1. Moloʼö Kolose 2:4, 8, hadia nifalua Zatana ba wondrönisi lala wangera-ngerada?

OMASI Zatana enaʼö lö saʼae taʼomasiʼö Yehowa. Enaʼö mofozu gohitö dödönia, itandraigö ba wondrönisi lala wangera-ngerada, ifalua daʼö enaʼö iʼila ifatörö wangera-ngerada ba moloʼö ita khönia. Iʼogunaʼö ngawalö zadöni dödöda enaʼö tedönisi ita mazui ilimo ita irege taʼoʼö ia.​—Baso Kolose 2:4, 8.

2-3. (a) Hana wa moguna taʼameʼegö tödö wamangelama nisura ba Kolose 2:8? (b) Hadia nitutunöda ba wamahaʼö daʼa?

² Hadia sindruhu-ndruhu no so ita ba wamaʼala nifaelungu Zatana? Sindruhu! Törö tödöu wa tenga ba niha si lö faʼaboto ba dödö ibeʼe Waulo wamangelama nisurania ba Kolose 2:8. Isura daʼö soguna ba niha Keriso si no mubayoini eheha niʼamoniʼö. (Kol. 1:2, 5) Me luo daʼö, niha Keriso so barö mbawa deʼala börö walimosa Zatana, ba iadaʼa abölö ebua wamaʼalania. (1 Kor. 10:12) Hadia mbörö? Börö me no lafazibo Zatana ba gulidanö, ba itandraigö ifaelungu nono mbanua Lowalangi si lö faröi. (Fam. 12:9, 12, 17) Aefa daʼö, ba götöda iadaʼa ato niha si lö sökhi ba si falimo, ba ’itugu monönö waʼalösökhira’.​—2 Tim. 3:1, 13.

³ Ba wamahaʼö daʼa, tatutunö dania hewisa Zatana ba wangogunaʼö ”waya-faya si lö boto” ba wondrönisi lala wangera-ngerada. Taʼila dania tölu ngawalö ’waʼonekhenia’. (Ef. 6:11) Ba wamahaʼö aefa daʼa, tatutunö dania hewisa lalada ba wotimbagö lala niʼogunaʼönia ba wondrönisi lala wangera-ngerada. Si oföna, datatutunö hewisa lala Zatana  ba wolimo iraono Gizaraʼeli me no larugi Danö Amabuʼula ba tafaigi hadia wamahaʼönia khöda.

4-6. Moloʼö 5 Moze 11:10-15, hadia lala si bohou ba wonowi sinangea lafahaʼö ndraono Gizaraʼeli me no larugi Danö Amabuʼula?

⁴ Onekhe sibai Zatana ba wondrönisi iraono Gizaraʼeli enaʼö mangalulu ira ba nadu. Hewisa wamaluania? Aboto ba dödönia wa moguna khöra gö, tobali iʼogunaʼö daʼö enaʼö lafalua hadia zomasi ia. Me larugi Danö Amabuʼula iraono Gizaraʼeli, moguna labulöʼö lalara ba wananö sinanö. Me so ndraono Gizaraʼeli ba Miserai, laʼogunaʼö nidanö moroi ba Nungo Nidanö Nilo enaʼö tola mufoʼidanö nowira. Hizaʼi, ba Danö Amabuʼula lö hadöi ebua nungo nidanönia. Tobali, enaʼö auri zinanöra moguna khöra nidanö deu hegöi namo. (Baso 5 Moze 11:10-15; Yes. 18:4, 5) Börö daʼö, moguna lafahaʼö ira iraono Gizaraʼeli hewisa lala si bohou ba wonowi. Tenga saoha ba wamalua daʼa, börö me no mate niha sogonekhe ba wonowi ba danö si mate.

⁵ Ifatunö Yehowa ba nono mbanuania wa faböʼö zalua khöra dania ba moguna lafahaʼö ira ba lala si bohou ba wonowi. Aefa daʼö, ibeʼe khöra wamangelama, ”Mifaigi sibai, faböi ibeʼe nifowöhö ia tödömi, ba wamosumange lowalangi böʼö, ba ba wangalulu ba daʼö.” (5 Moz. 11:16, 17) Na mufaigi wamangelama andrö hulö lö moʼamakhaita daʼö ba wonowi. Hizaʼi, hana wa ibeʼe Yehowa wamangelama andrö?

⁶ Aboto ba dödö Yehowa wa tola tedönisi ndraono Gizaraʼeli na lafahaʼö ira ba wonowi ba niha samosumange adu si so ba zi fasuira. Tatu manö, abölö onekhe ira ba  wonowi moroi ba ndraono Gizaraʼeli, ba oya nekhe-nekhe dangara si tola laʼogunaʼö ono mbanua Lowalangi na lafahaʼö ira, hizaʼi tola göi tefaelungu ira. Lala wangera-ngera niha Ganaʼana sohalöwö ba danö, tedönisi ba nifaduhusira tödö khö Mbaʼali. Faduhu dödöra wa Baʼali sangokhögö dalu mbanua hegöi sameʼe teu. Lö omasi Yehowa na ono mbanuania lafaelungu ba wamahaʼö si fasala simane daʼö. Hizaʼi, lafili iraono Gizaraʼeli ba wangalulu khö Mbaʼali, ba hauga kali lafuli ira ba wamalua daʼö. (4 Moz. 25:3, 5; Zangu. 2:13; 1 Raz. 18:18) Iadaʼa datatutunö hewisa lala Zatana ba wangosawuyu ndraono Gizaraʼeli.

7. Hadia wanandraigö ba wamati nitema ndraono Gizaraʼeli me larugi Danö Amabuʼula?

⁷ Lala si oföna niʼogunaʼö Zatana yaʼia daʼö iʼogunaʼö faʼomasi si toʼölö niʼokhögö ndraono Gizaraʼeli ba wanöndra deu enaʼö tola mufoʼidanö nowira. Lö asese moteu ba Danö Amabuʼula, ba alua daʼö ero röfi iʼotarai ba gafuriata mbaŵa si Öfa irugi mbaŵa si Siwa. Si toʼölönia ibörögö asese moteu ba mbaŵa si Fulu. Moguna sibai ba ndraono Gizaraʼeli nidanö deu enaʼö auri ira ba atabö zinanöra. Tobali ilimo ndraono Gizaraʼeli Satana enaʼö faduhu dödöra wa moguna laʼoʼö zi toʼölö lafalua niha samosumange adu si so ba zi fasuira. Faduhu dödö niha ba zi fasuira wa tola iʼekhugö deu lowalangira asala so wasömbata nifaluara. Niha sambö famati khö Yehowa, faduhu dödöra wa ha daʼa lala enaʼö tebato mbaŵa lökhö, andrö lafalua wamosumange sofaya ba wangalulu khö lowalangi Baʼali.

8. Hadia lala si dua niʼogunaʼö Zatana? Tutunö.

⁸ Lala si dua niʼogunaʼö Zatana ba ndraono Gizaraʼeli yaʼia daʼö idönisi ba wamalua amuata wohorö. Niha ba zi fasui ndraono Gizaraʼeli lafalua gamuata fohorö ba wamosumange lowalangira. Ba nahia wamosumangera, so ndra alawe hegöi ira matua nibaliʼö ba wamalua amuata wohorö. Latehegö alua homoseksualitas hegöi amuata wohorö tanö böʼö, ba no si toʼölö daʼö ba wamaigira! (5 Moz. 23:18, 19; 1 Raz. 14:24) Faduhu dödöra wa na lafalua daʼö tola oya mbua zinanöra. Ato ndraono Gizaraʼeli sadöni tödö ba wamalua famosumange wohorö ba lafili ba wamosumange lowalangi faya. No iʼosawuyu ira Satana.

9. Moloʼö Hosea 2:18, 19, hewisa Zatana ba wombawainö hörö ndraono Gizaraʼeli ba wamaigi Yehowa?

⁹ Lala si tölu niʼogunaʼö Zatana yaʼia daʼö imbawainö hörö ndraono Gizaraʼeli sanandrösa khö Yehowa. Ba götö zamaʼeleʼö sotöi Yeremia, ifatunö Yehowa wa ira samaʼeleʼö faya no lafaelungu nono mbanuania enaʼö laʼolifugö döinia ’börö Mbaʼali’. (Yer. 23:27) No tebato nono mbanua Lowalangi ba wangogunaʼö töi Yehowa ba lafalalini daʼö faoma töi Mbaʼali, eluahania Sangokhögö mazui Sokhö. Daʼa mbörö wa abua ba ndraono Gizaraʼeli ba wamaehusi Yehowa khö Mbaʼali. Lua-luania, famosumange Baʼali tefaruka ba wamosumangera khö Yehowa.​—Baso Hosea 2:18, 19.

10. Hadia manö lala niʼogunaʼö Zatana iadaʼa?

¹⁰ Fagölö lala niʼogunaʼö Zatana iadaʼa. Iʼogunaʼö faʼomasi si toʼölö, amuata fohorö, ba imbawainö hörö niha sanandrösa khö Yehowa enaʼö tola iʼosawuyu niha.  Iadaʼa dataʼofönaiʼö wanutunö lala safuria niʼogunaʼö Zatana.

11. Hewisa Zatana ba wombawainö hörö niha sanandrösa khö Yehowa?

¹¹ Imbawainö hörö niha Satana sanandrösa khö Yehowa. Me no mate fefu ndra sinenge Yesu, so ösa zangotöigö niha Keriso labörögö ba wameʼe famahaʼö sofaya. (Hal. 20:29, 30; 2 Tes. 2:3) Labörögö lafaböʼöni döi Lowalangi sindruhu ira niha si no mondröi sindruhu. Duma-dumania, lö laʼogunaʼö döi Lowalangi ba Zura Niʼamoniʼö niʼokhögöra ba laʼogunaʼö gamalalata döi simane ”Soʼaya”. Börö me laheta döi Lowalangi ba lafalalini faoma ”Soʼaya”, daʼö mbörö wa abua ba niha sombaso Sura Niʼamoniʼö ba wangiʼila wa faehu Yehowa faoma ’soʼaya’. (1 Kor. 8:5) Laʼogunaʼö ngawua wehede ”Soʼaya” khö Yehowa hegöi khö Yesu, irege abua ba niha ba wamaehusi Yehowa hegöi Yesu. (Yoh. 17:3) Daʼö mbörö wa tedou wamahaʼö Lowalangi Sambua Tölu, si lö hadöi ba Daromali Lowalangi. Lua-luania, ato niha si faduhu tödö wa tebai aboto ba dödöra Lowalangi. No sambua falimosa daʼa!​—Hal. 17:27.

12. Hadia nituhini agama sofaya, ba hadia lua-luania simane nitutunö ba Roma 1:28-31?

¹² Idönisi niha Satana ba wamalua amuata wohorö. Ba götö ndraono Gizaraʼeli me föna, iʼogunaʼö agama sofaya ba wotuhini amuata wohorö. Simanö göi nifaluania iadaʼa. Fatema ba dödö agama sofaya gamuata fohorö ba labaliʼö daʼö hulö si toʼölö mufalua. Lua-luania, ato niha sangumaʼö wa yaʼira samosumange Lowalangi, hizaʼi lö laʼoʼö goi-goinia sanandrösa ba gamuata. Itutunö daʼö sinenge sotöi Faulo ba zurania ba niha Roma. (Baso Roma 1:28-31.) ’Amuata saila ita’ nitötöi Faulo yaʼia daʼö fefu gamuata fohorö, simane homoseksualitas. (Rom. 1:24-27, 32; Fam. 2:20) Börö me ono mbanua Lowalangi ita, moguna sibai taʼoʼö wamahaʼö Zura Niʼamoniʼö si no muhaogö mututunö!

13. Hadia lala tanö böʼö niʼogunaʼö Zatana?

¹³ Iʼogunaʼö Zatana faʼomasi si toʼölö. No si toʼölö na omasi tafahaʼö ita ba nekhe-nekhe danga, si tola manolo yaʼita ba wangaʼasogö soguna khöda hegöi ba nösi nomoda. (1 Tim. 5:8) Sasesenia, tasöndra nekhe-nekhe danga na möi ita ba zekola  ba so khöda wa owölö-ölö ba wamahaʼö. Hizaʼi, moguna mangelama ita. Oya soi, tenga ha nekhe-nekhe danga nifahaʼöra ba ndraono sekola, hizaʼi lafahaʼö göi ira sanandrösa ba waʼatua-tua niha gulidanö. Duma-dumania, lafahaʼö ndraono ba zekola enaʼö aombö dödöra wa so Lowalangi ba tebai mufaduhusi tödö Zura Niʼamoniʼö. Lafahaʼö ira wa fefu niha sagatua-tua faduhu dödöra wa faʼauri tebörögö moroi ba evolusi. (Rom. 1:21-23) Famahaʼö simane daʼö, lö tefaudu ba ”waʼatua-tua Lowalangi”.​—1 Kor. 1:19-21; 3:18-20.

14. Hadia nidouʼö niha soloʼö faʼatua-tua niha gulidanö?

¹⁴ Faʼatua-tua niha gulidanö andre, latimbagö ba fatuwu ira ba goi-goi satulö khö Yehowa. Niha soloʼö faʼatua-tua niha gulidanö, tebai idouʼö mbua-bua geheha Lowalangi, hizaʼi ’bua-bua nösi’. (Gal. 5:19-23) Daʼö zamarou niha ba wangokhögö faʼasiliyawa ba lua-luania ”ha tanö khöra laʼalui”. (2 Tim. 3:2-4) Amuata daʼa no faehu sibai moroi ba gamuata fangide-ngideʼö, somasi Lowalangi enaʼö laʼokhögö ono mbanuania. (2 Zam. 22:28) So ösa niha Keriso si möi kuliah, labörögö laʼokhögö wangera-ngera simane gulidanö daʼa, tenga simane lala wangera-ngera Lowalangi. Datafaigi sambua duma-dumania.

15-16. Hadia wamahaʼö si tola öhalö ba zalua khö dalifusöda ira alawe?

¹⁵ Imane samösa dalifusöda ira alawe si no tobali perintis ba zi töra 15 fakhe, ”Börö me Samaduhuʼö si no tebayagö idanö ndraʼo, no ubaso ba ufondrondrongo sanandrösa ba wamangelama na  möi kuliah, hizaʼi lö uʼameʼegö tödö wamangelama andrö. Moloʼö yaʼo, tenga khögu moguna mene-mene daʼa.” Hadia lua-luania? Imane, ”Oya ginötö niʼogunaʼögu ba wamahaʼö yaʼo ba kuliah irege lö inötögu ba wangandrö khö Yehowa simane si no irai ufalua ba zilalö. Erege sibai dödögu irege lö khögu faʼomuso dödö ba ginötö ututunö Sura Niʼamoniʼö ba wanuriaigö, ba tebai ufaʼanö bua gera-era ba gangowuloa. Uʼandrö sibai saohagölö me iʼanemaiʼö aboto ba dödögu wa möi famakiko wahuwusagu khö Yehowa weʼamöi kuliah, uʼila wa moguna ubatogö kuliah. Ba ufalua daʼö.”

¹⁶ Hewisa weʼamöi kuliah möi fondrönisi lala wangera-ngera dalifusöda ira alawe andrö? Imane ba wameʼe fanema li, ”Sindruhunia ailado wangumaʼö daʼa, börö me ba kuliah ifahaʼö ndraʼo ba wangosambuaʼö fangera-ngeragu ba walömoʼahonoa niha böʼö, mendrua manö khö ndra talifusö si sara lala wamati. Utötöna enaʼö lafalua zi lö ikhamö faʼabölöra ba lö fariawödo khöra. Ara awena aheta khögu lala wangera-ngera simane daʼö. Ba zalua khögu andre, oroma wa lö sökhi lua-luania na tatimbagö wamangelama nibeʼe Namada si so ba zorugo hegöi organisasinia. Abölö aboto ba dödö Yehowa ndraʼo moroi na yaʼo samösa. Sinangeania menaʼö na ufondrondrongo ia!”

17. (a) Hadia gangetula zinangea tahalö? (b) Hadia nitutunöda ba wamahaʼö aefa daʼa?

¹⁷ Halö gangetula enaʼö böi irai laʼosawuyu ndraʼugö ”ba wamahaʼö niha gulidanö, hegöi ba waya-faya si lö boto”. Böi tebulö mangelama ndraʼugö ba lala niʼogunaʼö Zatana. (1 Kor. 3:18; 2 Kor. 2:11) Böi tehegö imbawainö hörömö ba wamaigi Yehowa. Oʼö goi-goi Yehowa salawa sanandrösa ba gamuata. Ba böi tehegö ilimo ndraʼugö Satana irege ötimbagö mene-mene Yehowa. Hizaʼi, hadia zinangea öfalua na no tedönisi ndraʼugö ba lala wangera-ngera niha gulidanö? Ba wamahaʼö fönada dania, tatutunö hewisa Daromali Lowalangi ba wanolo yaʼita ba wodudugö ”gofu hadia ia zi no aro” ba wangera-ngerada hegöi si no toʼölö tafalua.​—2 Kor. 10:4, 5.