1. Hadia nifaigi-faigi Yehowa ba nono mbanuania?

IWAʼÖ Sura Niʼamoniʼö wa ”iʼomasiʼö nono mbanuania Yehowa”. (2 Ng. 2:11) Tatu möi fangomuso dödöda daʼö! Ifaigi-faigi Yehowa gamuatada si sökhi. Iʼila wa tola tafalua ngawalö zangomusoiʼö tödönia, ba itolo ita tobali si fahuwu khönia. Na lö faröi ita khönia, hasambalö fahuwu ia khöda sagötö faʼara!​—Yoh. 6:44.

2. Hana wa so ösa ndra talifusöda sambö faduhu tödö wa iʼomasiʼö ira Yehowa?

² Te so zangumaʼö, ’Uʼila wa iʼomasiʼö fefu nono mbanuania Yehowa. Hizaʼi, hewisa wa tola faduhu dödögu wa iʼomasiʼö ndraʼo Yehowa?’ Hadia mbörö wa so zanofu simane daʼö? Imane Oksana, * si no irai manaögö ngawalö wamakao me iraono ia, ”Omuso sibai dödögu me tebayagö ndraʼo idanö hegöi me merintis ndraʼo. Hizaʼi, 15 fakhe aefa daʼö, ibörögö itörö tödögu wamakao si no irai utaögö me iraono. Daʼö mbörö wa umane tödögu, lö omuso dödö Yehowa khögu ba tenga sinangea iʼomasiʼö ndraʼo.” Daʼö göi zalua khö dalifusöda perintis sotöi Yua, si no irai manaögö ngawalö wamakao me iraono. Imane wanutunö, ”Ululu waʼaurigu khö Yehowa enaʼö omuso dödönia. Hizaʼi, no irai tumbu ba dödögu wa lö duhu iʼomasiʼö ndraʼo.”

3. Hadia nitutunöda ba artikel daʼa?

³ Tatu öʼomasiʼö sibai Yehowa. Hizaʼi, simane talifusöda ira alawe si darua no mege, te ambö faduhu dödöu wa iʼomasiʼö ndraʼugö Yehowa. Hana wa tola tobali famaʼalau lala wangera-ngera simane daʼö? Ba hadia zi tola manolo yaʼugö ba wolawa lala wangera-ngera si fasala andrö? Datatutunö wanema li moroi ba wanofu-nofu andrö.

4. Hana wa tola tobali famaʼalada na taʼaombösi tödö waʼomasi Yehowa?

⁴ Na faduhu dödöda wa iʼomasiʼö ita Yehowa, tola terou dödöda ba wamosumange yaʼia soroi ba dödö hewaʼae na tataögö gabula dödö. Hizaʼi, na ambö faduhu dödöda wa iʼameʼegö tödö ita Yehowa, tola ’ahori waʼabölöda’. (Amd. 24:10) Na tarasoi waʼide-ide dödö simane daʼö, tebai tatimbagö dandrawa niʼasogö Zatana.​—Ef. 6:16.

5. Hadia lua-lua nirasoi ndra talifusöda börö me laʼaombösi tödö waʼomasi Yehowa?

⁵ So ösa ndra talifusöda sangumaʼö wa lö iʼomasiʼö ira Yehowa, irege awuwu wamatira. Imane samösa satua sokubaloi sotöi James, ”Hewaʼae na mangai halöwö ndraʼo ba Mbetieli ba omuso dödögu wanuriaigö ba mbanua niha Keriso sangogunaʼö li böʼö, no irai lö faduhu dödögu wa omuso dödö Yehowa ba halöwö si no ufalua. Ibörögö göi manofu-nofu dödögu hadia ifondrondrongo wangandrögu Yehowa.” Imane göi Eva, sangai halöwö safönu inötö, ”No urasoi samösa wa tola möi famaʼalagu na uʼaombösi tödö waʼomasi Yehowa. Tola molua-lua daʼö ba ngawalö halöwö ba wamati nifaluada. Lö saʼae khöda faʼaterou dödö hegöi faʼomuso dödö ba wamosumange Yehowa.” Imane Michael, sangai halöwö tobali perintis biasa hegöi satua sokubaloi, ”Na lö faduhu dödöda wa iʼameʼegö tödö ita Lowalangi, tola fandröndröu ita khönia.”

6. Na ibörögö taʼaombösi tödö waʼomasi Lowalangi, hadia zinangea tafalua?

⁶ Si no irai alua khö ndra talifusöda andrö zangoromaʼö wa tola awuwu wamatida na so khöda waʼaombö-aombö dödö. Börö daʼö, na ibörögö taʼaombösi tödö waʼomasi Lowalangi, hadia zinangea tafalua? Moguna taforege ba wolawa lala wangera-ngera simane daʼö! Andrö wanolo moroi khö Yehowa enaʼö tola ölawa waʼaombö-aombö dödöu ba örasoi wa ’irorogö dödöu awö gera-erau faʼohahau dödö andrö khö Lowalangi’. (Si. 139:23; Fil. 4:6, 7) Ba törö tödöu wa tenga ha yaʼugö zorasoi daʼö. So göi ösa ndra talifusöda tanö böʼö hegöi samosumange Yehowa me götö föna samorege ba wolawa lala wangera-ngera si fasala andrö. Iadaʼa, datatutunö hadia wamahaʼö si tola tahalö moroi ba zi no irai alua khö zinenge sotöi Faulo.

7. Hadia manö gabula dödö salua khö Waulo?

⁷ Hadia no irai örasoi waʼamarase börö me oya sibai noro dödö sinangea öfalua?  Na noa, tatu aboto ba dödöu hadia nirasoi Waulo. Tenga ha sambua mbanua niha Keriso sinangea iʼangeragö, hizaʼi iʼangeragö fefu ”mbanua niha Keriso misa”. (2 Ko. 11:23-28) Hadia no göna ndraʼugö fökhö irege taya waʼomuso dödöu? No irai tefakao Waulo börö ’ndroi bakha ba mbotonia’. Te moʼamakhaita ”ndroi” andrö ba wökhö nitaögönia, ba omasi sibai ia teʼefaʼö moroi ba gabula dödö andrö. (2 Ko. 12:7-10) Hadia itaria ide-ide dödömö börö walömoʼahonoamö? No göi irai irasoi zimane daʼö Faulo. Itutunö wa ”tefakao sibai” ia börö me moguna iforege ba wolawa falömoʼahonoania samösa.​—Rom. 7:21-24.

8. Hadia zanolo Faulo irege lö faröi ia ba wamosumange Yehowa hewaʼae na oya gabula dödö nitaögönia?

⁸ Hewaʼae na itaögö fefu gabula dödö andrö Faulo, lö faröi ia ba wamosumange Yehowa. Hadia mbörö? Börö me aro sibai wamatinia sanandrösa ba höli. Hewaʼae na iʼila wa niha si lö moʼahonoa ia, faduhu dödönia ba mbuʼusa li Yesu wa ”dozi samati khönia, ba lasöndra waʼauri si lö aetu”. (Yoh. 3:16; Rom. 6:23) No tefarahu Waulo ba gotalua niha sangoromaʼö famati ba höli nibeʼe Yesu. Faduhu dödönia wa omasi Yehowa ba wangefaʼö sala niha samalalini era-era, hewaʼae na no lafalua horö sebua.​—Si. 86:5.

9. Hadia wamahaʼö nihalöda moroi ba wehede Waulo nisura ba Galatia 2:20?

⁹ Lö faröi göi Waulo börö me faduhu dödönia wa iʼomasiʼö sibai ia Lowalangi. Aboto ba dödönia wa ifatenge ba gulidanö Nononia andrö Lowalangi enaʼö mate salahinia. Nehegö atö hadia niwaʼö Waulo me imane, ’Ono Lowalangi zi no mangomasiʼö yaʼo ba sameʼe faʼaurinia ba khögu.’ (Baso Galatia 2:20.) Lö irai iwaʼö tödönia Faulo wa tenga sinangea iʼomasiʼö ia Lowalangi. Lö irai tumbu ba dödönia wangumaʼö, ’Aboto ba dödögu wa sinangea iʼomasiʼö ndra talifusögu Yehowa, hizaʼi lö irai iʼomasiʼö ndraʼo.’ Imane Faulo ba mbanua niha Keriso si so ba Roma, ”Mate Keriso salahida, me samazökhi horö ita nasa.” (Rom. 5:8) Sindruhu-ndruhu wa iʼomasiʼö fefu nono mbanuania Lowalangi!

10. Hadia wamahaʼö nihalöda moroi ba Roma 8:38, 39?

¹⁰ Baso Roma 8:38, 39. Sindruhu-ndruhu faduhu dödö Waulo wa ebua sibai waʼomasi Lowalangi. No irai isura wa lö hadöi si tola ’mamabali yaʼita moroi ba waʼomasi Lowalangi soroma ba khö Zoʼaya yaʼita Yesu Keriso’. Aboto göi ba dödönia wa ebolo sibai dödö Yehowa ba ndraono Gizaraʼeli mböröta, ba iʼila wa no iforomaʼö khönia waʼahakhö dödö Yehowa. Tola tamane wangumaʼö wa daʼa rahu-rahu nihalö Waulo: ’Börö me no  ifatenge Nononia Yehowa enaʼö mate salahigu, tebai aombö dödögu ba waʼomasinia.’​—Rom. 8:32.

11. Hewaʼae na no irai ifalua Faulo ngawalö zi lö sökhi si no mutötöi ba 1 Timoteo 1:12-15, hana wa tola faduhu dödönia wa iʼomasiʼö ia Yehowa?

¹¹ Baso 1 Timoteo 1:12-15. Te itaria itahigö ia tödönia Faulo me iʼangeragö ngawalö zi lö sökhi si no irai ifalua ba zilalö. Fatua lö nifahaʼönia ia ba zindruhu, ifakao niha Keriso si toröi misa ba mbanua böʼö. So ösa nibeʼenia ba gurunga, ba fao dödönia me lahalö gangetula ira sangetuʼö huku ba wamunu niha Keriso tanö böʼö. Daʼö mbörö wa ifotöi ia niha ’fondrege zebua horö’. (Hal. 26:10, 11) Hadia tola ökhalaigö hewisa dödö Waulo me falukha ia khö zi bohou ebua si lö satua, me no lahuku mate zatuania börö gangetula nituhini Waulo? Tatu manö maniasa sibai ia ba zala si no ifalua andrö. Hizaʼi, aboto ba dödönia wa lö iʼila ibulöʼö zi no irai alua ba zilalö. Faduhu dödönia wa mate Keriso salahinia, andrö wa iwaʼö, ”Tola tobali simane daʼa ndraʼo iadaʼa börö waʼasökhi dödö sebua moroi khö Lowalangi.” (1 Ko. 15:3, 10) Hadia wamahaʼönia khöda? Yafaduhu dödöu wa mate Keriso salahimö, irege tola aro wahuwusamö khö Yehowa. (Hal. 3:19) Lö irai itörö tödö Lowalangi zala si no irai tafalua ba zilalö, he na no tobali ita Samaduhuʼö Yehowa me luo daʼö mazui löʼö. (Yes. 1:18) Sabölö moguna khö Lowalangi yaʼia daʼö fefu nifaluada iadaʼa hegöi ba zi so miföna.

12. Na tarasoi wa lö hadöi guna waʼaurida ba tenga sinangea tatema waʼomasi, hewisa wa tola tobali fanoloda wehede nisura ba 1 Yohane 3:19, 20?

¹² Na öʼangeragö hewisa waʼamate Yesu ba wangöhöli yaʼugö, te ömane tödöu, ’Tenga sinangea utema mbuala sebua böli andre.’ Hadia mbörö wa tola örasoi zimane daʼö? Tola manö ilimo ita tödöda si lö moʼahonoa andre irege tarasoi wa lö hadöi guna  waʼaurida ba tenga sinangea tatema waʼomasi. (Baso 1 Yohane 3:19, 20.) Na tarasoi zimane daʼö, moguna tatörö tödöda wa ”abölö ebua Lowalangi moroi ba dödöda”. Iʼomasiʼö sibai ita Amada si so ba zorugo, ba omasi ia iʼefaʼö zalada. Enaʼö tola faduhu dödöda ba daʼö, böi taböhöli wamahaʼö yaʼita ba Daromalinia, talau mangandrö, ba fariawö ita ba nono mbanuania. Hana wa moguna tafalua fefu daʼö?

13. Hana wa moguna tafahaʼö ita ba Daromali Lowalangi? (Faigi göi kotak ” Bua Nirasoira Me Lafahaʼö Ira ba Daromali Lowalangi”.)

¹³ Fahaʼö ndraʼugö ba Daromali Lowalangi ero maʼökhö. Moguna öbaso ba öʼangerönusi Daromali Lowalangi ero maʼökhö enaʼö aboto ba dödöu gamuata Yehowa. Na öfalua daʼö, tola örasoi wa sindruhu-ndruhu iʼomasiʼö ndraʼugö Yehowa. Baero daʼö, itolo göi ndraʼugö Sura Niʼamoniʼö ”ba wangadölöʼö” era-erau hegöi tödöu. (2 Ti. 3:16, nisura ba gahe zura) No irai irasoi si samösa satua sokubaloi sotöi Kevin wa lö eluaha waʼaurinia. Imane wanutunö, ”Börö me ubaso Zinunö 103 ba uʼangerönusi nösinia, tola ubulöʼö lala wangera-ngeragu si lö atulö ba aboto ba dödögu hewisa wamaigi Yehowa yaʼo.” Imane Eva si no mututunö moroi yawa, ”Ero bongi, uʼangerönusi hewisa gera-era Yehowa. Daʼö zangaʼaroʼö famatigu ba itugu urasoi waʼahono dödö.”

14. Hadia mbuania na asese mangandrö ita?

¹⁴ Böi böhöli wangandrö. (1 Te. 5:17) Na omasi ita fahuwu ba niha böʼö, moguna asese fahuhuo ita khönia ba tatutunö nösi dödöda. Simanö göi, na omasi ita itugu aro wahuwusada khö Yehowa, moguna asese mangandrö ita khönia ba tatutunö hadia nirasoida, niʼera-erada, hegöi faʼaombö-aombö dödöda. Na tafalua daʼö, no taforomaʼö wa faduhu dödöda khönia ba aboto ba dödöda wa iʼomasiʼö ita. (Si. 94:17-19; 1 Yo. 5:14, 15) Imane Yua si no mutötöi moroi yawa, ”Nitutunögu khö Yehowa ero na mangandrö ndraʼo, tenga ha salua khögu ba zi maʼökhö daʼö, hizaʼi ututunö göi khönia hadia niʼera-eragu hegöi nirasoigu. Ba gafuriata, urasoi wa Yehowa andrö Ama sebua faʼomasi ba ndraononia, tenga kafalo.”​—Faigi kotak ” Hadia No Öbaso?”

15. Hewisa wangoromaʼö Yehowa wa iʼameʼegö tödö ita?

¹⁵ Fariawö khö ndra talifusöda. Yaʼira andrö buala moroi khö Yehowa. (Yak. 1:17) Me iʼamualagö khöda Yehowa ndra talifusöda sangomasiʼö yaʼita ”ero inötö” ba mbanua niha Keriso, daʼö dandra wa iʼameʼegö tödö ita. (Amd. 17:17) Ba zura nifaʼoheʼönia ba mbanua niha Keriso ba Golose, itötöi ösa ndra talifusönia Faulo si lö tebulö falulu fohalöwö khönia, ba ifotöi ira ’umbu wondrara dödönia’. (Kol. 4:10, 11) Yesu manö, moguna khönia wanolo moroi khö ndra si fahuwu khönia, he si so ba zorugo hegöi ba  gulidanö. Ba iʼandrö sibai saohagölö ba wanolo nibeʼera.​—Luk. 22:28, 43.

16. Hana wa itugu ahatö ita khö Yehowa na aro wahuwusada khö ndra talifusöda?

¹⁶ Hadia omasiʼö öʼandrö ba ötema wanolo moroi khö ndra talifusöda ba mbanua niha Keriso? Na tatutunö waʼaombö-aombö dödöda khö dalifusöda saro ba wamati, tenga daʼö geluahania wa ambö wamatida, hizaʼi tobali folumöʼöda daʼö. Imane James si no mutötöi moroi yawa, ”No sambua fanolo khögu me sökhi wahuwusagu khö ndra talifusöda saro ba wamati. Na abu dödögu börö gera-eragu si lö tefaudu, lahaogö lafondrondrongo nösi dödögu ira si fahuwu khögu ba lafasugi ba dödögu wa laʼomasiʼö ndraʼo. Buania, tola urasoi wa iʼomasiʼö ba iʼameʼegö tödö ndraʼo Yehowa.” Sindruhu-ndruhu wa moguna sibai taʼaroʼö ba tarorogö wahuwusada khö ndra talifusöda!

17-18. Haniha zinangea tafondrondrongo, ba hadia mbörö?

¹⁷ Omasi Zatana na taböhöli wamalua satulö. Omasi göi ia na faduhu dödöda wa lö iʼomasiʼö ita Yehowa ba tenga sinangea tatema wangorifi moroi khönia. Hizaʼi, simane si no tatutunö mege no, lö atulö daʼö.

¹⁸ Iʼomasiʼö sibai ndraʼugö Yehowa. No sebua böli ndraʼugö ba wamaiginia. Na öʼoʼö niwaʼönia, ”lö tebulö [ndraʼugö] ba waʼomasinia” sagötö faʼara, simane Yesu. (Yoh. 15:10) Börö daʼö, böi fondrondrongo niwaʼö Zatana, ba böi tehegö mowaʼa ba dödöu gera-era si lö tefaudu. Hizaʼi, fondrondrongo niwaʼö Yehowa. Lö tebulö ifaigi gamuata si sökhi niʼokhögömö. Ba yafaduhu dödöu wa ”iʼomasiʼö nono mbanuania Yehowa”, farahu ba daʼö ndraʼugö!