1, 2. Hadia zi lö tola lö’ö tahaogö ta’angeraigö? (Faigi gambara ba wamobörö wamaha’ö.)

SIMANE si no tatutunö ba wamaha’ö fatua lö da’a, iwa’ö Afökha wa tebai ifatörö niha gulidanö Yehowa. Molo’ö Gafökha, lö atulö lala wamatörö Yehowa ba abölö sökhi na niha gulidanö zamatörö fa’aurira. Hadia atulö niwa’ö Zatana andrö? Khalaigö hewisa na la’okhögö wa’auri si lö aetu niha gulidanö ba ya’ira samösa zamatörö fa’aurira. Hadia tola owua-wua dödöra moroi na Lowalangi zamatörö ya’ira? Hadia tola owua-wua dödömö na ö’okhögö wa’auri si lö aetu hiza’i tenga barö wamatörö Lowalangi?

² Lö hadöi si tola mame’e fanema linia khömö. Fefu ita moguna tahaogö ta’angeraigö hadia wanema linia. Na tafalua da’ö, tola ta’ila wa sindruhu-ndruhu atulö lala wamatörö Yehowa ba no sinangea tatuhini ia soroi ba dödö. Tola faduhu dödöda da’ö börö me no tafaha’ö ita ba Zura Ni’amoni’ö. Datafaigi hadia niwa’ö Zura Ni’amoni’ö sangoroma’ö wa no sinangea mamatörö Yehowa ba mbanua siawa awö danö.

3. Hana wa no sinangea Mamatörö Yehowa?

³ Ha Yehowa zinangea mamatörö banua siawa awö danö, börö me ya’ia Lowalangi si lö ambö fa’abölö ba Somböi. (I Nga’ötö 29:11; Halöwö Zinenge 4:24) Ba gangilata sanandrösa ba zorugo, lamane si 144.000 razo samatörö awö Keriso, ”No sinangea manema ndra’ugö lakhömi ba sumange ba fa’abölö, ya’ugö So’aya ya’aga, Lowalangima, me no ya’ugö zamazökhi fefu hadia ia, ba börö nilau dödöu, wa so ia, awö wa tefazökhi ia.” (Fama’ele’ö 4:11) Yehowa zomböi fefu hadia ia, andrö ha ya’ia zinangea mamatörö fefu hadia ia, he si so ba zorugo mazui ba gulidanö.

4. Hewa’ae ta’okhögö mbuala ba wangai angetula, hana wa tebai mamadaö ita khö Lowalangi?

⁴ Lö hadöi niwöwöi Zatana hadia ia. Andrö wa tenga ya’ia zinangea mamatörö banua siawa awö danö. Satana hegöi Adamo ba Khawa mamadaö ira ba wolawa famatörö Yehowa. (Yeremia 10:23) Hadia no sinangea latimbagö wamatörö Yehowa hewa’ae na la’okhögö mbuala ba wamili? Lö’ö. Hewa’ae tola tafili ba tahalö samösa gangetula, hiza’i tenga da’ö geluahania wa tola tatimbagö Zomböi ya’ita, Yehowa. Ba da’a oroma wa no angetula si lö tefaudu na mamadaö khö Lowalangi. Moguna khöda wamatörö hegöi fanuturu lala moroi khö Yehowa.

5. Hana wa hasambalö atulö gangetula nihalö Lowalangi?

⁵ Angeraigö dani tanö bö’ö sangoroma’ö wa no sinangea mamatörö Yehowa, ya’ia da’ö i’oguna’ö wamatörönia ba lala so’ahonoa. Imane khöda, ”Ya’odo Yehowa, zangoroma’ö fa’ahakhö dödö ba solau huku ba satulö ba gulida-nö; da’ö sa zomasido.” (Yeremia 9:24) Lö moguna khö Yehowa huku nifazökhi niha gulidanö ba wangai angetula satulö. Hiza’i, ibe’e goi-goi sanandrösa ba zatulö. Ba si fao fa’atulö so’ahonoa, ibe’e huku Yehowa ba niha gulidanö. Imane sanura zinunö, ”Fa’atulö ba fa’adölö daya-daya dadaomamö andrö.” Börö da’ö, gofu hadia huku, goi-goi hegöi angetula moroi khö Yehowa hasambalö atulö. (Zinunö 89:15; 119:128) Iwa’ö Satana wa lö atulö lala wamatörö Yehowa. Hiza’i, Satana samösa tebai i’asogö wa’atulö ba gulidanö.

6. Hadia sambua dani zangoroma’ö wa no sinangea mamatörö Yehowa?

⁶ Dani tanö bö’ö sangoroma’ö wa no sinangea mamatörö Yehowa ya’ia da’ö börö me i’okhögö wa’aboto ba dödö hegöi fa’atua-tua ba wondrorogö banua siawa awö danö. Tola ta’ila da’a moroi ba wame’enia fa’abölö khö Nononia ba wamadöhö fökhö si tebai lafadöhö ira doto. (Matai’o 4:23, 24; Mareko 5:25-29) Tatu manö, no tandra sahöli-höli dödö da’a khöda. Hiza’i, tenga tandra sahöli-höli dödö khö Yehowa. Aboto ba dödönia hewisa wohalöwö mboto niha ba i’ila hewisa wamadöhö fökhö. Tola göi isusugi niha si no mate ba tola itimbagö ena’ö lö alua bencana alam.

7. Hana wa tola faduhu dödöda wa ha Yehowa zabölö atua-tua moroi ba niha si so ba gulidanö Zatana?

⁷ Lö fa’atulö ba gulidanö nifatörö Zatana,  he ba soida samösa mazui ba soi bö’ö. Ha Yehowa zangokhögö fa’atua-tua si tola manga’asogö fa’atulö ba gulidanö. (Yesaya 2:3, 4; 54:13) Tola tarasoi hadia nirasoi zinenge sotöi Faulo me iwa’ö, ”Ha lö abakha wa no a’oi so manö khö Lowalangi ba fa’atua-tuania ba fangilania andrö! Si lö aboto ba dödö niha wanguhukunia, ba si lö isöndra niha lala andrö khönia!”​—Roma 11:33.

8. Hewisa dödömö sanandrösa ba lala wamatörö Yehowa?

⁸ Simane si no ta’ila, no itutunö Sura Ni’amoni’ö hadia mbörö wa no sinangea mamatörö Yehowa. Itutunö göi ba da’ö wa ya’ia no Samatörö sabölö sökhi. Ta’ila da’ö börö me mamatörö ia si fao fa’omasi. Tola itugu ahatö ita khönia na so ba wangera-ngerada wa ”sahakhö tödö Yehowa ba si no ebua tödö, ba sebolo tödö ba si no fahöna fa’oböwö, awö wa lö faröi ia”. (II Moze 34:6) I’ame’egö tödö ita Lowalangi ba ifalua khöda zi sökhi. I’ila irorogö wa’aurida moroi na ya’ita samösa. Iwa’ö Afökha wa Yehowa andre lö i’ame’egö tödö niha samosumange ya’ia, hiza’i falimosa da’ö. No ifatenge ba gulidanö Nono ni’omasi’önia Lowalangi ena’ö tola ta’okhögö wa’auri si lö aetu.​—Baso Zinunö 84:12; Roma 8:32.

9. Hezo ta’ila wa irorogö ita zamösana Lowalangi?

⁹ I’omasi’ö fefu nono mbanuania Yehowa. Hiza’i, i’omasi’ö göi ira zamösana. Khalaigö hadia zalua ba götö siföföna. Te mato tölu ngaotu fakhe, i’oguna’ö ndra sanguhuku Yehowa ba wame’e fanuturu lala ba nono mbanuania ba ibe’e khöra wa’amöna ba wolawa udura. Ba ginötö da’ö, i’ame’egö tödö nono mbanuania Yehowa zamösana. Samösa ba gotaluania ya’ia da’ö Ruti. Ya’ia andre tenga iraono Gizara’eli. Oya nifaluania hegöi niröinia ena’ö tola ifosumange Yehowa. Ifahowu’ö ia Yehowa, ibe’e wo’omo ba so nononia matua. Sabölö tohude ya’ia da’ö ba nga’ötö Ruti dania tumbu Mesia. No ifasura’ö göi Yehowa waö-waö wa’auri Ruti ba Zura Ni’amoni’ö, ba tefotöi mbuku da’ö ba döi Ruti samösa. Hadia tola ökhalaigö hewisa dödö Ruti ba ginötö tesusugi ia ba i’ila fefu zalua andrö?​—Ruti 4:13; Matai’o 1:5, 16.

10. Hana wa tola tawa’ö wa tenga sata’u ita lala wamatörö Yehowa?

¹⁰ Tenga sata’u ita lala wamatörö Yehowa. Andrö, fefu niha solo’ö khönia tola larasoi wangefa ba fa’owua-wua dödö. (II Korindro 3:17) Imane Dawido sanandrösa khö Yehowa, ”Lakhömi ba fa’asalawa fönania, fa’abölö ba fa’owua-wua dödö ba nahiania.” (I Nga’ötö 16:7, 27) Imane sanura zinunö sotöi Getano, ”Ya’ahowu soi, sangila ma’iki; sanörö lalara ba haga mbawau andrö, ya’ugö Yehowa. Ba döimö andrö lakaraini wa’iki, si lö mamalö-malö ba wa’atulömö andrö salawa ira.”​—Zinunö 89:16, 17

11. Hadia nifaluada ena’ö tola itugu faduhu dödöda wa ha famatörö Yehowa zabölö sökhi?

¹¹ Na itugu asese ta’angerönusi wa’ebua dödö Yehowa, tola itugu faduhu  dödöda wa famatörönia zabölö sökhi. Tarasoi hadia nirasoi zanura sinunö sanguma’ö khö Lowalangi, ”Sökhi zi ha ma’ö-ma’ökhö ba golayamamö, moroi ba zi hönö ngaluo bö’ö.” (Zinunö 84:11) Yehowa zangehaogö ba somböi ya’ita. Andrö, i’ila hadia zame’e khöda fa’owua-wua dödö. Oböwö sibai ia ba wanga’asogö zoguna khöda. Fefu ni’andrö Yehowa, oi si sökhi khöda. Hewa’ae oya nitehegöda mazui niröida, hasambalö owua-wua dödöda na molo’ö ita khö Yehowa.​—Baso Yesaya 48:17.

12. Hadia dani siföföna wa fao ita ba wamaduhu’ö wa no sinangea mamatörö Yehowa?

¹² No tafaha’ö ita ba Zura Ni’amoni’ö wa na no aefa Saribu Fakhe Wamatörö Keriso, so ösa zamadaö ba wamatörö Yehowa. (Fama’ele’ö 20:7, 8) Hana wa tola alua da’ö? Ba ginötö da’ö, i’asogö ba wangera-ngera niha Afökha ena’ö ha tana khöra la’alui, ba no asese ifalua da’ö. I’alui göi lala ena’ö faduhu dödö niha wa tola auri ira sagötö fa’ara hewa’ae lö molo’ö ira khö Yehowa. Lö atulö da’ö. Andrö, moguna tasofu khöda samösa, ’Hadia faduhu dödögu ba walimosa andre?’ Na sindruhu-ndruhu ta’omasi’ö Yehowa ba faduhu dödöda wa si sökhi tödö ia hegöi wa no ya’ia zinangea mamatörö banua siawa awö danö, lö faduhu dödöda ba walimosa andrö. Omasi ita toröi barö wamatörö Yehowa, samatörö si fao fa’omasi.

13. Hewisa wangoroma’öda wa fao ita ba wamaduhu’ö wa no sinangea mamatörö Lowalangi na ta’o’ö ia?

¹³ Simane si no ta’ila, ha Yehowa zinangea mamatörö, ba sökhi lala wamatörönia. No sinangea tatuhini wamatörönia. Tola tatuhini da’a na lö faröi ita khö Yehowa ba ta’o’ö ia. Na tafalua zabölö sökhi ba lala somasi Yehowa, taforoma’ö wa ta’omasi’ö ba tatuhini lala wamatörönia.​—Baso Efeso 5:1, 2.

14. Hadia nifalua ndra satua sokubaloi hegöi satua si tobali högö yomo ba nomo ba wolo’ö Yehowa?

¹⁴ No tafaha’ö ita ba Zura Ni’amoni’ö wa asese i’oguna’ö wa’abölönia Yehowa si fao fa’omasi. Satua si tobali högö yomo ba nomo hegöi ira satua sokubaloi sangomasi’ö lala famatörö Yehowa, la’o’ö ia ba lö mofönu-fönu manö ira mazui lafatörö niha bö’ö. No iforege sinenge sotöi Faulo ba wolo’ö Lowalangi hegöi Ononia. (I Korindro 11:1) Lö i’ailasi niha bö’ö mazui ifaso ira ba wamalua satulö. Hiza’i, ihaogö wamarou tödöra ba wamalua satulö. (Roma 12:1; Efeso 4:1; Filemo 8-10) Da’a zangoroma’ö wa no i’o’ö Yehowa Faulo. Na tafalua zimane da’ö, no tatuhini wa no sinangea mamatörö Yehowa.

15. Na molo’ö ita khö ndra sondrönia’ö, hewisa wa tola tatuhini lala wamatörö Yehowa?

¹⁵ Tola göi tatuhini lala wamatörö Yehowa na ta’ame’egö tödö ba ta’o’ö fefu wanuturu lala nibe’e ndra sondrönia’ö ya’ita ba wamati. Hewa’ae ambö aboto ba dödöda ba lö fao dödöda ba gangetula nihalöra, hiza’i hasambalö tatuhini ira. Lö lafalua da’a niha gulidanö. Hiza’i, na tafalua da’ö no tatema’ö Yehowa tobali Samatörö ya’ita. (Efeso 5:22, 23; 6:1-3; Heberai’o 13:17) Ba omuso sibai dödöda börö me omasi Lowalangi na sökhi wa’aurida.

16. Hewisa gangetula nihalöda mangoroma’ö wa tatuhini ba wamaduhu’ö wa no sinangea mamatörö Lowalangi?

 ¹⁶ Tola göi tatuhini wa no sinangea mamatörö Lowalangi moroi ba gangetula nihalöda. Lö nibe’e Yehowa khöda huku ba ngawalö zalua ba wa’aurida. Hiza’i, ifatunö khöda lala wangera-ngerania. Da’ö zanolo ya’ita ena’ö aboto ba dödöda hadia zinangea tafalua. Duma-dumania, lö ibe’e ba niha Keriso waö-waö nukha si tola mazui si tebai lafake. Hiza’i, itutunö khöda wa moguna ta’oguna’ö nukha soadu ba sangoroma’ö wa ya’ita andrö niha Samosumange ya’ia. (I Timoteo 2:9, 10) Omasi ia na ta’angeraigö hadia lua-lua gangetulada ba niha bö’ö. (I Korindro 10:31-33) Ba ginötö tahalö gangetula si te’odane-dane ba lala wangera-ngera Yehowa, taforoma’ö wa ta’omasi’ö ba tatuhini wamatörönia.

17, 18. Hewisa niha Keriso si no mongambatö tola fao ira ba wotuhini wa no sinangea mamatörö Yehowa?

¹⁷ Angeraigö sambua lala si tola lafalua niha Keriso si no mongambatö ba wotuhini wa no sinangea mamatörö Yehowa. Niha si no mongambatö tola manö lö owua-wua dödöra simane nitötönara. Tola manö so gabula dödö sebua nitaögöra. Na alua da’ö, tola latema mbua na la’angeraigö hadia nifalua Yehowa ba ndraono Gizara’eli ba götö siföföna. I’amaedolagö ia Yehowa  hulö simane fo’omo ira matua ba nono mbanuania. (Yesaya 54:5; 62:4) Asese sibai lafalua zi lö omasi Yehowa. Salua andre, no amaedola gabula dödö ba wongambatö. Hiza’i, lö aföli Yehowa ba ndraono Gizara’eli. Lö mamalö i’efa’ö zalara ba ifalua mbu’usa linia khöra.​—Baso Zinunö 106:43-45.

¹⁸ Niha Keriso si no mongambatö sangomasi’ö Yehowa, laforege ba wolo’ö ya’ia. Hewa’ae so gabula dödö ba wongambatöra, lö la’alui lala si lö te’odane-dane ba Zura Ni’amoni’ö ba wangasiwaisi da’ö. La’ila wa tohude sibai wamaigi Yehowa mbu’usa li ba wongambatö ba omasi ia na fo’omo ira matua ba ira alawe faoma ’la’olembai’ nawöra. Ha sambua dani moroi ba Zura Ni’amoni’ö zanehegö fabali auri ba ifuli mangowalu zi samösa niha, ya’ia da’ö ha na no ifalua gamuata fohorö nga-mbatönia. (Matai’o 19:5, 6, 9) Na lafalua fefu hadia zi tola lafalua ba wanga’aro’ö fongambatöra, no fao ira ba wotuhini wa no sinangea mamatörö Yehowa.

19. Hadia zinangea tafalua na no tafalua zala?

¹⁹ Fefu ita lö mo’ahonoa, ba itaria tafalua zala si möi mangafökhöi’ö dödö Yehowa. I’ila da’ö Yehowa, ba da’ö mbörö wa no ihenaigö höli moroi khö Keriso. Andrö, ba ginötö tafalua zala, moguna ta’andrö wangefa moroi khö Yehowa. (I Yohane 2:1, 2) Moroi na ha asala ta’abusi tödö zala si no tafalua, tola tafaha’ö ita moroi ba da’ö. Omasi ita lö mamalö ahatö khö Yehowa, same’e aefa fefu zala si no tafalua ba sanolo ya’ita ba wangehaogö zala si no tafalua ba lö mamalö tafosumange ia.​—Zinunö 103:3.

20. Hana wa moguna tatuhini wa no sinangea mamatörö Yehowa i’otarai iada’a?

²⁰ Ba gulidanö si bohou, Yehowa zamatörö fefu niha ba lafaha’ö ira ba lalania satulö. (Yesaya 11:9) Hiza’i iada’a, tola tafaha’ö ita sanandrösa ba lala wangera-ngera Yehowa hegöi lala somasi ia tafalua ba wangasiwaisi fefu zalua ba wa’aurida. Ba zi lö aratö, lö hadöi niha sanandrawaisi fa’atulö wa no sinangea mamatörö Lowalangi. Andrö, iada’a datafalua fefu zi tola tafalua ba wanuhini wa no sinangea mamatörö Yehowa. Lalania ya’ia da’ö ta’o’ö niwa’önia, lö faröi ita ba wamosumange ya’ia, ba tafalua zabölö sökhi si tola tafalua ba wolo’ö ya’ia.