Talifusöma Winston, tutunö khöma hewisa ndraʼugö ba wangalui Lowalangi.

Teʼebuaʼö ndraʼo ba nösi nomo si lö mamati. Toröi nösi nomoma ba sambua peternakan ba Queensland, Australia. Ba nahia saröu si lö niha-niha. Lö asese falukhado ba niha, baero nösi nomogu. Me 12 fakhe ndröfigu, ibörögö uʼalui Lowalangi. Mangandrö ndraʼo khö Lowalangi enaʼö aboto ba dödögu sanandrösa khönia. Uröi peternakan ba mohalöwödo ba Adelaide, Australia Selatan. Me 21 fakhe ndröfigu, ulau manörö-nörö ba Sydney. Ba daʼö falukhado khö Pam, ba itutunö khögu sambua ngawawa agama Inggris-Israel. Faduhu dödö ngawawa andre wa niha Inggris ngaʼötö moroi ba mado Gizaraʼeli si no taya. Lawaʼö wa mado andrö yaʼia daʼö si fulu mado moroi ba wamatörö tanö yöu niʼoloiʼö me abad si walu SM. Andrö me mangawulido ba Adelaide, ututunö khö nawögu wohalöwö si no mamahaʼö yaʼia ba Zura Niʼamoniʼö khö ndra Samaduhuʼö Yehowa. Matutunö daʼö mato hauga za ba matutunö göi sanandrösa ba nifaduhusi tödö ndra Samaduhuʼö Yehowa. Hizaʼi, iʼanemaiʼö aboto ba dödögu wa no tebeʼe wanema li moroi ba wangandrö nifaʼemagu me iraono. Ibörögö uʼila zindruhu sanandrösa khö Zomböi hegöi Famatörönia! No usöndra ”mutiara si sökhi”.​—Mat. 13:45, 46.

Talifusöma Pam, iʼotarai me awuyu-wuyu ndraʼugö no göi öʼalui mutiara. Hewisa wa tola ösöndra ia?

Teʼebuaʼö ndraʼo ba nösi nomo samati ba kota Coffs Harbour, New South Wales. Satuagu hegöi kake, nenegu lafaduhusi tödö wamahaʼö moroi ba ngawawa Inggris-Israel. Iʼotarai me ide-ide, yaʼo, akhigu ono matua, gaʼagu ira alawe hegöi ono dalifusö zatuagu, lafahaʼö ndraʼaga wa omasi Lowalangi ba ngaʼötö niha  Inggris. Hizaʼi lö fao dödögu ba wamahaʼö daʼö ba urasoi wa lö ahatö ndraʼo khö Lowalangi. Me 14 fakhe ndröfigu, möi ndraʼo ba gereja si so ba mbanua daʼö, simane Gereja Anglikan, Baptis hegöi Adven Hari Ketujuh. Hewaʼae simanö lö tebulö olofo ndraʼo ba wamati.

Ba gafuriata, findra nösi nomogu ba Sydney. Ba daʼö falukha ndraʼo khö Winston si möi manörö-nörö. Simane nitutunönia mege, börö me matutunö sanandrösa ba agama, ba gafuriata ifahaʼö ia khö ndra Samaduhuʼö. Aefa daʼö, na ikirim zura hasambalö oya ayati nisurania! Sindruhunia, ba wamobörö aombö dödögu ba asala khögu. Hizaʼi arara manö, ibörögö aboto ba dödögu wa nisurania andrö yaʼia daʼö sindruhu.

Me 1962, findra ndraʼo ba Adelaide enaʼö itugu ahatö ndraʼo khö Winston. Iʼalui lala enaʼö toröi ndraʼo ba zi sambua fongambatö Samaduhuʼö sotöi Thomas hegöi Janice Sloman si no irai tobali utusan injil ba Papua Nugini. Baga sibai gamuatara khögu. Awena 18 fakhe ndröfigu ba latolo sibai ndraʼo ba wamati. Ibörögö ufahaʼö ndraʼo ba Daromali Lowalangi. Lö ara aefa daʼö, faduhu dödögu wa no usöndra zindruhu. Lö ara me no mangowaluga Winston, ibörögö mahalö halöwö safönu inötö. Oya sibai howu-howu nitemama börö wangai halöwö khö Yehowa. Hewaʼae oya zi tobali abula dödöma, halöwö nifaluama zanolo yaʼaga ba wangandrö saohagölö börö me no masöndra ”mutiara si sökhi”.

Talifusöma Winston, tutunö khöma me awena öhalö halöwö khö Yehowa.

Lö ara me no mangowaluga Pam, ibörögö ’ibokai mbawandruhö sebua’ khöma Yehowa enaʼö oya mahalö halöwö khönia. (1 Kor. 16:9) Bawandruhö si oföna tohare moroi ba mbanua niha Keriso side-ide si farahu ndraʼaga, me möi zatua samasui sotöi Jack Porter. (Iadaʼa faoma mohalöwö ndraʼaga tobali anggota Panitia Cabang Australasia.) Jack hegöi foʼomonia Roslyn, lafarou dödöma enaʼö tobali perintis biasa. Merintis ndraʼaga ba zi lima fakhe. Aefa daʼö me 29 fakhe ndröfigu, laʼandrö khögu tobali satua samasui ba Kepulauan Pasifik Selatan, me luo daʼö gödo ndraha Fiji zamaigi-maigi mbanua andrö. Si tefarahu ba kepulauan andrö, yaʼia daʼö Kiribati, Nauru, Niue, Samoa Amerika ba Samoa, Tokelau, Tonga, Tuvalu hegöi Vanuatu.

Me luo daʼö, ba zi hauga hulo side-ide, manahö-nahö dödö niha khö ndra Samaduhuʼö Yehowa, andrö mahaogö maʼangenanöi ndraʼaga ba maʼatua-tuaʼö ndraʼaga ba zalua andrö. (Mat. 10:16) No ide-ide mbanua niha Keriso si so ba daʼö ba so ösa moroi ba mbanua niha Keriso andrö si lö mangaʼasogö nahia wemörö. Tobali, maʼalui samösa nahia wemöröma ba nomo niha si so ba daʼö, ba baga sibai gamuatara khöma.

Talifusöma Winston, adöni sibai dödömö ba wamoʼeluaha. Hana wa tola adöni dödöu?

Me mabörögö wangai halöwö ba hulo Tonga, ha maʼifu risalah hegöi buku side-ide niʼokhögö ndra talifusöda ba li Tonga, yaʼia daʼö sambua moroi ba li si so ba Polinesia. Ba wanolo niha ba wamahaʼö yaʼira ba Zura Niʼamoniʼö, laʼogunaʼö mbuku Kebenaran yang Membimbing kepada Hidup yang Kekal ba li Inggris. Andrö me tefalua zekola khö ndra satua sokubaloi ba zi öfa migu, so datölu zatua sokubaloi moroi ba mbanua andrö zomasi mamoʼeluaha mbuku Kebenaran ba li Tonga hewaʼae ambö laʼila li Inggris. Pam zoketik hadia zi no lafoʼeluaha, aefa daʼö makirim daʼö ba gödo ndraha Amerika Serikat enaʼö mucetak. Arakhagö walu migu awai proyek daʼa. Hewaʼae ambö baga wamoʼeluahara, ato niha sangogunaʼö li Tonga zangila zindruhu börö mbuku andrö. Yaʼo hegöi Pam tenga niha samoʼeluaha, hizaʼi börö zalua andrö adöni dödöma ba wamoʼeluaha.

Talifusöma Pam, hadia faböʼö rasonia me toröiʼö ba hulo faoma ba Australia?

Faböʼö sibai rasonia! Ba zi hauga nahia, aukhu sibai nanginia ba monamo, ba oya sibai ndri hegöi teʼu. Aefa daʼö, asese mofökhöga ba ambö mbalazoma. Hewaʼae simanö, ero  bongi tola mafaigi-faigi nasi moroi ba fale, töi nomo hada Polinesia ba li Samoa ba sagönia moroi ba döla wakhe, ba lö hadöi dowa nomo andrö. Itaria na mohaga mbaŵa, tola maʼila lumö-lumö mbaŵa moroi ba nasi hegöi lumö-lumö hogu nohi. Na mafaigi daʼö tola taya wa erege dödöma. Daʼö göi zanolo yaʼaga ba woʼangerönusi hegöi mangandrö. Ba itugu maʼosambuaʼö wangera-ngerama ba zi sökhi tenga ba zi lö baga.

Omasi sibai ndraʼaga ndraono si so ba daʼö. Maʼiki-iki ira ba ahöli-höli dödöra me laʼila niha safusi uli simane yaʼaga. Me möi ndraʼaga ba Niue, so samösa ndraono somasi-masi mamaigi danga Winston ba imane, ”Waʼomasigu wamaigi mbu dangamö.” Lö irai iʼila zimane daʼö, börö me atabö sibai mbu dangania!

Abu dödöma me maʼila wa numana sibai niha si so ba daʼö. No baga-baga nahia zi fasuira, hizaʼi moʼamböta ira sanandrösa ba kesehatan hegöi ba göra idanö. Hewaʼae simanö, lö irai aombö dödö ndra talifusöda börö me no toʼölö ira ba zimanö. Lö tebulö waʼomuso dödöra asala so nösi nomora, laʼokhögö naha wamosumange ba tola lasuno Yehowa. Duma-dumara zanolo yaʼaga enaʼö lö tebulö maʼosambuaʼö wangera-ngerama ba zabölö moguna hegöi ba woʼönai-önaiʼö faʼaurima.

Talifusöma Pam, itaria ötaʼu samösa nidanö ba öfaʼanö gö hewaʼae faböʼö sibai ba zi toʼölö öfalua ba zilalö. Hewisa wa tola öfalua daʼö?

Uʼandrö sibai saohagölö khö bapagu börö me no irai ifahaʼö ndraʼo simane ba wamewuaʼö alitö enaʼö tola mondrino, hegöi tola auri hewaʼae na moʼambö-amböta. Samuza inötö me möi ndraʼaga ba Kiribati, toröi ndraʼaga ba nomo side-ide. Sagönia moroi ba döla wakhe, towania moroi ba lewuö ba salonia moroi ba gara nasi sigide-ide hegöi moroi ba gawu. Enaʼö tola ulau mondrino, ukhao zalo aefa daʼö uʼogunaʼö zawu mbanio ba wamewuaʼö alitö. Na utaʼu nidanö, fao ndraʼo ba ndra alawe si so ba mbanua andrö ba mafalali-lali ndraʼaga ba wanaʼu idanö. Ba wanaʼu idanö, laʼogunaʼö geu faʼanaunia arakhagö dua meter ba no laböbö faoma tali sise-ise mbalönia simane tali gai. Hizaʼi ba mbalö tali daʼö, no lafasa kale-kale tenga mata gai. Lafalali-lali ira ba wamazaumba tali ba mbaʼa ba lafaliwa mbagi mbölökhara ba ginötö si tefaudu. Ba tefarigawa kale-kale andrö ba tefoʼösi nidanö. Aoha sibai ba dödögu wamalua daʼö. Hizaʼi me utandraigö, abua wamalua yaʼia. Hauga kali ufazibo tali hizaʼi lö irai möi bakha ba kale-kale andrö nidanö! Maʼigi ira khögu, so samösa ndra alawe somasi manolo yaʼo. Lö tebulö ira ba wanolo yaʼö ba baga sibai gamuatara.

Tatu omuso dödömi ba halöwö nitemami si so ba hulo. Hadia tola mitutunö ösa zi no irai alua si tebai miʼolifugö?

Winston: Moguna khöma ginötö enaʼö aboto ba dödöma ba zi toʼölö lafalua andrö. Duma-dumania, me lakaoni ndraʼaga ira talifusö wemanga ba nomora, si toʼölönia labeʼe baulu fefu gö niʼokhögöra. Ba wamobörö, lö maʼila wa moguna matenagö göra. Börö me lö maʼila, ahori maʼa fefu gö nibeʼera! Hizaʼi ba gafuriata me aboto ba dödöma ba zi toʼölö lafalua, lö tebulö ndraʼaga ba wotenagö göra. Aboto ba dödö ndra talifusö wa ambö maʼila ba zi toʼölö lafalua. Ba omuso dödöra ba ginötö sakali önö waŵa möi ndraʼaga wamalukhaisi yaʼira tobali satua samasui. Lö irai falukha ira khö ndra Samaduhuʼö tanö böʼö baero ndraʼaga.

Feʼamöima khöra tobali famaduhuʼö ba niha si so ba zi fasuira. Ato niha ba mbanua daʼö, si faduhu tödö wa nifasindro ndra talifusöda samösa agamara. Hizaʼi me laʼila ndraʼaga si otarai soi böʼö si möi ba wangondrasi ndra talifusö si so ba daʼö, lö saʼae manahö-nahö dödöra ba ahöli-höli dödöra.

Pam: Ba Kiribati, so sambua zalua si lö irai uʼolifugö. Ba daʼö, so sambua mbanua niha Keriso si lö atoto nihania. Ba ha samösa zatua sokubaloi, töinia Itinikai Matera. Iʼodödögö zoguna khöma. Samuza inötö, tohare ia ba iʼohe sambua karaza gadulo. Imane, ”Yae khömi.” Me luo daʼö, ha fataria tola maʼa gadulo.  Hewaʼae no ide-ide nifaluania, hizaʼi asöndru dödöma börö waʼoböwönia.

Talifusöma Pam, ba zi hauga fakhe aefa daʼö adudu nonomö ba dalu. Hewisa ndraʼugö ba wanaögö abula dödö andrö?

Me döfi 1973 manabina ndraʼo. Me luo daʼö toröi ndraʼo hegöi Winston ba Pasifik Selatan. Öfa waŵa aefa daʼö, adudu nonogu ba dalu. Abu sibai dödö Winston me mate nonoma. Itugu numalö ginötö, itugu alö waʼabu dödögu. Hizaʼi, sindruhu-ndruhu awena taya daʼö me utema Menara Pengawal 15 Mbaŵa si Öfa 2009. So wanofu ba artikel ”Pertanyaan Pembaca”: ”Apakah ada harapan kebangkitan bagi bayi yang meninggal dalam kandungan ibunya?” Ifaduhuʼö ba dödöma nösi artikel andrö, wa daʼö no angetula Yehowa ba wotatugöi satulö. Ifadöhö dania fefu zokhoma börö me lö sökhi waʼauri andre. Iʼoʼou dania göi Nononia ’ba wamakiko halöwö Zatana’. (1 Yoh. 3:8) Tobali fanolo göi khöma artikel andrö ba wangandrö saohagölö ba ”mutiara” si no maʼokhögö tobali ono mbanua Yehowa! Na lö hadöi fanötöna moroi ba Wamatörö Lowalangi, tatu tebai tataögö fefu gabula dödö salua khöda.

Me no mate nonoma, mafuli mahalö halöwö safönu inötö. Mato hauga waŵa mohalöwö ndraʼaga ba Mbetieli Australia, ba ifuli tobali satua samasui Winston. Me döfi 1981, me no öfa fakhe ndraʼaga mangai halöwö khö Yehowa ba mbanua side-ide ba New South Wales hegöi Sydney, lakaoni ndraʼaga mohalöwö ba gödo ndraha Australia, ba mufotöi ia gödo ndraha Australasia me luo daʼö. Mohalöwö ndraʼaga ba daʼö irugi maʼökhö.

Talifusöma Winston, hadia möi fanolomö me öhalö halöwö khö Yehowa ba Kepulauan Pasifik Selatan tobali anggota Panitia Cabang Australasia?

Tatu manö, oya mbuania khögu. Me föna, gödo ndraha Australia zamaigi-maigi Samoa Amerika hegöi Samoa. Ba gafuriata, laʼosambuaʼö gödo ndraha Selandia Baru faoma gödo ndraha Australia ba lafotöi ia gödo ndraha Australasia. Iadaʼa, wilayah nifaigi-faigi gödo ndraha andrö, yaʼia daʼö Australia, Kepulauan Cook, Niue, Samoa Amerika ba Samoa, Selandia Baru, Timor-Leste, Tokelau, hegöi Tonga. Tebeʼe khögu ginötö ba wosalahini gödo ndraha ba weʼamöi ba ngawalö hulo. Börö me no irai falulu fohalöwö ndraʼo khö ndra talifusö ba hulo andre, tola itugu sökhi ndraʼo ba wanolo ndra talifusö hewaʼae ba gödo ndraha mohalöwödo.

Si tobali rahu-rahunia, tola umane wa iʼotarai me föna, aboto ba dödögu hegöi Pam wa tenga ha niha satua zangalui Lowalangi. So göi zi bohou ebua sangalui ”mutiara si sökhi” hewaʼae lö adöni dödö nösi nomora. Duma-dumania yaʼo hegöi Pam. (2 Raz. 5:2, 3; 2 Nga. 34:1-3) Yehowa no Lowalangi sebua faʼomasi, omasi ia enaʼö fefu niha, satua ba sawuyu-wuyu lasöndra waʼauri si lö aetu!

Töra 50 fakhe silalö me maʼalui zindruhu, lö madöna-döna wa tola masöndra daʼa fefu. No ”mutiara si sökhi” zindruhu andrö”! Lö tebulö mahaogö magogohe mutiara andrö ba lö irai maʼefasi!