1. Hana wa ifarou niha Keriso si so ba Heberaiʼo Faulo enaʼö lafarou dödö nawöra zamösana ”soroi ba dödö”?

BA GÖTÖ siföföna, ibeʼe mene-mene sinenge sotöi Faulo ba niha Keriso si so ba Heberaiʼo, ”Yafaoma taʼameʼegö tödö nawöda ba wamarou tödö ba waʼomasi hegöi ba mbua-bua si sökhi, böi taböhöli weʼamöi ba gangowuloa, simane nifalua danö böʼö ösa, hizaʼi faoma tafarou dödö nawöda zamösana ba tafalua ia soroi ba dödö, mendrua manö me taʼila wa no ahatö ginötö andrö.” (Heberai’o 10:24, 25) Tola manö manofu-nofu dödö ndra talifusöda si so ba daʼö, hana wa iwaʼö Faulo enaʼö itugu lafarou dödö nawöra zamösana. Ambö lima fakhe aefa daʼö, laʼila hadia mbörö wa iwaʼö daʼö. Me luo daʼö, laʼila wa no ahatö luo wanguhuku Yehowa ba mbanua Yeruzalema. Aboto ba dödöra wa moguna laröi mbanua andrö simane niwaʼö Yesu. (Luka 21:20-22; Halöwö Zinenge 2:19, 20) Alua wanguhuku Yehowa me döfi 70 M,  me ladudugö Yeruzalema ira saradadu Romawi.

2. Hana wa moguna tadouʼö ba wameʼe famarou dödö khö ndra talifusöda ba ginötö iadaʼa?

² Iadaʼa, alua göi khöda zimane daʼö. No ahatö mbaŵa sebua andrö khö Yehowa ba sataʼu ita. (Yoeli 2:11) Tefaudu göi khöda wehede zamaʼeleʼö sotöi Zefania, ”No ahatö mbaŵa sebua andrö khö Yehowa; no ahatö ia, ba alio sibai irugi.” (Zefania 1:14) Börö daʼö, moguna ”taʼameʼegö tödö nawöda ba wamarou tödö ba waʼomasi hegöi ba mbua-bua si sökhi”. (Heberaiʼo 10:24) Moguna itugu taʼameʼegö tödö ndra talifusöda enaʼö tola tabeʼe khöra wamarou dödö ba ginötö si tefaudu.

3. Hadia niwaʼö Waulo sanandrösa ba wamarou dödö? (Faigi gambara ba wamobörö wamahaʼö.)

³ ”Faʼabu dödö niha, ba ihöndrögö tou dödö; ba fondrara dödö daromali nihaogö.” (Gamaedola 12:25) Fefu ita moguna khöda wamarou dödö. Iwaʼö Faulo wa moguna göi wamarou dödö ba niha sameʼe famarou dödö. Isura zura khö ndra talifusöda si so ba Roma, ”Omasido sibai falukha khömi enaʼö tola ufarou dödömi ba wamati ba wangaʼaroʼö yaʼami. Eluahania, enaʼö tola tafarou dödö nawöda zamösana. Tefarou dödögu ba wamatimi, ba tefarou dödömi ba wamatigu.” (Roma 1:11, 12) Andrö, itaria moguna göi wamarou dödö khö Waulo.​—Baso Roma 15:30-32.

4, 5. Haʼökhö manö moguna wamarou dödö ba ginötö iadaʼa, ba hadia mbörö?

⁴ Iadaʼa, moguna tafarou dödö niha samosumange Yehowa safönu inötö, simane ira perintis si lö faröi. Ato ba gotaluara zondröi somasi-masi dödöra ba waʼauri enaʼö tola merintis ira. Lafalua göi daʼa ira utusan injil, ösi nomo Mbetieli, satua samasui ba foʼomora hegöi ira sohalöwö ba RTO. Oya zi no latehegö ba waʼaurira irege oya ginötö niʼogunaʼöra ba wamosumange Yehowa. Daʼö mbörö wa moguna tabeʼe khöra wamarou dödö. Ato göi zi lö omasi mondröi halöwö safönu inötö, hizaʼi tebai saʼae lafalua. Moguna göi khöra wamarou dödö.

⁵ Haʼökhö manö nasa mubeʼe wamarou dödö? Tola tafarou dödö ndra talifusöda si lö sangowalu börö me laʼoʼö niwaʼö Yehowa ba mangowalu ira ha ”ba khö Zoʼaya”. (1 Korindro 7:39) Tefarou sibai dödö woʼomo ira alawe ba ginötö iwaʼö khönia foʼomonia wa iʼomasiʼö ia ba iʼandrö saohagölö ba ngawalö zi no ifalua. (Gamaedola 31:28, 31) Moguna göi wamarou dödö ba niha Keriso si göna folohi mazui si göna fökhö. (2 Tesalonika 1:3-5) Yehowa hegöi Yesu, labeʼe wondrara dödö ba niha si lö faröi.​—Baso 2 Tesalonika 2:16, 17.

6. Ba Yesaya 32:1, 2, hadia wamahaʼö nihalöda sanandrösa ba halöwö ndra satua sokubaloi?

⁶ Baso Yesaya 32:1, 2. Börö me no so ita ba ginötö si lö sökhi, andrö wa alio abu dödöda ba afatö dödöda. Iʼogunaʼö Yesu Keriso ndra ”kumandru”, ya’ia da’ö ira satua sokubaloi si no mubayoini mazui si lö’ö ba wameʼe khöda famarou dödö. Ira satua sokubaloi andre tenga ’samatörö’ famatida hizaʼi ”si falulu fohalöwö” khöda si fao faʼomuso dödö. Omasi ira latolo ita ba wangokhögö faʼomuso  dödö ba enaʼö lö faröi ita.​—2 Korindro 1:24.

7, 8. Hewisa wameʼe ndra satua sokubaloi famarou dödö ba niha böʼö moroi ba wehede hegöi ba nifaluara?

⁷ Ira satua sokubaloi tola laʼoʼö Waulo, si lö aetu-aetu mamarou tödö ndra talifusönia. Ibeʼe zurania ba niha Keriso si so ba Desalonika si no göna folohi, ”Börö waʼomasima, mahalö gangetula ba wamaʼema turia somuso dödö khömi moroi khö Lowalangi, ba matehegö waʼaurima börö waʼomasima khömi.”​—1 Tesalonika 2:8.

⁸ Tola labeʼe wamarou dödö ira satua sokubaloi moroi ba wehedera. Hizaʼi, hadia no obönö daʼö? Imane Faulo khö ndra satua sokubaloi si so ba Efeso, ”Hasambalö mitolo zambö faʼabölö, ba böi olifu ami wehede Zoʼaya Yesu me iwaʼö, ’Ohahau dödö ba wameʼe moroi ba wanema.’” (Halöwö Zinenge 20:35) Itehegö fefu hadia ia Faulo hegöi faʼaurinia khö ndra talifusönia. Oroma daʼa moroi ba nifaluania. (2 Korindro 12:15) Simanö göi, labeʼe wamarou dödö hegöi fondrara dödö ira satua sokubaloi ba niha böʼö tenga ha ba wehede hizaʼi moroi ba nifaluara. Ba daʼa taʼila wa sindruhu-ndruhu laʼameʼegö tödö ita.​—1 Korindro 14:3.

9. Hewisa ndra satua sokubaloi ba wameʼe mene-mene si möi famarou dödö?

⁹ Itaria labeʼe mene-mene ira satua sokubaloi ba wangaʼaroʼö ira talifusöda. Enaʼö tola labeʼe mene-mene si möi famarou dödö, tola lafahaʼö ira ba Zura Niʼamoniʼö. Ibeʼe duma-duma si sökhi Yesu sanandrösa ba daʼö ba ginötö ibeʼe mene-mene ba mbanua niha Keriso si so ba Asia Kecil me no aefa mate ba tesusugi ia. Ibeʼe mene-mene sabeʼe ba mbanua niha Keriso si so ba Efeso, Feregamo hegöi Tiatira. Hizaʼi, fatua lö ifalua daʼö, isuno ira börö me so zi sökhi si no lafalua. (Famaʼeleʼö 2:1-5, 12, 13, 18, 19) Imane Yesu ba mbanua niha Keriso si so ba Laodikia, ”Utegu ba ufotu fefu niha niʼomasiʼögu. Börö daʼö, falalini gera-erau ba yaʼowölö-ölö ndraʼugö.” (Famaʼeleʼö 3:19) Moguna laʼoʼö Keriso ira satua sokubaloi ba ginötö labeʼe mene-mene.

10. Fefu ita tola tafarou dödö niha böʼö, hewisa wamaluada daʼö?

¹⁰ Tenga ha ira satua sokubaloi zinangea mameʼe famarou dödö ba niha böʼö. Imane Faulo ba niha Keriso, ”Mibeʼe wehede si sökhi si möi famarou dödö na moguna, enaʼö ohahau dödö zamondrongo.” (Efeso 4:29) Moguna aboto ba dödöda hadia zinangea tafalua ba wanolo niha böʼö. Imane Faulo ba niha Keriso si so ba Heberaiʼo, ”Miʼabeʼeʼö dangami si no adada ba balöduhi si no atage, ba böi atage ami miʼadölöʼö wofanö, enaʼö lö itugu monönö waʼatebai mbuʼu si fakaole andrö, hizaʼi tefadöhö.” (Heberaiʼo 12:12, 13) Fefu ita tola taʼaroʼö ba tafarou dödö niha böʼö moroi ba wehededa, hewaʼae awuyu-wuyu ita nasa.

11. Hadia zanolo Marthe me fawuka wangera-ngerania?

¹¹ So samösa dalifusöda ira alawe sotöi Marthe, fawuka wangera-ngerania hewaʼae ba zi lö arara. * (Faigi nisura ba gahe zura.) Isura, ”Samuza maʼökhö,  ulau mangandrö enaʼö teʼabeʼeʼö ndraʼo. Falukhado khö dalifusöda ira alawe si no alawa döfi, sangoromaʼö khögu faʼomasi hegöi faʼahakhö dödö ba ginötö si tefaudu. Itutunö khögu zalua khönia tefaudu simane abula dödö nirasoigu yaʼia daʼö falöʼawö-awö.” Tola manö lö iʼila talifusöda ira alawe andrö wa no möi fanolo khö Marthe wehedenia andrö!

12, 13. Hewisa wamaluada mene-mene si so ba Filifi 2:1-4?

¹² Isura zurania Faulo ba niha Keriso si so ba Wilifi, ”Börö me faoma mifarou dödö nawömi ba woloʼö Keriso, mirara dödö nawömi börö waʼomasi, miʼameʼegö tödö, miʼomasiʼö ba faoma mihakhösi tödö nawömi, miʼomusoiʼö dödögu ba miʼoromaʼö wa fagölö gera-erami hegöi faʼomasimi, sindruhu-ndruhu hasara dödömi ba ha sambua gohitö dödö. Böi mifaʼudu mazui miʼosebua. Si sökhinia miʼide-ideʼö ami, enaʼö alawa niha böʼö miwaʼö tödömi, ba miʼangeragö zoguna ba niha böʼö, tenga ha soguna khömi manö.”​—Filifi 2:1-4.

¹³ Fefu ita, moguna taʼalui lala ba wanolo niha böʼö. Tola ’tarara dödö nawöda börö waʼomasi’, ’taʼameʼegö tödö’ ba ’faoma tahakhösi tödö’ ndra talifusöda enaʼö tafarou dödö nawöda zamösana.

14. Hadia lala nifaluada ba wameʼe famarou dödö?

¹⁴ Tatu omuso dödöda na tarongo wa lö si faröi niha si no tatolo ba zilalö. Isura sinenge sotöi Yohane, ”Lö faʼomuso dödögu sebua baero wamondrongo me lö laböhöli wanörö lala sindruhu iraonogu.”  (3 Yohane 4) Ato ndra perintis somuso tödö na larongo wa lö si faröi niha si no lafahaʼö ba zindruhu ba wamosumange Yehowa mendrua manö na so zi tobali perintis. Andrö, na so khöra wa’ide-ide dödö tola tafasugi ba dödöra fefu zi sökhi si no lafalua ba wanolo niha böʼö.

15. Hewisa wameʼeda famarou dödö ba niha si lö faröi ba wamati?

¹⁵ Ato ndra satua samasui sangumaʼö wa tefarou dödöra hegöi foʼomora me laʼandrö khöra saohagölö ira talifusöda ba ginötö möi ira ba mbanua niha Keriso. Larasoi göi daʼö ira satua sokubaloi, utusan injil, perintis hegöi ösi nomo Mbetieli si lö faröi ba wamosumange Yehowa. Na taʼandrö khöra saohagölö, tola itugu tefarou dödöra.

16. Hadia lala saoha ba wame’e famarou dödö ba zi samösa niha?

¹⁶ Hewisa na abua khöu wame’e famarou dödö ba niha bö’ö, börö me lö onekhe’ö fahuhuo? Sindruhunia, lö abua wamarou dödö niha böʼö. Tola öboho mbawa khöra, hizaʼi na lö lafuli laboho mbawa khöu tola manö daʼö geluahania wa so gabula dödöra ba omasi ira na so zi fahuhuo khöra. Tola örara dödöra na öfondrondrongo nitutunöra.​—Yakobo 1:19.

17. Hadia zameʼe famarou dödö khö zi samösa talifusöda ira matua si bohou ebua?

¹⁷ Samösa dalifusöda ira matua si bohou ebua sotöi Henri, afatö dödönia börö me so ösa nösi nomonia si no mamöhöli wamosumange Yehowa. Samösa  moroi ba gotaluara yaʼia daʼö bapania si no irai tobali satua sokubaloi. Inehegö satua samasui wa abu dödö Henri ba ikaoni ia ba wamadu kofi. Ihaogö ifondrondrongo me itutunö Henri zalua khönia. Aboto ba dödö Henri wa ha sambua lala enaʼö tola mangawuli ba zindruhu nösi nomonia yaʼia daʼö lö faröi ia ba wamati. Terara göi dödönia me ibaso Zinunö 46, Zefania 3:17 hegöi Mareko 10:29, 30.

18. (a) Hadia niwa’ö Razo Selomo sanandrösa ba wamarou tödö? (b) Hadia mene-mene nibe’e Waulo khöda?

¹⁸ Hadia wamahaʼö nihalöda moroi ba zalua khö Marthe hegöi Henri? Fefu ita, tola tarara ba tafarou dödö ndra talifusöda. Imane Razo Selomo, ”Taromali ba ginötö, ba ha lö asökhi! Fangomuso dödö haga hörö, ba fangabeʼe döla duria si sökhi.” (Gamaedola 15:23, 30) Hadia so ni’ilamö niha si göna abula dödö mazui safatö tödö? Tola öbaso khönia wamahaʼö si so ba Manuriaigö mazui si so ba situs Web khöda. Iwa’ö göi Faulo, tola tarasoi wa omuso dödö na fao ita ba woʼanunöisi sinunö Mbanua Lowalangi. Imane, ”Böi miböhöli wamahaʼö hegöi ba wameʼe famarou dödö ba niha böʼö si fao sinunö, fanuno Lowalangi, sinunö ba wamati si fao fangandrö saohagölö, ba miʼanunö khö Yehowa soroi ba dödö.”​—Kolose 3:16; Halöwö Zinenge 16:25.

19. Hana wa itugu moguna tafarou dödö nawöda zamösana ba hadia nifaluada?

¹⁹ Börö me no ahatö luo Yehowa, moguna enaʼö itugu tafarou dödö nawöda zamösana. (Heberaiʼo 10:25) Tasöndra waʼowua-wua dödö na tafalua niwaʼö Waulo, ”Böi miböhöli wangaʼaroʼö hegöi ba wamarou tödö simane si no mifalua.”​—1 Tesalonika 5:11.