AURI ita ba gulidanö safönu famakao, daʼö mbörö wa abua khöda wanöndra faʼohahau dödö. Hewaʼae no taʼokhögö ösa waʼohahau dödö tola manö alio taya ia. Hadia niwaʼö Zura Niʼamoniʼö si tola manolo yaʼita ba wanöndra faʼohahau dödö sindruhu ba sagötö faʼara? Ba hewisa wanoloda niha böʼö ba wanöndra yaʼia?

Enaʼö tasöndra waʼohahau dödö moguna so khöda waʼahono dödö hegöi folumöʼö. Taʼokhögö zi fahuwu si sökhi ba sabölö moguna yaʼia döʼö tahatöʼö ita khö Lowalangi. Hewisa wamaluada daʼö?

No si sökhi khöda fefu niwaʼö Yehowa hegöi goi-goinia. Na taʼoʼö fefu daʼö, no taforomaʼö wa faduhu dödöda khö Yehowa ba omasi taʼokhögö waʼohahau dödö ba fahuwusa khönia. (Yeremia 17:7, 8; Yakobo 2:22, 23) Aefa daʼö, ihatöʼö ia khöda Yehowa ba ibeʼe khöda waʼohahau dödö ba wangera-ngera. Imane Yesaya 32:17, ”Ba lua-lua waʼatulö andrö, ba faʼohahau dödö, ba bua waʼatulö, ba faʼahono-hono ba fa lö hadia ia, götö waʼara dania.” Tola tasöndra waʼohahau dödö sindruhu ba ginötö taʼoʼö Yehowa soroi ba dödöda.​—Yesaya 48:18, 19.

No ibeʼe khöda mbuala sabölö tohude Yehowa si tobali fanolo ba wondrouʼö faʼohahau dödö sagötö faʼara. Daʼa no mbuala moroi ba gehehania.​—Halöwö Zinenge 9:31.

Itutunö Faulo wa faʼohahau dödö no ”bua-bua geheha”. (Galatia 5:22, 23) Börö me iʼasogö waʼohahau dödö eheha Lowalangi, andrö wa tatehegö enaʼö eheha andrö zameʼe khöda fanuturu lala ba wangokhögö faʼohahau dödö. Hewisa wamaluada daʼa?

Si oföna, moguna lö aetu tabaso Daromali Lowalangi. (Zinunö 1:2, 3) Na tahaogö woʼangerönusi hadia nibasoda, itolo ita eheha enaʼö  aboto ba dödöda hadia niʼera-era Yehowa sanandrösa ba ngawalö hadia ia. Duma-dumania, tafahaʼö ita hewisa ia ba wangaroʼö faʼohahau dödönia ba hana wa moguna sibai khönia waʼohahau dödö andrö. Na tafalua zi no tafahaʼö yaʼita moroi ba Zura Niʼamoniʼö itugu oya taʼokhögö waʼohahau dödö ba waʼaurida.​—Gamaedola 3:1, 2.

Si dua, moguna taʼandrö geheha Lowalangi. (Luka 11:13) No ifabuʼu Yehowa wa dozi sangandrö khönia, ’Irorogö dödö awö gera-era faʼohahau dödö andrö khö Lowalangi, sabölö moroi ba gera-era niha fefu ba khö Keriso Yesu.’ (Filifi 4:6, 7) Ba ginötö ahatö ita khö Yehowa ba taʼodaligö gehehania, ibeʼe khöda waʼohahau dödö ba wangera-ngera.​—Roma 15:13.

Ato zombulöʼö faʼaurira börö wanolo moroi ba Zura Niʼamoniʼö, ba iadaʼa laʼokhögö waʼohahau dödö khö Yehowa, faʼohahau dödö ba wangera-ngera, hegöi faʼatulö ba niha böʼö. Hewisa wamaluara irege tola labulöʼö ira?

So ba gotalua ndra talifusöda zagalio mofönu hegöi samalua faʼalösökhi fatua lö laʼila zindruhu. Hizaʼi, laforege ba wamalua fombulöʼö, iadaʼa itugu sökhi ira, so waʼebolo dödö ba laʼokhögu waʼohahau dödö ba niha böʼö. * (Faigi nisura ba gahe zura.) (Gamaedola 29:22) Faigi hewisa samösa dalifusöda ira matua sotöi David hegöi talifusöda ira alawe sotöi Rachel samalua fombulöʼö ba waʼaurira.

Fatua lö iʼila zindruhu David, asese ikata-kataʼö niha böʼö ba asese ifalua wehede sagabeʼe ba nösi nomonia. Ba gafuriata awena aboto ba dödönia wa moguna ifalua wombulöʼö. Hezo tola isöndra wa ohahau dödö? Imane David, ”Ubörötaigö ufalua goi-goi Zura Niʼamoniʼö ba waʼaurigu, ba buania, so wangosinangegö ba gotalua nösi nomoma.”

 Tedönisi dödö Rachel ba zi toʼölö lafalua ba nomonia. Imane, ”Irugi iadaʼa uforege enaʼö lö mofönu börö me teʼebuaʼö ndraʼo ba nösi nomo sofönu-fönu.” Hadia zanolo Rachel ba wanöndra faʼohahau dödö? Imane wangumaʼö, ”Ulau mangandrö khö Yehowa ba woʼandrö fanolo.”

David hegöi Rachel ha dombua moroi ba duma-duma niha sangokhögö faʼohahau dödö iadaʼa, börö me lafalua goi-goi Zura Niʼamoniʼö ba laʼodaligö geheha. Hewaʼae auri ita ba gulidanö sofönu-fönu, hizaʼi tola taʼokhögö waʼohahau dödö ba wangera-ngera. Daʼa zanolo yaʼita enaʼö aoha khöda wariawösa ba nösi nomoda hegöi khö ndra talifusöda ba gangowuloa. Hizaʼi, iwaʼö khöda Yehowa enaʼö ’atulö ita ba niha fefu’. (Roma 12:18) Hadia tola alua daʼö? Ba hadia mbörö wa taforege ba wangokhögö faʼatulö ba niha böʼö?

Ba halöwö fanuriaigöda taʼombakhaʼö sambua duria waʼohahau dödö sanandrösa ba Wamatörö Lowalangi. (Yesaya 9:6, 7; Mataiʼo 24:14) Ato zomasi hegöi sanemaʼö turia daʼa. Buania, lö khöra saʼae faʼide-ide dödö mazui mofönu börö zalua ba gulidanö andre. Hizaʼi, iadaʼa laʼokhögö dötönafö si so ba zi so miföna ba daʼa zamarou tödöra ba ’wangalui faʼatulö’.​—Zinunö 34:15.

Hewaʼae simanö, lö fefu niha ba wamobörö latema duria nifaʼömada. (Yohane 3:19) Hewaʼae lö latema duria nifaʼemada, hizaʼi ibeʼe khöda wamarou dödö Yehowa. Daʼa zanolo yaʼita enaʼö teʼasogö waʼohahau dödö hegöi ba wamosumange niha ba ginötö möi ita manuriaigö. Daʼa lala ba woloʼö mene-mene Yesu, ”Na mirugi ero sambua omo, miʼowai ira. Na itemaʼö ami sokhö omo, lasöndra waʼohahau dödö ba wangondrasimi yaʼira. Na löʼö, mangawuli khömi waʼohahau dödö andrö.” (Mataiʼo 10:11-13) Na taʼokhögö mbua-bua daʼa, tola taʼokhögö waʼohahau dödö ba lö taʼangeragö sibai gofu hadia niwaʼö niha mazui nifaluara. Ba moguna tatörö tödöda wa taʼokhögö nasa ginötö ba wanolo niha ba zi so miföna.

Tafakhai waʼatulö ba ginötö fahuhuo ita khö ndra samatörö si fao famosumange, hewaʼae na lö omasi ira ba halöwöda. Duma-dumania, ba zi sambua soi si so ba Afrika lö latehegö ira samatörö ba wamosindro Balai Mbanua Lowalangi. Aboto ba dödö ndra talifusöda wa moguna laforege ba wangasiwai abula dödö andre si fao faʼatulö. Lafatenge samösa dalifusöda si no irai tobali utusan injil ba soi daʼö ba wamalukhaisi Komisaris Tinggi ba London, Inggris. Ifatunö sanandrösa ba halöwö faʼatulö niforege ndra Samaduhuʼö Yehowa.

Imane samösa talifusöda ira matua, ”Me urugi meza resepsionis, uhalö gangetula moroi ba lagu wonukha resepsionis daʼö wa yaʼia andrö moroi ba mado sangogunaʼö li nifahaʼögu yaʼo. Andrö wa uʼowai ia ba li niʼogunaʼönia. Tokea ndraʼo me manofu ia khögu, ’Hana wa möiʼö ba daʼa?’ Uhaogö wahuhuosa khönia ba ufatunö wa omasido ufalukhaisi Komisaris Tinggi. Itelefo samösa zohalöwö ba wamalukhaisi yaʼo, ba iʼowai ndraʼo ba li niʼogunaʼö ba mbanua andrö. Aefa daʼö, ihaogö ifondrondrongo me ututunö khönia halöwö faʼatulö nifalua ndra Samaduhuʼö.”

Me no aefa ifondrondrongo Komisaris Tinggi nitutunö dalifusada andre, awena aboto ba dödönia halöwö nifaluada ba lö saʼae khönia fanahö-nahö dödö simane ba zilalö. Lö ara aefa daʼö, labulöʼö gangetulara ira samatörö ba latehegö khö ndra Samaduhuʼö Yehowa ba wamosindro Balai Mbanua Lowalangi. Omuso sibai dödö ndra talifusöda! Ba daʼa taʼila, na tafosumange niha böʼö no tafakhai waʼatulö.

Iadaʼa, so waʼomuso dödö ba nono mbanua Yehowa ba waradaiso wamati, ba ginötö lafosumange ia ba gotalua niha safönu faʼohahau dödö. Tola monönö waʼohahau dödöda zamösana na taforege wondrouʼö faʼohahau dödö ba waʼaurida. Aefa daʼö, tola saʼae faduhu dödöda wa omasi Yehowa khöda. Ba gulidanö si bohou khönia, ibeʼe khöda waʼohahau dödö sagötö faʼara.​—2 Fetero 3:13, 14.