OMASI Lowalangi Yehowa na niha samosumange ya’ia larasoi wa’ohahau dödö. Omasi ia na faoma laforege ba wondrorogö fa’atulö. Na lafalua zimane da’ö, so wa’atulö ba mbanua niha Keriso. Buania, ato niha sadöni tödö ba we’amöi ba mbanua niha Keriso.

Duma-dumania, so samösa duku samadöhö fökhö ba Madagaskar, inehegö wa’atulö salua ba gotalua nono mbanua Yehowa. Imane tödönia, ’Na lawa’ö khögu ba wamili, agama da’a nifiligu.’ Andrö wa iböhöli wamosumange bekhu, i’ehaogö wangowalunia ena’ö tefaudu ba zi no iwa’ö Sura Ni’amoni’ö, ba ibörötaigö ifosumange Yehowa, Lowalangi wa’atulö.

Simane ira matua da’a, so ngahönö niha ero röfi si fao ba mbanua niha Keriso ba lasöndra wa’atulö ni’alu-aluira. Hiza’i, imane Sura Ni’amoni’ö wa na so ’wa’afökhö dödö hegöi wasosota’ ba mbanua niha Keriso, tola tekiko wahuwusa si no te’a’azökhi ba tola te’asogö gabula dödö. (Yakobo 3:14-16) Hiza’i, ibe’e khöda mene-mene si sökhi Sura Ni’amoni’ö ena’ö tola tatimbagö gabula dödö simane da’ö hegöi ena’ö itugu aro wahuwusada ba gotalua ndra talifusöda. Datatutunö hewisa mene-mene da’a tola manolo ndra talifusöda.

”Abua sibai falulu fohalöwö khö dalifusöda ira matua andrö. No irai fa’uduga ba faoma malau mo’ao-ao. Ba so darua niha si tohare ba lafaigi-faigi ndra’aga.”​—CHRIS.

”So samösa dalifusöda ira alawe, asese fao ndra’aga manuriaigö. Hiza’i, lö sa’ae omasi fao ia khögu manuriaigö. Aefa da’ö, lö omasi ia fahuhuo khögu. Lö u’ila hadia mbörö.”​—JANET.

”Fahuhuodo khö zi darua nawögu ba HP. Me imane zi samösa awögu wa ibunu telefonia, uwalinga sindruhu-ndruhu no ibunu. Ufatou-tou ia khö nawögu si samösa. Hiza’i, sindruhunia lö nibununia telefonia.”​—MICHAEL.

”Ba mbanua niha Keriso si fao ndra’odo, so darua perintis zi fakara-kara. Si samösa, mofönu ia ba niha bö’ö. Ide-ide dödö ndra talifusöda ba nifaluara andrö.”​—GARY.

Fefu da’a hulö tenga abula dödö sebua. Hiza’i, tola manö tobali sokho sebua da’a khö ndra talifusöda si farahu, ba tola mamakiko wa’atulö ba mbanua niha Keriso. Ta’andrö sibai saohagölö börö me la’o’ö goi-goi si so ba Zura Ni’amoni’ö ira talifusöda ba ifuli mangatulö ira. Hadia goi-goi si so ba Zura Ni’amoni’ö si tola manolo ya’ira?

”Böi fasoso ami ba lala!” (I Moze 45:24) Ibe’e mene-mene da’a Yosefo khö ndra talifusönia sangawuli ba nomo namara. Na lö fanaha tödö khö zi samösa niha ba na alio aukhu ia, tola manö itugu lö sökhi zalua. Tola manö mofönu göi niha bö’ö. I’ila Chris wa itaria lö khönia fangide-ngide’ö ba abua khönia ba wolo’ö fanuturu lala. Omasi ia ibulö’ö wa’aurinia, andrö wa i’andrö wa’ebolo dödö khö dalifusöda ira matua si no irai fa’udu ba li khönia. Iforege göi Chris ba wanaha  fönunia. Me i’ila dalifusöda andrö famorege nifalua Chris, ifalua göi zimane da’ö. Iada’a, no mangatulö ira ba falulu fohalöwö ira ba wamosumange Yehowa.

”Na lö famagölö, ba tobali lö boto niwa’ö.” (Gamaedola 15:22) Me lö omasi fahuhuo nawönia khönia, ihalö gangetula Janet ba wamalua hadia niwa’ö ayati da’a. Omasi ia mamagölö mazui fahuhuo khö dalifusöda andrö. Isofu Janet hadia no ifalua zala sangafökhöi’ö tödö dalifusöda ira alawe andre. Faoma no alawö-lawö ira me awena lalau fahuhuo. Hiza’i, lahaogö wahuhuosa irege itugu sökhi zalua. Aboto ba dödö dalifusöda andre wa so khönia wangera-ngera si fasala sanandrösa ba zi no irai alua ba zilalö. Sindruhunia, lö mufalua Janet zala. I’andrö wa’ebolo dödö Janet, ifuli fahuwu ira, ba faoma falulu fohalöwö ira ba wamosumange Yehowa.

”Andrö, na öbe’e game’elau ba naha wame’e sumange, ba na itörö tödöu ba da’ö so hadia ia zinegu dalifusöu khöu, ba röi ba da’ö game’elau föna naha wame’e sumange, ba ae ua, ba atulö’ö ndra’ugö khö dalifusöu.” (Matai’o 5:23, 24) Ibe’e mene-mene da’a Yesu me Fahuhuo ia ba Hili. Me no aefa iwa’ö wehede sagafökhö Michael khö dalifusöda tanö bö’ö, maniasa sibai ia. Ifalua gofu hadia ia zi tola ifalua ena’ö tola te’atulö’ö ira. Andrö wa möi ia khö dalifusöda andrö ba sindruhu-ndruhu i’andrö wa’ebolo dödö. Hadia zalua? Imane Michael, ”Soroi ba dödö ibe’e aefa zalagu andrö talifusöda.” Ifuli fahuwu ira.

”Faoma mibologö dödömi khö nawömi, ba faoma mi’efa’ö zala nawömi khömi, na so zinegu zamösana khö nawönia.” (Kolose 3:12-14) Hadia itörö tödömö zi darua perintis si fakara-kara nitutunö moroi siawa? Ihaogö satua sokubaloi ba wanolo ya’ira ena’ö la’ila wa tola afökhö ba tetutu dödö ndra talifusöda tanö bö’ö ba nifaluara. Ibe’e khöra mene-mene ena’ö so khöra wa’ebolo dödö ba faoma larorogö wa’atulö ba mbanua niha Keriso. Latema’ö ba lafalua mene-mene nibe’e zatua sokubaloi andrö. Iada’a, falulu fohalöwö ira ba wamalua halöwö fanuriaigö turia somuso dödö.

Mene-mene si so ba Kolose 3:12-14, tola möi fanolomö ena’ö ö’okhögö wangide-ngide’ö, fa’edöna ba wangefa’ö zala niha sangafökhöi’ö dödömö, hegöi ena’ö lö ö’angera-ngeraigö zalua andrö. Hiza’i, hewisa na tebai ta’efa’ö zala niha hewa’ae no taforege ba wamalua da’ö? Goi-goi Zura Ni’amoni’ö ba Matai’o 18:15 möi fanoloda. Hewa’ae huhuo Yesu ba ayati da’ö sanandrösa ba horö sebua, itutunö göi hadia zinangea tafalua na so watitisada khö ndra talifusö tanö bö’ö. Si fao fangide-ngide’ö hegöi lala si sökhi, möi ita khö dalifusöda si no fatiti khöda ba tahaogö ta’alui lala ba wanga’asiwaisi salua andrö.

Oya wanuturu lala si sökhi ba si tefaudu ba Zura Ni’amoni’ö. Sabölö tohudenia, ta’odaligö geheha ni’amoni’ö moroi khö Lowalangi irege tola taforoma’ö ”bua-bua geheha”, ya’ia da’ö ’fa’omasi, ba fa’omuso dödö, ba fa’ohahau dödö, ba fa’ebolo dödö, ba fa’asökhi dödö, ba fa’ebua  dödö, ba falöfaröi, ba falömofönu, ba famoni’. (Galatia 5:22, 23) Angeraigö da’a. Tola sökhi wofanö zi sambua mesin na no labe’e oli. Simane da’ö göi, aoha khöda ba wangasiwai fa’afabö’ö hegöi ba wangokhögö fahuwusa si sökhi khö ndra talifusöda na taforoma’ö mbua-bua si sökhi moroi khö Yehowa.

Fefu ita fabö’ö-bö’ö laguda zamösana. Fabö’ö-bö’ö göi mbua-bua, lala wangera-ngera hegöi lala wahuhuosada. Da’a zame’e itugu sökhi ba adöni dödöda ba wariawösa. Hiza’i, da’a göi zanga’asogö fa’afabö’ö wangera-ngera hegöi falöhasara dödö. Samösa satua sokubaloi ibe’e duma-duma wa tola alua da’a. Imane, ”Te abua ba niha saila-aila ba wahuwusa ba niha sonekhe fahuwu. Hulö no ide-ide gamaehutara andre, hiza’i tola tobali abula dödö sebua da’ö.” Hadia tebai fa’awö zi darua niha si fabö’ö mbua-bua andre? Datafaigi darua zinenge si tobali duma-duma khöda. Fetero, niha sanguma’ö hadia zi so ba dödönia. Yohane, samösa talifusöda so’ame’egö tödö niha bö’ö, ba si to’ölönia i’angeraigö wehedenia fatua lö iwa’ö. No aröu faehu lagura. Hiza’i, tola falulu fohalöwö ira ba wamosumange Yehowa. (Halöwö Zinenge 8:14; Galatia 2:9) Alua göi zimane da’ö iada’a. So ndra talifusöda si falulu fohalöwö hewa’ae na fabö’ö lagura.

Hiza’i, hewisa na so samösa niha ba mbanua niha Keriso samalua mazui sanguma’ö fehede sangafökhöi’ö tödömö? Sökhi na ötörö tödömö wa fagölö-gölö mate Keriso salahimi, ba moguna ö’omasi’ö dalifusömö ira matua andrö. (Yohane 13:34, 35; Roma 5:6-8) Lö atulö na öhalö gangetula ba wamöhöli fahuwusa khönia mazui na ö’aröu’ö ndra’ugö khönia. Hiza’i, sofu khöu samösa, ’Hadia no ifalua zala solawa goi-goi moroi khö Yehowa? Hadia soroi ba dödönia  i’afökhöi’ö dödögu? Mazui, hadia alua da’a ha börö me fabö’ö laguma? Sindruhunia, hadia i’okhögö mbua-bua si sökhi si tola u’o’ö?’

Duma-dumania, na omasi ia fahuhuo, hiza’i ya’ugö niha si lö hede-hede, hadia omasi’ö fao khönia ba wanuriaigö hegöi ba wamaha’ö ya’ugö ba nifaluania? Mazui, hewisa na abölö oböwö ia moroi khömö? Hadia ö’ila wa tola owua-wua dödöda na mamuala ita ba niha si no alawa ndröfi, niha sofökhö mazui niha soguna mutolo? Hadia öfaha’ö ndra’ugö ba zi samösa niha ena’ö itugu oböwö? Sabölö tohude, hewa’ae na fabö’ö-bö’ö mbua-buami, osambua’ö dödömö ba mbua-bua si sökhi ni’okhögönia. Hewa’ae na tebai tobali si fahuwu ami, hiza’i tola faoma ahatö ami khö nawömi. Da’a zanga’asogö fa’atulö ba mbanua niha Keriso hegöi khömö samösa.

Ba götö siföföna, so darua dalifusöda ira alawe sotöi Gewodia ba Zitikhe. Sinduruhu-ndruhu fabö’ö lagura. Hiza’i ifarou ira sinenge sotöi Faulo ”ena’ö ha sambua dödö, ba khö Zo’aya”. (Filifi 4:2) Omasi göi ita falulu fohalöwö khö ndra talifusöda ba wamosumange Yehowa hegöi ba wanga’asogö fa’atulö ba mbanua niha Keriso.

Hana wa böi taradö-radö ba wanibo’ö fangera-ngera si sala sanandrösa ba niha bö’ö? Tola tafagölösi dödöda hulö simane go’o si tumbu ba kabu mbunga si sökhi. Na lö alio tasöbi go’o andrö, tola manö ifönui zi sagörö kabu. Simane da’ö göi, na lö taheta wangera-ngera si fasala sanandrösa ba niha bö’ö, tola molua-lua ia ba mbanua niha Keriso. Hiza’i, na ta’omasi’ö Yehowa hegöi ira talifusöda, tafalua fefu hadia zi tola tafalua ba wondrorogö fa’atulö ba mbanua niha Keriso.

Na taforege ba wondrorogö fa’atulö ba niha bö’ö, tatema mbua si sökhi. No irasoi da’a  samösa dalifusöda Samaduhu’ö. Itutunö waö-waö si no irai irasoi imane, ”Ba worasoigu, hulö mane ndraono ndra’odo ibe’e samösa dalifusöda ira alawe. Sindruhu-ndruhu fatimba ba dödögu nifaluania andrö. Itugu ara, itugu fatuwudo khönia, ba ibörötaigö lö u’ame’egö tödö ia. So ba wangera-ngeragu, ’Ya’ia manö lö iforoma’ö wa i’ame’egö tödö ndra’odo, andrö wa lö moguna u’ame’egö tödö göi ia.’”

Aefa da’ö, ifuli i’angeraigö gamuatania talifusöda ira alawe andre ba imane, ”Aboto ba dödögu wa so göi zambö ba mbua-buagu samösa, ba afatö sibai dödögu ba da’ö. U’ila wa moguna ubulö’ö lala wangera-ngeragu. Me no aefa ulau mangandrö khö Yehowa sanandrösa ba zalua andre, ube’e mbuala side-ide khö dalifusöda ira alawe andrö ba usura sambua kartu ba wangandrö fa’ebolo dödönia ba gamuatagu si lö baga. Fatalagu bagi ndra’aga ba fao dödöma ba wangolifugö zalua andrö. I’otarai da’ö, lö sa’ae marasoi gabula dödö tanö bö’ö.”

Fefu ita moguna khöda wa’atulö mazui fa’ahono dödö. Hiza’i, niha sasiliawa ba somasi fahindri tola mamakiko fa’atulö. Ba gulidanö da’a, ato niha samalua simane da’ö. Hiza’i, omasi Yehowa na fabö’ö nono mbanuania. Ba gotalua ndra Samaduhu’ö Yehowa, moguna so wa’atulö ba fahasara dödö. Ifarou dödö Waulo Yehowa ba wanura ba niha Keriso ’ena’ö latörö zinangea lala nikaoni andrö’, ba zi no lakaoni ya’ira. Ifarou göi ira ena’ö lafalua da’a si fao mbua-bua si sökhi. Imane, ”Ya’a’oi so wa lö fayawa ami, awö wa’asökhi dödö, awö wa’ebolo dödö, mibologö dödömi khö nawömi, mi’omasi’ö ia, mi’oigö dödömi ena’ö lö tebulö wahasara dödö, ena’ö faböbö ami, famaböbö fa’atulö andrö.” (Efeso 4:1-3) Sindruhu-ndruhu sökhi sibai ’wamaböbö fa’atulö’ ba gotalua nono mbanua Yehowa. Andrö, datafalua fefu zi tola tafalua ba wanga’aro’ö famaböbö andrö ba data’asiwai fefu gabula dödö mazui fatitisada ba gotalua ndra talifusöda.