Alimagö sibai, me 13 fakhe ndröfigu, lö saʼae aro wahuwusagu khö Yehowa. Na ufaigi tödögu, tola lafalua fefu zomasi-masi dödöra ira awögu sekola, ba omasido göi urasoi zimane daʼö. Urasoi wa oya sibai zi tebai ufalua börö gamakhoita nitatugöi ndra satuagu hegöi goi-goi niha Keriso, ba uwaʼö göi tödögu wa abua sibai wamalua halöwö ba wamati. Lö tebulö faduhu dödögu wa so Yehowa. Hizaʼi, urasoi wa lö aro wahuwusagu khönia.

Enaʼö lö lafotöi ndraʼo sanuriaigö si no mamöhöli halöwö ba wamati, itaria möido manuriaigö. Hizaʼi, hewaʼae na möido manuriaigö, lö irai ufaʼanö ndraʼo. Daʼö mbörö wa itaria lö uʼila hadia zinangea uwaʼö na fahuhuo ndraʼo ba niha böʼö. Lua-luania, lö usöndra niha si tola ufuli ufalukhaisi mazui ufahaʼö ba Zura Niʼamoniʼö, ba taya waʼomuso dödögu. Itugu lö omasido manuriaigö. Asese manofu-nofu dödögu, ’Hana wa tola owölö-ölö niha böʼö ba wanuriaigö ba omuso dödöra wamalua daʼö?’

Me 17 fakhe ndröfigu, omasido ufalua fefu zomasi-masi dödögu. Börö daʼö, uhalö gangetula findra ba Australia. Me mofanödo moroi  ba nomo, abu sibai dödö ndra satuagu ba so khöra waʼaombö dödö. Hizaʼi, lawaʼö tödöra wa lö tebulö ufosumange Yehowa.

Sindruhunia, itugu awuwu wamatigu me so ndraʼo ba Australia. Lö asese uʼondrasi gangowuloa, ba fahuwu ndraʼo khö ndra si bohou ebua samodombua tödö. Simane yaʼo, lö tebulö laʼondrasi gangowuloa, hizaʼi omasi-masi ira maminu ba möi ira ba kelab malam. Me luo daʼö, omasido urasoi fefu waʼomuso dödö si so ba gulidanö andre, ba lö göi omasido uröi zindruhu. Hewaʼae simanö, lö urasoi waʼomuso dödö.

Mato dua fakhe aefa daʼö, falukha ndraʼo khö dalifusöda ira alawe sotöi Tamara. Me falukha ndraʼaga, ibörögö uʼangeragö sanandrösa ba waʼaurigu me luo daʼö, hewaʼae na lö iʼila wa molua-lua khögu duma-duma nibeʼenia. Ba ginötö daʼö, fagölö nahia waʼatoröigu khö zi daöfa talifusöda ira alawe si lö sangowalu. Makaoni zatua samasui hegöi foʼomonia sotöi Tamara enaʼö toröi ira ba nomoma mato samigu. Me ifalua halöwö soguna ba mbanua niha Keriso foʼomonia, lö fao Tamara. Börö daʼö, tola fahuhuo ndraʼaga khönia. Omuso sibai dödögu. Tamara andrö niha si toʼölö manö ba lö alawö niha fahuhuo khönia. Ahöli sibai dödögu börö me tola ifaʼiki ndraʼaga na fariawöga khönia hewaʼae na niha saro ba wamati ia.

Tamara andrö niha sowölö-ölö. Terou dödöda wamaigi faʼomasinia ba zindruhu hegöi faʼowölö-ölönia weʼamöi manuriaigö. Omuso dödönia wameʼe fondrege zi sökhi khö Yehowa, tenga simane yaʼo si lö faʼomuso dödö ba wanuriaigö börö me asala noa wamaluagu daʼö. Toröi-röi ba dödögu fefu zi sökhi nifaluania hegöi faʼomuso dödönia ba wamalua daʼö. Börö duma-duma nibeʼenia, tola aboto ba dödögu wa atulö wehede si so ba Zura Niʼamoniʼö wa omasi Yehowa na tafosumange ia ”si fao faʼomuso dödö” ba ’taʼowua-wuaʼö dödöda’.​—Si. 100:2.

Omasido urasoi waʼomuso dödö simane nirasoi Tamara, hizaʼi oya zinangea ubulöʼö. Me no tölu fakhe, ibörögö uzara-zara wombulöʼö faʼaurigu. Ibörögö ufaʼanö ndraʼo fatua lö möido  manuriaigö, ba itaria faodo merintis ekstra. Buania, lö saʼae khögu fanizi-nizi na möido manuriaigö ba itugu barani ndraʼo. Ba itugu asese uʼogunaʼö Zura Niʼamoniʼö, itugu omuso dödögu wanuriaigö. Lö ara aefa daʼö, uhalö gangetula enaʼö lö tebulö merintis ekstra ndraʼo.

Ibörögö göi fariawö ndraʼo khö ndra talifusöda gofu hawaʼalawa ndröfira. Omuso dödöra wamalua halöwö ba wamati ba laʼofönaiʼö Yehowa ba waʼaurira. Börö duma-duma nibeʼera, ibörögö uʼangeragö hadia zabölö uʼofönaiʼö ba waʼaurigu. Ibörögö göi ubaso Zura Niʼamoniʼö ero maʼökhö. Itugu ara, itugu omasido wanuriaigö, ba uhalö gangetula wangai halöwö tobali perintis biasa. Ba gafuriata, ifuli urasoi waʼomuso dödö ba aro wahuwusagu khö ndra talifusöda ba mbanua niha Keriso.

Döfi aefa daʼö, falukha ndraʼo khö Alex, samösa talifusöda ira matua si sökhi tödö ba sangomasiʼö Yehowa hegöi halöwö fanuriaigö soroi ba dödö. Yaʼia andrö samösa enoni, ba no merintis ia ba zi önö fakhe faʼara. No göi irai merintis ia ba Malawi mato walu waŵa. Duma-duma ndra utusan injil si so ba daʼö zamarou tödönia enaʼö lö tebulö iʼofönaiʼö Yehowa ba waʼaurinia.

Mangowalu ndraʼaga me 2003. Aefa daʼö, lö tebulö mangai halöwö ndraʼaga safönu inötö. Oya sibai howu-howu nibeʼe Yehowa khöma, ba oya waʼomuso dödö nirasoima.

Me 2009, matema undranga ba wangai halöwö tobali utusan injil ba Timor-Leste, sambua soi side-ide si fasinga ba soi Indonesia. Tokea sibai ndraʼaga, omuso dödöma, hizaʼi so göi khöma waʼaombö-aombö dödö. Lima waŵa aefa daʼö, ofeta ndraʼaga ba Dili, ibu kota Timor-Leste.

Faböʼö sibai waʼaurima ba daʼö. Moguna mafaudugö waʼaurima ba zi toʼölö mufalua, li, ö, hegöi nahia si bohou. Na möiga manuriaigö,  asese falukha ndraʼaga ba niha si numana sibai, si lö sekola, hegöi niha nifakao. Börö wasuwöta hegöi faʼakaliru ba soi daʼö, ato göi niha si cacat hegöi niha si tebai mangolifugö famakao si no irai larasoi. *

Omuso sibai dödögu wanuriaigö ba daʼö! Duma-dumania, no irai falukha ndraʼo khö nono alawe sotöi Maria *, 13 fakhe ndröfinia. No mate mamania me hauga fakhe silalö, ba lö asese falukha ia khö bapania. Si lö tatu waʼaurinia simane iraono si fagölö döfi khönia. Samuza inötö, no irai meʼe ia me itutunö khögu nirasoinia. Hizaʼi, maʼifu na uʼila hadia niwaʼönia, börö me lö nasa onekhe ndraʼo fahuhuo ba li niʼogunaʼönia. Börö daʼö, mangandrö ndraʼo khö Yehowa enaʼö tola utolo Maria. Aefa daʼö, ubaso khönia ngawalö ayati sangabölöʼö yaʼia. Itugu ara, tebulö gamuata, fonukha, hegöi lala waʼauri Maria börö zindruhu andrö. Iadaʼa, no tebayagö ia idanö, ba ifahaʼö niha böʼö ba Zura Niʼamoniʼö. No iʼokhögö Maria nösi nomo sebua ba wamati, ba irasoi waʼomasi.

Sindruhu-ndruhu wa ifahowuʼö Yehowa halöwö fanuriaigö nifalua ba Timor-Leste. Hewaʼae na ato zanuriaigö sawena tebayagö idanö barö zi fulu fakhe andre, ato ba gotaluara zi no mangai halöwö tobali perintis, enoni, mazui satua sokubaloi. So göi ösa zohalöwö ba RTO ba wamoʼeluaha ö ba wamati ba ngawalö li niʼogunaʼö ba mbanua side-ide. Omuso sibai dödögu me urongo zinunö niʼanunöisira ba gangowuloa, me uʼila laboho mbawara, hegöi me unehegö waʼatedoura ba wamati.

Sindruhu sa, faböʼö sibai waʼaurima ba Timor-Leste, na mafaedogö daʼö ba waʼaurima me soga ba Australia. Itaria, moguna matörö moto sewa. Fasösö sibai niha yawa, ba so zolohe iʼa soköli hegöi sayu moroi ba fasa. Asese göi madöniaʼö wamahaʼö ba Zura Niʼamoniʼö ba nomo side-ide, ba aukhu sibai ba daʼö, fatambu zalonia, ba asese möi yomo manu. Hewaʼae simanö, sindruhu-ndruhu urasoi waʼomuso dödö ba waʼaurigu!

Na itörö tödögu zalua khögu ba zilalö, uʼandrö sibai saohagölö ba wamorege si no lafalua ira satuagu. Laforege wamahaʼö yaʼo sanandrösa ba goroisa Yehowa, ba lö tebulö latolo ndraʼo hewaʼae na lö saʼae aro wahuwusagu khö Yehowa me awuyu-wuyu ndraʼo. Urasoi samösa wa sindruhu wehede si so ba Gamaedola 22:6. Omuso sibai dödö ndra satuagu khögu hegöi Alex börö me fao ndraʼaga wamosumange Yehowa. Iʼotarai 2016, fao ndraʼo khö Alex ba wamalua halöwönia tobali satua samasui. Mangai halöwö ndraʼaga ba wilayah gödo ndraha Australasia.

Sindruhu sa, lö omasido wanuriaigö ba zilalö, hizaʼi iadaʼa omasido sibai halöwö fanuriaigö! Tola aboto ba dödögu wa gofu hadia zalua ba waʼaurida, tola tarasoi waʼomuso dödö sindruhu na tafosumange Yehowa soroi ba dödö. Daʼö nirasoigu. No fao ndraʼo khö Alex ba wamosumange Yehowa barö zi 18 fakhe andre, daʼö ginötö safönu faʼomuso dödö ba waʼaurigu. Iadaʼa, aboto ba dödögu hadia geluaha wehede zanura sinunö sotöi Dawido, me imane khö Yehowa, ”Omuso dödö niha na lalumöʼö ira khöu; si lö tebulö waʼomuso dödöra. . . . Ba niha sangomasiʼö töimö, latema dania waʼomuso dödö börö ndraʼugö.”​—Si. 5:11.