1. Simane nitutunö ba Efeso 6:10-13, hadia sambua lala niʼogunaʼö Yehowa ba wangoromaʼö wa iʼameʼegö tödö ita? Tutunö.

SAMBUA lala niʼogunaʼö Yehowa ba wangoromaʼö wa iʼameʼegö tödö yaʼita ono mbanuania, yaʼia daʼö itolo ita ba wolawa nududa. Ududa yaʼia daʼö Satana hegöi bekhu. Ifangelama ita Yehowa sanandrösa ba nudu andre, ba ibeʼe khöda hadia zoguna khöda ba wotimbagö yaʼira. (Baso Efeso 6:10-13.) Ba ginötö tatema wanolo Yehowa ba taʼodaligö ia, tola mofozu ita ba wolawa Afökha. Taʼokhögö waʼafaduhu dödö si fagölö simane khö zinenge sotöi Faulo. Imane, ”Na fao khöda Lowalangi, haniha zolawa yaʼita?”​—Rom. 8:31.

2. Hadia nitutunöda ba wamahaʼö daʼa?

² Börö me niha Keriso sindruhu ita, lö taʼosambuaʼö dödöda ba wamahaʼö yaʼita sanandrösa khö Zatana hegöi malaʼika si lö sökhi. Taʼosambuaʼö dödöda ba wamahaʼö yaʼita sanandrösa khö Yehowa hegöi ba wamosumange yaʼia. (Zin. 25:5) Hewaʼae simanö, moguna taʼila ngawalö nifalua Zatana ba wamaelungu yaʼita. Hadia mbörö? Enaʼö tola tatimbagö wamaelungu nibeʼenia. (2 Kor. 2:11) Ba wamahaʼö daʼa, tatutunö lala siföföna niʼogunaʼö Zatana hegöi malaʼika si lö sökhi ba wamaelungu niha. Ba tatutunö göi hewisa enaʼö mofozu ita ba wolawa yaʼira.

3-4. (a) Hadia wakelemusa andrö? (b) Hawaʼato niha si faduhu tödö ba wakelemusa?

³ Lala niʼogunaʼö Zatana hegöi malaʼika si lö sökhi ba wamaelungu niha, yaʼia daʼö fakelemusa. Niha samalua fakelemusa, iwaʼö wa laʼila hadia zalua mazui laʼila lafatörö hadia ia  si tebai lafalua niha si toʼölö. Duma-dumania, lawaʼö wa tola mamaʼeleʼö ira mazui manahö döfi enaʼö tola laʼila hadia zalua ba zi so miföna. Tanö böʼönia so nifaluara enaʼö tola fahuhuo ira ba niha si no mate. So ösa göi zangogunaʼö fetua mazui hazima ba wogönaisi niha böʼö. *

⁴ Hawaʼato niha si faduhu tödö sanandrösa ba wakelemusa? Sambua survei nifalua ba zi 18 soi si so ba Amerika Latin hegöi Kepulauan Karibia, so sambua niʼotölu niha si faduhu tödö ba gelemu. Ba ato göi niha si faduhu tödö wa tola fahuhuo ira ba mbekhu niha si no mate mazui ba malaʼika si lö sökhi. Moloʼö survei tanö böʼö ba zi 18 soi si so ba Afrika, arakhagö töra matonga niha sangumaʼö wa faduhu dödöra ba wakelemusa. Börö daʼö, gofu hezo toröi ita moguna taʼangelamaisi wakelemusa. Börö me iforege Satana ba wamaelungu ’niha ba gulidanö maʼasagörö’.​—Fam. 12:9.

5. Hewisa wamaigi Yehowa fakelemusa?

⁵ Yehowa no ”Lowalangi waʼatulö”. (Zin. 31:5, Terjemahan Dunia Baru) Hewisa wamaiginia fakelemusa? Fatuwu sibai khönia daʼö! Imane Yehowa ba ndraono Gizaraʼeli, ”Böi falukha ba khömi zamatörö ba galitö ononia matua ba ma ononia alawe, ba he si faeta ba he sanahö lawuo ba he sanaka [ulö] ba he si fakelemu; ba he sanaka, böʼönia, ba he samahede bekhu, ma bekhu waetasa, sanofu ba zi no mate, hadia ia. Me no sogoro Yehowa dozi solau simanö.” (5 Moz. 18:10-12) Tenga barö Goroisa so niha Keriso simane nibeʼe Yehowa ba ndraono Gizaraʼeli. Hizaʼi, aboto ba dödöda wa lö irai tebulö dödönia sanandrösa ba wakelemusa.​—Mal. 3:6.

6. (a) Hewisa Zatana ba wangogunaʼö fakelemusa ba wamaʼala niha? (b) Moloʼö Zangombakha 9:5, hadia zindruhu sanandrösa ba zalua ba niha si no mate?

⁶ Ifangelama ita Yehowa ba wakelemusa börö me aboto ba dödönia wa daʼa niʼogunaʼö Zatana ba wamaʼala niha. Iʼogunaʼö daʼö Satana ba wamalua falimosa simane, auri nasa niha si no mate ba nahia tanö böʼö. (Baso Zangombakha 9:5.) Iʼogunaʼö göi daʼa Satana ba wametaʼu niha irege fandröndröu ira khö Yehowa. Ohitö dödönia enaʼö niha samalua fakelemusa, abölö faduhu dödöra khö ndra malaʼika si lö sökhi moroi khö Yehowa.

7. Hadia nifatunö Yehowa khöda?

⁷ Simane si no mututunö ba wamobörö, no ifatunö khöda Yehowa hadia zinangea tatimbagö enaʼö lö ifaelungu ita Satana hegöi bekhu. Datatutunö ösa hadia lala si tola tafalua ba wolawa Satana hegöi malaʼika si lö sökhi.

8. (a) Hadia lala si oföna ba wanimbagö malaʼika si lö sökhi? (b) Hewisa Zinunö 146:4 ba wangoromaʼö falimosa Zatana sanandrösa ba niha si no mate?

⁸ Baso Daromali Lowalangi ba angerönusi. Daʼa lala si oföna ba wanimbagö falimosa niʼasogö malaʼika si lö sökhi. Taromali Lowalangi hulö wöda satarö si tola mangoromaʼö falimosa nifalua Zatana. (Ef. 6:17) Duma-dumania, Taromali Lowalangi zangoromaʼö falimosa sanandrösa ba niha si no mate wa tola fahuhuo ba niha sauri. (Baso Zinunö 146:4.) Ifasugi göi ba dödöda wa ha Yehowa zi tola tafaduhusi  tödö sangila hadia zalua ba zi so miföna. (Yes. 45:21; 46:10) Na lö tebulö ita ba wombaso hegöi ba woʼangerönusi Daromali Lowalangi, no tefaʼanö ita dania ba wanimbagö hegöi fatuwu ba walimosa nifalua malaʼika si lö sökhi.

9. Hadia manö zi farahu ba wakelemusa sinangea tatimbagö?

⁹ Timbagö ngawalö hadia ia zoʼamakhaita ba wakelemusa. Börö me niha Keriso sindruhu ita, böi tafalua gofu hadia ia soʼamakhaita ba wakelemusa. Duma-dumania, lö möi ita ba zamaʼeleʼö mazui taʼogunaʼö lala tanö böʼö enaʼö tola fahuhuo ita ba niha si no mate. Simane si no tatutunö ba wamahaʼö si no aefa, tatimbagö zi toʼölö lafalua sanandrösa ba wogoʼo niha si no mate si teʼodane-dane ba waʼafaduhu dödö, wa auri nasa niha si no mate ba nahia tanö böʼö. Ba lö taʼogunaʼö wanahö döfi mazui samaʼeleʼö enaʼö taʼila sanandrösa ba zi so miföna. (Yes. 8:19) Aboto ba dödöda wa fefu daʼö möi famaʼala ba moʼamakhaita ia khö Zatana hegöi ba mbekhu.

10-11. (a) Hadia nifalua niha ba abad siföföna ba ginötö lafahaʼö ira ba zindruhu? (b) Moloʼö 1 Korindro 10:21, hana wa moguna taʼoʼö duma-duma niha Keriso ba abad siföföna, ba hewisa wamaluada?

¹⁰ Tiboʼö gama-gama soʼamakhaita ba wakelemusa. Ba abad siföföna, so ösa niha Efeso si fao ba wakelemusa. Me lafahaʼö ira ba zindruhu, laʼanemaiʼö lö saʼae lafalua daʼö. ”Ato ba gotaluara mböröta zi fakelemu, laʼowuloi mbukura ba latunu föna niha sato.” (Hal. 19:19) Latimbagö fefu zoʼamakhaita ba malaʼika si lö sökhi. Hewaʼae ebua sibai mböli mbukura sanandrösa ba gelemu, lö labeʼe mbuku daʼö ba niha böʼö mazui lafamawa, hizaʼi latunu daʼö fefu. Lö laʼangeragö hawaʼebua mböli mbuku andrö, hizaʼi abölö moguna khöra ba wangomusoiʼö dödö Yehowa.

¹¹ Hewisa woloʼöda duma-duma niha Keriso ba abad siföföna? No sambua faʼatua-tua  na tatimbagö gama-gama soʼamakhaita ba wakelemusa, simane hazima mazui gama-gama tanö böʼö niʼogunaʼö mazui niʼiröʼö ba wolumöʼö moroi ba malaʼika si lö sökhi.​—Baso 1 Korindro 10:21.

12. Hadia wanofu-nofu sinangea tasofu khöda samösa sanandrösa ba hiburan nifilida?

¹² Angenanöi ba wamili hiburan. Sofu khöu samösa: ’Hadia buku nibasogu, majalah mazui artikel si so ba Internet moʼamakhaita ia ba wakelemusa? Hewisa musik nifondrondrongogu, film hegöi acara TV nifaigigu mazui video game niʼogunaʼögu? Hadia fefu hiburan nifaigigu moʼamakhaita ba wakelemusa? Hadia moʼamakhaita daʼö ba vampir, zombi mazui ba gelemu? Ba hiburan andrö, hadia hulö möi faʼomuso dödö ba lö möi famaʼala wakelemusa hegöi fogönaisi?’ Tatu manö lö fefu hiburan soʼamakhaita ba hikaya hegöi anga-anga moʼamakhaita ia ba wakelemusa. Ba ginötö öfili hiburan halö gangetula ba wofili si möi fanolo khöu enaʼö aröu moroi ba zi fatuwu khö Yehowa. Omasi ita ba wamalua sabölö sökhi enaʼö ’lö itegu ita tödöda side-ide’ föna Lowalangida.​—Hal. 24:16. *

13. Hadia zinangea tatimbagö?

¹³ Timbagö ba wodunö-dunö sanandrösa ba mbekhu. Ba zalua andre, moguna taʼoʼö duma-duma nibeʼe Yesu. (1 Fet. 2:21) Fatua lö möi ia ba gulidanö, auri Yesu ba zorugo ba oya niʼilania sanandrösa khö Zatana hegöi malaʼika si lö sökhi. Hizaʼi, lö ihaogö wodunö-dunö sanandrösa ba nifalua ndra malaʼika si lö sökhi andrö. Omasi Yesu ba wamahaʼö niha sanandrösa khö Yehowa tenga Satana. Tola taʼoʼö duma-duma nibeʼe  Yesu na lö tadunö-dunö nifalua mbekhu. Hizaʼi, moguna taforomaʼö moroi ba wehededa wa ’falawu dödöda fehede omasiö’ yaʼia daʼö sindruhu.​—Zin. 45:1.

14-15. (a) Hadia mbörö wa lö moguna ataʼu ita khö ndra malaʼika si lö sökhi? (b) Hadia dandra sangoromaʼö wa irorogö nono mbanuania iadaʼa Yehowa?

¹⁴ Böi ataʼufi malaʼika si lö sökhi. Ba gulidanö iadaʼa, tola manö alua khöda zi lö sökhi. Tola manö lö tadöna-döna göna ita deʼala, fökhö, hegöi faʼamate. Hizaʼi, böi so ba wangera-ngerada wa börö malaʼika si lö sökhi waʼalua khöda daʼö. Itutunö Sura Niʼamoniʼö wa ”no hasambua ginötö ba no hasara zi göna ira fefu”, daʼa tola alua gofu haʼökhö manö. (Zango. 9:11) Aefa daʼö, no iforomaʼö Yehowa wa abölö nasa ia moroi khö malaʼika si lö sökhi. Duma-dumania, lö itehegö Lowalangi khö Zatana ba wamunu Yobi. (Yob. 2:6) Me götö Moze, iforomaʼö Yehowa wa abölö ia nasa moroi ba niha Miserai samalua fakelemusa. (2 Moz. 8:18; 9:11) Me ba zorugo, ibeʼe Yehowa kuaso khö Yesu ba waniboʼö Satana hegöi malaʼika si lö sökhi si tou ba gulidanö. Ba zi lö ara tö, tetiboʼö ira ba mbaho sabakha ba tebai saʼae dania lafakao niha ba daʼö.​—Fam. 12:9; 20:2, 3.

¹⁵ Oya dandra si no taʼila sangoromaʼö wa irorogö nono mbanuania Yehowa iadaʼa. Angeragö daʼa: Taturiaigö ba tafahaʼö zindruhu ba zi sagörö ulidanö. (Mat. 28:19, 20) Buania, taforomaʼö hadia nifalua Gafökha. Na sindruhu so waʼabölö khö Zatana, tatu ibatogö halöwö nifaluada, hizaʼi tebai ifalua daʼö. Daʼö mbörö wa lö moguna ataʼu ita khö ndra malaʼika si lö sökhi. Aboto ba dödöda wa ”ihörö-hörögö sa gulidanö maʼasagörö Yehowa, enaʼö iʼabölögö wanolo si no adölö tödö khönia”. (2 Nga. 16:9) Na lö faröi ita khö Yehowa, tebai ifaʼala ita bekhu sagötö faʼara.

16-17. Beʼe sambua duma-duma wa moguna so waʼabarani ba wolawa malaʼika si lö sökhi.

¹⁶ Moguna so waʼabarani ba wolawa malaʼika si lö sökhi, mendrua manö na so nawöda mazui si fahatö khöda sanandrawaisi yaʼita hewaʼae sökhi gohitö dödöra. Tola  manö ataʼu ira na alua khöda zi lö sökhi. Hizaʼi, na lö tebulö so khöda waʼabarani hewaʼae na latandrawaisi ita, hasambalö ifahowuʼö ita Yehowa. Nehegö duma-duma dalifusöda ira alawe sotöi Erica si toröi ba Ghana. Me ifahaʼö ia ba Zura Niʼamoniʼö, 21 fakhe ndröfinia. Börö me samaʼeleʼö bapania, laʼandrö khönia enaʼö iʼoʼö zi toʼölö mufalua soʼamakhaita ba wakelemusa. Duma-dumania ba wemanga nagole si no mubeʼe tobali sumange khö ndra tuara si no mate. Me itimbagö daʼö Erica, lawaʼö ira ösi nomonia wa lö ba dödönia ndra tuara si no mate. Faduhu dödö nösi nomonia wa hasambalö ihuku ira faoma fökhö wangera-ngera hegöi fökhö salua ba mboto.

¹⁷ Lö aetu lafaso ia ira ösi nomonia ba wamalua si toʼölö mufalua andrö. Hizaʼi, lö awuwu Erica hewaʼae na lua-luania aheta ia moroi ba nomo. So ösa Zamaduhuʼö sanemaʼö Erica ba nomora. Ba zalua andre, ifahowuʼö Erica Yehowa faoma nösi nomo si bohou, yaʼia daʼö ira talifusö si sara lala ba wamati simane ösi nomonia samösa. (Mrk. 10:29, 30) Hewaʼae ba wamaigi nösi nomo Erica wa tenga saʼae ösi nomora ia ba latunu gama-gama niʼokhögönia, hizaʼi lö faröi Erica khö Yehowa, ibayagö ia idanö ba iadaʼa tobali ia perintis biasa. Lö ataʼu ia ba mbekhu. Imane Erica sanandrösa ba nösi nomonia, ”Mangandrödo ero maʼökhö enaʼö larasoi ira ösi nomogu waʼomuso dödö na aboto ba dödöra Yehowa ba lasöndra wangefa börö wamosumange Lowalangi sebua faʼomasi.”

18. Hadia howu-howu nitemada börö me tafaduhusi tödö Yehowa?

¹⁸ Lö fefu ita göna fanandraigö wamati sabölö-bölö. Hewaʼae simanö, fefu ita moguna talawa malaʼika si lö sökhi ba tafaduhusi tödö Yehowa. Na tafalua daʼö, oya howu-howu nitemada ba tola tatimbagö walimosa nifalua Zatana. Aefa daʼö, böi awuwu ita ba wamosumange Yehowa ha börö waʼataʼuda ba malaʼika si lö sökhi. Sabölö moguna yaʼia daʼö itugu aro wahuwusada khö Yehowa. Simane nisura zinenge sotöi Yakobo, ”Miʼangalulu khö Lowalangi, milawa Gafökha ba iröi ami. Miʼondrasi Lowalangi ba iʼondrasi ami.”​—Yak. 4:7, 8.