1. Hadia zameʼe tohude niha moroi ba gurifö?

SO SAMBUA zi tohude nibeʼe Yehowa ba niha. Yaʼia daʼö tödöda side-ide. Daʼö mbörö wa tohude ita moroi ba gurifö. Hezo taʼila wa laʼokhögö dödö side-ide ira Adamo ba Khawa? Me aefa lasawö nifakhoi Lowalangi, labiniʼö ira fönania. Itegu-tegu ira tödöra side-ide.

2. Hadia waʼafagölö dödö side-ide faoma kompas? (Faigi gambara ba wamobörö wamahaʼö.)

² Tödöda side-ide zamaehusi si sala hegöi satulö sameʼe khöda fanuturu lala ba waʼauri. Tödö side-ide si lö mufomaha, tola muʼamaedolagö simane köfa si no tekiko kompasnia. Tola iʼoloiʼö ia angi hegöi bade ba lala si fasala. Hizaʼi, kompas si baga tola itolo kafite göfa enaʼö lö tebulö so göfa andrö ba lala satulö. Simanö göi, na tahaogö tafomaha dödöda side-ide tola tobali daʼö fanuturu lala si sökhi.

3. Hadia zalua na lö tahaogö tafomaha dödöda side-ide?

³ Na lö tahaogö tafomaha dödöda side-ide, lö ibeʼe khöda wamangelama ba ginötö tafalua zala. (1 Timoteo 4:1, 2) Hizaʼi, tola manö tawaʼö ”si lö sökhi si sökhi”. (Yesaya 5:20)  Imane Yesu khö ndra nifahaʼönia, ”Samuza inötö dania, dozi niha samunu yaʼami lawalinga no lafalua halöwö niʼamoniʼö khö Lowalangi.” (Yohane 16:2) Simane daʼö zi so ba wangera-ngera niha samunu Sitefano. (Halöwö Zinenge 6:8, 12; 7:54-60) Sagötö sejarah, ato niha si so agama zamalua si lö sökhi, simane famunu niha ba moloʼö yaʼira lafalua daʼö ba zomasi Lowalangi. Hizaʼi, sindruhunia no lalawa huku Lowalangi. (2 Moze 20:13) Sindruhu-ndruhu tenga ba lala si sökhi iʼohe ira tödöra side-ide!

4. Hewisa enaʼö taʼila wa sökhi wohalöwö dödöda side-ide?

⁴ Na simanö, hewisa enaʼö taʼila wa sökhi wohalöwö dödöda side-ide? Huku hegöi goi-goi moroi ba Zura Niʼamoniʼö ”moguna ia ba wamahaʼö, ba wangotuʼö, ba wangaʼazökhi, ba wamomaha ba waʼatulö dödö”. (2 Timoteo 3:16) Börö daʼö, moguna böi taböhöli wamomaha yaʼita ba Zura Niʼamoniʼö, taʼangerönusi ba taforomaʼö ia ba lala waʼaurida. Na tafalua daʼö, no tafomaha ita ba wangera-ngera Yehowa. Aefa daʼö, awena tola faduhu dödöda wa ba lala satulö iʼohe ita tödöda side-ide. Datatutunö hewisa lala ba wangogunaʼö huku hegöi goi-goi Yehowa ba wamomaha tödöda side-ide.

5, 6. Hewisa huku Lowalangi wanolonia yaʼita?

⁵ Enaʼö tola tobali fanolo khöda huku Lowalangi, moguna tenga ha asala tabaso mazui taʼila nösinia. Hizaʼi, moguna taʼomasiʼö ba taʼameʼegö tödö huku andrö. Imane khöda Sura Niʼamoniʼö, ”Miʼogorofi zi lö sökhi ba miʼomasiʼö zi sökhi.” (Gamosi 5:15) Hizaʼi, hewisa wamaluada daʼö? Moguna tafahaʼö ita ba wamaigi hadia ia simane famaigi Yehowa. Angeragö duma-duma daʼa. Khalaigö, lö öʼila mörö ba iwaʼö khöu doto wa moguna öʼa gö si sökhi, öfalua olahraga, ba so mato hauga ngawalö zinangea öbulöʼö ba waʼaurimö. Aefa daʼö, öʼoʼö niwaʼönia andrö ba örasoi gunania! Hadia nirasoimö ba wanuturu lala nibeʼe doto andrö?

⁶ Simane daʼö göi Zomböi yaʼita. Ibeʼe khöda huku ba wolumöʼö yaʼita moroi ba lua-lua si lö sökhi börö horö ba enaʼö tola itugu sökhi waʼaurida. Duma-dumania, ifahaʼö ita Sura Niʼamoniʼö wa tebai falimo ita, tebai takisu niha, tebai managö, tebai tafalua gamuata fohorö, tebai tafalua zi lö sökhi, mazui böi tafaogö ita ba ngawalö hadia ia zoʼamakhaita khö ndra malaʼika si lö sökhi. (Baso Gamaedola 6:16-19; Famaʼeleʼö 21:8) Tarasoi mbua si sökhi börö woloʼöda khö Yehowa, itugu taʼomasiʼö ia hegöi hukunia.

7. Hewisa waö-waö si so ba Zura Niʼamoniʼö möi fanoloda?

⁷ Lö moguna tefakao ita ua sakali börö me lö taʼoʼö huku Lowalangi, awena tafahaʼö ita hadia zatulö ba hadia zi sala. Tola tafahaʼö ita ba zala nifalua niha ba götö föna, simane duma-duma si so ba Zura Niʼamoniʼö. Imane Gamaedola 1:5, ”Na ifondrondrongo satua-tua, ba tedou waʼaboto ba dödönia.” Fefu waʼaboto ba dödöda andrö no moroi khö Lowalangi ba moguna khöda daʼö! Duma-dumania, angeragö hewisa waʼatefakao Dawido me lö iʼoʼö niwaʼö Yehowa ba me no ifalua gamuata fohorö khö Mbaseba. (2 Zamueli 12:7-14) Ba ginötö öbaso waö-waönia  andrö, angeragö daʼa: ’Hadia zi tola ifalua Dawido ba wotimbagö abula dödö andrö? Hadia zi tola ufalua na alua khögu zimane daʼö? Na tedönisi dödögu ba wamalua amuata fohorö, hadia tobalido simane Dawido mazui Yosefo?’ (1 Moze 39:11-15) Na taʼangeragö hadia manö lua-lua horö, tola itugu ’taʼogorofi zi lö sökhi’.

8, 9. (a) Hadia nifalua dödöda side-ide ba wanolo yaʼita? (b) Hewisa enaʼö tefaudu ba goi-goi Yehowa wohalöwö dödöda side-ide?

⁸ Tatu tatimbagö ngawalö hadia ia zi fatuwu khö Yehowa. Hizaʼi, hadia nifaluada na lö nizara-zara ba Zura Niʼamoniʼö huku soʼamakhaita ba zi sambua ngawalö? Hewisa wotatugöida hadia manö zomasi Lowalangi? Na taʼoʼö niwaʼö Zura Niʼamoniʼö ba wamomaha tödöda side-ide, tola tahalö gangetula si sökhi.

⁹ Börö me iʼomasiʼö ita Lowalangi, ibeʼe khöda goi-goi si tola mameʼe fanuturu lala ba dödöda side-ide. Imane, ”Yaʼo, Yehowa, Lowalangiu zamahaö yaʼugö ba zoguna khöu, samasao yaʼugö ba lala nitöröu.” (Yesaya 48:17, 18) Na tahaogö taʼangeragö sanandrösa ba goi-goi Zura Niʼamoniʼö ba tatehegö tofakha ba dödöda daʼö, tola taʼehaogö ba tafaudugö dödöda side-ide. Na tafalua daʼö, tola tahalö gangetula si sökhi.

10. Hadia goi-goi andrö, ba hewisa wangogunaʼö Yesu goi-goi ba wamahaʼönia?

¹⁰ Goi-goi yaʼia daʼö dane-dane zindruhu sameʼe fanuturu lala ba wangera-ngerada, sanolo yaʼita ba wangai angetula si sökhi. Na tafahaʼö ita ba goi-goi Yehowa, tola taʼila lala wangera-ngera Yehowa ba hadia mbörö wa ibeʼe zi sambua huku. Iʼogunaʼö Yesu goi-goi ba ginötö ifahaʼö ndra nifahaʼönia sanandrösa ba lua-lua moroi ba ngawalö nifaluara. Duma-dumania, ifahaʼö ita wa fofönu tola molua-lua ba wamalua si lö sökhi, ba foʼera-era amuata wohorö tola molua-lua ba wamalua fohorö. (Mataiʼo 5:21, 22, 27, 28) Enaʼö so khöda dödö side-ide si no tefomaha, moguna tatehegö goi-goi Yehowa wameʼe khöda fanuturu lala. Na tafalua daʼö, tola tefolakhömi Lowalangi ba gangetula nihalöda.​—1 Korindro 10:31.

11. Hana wa tola faböʼö-böʼö dödö side-ide niʼokhögö niha zamösana?

¹¹ Ba ginötö laʼogunaʼö Zura Niʼamoniʼö ira niha Keriso ba wamomaha tödöra side-ide, angetula nihalöra sanandrösa ba ngawalö hadia ia tatu faböʼö-böʼö. Duma-dumania sanandrösa ba wombadu alkohol. Lö niwaʼö Zura Niʼamoniʼö wa fasala na tabadu hadia ia zi so alkohol. Hizaʼi, ifangelama ita Sura Niʼamoniʼö enaʼö böi talafo oya tabadu ia faböi mabu ita. (Gamaedola 20:1; 1 Timoteo 3:8) Hadia daʼa geluahania wa lö moguna saʼae iʼera-era danö böʼö si samösa niha börö me lö talafo oya ibadu? Tenga. Hewaʼae itehegö khönia tödönia side-ide ba wombadu daʼö, hizaʼi, moguna göi iʼangeragö dödö side-ide niha böʼö.

12. Hewisa wa tola möi fanoloda wehede si so ba Roma 14:21 ba wangosinangegö dödö side-ide niha böʼö?

¹² Iforomaʼö Faulo wa moguna taʼosinangegö dödö side-ide niha böʼö. Imane, ”Sökhi na lö muʼa nagole mazui mubadu nagu ba gofu hadia nifaluami, moroi na tobali fangala khö dalifusömi.” (Roma 14:21) Sindruhunia tola manö tabadu zi so alkohol. Hizaʼi, na so niha Keriso tanö böʼö zi tetutu tödö börö me tafalua daʼö, tatu lö tafalua saʼae ia. Tola manö sandru ia ba wombadu alkohol fatua lö ifahaʼö ia ba Zura Niʼamoniʼö ba no ihalö gangetula wa lö ibadu saʼae daʼö. Tatu lö omasi tafalua hadia ia zi tola mameʼe mangawuli dödönia ba zi toʼölö ifalua ba zilalö. (1 Korindro 6:9, 10) Na so ndra talifusöda si möi manörö ba nomoda, hadia tafaso ia wombadu alkohol, hewaʼae no hauga kali iwaʼö wa lö omasi ia? Tatu lö tafalua daʼö!

13. Hewisa Dimoteo wangosinangegönia dödö side-ide niha böʼö ba wanolo yaʼira enaʼö latemaʼö duria somuso dödö?

¹³ Me awuyu-wuyu nasa Dimoteo, itehegö lasuna ia hewaʼae afökhö daʼö. Aboto ba dödönia wa moguna sibai wosuna andrö ba niha Yahudi enaʼö tola manuriaigö ia khöra. Simane Faulo, lö omasi ibeʼe tetutu dödö niha böʼö Timoteo. (Halöwö Zinenge 16:3; 1 Korindro 9:19-23) Hadia ötehegö göi niʼokhögömö ba wanolo niha böʼö soroi ba dödö?

14, 15. (a) Hewisa enaʼö moʼahonoa ita ba waʼaboto ba dödö? (b) Hewisa niha Keriso soʼahonoa ba waʼaboto ba dödö wangosinangegö niha böʼö?

¹⁴ ”Me no aefa tafahaʼö ita ba wamahaʼö si oföna sanandrösa khö Keriso” ba ”moʼahonoa waʼaboto ba dödöda”. (Heberaiʼo 6:1) Lö iʼanemaiʼö tobali ita niha Keriso soʼahonoa faʼaboto ba dödö na no hauga fakhe faböbö ita ba zindruhu. Moguna taforege enaʼö moʼahonoa waʼaboto ba dödöda. Moguna tanönö waʼatua-tua hegöi faʼaboto ba dödöda. Andrö moguna tabaso Zura Niʼamoniʼö ero maʼökhö. (Zinunö 1:1-3) Na öbaso Zura Niʼamoniʼö ero maʼökhö, tola itugu aboto ba dödöu huku hegöi goi-goi Yehowa.

¹⁵ Hadia huku sabölö moguna ba niha Keriso? Yaʼia daʼö huku faʼomasi. Imane Yesu khö ndra nifahaʼönia, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.” (Yohane 13:35) Faʼomasi daʼa mufotöi ia ”huku razo” ba ”oroisa waʼomasi”. (Yakobo 2:8; Roma 13:10) Lö tokea ita na moguna sibai waʼomasi simane daʼö börö me iwaʼö Sura Niʼamoniʼö wa ”Lowalangi andrö no faʼomasi”. (1 Yohane 4:8) Ba khö Lowalangi, faʼomasi andrö tenga ha nirasoi dödö. Hizaʼi, oroma waʼomasinia andrö ba nifaluania. Imane Yohane, ”Daʼa lala Lowalangi ba wangoromaʼö faʼomasinia khöda: Ifatenge Nononia si ha sambua ba gulidanö enaʼö tasöndra waʼauri ba döinia.” (1 Yohane 4:9) Ba ginötö taforomaʼö waʼomasida khö Yehowa, Yesu, ira talifusöda, hegöi niha böʼö, daʼö dandra wa yaʼita niha Keriso soʼahonoa ba waʼaboto ba dödö.​—Mataiʼo 22:37-39.

16. Na tobali ita niha Keriso soʼahonoa ba waʼaboto ba dödö, hadia mbörö wa itugu taʼameʼegö tödö goi-goi?

 ¹⁶ Na tobali ita niha Keriso soʼahonoa ba waʼaboto ba dödö, itugu taʼameʼegö tödö goi-goi Zura Niʼamoniʼö. Si toʼölönia, lö ero-ero na so zalua tola muʼogunaʼö huku. Hizaʼi nifotöi goi-goi, tola muʼogunaʼö ba ngawalö zalua. Duma-dumania, lö laʼila iraono side-ide hadia lua-luania wariawösa ba niha si lö sökhi. Tobali, labeʼe ira satuania gamakhoita ba wolumöʼö yaʼia. (1 Korindro 15:33) Hizaʼi, na itugu ebua-bua nono daʼö, tola ifaudugö nifaluania moloʼö goi-goi Zura Niʼamoniʼö. Goi-goi andre zanolo yaʼia ba wamili si fahuwu si sökhi. (Baso 1 Korindro 13:11; 14:20.) Na asese taʼangerönusi goi-goi Zura Niʼamoniʼö, tola itugu taʼodaligö dödöda side-ide. Ba itugu aboto ba dödöda hadia zomasi Lowalangi enaʼö tafalua.

17. Hana tola tawaʼö wa so khöda fefu ngawalö niʼogunaʼö ba wangai angetula si sökhi?

¹⁷ So khöda fefu hadia ia niʼogunaʼö ba wangai angetula si tola mangomusoiʼö tödö Yehowa. Ba Zura Niʼamoniʼö, so huku hegöi goi-goi si tola manolo yaʼita ”enaʼö moʼahonoa . . . ba tefaʼanö ba wamalua ngawalö halöwö si sökhi”. (2 Timoteo 3:16, 17) Daʼö mbörö wa moguna böi mamalö taʼalui goi-goi Zura Niʼamoniʼö enaʼö tola aboto ba dödöda hadia ia zomasi Yehowa. (Efeso 5:17) So khöda Indeks Publikasi Menara Pengawal, Fanuturu Lala ba Wamalua Riset khö Ndra Samaduhuʼö Yehowa, Watchtower Library, PERPUSTAKAAN ONLINE Manuriaigö, hegöi aplikasi JW Library. Na taʼogunaʼö fakake daʼa ba wamalua famahaʼö samösa hegöi famahaʼö ba zi sambua omo, tola oya tasöndra mbuania.

18. Hadia gunania na tafalua huku hegöi goi-goi Yehowa ba waʼaurida?

¹⁸ Na taʼogunaʼö huku hegöi goi-goi Yehowa, tola itugu sökhi waʼaurida! Imane Zinunö 119:97-100, ”Ha lö omasido goroisamö andrö! Maʼö-maʼökhö lö aefa ba dödögu. No öʼatua-tuaʼö ndraʼodo, moroi ba zi faʼudu khögu, oroisamö andrö, me no tana khögu, irugi zi lö aetu. Atua-tua ndraʼodo, moroi ba zamahaö yaʼo fefu; me ufatou-tou tödögu wamaduhuʼömö andrö. Atua-tua ndraʼo, moroi ba zatua, me utöngöni goroisamö andrö.” Tola itugu atua-tua ita ba moʼera-era, na tahaogö taʼangeragö huku hegöi goi-goi Lowalangi. Ba na taʼogunaʼö huku hegöi goi-goinia ba wamomaha tödöda side-ide, tola sindruhu-ndruhu ”moʼahonoa ita simane Keriso”.​—Efeso 4:13.