1-2. Hana wa abu sibai dödö Yesu?

BA GAFURIATA waʼaurinia tobali niha, abu sibai dödö Yesu. Lö ara tö lafakao ia niha samunu yaʼia. Abu dödö Yesu tenga ha börö me lö ara tö mate ia. Iʼomasiʼö sibai Namania ba omasi iʼomusoiʼö dödö Namania. Aboto ba dödönia na lö faröi ia sagötö göna ia famakao, no fao ia ba wangoromaʼö wa lö atulö niböbögö khö Yehowa ba sinangea mufosumange ia. Iʼomasiʼö göi niha Yesu ba aboto ba dödönia wa tola tasöndra waʼauri si lö aetu na lö faröi ia khö Yehowa irugi waʼamatenia.

² Hewaʼae abu sibai dödö Yesu, so khönia waʼohahau dödö. Imane khö ndra sinengenia, ”Uröi khömi waʼohahau dödö.” (Yoh. 14:27) Iʼokhögö ’waʼohahau dödö andrö khö Lowalangi’ yaʼia daʼö, faʼahono dödö nirasoi zi samösa niha börö me fahuwu ia khö Yehowa. Faʼohahau dödö zameʼe ahono dödö Yesu hegöi fangera-ngerania.​—Fil. 4:6, 7.

3. Hadia nitutunöda ba wamahaʼö daʼa?

³ Lö irai so ba gotaluada sanaögö famakao simane nitaögö Yesu, hizaʼi fefu zoloʼö khö Yesu hasambalö göna wanandraigö. (Mat. 16:24, 25; Yoh. 15:20) Simane Yesu, tarasoi göi waʼaombö dödö. Hadia zinangea tafalua enaʼö lö aombö sibai dödöda ba taya waʼohahau dödöda? Datafaigi tölu ngawalö hadia nifalua Yesu sagötö mangai halöwö ia khö Yehowa me so ia ba gulidanö ba hewisa woloʼöda yaʼia ba ginötö göna ita fanandraigö.

4. Ba 1 Tesalonika 5:17, beʼe duma-duma sangoromaʼö wa asese mangandrö Yesu me afuriata waʼaurinia ba gulidanö.

⁴ Baso 1 Tesalonika 5:17. Me afuriata waʼaurinia ba gulidanö, lö tebulö Yesu ba wangandrö. Me ifalua wanörö tödö faʼamatenia, ilau mangandrö fatua lö ibeʼe roti awö agu.  (1 Kor. 11:23-25) Fatua lö iröi nahia wamaluara Owasa Fasa, fao ia mangandrö khö ndra nifahaʼönia. (Yoh. 17:1-26) Bongi daʼö, me larugi Hili Zaitu, mato hauga kali ilau mangandrö. (Mat. 26:36-39, 42, 44) Ba fehede safuria niwaʼö Yesu fatua lö mate ia yaʼia daʼö fangandrö. (Luk. 23:46) Ba wangandrönia, ifatunö Yesu khö Yehowa sanandrösa ba zalua ba gafuriata waʼaurinia ba gulidanö.

5. Hana wa ataʼu ndra sinenge?

⁵ Sambua mbörö wa tola anau gölö Yesu ba wanaögö fanandraigö yaʼia daʼö börö me iʼodaligö Namania ba wangandrö. Hizaʼi ira sinengenia me bongi daʼö, lö anau gölöra ba wangandrö. Lua-luania, ataʼu ira ba ginötö alua khöra wanandraigö. (Mat. 26:40, 41, 43, 45, 56) Ba ginötö alua khöda wanandraigö, tola lö faröi ita na taʼoʼö duma-duma Yesu ba lö tebulö ’mangandrö’ ita. Hadia zinangea taʼangandröi?

6. Hewisa wamati möi fanoloda ba wangokhögö faʼohahau dödö?

⁶ Mangandrö ita khö Yehowa enaʼö ’idouʼö wamatida’. (Luk. 17:5; Yoh. 14:1) Moguna khöda wamati börö me fefu zoloʼö khö Yesu hasambalö itandraigö Satana. (Luk. 22:31) Hewisa wamati möi fanoloda ba wangokhögö faʼohahau dödö hewaʼae göna khöda ngawalö wanandraigö? Na no taforege ba wamalua hadia zi tola tafalua ba wanaögö fanandraigö, famati zamarou yaʼita ba wotouʼö ba danga Yehowa gabula dödö andrö börö me taʼila hasambalö iʼasiwai ba ginötönia. Börö me faduhu dödöda wa iʼila hadia zinangea ifalua ba zi sökhi khöda, tola ahono wangera-ngerada ba ohahau dödöda.​—1 Fet. 5:6, 7.

7. Hadia wamahaʼö si tola tahalö moroi ba niwaʼö Robert?

 ⁷ Fangandrö no tobali fanolo khöda ba wangokhögö faʼohahau dödö gofu hadia wanandraigö nitaögöda. Angeragö duma-duma Robert, samösa satua sokubaloi si lö faröi, ndröfinia 80-an fakhe. Imane, ”Mene-mene si so ba Filifi 4:6, 7 tobali fanolo khögu ba wangasiwai ngawalö gabula dödö ba waʼaurigu. So gabula dödögu sanandrösa ba gefe. Irege aheta khögu tobali satua sokubaloi ba zi sabata.” Hadia zanolo Robert irege lö tebulö iʼokhögö waʼohahau dödö? Imane, ”Uʼanemaiʼö ulau mangandrö ba ginötö so khögu waʼaombö-aombö dödö. Faduhu dödögu na asese ulau mangandrö, urasoi wa itugu so khögu waʼohahau dödö.”

8. Simane nitutunö ba Yohane 8:29, hadia nasa mbörö wa so khö Yesu waʼohahau dödö?

⁸ Baso Yohane 8:29. Hewaʼae tefakao Yesu, so khönia waʼohahau dödö börö me iʼila wa no iʼomusoiʼö dödö Namania. Lö tebulö so khönia woloʼö hewaʼae na abua wamalua yaʼia. Iʼomasiʼö Namania, ba sabölö moguna ba waʼaurinia yaʼia daʼö ba wangai halöwö Yehowa. Fatua lö möi ia ba gulidanö, yaʼia ’tuka’ khö Lowalangi. (Gamd. 8:30) Ba me so ia ba gulidanö, owölö-ölö ia ba wamahaʼö niha sanandrösa khö Namania. (Mat. 6:9; Yoh. 5:17) Omuso sibai dödö Yesu wamalua halöwö andrö.​—Yoh. 4:34-36.

9. Hana wa so khöda waʼohahau dödö na asese möi ita manuriaigö?

⁹ Tola taʼoʼö duma-duma Yesu ba woloʼö  Yehowa, ba ’owölö-ölö ita ba wangai halöwö Lowalangi’. (1 Kor. 15:58) Ba ginötö ’oya tabeʼe ginötöda’ ba wanuriaigö, tola taʼokhögö wangera-ngera si sökhi hewaʼae so gabula dödöda. (Hal. 18:5) Duma-dumania, ba ginötö manuriaigö ita asese falukha ita ba niha sanaögö abula dödö töra moroi ba nitaögöda. Hizaʼi, ba ginötö lafomaha ira ba wangomasiʼö Yehowa hegöi ba wamalua mene-menenia, itugu sökhi waʼaurira ba so waʼomuso dödö. Ero taʼila zimane daʼö, itugu faduhu dödöda khö Yehowa wa iʼameʼegö tödö ita. Ba faʼafaduhu dödö andrö zanolo yaʼita enaʼö lö tebulö taʼokhögö waʼohahau dödö. Daʼö göi nirasoi samösa dalifusöda ira alawe. Sandrohu faʼaurinia, asese irasoi wa tenga niha sinangea ia ba abu sibai dödönia. Imane, ”Ba ginötö asese ufalua halöwö fanuriaigö, so khögu waʼahono dödö ba itugu omuso dödögu. Umane tödögu, tola urasoi zimane daʼö börö me itugu ahatö ndraʼo khö Yehowa ba ginötö möido manuriaigö.”

10. Hadia wamahaʼö nihalöda moroi ba niwaʼö Brenda?

¹⁰ Angeragö duma-duma dalifusöda ira alawe sotöi Brenda. Yaʼia hegöi ononia ono alawe, so khöra wökhö sklerosis multipel (fökhö si göna ba sistem saraf). Lö iʼila mowaö-waö Brenda ba iʼogunaʼö kursi roda, ba alio sibai marase ia. Ba ginötö abölö ia, möi ia manuriaigö ba nomo-omo misa hizaʼi sabölö asese iʼogunaʼö zura ba wanuriaigö. Imane, ”Ba ginötö aboto ba dödögu ba fatema ba dödögu wa tebai döhö wökhögu ba gulidanö andre, uʼosambuaʼö wangera-ngeragu ba wanuriaigö. Lö saʼae uʼangeragö waʼaombö dödögu ba ginötö möido manuriaigö. Irege teʼosambuaʼö wangera-ngeragu ba wanolo niha nituriaigögu ba daerah dinas mbanua niha Keriso khöma. Me möido manuriaigö, lö tebulö uʼangeragö wanötöna nitemagu ba zi so miföna.”

11-13. (a) Hadia nifalua ndra sinenge hegöi niha böʼö ba wangoromaʼö wa yaʼira si fahuwu sindruhu khö Yesu? (b) Hadia nirasoi Yesu moroi ba nifalua ndra si fahuwu khönia?

¹¹ Sagötö weʼamöi Yesu manuriaigö, tobali si fahuwu sindruhu khö Yesu ndra sinengenia si lö faröi. No si fahuwu si sökhi ira simane niʼamaedolagö ba Zura Niʼamoniʼö, ”Ba so zi fahuwu saro moroi ba zi fatalifusö.” (Gamd. 18:24) Iʼameʼegö tödö zi fahuwu khönia andrö Yesu. Sagötö wamalua Yesu halöwönia, fefu nakhinia ira matua lö mamati khönia. (Yoh. 7:3-5) Ba zi sambua inötö, no irai labaliʼö ia sowöhö ira talifusönia. (Mrk. 3:21) Hizaʼi, lö lafalua zimane daʼö ira sinengenia si lö faröi. Imane Yesu khö ndra sinengenia si lö faröi me bongi fatua lö mate ia, ”Yaʼami niha si lö faröi khögu me göna ndraʼo fanandraigö.”​—Luk. 22:28.

¹² Itaria afatö dödö Yesu labeʼe ira sinengenia, hizaʼi lö iʼosambuaʼö dödönia ba zala nifaluara, nifaiginia yaʼia daʼö famati niʼokhögöra. (Mat. 26:40; Mrk. 10:13, 14; Yoh. 6:66-69) Ba mbongi safuria fatua lö mate ia, imane Yesu ba niha si lö faröi, ”Ukaoni ami si fahuwu börö me no ufatunö khömi fefu nirongogu moroi khö Nama.” (Yoh. 15:15) Tatu manö möi fangabölöʼö Yesu nifalua zi fahuwu khönia. Fanolo nibeʼera sagötö wanuriaigö Yesu no möi faʼomuso dödönia.​—Luk. 10:17, 21.

¹³ Tenga ha ira sinengenia zi fahuwu khö Yesu, so göi ndra matua hegöi ira alawe tanö böʼö sanolo yaʼia ba wanuriaigö hegöi ba wamalua halöwö tanö böʼö. So ösa  zokaoni yaʼia wemanga ba nomora. (Luk. 10:38-42; Yoh. 12:1, 2) Tanö böʼönia, so zi fao khönia ba wofanö ba laʼogunaʼö haratora ba wanolo yaʼia. (Luk. 8:3) Iʼokhögö Yesu zi fahuwu si sökhi börö me ibaliʼö ia si fahuwu si sökhi khöra. Ifalua zi sökhi khöra ba lö irai iʼandrö khöra ba wamalua si tebai lafalua. Hewaʼae moʼahonoa Yesu, hizaʼi iʼandrö saohagölö ba zi fahuwu khönia si lö moʼahonoa börö me no latuhini ia. Ba faduhu dödöda, wa latolo Yesu enaʼö lö tebulö ba wangokhögö faʼohahau dödö.

14-15. Hewisa enaʼö taʼokhögö zi fahuwu si sökhi ba hewisa ira ba wanolo yaʼita?

¹⁴ Si fahuwu si sökhi itolo ita enaʼö lö faröi khö Yehowa. Lala sabölö sökhi enaʼö taʼokhögö zi fahuwu si sökhi, yaʼia daʼö tabaliʼö ita si fahuwu si sökhi. (Mat. 7:12) Duma-dumania, ifarou ita Sura Niʼamoniʼö enaʼö taʼogunaʼö ginötöda hegöi faʼabölöda ba wanolo niha böʼö, mendrua manö ba niha ”soʼamböta”. (Ef. 4:28) Hadia so niha si tola ötolo si so ba mbanua niha Keriso si farahu yaʼugö? Hadia tola ötolo niha si tebai mondröi omora ba wowöli soguna khöra börö me no atua mazui mofökhö? Hadia tola öbeʼe zoguna ba nösi nomo soʼamböta? Na öʼila öʼogunaʼö situs jw.org^® hegöi aplikasi JW Library^®, hadia tola ötolo niha böʼö ba mbanua niha Keriso si farahu yaʼugö ba wangogunaʼö yaʼia? Na taʼosambuaʼö dödöda ba wanolo niha böʼö tola itugu omuso dödöda.​—Hal. 20:35.

¹⁵ Hasambalö ituhini ita si fahuwu khöda ba ginötö so gabula dödöda, ba itolo ita enaʼö lö tebulö taʼokhögö waʼohahau dödö. Simane Elihu, omasi ifondrondrongo  me itutunö Yobi gabula dödönia, simanö göi zi fahuwu khöda si fao faʼebolo dödö ihaogö ifondrondrongo ba ginötö fahuhuo ita khönia sanandrösa ba nirasoida. (Yob. 32:4) Böi tatötöna zi fahuwu khöda zangai angetula khöda. Hizaʼi, moguna tafondrondrongo mene-menera si teʼodane-dane moroi ba Zura Niʼamoniʼö. (Gamd. 15:22) Ba simane Razo Dawido si fao fangide-ngideʼö itema wanolo moroi ba zi fahuwu khönia, moguna göi so khöda wangide-ngideʼö ba wanemaʼö fanolo moroi ba zi fahuwu khöda ba ginötö moguna khöda. (2 Zam. 17:27-29) Sindruhu sa, wa si fahuwu si sökhi no buala moroi khö Yehowa.​—Yak. 1:17.

16. Moloʼö Filifi 4:6, 7, hadia zinangea taʼokhögö enaʼö so khöda waʼohahau dödö? Tutunö.

¹⁶ Baso Filifi 4:6, 7. Hana wa iwaʼö khöda Yehowa wa moroi ”khö Keriso Yesu” tola tatema waʼohahau dödö? Na taʼokhögö waʼaboto ba dödö khö Yesu ba mamati ita khönia, tola tasöndra waʼohahau dödö ba faʼahono wangera-ngera. Duma-dumania, börö höli nibeʼe Yesu, tola teʼefaʼö fefu horöda. (1 Yoh. 2:12) Na taʼangeragö daʼö, tola terara dödöda! Börö me Yesu Razo ba Wamatörö Lowalangi, ihori dania fefu wamakao nitaögöda börö nifalua Zatana hegöi famatörönia. (Yes. 65:17; 1 Yoh. 3:8; Fam. 21:3, 4) No fanötöna sahöli-höli dödö daʼö! Ba no göi ibeʼe khöda Yesu halöwö sabua, ba fao ia khöda ba wotuhini yaʼita ba ngaluo safuria andre. (Mat. 28:19, 20) Tatu itugu taʼokhögö waʼabarani! Fanolo, fanötöna hegöi faʼabarani zabölö moguna ba wangokhögö faʼohahau dödö ba wangera-ngera.

17. (a) Hewisa zi samösa niha Keriso ba wondrorogö faʼohahau dödö? (b) Simane nifabuʼu ba Yohane 16:33, hadia zi tola tafalua?

¹⁷ Hewisa lalada ba wondrorogö faʼohahau dödö ba ginötö so gabula dödöda? Moguna taʼoʼö duma-duma nifalua Yesu. Si oföna, mangandrö, ba lö tebulö mangandrö. Si dua, taʼoʼö niwaʼö Yehowa ba owölö-ölö ba wanuriaigö hewaʼae na abua wamalua yaʼia. Ba si tölu, tema wanolo nibeʼe zi fahuwu khöu ba ginötö so gabula dödöu. Faʼohahau dödö moroi khö Yehowa tola irorogö wangera-ngerau hegöi tödöu. Simane Yesu, tola dania ötaögö gofu hadia ia wanandraigö.​—Baso Yohane 16:33.