa ira Boto Solohe. Hizaʼi, hadia ha ira talifusöda sondröniaʼö zi tola mameʼe famarou dödö mazui tola tafalua daʼö? Tatutunö wanofu andre ba wamahaʼö aefa daʼa.