1-3. (a) Hezo la’amaedolagö wa’auri ndra si bohou ebua? (Faigi gambara ba wamobörö wamahaʼö.) (b) Hewisa ena’ö tola lahalö gangetula si sökhi ira niha Keriso si bohou ebua?

KHALAIGÖ atö, hewisa na möi’ö ba gangowuloa si tohude ba mbanua saröu. Enaʼö tola möiʼö ba daʼö, moguna ötörö moto. Ba naha wolombase moto, tola manö abu dödömö börö me ato niha ba daʼö ba oya moto. Hizaʼi, omuso dödömö börö me öʼila hezo numalöʼö ba hezo moto nitörömö. Lö ötörö moto tanö böʼö börö me tola laʼohe ndraʼugö ba lala si fasala.

² Faʼauri andre no amaedola wofanö, ba yaʼugö si bohou ebua hulö niha si so ba naha wolombase moto. Itaria abu dödömö börö me oya zinangea öfili ba wa’auri. Hizaʼi, na ö’ila hezo numalöʼö, tola aoha khöu ba wangai angetula si sökhi. Hadia gangetula nifilimö?

³ So wanema linia ba wamaha’ö da’a, ba ifarou dödömö ba wangosambua’ö fa’aurimö ba wangomusoi’ö tödö Yehowa. Eluahania, moguna öʼoʼö wanuturu lala moroi khö Yehowa ba ngawalö gangetula nihalömö, simane sekola,  halöwö mazui hadia mangowalu ndraʼugö ba öʼokhögö ndraono. Tola itugu ahatö ndraʼugö khö Yehowa na öʼosambuaʼö dödömö ba gohitö dödö ba wamati. Na öʼosambuaʼö dödömö ba wamosumange Yehowa, hasambalö ifahowuʼö ndraʼugö ba itoloʼö enaʼö mofozu waʼaurimö.​—Baso Gamaedola 16:3.

4. Hadia nitutunöda ba wamahaʼö daʼa?

⁴ Hana wa moguna ta’okhögö gohitö dödö ba wamati? So tölu daninia. Si ofanö ba si dua, tola itolo ndraʼugö enaʼö öʼila wa fangai halöwö ba wamati möi fangaro wahuwusau khö Yehowa. Si tölu, tola ö’ila hadia gunania na no ötatugöi gohitö dödömö i’otarai ba wa’awuyu-wuyu.

5. Hadia dani sabölö tohude wa moguna mutatugöi gohitö dödö ba wamati?

⁵ Tani sabölö tohude ba wotatugöi ohitö dödö ba wamati yaʼia daʼö ba wangandrö saohagölö khö Yehowa börö waʼomasi hegöi nifaluania ba waʼaurida. Imane samösa sanura Zinunö, ”Si sökhi, na taʼandrö saohagölö khö Yehowa . . . Me öʼomusoiʼö dödögu, yaʼugö Yehowa folau-laumö andrö; maʼiki dödögu ba halöwö dangau andrö.” (Zinunö 92:2, 5) Angeragö hadia manö zi no ibeʼe khöu Yehowa, faʼaurimö, famati, Sura Niʼamoniʼö, banua niha Keriso ba tötönafö faʼauri si lö aetu ba Waradaiso. Na ötatugöi gohitö dödöu ba wamati, öforomaʼö khö Yehowa wa öʼandrö saohagölö ba zi no ibeʼe khöu ba tola itugu ahatö ndraʼugö khönia.

6. (a) Na no ötatugöi gohitö dödöu ba wamati, hadia mbuania ba wahuwusamö khö Yehowa? (b) Hadia manö gohitö dödö si tola ötatugöi ba waʼawuyu-wuyumö?

⁶ Tani si dua ba wotatugöi ohitö dödö ba wamati yaʼia daʼö öfalua halöwö si sökhi khö Yehowa ba tola itugu ahatö ndraʼugö khönia börö me öforege ba wogamö ohitö dödömö. Ifabuʼu sinenge sotöi Faulo, ”Tenga sa si lö atulö Lowalangi irege olifu ia halöwömi hegöi faʼomasimi börö döinia.” (Heberaiʼo 6:10) Hewaʼae awuyu-wuyu nasa ndra’ugö, tola ötatugöi gohitö dödömö ba wamati. Duma-dumania, me 10 fakhe ndröfi Christine, ihalö gangetula enaʼö lö ibato ba wombaso waö-waö waʼauri ndra Samaduhuʼö si lö faröi. Simanö göi Toby, me 12 fakhe ndröfinia ihalö gangetula ba wombaso fefu nösi Zura Niʼamoniʼö fatua lö mubayagö ia idanö. Me 11 fakhe ndröfi Maxim ba 10 fakhe ndröfi nakhinia ono alawe sotöi Noemi, tebayagö ira idanö. Latatugöi gohitö dödöra enaʼö mohalöwö ira ba Mbetieli. Enaʼö laʼosambuaʼö wangera-ngerara ba gohitö dödöra andrö, lafalemba ba dowa nomora formulir weʼamöi ba Mbetieli. Hewisa göi ndraʼugö? Hadia tola öʼangeragö hadia manö gohitö dödöu si tola ötatugöi ba öbörögö wogamö yaʼia?​—Baso Filifi 1:10, 11.

7, 8. (a) Hana wa tola aoha khöu ba wangai angetula na no ötatugöi gohitö dödömö? (b) Hana wa lö omasi möi kuliah zi samösa si bohou ebua?

⁷ Hadia dani si tölu wa moguna ötatugöi gohitö dödömö ba waʼawuyu-wuyu? Ba waʼawuyu-wuyu, oya gangetula sinangea öhalö. Moguna ötatugöi hadia zekola mazui halöwö sinangea öhalö ba tanö böʼönia nasa. Angetula ba waʼauri andre hulö simane fabaliwa lala si so fönamö. Na no öʼila hezo möiʼö, aoha khöu ba wotatugöi hezo ötörö. Simanö göi, na no öʼila hadia gohitö dödöu, aoha khömö ba wangai angetula si sökhi. Imane ba Gamaedola  21:5, ”Lua-lua nikhoi dödö zowölö-ölö, ba no hare.” Na no iʼotarai ba wamobörö ötatugöi gohitö dödömö, tola alio mofozu waʼaurimö. Daʼö nirasoi Damaris ba ginötö moguna ihalö gangetula si tohude ba waʼawuyu-wuyunia.

⁸ Ebua sibai nilai sekola Damaris me tama ia SMA, ba tola manö itema beasiswa weʼamöi ba sekola salawa ba ihalö jurusan hukum. Hizaʼi, ifili wohalöwö ba bank. Hadia mbörö? I’otarai ba wa’ide-ide, no ihalö gangetula enaʼö tobali ia perintis. Imane, ”Ena’ö tola ulau merintis, moguna tenga ero maʼökhö mohalöwödo. Tola oya usöndra gefe na no tobalido sarjana hukum, hizaʼi tatu abua khögu ba wanöndra halöwö si tola ufalua mato hauga za ero migu.” No merintis Damaris 20 fakhe faʼara. Hadia maniasa ia ba gangetula si no ihalö? Lö’ö. Ato ndra pengacara si falukha khönia ba nahiania wohalöwö ba bank. Simanö göi menaʼö halöwönia na no möi ia ba sekola salawa. Iwaʼö, ato moroi ba gotaluara zi lö faʼomuso dödö ba halöwöra. No irasoi samösa Damaris waʼowua-wua dödö sagötö tobali ia perintis ba no möi fanolonia daʼö enaʼö lö khönia faʼabu dödö simane nirasoi ndra pengacara andrö.

9. Hana wa omuso dödöda khö ndra si bohou ebua?

⁹ Ngahönö zi bohou ebua ba zi sagörö ulidanö si no mamalua halöwö si sökhi ba no sinangea tasuno ira. Fahuwu ira khö Yehowa ba laʼofönaiʼö gohitö dödöra ba wamati. Larasoi waʼowua-wua dödö ira si bohou ebua andre ba waʼaurira, aefa daʼö lafahaʼö ira ba woloʼö fanuturu lala moroi khö Yehowa ba ngawalö hadia ia, simane sekola, halöwö hegöi ba nösi nomo. Imane Selomo, ”Döna-döna khö Yehowa, moroi siʼaikö ba dödöu.” Imane nasa, ”Böi aefa dödöu khönia, gofu hadia ia lala khöu, ba yaʼia zangadölö töröwau.” (Gamaedola 3:5, 6) Yaʼami si bohou ebua, iʼomasiʼö sibai ami Yehowa! Ebua mbölimi föna hörönia ba ilumöʼö ami, ibeʼe wanuturu lala ba ifahowuʼö ami.

10. (a) Hana wa taʼofönaiʼö sibai halöwö fanuriaigö ba waʼaurida? (b) Hewisa enaʼö monönö waʼatua-tuamö ba wanutunö si no öfaduhusi tödö?

¹⁰ Na öʼosambuaʼö dödöu ba wangomusoiʼö tödö Yehowa, hasambalö ötutunö ia ba niha böʼö. Imane Yesu Keriso, ”Si oföna, hasambalö teturiaigö duria somuso dödö.” (Mareko 13:10) Daʼö mbörö wa mangaösö halöwö fanuriaigö andre ba daʼö zabölö taʼofönaiʼö ba waʼaurida. Hadia tola ötatugöi enaʼö itugu oya ginötömö ba wanuriaigö? Hadia tola merintis ndraʼugö? Hadia nifaluamö na lö ösöndra waʼomuso dödö ba wanuriaigö? Hewisa enaʼö itugu onekhe ndraʼugö ba wanutunö nifaduhusimö tödö? So dombua zi tola manolo yaʼugö. Haogö wamaʼanö yaʼugö ba böi awuwu ndraʼugö ba wanutunö ba niha böʼö sanandrösa khö Yehowa. Buania, örasoi waʼowua-wua dödö ba wanuriaigö.

11, 12. (a) Hadia zi tola öfalua ba wamaʼanö yaʼugö ba wanutunö sanandrösa khö Yehowa ba niha böʼö? (b) Hewisa zi samösa si bohou ebua ba wanutunö sanandrösa khö Yehowa ba sekola?

 ¹¹ Tola öbörögö ba wamaʼanö fanema li ba wanofu si tola manö lasofu ira awöu ba sekola. Duma-dumania, ”Hana wa faduhu dödömö khö Lowalangi?” Ba situs Web khöda jw.org, so artikel sanolo yaʼugö ba wameʼe fanema li ba zi nofu daʼö. Na öfaigi ba AJARAN ALKITAB > ANAK MUDA, tola ösöndra artikel lembar kegiatan tuhonia Mengapa Aku Percaya kepada Allah?” Oʼö wanuturu lala si so ba daʼö enaʼö tola öfaʼanö wanema liu samösa. So tölu ayati Zura Niʼamoniʼö si tola öʼogunaʼö: Heberaiʼo 3:4, Roma 1:20, hegöi Zinunö 139:14. Ba daʼö, no tehenaigö lembar kegiatan na so wanofu tanö böʼö.​—Baso 1 Fetero 3:15.

¹² Fatunö khö ndra awöu ba sekola wa tola lafaigi daʼö ba jw.org. Daʼö nifalua Luca. Ba kelasnia, latutunö sanandrösa ba agama. Ba mbuku wamahaʼöra ba sekola, iʼila sambua duho sanutunö si fasala sanandrösa khö ndra Samaduhuʼö Yehowa. Hewaʼae so maʼifu waʼataʼu khö Luca, iʼandrö khö gurunia enaʼö itutunö khö ndra awönia hana wa fasala daʼö. Itehegö khönia gurunia ba wanutunö hadia nifaduhusinia tödö ba iforomaʼö situs Webda khö ndra awönia sekola. Buania, ifarou ndraono sekola andrö gurunia enaʼö lafaigi video Kalaisi Zamaka-makao Yaʼugö Tenga Dali Faʼudu. Hadia tola ökhalaigö hewisa waʼomuso dödö Luca me ifatunö khö ndra awönia sanandrösa khö Yehowa?

13. Hana wa böi awuwu ita na alua khöda gabula dödö?

¹³ Ba ginötö alua khöu gabula dödö, böi  so khöu wa’ide-ide dödö, hizaʼi osambuaʼö dödöu ba wogamö ohitö dödömö. (2 Timoteo 4:2) Daʼö nifalua Katharina. Me 17 fakhe ndröfinia, itatugöi gohitö dödönia enaʼö manuriaigö ia khö ndra awönia sohalöwö. So samösa ba gotaluara zasese mangoʼaya yaʼia. Hizaʼi, lö olifu ia gohitö dödönia. Börö gamuatania si sökhi, adöni dödö nawönia tanö böʼö sotöi Hans. Ibörögö ibaso publikasida, ifahaʼö ia ba Zura Niʼamoniʼö ba tebayagö ia idanö. Lö iʼila Katharina hadia zalua börö me no findra ia. Me 13 fakhe aefa daʼö, fao ia ba nösi nomonia weʼamöi ba gangowuloa ba tokea sibai ia börö me Hans zangolohesi huhuo sebua! Omuso sibai dödönia börö me lö sawuwu ia ba wanuriaigö khö ndra awönia sohalöwö.

14, 15. (a) Hadia zinangea ötörö tödömö na so niha samaso yaʼugö ba wamalua somasi dödöra? (b) Hadia zi tola öfalua enaʼö aro ndraʼugö ba wamati na so niha samaso yaʼugö?

¹⁴ Ba wamahaʼö daʼa, oya wamarou dödö si no ötema enaʼö öʼosambuaʼö waʼaurimö ba wangomusoiʼö tödö Yehowa hegöi ba wotatugöi ohitö dödö ba wamati. Hizaʼi, ato ndra si bohou ebua si fagölö döfi khöu, sangomusoiʼö tödöra samösa ba tola manö ladönisi dödömö ba wamalua daʼö. Moguna öforomaʼö khöra wa hasambalö ögohi gohitö dödömö. Böi tehegö so niha böʼö zanaisi yaʼugö ba wamalua da’ö. Na yaʼugö zi so ba naha wolombase moto simane nitutunö ba wamobörö wamahaʼö da’a, hadia ötörö moto tanö böʼö ha börö me lafalua zomasi-masi dödöra niha si so ba daʼö? Tatu manö löʼö!

¹⁵ Hadia zi tola öfalua enaʼö lö awuwu ndraʼugö ba wamati na so niha samaso yaʼugö ba wamalua simane nifaluara? Timbagö hadia ia zi tola mondrönisi tödöu. (Gamaedola 22:3) Angeragö hawaʼafökhö lua-luania na öfalua zala. (Galatia 6:7) Si fao fangide-ngideʼö, faduhuʼö wa moguna khömö mene-mene si sökhi. Fondrondrongo mene-mene moroi khö ndra satuamö hegöi khö ndra talifusöda si so ba gangowuloa.​—Baso 1 Fetero 5:5, 6.

16. Moroi ba zalua khö Christoph, hewisa wa tola oroma wa moguna sibai wangide-ngideʼö?

¹⁶ Börö me so khö Christoph wangide-ngideʼö, andrö wa aoha khönia wanema mene-mene si sökhi. Me no aefa tebayagö ia idanö, ibörögö asese möi ia ba naha fitness. Ba daʼö, so ndra si bohou ebua sondrönisi tödönia wefao ba gorahua olahraga. Ifatunö daʼö khö zatua sokubaloi, ba ifatunö göi khönia satua sokubaloi hadia deʼala salua ba daʼö, duma-dumania alua watandrisa. Ihalö gangetula Christoph wefao ba gorahua daʼö gofu hadia ia zalua. Hizaʼi lö ara aefa daʼö, iʼila wa so waʼalösökhi hegöi teʼala ba olahraga daʼö. Ifuli fahuhuo khö ndra satua sokubaloi ba labeʼe khönia mene-mene moroi ba Zura Niʼamoniʼö. Imane Christoph, ”Ifatenge khögu Yehowa zameʼe mene-mene si sökhi, ba gafuriatania ufondrondrongo da’ö.” Hadia so khöu wangide-ngideʼö ba wanemaʼö mene-mene si sökhi?

17, 18. (a) Hadia zomasi Yehowa enaʼö larasoi ira si bohou ebua? (b) Hewisa enaʼö lö khöu faniasa ba gangetula nihalömö na no atuaʼö? Beʼe duma-duma.

¹⁷ Imane Sura Niʼamoniʼö, ”Omusoiʼö dödöu, yaʼugö ono matua [mazui ono alawe], fatua ono matua ndraʼugö, ya sowua-wua dödöu, götö wa ono matua ndraʼugö.” (Zangombakha 11:9) Omasi Yehowa na owua-wua dödömö ba waʼawuyu-wuyu. Ba wamahaʼö daʼa, no öfahaʼö ndraʼugö lala ba wanöndra faʼomuso dödö yaʼia daʼö  öʼosambuaʼö wangera-ngeramö ba gohitö dödömö ba wamati ba ö’oʼö fefu mene-mene Yehowa ba gangetula nihalömö hegöi niʼera-eramö. Na no iʼotarai ba wamobörö öfalua daʼö, hasambalö örasoi hewisa wameʼe Yehowa khöu fanuturu lala, folumöʼö hegöi howu-howu. Angeragö fefu mene-mene si sökhi nibeʼenia khöu ba Daromalinia ba falua mene-mene daʼa, ”Törö-törö tödöu Zomböi yaʼugö, götö wa ono matua na ndraʼugö.”​—Zangombakha 12:1.

¹⁸ Alio tedou mboto ndra si bohou ebua ba tobali satua. Hizaʼi, ato zaniasa ba gotaluara börö me no latatugöi gohitö dödö si fasala mazui lö nitatugöira gohitö dödöra me awuyu-wuyu. Na lö mamalö öʼosambua’ö wangera-ngerau ba gohitö dödö ba wamati, hasambalö owua-wua dödömö ba zi no öfili na no atua ndraʼugö. Daʼö nirasoi dalifusöda ira alawe sotöi Mirjana. Me awuyu-wuyu ia, onekhe sibai ia faʼolahraga ba no irai lakaoni ia wefao ba Pertandingan Olimpiade Musim Dingin. Hizaʼi, ifili ba wangai halöwö safönu inötö khö Yehowa. Töra 30 fakhe aefa daʼö, lö tebulö ia ba wangai halöwö safönu inötö, ba iada’a fao ia khö woʼomonia ba wamalua da’ö. Iwaʼö, omasi niha sato waʼatehöngö, sumange, faʼabölö hegöi faʼakayo si lö irai mameʼe khöra faʼomuso dödö sindruhu. Iwaʼö nasa, ohitö dödö sabölö sökhi yaʼia daʼö ba wamosumange Lowalangi hegöi ba wanolo niha enaʼö lasöndra waʼaboto ba dödö sanandrösa khönia.

19. Hana wa sökhi na öʼosambuaʼö wangera-ngeramö ba gohitö dödömö ba waʼawuyu-wuyu?

¹⁹ Yaʼami si bohou ebua, no sinangea musuno ami börö me miʼosambuaʼö dödömi ba wamosumange Yehowa hewaʼae so gabula dödömi. No mitatugöi gohitö dödömi ba wamati, ba tohude sibai khömi halöwö fanuriaigö ba waʼaurimi. Lö mitehegö möi fanaisimi ngawalö hadia ia zi so ba gulidanö andre ba wogamö ohitö dödömi. Yafaduhu dödömi wa tenga zaya-zaya gölö fefu zi no mifalua. So ndra talifusöda sangomasiʼö ba samarou tödömi. Andrö, ”Beʼe balazi Yehowa wolau-laumö andrö; ba mofozu nikhoi dödöu.”