1, 2. (a) Hadia gangandröwa Yesu ba wangandrönia safuria me fao ia khö ndra sinengenia? (b) Hana wa abu dödö Yesu sanandrösa ba wahasara dödöra?

ME FAO Yesu khö ndra nifahaʼönia ba wemanga safuria, abu dödönia me lö khöra fahasara dödö. Me fao khöra Yesu wangandrö, iwaʼö wa omasi ia enaʼö so wahasara dödö khö ndra nifahaʼönia, simane yaʼia faoma Amania. (Baso Yohane 17:20, 21.) Fahasara dödö ndra nifahaʼö Yesu zamaduhuʼö wa Yehowa zamatenge Yesu ba gulidanö. Faʼomasi zi tobali tandra ba niha wa sindruhu-ndruhu nifahaʼö Yesu ira ba daʼö zameʼe khöra fahasara dödö.​—Yohane 13:34, 35.

² Aboto ba dödöda hadia mbörö wa oya iʼombakhaʼö Yesu sanandrösa ba wahasara dödö ba mbongi daʼö. Iʼila wa lö hadöi fahasara dödö ba gotalua ndra sinengenia. Duma-dumania, fadaʼawa ndra sinenge ba wotatugöi ”haniha zabölö ebua ba gotaluara” simane nifaluara ba zilalö. (Luka 22:24-27; Mareko 9:33, 34) No irai laʼandrö khö Yesu ira Yakobo faoma Yohane enaʼö ibeʼe khöra dadaoma si tohude ba zingania ba Wamatörö ba zorugo.​—Mareko 10:35-40.

3. Hadia mbörö wa tola manö abua khö ndra nifahaʼö Yesu ba wangoromaʼö fahasara dödö, ba hadia manö wanofu nitutunöda?

 ³ Hizaʼi, tenga ha faʼedöna ba wamatörö hegöi ba wangokhögö dadaoma zi tobali börö wa abua khö ndra nifahaʼö Keriso ba wangoromaʼö fahasara dödö. Aboto wahasara dödö niha ba götö Yesu börö me so khöra waʼafatuwu hegöi fanahö-nahö dödö. Moguna lalawa dödö si lö baga simane daʼö ira nifahaʼö Yesu. Ba wamahaʼö daʼa, so tölu wanofu nitutunöda: Hadia nifalua Yesu sanandrösa ba wanahö-nahö dödö? Hewisa wanolonia ira soloʼö khönia enaʼö lö ebua dödö zambuana ba so khöra wahasara dödö? Hewisa duma-duma hegöi famahaʼö Yesu, tola tobali fanolo khöda ba wangoromaʼö fahasara dödö?

4. Beʼe duma-duma wanahö-nahö dödö niha khö Yesu.

⁴ No irai manahö-nahö dödö niha khö Yesu. Me ifatunö Filifo khö Natanaʼeli wa no isöndra Mesia, imane Natanaʼeli, ”Hadia tesöndra zi sökhi moroi ba Nazareta?” (Yohane 1:46) Te iʼila Natanaʼeli wa ba Mbetilekhema dania tumbu Mesia, simane si no mufaʼeleʼö ba Mikha 5:2. Te so ba wangera-ngerania wa lö tefaudu na moroi ba Nazareta tohare Mesia börö me tenga banua si tohude daʼö. So göi ösa niha Yudea sangokhögö dadaoma zangosiwawöi Yesu börö me moroi ba Galilaia ia. (Yohane 7:52) Ato niha Yudea zangosiwawöi niha Galilaia. So ösa niha Yahudi zangoʼaya Yesu ba lafotöi ia niha Zamaria. (Yohane 8:48) Moroi ba soi böʼö niha Zamaria, ba faböʼö agamara ba agama niha Yahudi. Laʼosiwawöi ira ba lö fahuwu khöra niha Yudea hegöi niha Galilaia.​—Yohane 4:9.

5. Hadia wanahö-nahö dödö nitaögö ndra nifahaʼö Yesu?

⁵ Laʼosiwawöi zoloʼö khö Yesu ira sondröniaʼö agama Yahudi. Labeʼe döira ira Farizaiʼo ”niha si göna fangelifi”. (Yohane 7:47-49) Moloʼö Farizaiʼo, niha si lö tefahaʼö ba zekola agama Yahudi hegöi niha si lö moloʼö si toʼölö lafalua, no niha si toʼölö ba si lö karua. (Halöwö Zinenge 4:13, nisura ba gahe zura) Manahö-nahö dödö niha khö Yesu hegöi khö ndra nifahaʼönia, börö me lahöni-höni sibai niha agama, status sosial, hegöi soira samösa. Molua-lua göi wanahö-nahö dödö andre khö ndra nifahaʼö hegöi famaigira niha böʼö. Enaʼö lö mamalö so khöra wahasara dödö, moguna labulöʼö lala wangera-ngerara.

6. Beʼe duma-duma sangoromaʼö wa tola molua-lua khöda wanahö-nahö dödö.

⁶ Iadaʼa, oya wanahö-nahö dödö ba gulidanö. Tola manö manahö-nahö dödö niha khöda, mazui tola manö göi manahö-nahö dödöda khöra. Imane samösa talifusöda ira alawe perintis ba Australia, ”Me mböröta, fatuwudo sibai ba niha safusi uli, börö me iʼotarai mböröta lafalua walöʼatulö ba niha  Aborigin.” Itugu monönö waʼafatuwunia khöra börö me no lafalua khönia zi lö atulö. Ifatunö göi talifusöda ira matua moroi ba Kanada sanandrösa ba nirasoinia ba mböröta, imane ”Moloʼö yaʼo abölö sökhi niha sangogunaʼö li Prancis.” Iwaʼö wa lua-luania lö omasi ia ba niha sangogunaʼö li Inggris.

7. Hewisa wamaigi Yesu fanahö-nahö dödö?

⁷ Simane ba götö Yesu, fanahö-nahö dödö si so ba götöda iadaʼa göi no mowaʼa ba dödö niha ba abua wombulöʼö. Hadia nifalua Yesu sanandrösa ba wanahö-nahö dödö? Si oföna, yaʼia samösa lö irai so khönia wanahö-nahö dödö ba lö irai ebua dödö zambuana. Manuriaigö ia ba niha si kayo hegöi ba niha si numana, khö Warizaiʼo hegöi ba niha Zamaria, khö zangai pajak hegöi ba niha samalua horö. Si dua, moroi ba wamahaʼö hegöi duma-dumania, iforomaʼö wa tebai manahö-nahö dödö ndra nifahaʼönia ba niha böʼö.

8. Hadia goi-goi soguna si tobali dane-dane wahasara dödöda? Tutunö.

⁸ Ifahaʼö Yesu sambua goi-goi soguna si tobali dane-dane wahasara dödöda. Imane khö ndra nifahaʼönia, ”Fatalifusö ami fefu.” (Baso Mataiʼo 23:8, 9.) Sindruhu sa wa si fatalifusö ita börö me yaʼita fefu ngaʼötö Gadamo. (Halöwö Zinenge 17:26) Ifatunö göi Yesu khö ndra nifahaʼönia wa si fatalifusö ira fefu börö me lafaduhuʼö wa Yehowa andrö Amara si so ba zorugo. (Mataiʼo 12:50) Ba yaʼira fefu no tobali ösi nomo Lowalangi ba niʼosambuaʼö ba waʼomasi hegöi famati. Daʼö mbörö wa laʼogunaʼö ira sinenge wehede ira talifusö khö ndra niha Keriso tanö böʼö ba ginötö lasura zura ba mbanua niha Keriso.​—Roma 1:13; 1 Fetero 2:17; 1 Yohane 3:13.

9, 10. (a) Hadia mbörö wa tebai lahöni-hönisi soira samösa niha Yahudi? (b) Hewisa Yesu ba wamahaʼö yaʼita enaʼö böi irai so ba gera-erada wa abölö sökhi soida? (Faigi gambara ba wamobörö wamahaʼö.)

⁹ Me no aefa ifatunö Yesu khö ndra nifahaʼönia hadia mbörö wa moguna laʼotalifusögö niha böʼö, ifatunö göi khöra wa moguna so khöra wangide-ngideʼö. (Baso Mataiʼo 23:11, 12.) Simane si no tatutunö, itaria lö fahasara dödö khö ndra sinenge börö wayawasa. Ba götö Yesu, lahöni-höni sibai niha soira samösa. Ato niha Yahudi zi faduhu tödö wa abölö sökhi ira moroi ba niha böʼö börö me yaʼira ngaʼötö Gaberahamo. Hizaʼi, imane khöra Yohane Samayagö Idanö, ”Tola ibeʼe ngaʼötö khö Gaberahamo moroi ba gara andre Lowalangi.”​—Luka 3:8.

¹⁰ Ifahaʼö Yesu wa fasala na lahöni-höni sibai soira samösa niha. No irai manofu khönia samösa zangila amakhoita, ”Haniha zindruhunia nawögu andrö?” Ba wameʼe fanema li ba wanofu andrö, ibeʼe Yesu sambua duma-duma. So samösa niha Yahudi niböbözi zorabu ba laröi ia ba zinga lala. Me so ösa niha Yahudi sanörö lala andrö, ba lö latolo ia. Hizaʼi, so samösa niha Zamaria sahakhö tödö ba niha Yahudi andrö ba itolo. Ifatunö Yesu khö zangila amakhoita andrö wa moguna tobali ia simane niha Zamaria andrö. (Luka 10:25-37) Iʼoromaʼö Yesu wa duma-duma niha Zamaria zamahaʼö niha Yahudi ba wangomasiʼö awöra.

11. Hana wa moguna enaʼö lö ebua dödö zambuana ndra nifahaʼö Yesu ba hewisa wanolonia yaʼira enaʼö aboto ba dödöra daʼö?

 ¹¹ Fatua lö mangawuli Yesu ba zorugo, iʼandrö khö ndra nifahaʼönia enaʼö manuriaigö ira ba ”Yudea ba Samaria maʼasagörö, irugi wondrege danö”. (Halöwö Zinenge 1:8) Enaʼö tola lafalua daʼö, moguna böi so ba dödö ndra nifahaʼö Yesu wa yaʼira zabölö sökhi ba böi manahö-nahö dödöra. Asese fahuhuo Yesu sanandrösa ba mbua-bua si sökhi niʼokhögö niha baero, ba daʼa zamaʼanö ndra nifahaʼönia enaʼö tola manuriaigö ba ngawalö soi. Duma-dumania, no irai isuno gumandru Romawi börö waʼebua wamatinia. (Mataiʼo 8:5-10) Ba Nazareta, banua si tumbu yaʼia, no irai itutunö Yesu wa itolo Yehowa niha baero, simane lakha mbanua Fenisia moroi ba Zarefa, hegöi Naʼema, niha Siria si göna bo auri. (Luka 4:25-27) Manuriaigö göi Yesu khö ndra alawe Zamaria, ba dua hari toröi ia ba zi sambua kota si so ba Zamaria börö me ato niha sadöni dödö ba wamondrondrongo turia nifaʼemania.​—Yohane 4:21-24, 40.

12, 13. (a) Hewisa wamaigi ndra sinenge me ifahaʼö ndra alawe Zamaria Yesu? (Faigi gambara ba wamobörö wamahaʼö.) (b) Hadia zangoromaʼö wa lö saboto sibai ba dödö Yakobo hegöi Yohane nifahaʼö Yesu khöra?

¹² Tenga zaoha khö ndra sinenge ba wolawa fanahö-nahö dödö. Tokea ira me omasi Yesu ba wamahaʼö ira alawe Zamaria. (Yohane 4:9, 27) Hadia mbörö? Tola manö börö me lö fahuhuo ndra sondröniaʼö ba agama khö ndra alawe föna niha sato, ba mendrua manö ba ndra alawe Zamaria si lö baga bua-bua. Lakaoni Yesu ira sinenge ba wemanga, hizaʼi abölö moguna khö Yesu wahuhuosania ba ndra alawe andrö moroi ba wemanga. Omasi Lowalangi na manuriaigö ia ba ifalua hadia zomasi Namania, mendrua manö manuriaigö khö ndra alawe Zamaria andrö, ba no amaedola gö daʼö khönia.​—Yohane 4:31-34.

¹³ Lö aboto ba dödö Yakobo hegöi Yohane wamahaʼö sabölö moguna andre. Me fao ndra nifahaʼö khö Yesu weʼamöi ba Zamaria, laʼalui nahia wolombase ba zi sambua banua side-ide börö me no bongi. Hizaʼi, lö latehegö khöra niha Zamaria wemörö. Mofönu sibai Yakobo faoma Yohane ba laʼandrö khö Yesu enaʼö itehegö khöra ba wotorugö alitö moroi ba zorugo ba wangohori niha si so ba mbanua andrö. Hizaʼi itegu ira Yesu. (Luka 9:51-56) Te tenga simane daʼö wofönu Yakobo faoma Yohane na ba Galilaia alua daʼö, banuara samösa. Tola manö mofönu ira börö me so khöra wanahö-nahö dödö. Ba gafuriata, me omasi niha Zamaria wamondrongo turia nifaʼema Yohane, te ifuli aila ia ba zi no irai ifalua ba zilalö.​—Halöwö Zinenge 8:14, 25.

14. Hewisa wangasiwai abula dödö sanandrösa ba wanahö-nahö dödö?

¹⁴ Lö ara me no aefa Wendrakose me 33 M, so waʼebua dödö zambuana salua ba mbanua niha Keriso. Me inötö so wombagi ö ba lakha mbanua si numana, laʼosilöʼögö lakha mbanua sangogunaʼö li Yunani. (Halöwö Zinenge 6:1) Tola manö alua daʼa börö wanahö-nahö dödö sanandrösa ba li. Hizaʼi, iʼanemaiʼö laʼasiwai daʼa ira sinenge. So dafitu ndra talifusö nituyura ba wombagi ö si lö ebua dödö zambuana. Börö me töi niha Yunani döi  ndra talifusö si dafitu andrö, tola manö terara dödö ndra lakha mbanua andrö.

15. Hewisa wangodödögö Wetero enaʼö lö ebua dödö zambuana ia ba niha fefu? (Faigi gambara ba wamobörö wamahaʼö.)

¹⁵ Me 36 M, ibörötaigö manuriaigö ndra nifahaʼö Yesu ba niha moroi ba ngawalö soi. Ba zilalö, ha ba niha Yahudi fariawö zinenge sotöi Fetero. Hizaʼi, no iwaʼö Lowalangi wa tebai abua dambai niha Keriso. Daʼö mbörö wa manuriaigö Wetero khö Gonelio, samösa saradadu Romawi. (Baso Halöwö Zinenge 10:28, 34, 35.) Me no aefa daʼö, fariawö ba fao manga Wetero ba niha Keriso si tenga niha Yahudi. Hauga fakhe aefa daʼö me so ia ba kota Gandriokhia, lö omasi ia fao manga ba niha Keriso si tenga niha Yahudi. (Galatia 2:11-14) Ibeʼe degu-tegu Faulo khö Wetero ba itemaʼö daʼö Fetero. Hezo taʼila? Me isura zurania siföföna Fetero ba niha Keriso Yahudi hegöi si tenga niha Yahudi si so ba Asia Kecil, itutunö wa moguna sibai na taʼomasiʼö fefu ndra talifusöda ba wamati.​—1 Fetero 1:1; 2:17.

16. Hadia mbörö wa tehöngö niha Keriso siföföna?

¹⁶ Börö duma-duma Yesu, andrö wa tola laʼomasiʼö ”fefu niha” ira sinenge. (Yohane 12:32; 1 Timoteo 4:10) Ba gafuriata, labulöʼö lala wangera-ngerara sanandrösa ba niha böʼö. Tehöngö niha Keriso siföföna börö me faoma laʼomasiʼö nawöra. Mato 200 fakhe silalö, so samösa penulis sotöi Tertullian sangombakha fehede niha böʼö sanandrösa ba niha Keriso, ”Faoma laʼomasiʼö nawöra” ba ”Latehe mate salahi dalifusöra”. Börö me no ’labohouni gamuatara’ ira niha Keriso, lafahaʼö ira ba wamaigi niha fefu simane famaigi Lowalangi yaʼira.​—Kolose 3:10, 11.

17. Hewisa enaʼö tola tatiboʼö wanahö-nahö dödö? Beʼe duma-duma.

¹⁷ Iadaʼa, moguna khöda ginötö ba wotiboʼö fefu wanahö-nahö dödö. Itutunö samösa talifusöda ira alawe moroi ba  Prancis wa abua sibai khönia wamalua daʼa. Imane, ”No ifahaʼö ndraʼo Yehowa hadia geluaha waʼomasi, faʼoböwö, hegöi fangomasiʼö ngawalö niha. Hizaʼi, ufahaʼö nasa ndraʼo ba wolawa fanahö-nahö dödö ba niha böʼö. Ba tenga zaoha wamalua daʼa. Daʼö mbörö wa lö aetu-aetu uʼohe daʼa ba wangandrö.” Itutunö göi samösa talifusöda ira alawe moroi ba Spanyol sanandrösa ba wolawania fangera-ngera si lö baga ba niha. Imane wangumaʼö, ”Asese mofozu ndraʼo, hizaʼi uʼila wa moguna nasa uforege. Uʼandrö saohagölö khö Yehowa, omuso dödögu me tola fao ndraʼo ba gotalua nösi nomo si so fahasara dödö.” Moguna tahaogö tafareso hewisa zindruhunia dödöda. Hadia moguna tatiboʼö wanahö-nahö dödö si so khöda nasa?

18, 19. (a) Hadia manö mbörö wa moguna tatemaʼö niha böʼö? (b) Hewisa wamaluada daʼa?

¹⁸ Sökhi sibai na tatörö tödöda wa fefu ita me mböröta no aröu moroi khö Lowalangi. (Efeso 2:12) Hizaʼi, ikaoni ita Yehowa enaʼö ahatö ita khönia si fao faʼomasi. (Hosea 11:4; Yohane 6:44) Ba itemaʼö göi ita Yesu, irege tola tobali ita ösi nomo Lowalangi. (Baso Roma 15:7.) Hewaʼae lö moʼahonoa ita, itemaʼö Yesu si fao faʼasökhi dödö. Tatu omasi göi tatemaʼö gofu haniha manö!

¹⁹ Ba ngaluo safuria ba gulidanö si lö sökhi andre, itugu lö fahasara dödö ba niha, manahö-nahö dödö, ba faoma fatuwu ira khö nawöra. (Galatia 5:19-21; 2 Timoteo 3:13) Hizaʼi, yaʼita ono mbanua Yehowa, moguna taʼalui ’waʼatua-tua si otarai moroi yawa’ sanolo yaʼita enaʼö lö ebua dödö zambuana hegöi ba wangoromaʼö faʼatulö. (Yakobo 3:17, 18) Omuso dödöda me tola fahuwu ita ba niha moroi ba soi tanö böʼö, tatemaʼö zi toʼölö lafalua, ba tafahaʼö ita ba li niʼogunaʼöra. Na tafalua daʼö, tola tasöndra howu-howu ”hulö hohou nidanö” ba faʼatulö ”hulö ndrulu nasi”.​—Yesaya 48:17, 18.

20. Hadia mbuania na tatehegö waʼomasi zombulöʼö lala wangera-ngerada hegöi tödöda?

²⁰ Me ifahaʼö ia ba Zura Niʼamoniʼö talifusöda ira alawe moroi ba Australia andrö, ibörötaigö lö khönia saʼe fanahö-nahö dödö hegöi faʼafatuwu. Faʼomasi zanolo yaʼia ba wombulöʼö fangera-ngera hegöi tödönia. Ifatunö talifusöda ira matua sangogunaʼö li Prancis moroi ba Kanada, wa tola manö fatuwu zi samösa niha ba niha böʼö börö me lö faoma aboto ba dödöra nawöra. Iadaʼa iʼila wa ”lö teʼodaligö mbua-bua zi samösa niha ba nahia waʼatumbunia”. Mangowalu göi ia khö dalifusöda ira alawe sangogunaʼö li Inggris! Duma-duma andre zangoromaʼö wa faʼomasi tola ilawa wanahö-nahö dödö. Faʼomasi zangosambuaʼö yaʼita faoma böbö si tebai muʼetuʼö.​—Kolose 3:14.