TABASO ba mbuku Matai’o: ”Ba möi ba gosali Lowalangi andrö Yesu, ba ifofanö baero fefu zamawa-mawa hadia ia, awö zowöli-wöli ba gosali, ba iso’agö meza zanuka ana’a, awö dadaoma zamawa marafadi. Ba imane khöra, ’No so ba zura, ”Omo wangandrö döi nomogu.” Ba ya’ami, ba no mibali’ö tögi narö hili naha zorabu.’”​—Matai’o 21:12, 13.

Molo’ö zi no irai tesura, niha samawa ba gosali la’alawa’ö mböli ngamawaöra. Duma-dumania, si to’ölönia ide-ide sibai mböli marafadi irege tola la’öli da’ö ira niha si numana tobali sumange. Hiza’i, itutunö waö-waö nisura Yahudi meföna wa no irai me döfi siföföna böli marafadi si dombua ngawua ya’ia da’ö sambua dinar gana’a. Da’a gazi zi samösa niha sohalöwö te ba zi 25 ngaluo. Ebua sibai mböli marafadi irege lö sagu ba niha si numana ba wowöli ya’ia. (III Moze 1:14; 5:7; 12:6-8) Mofönu sibai Rabi Simeon ono matua Gamaliel ba zalua andre irege i’alösi zumange sinangea labe’e ira niha Yahudi. Me no aefa da’ö, otu kali winaeta möi tou mböli marafadi si dombua ngawua.

Ba da’a ta’ila wa sindruhu-ndruhu mangisö ba gana’a niha samawa andre ba lahalö hare sebua ba niha sowöli khöra. Da’a mbörö wa tefaudu sibai ifotöi ira Yesu ”zorabu”.