1-2. Hadia höli andrö, ba hana wa moguna khöda daʼö?

BA WAMOBÖRÖ, niha soʼahonoa Gadamo. Hizaʼi, me no ifalua horö, lö saʼae iʼokhögö waʼauri si lö aetu, ba simanö göi ngaʼötönia. Börö me iʼodödögö Adamo wamalua horö, lö teʼefaʼö horönia andrö ba tenga saʼae sinangea iʼokhögö waʼauri si lö aetu. Hizaʼi, hewisa ngaʼötönia? Lö nifaluara zala, ba lö göi nifaroura Gadamo ba wamalua horö. (Rom. 5:12, 14) Hadia tola iʼalui lala Yehowa enaʼö laʼokhögö dötönafö faʼauri si lö aetu ngaʼötö Gadamo? Tola! Lö ara me no ifalua horö Adamo, iforomaʼö Yehowa hewisa lalania ba wangefaʼö ngaʼötö Gadamo moroi ba horö hegöi faʼamate. (1 Mo. 3:15) Ba ginötö si no itatugöi Yehowa, ifatenge Nononia moroi ba zorugo ’ba wameʼe nosonia höli zato’.​—Mrk. 10:45; Yoh. 6:51.

² Hadia höli andrö? Ba Mbuku Niʼamoniʼö Yunani Niha Keriso, manandrösa ngawua wehede ”höli” ba mböli sinangea ibuʼa Yesu ba wowöli mangawuli hadia zi no itayaigö Adamo. (1 Ko. 15:22) Hana wa moguna khöda höli? Börö me tefaudu daʼö ba goi-goi waʼatulö moroi khö Yehowa. Simane nitutunö ba Goroisa Moze, moguna mubeʼe noso wangali noso. (2 Mo. 21:23, 24) Me ifalua horö, no itayaigö Adamo waʼaurinia soʼahonoa. Börö daʼö, enaʼö alua goi-goi waʼatulö moroi khö Lowalangi, moguna ibeʼe waʼaurinia soʼahonoa Yesu. (Rom. 5:17) Na ifalua daʼö, tola tobali ”Ama zi Lö Aetu” Yesu ba niha samati ba höli nibeʼenia.​—Yes. 9:6; Rom. 3:23, 24.

3. Moloʼö Yohane 14:31 hegöi 15:13, hana wa itehegö nosonia Yesu?

³ Itehegö nosonia Yesu börö me iʼomasiʼö sibai Namania hegöi niha gulidanö. (Baso Yohane 14:31; 15:13.) Börö waʼomasinia andrö, ihalö gangetula ba wamalua ohitö dödö Namania ba lö faröi ia irugi gamozua. Buania, tola alua gohitö dödö Yehowa ba niha hegöi ulidanö. Ba artikel daʼa, tatutunö hana wa  itehegö Lowalangi na alua wanandraigö sabölö-bölö khö Yesu fatua lö mate ia. Taʼadogoiʼö göi dania wanutunö sanandrösa khö zi samösa sanura Sura Niʼamoniʼö, sangoromaʼö fangandrö saohagölö ba höli. Aefa daʼö, tatutunö hewisa wangoromaʼöda fangandrö saohagölö ba höli, ba hewisa enaʼö itugu taʼameʼegö tödö mbuala si no ibeʼe khöda Yehowa hegöi Yesu.

4. Tutunö wamakao nitaögö Yesu fatua lö mate ia.

⁴ Khalaigö hadia zalua khö Yesu ba gafuriata waʼaurinia ba gulidanö. Me tohare ndra saradadu Romawi ba wondraʼu Yesu, tola menaʼö iʼandrö khö ndra malaʼika enaʼö lalumöʼö ia. Hizaʼi, lö ifalua daʼö. Ilulu manö ia khö ndra saradadu Romawi me laleasi ia lö faʼahakhö dödö. (Mat. 26:52-54; Yoh. 18:3; 19:1) Laleasi ia faoma bözi-bözi irege akuba nagolenia. Aefa daʼö, lafaluʼigö ba hulunia si no ahori mesokho andrö döla geu sabua. Idöni-döni döla geu andrö Yesu ba nahia niʼogunaʼö ba wohuku mate ia. Me lö saʼae faʼabölö khö Yesu, lawaʼö khö zi samösa ira matua si so ba daʼö enaʼö isalahini Yesu ba wangosaʼö töla geu andrö. (Mat. 27:32) Me no ofeta Yesu ba nahia niʼogunaʼö ba wohuku mate ia, laʼosö dangania awö gahenia ba döla geu andrö ira saradadu. Me lafasindro döla geu andrö, asika danga hegöi ahenia ba gosö-osö andrö börö waʼabua mbotonia. Abu sibai dödö ninania hegöi ira si fahuwu khönia me laʼila daʼö. Hizaʼi, laʼoʼaya ia ira sondröniaʼö niha Yahudi. (Luk. 23:32-38; Yoh. 19:25) Tefakao Yesu mato hauga za. Me so ia ba döla geu famakao, abölö-bölö weʼugu-ugu dödönia ba abua khönia wohanu-hanu. Aboto ba dödö Yesu wa lö faröi ia irugi gamozua, ba lö ara fatua lö mate ia, ifaʼema wangandrönia safuria. Aefa daʼö, tolea högönia ba aetu nosonia. (Mrk. 15:37; Luk. 23:46; Yoh. 10:17, 18; 19:30) Itaögö waʼafökhö hegöi faʼaila fatua lö mate ia, ba tenga ha sabata worasoinia daʼö!

5. Ba wamaigi Yesu, hadia zabölö abua moroi ba wamakao nitaögönia?

⁵ Ba wamaigi Yesu, so zabölö abua moroi ba wamakao nitaögönia andrö. Abölö abu dödönia me iʼila hadia mbörö wa lahuku mate ia. Iʼomasiʼö sibai Yehowa, hizaʼi laböbögö khönia zi lö duhu wa yaʼia andrö niha sangoʼaya Lowalangi hegöi töi Lowalangi. (Mat. 26:64-66) Me iʼangeragö wamobahulu andrö, tefakao sibai gera-erania, ba itötöna enaʼö lö itehegö mate ia Amania börö niböbögö khönia andrö. (Mat. 26:38, 39, 42) Hana wa itehegö Yehowa na tefakao ba mate Nono niʼomasiʼönia andrö? Datatutunö tölu dane-danenia.

6. Hana wa lö tola löʼö latawi Yesu ba döla geu famakao?

⁶ Si oföna, lö tola löʼö latawi Yesu ba döla geu enaʼö tola teʼefaʼö niha Yahudi moroi ba zi sambua fangelifi. (Gal. 3:10, 13) No göna ira fangelifi börö me ngaʼötö Gadamo ira. Baero daʼö, muʼelifi göi ira börö me no lasawö zi no lafabuʼu wa hasambalö laʼoʼö Goroisa Lowalangi. (Rom. 5:12) Moloʼö Oroisa Lowalangi ba ndraono Gizaraʼeli, na no ifalua horö si samösa niha irege sinangea na mate ia, lö tola löʼö labunu ia. Aefa daʼö, tola manö latawi mbotonia ba döla geu. Iwaʼö göi Oroisa andrö wa niʼelifi dozi nitawi ba döla geu. * (5 Mo. 21:22, 23; 27:26) Yesu, si no moʼahonoa ba wamalua Oroisa andrö, itaögö wangelifi me latawi ia ba döla geu. Börö me ifalua daʼö, tola teʼefaʼö niha Yahudi moroi ba wangelifi andrö, ba tola latema mbua moroi ba höli nibeʼenia khöra hewaʼae na latimbagö ia soi daʼö.

7. Hadia dane-dane si dua wa itehegö tefakao Nononia Yehowa?

 ⁷ Nehegö dane-dane si dua wa itehegö tefakao Nononia Yehowa. Börö me ifalua daʼö Yehowa, tola tefaʼanö Yesu ba wamalua halöwönia tobali Ere Sebua khöda. No irasoi samösa Yesu hawaʼabua woloʼö niwaʼö Lowalangi ba ginötö göna ia fanandraigö sabua. Me abu sibai dödönia, no irai mangandrö ia ”si fao taŵa hörö ba feʼao sabölö-bölö”. Börö me no irai irasoi gabula dödö simane daʼö Yesu, tatu aboto ba dödönia hadia zoguna khöda ba ”tola itolo” ita na ”göna [ita] fanandraigö”. Taʼandrö sibai saohagölö börö me no ifataro Yehowa Gere Sebua safönu faʼahakhö dödö ba ”tenga zi lö aboto ba dödönia wa ambö faʼabölöda”!​—Heb. 2:17, 18; 4:14-16; 5:7-10.

8. Hadia dane-dane si tölu wa itehegö Lowalangi alua wanandraigö sabölö-bölö khö Yesu?

⁸ Si tölu, itehegö Yehowa na tefakao sibai Yesu enaʼö tesöndra wanema li ba wanofu daʼa: Hadia so niha si lö faröi khö Lowalangi na göna ia fanandraigö sabua? Iwaʼö Satana wa lö hadöi niha si tola mamalua daʼö. Ifobahulu fefu niha wa lafosumange Lowalangi ha ba wangalui tana khöra samösa. Ba faduhu dödönia wa lö laʼomasiʼö Lowalangi, simane Adamo mböröta. (Yob. 1:9-11; 2:4, 5) Börö me faduhu dödö Yehowa wa lö faröi khönia Nononia, itehegö alua khö Yesu wanandraigö sabölö-bölö. Lö faröi Yesu irugi waʼamate ba iforomaʼö wa falimo Zatana.

9. Hadia duma-duma nibeʼe zinenge sotöi Yohane khöda?

⁹ Ato niha Keriso sanaögö fanaisi hegöi ngawalö gabula dödö. Hewaʼae simanö, lö laböhöli wanuriaigö ba anau gölöra sandrohu faʼaurira börö me no teʼaroʼö wamatira ba wamahaʼö sanandrösa ba höli. Nehegö atö duma-duma zinenge sotöi Yohane. Lö faröi ia ba wanuriaigö sindruhu sanandrösa khö Keriso hegöi höli, te ba zi töra 60 fakhe faʼara. Me arakhagö 100 fakhe ndröfinia, latiboʼö ia ba Hulo Fatemo ira samatörö Romawi. Hadia mbörö? Börö me lö iböhöli ”wanuriaigö sanandrösa khö Lowalangi hegöi ba wamaduhuʼö Yesu”. (Fam. 1:9) Sindruhu-ndruhu wa no ibeʼe khöda duma-duma sahöli dödöda sanandrösa ba wangoromaʼö famati hegöi faʼanau gölö!

10. Hadia dandra sangoromaʼö wa mangandrö sibai saohagölö Yohane ba höli?

¹⁰ Na tabaso zi hauga ngawua mbuku nisura Yohane ba Zura Niʼamoniʼö, tola taʼila wa iʼomasiʼö sibai Yesu ba iforomaʼö wangandrö saohagölö ba höli nibeʼenia. Ba zi hauga buku nisurania andrö, töra 100 kali itötöi Yohane sanandrösa ba höli hegöi ngawalö mbua si sökhi niʼasogönia. Duma-dumania, isura Yohane, ”Na so zamalua horö, so zanolo yaʼita si fao khö Nama, yaʼia daʼö Yesu Keriso, samalua satulö.” (1 Yo. 2:1, 2) Itandrösaigö göi Yohane wa moguna sibai ”wamaduhuʼö sanandrösa khö Yesu”. (Fam. 19:10) Ba daʼa taʼila wa mangandrö sibai saohagölö Yohane ba höli. Hewisa göi wangoromaʼöda fangandrö saohagölö ba höli?

11. Hadia zinangea tafalua enaʼö tola tatimbagö wondrönisi dödö?

¹¹ Timbagö wondrönisi dödö ba wamalua horö. Na sindruhu-ndruhu taʼandrö saohagölö ba höli, lö tamane tödöda, ’Lö moguna uforege sibai wanimbagö fondrönisi dödö. Tola saʼatö uʼandrö wangefa na no ufalua horö.’ Hizaʼi, na so zondrönisi tödöda ba wamalua amuata si fasala, tamane wangumaʼö, ’Lö omasido ufalua daʼa! Oya sibai zi no ibeʼe khögu Yehowa hegöi Yesu. Lö  omasido na abu dödöra.’ Baero daʼö, tola göi taʼandrö waʼabölö moroi khö Yehowa. Tola mangandrö ita khönia simane daʼa: ’Böi tehegö awuwu ndraʼo na so wondrönisi dödö.’​—Mat. 6:13.

12. Hewisa woloʼöda mene-mene nisura ba 1 Yohane 3:16-18?

¹² Omasiʼö ndra talifusöda. Na taʼomasiʼö ndra talifusöda, no taforomaʼö wangandrö saohagölö ba höli. Hadia mbörö? Börö me tenga ha salahida samösa wa ibeʼe nosonia Yesu, hizaʼi salahi ndra talifusöda tanö böʼö göi. Daʼö zangoromaʼö wa iʼomasiʼö sibai ira. (Baso 1 Yohane 3:16-18.) Tola göi taforomaʼö waʼomasida khöra moroi ba nifaluada. (Ef. 4:29, 31–5:2) Duma-dumania, tola tatolo ndra talifusöda na göna ira fökhö mazui na lataögö gabula dödö sabua, simane bencana alam. Hizaʼi, hewisa ita na so dalifusöda sangafökhöiʼö tödöda ba wehede mazui ba nifaluara?

13. Hana wa moguna taʼefaʼö zala niha böʼö?

¹³ Hadia itaria abua khöu wangefaʼö sala ndra talifusöda sangafökhöiʼö tödöu? (3 Mo. 19:18) Na yaʼia, falua mene-mene daʼa: ”Hewaʼae na so mbörö waʼabao dödömi, böi tebulö khömi waʼebolo dödö zamösana ba faoma miʼefaʼö zala nawömi soroi ba dödö. Simane fangefaʼö Yehowa salami soroi ba dödö, mifalua göi zimane daʼö.” (Kol. 3:13) Ero na taʼefaʼö zala ndra talifusöda, no taforomaʼö khö Yehowa wa sindruhu-ndruhu taʼandrö khönia saohagölö ba höli si no ibeʼe. Hadia zi tola tafalua enaʼö itugu taʼameʼegö tödö mbuala nibeʼe Lowalangi andre?

14. Hadia zi tola tafalua enaʼö itugu taʼameʼegö tödö höli?

¹⁴ Andrö saohagölö khö Yehowa ba höli si no ibeʼe. Imane Joanna, samösa talifusöda ira alawe si 83 fakhe si toröi ba India, ”Na mangandrö ndraʼo ero maʼökhö, lö tebulö uʼandrö saohagölö khö Yehowa ba höli si no ibeʼe. Ba wamaigigu, moguna sibai ufalua daʼö.” Na mangandrö ndraʼugö ero maʼökhö, fatunö khö Yehowa zala si no öfalua ba zi maʼökhö daʼö ba andrö wangefa moroi khönia. Hizaʼi, na no öfalua horö sebua, moguna öʼandrö wanolo khö ndra satua sokubaloi. Hasambalö lafondrondrongo ndraʼugö ba labeʼe khöu mene-mene Zura Niʼamoniʼö si fao faʼomasi. Fao ira khöu ba wangandrö, ba laʼandrö khö Yehowa enaʼö iʼefaʼö horöu. Buania, tola ifuli öʼokhögö wahuwusa si sökhi khö Yehowa.​—Yak. 5:14-16.

15. Hana wa moguna tabeʼe ginötöda ba wombaso hegöi ba woʼangerönusi höli?

 ¹⁵ Angerönusi höli si no ibeʼe Yehowa hegöi Yesu. Imane talifusöda ira alawe si 73 fakhe sotöi Rajamani, ”Ero ubaso wamakao salua khö Yesu, mowöi dawa hörögu.” Tola manö göi asöndru dödömö na öʼangeragö wamakao salua khö Yesu. Hewaʼae simanö, na lö tebulö öʼangerönusi zi no ifalua Yesu, tola itugu öʼomasiʼö ia hegöi Amania. Enaʼö aoha khöu woʼangerönusi höli, tola öbaliʼö daʼö tuho wamahaʼöu samösa.

16. Hadia mbuania na tafahaʼö niha böʼö sanandrösa ba höli? (Faigi gambara ba guli majalah.)

¹⁶ Fahaʼö niha böʼö sanandrösa ba höli. Tola itugu taʼameʼegö tödö höli ero na tatutunö daʼö ba niha böʼö. Enaʼö aoha khöu wanutunö ba niha böʼö hadia mbörö wa lö tola löʼö mate Yesu salahida, oya publikasi hegöi video si sökhi si no ifaʼanö organisasi. Duma-dumania, tola taʼogunaʼö wamahaʼö si 4 moroi ba brosur Turia Somuso Dödö moroi khö Lowalangi! Tuhonia, ”Haniha Yesu Keriso?” Mazui, tola taʼogunaʼö faza 5 moroi ba mbuku Hadia Nifahaʼö Zura Niʼamoniʼö Khöda? Tuhonia, ”Höli—Buala Fondrege Zebua moroi khö Lowalangi”. Ero röfi, itugu taʼameʼegö tödö höli börö me taʼondrasi Wanörö Tödö faʼamate Yesu, ba owölö-ölö ita ba wogaoni niha böʼö ba wangondrasi angowuloa andrö. Sindruhu-ndruhu wa no töi si sökhi me no ibeʼe khöda Yehowa halöwö ba wamahaʼö niha böʼö sanandrösa khö Nononia!

17. Hana wa no buala fondrege zebua böli höli andrö moroi khö Lowalangi?

¹⁷ Börö höli nibeʼe Yehowa hegöi Yesu, tola fahuwu ita khö Yehowa hewaʼae na lö moʼahonoa ita. Börö höli andrö göi, tola tehori fefu zi lö sökhi niʼasogö Zatana. (1 Yo. 3:8) Baero daʼö, börö me no mubeʼe höli, tola alua gohitö dödö Yehowa ba gulidanö. Tobali faradaiso dania gulidanö andre maʼasagörö. Fefu niha si toröi ba daʼö hasambalö laʼomasiʼö ba lafosumange Yehowa. Sindruhu-ndruhu wa no buala fondrege zebua böli höli andrö moroi khö Lowalangi, ba moguna itugu taʼameʼegö tödö daʼö. Börö daʼö, dataforege ba waʼaurida sero maʼökhö ba wangoromaʼö wa taʼandrö sibai saohagölö ba mbuala nibeʼenia andre!