1-2. Enaʼö aboto ba dödöda geluaha wehede si so ba 1 Fetero 2:21, hadia gamaedola si tola manolo yaʼita?

KHALAIGÖ na fao ndraʼugö ba zi sambua ngawawa si möi manösö hili. Mitörö nahia safönu ametaʼuö ba si no ibalugö salju. So fönami samösa zanuturu lala si no toʼölö ba wanösö hili andrö. Me mowaö-waö ia, toröi lahe gahenia ba dete salju. Ba zi lö ödöna-döna, lö saʼae oroma khöu niha sameʼe fanuturu lala andrö! Hizaʼi, lö ataʼu ndraʼugö. Fefu ami si fao ba ngawawa andrö, mihaogö sibai wanara lahenia.

² Tola muʼamaedolagö gulidanö si lö sökhi andre simane nahia safönu ametaʼuö, ba muʼamaedolagö niha Keriso sindruhu simane niha sanösö hili. Taʼandrö sibai saohagölö khö Yehowa börö me no ibeʼe khöda Zanuturu Lala soʼahonoa, yaʼia daʼö Ononia, Yesu Keriso, ba tola tatara lahenia. (1 Fe. 2:21) Moloʼö sambua referensi Zura Niʼamoniʼö, me isura nösi 1 Fetero 2:21 sinenge sotöi Fetero, iʼamaedolagö Yesu simane niha sameʼe fanuturu lala. Simane niha sameʼe fanuturu lala sondröi lahe gahenia, no göi iröi khöda lahenia Yesu si tola taʼoʼö. Iadaʼa, datatutunö zi tölu wanofu andre: Hadia geluahania wanara lahe Yesu? Hana wa moguna tatara lahe Yesu? Ba hewisa wamaluada daʼö?

3. Hadia geluahania wanara lahe zi samösa niha?

³ Hadia geluahania wanara lahe zi samösa niha? Ba Zura Niʼamoniʼö, asese manandrösa ngawua wehede ”lala” ba nifalua zi samösa niha sagötö faʼaurinia. (1 Mo. 6:9; Amd. 4:26) Duma-duma nibeʼe zi samösa niha tola muʼamaedolagö daʼö simane lahe niröinia me mowaö-waö ia. Börö daʼö, na tatara  lahe zi samösa niha, eluahania taʼoʼö duma-duma nibeʼenia.

4. Hadia geluahania wanara lahe Yesu?

⁴ Hadia geluahania wanara lahe Yesu? Eluahania, taʼoʼö duma-duma nibeʼe Yesu. Ba ayati si tobali tuho artikel andre, itutunö Fetero duma-duma nibeʼe Yesu, sangoromaʼö faʼanau gölö hewaʼae na tefakao ia. Hizaʼi, oya nasa danö böʼö si tola taʼoʼö khö Yesu. (1 Fe. 2:18-25) Sindruhunia, no tobali duma-duma khöda Yesu ba ngawalö hadia ia niwaʼönia hegöi nifaluania.

5. Hadia tola taʼoʼö duma-duma nibeʼe Yesu hewaʼae na niha si lö moʼahonoa ita? Tutunö.

⁵ Hadia tola taʼoʼö duma-duma nibeʼe Yesu hewaʼae na niha si lö moʼahonoa ita? Tola. Iʼamenesi ita Fetero ’enaʼö tahaogö wanara’ lahe Yesu, tenga enaʼö moʼahonoa wanarada lahenia. Börö daʼö, hewaʼae na lö moʼahonoa ita, tola tatara lahe Yesu na taforege ba woloʼö duma-duma nibeʼenia. Na tafalua daʼö, no taʼoʼö mene-mene nibeʼe zinenge sotöi Yohane me imane, ’Miʼoʼö gamuata Yesu.’​—1 Yo. 2:6.

6-7. Hana wa itugu ahatö ita khö Yehowa na tatara lahe Yesu?

⁶ Na tatara lahe Yesu, tola itugu ahatö ita khö Yehowa. Hadia mbörö? Si oföna, no ibeʼe khöda duma-duma Yesu ba wangomusoiʼö tödö Yehowa sagötö faʼaurinia. (Yoh. 8:29) Börö daʼö, na taʼoʼö duma-duma nibeʼe Yesu, tola göi taʼomusoiʼö dödö Yehowa. Ba tola faduhu dödöda wa ahatö Namada si so ba zorugo ba niha samorege tobali si fahuwu khönia.​—Yak. 4:8.

⁷ Si dua, moʼahonoa woloʼö Yesu duma-duma Namania. Daʼö mbörö wa tola imane Yesu, ”Dozi si no mangila yaʼo ba no göi iʼila Nama.” (Yoh. 14:9) Sökhi gamuata Yesu ba niha böʼö. Duma-dumania, iforomaʼö waʼahakhö dödö ba niha si göna bou auri, itöfaigö ba dödönia zalua khö zi samösa ira  alawe si göna fökhö sabölö-bölö, ba ahakhö dödönia ba niha sabu tödö börö waʼamate niha niʼomasiʼöra. Na taʼoʼö gamuata si sökhi niforomaʼö Yesu andrö, no göi taʼoʼö duma-duma Yehowa. (Mrk. 1:40, 41; 5:25-34; Yoh. 11:33-35) Na lö tebulö taʼoʼö duma-duma Yehowa, itugu aro wahuwusada khönia.

8. Hana wa tola ’takalaisi’ gulidanö na tatara lahe Yesu?

⁸ Na tatara lahe Yesu, lö ifangoloi dödöda ulidanö si lö sökhi andre. Ba mbongi safuria fatua lö mate ia, imane Yesu, ”No ukalaisi gulidanö.” (Yoh. 16:33) Eluahania, no itimbagö fefu wondrönisi dödö si so ba gulidanö andre, yaʼia daʼö lala wangera-ngera, ohitö dödö, hegöi amuata niha gulidanö. Lö irai iʼolifugö hadia mbörö wa mufatenge ia ba gulidanö, yaʼia daʼö ba wangamoniʼö töi Yehowa. Hewisa göi ita? Ba gulidanö andre, oya zi tola möi famangoloi dödöda. Hewaʼae simanö, moguna taʼosambuaʼö dödöda ba wamalua ohitö dödö Yehowa. Na tafalua daʼö, tola göi ’takalaisi’ gulidanö andre.​—1 Yo. 5:5.

9. Hadia zinangea tafalua enaʼö lö tebulö tatörö lala saekhu ba waʼauri si lö aetu?

⁹ Na tatara lahe Yesu, tola tasöndra waʼauri si lö aetu. Samuza inötö, so samösa ndra matua si kayo sanofu khö Yesu hewisa enaʼö tola isöndra waʼauri si lö aetu. Imane khönia Yesu, ”Oʼö ndraʼo.” (Mat. 19:16-21) Me fahuhuo ia ba niha Yahudi si lö faduhu tödö wa yaʼia andrö Keriso, imane Yesu, ”Biri-birigu . . . laʼoʼö ndraʼo. Ubeʼe khöra waʼauri si lö aetu.” (Yoh. 10:24-29) Ba me fahuhuo ia khö Nikodemo, samösa Sangetuʼö Huku sadöni tödö ba wamahaʼö nifaʼemania, iwaʼö Yesu wa ”dozi samati khönia, ba lasöndra waʼauri si lö aetu”. (Yoh. 3:16) No taforomaʼö wa mamati ita khö Yesu na tafalua zi no ifahaʼö khöda ba taʼoʼö duma-duma nibeʼenia. Na tafalua daʼö, lö tebulö tatörö lala saekhu ba waʼauri si lö aetu.​—Mat. 7:14.

10. Hadia zinangea tafalua enaʼö itugu ’aboto ba dödöda’ haniha Yesu? (Yohane 17:3)

¹⁰ Enaʼö tola tahaogö wanara lahe Yesu, moguna ’aboto ba dödöda’ haniha ia. (Baso Yohane 17:3.) Eluahania, moguna tafahaʼö ita sanandrösa ba gamuatania, lala wangera-ngerania, hegöi goi-goi niʼoʼönia. Lö tebulö tafalua daʼö enaʼö aboto ba dödöda haniha ia. Hewaʼae na no ara faböbö ita ba zindruhu, böi tebulö taforege enaʼö itugu aboto ba dödöda haniha Yehowa hegöi Ononia.

11. Hadia nösi Injil si öfa ngawua?

¹¹ No ihenaigö khöda Yehowa Injil si öfa ngawua ba Daromalinia enaʼö tola taʼokhögö waʼaboto ba dödö sanandrösa khö Nononia. Bakha ba Injil andrö, tola tabaso waö-waö waʼauri hegöi fanuriaigö nifalua Yesu. Tola göi taʼila hadia manö niwaʼönia, nifaluania, hegöi nirasoinia. Tola tawaʼö, no toröi lahe Yesu bakha ba Injil si öfa ngawua andrö. Na tabaso fefu daʼö, tola ’tatörö-törö tödöda’ duma-duma nibeʼenia. (Heb. 12:3) Baero  daʼö, itugu aboto göi ba dödöda haniha Yesu. Buania, tola tahaogö wanara lahenia.

12. Hewisa enaʼö sindruhu-ndruhu tatema mbua moroi ba Injil si öfa ngawua?

¹² Hewisa enaʼö sindruhu-ndruhu tatema mbua moroi ba wombaso Injil si öfa ngawua? Lö obönö na ha tabaso nösinia. Moguna tafahaʼö ita ba daʼö ba taʼangerönusi fefu zi no tabaso. (Fatimbaisi Yosua 1:8, nisura ba gahe zura.) So dombua ngawalö zi tola manolo yaʼita ba woʼangerönusi Injil si öfa ngawua andrö hegöi ba wamalua si no tafahaʼö yaʼita. Hadia manö daʼö? Datatutunö.

13. Hewisa enaʼö tola takhalaigö waö-waö nibasoda bakha ba Injil?

¹³ Si oföna, khalaigö waö-waö nibasomö bakha ba Injil. Tandraigö faigi, fondrondrongo, ba rasoi nidunö-dunö ba waö-waö andrö. Börö daʼö, moguna öfareso publikasi si no ihenaigö organisasi Yehowa. Osisiʼö hadia zalua fatua lö alua hegöi me no alua waö-waö nidunö-dunö ba daʼö. Alui waʼaboto ba dödö tanö böʼö sanandrösa ba niha hegöi nahia nitutunö ba daʼö. Fatimbaisi göi hadia niwaʼö Injil tanö böʼö sanandrösa ba zalua andrö. Itaria, so zadöni dödöda si no isura si samösa sanura Injil, si lö nisura zanura Injil tanö böʼö.

14-15. Hewisa enaʼö tola tafalua ba waʼaurida wamahaʼö si no tatema moroi ba Injil nibasoda?

¹⁴ Si dua, falua wamahaʼö si no ösöndra moroi ba Injil nibasomö. (Yoh. 13:17) Na no öfahaʼö ndraʼugö sanandrösa ba waö-waö nitutunö bakha ba Injil, sofu khöu samösa, ’Moroi ba waö-waö andre, hadia wamahaʼö si tola ufalua ba waʼaurigu? Hewisa enaʼö tola uʼogunaʼö waö-waö andre ba wanolo niha böʼö?’ Angeragö atö haniha zi tola ötolo. Aefa daʼö, na tefaudu ginötö, tutunö khönia si fao faʼomasi hadia manö wamahaʼö si no öhalö.

¹⁵ Iadaʼa, datatutunö waö-waö sanandrösa khö lakha mbanua niʼila Yesu ba gosali. Aefa daʼö, taʼogunaʼö lala si dombua sawena tatutunö ba wamahaʼö yaʼita sanandrösa ba waö-waö andrö.

16. Tutunö hadia zi tola ökhalaigö ba waö-waö nisura ba Mareko 12:41.

¹⁶ Khalaigö waö-waönia. (Baso Mareko 12:41.) Khalaigö atö hadia zalua me 11 Nisana 33 M, ambö samigu fatua lö mate Yesu. Me luo daʼö, oya ginötö niʼogunaʼö Yesu ba wamahaʼö niha ba gosali. Hizaʼi, ato zondröniaʼö ba agama sanaisi yaʼia. So ösa ba gotaluara zanofu khö Yesu hezo moroi waʼabölönia. So göi ösa ba gotaluara zameʼe khönia fanofu-nofu sagabua enaʼö teʼala ia ba wehedenia samösa. (Mrk. 11:27-33; 12:13-34) Aefa daʼö, möi Yesu ba nahia tanö böʼö si so ba gosali, te ba Golayama Ndra Alawe. Ba daʼö, tola iʼila naha wameʼe tolo-tolo. Modadao ia ba daʼö, ba ibörögö inehegö niha sameʼe tolo-tolo. Iʼila wa oya sibai gefe loga nibeʼe niha si kayo. Te tola irongo Yesu me moriti-riti gefe andrö nibeʼe bakha ba naha wameʼe tolo-tolo.

17. Hadia nifalua lakha mbanua nitutunö ba Mareko 12:42?

¹⁷ Baso Mareko 12:42. Lö ara aefa daʼö, so samösa ”lakha mbanua” si numana niʼila Yesu. (Luk. 21:2) Te lö ibönö gefe lakha mbanua andrö ba wowöli soguna khönia. Hewaʼae simanö, omasi ia ibeʼe dolo-tolo ba gosali. Ifahatö ia ba naha wameʼe tolo-tolo, ba ibeʼe bakha dombua gefe loga side-ide ba zi lö laʼila niha sato. Te lö terongo riti-riti gefe loga andrö me ibeʼe bakha ba naha dolo-tolo. Iʼila Yesu wa loga lepton nibeʼe ndra alawe andrö, daʼö gefe loga fondrege zide-ide me götö daʼö. Lö ibönö gefe nibeʼenia andrö ba wowöli si sambua ngawua siliwi, hewaʼae na daʼö wofo fondrege zide-ide böli si tola muʼa.

18. Moloʼö Mareko 12:43, 44, hadia niwaʼö Yesu sanandrösa ba dolo-tolo nibeʼe lakha mbanua andrö?

¹⁸ Baso Mareko 12:43, 44. Toröi-röi ba dödö Yesu nifalua lakha mbanua andrö. Börö daʼö, ikaoni ndra nifahaʼönia, ba iwaʼö khöra enaʼö lanehegö lakha mbanua andrö. Imane khöra, ”Abölö ebua nibeʼe lakha mbanua andre moroi khö ndra niha daʼö.” Aefa daʼö itutunö, ”Labeʼe [ira niha si kayo andrö] zi töra moroi ba gokhötara. Hizaʼi, hewaʼae numana lakha mbanua daʼö, no ibeʼe fefu gefenia böli zoguna khönia menaʼö.” Me ibeʼe lakha mbanua si lö faröi andrö zi toröi gefenia me luo daʼö, no iforomaʼö wa sindruhu-ndruhu iʼodaligö Yehowa. Faduhu dödönia wa hasambalö ibönökhi zoguna khönia Yehowa.​—Si. 26:3.

19. Hadia wamahaʼö si tola tahalö moroi ba wehede Yesu sanandrösa khö lakha mbanua si numana andrö?

¹⁹ Falua wamahaʼö si no ösöndra ba waö-waö nibasomö. Sofu khöu samösa, ’Hadia wamahaʼö si tola uhalö moroi ba wehede Yesu sanandrösa khö lakha mbanua si numana andrö?’ Angeragö hewisa waʼauri lakha mbanua andrö. Tatu manö omasi ia na abölö oya zi tola ibeʼe khö Yehowa. Hizaʼi, hewaʼae na tebai ifalua daʼö, iforege ba wameʼe fondrege zi sökhi khö Yehowa. Aboto ba dödö Yesu wa no sebua böli dolo-tolo nibeʼe lakha mbanua andrö ba wamaigi Namania. Ba waö-waö andrö, so sambua wamahaʼö si tohude si tola tahalö: Omasi Yehowa na tabeʼe khönia wondrege zi sökhi, yaʼia daʼö na tafalua halöwö ba wamati moroi siʼaikö ba dödöda hegöi nosoda maʼasambua. (Mat. 22:37; Kol. 3:23) Omuso dödö Yehowa na taforege ba wamosumange yaʼia! Tefarahu ba daʼö ginötö hegöi faʼabölö niʼogunaʼöda ba wamosumange yaʼia. Duma-dumania, na möi ita manuriaigö hegöi na möi ita ba gangowuloa.

20. Hewisa enaʼö tola öfalua wamahaʼö nihalöu moroi ba waö-waö lakha mbanua andrö? Beʼe duma-duma.

²⁰ Hewisa enaʼö tola öfalua wamahaʼö nihalöu moroi ba waö-waö lakha mbanua andrö?  Angeragö atö haniha manö zambö faduhu tödö wa no sebua böli halöwö ba wamati nifaluara föna Yehowa. Duma-dumania, te so samösa dalifusöda ira alawe si no alawa döfi, si tebai mamalua halöwö fanuriaigö simane si tola ifalua ba zilalö börö me itugu tebai mbotonia. Tola manö itahi-tahigö ia tödönia mazui irasoi wa lö moguna ia saʼae. Mazui, te so samösa dalifusöda ira matua si göna fökhö sabölö-bölö. Tola manö ide-ide dödönia börö me itaria tebai möi ia ba gangowuloa. Na so ndra talifusöda niʼilau sorasoi abula dödö simane daʼö, rara dödöra faoma ’fehede si sökhi si möi famarou dödö’. (Ef. 4:29) Fatunö khöra hadia wamahaʼö si tola öhalö moroi ba waö-waö lakha mbanua si numana andrö si tola mangabölöʼö yaʼira. Buania, tola öfaduhuʼö ba dödöra wa omuso dödö Yehowa khöra börö me no labeʼe khönia wondrege zi sökhi. (Amd. 15:23; 1 Te. 5:11) Moguna ösuno ndra talifusöda samalua fondrege zi sökhi khö Yehowa, he na oya zi tola lafalua mazui löʼö. Na öfalua daʼö, no öhaogö wanara lahe Yesu.

21. Me no tatutunö artikel daʼa, hadia gangetula nihalöu?

²¹ Taʼandrö sibai saohagölö me oya wamahaʼö si tola tahalö sanandrösa khö Yesu bakha ba Injil. Daʼö mbörö wa tola taʼoʼö duma-duma nibeʼenia, mazui tahaogö wanara lahenia. Na tafalua wamahaʼö samösa mazui Famahaʼö zi Sambua Omo, tola tatandraigö wamahaʼö yaʼita ba Injil si öfa ngawua. Böi olifu ita wa moguna takhalaigö waö-waö nibasoda ba tafalua zi no tafahaʼö yaʼita enaʼö tola tatema mbua moroi ba waö-waö andrö. Baero ba woloʼö hadia nifalua Yesu, moguna göi tafondrondrongo hadia niwaʼönia. Ba artikel aefa daʼa, tatutunö hadia wamahaʼö si tola tahalö moroi ba wehedenia safuria fatua lö mate ia.