1-2. (a) Hewisa Zatana ba wolimo niha? (b) Hadia nitutunöda ba wamahaʼö daʼa?

SATANA no ”ama zofaya”, ilimo niha iʼotarai ba götö Gadamo ba Khawa. (Yoh. 8:44) Sambua moroi ba gotalua walimosania yaʼia daʼö famahaʼö sofaya sanandrösa ba niha si no mate hegöi faʼauri na no aefa mate niha. Oya zi toʼölö lafalua niha sato hegöi nifaduhusira tödö si teʼodane-dane ba wamahaʼö sofaya andre. Lua-luania, so ndra talifusöda ’lö mamalö larorogö wamatira’ ba ginötö so zi mate ba nösi nomora mazui ba mbanuara.​—Yud. 3.

² No aboto ba dödöu hadia niwaʼö Zura Niʼamoniʼö sanandrösa ba waʼamate. Na lafaso ndraʼugö wefao ba wamalua si toʼölö lafalua sanandrösa ba zi fasala, hadia nifaluau enaʼö lö faröi ndraʼugö? (Ef. 6:11) Hewisa ndraʼugö ba wondrara tödö hegöi ba wangabölöʼö talifusöda si sara lala ba wamati ba ginötö lafaso ira ba wamalua si lö tefaudu ba zomasi Lowalangi? Ba wamahaʼö daʼa, tatutunö dania wanuturu lala nibeʼe Yehowa ba wanolo yaʼita. Si oföna, datafaigi hadia niwaʼö Zura Niʼamoniʼö sanandrösa ba niha si no mate.

3. Hadia lua-lua moroi ba walimosa si oföna?

³ Lö omasi Lowalangi na mate niha. Hizaʼi, enaʼö tola auri niha sagötö faʼara, moguna laʼoʼö goroisa Yehowa. Ibeʼe goroisa khö Gadamo ba Khawa, ”Ba bua geu famotokhi ba dödö si sökhi ba si lö sökhi, ba lö tola öʼa; öʼa siʼaikö daʼö, ba mate ndraʼugö.” (1 Moz. 2:16, 17) Andrö ibörögö Zatana ba wameʼe abula dödö. Iʼogunaʼö gulö ba wahuhuosa khö Khawa ba imane, ”Maʼifu sa lö mate ami.” Faduhu dödönia ba walimosa andrö ba iʼa mbua geu. Ba gafuriata, ibeʼe göi mbua geu daʼö khö woʼomonia. (1 Moz. 3:4, 6) Daʼö mbörö, wa irugi ba niha horö ba faʼamate.​—Rom. 5:12.

4-5. Hewisa Zatana lö iböhöli ba wolimo niha?

 ⁴ Mate Gadamo ba Khawa simane si no iwaʼö Yehowa khöra. Hizaʼi, lö ibato Satana ba wolimo niha sanandrösa ba waʼamate. Ba gafuriata, ifaʼema zui walimosa tanö böʼö. Sambua moroi ba gotaluania yaʼia daʼö, ibeʼe wamahaʼö wa na mate niha auri nasa nosonia. Börö walimosa andre, no telimo niha sato irugi maʼökhö.​—1 Tim. 4:1.

⁵ Hadia mbörö waʼato niha si faduhu tödö ba walimosa Zatana? Börö me aboto ba dödö Zatana hewisa dödö niha sanandrösa ba waʼamate, iʼogunaʼö daʼö ba wolimo niha. Börö me tewöwöi ita enaʼö auri sagötö faʼara tatu lö omasi ita mate. (Zango. 3:11) Ba wamaigida faʼamate andrö no ududa.​—1 Kor. 15:26.

6-7. (a) Hadia mofozu Zatana ba wombiniʼö sindruhu sanandrösa ba waʼamate? Tutunö. (b) Hewisa wanolo Zura Niʼamoniʼö yaʼita enaʼö lö ataʼu ita ba waʼamate?

⁶ Lö tobini zindruhu sanandrösa ba waʼamate hewaʼae no iʼodödögö Zatana ba wolimo niha. Iadaʼa ato niha sangila ba samatunö hadia niwaʼö Zura Niʼamoniʼö sanandrösa ba zalua ba niha si no mate hegöi fanötöna ba niha si no mate. (Zango. 9:5, 10; Hal. 24:15) Tobali fondrara dödö khöda zindruhu andrö ba tobali fanolo enaʼö lö ataʼu ba lö aombö dödöda sanandrösa ba zalua ba niha si no mate. Duma-dumania, lö ataʼu ita ba niha si no mate, ba lö göi aombö dödöda wa alua zi lö sökhi ba niha niʼomasiʼöda si no mate. Aboto ba dödöda wa lö auri ira ba nahia tanö böʼö ba tebai lafakao niha böʼö. No amaedola zi mörö ira. (Yoh. 11:11-14) Aboto göi ba dödöda wa niha si no mate lö larasoi na numalö ginötö. Hewaʼae no ngaotu fakhe mate ira, ba na tesusugi ira dania hulö ha mamöʼi hörö khöra ginötö si no numalö andrö.

⁷ Tatu fao dödöu wa tebai muʼaohasi ba dödö zindruhu sanandrösa ba niha si no mate börö me alio muʼila geluaha, ba tola mufaduhusi tödö. Daʼa no aröu faböʼö moroi ba walimosa Zatana! Aefa daʼö, ifaelungu niha ba iböbögö zi lö duhu khö Zomböi yaʼita. Enaʼö itugu aboto ba dödöda hadia lua-lua nifalua Zatana, datatutunö wanofu andre: Hewisa walimosa Zatana ba wamöbögö si lö duhu khö Yehowa? Hewisa walimosa andrö iʼasogö ba dödö niha wa lö moguna faduhu dödöra sanandrösa ba höli nibeʼe Keriso? Hewisa walimosa daʼö möi fonönö wangabu dödö hegöi famakao ba niha?

8. Simane ba Yeremia 19:5, hewisa walimosa Zatana sanandrösa ba waʼamate möi famöbögö si lö duhu khö Yehowa?

⁸ Falimosa Zatana sanandrösa ba waʼamate tobali famöbögö si lö duhu khö Yehowa. Sambua moroi ba walimosania yaʼia daʼö wa niha si no mate tefakao ba galitö narako. Möi famöbögö si lö duhu khö Lowalangi wamahaʼö andre! Börö wamahaʼö daʼa, faduhu dödö niha wa Lowalangi sebua faʼomasi fagölö waʼalösökhinia khö Gafökha. (1 Yoh. 4:8) Hewisa dödöu sanandrösa ba daʼö? Ba hewisa göi dödö Yehowa? Tatu lö omuso dödönia börö me fatuwu ia ngawalö zi lö sökhi.​—Baso Yeremia 19:5.

9. Hadia lua-lua walimosa Zatana ba höli nibeʼe Keriso ba Yohane 3:16 hegöi 15:13?

⁹ Falimosa Zatana sanandrösa ba waʼamate andrö iʼasogö ba dödö niha wa lö moguna faduhu dödöra sanandrösa ba höli nibeʼe Keriso. (Mat. 20:28) Falimosa Zatana tanö böʼö yaʼia daʼö so ba niha noso si tebai mate. Na sindruhu daʼö, tatu tola auri niha sagötö faʼara. Ba lö moguna ibeʼe nosonia Keriso tobali höli khöda enaʼö tola auri sagötö faʼara. Böi olifu ita wa höli nibeʼe Keriso andrö zangoromaʼö, hawaʼebua waʼomasinia ba niha gulidanö. (Baso Yohane 3:16; 15:13.) Khalaigö hewisa dödö Yehowa hegöi Ononia sanandrösa ba wamahaʼö daʼa, sangoromaʼö wa lö moguna mbuala nibeʼera!

10. Hewisa walimosa Zatana sanandrösa ba waʼamate möi fonönö wangabu dödö hegöi famakao ba niha?

¹⁰ Falimosa Zatana möi fonönö wangabu dödö hegöi famakao ba niha. Satua sabu tödö börö me no mate nononia, tola manö so zangumaʼö wa no ihalö Lowalangi nononia andrö tobali malaʼika ba zorugo. Hadia möi fangalösi waʼabu dödöra walimosa Zatana andrö mazui itugu monönö? Laʼogunaʼö wamahaʼö sofaya simane alitö narako ba wotuhini famakao, simane na latunu niha ba döla geu börö me lalawa wamahaʼö gereja. Moloʼö sambua mbuku Inkuisisi Spanyol, yaʼia daʼö Dewan Pengadilan Katolik Spanyol, niha sanunu niha andrö faduhu dödöra wa na latunu niha solawa, tola iʼila ”hewisa rasonia galitö narako si lö irai mate”. Manötöna ira wa tola ifalalini gera-erania niha daʼö fatua lö mate ia enaʼö lö tefakao ba galitö narako. Ba zi hauga soi, so niha sangalulu khö ndra tuara si no mate, lafosumange ira, ba laʼandrö howu-howu moroi khöra. Tanö böʼönia labeʼe gö mazui fasömbata enaʼö ahono niha si no mate. Ba so göi zamalua gowasa ba woʼangandröi niha si no mate. Hizaʼi, famahaʼö si fasala si teʼodane-dane ba walimosa Zatana andre lö möi fondrara dödö. Itugu so khöra waʼaombö dödö mazui faʼataʼu.

11. Hewisa zi fahatö khöda hegöi ira awöda, lafaso ita ba wamalua si lö tefaudu ba Daromali Lowalangi?

¹¹ Faʼomasida khö Lowalangi hegöi Taromalinia tola möi fangaroʼöda ba ginötö lafaso ita si fahatö khöda mazui ira awöda ba wamalua si lö tefaudu sanandrösa ba niha si no mate. Laʼodödögö ba wangailasi yaʼita, tola manö lawaʼö wa lö taʼomasiʼö mazui lö tafosumange niha si no mate. Mazui lawaʼö wa börö ita wa tola dania ifaʼala waʼauri niha sauri niha si no mate andrö. Hewisa lalada ba wangoʼawögö sindruhu ba Zura Niʼamoniʼö? Angeragö hewisa lalada ba wamalua goi-goi Zura Niʼamoniʼö.

12. Hadia nifaduhusi tödö niha hegöi si toʼölö lafalua sanandrösa ba niha si no mate si lö teʼodane-dane ba Zura Niʼamoniʼö?

¹² Halö gangetula ’fabali’ moroi ba wamahaʼö hegöi si toʼölö lafalua si lö teʼodane-dane ba Zura Niʼamoniʼö. (2 Kor. 6:17) Ba soi Karibia,  ato niha si faduhu tödö wa na mate zi samösa niha, molaya-laya misa ”mbekhunia” ba ihuku niha si no irai mamalua si lö sökhi khönia. Moloʼö sambua referensi, ”bekhu” daʼö tola manö ”iʼasogö zi lö sökhi ba niha sato”. Si toʼölönia ba Afrika, labalugö zörömi ba lafaʼotahögöʼö ba dowa koda niha si no mate. Lawaʼö wa niha si no mate tebai ifaigi zikhalania samösa! Börö me ono mbanua Yehowa ita, lö faduhu dödöda ba ngawalö nifaduhusi tödö ba zi lö duhu mazui ba wamalua si lö atulö ba wotuhini falimosa Zatana!​—1 Kor. 10:21, 22.

13. Na lö faduhu dödöu sanandrösa ba zi toʼölö lafalua, hadia zinangea öfalua simane nisura ba Yakobo 1:5?

¹³ Na lö faduhu dödöu sanandrösa ba zi toʼölö lafalua, ohe ba wangandrö khö Yehowa enaʼö ibeʼe khöu waʼatua-tua. (Baso Yakobo 1:5.) Moguna öfalua riset ba publikasida. Na tola, andrö mene-mene moroi khö ndra satua sokubaloi ba mbanua niha Keriso si farahu yaʼugö. Lö lafatunö khöu hadia zinangea öfalua, hizaʼi lafatunö khöu goi-goi ba Zura Niʼamoniʼö si tefaudu, duma-dumania goi-goi nifatunö ba wamahaʼö daʼa. Na öfalua daʼö, no öfomaha ’wangera-ngeramö’ si tobali fanolo khöu ”ba wamaehusi satulö ba si lö atulö”.​—Heb. 5:14.

14. Hewisa lalada faböi tobali ita fangala ba niha?

¹⁴ ”Mifalua ia ba wamolakhömi Lowalangi. Böi tobali ami fangala.” (1 Kor. 10:31, 32) Na tahalö gangetula hadia tola fao ita ba wamalua si no toʼölö lafalua niha, moguna taʼangeragö lua-lua gangetulada ba dödö side-ide niha böʼö, mendrua manö khö ndra talifusöda si sara lala ba wamati. Böi tobali fangala ita ba niha böʼö! (Mrk. 9:42) Tatu lö omasi göi ita ba wameʼe afökhö dödö niha si tenga Samaduhuʼö. Faʼomasi zamarou yaʼita enaʼö taʼangenanöi wehededa na fahuhuo ita khöra, ba tola möi famolakhömi Yehowa daʼa. Tatu manö lö omasi ita fadaʼawa ba niha mazui taʼoʼaya zi toʼölö lafalua. Törö tödöu, wa mofaʼabölö waʼomasi andrö! Na taforomaʼö waʼomasi si fao foʼameʼegö tödö ba tafosumange ira, tola alulu dödö niha si fatuwu khöda.

15-16. (a) Hana wa moguna öfatunö ba niha böʼö hadia nifaduhusiu tödö? Beʼe duma-duma. (b) Hewisa wamaluada niwaʼö Waulo ba Roma 1:16?

¹⁵ Fatunö ba niha si so ba zi fasui yaʼugö wa Samaduhuʼö Yehowa ndraʼugö. (Yes. 43:10) Na so zi mate ba nösi nomou, tola manö  mofönu zi fahatö khöu hegöi si falazi omo khöu na lö fao ndraʼugö ba zi toʼölö lafalua. Hizaʼi, tola aoha khöu ba wangasiwai zalua andrö na no tohöna öfatunö hadia nifaduhusiu tödö. Isura Francisco si toröi ba Mozambik, ”Ba ginötö ufahaʼö ndraʼo hegöi foʼomogu sotöi Carolina ba zindruhu, mafatunö ba nösi nomoma wa lö saʼae mangalulu ndraʼaga ba niha si no mate. Tetandraigö gangetulama ba ginötö mate gaʼa Carolina ira alawe. No si toʼölö lafalua ba mbanuama na laʼowasaini ba wamemondri niha si no mate. Aefa daʼö, idanö wemondri niha si no mate latiboʼö ba zi sambua nahia, ba ösi nomo sabölö ahatö khönia moguna mörö ia tölu bongi ba nahia daʼö. Lafalua daʼa enaʼö ahono noso niha si no mate. Laʼandrö khö Carolina ira ösi nomonia ba wamalua daʼö.”

¹⁶ Hadia nifalua Francisco hegöi foʼomonia? Imane Francisco, ”Börö me maʼomasiʼö Yehowa ba omasiga maʼomusoiʼö dödönia, lö omasi ndraʼaga wamalua si toʼölö andrö. Mofönu khöma nösi nomo Carolina. Lafobahulu ndraʼaga wa lö mafosumange niha si no mate ba lawaʼö wa lö möi ira manörö khöma mazui latologa. Börö me ba wamobörö no matutunö khöra hadia nifaduhusima tödö, lö mafatunöisi khöra zalua andre börö me mofunö ira nasa. So ösa zi fahatö khöma sangoʼawögö yaʼaga, laʼombakhaʼö wa no irai mafatunö hadia nifaduhusima tödö. Ba gafuriata, alö wönu nösi nomo Carolina ba ifuli atulö ndraʼaga. So moroi ba gotaluara zi möi ba nomoma ba wangandrö publikasi si teʼodane-dane ba Zura Niʼamoniʼö.” Böi irai aila ita ba wangoʼawögö sindruhu sanandrösa ba waʼamate.​—Baso Roma 1:16.

17. Hewisa enaʼö tobali ita sindruhu si fahuwu ba wondrara tödö dalifusöda si sara lala ba wamati?

¹⁷ Ba ginötö mate niha niʼomasiʼö dalifusöda si sara lala ba wamati, moguna tobali ita ”sindruhu si fahuwu . . . , ba ba wamakao, tumbu ia si fatalifusö”. (Gamd. 17:17) Hewisa enaʼö tobali ita ”sindruhu si fahuwu” mendrua manö na abu dödö ndra talifusöda ba ginötö lafaso ira ba wamalua si toʼölö lafalua niha si lö tefaudu ba Zura Niʼamoniʼö? Angeragö dombua goi-goi Zura Niʼamoniʼö si tobali fanolo khöda ba wondrara tödö niha sabu tödö.

18. Hana wa meʼe Yesu, ba hadia wamahaʼö nihalöda moroi ba duma-dumania?

 ¹⁸ ”Miʼege-ege awö zege-ege.” (Rom. 12:15) Tola manö lö taʼila hadia zinangea tawaʼö ba niha sabu tödö, hizaʼi ba ginötö laʼila wa meʼe ita, aboto ba dödöra wa taʼameʼegö tödö ira. Me mate Lazaro si fahuwu khö Yesu, meʼe Maria, Marata hegöi tanö böʼönia börö me yaʼia andrö talifusö niʼomasiʼöra ba si fahuwu khöra. Öfa ngaluo aefa daʼö, tohare Yesu ba ”ilau meʼe”, hewaʼae iʼila wa isusugi dania Lazaro. (Yoh. 11:17, 33-35) Ba ginötö meʼe Yesu, daʼö zangoromaʼö hewisa dödö Namania. Daʼö göi zangoromaʼö hewisa waʼomasinia ba nösi nomo Lazaro, tatu terara dödö Maria hegöi Marata. Simanö göi, ba ginötö larasoi ira talifusöda wa taʼomasiʼö ba taʼameʼegö tödö ira, aboto ba dödöra wa tenga ha yaʼira zabu tödö, hizaʼi no lafasui ira si fahuwu si sökhi tödö ba sanolo yaʼira.

19. Ba ginötö tarara dödö ndra talifusöda si sara lala ba wamati, hadia zinangea tafalua simane niwaʼö ba Zangombakha 3:7?

¹⁹ ”Falöhede-hede ba fehede.” (Zango. 3:7) Lala tanö böʼö ba wondrara tödö ndra talifusöda si sara lala ba wamati sorasoi faʼabu dödö yaʼia daʼö tobali ita samondrongo si sökhi. Tehegö khö ndra talifusöda wanutunö ösi dödöra ba böi afökhö dödöda ba ginötö ’elungu-lungu lira’ na mohede. (Yob. 6:2, 3) Tola manö fawuka wangera-ngerara börö me lafaso ia si fahatö khöra si tenga Samaduhuʼö. Andrö, faogöʼö khöra ba wangandrö. Angandrö khö ’Zamondrondrongo fangandrö’ enaö ibeʼe khöra waʼabölö ba faʼohahau ba wangera-ngera. (Zin. 65:3) Na tefaudu ginötönia, mifao ba wombaso Sura Niʼamoniʼö. Mazui baso artikel si tefaudu moroi ba publikasida simane waö-waö waʼauri si möi famarou dödönia.

20. Hadia nitutunöda ba wamahaʼö aefa daʼa?

²⁰ Tatu taʼandrö sibai saohagölö me taʼila zindruhu sanandrösa ba waʼamate hegöi fanötöna sahöli-höli dödö nitema niha si no mate! (Yoh. 5:28, 29) Börö daʼö, enaʼö oroma moroi ba wehededa hegöi nifaluada wa taʼoʼawögö zindruhu ba Zura Niʼamoniʼö ba tafatunö ba niha ero so ginötö. Ba wamahaʼö aefa daʼa, tatutunö walimosa Zatana ba wolimo niha, yaʼia daʼö fakelemusa. Taʼila dania hadia mbörö wa tatimbagö hiburan hegöi famalua fefu hadia ia zoʼamakhaita ba dandrawa Zatana.