1. Hadia wamangelama nisura Waulo soguna ba niha Keriso nibayoini?

”BÖI mifaomagö ami ba niha gulidanö ba götö daʼa.” (Rom. 12:2) Ibeʼe wamangelama daʼa sinenge sotöi Faulo soguna ba niha Keriso ba abad siföföna. Hana wa ibeʼe wamangelama sabeʼe andrö ba niha si no molulu faʼaurira khö Lowalangi ba no mubayoini eheha niʼamoniʼö?​—Rom. 1:7.

2-3. Hewisa Zatana ba wondrönisi yaʼita enaʼö lö taʼomasiʼö Yehowa, hizaʼi hewisa lalada ba wangeheta ”gofu hadia ia zi no aro” ba wangera-ngerada?

² So khö Waulo waʼaombö dödö, börö me so ösa niha Keriso si no tedönisi ba lala wangera-ngera si lö baga hegöi si lö eluaha moroi ba gulidanö Zatana. (Ef. 4:17-19) Tola göi alua khöda daʼa zamösana. Börö me Satana zamatörö ulidanö, lö iböhöli ba wangogunaʼö ngawalö lala enaʼö lö taʼomasiʼö Yehowa. Duma-dumania, na omasi ita tobali niha si tohude mazui tehöngö, iʼogunaʼö daʼö enaʼö lö taʼomasiʼö Yehowa. Tola manö göi iʼogunaʼö zalua khöda ba zilalö, si toʼölö mufalua ba mbanuada mazui faʼalawa zekolada, ba wondrönisi yaʼita ba lala wangera-ngerania.

³ Hadia tola tatimbagö ”gofu hadia ia zi no aro” ba wangera-ngerada? (2 Kor. 10:4) Nehegö wanema li nibeʼe Waulo, ”Madudugö lala wangera-ngera si fasala hegöi ngawalö daha-taha nifazökhi ba wolawa faʼaboto ba  dödö khö Lowalangi. Maböbö wangera-ngera enaʼö moloʼö ia khö Keriso.” (2 Kor. 10:5) Börö wanolo Yehowa, tola talawa gamuata mazui lala wangera-ngera si fasala. Simane dalu-dalu si tola mamadöhö wökhö, tola itolo ita Taromali Lowalangi ba wanimbagö fondrönisi zi lö sökhi gulidanö Zatana.

4. Hadia wombulöʼö nifaluada me tatema zindruhu?

⁴ Fuli angeragö wombulöʼö si no öfalua me öfahaʼö ba zindruhu moroi ba Zura Niʼamoniʼö, ba öhalö gangetula ba wamosumange Yehowa. Ato moroi ba gotaluada si no mamöhöli wamalua ngawalö zi fasala. (1 Kor. 6:9-11) Taʼandrö sibai saohagölö khö Yehowa börö me itolo ita ba wamöhöli wamalua ngawalö zi fasala!

5. Hadia zi dombua ngawalö nitutunö ba Roma 12:2 sinangea tafalua?

⁵ Hizaʼi, böi irai so ba dödöda wa lö moguna saʼae tabulöʼö ita. Hewaʼae no taböhöli ba wamalua horö sebua si no irai tafalua ba zilalö fatua lö tebayagö ita idanö, moguna nasa tatimbagö ngawalö hadia ia si tola mondrönisi yaʼita ba wamalua zui horö sebua. Hewisa wamaluada yaʼia? Imane Faulo, ”Böi mifaomagö ami ba niha gulidanö ba götö daʼa. Hizaʼi, mibulöʼö lala wangera-ngerami.” (Rom. 12:2) Tobali, so dombua ngawalö sinangea tafalua. Si oföna, ’böi tafaomagö ita’ mazui tedönisi ba gulidanö daʼa. Si dua, moguna ’tabulöʼö’ lala wangera-ngerada.

6. Hadia wamahaʼö si tola tahalö moroi ba niwaʼö Yesu nisura ba Mataiʼo 12:43-45?

⁶ Fombulöʼö niwaʼö Waulo, tenga ha fombulöʼö niʼila hörö. Moguna tahaogö tabulöʼö lala wangera-ngerada yaʼia daʼö amuatada, nirasoida, hegöi somasi ita. (Faigi kotak ” Hadia Sindruhu-ndruhu Tebulö Ita mazui Ha ba Niʼila Hörö?”) Andrö moguna tasofu khöda  samösa, ’Hadia fombulöʼö nifaluagu tobali niha Keriso ha ba niʼila hörö mazui sindruhu-ndruhu moroi ba dödögu hegöi fangera-ngeragu wa tobalido niha Keriso?’ Itutunö Yesu hadia zinangea mufalua ba Mataiʼo 12:43-45. (Baso.) Ösi ayati daʼö, ibeʼe wamahaʼö sabölö moguna: Lö tobönö na ha tatimbagö lala wangera-ngera si fasala; moguna tafaʼanö ba wangera-ngerada ba zomasi Lowalangi.

7. Hewisa lalada ba wombulöʼö tödöda hegöi fangera-ngerada?

⁷ Hadia tola tabulöʼö hadia zi so ba dödöda hegöi ba wangera-ngerada? Imane Taromali Lowalangi ba wameʼe fanema li, ”Yalötebulö tebohouni lala wangera-ngerami, ba tebohouni gamuatami, nifazökhi moloʼö ohitö dödö Lowalangi, si tefaudu ba waʼatulö ba faʼalöfaröi sindruhu.” (Ef. 4:23, 24) Sindruhunia tola tabulöʼö dödöda hegöi ’lala wangera-ngerada’, hizaʼi tenga saoha ba wamalua yaʼia. Moguna taforege ba wolawa gisö-isö dödöda ba taböhöli wamalua si fasala. Aefa daʼö, moguna göi tabulöʼö hadia zomasi ita, sasese tafalua, ba hadia mbörö wa tafalua ia. Börö daʼö, moguna enaʼö lö tebulö ba wamalua fangodödögö.

8-9. Hewisa zalua khö zi samösa dalifusöda ira matua, tobali famahaʼö khöda wa moguna sibai tabulöʼö lala wangera-ngerada?

⁸ Datafaigi duma-duma zi samösa dalifusöda ira matua. Me föna, yaʼia niha somasi faʼudu. Me no iböhöli wemabu-mabu hegöi faʼudu, no sinangea ia tebayagö idanö. Ba tobali wamaduhuʼö daʼa ba nahia si toröi yaʼia. Hizaʼi, samuza inötö me ba zi bongi, lö ara me no tebayagö ia idanö göna ia fanandraigö si lö idöna-döna. So samösa ndra matua si no mabu sangondrasi nomonia ba iʼandrö khönia faʼudu. Ba wamobörö itaha dödönia enaʼö lö faʼudu. Hizaʼi, me iwaʼö niha daʼö zi lö sökhi sanandrösa khö Yehowa, tebai itaha dödönia. Möi ia baero ba nomo ba ibözi ndra matua daʼö. Hana wa ifalua daʼö? Me no ifahaʼö ia ba Zura Niʼamoniʼö, tola itaha waʼomasinia faʼudu, hizaʼi lö nasa nibulöʼönia lala wangera-ngerania.

⁹ Hewaʼae simanö, lö awuwu dalifusöda andrö. (Gamd. 24:16) Itolo ia ndra satua sokubaloi irege itugu tedou ia ba wamati. Ba gafuriata, tobali ia satua sokubaloi. Samuza inötö me ba zi bongi, föna Balai Mbanua Lowalangi, ifuli zui alua khönia wanandraigö simane salua khönia ba zi hauga fakhe silalö. So samösa ndra matua si no mabu, sedöna mamözi zatua sokubaloi tanö böʼö. Hadia nifalua dalifusöda andre? Si fao fangide-ngideʼö, ihaogö fahuhuo ba niha si mabu andrö, ifahono ba ifasao niha daʼö mangawuli ba nomonia. Hana wa iadaʼa faböʼö nifalua dalifusöda? Börö me no ibulöʼö lala wangera-ngerania. No sindruhu-ndruhu tobali ia niha somasi faʼatulö ba sangokhögö fangide-ngideʼö. Möi famolakhömi Yehowa daʼa!

10. Hadia zinangea tafalua enaʼö tola tabulöʼö lala wangera-ngerada?

¹⁰ Fombulöʼö simane daʼö tebai alua ia ba zi sabata mazui iʼanemaiʼö tebulö. Moguna khöda ’wangodödögö’ ba tola manö moguna khöda ginötö ba zi hauga fakhe. (2 Fet. 1:5) Lö alua waʼatebulö andrö ha börö me no ara tafosumange Yehowa. Moguna khöda wangodödögö ba wombulöʼö lala wangera-ngerada. So ösa zinangea tafalua enaʼö tola tabulöʼö ita. Datatutunö ösa ba gotaluania.

11. Hewisa wangandrö tobali fanolo khöda ba wombulöʼö lala wangera-ngerada?

¹¹ Lala si oföna sibai yaʼia daʼö fangandrö. Moguna mangandrö ita simane nifalua zanura sinunö, ”Asogö khögu dödö sohau-hau, yaʼugö Lowalangi, ba eheha si bohou ba saro, ba dödögu bakha.” (Zin. 51:12) Moguna tafaduhuʼö wa tabulöʼö lala wangera-ngerada ba taʼandrö wanolo moroi khö Yehowa. Hana wa tola faduhu dödöda wa itolo ita Yehowa? Tola faduhu dödöda ba nifabuʼu Yehowa ba ndraono Gizaraʼeli sabeʼe högö me götö Hezekieli, ”Ba ubeʼe khöra dödö si bohou, ba eheha si bohou ubeʼe ba dödöra bakha; tödö kara andrö, ba uheta barö doto, ba ubeʼe khöra dödö nagole, [eluahania, tödö salio ba wanemaʼö fanuturu lala Lowalangi].” (Hez. 11:19) Omasi Yehowa ba wanolo iraono Gizaraʼeli enaʼö tebulö, ba omasi göi ia ba wanolo yaʼita.

12-13. (a) Moloʼö Zinunö 119:59, hadia zinangea taʼangerönusi? (b) Hadia manö wanofu-nofu sinangea tasofu khöda samösa?

¹² Lala si dua sabölö moguna yaʼia daʼö foʼangerönusi. Moguna ero maʼökhö taʼodödögö ba wombaso Daromali Lowalangi, tabeʼe ginötöda ba woʼangerönusi yaʼia mazui tahaogö taʼangeragö hadia zi no tabaso, irege tola taʼila hadia zinangea tabulöʼö moroi ba lala wangera-ngerada hegöi nirasoida. (Baso Zinunö 119:59; Heb. 4:12; Yak. 1:25) Moguna taʼila lala wangera-ngerada hegöi nirasoida si no tedönisi ba waʼatua-tua niha gulidanö. Moguna tatemaʼö zoʼamböta yaʼita ba taʼodödögö ba wanayaigö yaʼia.

¹³ Moguna tasofu khöda samösa, ’Hadia so khögu waʼafökhö dödö mazui faʼolohu?’ (1 Fet. 2:1) ’Hadia urasoi wa abölö sökhi ndraʼo moroi ba niha böʼö börö waö-waö waʼaurigu, faʼalawa zekolagu, mazui faʼoya gefe niʼokhögögu?’ (Gamd. 16:5) ’Hadia uʼaohasi ba dödö niha böʼö börö me lö laʼokhögö simane niʼokhögögu mazui börö me tenga si fagölö soi khögu ira?’ (Yak. 2:2-4) ’Hadia adöni dödögu nibeʼe gulidanö Zatana andre?’ (1 Yoh. 2:15-17) ’Hadia adöni dödögu ba wamaigi hiburan soʼamakhaita ba wohorö hegöi faʼalösökhi?’ (Zin. 97:10; 101:3; Gamo. 5:15) Ba ginötö öbeʼe wanema li ba wanofu-nofu daʼö, tola manö aboto ba dödömö wa so zinangea öbulöʼö. Ba ginötö mofozu ita ba wombulöʼö ”gofu hadia ia zi no aro” ba dödöda, omuso dödö Namada si so ba zorugo.​—Zin. 19:15.

14. Hana wa moguna sibai tafili wariawösa si sökhi?

¹⁴ Lala si tölu yaʼia daʼö tafili wariawösa si sökhi. Hewaʼae taʼila mazui löʼö, tola idönisi ita awöda fariawö. (Gamd. 13:20) Ba naha wohalöwö mazui ba zekola, niha ba zi fasuida lö latolo ita ba wamaʼanö ba gera-erada hadia zomasi Lowalangi. Hewaʼae simanö, tola tasöndra wariawösa si sökhi ba nahia gangowuloa niha Keriso. Ba daʼö tola tefarou ita ba wangokhögö ’faʼomasi hegöi ba mbu-bua si sökhi’.​—Heb. 10:24, 25.

15-16. Hadia nifalua Zatana ba wombulöʼö lala wangera-ngerada?

¹⁵ Törö tödöu wa no ihalö gangetula Satana ba wombulöʼö lala wangera-ngerada. Iʼogunaʼö ngawalö wamahaʼö ba wamakiko ngawalö zi sökhi si so ba wangera-ngerada si otarai ba Daromali Lowalangi.

¹⁶ Lö tebulö Zatana ba wameʼe fanofu  si fagölö simane nibeʼenia khö Khawa ba Kabu Edena, ’Hadia sindruhu-ndruhu iwaʼö Lowalangi . . . ?’ (1 Moz. 3:1) Ba gulidanö nifatörö Zatana, asese tarongo wanofu-nofu si tola mameʼe aombö dödöda ba nifaduhusida tödö, duma-dumania, ’Hadia sindruhu-ndruhu lö omasi Lowalangi na alua waʼorudu ba gotalua ndra matua faoma ira matua mazui ira alawe faoma ira alawe? Hadia sindruhu-ndruhu lö omasi Lowalangi na öfalua Natal hegöi ulang tahun? Hadia sindruhu-ndruhu itötöna Lowalangi enaʼö ötimbagö transfusi darah? Hadia sindruhu-ndruhu itötöna Lowalangi sebua faʼomasi enaʼö ötimbagö wariawösa ba nösi nomomö hegöi si fahuwu khömö si no muʼefasi moroi ba gangowuloa?’

17. Hadia zinangea tafalua ba ginötö labeʼe khöda wanofu-nofu si tola mameʼe aombö dödöda ba nifaduhusida tödö, ba hadia mbuania simane niwaʼö ba Kolose 2:6, 7?

¹⁷ Moguna faduhu dödöda ba zi no tafaduhusi tödö. Na lö taʼalui wanema li ba wanofu-nofu sabölö moguna sanandrösa ba nifaduhusida tödö, tola ibörögö aombö dödöda hadia zi no tafaduhusi tödö. Faʼaombö dödö daʼö tola ifakiko lala wangera-ngerada hegöi famatida. Na simanö, hadia zinangea tafalua? Iwaʼö khöda Taromali Lowalangi enaʼö tabulöʼö lala wangera-ngerada ba taforomaʼö ba waʼaurida samösa hadia ”zomasi Lowalangi, soʼahonoa ba sangomusoiʼö tödönia”. (Rom. 12:2) Na owölö-ölö ita ba wamahaʼö yaʼita ba Zura Niʼamoniʼö hegöi publikasida, tola tafaduhuʼö ba dödöda samösa wa hadia zi no tafahaʼö yaʼita moroi ba Zura Niʼamoniʼö andrö sindruhu. Ba tola faduhu dödöda wa satulö goi-goi Yehowa. Simane waʼa geu saro, tola aro göi ita irege ’tehonogöigö wamatida’.​—Baso Kolose 2:6, 7.

18. Hadia zanolo yaʼita ba wotimbagö lua-lua si lö sökhi moroi ba gulidanö Zatana?

¹⁸ Yaʼugö samösa zi tola mangaroʼö famatimö. Tobali, böi tebulö tabohouni lala wangera-ngerada. Angandrö ero inötö ba andrö wanolo geheha Yehowa. Haogö ba wamalua foʼangerönusi ba böi tebulö öfareso lala wangera-ngeramö hegöi ohitö dödömö. Fili wariawösa si sökhi si tola manolo yaʼugö ba wombulöʼö lala wangera-ngeramö. Na öfalua daʼö, tola ötimbagö fondrönisi zi lö sökhi gulidanö Zatana ba tola mofozu ndraʼugö ba ’wodudugö lala wangera-ngera si fasala hegöi ngawalö daha-taha nifazökhi ba wolawa faʼaboto ba dödö khö Lowalangi’.​—2 Kor. 10:5.