1. Hadia zinangea lafalua fefu ono mbanua Lowalangi, ba hadia mbörö? (Faigi gambara ba guli majalah.)

NO IBEʼE Yesu Keriso goroisa ba zoloʼö khönia imane, ”Miʼae mibaliʼö nifahaʼögu fefu niha moroi ba ngawalö soi.” (Mat. 28:19) Fefu nono mbanua Lowalangi si lö faröi omasi lafahaʼö ira hewisa lala enaʼö ’moʼahonoa wamalua halöwö’ fanuriaigö börö me no tebeʼe khöra halöwö andre. (2 Tim. 4:5) Mendrua manö abölö moguna ba mangaösö halöwö daʼa moroi ba halöwö tanö böʼö. Hizaʼi, tola manö so zi tobali daha-tahada hewaʼae omasi ita oya tabeʼe ginötöda ba halöwö andre.

2. Hadia zi tobali daha-tahada irege lö moʼahonoa wamaluada halöwö fanuriaigö?

² So halöwö tanö böʼö si lö tola löʼö tabeʼe ginötöda hegöi faʼabölöda. Mohalöwö ita ba wombönökhi soguna khöda samösa hegöi ösi nomoda irege ahori ginötöda ba zi maʼö-maʼökhö. Tola manö so zi tobali noro dödöda ba nomo, mofökhö ita, fawuka wangera-ngerada mazui mofökhö-fökhö manö ita börö me no atua. Hewisa enaʼö moʼahonoa wamaluada halöwö fanuriaigö hewaʼae na alua khöda zimane daʼö?

3. Hadia rahu-rahu si tola tahalö moroi ba wehede Yesu ba Mataiʼo 13:23?

³ Böi ide-ide dödöda na ha maʼifu ginötö nibeʼeda khö Yehowa börö zalua khöda andrö. Aboto ba dödö Yesu wa faböʼö-böʼö mbua nibeʼeda ba Wamatörönia. (Baso Mataiʼo 13:23.) Iʼandrö sibai saohagölö khöda Yehowa börö me no tabeʼe khönia fefu zabölö sökhi soroi ba dödö. (Heb. 6:10-12) Aefa daʼö, tola manö tarasoi wa oya zi tola tafalua nasa. Ba wamahaʼö daʼa, datafaigi hewisa lala enaʼö tabaliʼö halöwö fanuriaigö  zabölö oföna ba waʼaurida, taʼöna-önaiʼö waʼaurida ba tadouʼö waʼatua-tuada ba wanuriaigö hegöi faʼaboto ba dödö. Si oföna, hadia geluahania moʼahonoa ita wamalua halöwö fanuriaigö?

4. Hadia geluahania moʼahonoa wamaluada halöwö fanuriaigö?

⁴ Moʼahonoa wamaluada halöwö fanuriaigö, eluahania moguna möi ita manuriaigö ba tafahaʼö niha ndrege zi tola tafalua. Hizaʼi, lö ibönö na ha tabeʼe ginötöda, moguna göi khö Yehowa gohitö dödöda weʼamöi manuriaigö. Börö me taʼomasiʼö Yehowa hegöi awöda niha, famaluada halöwö khö Yehowa enaʼö soroi ba dödö. * (Mrk. 12:30, 31; Kol. 3:23) Famosumange Lowalangi soroi ba dödö eluahania, talulu waʼaurida khönia, taʼogunaʼö waʼabölöda ba wameʼe sabölö sökhi khönia. Na aboto ba dödöda wa halöwö fanuriagö no sambua töi sebua khöda, hasambalö tafalua zabölö sökhi ba wamaʼema turia somuso dödö ba niha sato ndrege zi tola tafalua.

5-6. Beʼe duma-duma hewisa zi samösa niha ba wangofönaiʼö halöwö fanuriaigö ba waʼaurinia hewaʼae ha maʼifu ginötö niʼogunaʼönia.

⁵ Khalaigö samösa nono matua, omasi sibai ia famai gitar. Omuso sibai dödönia famai musik gofu hezoso so ia. Halöwönia yaʼia daʼö, famai gitar ba nahia wemanga ba luo Satu hegöi Migu ba mbanuania. Hewaʼae simanö, lö ibönö gazi nitemania famai gitar. Andrö mohalöwö ia ba toko iʼotarai ngaluo Sinaya irugi Zumaha. Hewaʼae ihorigö ginötönia wohalöwö ba toko, hizaʼi toröi-röi nasa ba dödönia musik. Omasi sibai idouʼö waʼatua-tuania hegöi ba wangohorigö inötönia famai musik. Andrö ero so ginötönia ilau famai musik.

⁶ Simanö göi ita, tola manö lö oya ginötö si tola tabeʼe ba weʼamöi manuriaigö, hewaʼae omasi ita wamalua fanuriaigö. Moguna taforege wangalui niha somasi wamondrongo turia somuso dödö. Börö me oya zi tobali noro dödöda, tola manö manofu-nofu ita hewisa lalada ba wangofönaiʼö halöwö fanuriagö ba waʼaurida.

7-8. Hewisa lalada ba woloʼö Yesu ba wanuriaigö?

⁷ No ibeʼe Yesu duma-duma moroi ba nifaluania ba wangofönaiʼö halöwö fanuriaigö. Iʼosambuaʼö waʼaurinia ba wanutunö sanandrösa ba Wamatörö Lowalangi. (Yoh. 4:34, 35) Mowaö-waö ia ngaotu kilometer ba wanuriaigö ba niha sato. Ero so ginötö, ilau fahuhuo ba nahia sato niha hegöi ba nomora. Fefu nifalua Yesu moʼamakhaita daʼö ba wotuhini halöwö fanuriaigö.

⁸ Tola taʼoʼö duma-duma Keriso, ero so ginötö taʼogunaʼö ia ba wanutunö turia somuso dödö gofu hezoso so ita. Moguna tatehegö waʼasana dödöda ba wamalua halöwö fanuriaigö. (Mrk. 6:31-34; 1 Fet. 2:21) So ösa ba mbanua niha Keriso zi tobali perintis istimewa, perintis biasa mazui perintis ekstra. Tanö böʼönia, lafahaʼö ira ba li tanö böʼö mazui möi ira ba mbanua sabölö oya muʼogunaʼö sanuriaigö. Hewaʼae simanö, samalua halöwö andre soyania yaʼia daʼö ira sanuriaigö si toʼölö si no mameʼe sabölö sökhi. Gofu hadia zalua, he oya mazui ha maʼifu zi tola tafalua ba wanuriaigö, lö irai iʼandrö khöda Yehowa zi töra moroi ba waʼabölöda. Omasi ia enaʼö omuso dödöda fefu ba wamalua halöwö niʼamoniʼö andrö, yaʼia daʼö ba wamaʼema ’turia somuso dödö andrö solakhömi moroi khö Lowalangi somuso tödö’.​—1 Tim. 1:11; 5 Moz. 30:11.

9. (a) Hewisa Waulo ba wangofönaiʼönia halöwö fanuriaigö hewaʼae mohalöwö ia ba wombönökhi soguna khönia? (b) Moloʼö Halöwö Zinenge 28:16, 30, 31, hewisa Waulo ba halöwö fanuriaigö?

⁹ No ibeʼe duma-duma si sökhi Faulo ba wangofönaiʼö halöwö fanuriaigö ba waʼaurinia. Me möi ia ba Gorindro tobali utusan injil si mendrua kali, no ide-ide gefe niʼokhögönia ba mohalöwö ia ba wamazökhi tendra. Hewaʼae simanö, lö ba dödö Waulo wa halöwö famazökhi tendra zabölö moguna. Ifalua halöwö daʼa ba wotuhini halöwö fanuriaigö, yaʼia daʼö ba wamaʼema turia somuso dödö ba niha Gorindro hewaʼae lö ’böli gölönia’ khöra. (2 Kor. 11:7) Hewaʼae mohalöwö Waulo ba wangalui soguna khönia, lö tebulö ia ba wangofönaiʼö halöwönia khö Yehowa ba ero luo Sabato ilau manuriaigö. Aefa daʼö na lö saʼae mohalöwö ia, iʼosambuaʼö dödönia ba halöwö fanuriaigö. ”Ibörögö oya ibeʼe ginötönia Faulo ba wanuriaigö taromali. Ifaduhuʼö ba niha Yahudi wa Yesu andrö Keriso.” (Hal. 18:3-5; 2 Kor. 11:9) Ba gafuriata, me lakuru Waulo ba nomonia ba Roma ba zi dua fakhe, ilau manuriaigö ba zangondrasi yaʼia ba isura zura. (Baso Halöwö Zinenge 28:16, 30, 31.) Ihalö gangetula Faulo wa gofu hadia zalua, lö itehegö mangoloi dödönia ba halöwö nibeʼe Lowalangi. Imane, ”Börö me no matema halöwö moroi khö Lowalangi . . . , andrö wa lö awuwu ndraʼaga.” (2 Kor. 4:1) Simane Faulo, hewaʼae mohalöwö ita ba wombönökhi soguna khöda, tola taʼofönaiʼö halöwö nibeʼe Lowalangi ba waʼaurida.

10-11. Hewisa enaʼö moʼahonoa wamaluada halöwö fanuriaigö hewaʼae na mofökhö ita?

¹⁰ Na tebai manuriaigö ita ba nomo-omo misa simane waʼoya nifaluada ba zilalö börö me no atua ita mazui ambö waʼabölöda, tola taʼogunaʼö lala tanö böʼö weʼamöi manuriaigö. Niha Keriso ba abad siföföna manuriaigö ira ba niha si so ba zi fasuira. Lahaogö laʼogunaʼö ginötö si so ba wanutunö sanandrösa ba zindruhu, simane ba nomo-omo, ba nahia sato niha hegöi si lö resmi, möi ira ba ’wamalukhaisi niha si so ba daʼö’. (Hal. 17:17; 20:20) Na tebai aröu döröwada, tola modadao ita ba nahia sato niha, ba manuriaigö ita khöra. Mazui talau manuriaigö si lö resmi, tasura zura mazui tatelefo ira. Ato zanuriaigö somuso tödö ba wangogunaʼö lala wanuriaigö andre hewaʼae lö oya ginötö nibeʼera ba wanuriaigö  ba nomo-omo börö wökhö mazui börö gabula dödöra tanö böʼö.

¹¹ Hewaʼae ambö faʼabölöu, tola moʼahonoa wamaluau halöwö fanuriaigö. Angeragö nasa duma-duma zinenge sotöi Faulo. Imane, ”Tola utaögö fefu hadia ia börö waʼabölö nitemagu moroi khö Lowalangi.” (Fil. 4:13) Moguna khö Waulo waʼabölö börö me mofökhö ia ba ginötö ifalua halöwö utusan injil. Itutunö ba niha Galatia, ”Börö wökhögu, andrö wa so ginötögu wanuriaigö turia somuso dödö khömi me awena falukha ita.” (Gal. 4:13) Simanö göi ndraʼugö, hewaʼae na mofökhö ndraʼugö tola öʼogunaʼö ginötö si so ba wanutunö turia somuso dödö ba niha böʼö, simane khö doto, perawat hegöi ba niha sondrorogö yaʼugö. Ato moroi ba gotalua zohalöwö andre tebai tafalukhaisi ba wanuriaigö ba nomo-omo börö me mohalöwö ira.

12. Hadia geluahania ”öʼosambalöʼö” höröu?

¹² Imane Yesu, ”Haga mboto hörö. Na öʼosambalöʼö [mazui ”öna-öna”, nis.] höröu, mohaga mbotou maʼasambua.” (Mat. 6:22) Hadia geluaha niwaʼönia? Iwaʼö wa moguna khöda enaʼö lö tebulö taʼöna-önaiʼö waʼaurida mazui taʼosambuaʼö gohitö dödöda ba zi sambua ngawalö, böi so khöda waʼaombö dödö mazui mangoloi dödöda. Yesu samösa no ibeʼe duma-duma ba wangofönaiʼö halöwö fanuriaigö ba waʼaurinia, ba ifahaʼö ndra nifahaʼönia enaʼö laʼosambuaʼö dödöra ba wangai halöwö khö Yehowa hegöi ba Wamatörönia. Na taʼoʼö duma-duma Yesu  yaʼia daʼö taʼofönaiʼö halöwö fanuriaigö ba waʼaurida, no ’taʼofönaiʼö wangalui Famatörö Lowalangi awö waʼatulönia’.​—Mat. 6:33.

13. Hadia zanolo yaʼita enaʼö tola teʼosambuaʼö dödöda ba wanuriaigö?

¹³ Sambua lala nifaluada enaʼö teʼosambuaʼö dödöda ba wanuriaigö, yaʼia daʼö taʼöna-önaiʼö waʼaurida irege oya ginötö niʼogunaʼöda ba wanolo niha böʼö, enaʼö aboto ba dödöra Yehowa ba laʼomasiʼö ia. * Duma-dumania, hadia tola tafaudugö ginötö wohalöwöda ba wangalui soguna irege oya ginötö nibeʼeda ba wanuriaigö ba zi samigu? Hadia tola taʼalösi ginötöda ba wanörö-nörö?

14. Hadia nifalua zi sambua fongambatö enaʼö oya ginötö nibeʼera ba wanuriaigö?

¹⁴ Daʼa nifalua samösa zatua sokubaloi sotöi Elias hegöi foʼomonia. Imane Elias, ”Me luo daʼö tebai merintis ndraʼaga, hizaʼi moguna so nifaluama enaʼö tola oya ginötö nibeʼema ba wanuriaigö. Börö daʼö moguna maforege ba wondrouʼö ginötöma ba wanuriaigö. Duma-dumania, mabörögö maʼalösi wangogunaʼö kefe hegöi ba wanörö-nörö. Ba maʼandrö khö gafaloma enaʼö ibulöʼö ginötö wohalöwöma irege oya ginötö si tola maʼogunaʼö ba wanuriaigö. Buania, tola manuriaigö ndraʼaga ba zi tanö owi, itugu oya niha nifahaʼöma ba Zura Niʼamoniʼö, ba zi sara waŵa tola dua kali faoga manuriaigö barö migu. Omuso sibai dödöma!”

15-16. Moloʼö 1 Timoteo 4:13, 15, hewisa enaʼö tedou waʼatua-tuada ba wanuriaigo? (Faigi kotak ” Ohitö Dödö Zanolo Yaʼo Enaʼö Moʼahonoa Wamaluagu Halöwö Fanuriaigö”.)

¹⁵ Lala tanö böʼö enaʼö moʼahonoa wamaluada halöwö fanuriaigö, yaʼia daʼö tadouʼö waʼatua-tuada ba wanuriaigö. Niha somasi  onekhe ba halöwönia, moguna itema wamomaha hegöi faʼaboto ba dödö enaʼö tedou waʼatua-tuania ba onekhe ia. Simane daʼö göi niha sanuriaigö Famatörö Lowalangi. Moguna enaʼö lö tebulö tadouʼö waʼatua-tuada ba wanuriaigö.​—Gamd. 1:5; baso 1 Timoteo 4:13, 15.

¹⁶ Hewisa enaʼö tedou ita ba wanuriaigö? Haogö wamondrondrongo wanuturu lala nibeʼe ba ginötö mufalua Waö-Waö Halöwö ba Gangowuloa Faʼauri ba Fanuriaigö barö migu. Ba gangowuloa daʼa, labeʼe khöda wamomaha enaʼö itugu atua-tua ita ba wanuriaigö. Moguna tafondrondrongo mene-mene nibeʼe zondröniaʼö khö zangai sekola enaʼö itugu atua-tua ita ba wanuriaigö. Ba taʼogunaʼö daʼö ba wamaʼema turia somuso dödö. Tola manofu ita khö pengawas kelompok dinasda mazui falulu fohalöwö ita khönia ba wanuriaigö, mazui fao ita manuriaigö khö ndra talifusöda tanö böʼö si no toʼölö simane perintis mazui satua samasui. Tola itugu atua-tua ita na taʼogunaʼö fefu wakake si so ba Fakake Niʼogunaʼöda ba Wamahaʼö, ba itugu omuso dödöda ba wanuriaigö hegöi ba wamahaʼö.

17. Hadia zi no öforomaʼö na moʼahonoa wamaluau halöwö fanuriaigö?

¹⁷ No töi sebua khöda me itehegö khöda Yehowa ”falulu fohalöwö” khönia! (1 Kor. 3:9) Ba ginötö ’ötatugöi hadia zabölö moguna’ ba öʼosambuaʼö dödöu ba halöwö nibeʼe Yehowa, tola ’aoha gölöu weʼamöi enoni Yehowa’. (Fil. 1:10; Zin. 100:2) Börö me sangai halöwö khö Lowalangi ndraʼugö, tola faduhu dödöu wa hasambalö ibeʼe khöu waʼabölö enaʼö moʼahonoa wamaluau halöwö fanuriaigö gofu hadia daha-taha mazui abula dödö nitaögöu. (2 Kor. 4:1, 7; 6:4) Hewaʼae na ide-ide mazui oya nibeʼeu ba wanuriaigö, tola ’omuso dödöu ba nifaluau’ börö me soroi ba dödöu wamalua halöwö fanuriaigö. (Gal. 6:4) Ba ginötö moʼahonoa wamaluau halöwö fanuriaigö, no öforomaʼö wa öʼomasiʼö Yehowa hegöi nawöu niha. ”Böi böhöli wamalua daʼa börö me teʼorifi ndraʼugö awö zamondrongo yaʼugö.”​—1 Tim. 4:16.