1, 2. Hewisa wame’e Yehowa wondrara dödö ba wanandraigö nitaögöda, ba hadia zi no ifabu’u si so ba Daromalinia?

SAMÖSA dalifusöda ira matua si bohou ebua si lö sangowalu, i’angeraigö ngawua wehede si so ba I Korindro 7:28 sanguma’ö wa niha songambatö ”falukha sa wamakao”. Fahuhuo dalifusöda andre khö zi samösa satua sokubaloi si no ara mongambatö. Ilau manofu imane, ”Hadia ’wanandraigö’ da’ö, ba hewisa lala wanaögö ya’ia na ulau mongambatö?” Fatua lö ibe’e wanema li, ifarou ia satua sokubaloi andrö ena’ö i’angeraigö hadia zi no isura sinenge sotöi Faulo, sanguma’ö wa Yehowa andrö no ”Lowalangi wondrara dödö, fefu, sondrara tödöma, ba wa’afökhö andrö fefu” mazui ba wamakao andrö.​—II Korindro 1:3, 4.

² Aboto ba dödöda wa i’omasi’ö ita Amada Yehowa ba ibe’e khöda wondrara dödö ba ginötö tataögö gabula dödö. Te itörö tödömö me ibe’e khöu wamarou dödö Yehowa hegöi fanuturu lala moroi ba Daromalinia. Tola faduhu dödöda wa omasi ia na sökhi wa’aurida, simane nifaluania  ba niha samosumange ya’ia ba götö föna.​—Baso Yeremia 29:11, 12.

3. Hadia wanofu-nofu nitutunö ba wamaha’ö da’a?

³ Si to’ölönia, aoha khöda wanaögö abula dödö hegöi famakao na ta’ila hadia mbörö wa alua da’ö. Börö da’ö, hadia mbörö wa so gabula dödö ba wongambatö hegöi ba nösi nomoda? Haniha duma-duma ba götö Zura Ni’amoni’ö hegöi ba götöda iada’a sanolo ya’ita ba wanöndra fondrara dödö? Datatutunö wanema li moroi ba wanofu-nofu da’a ena’ö ta’ila hewisa wanaögöda abula dödö andrö.

4, 5. Hadia manö gabula dödö nitaögö zi darua niha si no mongambatö?

⁴ Me no aefa iwöwöi ndra alawe siföföna Yehowa, i’ohe ia khö ndra matua andrö, ba tobali fo’omonia. Aefa da’ö imane Yehowa, ”Andrö i’erogö ndra amania inania niha, ba molemba ia ba ngambatönia, ba tobali ha sambua boto ira.” (I Moze 2:24) Sindruhusa wa fefu ita lö mo’ahonoa. (Roma 3:23) Börö da’ö, ba ginötö mangowalu zi darua niha, ira matua ba ira alawe, hasambalö lataögö gabula dödö. Duma-dumania, fatua lö sangowalu zi samösa ira alawe, i’o’ö fefu li zatuania. Hiza’i, imane Taromali Lowalangi wa na no mangowalu, fo’omo ira matua zi tobali högö khö wo’omonia ira alawe. (I Korindro 11:3) Ba wamobörö, te abua khö ndra matua ba wame’e fanuturu lala khö wo’omonia. Ba fo’omo ira alawe te abua göi khönia ba wolo’ö fanuturu lala moroi khö wo’omonia, tenga simane folo’önia khö zatuania. Ba ginötö no mangowalu zi darua niha, tola manö fabö’ö lala wangera-ngerara moroi khö nina mazui khö nama matuara, ba no sambua fanandraigö da’ö.

⁵ Angeraigö göi hadia nirasoi wo’omo ira matua hegöi ira alawe me la’ila wa lö aratö so khöra ndraono. Hewa’ae omuso sibai dödöra, hiza’i si to’ölönia so khöra wa’aombö-aombö dödö. Te manofu-nofu dödöra, hadia lö hadia ia ba dabina andrö, ba hadia lö fökhö nono sawuyu andrö dania na no tumbu. La’ila göi wa itugu tedou zoguna khöra. Na no tumbu nonora, oya zinangea labulö’ö. Oya i’oguna’ö ginötönia satua ira alawe ba wondrorogö onora sawena tumbu, irege tebai la’osambua’ö dödöra khö nawöra simane nifaluara ba zilalö. Itugu oya göi noro dödö ni’okhögö zatua ira matua. Moguna i’asogö zoguna khö wo’omonia hegöi khö nononia.

6-8. Hadia nirasoi niha si no mongambatö si tebai mangokhögö iraono?

⁶ So ösa wongambatö sangokhögö abula dödö tanö bö’ö. Omasi sibai ira na so khöra ndraono, hiza’i tebai. Ba ginötö tebai manabina zi samösa ira alawe, tola manö afatö sibai dödönia. (Gamaedola 13:12) Ba götö Zura Ni’amoni’ö, fa’aila sebua ba ndra alawe na lö mangowalu hegöi mo’ono. Da’a mbörö wa afökhö sibai dödö wo’omo Yakobo sotöi Rakhela, börö me tebai mo’ono ia, hiza’i tola mo’ono ga’ania alawe. (I Moze 30:1, 2) Ba zi hauga soi iada’a, ato niha zi faduhu tödö wa moguna sibai la’okhögö ndraono. Asese manofu niha khö ndra talifusöda utusan injil si toröi ba soi da’ö hana wa lö hadöi iraonora. Hewa’ae no lahaogö latutunö  ira utusan injil hadia mbörö, hiza’i so ösa zanguma’ö, ”He bale, mangandröga dania salahiu!”

⁷ Angeraigö duma-duma tanö bö’ö. Samösa dalifusöda ira alawe ba Inggris omasi sibai so khönia ndraono. Ba ginötö i’ila wa tebai mo’ono ia ba götö da’a, afatö sibai dödönia. Ya’ia hegöi fo’omonia ira matua lahalö gangetula ba wangai ono nisou. Hiza’i, itaria afatö nasa dödönia. Imane, ”U’ila wa fabö’ö sibai rasonia ba wondrorogö ono nisou moroi na onogu samösa.”

⁸ Imane Sura Ni’amoni’ö wa ’ni’orifisa ndra alawe, ba wadono’. (I Timoteo 2:15) Hiza’i, tenga da’ö geluahania wa tola isöndra wa’auri si lö aetu ha börö me so khönia ndraono. Hadia geluaha ayati da’ö? Oya ginötö ni’oguna’ö zi samösa ina ba wondrorogö ononia hegöi omora. Da’a zanolo ya’ia ena’ö lö arörö ia ba wamato-matou niha bö’ö mazui ba wamalua zi tenga halöwönia. (I Timoteo 5:13) Hewa’ae simanö, hasambalö so gabula dödö ba wongamba-tö hegöi ba nösi nomonia.

9. Hadia gabula dödö tanö bö’ö nitaögö niha si no mongambatö?

⁹ Fanandraigö tanö bö’ö nitaögö niha si no mongambatö ya’ia da’ö na mate ngambatöra. Hewa’ae so zanguma’ö wa lö alua khöra da’ö, hiza’i ato zanaögö ya’ia. Sindruhu-ndruhu terara dödö niha Keriso börö me faduhu dödöra ba mbu’usa li sanandrösa ba wanusugi. (Yohane 5:28, 29) Ba Daromalinia, oya mbu’usa li nibe’e Namada Yehowa sondrara tödöda ba ginötö so gabula dödö. Iada’a, datafaigi hewisa wame’e Yehowa wondrara dödö hegöi fanolo ba niha samosumange ya’ia.

10. Hadia nifalua Khana ba wanöndra fondrara dödö? (Faigi gambara ba wamobörö wamaha’ö.)

¹⁰ Angeraigö hadia zalua khö Khana, fo’omo Elikana sabölö i’omasi’ö. Omasi ia na so khönia ndraono hiza’i tebai. Sindruhunia, oya nono wo’omo ndrongania tanö bö’ö sotöi Fenina. (Baso I Zamueli 1:4-7.) Aefa da’ö, i’o’aya ia Fenina ”ero röfi” börö me lö hadöi ononia. Afatö sibai dödö Khana. Hadia nifaluania ba wanöndra fondrara dödö? Ilau mangandrö khö Yehowa. Möi ia ba nahia wamosumange Yehowa ba ara sibai wangandrönia. I’andrö khö Yehowa ena’ö ibe’e khönia nono matua ba faduhu dödönia wa hasambalö itolo ia Yehowa. Me no aefa mangandrö ia, aheta noro dödönia ba ”döhö wa’abu dödö” nirasoinia. (I Zamueli 1:12, 17, 18) Faduhu dödönia wa ibe’e khönia Yehowa samösa nono matua mazui ibe’e khönia wondrara dödö tanö bö’ö.

11. Hewisa wa tola terara dödöda na mangandrö?

¹¹ Börö me lö mo’ahonoa ita ba toröi ita ba gulidanö nifatörö Zatana, hasa-mbalö tataögö wanandraigö. (I Yohane 5:19) Hiza’i, so wanolo. Tola mangandrö ita khö Yehowa, ”Lowalangi  wondrara dödö”. Da’a nifalua Khana. Izara-zara wanutunö khö Yehowa hadia nirasoinia ba i’andrö wanolo. Simane da’ö göi na so gabula dödöda, tenga ha fangandrö sadogo-dogo nifa’emada khö Yehowa. Moguna mangalulu ita ba wangandrö fanolo moroi khönia ba tazara-zara ba wanutunö fefu nirasoida.​—Filifi 4:6, 7.

12. Hadia zanolo Ana irege tola omuso dödönia hewa’ae itaögö wanandraigö?

¹² Tola manö afatö dödöda na tebai mo’ono ita mazui na mate niha ni’omasi’öda. Hiza’i, tola tasöndra wondrara dödö. Angeraigö duma-duma Ana, sauri ba götö Yesu. Me no fitu fakhe mangowalu ia, mate wo’omonia ira matua ba te lö hadöi ononia. Hiza’i, hadia zanolo ya’ia? ”Lö iröi-röi gosali.” Hewa’ae no 84 fakhe ndröfi Ana, lö mamalö möi ia mangandrö ba gosali ba ifosumange Yehowa. (Luka 2:37) Da’a zame’e khönia fondrara dödö ba sanolo ya’ia ena’ö isöndra wa’owua-wua dödö hewa’ae na göna ia fanandraigö.

13. Hewisa wa tola ibe’e khöda wondrara dödö niha si fahuwu khöda na afatö dödöda labe’e ira ösi nomoda?

¹³ Tola tasöndra wondrara dödö moroi khö ndra si fahuwu khöda ba mbanua niha Keriso. (Gamaedola 18:24) Awena lima fakhe dröfi Paula me ibato wamosumange Yehowa mamania. Afatö sibai dödö Paula ba abua khönia ba wanaögö da’a. Hiza’i, so samösa dalifusöda ira alawe perintis sotöi Ann, ifarou ba i’omasi’ö sibai Paula. Imane Paula, ”Hewa’ae tenga talifusögu si-ndruhu Ann, urasoi wa’omasinia ba wanolo ya’odo. Da’ö zanolo ya’odo irege lö mamalö ufosumange Yehowa.” Iada’a, omuso sibai dödö Paula börö me no ifuli ia mamania ba mbanua niha Keriso. Omuso göi dödö Ann börö me tola itolo Paula ba wamosumange Yehowa.

14. Hadia mbua nitemada na tabe’e wondrara dödö ba niha bö’ö?

¹⁴ Na asese tafalua zi sökhi ba niha bö’ö, tola olifu ita gabula dödö  nitaögöda. Duma-dumania, ato ndra talifusöda ira alawe si no mangowalu mazui si lö’ö, la’ila wa ba ginötö laturiaigö Mbanua Lowalangi ba niha bö’ö no falulu fohalöwö ira khö Yehowa ba lafalua zomasi ia. Da’a zame’e khöra fa’owua-wua dödö. Sindruhunia, fefu ita tola taforoma’ö wa ta’ame’egö tödö niha bö’ö na taturiaigö khöra duria somuso dödö. Ba na tafalua zi sökhi khö ndra talifusöda, tola itugu ahatö ita khöra. (Filifi 2:4) Da’a zi no ifalua Faulo. I’ame’egö tödö niha bö’ö hulö simane ”zamaenu ono, ba wondrorogö ononia”. Ibe’e göi wondrara dödö hegöi famarou dödö Faulo khö ndra talifusönia ira matua ”hulö nama khö nononia”.​—Baso I Tesalonika 2:7, 11, 12.

15. Haniha zangokhögö halöwö ba wamaha’ö iraono sanandrösa khö Yehowa?

¹⁵ Hewisa wame’eda fondrara dödö ba nösi nomo si so ba mbanua niha Keriso? Itaria, niha sawena mamaha’ö ya’ira ba Zura Ni’amoni’ö, la’andrö khöda ba wanolo ba wamaha’ö iraonora sanandrösa khö Yehowa mazui ba wamaha’ö iraonora ba Zura Ni’amoni’ö. Imane Sura Ni’amoni’ö wa no ibe’e halöwö Yehowa khö zatua ba wamaha’ö hegöi ba wangebua’ö iraonora. (Gamaedola 23:22; Efeso 6:1-4) Hewa’ae tola labe’e wanolo ira niha bö’ö, hiza’i moguna sibai ifaha’ö ndraononia satua. Moguna göi asese fahuhuo ira khö ndraonora.

16. Hadia zinangea tatörö tödöda ba ginötö tafaha’ö ndraono?

¹⁶ Ba ginötö la’andrö khöda ira satua ba wamaha’ö iraonora ba Zura Ni’amoni’ö, moguna tatörö tödöda wa tebai tahalö halöwö ndra satua. Itaria so ndraono nifaha’öda ba Zura Ni’amoni’ö börö me tenga Samaduhu’ö Yehowa zatuania. Ba ginötö tafaha’ö ndraono niha bö’ö, moguna tafaha’ö ira ba nomora na so zatuara mazui na so niha Keriso tanö bö’ö si no aro ba wamati. Tola göi tafaha’ö ira ba nahia sato niha. Na tafalua da’ö, tola latimbagö wangera-ngera si fasala moroi ba niha bö’ö. Ba zi sambua inötö, satua ndraono andrö zamaha’ö iraonora samösa sanandrösa khö Yehowa.

17. Hadia zi tola lafalua iraono ba wame’e fo-ndrara dödö ba nösi nomora?

¹⁷ Iraono si no mamaha’ö ya’ira ba wangomasi’ö Yehowa, tola lafarou ba labe’e wondrara dödö ba nösi nomora. Hewisa lalania? Moguna lafosumange ba laforege ba wanolo zatuara ba lala si tefaudu. Na lö faröi göi ndraono khö Yehowa, tola tefarou dödö nösi nomora. Fatua lö Anönö Danö Idanö, ifosumange Yehowa Lamekhi. Imane sanandrösa khö nononia matua sotöi Noakhi, ”Da’e dania zondrara tödöda ba wa’erege dödöda ba ba wa’akao dangada andre, ba danö, ni’elifi Yehowa.” Alua wama’ele’ö andre me no aefa Anönö Danö Idanö me iheta wangelifi andrö Yehowa moroi ba danö. (I Moze 5:29; 8:21) Iada’a, iraono si lö faröi khö Yehowa tola larara dödö nösi nomora. Tola latolo nösi nomora ena’ö anau gölöra ba wanaögö ngawalö gabula dödö salua iada’a hegöi ba zi so miföna.

18. Hadia zanolo ya’ita ena’ö anau gölöda ba wanaögö gofu hadia ia wanandraigö nitaögöda?

¹⁸ Ono mbanua Yehowa iada’a, lasöndra wondrara dödö börö me la’angerönusi duma-duma si so ba Zura Ni’amoni’ö, fangandrö hegöi börö me fahuwu ira khö ndra talifusö si sara lala wamati. (Baso Zinunö 145:18, 19.) Faduhu dödöda wa hasambalö ibe’e khöda wondrara dödö Yehowa ba sindruhu-ndruhu itolo ita ena’ö anau gölöda ba wanaögö gofu hadia wana-ndraigö nitaögöda!