Lö ara fatua lö mate ia, hana wa itötöi Yesu wehede Dawido si no tesura ba Zinunö 22:1?

No tesura wehede Yesu safuria ba Mataiʼo 27:46 hegöi Mareko 15:34, ”He Lowalangigu, he Lowalangigu, hana wa öröi ndraʼo?” Me iwaʼö daʼö, alua niwaʼö Dawido ba Zinunö 22:1. Itötöi ngawua wehede daʼö Yesu tenga börö me afatö dödönia mazui ambö wamatinia. Sindruhu-ndruhu aboto ba dödönia hana wa lö tola löʼö mate ia, ba aoha gölönia wamalua daʼö. (Mat. 16:21; 20:28) Iʼila göi wa lö ilumöʼö ia Yehowa hewaʼae na arakhagö mate ia. (Yob. 1:10) Lö ilumöʼö ia Yehowa enaʼö tola iforomaʼö wa lö faröi ia hewaʼae na afökhö sibai waʼamatenia.​—Mrk. 14:35, 36.

Na simanö, hana wa itötöi Yesu ngawua wehede nisura ba zinunö andre? Hewaʼae na lö taʼila sibai hadia mbörönia, datafaigi hadia manö zi tola tobali dane-dane wa itötöi ngawua wehede andrö Yesu. *

Me itötöi wehede daʼö Yesu, te iforomaʼö wa itehegö Yehowa na mate ia. Moguna ibuʼa höli andrö Yesu, hewaʼae na lö itolo ia Yehowa. Lö tola löʼö ”itaögö waʼamate salahi zato”.​—Heb. 2:9.

Me itötöi ösa ngawua wehede nisura ba zinunö, te omasi Yesu na latörö tödöra niha nösi zinunö andrö maʼafefu. Me götö Yesu, oya zinunö nitöngöni ndra niha Yahudi. Na larongo sambua ayati moroi  ba zinunö, si toʼölönia iʼanemaiʼö itörö tödöra nösi zinunö andrö maʼafefu. Na daʼö gohitö dödö Yesu wa itötöi wehede si so ba Zinunö 22:1, te tola latörö tödöra ira niha Yahudi wamaʼeleʼö si so ba zinunö andrö sanandrösa ba ngawalö zalua fatua lö mate Yesu hegöi na no aefa mate ia. (Si. 22:7, 8, 15, 16, 18, 24) Baero daʼö, te göi itörö tödöra ayati safuria ba zinunö andrö sanuno Yehowa ba sanutunö wa yaʼia andrö Razo ba zi sagörö ulidanö.​—Si. 22:27-31.

Me itötöi wehede Dawido, te iforomaʼö Yesu wa lö nifaluania zala. Fatua lö mate Yesu, lafalua khönia wanguhuku si lö atulö ira Sangetuʼö Huku, ba laʼetuʼö wa fasala ia börö me no iʼoʼaya Lowalangi. (Mat. 26:65, 66) Aösö-aösö sibai ira wangetuʼö hukumania me bongi daʼö, ba lö laʼoʼö goroisa si so me luo daʼö. (Mat. 26:59; Mrk. 14:56-59) Börö daʼö, me itötöi wehede si so ba Zinunö 22:1, hulö no imane Yesu, ”He Lowalangigu, he Lowalangigu, hana wa öröi ndraʼo hewaʼae na lö nifaluagu zala?” Tola manö omasi Yesu na aboto ba dödö niha wa sindruhunia lö hadöi sala nifaluania ba tenga sinangea lahuku mate ia menaʼö.

Tola manö omasi Yesu ba wangoromaʼö wa tenga börö me lö omuso dödö Yehowa khönia wa göna ia famakao. No göi itaögö wamakao Dawido, hizaʼi tenga daʼö geluahania wa lö omuso dödö Yehowa khönia. Tenga börö me ambö wamatinia wa ifaʼema Dawido wanofu nisura ba Zinunö 22:1. Me no aefa ifaʼema wanofu andrö Dawido, itutunö wa faduhu dödönia wa so waʼabölö khö Yehowa ba wolumöʼö ono mbanuania, ba lö tebulö ifahowuʼö ia Yehowa. (Si. 22:23, 24, 27) Simanö göi, hewaʼae na tefakao Yesu, ”Maʼuwu Dawido” andrö, tenga daʼö geluahania wa lö omuso dödö Yehowa khönia.​—Mat. 21:9.

Tola manö abu sibai dödö Yesu börö me lö tola löʼö iböhöli Yehowa ba wolumöʼö yaʼia enaʼö tola iforomaʼö waʼalöfaröinia. Sindruhunia, lö omasi Yehowa na tefakao ba mate Yesu. Hizaʼi, börö me no mamadaö Gadamo hegöi Khawa, lö tola löʼö tefakao ba mate Yesu hewaʼae na lö nifaluania zala. Ifalua daʼö Yesu ba wangoromaʼö wa lö atulö niböbögö Zatana, hegöi ba wameʼe höli ba niha gulidanö enaʼö tola laʼokhögö waʼauri soʼahonoa si no itayaigi Adamo. (Mrk. 8:31; 1 Fe. 2:21-24) Enaʼö tola alua gohitö dödönia andrö, lö tola löʼö iböhöli Yehowa ba wolumöʼö Yesu. Lö irai ifalua daʼö Yehowa ba zilalö.

Tola manö omasi Yesu na aboto ba dödö ndra soloʼö khönia hadia mbörö wa itehegö Yehowa na mate ia ba döla geu famakao. * Aboto ba dödö Yesu wa tola manö awuwu wamati niha sato börö me lahuku mate ia tobali niha si lö sökhi. (1 Ko. 1:23) Na aboto ba dödö ndra nifahaʼönia hadia mbörö wa lö tola löʼö mate ia, tola laʼila wa yaʼia andrö Sangefaʼö, tenga niha si lö sökhi.​—Gal. 3:13, 14.

Gofu hadia mbörö wa itötöi Yesu ngawua wehede si so ba Zinunö 22:1, aboto ba dödönia wa lö tola löʼö mate ia ba wamalua ohitö dödö Yehowa. Lö ara me no aefa itötöi wehede nisura ba zinunö andrö, imane Yesu, ”No awai!” (Yoh. 19:30; Luk. 22:37) Daʼa zangoromaʼö wa lö tola löʼö iböhöli sabata Yehowa ba wolumöʼö Yesu enaʼö tola iʼasiwai halöwönia ba gulidanö. Baero daʼö, tola göi ifalua Yesu fefu zi no mufaʼeleʼö sanandrösa khönia ba ”Goroisa Moze, Nisura Ndra Samaʼeleʼö, hegöi ba Zinunö”.​—Luk. 24:44.