SI TOʼÖLÖNIA me götö Waulo, lö hadöi göfa nasi solohe niha. Na omasi zi samösa niha ba wanörö göfa nasi, moguna iʼila hadia so göfa barang sofanö ba nahia si möi yaʼia ba omasi laʼohe niha. (Hal. 21:2, 3) Hewaʼae lö möi göfa ba nahia si möi yaʼia, tola itörö göfa daʼö, hizaʼi tola möi ia tou ba pelabuhan ba zi tebato göfa andrö. Ba daʼö dania ifuli itörö göfa tanö böʼö si numalö ba nahia si möi yaʼia.​—Hal. 27:1-6.

Si toʼölönia mofanö göfa ba mbaŵa si no mutatugöi, hizaʼi lö nitatugöi hawaʼara wofanö göfa andrö. Niha solohe göfa tola tetaha wofanöra na laʼila ambö baga cuaca mazui börö hadia zi no lafaduhusi tödö niha me föna. Duma-dumania, na laʼila gadudula göfa ba mbewe nasi mazui larongo li wofo gaga sanuge ba tali loyo, faduhu dödöra wa daʼö zi tobali tandra alua zi lö baga. Laʼodaligö göi nangi ira solohe köfa. Andrö si toʼölönia labaloi nangi si baga awena wofanö göfa. Na no isöndra zi samösa niha göfa solohe yaʼia, awena möi ia ba pelabuhan ba iʼohe gama-gamania, ba ibaloi gangombakhata wa ba zi lö ara tö mofanö göfa.

Imane sejarawan Lionel Casson, ”Ba Roma lö moguna ba niha larörö ira ba pelabuhan ba wangalui köfa. Ba luaha Nungo Nidanö Tiber ba daʼö so pelabuhannia. Lö aröu moroi ba daʼö, so kota Ostia, ba daʼö so danö sebolo hizaʼi ba zi fasuinia oya gödo. Soyania yaʼia daʼö, gödo perusahaan kargo moroi ba ngawalö pelabuhan, duma-dumania moroi ba Narbonne [töi ba li Prancis me luo daʼö], Kartago [töi ba li Tunisia me luo daʼö], . . . ba tanö böʼönia. Niha somasi manörö köfa daʼö, moguna isofu hadia so göfa sofanö ba nahia si möi yaʼia.”

Na latörö göfa tola alio larugi, hizaʼi ebua deʼalania. Me mofanö Waulo tobali utusan injil, no hauga kali ahöndrö göfa nitörönia.​—2 Kor. 11:25.