1. Hadia sibai mbörö wa omuso dödöda?

TATU omuso dödöda me tarongo hewisa waʼoroma haga nono mbanua Lowalangi! Me ndröfia, so töra 10.000.000 wamahaʼö ba Zura Niʼamoniʼö nifalua nono mbanua Yehowa. Aefa daʼö, zuta niha sadöni tödö sangondrasi Fanörö Tödö ba lafahaʼö ira sanandrösa khö Yehowa sebua faʼomasi sameʼe höli.​—1 Yohane 4:9.

2, 3. (a) Hadia zi tebai manaha yaʼita ba wangoromaʼö ”haga ba niha gulidanö”? (b) Hadia nitutunöda ba wamahaʼö daʼa?

² Ba zi sagörö ulidanö, faböʼö-böʼö li niʼogunaʼö ndra Samaduhuʼö Yehowa. Hizaʼi, lö tobali taha-tahada daʼa ba wamosumange Yehowa tobali ösi nomo si so fahasara dödö. (Famaʼeleʼö 7:9) Gofu hadia ia li niʼogunaʼöda mazui hezo toröi ita, tola tobali ita ”haga ba niha gulidanö”.​—Filifi 2:15.

³ Tola tefolakhömi döi Yehowa börö halöwö fanuriaigöda, fahasara dödöda yaʼita niha Keriso, hegöi faʼamangaösöda.  Hewisa enaʼö lö tebulö oroma hagada ba zi tölu ngawalö andre?​—Baso Mataiʼo 5:14-16.

4, 5. (a) Hewisa wangoromaʼöda haga, baero na tafalua halöwö fanuriaigö? (b) Hadia mbua si sökhi na sökhi gamuatada hegöi fehededa? (Faigi gambara ba wamobörö wamahaʼö.)

⁴ Sambua lala sabölö moguna ba wangoromaʼöda haga yaʼia daʼö na manuriaigö hegöi wombaliʼö niha nifahaʼö. (Mataiʼo 28:19, 20) Me 1925, artikel ”Terang yang Menembus Kegelapan” iwaʼö wa ba ginötö safuria moguna ”oroma hagada” enaʼö lö faröi ita khö Zoʼaya. Itohugö nasa wangombakha, ”Tola tafalua daʼö na taturiaigö duria somuso dödö ba niha fefu ba tafaudugö mbua-buada ba goi-goi Yehowa.” (The Watch Tower, 1 mbaŵa si Önö 1925) Amuatada ba ginötö manuriaigö möi famolakhömi Yehowa. Ato niha sonehe-nehegö yaʼita ba ginötö manuriaigö. Na taboho khöra mbawa ba tahaogö wangowai yaʼira, tola so khöra wangera-ngera si sökhi sanandrösa khöda hegöi khö Lowalangi nifosumangeda.

⁵ Imane Yesu khö ndra nifahaʼönia, ”Na mirugi ero sambua omo, miʼowai ira.” (Mataiʼo 10:12) Ba mbanua si möi Yesu manuriaigö, na so niha sawena laʼila, tola lafeʼamöi ia yomo ira niha ba mbanua andrö. Iadaʼa, lö toʼölö na mufalua zimane daʼö ba zi hauga banua. Si toʼölönia, agataʼu mazui lö omasi niha na so niha si lö irai laʼila si tohare ba nomora. Hizaʼi, na sökhi gamuatada ba tahaogö-haogö wahuhuosa khöra, tola lö ataʼu ira khöda. Ba ginötö manuriaigö ita ba nahia sato niha wangogunaʼö naha mbuku si so gaolo-gaolo, hadia tanehegö wa adöni dödöra ba wangondrasi yaʼita hegöi ba wangai publikasi na taboho khöra mbawa ba tahaogö wangowai yaʼira? Tola manö yaʼira zamörögö fahuhuo!

6. Hadia zanolo si sambua fongambatö si no numalö döfi enaʼö lö tebulö lafalua halöwö fanuriaigö?

⁶ Börö wökhö, tebai manuriaigö ba nomo-omo zi sambua fongambatö si no numalö döfi ba Inggris. Tobali, labeʼe meza föna nomora ba labeʼe mbuku ba daʼö. Toröi zi sambua fongambatö andrö ahatö ba zekola, tobali labeʼe ba meza mbuku si tefaudu ba zatua samaondragö iraonora. So ösa zatua sangai buku andrö simane buku Pertanyaan Kaum Muda—Jawaban yang Praktis, Jilid 1 ba 2. Asese fao khöra samösa dalifusöda ira alawe perintis. Lanehe-nehegö ira satua waʼafahuwu dalifusöda ira alawe andrö hegöi faʼomasi niʼokhögö zi sambua fongambatö ba wanolo niha böʼö. So samösa zatua somasi mamomaha yaʼia ba Zura Niʼamoniʼö.

7. Hadia zi tola tafalua ba wanolo pengungsi si so ba mbanuada?

⁷ Barö-barö daʼa, ato niha si findra moroi ba mbanuara ba numalö ba soi böʼö ba tobali ira pengungsi. Hadia zi tola tafalua ba wanolo ira pengungsi si so ba  mbanuada enaʼö lafahaʼö ira sanandrösa khö Yehowa? Si oföna, tola tafomaha ita ba wangowai yaʼira ba li niʼogunaʼöra. Si dua, tola taʼogunaʼö aplikasi JW Language ba wamomaha yaʼita ba ngawua wehede enaʼö tola fahuhuo ita khöra. Si tölu, tola taʼogunaʼö jw.org ba wangoromaʼö video hegöi publikasi si no tehenaigö ba li niʼogunaʼöra.​—5 Moze 10:19.

8, 9. (a) Hewisa enaʼö tola tobali fanolo khöda gangowuloa nifalua barö migu? (b) Hewisa zatua ba wanolo iraonora ba wamaʼanö mbua gera-erara ba gangowuloa?

⁸ Ibeʼe khöda Yehowa wanolo si moguna enaʼö tola onekhe ita wanuriaigö. Duma-dumania, Faʼauri Niha Keriso ba Fanuriaigö zanolo yaʼita enaʼö faduhu dödöda ba khöda samösa ba ginötö tafuli tafalukhaisi niha hegöi ba wamörögö famahaʼö ba Zura Niʼamoniʼö.

⁹ Itaria asese toröi-röi ba dödö niha sawena mangondrasi angowuloa na so ndraonoda sameʼe bua gera-era ba gangowuloa. Tola öfahaʼö ndraonomö ba wameʼe bua gera-era moloʼö fehedera samösa. So niha somasi mamomaha yaʼia ba zindruhu börö me ahöli-höli dödöra mbua gera-era ndraono si no öna-öna ba soroi ba dödö.​—1 Korindro 14:25.

10. Hana wa tola so wahasara dödö ba nösi nomoda na mufalua wamahaʼö zi sambua omo?

¹⁰ Na taʼodödögö ba wamahaʼö ösi nomoda enaʼö so wahasara dödö ba halöwö hegöi faʼatulö, möi famolakhömi Yehowa daʼö. Duma-dumania, böi mamalö  lafalua ira satua mbongi Wamahaʼö zi Sambua Omo. Ato nösi nomo si fao ba wamaigi JW Broadcasting ba latutunö hewisa lalara wamalua si no lafahaʼö yaʼira. Törö tödöu wa faböʼö wanuturu lala soguna ba ndraono side-ide faoma si bohou ebua. Fefu nifaluamö tola tobali fanolo ba nösi nomomö irege latema mbua moroi ba wamahaʼö zi sambua omo.​—Zinunö 148:12, 13.

11-13. Hadia zi tola tafalua enaʼö monönö wahasara dödö ba gangowuloa?

¹¹ Na yaʼugö samösa si bohou ebua, tola ötolo fefu niha si so ba gangowuloa enaʼö larasoi wa muʼogunaʼö göi ira. Duma-dumania, fahuwu khö ndra talifusöda si no numalö döfi. Sofu khöra hadia mbörö wa tola anau gölöra wamosumange Yehowa ba zi hauga fakhe. Tola öfahaʼö ndraʼugö moroi ba duma-dumara ba faoma mifarou dödö nawömi! Baero daʼö, moguna göi tatemaʼö fefu niha sangondrasi Balai Mbanua Lowalangi. Tola taʼowai ira, taboho khöra mbawa, tatolo ira ba wangalui nahiara wedadao, ba taʼombakhaʼö göi ira ba niha böʼö. Na tafalua daʼö, larasoi wa tatemaʼö ira.

¹² Ba ginötö ödöniaʼö gangowuloa weʼamöi manuriaigö, tola ötolo zi no numalö döfi enaʼö laforomaʼö hagara. Tatugöi enaʼö tefaudu nahia wanuriaigöra ba falulu fohalöwö ira khö ndra talifusöda sagawuyu-wuyu. Asese göi ide-ide dödö ndra talifusöda si no numalö döfi ba sofökhö-fökhö börö me tebai manuriaigö ira simane ba zilalö. Hizaʼi, tola terara dödöra na laʼila wa taʼameʼegö tödö ba aboto ba dödöda hadia zalua khöra. Gofu hauga waʼalawa ndröfira mazui hawaʼara ira ba zindruhu, faʼasökhi dödö niforomaʼöda khöra tola tobali fanolo khöra irege terou dödöra ba wanuriaigö.​—3 Moze 19:32.

¹³ Fefu ndraono Gizaraʼeli lafosumange Yehowa si fao faʼowua-wua dödö. Imane sanura buku Zinunö, ”Hiza waʼasökhi, ba ha lö omasiö, na hasara dödö moroi yomo zi fatalifusö!” (Baso Zinunö 133:1, 2.) Ifagölösi wahasara dödö andrö simane fanikha wombayoini, sangokafui uli ba somuhua. Simanö göi, tola tobali ita fangokafu dödö khö ndra talifusöda na fahuwu ita khöra ba tafalua zi sökhi. Daʼa zameʼe itugu monönö wahasara dödö ba gangowuloa. Hadia öforege enaʼö itugu aboto ba dödöu ndra talifusö ba gangowuloa?​—2 Korindro 6:11-13.

14. Hewisa enaʼö lö mamalö taforomaʼö haga ba nahia waʼatoröida?

¹⁴ Gofu hezo so ita, tola taforomaʼö hagada. Na tafalua zi sökhi, tola adöni dödö zi fasinga omo khöda ba wamomaha yaʼira sanandrösa khö Yehowa. Sofu khöu samösa, ’Hadia niwaʼö-waʼö zi fasinga omo khögu sanandrösa khögu? Hadia toföfö ba lö taʼunö nomogu? Hadia monönö waʼasökhi zi so ba zi fasui? Hadia asese utolo zi fasinga omo khögu?’ Tandraigö sofu khö ndra Samaduhuʼö tanö böʼö, hadia lua-lua waʼasökhi dödö hegöi bua-buara ba zi fahatö khöra, si  fasinga omo khöra, awöra wohalöwö mazui ba nawöra sekola.​—Efeso 5:9.

15. Hana wa moguna böi mörö ita ba wamati?

¹⁵ Lala tanö böʼö ba wangoromaʼö hagada yaʼia daʼö na lö mörö ita ba wamati. Hauga kali iwaʼö Yesu khö ndra nifahaʼönia, ”Böi miförö.” (Mataiʼo 24:42; 25:13; 26:41) Na so ba wangera-ngerada wa ara nasa tohare ”wamakao sabölö-bölö”, tola manö lö tahaogö wangogunaʼö inötö si so ba wanolo niha enaʼö lafahaʼö ira sanandrösa khö Yehowa. (Mataiʼo 24:21) Lua-luania, haga niforomaʼöda itugu alö ba tola manö mate.

16, 17. Hadia zi tola tafalua enaʼö lö mörö ita ba wamati?

¹⁶ Moguna sibai enaʼö lö mörö ita ba wamati mendrua manö ba ginötö iadaʼa börö me itugu lö sökhi zalua andre. Hizaʼi, faduhu dödöda wa hasambalö tohare daʼö ba ginötö si no itatugöi Yehowa. (Mataiʼo 24:42-44) Gasa-gasa daʼö, moguna tabaloi si fao faʼebolo dödö ba taʼosambuaʼö dödöda ba zi so miföna. Baso Zura Niʼamoniʼö ero maʼökhö ba böi böhöli wangandrö khö Yehowa.  (1 Fetero 4:7) Fahaʼö ndraʼugö khö ndra talifusöda si no mamosumange Yehowa ba zi hauga fakhe. Duma-dumania, tola öbaso waö-waö waʼauri simane si so ba artikel ”Tujuh Puluh Tahun Memegang Punca Baju Seorang Yahudi” nifaʼanö ba Menara Pengawal 15 mbaŵa si Öfa 2012, ngaʼörö 18-21.

¹⁷ Böi böhöli wamosumange Yehowa. Ogunaʼö ginötö ba wamalua si sökhi hegöi ba wariawösa khö ndra talifusö. Na öfalua daʼö, tola monönö waʼomuso dödömö ba lö taraso khömö waʼanumalö ginötö. (Efeso 5:16) Barö zi otu fakhe, oya ngawalö zi no lakhamö ono mbanua Yehowa. Ba iadaʼa abölö oya halöwöda. Itugu tedou halöwö khö Yehowa, töra moroi ba zi tola takhalaigö. Mohaga sibai haga niforomaʼöda!

18, 19. Hewisa ndra satua sokubaloi wanolo yaʼita enaʼö lö mamalö so khöda waʼaterou dödö ba wamosumange Yehowa? Beʼe duma-duma.

¹⁸ Hewaʼae oya tafalua zala, itehegö khöda Yehowa ba wamosumange yaʼia. Ibeʼe khöda ndra satua sokubaloi si tola manolo yaʼita, yaʼia daʼö ”buala ba niha”. (Baso Efeso 4:8, 11, 12.) Tobali, na so ndra satua sokubaloi sangondrasi yaʼugö, ogunaʼö daʼö tobali inötö ba wamahaʼö yaʼugö sanandrösa ba waʼatua-tua hegöi mene-mene nibeʼera.

¹⁹ Duma-dumania, so sambua fongambatö ba Inggris si so abula dödö sanandrösa ba wangowalura. Laʼandrö wanolo moroi khö zi darua satua sokubaloi. Moloʼö foʼomo ira alawe, ambö iʼameʼegö tödö foʼomonia ira matua zoguna khöra ba wamati. Hizaʼi, moloʼö foʼomo ira matua, tenga samahaʼö si sökhi ia ba lö ifalua wamahaʼö zi sambua omo. Laʼogunaʼö duma-duma Yesu ira satua sokubaloi ba wameʼe khöra mene-mene. Lafarou dödö woʼomo ira matua enaʼö iʼoʼö lala Yesu ba woʼameʼegö tödö ndra nifahaʼönia. Lafarou göi dödö woʼomo ira alawe enaʼö ebolo dödönia khö woʼomonia ira matua. Labeʼe göi mato hauga ngawua mene-mene enaʼö fongambatö andrö tola fao ira ba ndraonora si darua wamalua famahaʼö zi sambua omo. (Efeso 5:21-29) Iforege foʼomo ira matua enaʼö tobali ia högö si sökhi ba nösi nomonia. Lafarou ia ira satua sokubaloi enaʼö lö awuwu ba iʼodaligö geheha niʼamoniʼö moroi khö Yehowa. Faʼomasi hegöi faʼasökhi dödö niforomaʼö ndra satua sokubaloi andrö zanolo si sambua omo!

20. Hadia mbuania na taforomaʼö hagada?

²⁰ ”Yaʼahowu dozi sangataʼufi Yehowa, sanörö lala andrö khönia.” (Zinunö 128:1) Na lö mamalö taforomaʼö haga, tola so khöda waʼowua-wua dödö. Andrö moguna tafahaʼö niha böʼö sanandrösa khö Lowalangi, tatolo nösi nomoda hegöi ira talifusöda ba gangowuloa enaʼö so wahasara dödö, ba böi mörö ita ba wamati. Laʼila niha böʼö duma-dumada si sökhi ba tola tefarou dödöra ba wamolakhömi Amada Yehowa.​—Mataiʼo 5:16.