1. Hana wa moguna tafondrondrongo wamangelama nibeʼe Yesu?

IMANE Yesu me ifaʼeleʼö sanandrösa ba ngaluo safuria, ”Miʼangelama, böi tobali noro dödö sabua khömi . . . faʼaombö dödö ba waʼauri,” eluahania fangabu dödö ba wangalui soguna ero maʼökhö. (Luk. 21:34) Moguna tafondrondrongo wamangelama andrö. Hadia mbörö? Simane niha böʼö, alua göi khöda wangabu dödö.

2. Hadia wangabu dödö nitaögö ndra talifusöda?

² Itaria, fatete alua khöda gabula dödö ba ginötö si fagölö. Nehegö ösa duma-duma daʼa. So samösa Zamaduhuʼö sotöi John, * göna ia fökhö sklerosis multipel, ba abu sibai dödönia me iröi ia foʼomonia me no aefa 19 fakhe mangowalu ira. Aefa daʼö, labato wamosumange Yehowa ononia alawe si darua. Faböʼö göi zalua khö zi sambua fongambatö sotöi Bob hegöi Linda. Laʼefasi ira moroi ba naha wohalöwö, ba tebai saʼae toröi ira ba nomora börö me lö sagu khöra ba wamuʼa mböli nomora. Aefa daʼö, ifatunö doto khö Linda wa göna ia fökhö tödö si tola mamunu yaʼia. Ba ibörögö göi so khönia wökhö tanö böʼö samakiko sistem kekebalan tubuh.

3. Hadia nitutunö Filifi 4:6, 7 sanandrösa khö Yehowa?

³ Tola faduhu dödöda wa Somböi yaʼita hegöi Amada sebua faʼomasi sotöi Yehowa, aboto ba dödönia hadia nirasoida ba ginötö göna ita wangabu dödö. Ba omasi itolo ita ba ginötö alua khöda daʼö. (Baso Filifi 4:6, 7.) Oya duma-duma ba Daromali Lowalangi, sanutunö fanandraigö nitaögö nono mbanuania si lö faröi. Itutunö göi, hewisa lala Yehowa ba wanolo yaʼira ba ginötö alua khöra wangabu dödö. Datafaigi ösa duma-dumania.

4. Hadia wanandraigö nitaögö Elia, ba hadia nirasoinia sanandrösa khö Yehowa?

⁴ Ifosumange Yehowa Elia ba ginötö si basaki ba itaögö wanandraigö sabölö-bölö. So samösa razo ndraono Gizaraʼeli si faröi sotöi Ahabi. Mangowalu ia khö Izebela, samösa ndra alawe si lö sökhi ba samosumange Baʼali. Lafönui soi andrö famosumange Baʼali ba oya zamaʼeleʼö khö Yehowa nibunura. Ilau moloi Elia. Teʼefaʼö göi ia ba mbaŵa lofo, börö me iʼodaligö Yehowa. (1 Raz. 17:2-4, 14-16) Aefa daʼö, iʼodaligö Yehowa Elia, ba ginötö ilawa ndra samaʼeleö hegöi samosumange Baʼali, ba ifarou ndraono Gizaraʼeli ba wamosumange Yehowa. (1 Raz. 18:21-24, 36-38) No irasoi Elia ba iʼila hörönia samösa, hewisa Yehowa ba wanolo hegöi ba wolumöʼö yaʼia ba zi hauga kali ba ginötö alua khönia wangabu dödö.

5-6. Moloʼö 1 Razo 19:1-4, hadia nirasoi Elia ba hadia nifalua Yehowa ba wangoromaʼö wa iʼomasiʼö Gelia?

⁵ Baso 1 Razo 19:1-4. Hizaʼi, ataʼu Elia ba ginötö edöna ibunu ia Ratu Izebela. Daʼö mbörö wa ilau moloi ba danö Mbereseba. Ide-ide dödönia ba ”omasi ia mate”. Hana wa tola irasoi zimane daʼö? Börö me niha si lö moʼahonoa Elia, ”niha simane yaʼita”. (Yak. 5:17) Tola manö irasoi wa tebai saʼae itaha gabula dödö nitaögönia ba marase ia. Ba wamaigi Elia, no zaya-zaya gölö fefu nifaluania ba wangoʼawögö famosumange sindruhu, samösa lö hadöi ba gotalua ndraono Gizaraʼeli sombulöʼö faʼaurira, ba ha yaʼia samösa zi lö faröi ba wamosumange Yehowa. (1 Raz. 18:3, 4, 13;  19:10, 14) Tola manö tokea dödöda ba nirasoi zamaʼeleʼö si lö faröi andre. Hizaʼi, aboto ba dödö Yehowa hadia nirasoi Elia.

⁶ Lö mofönu Yehowa khö Gelia, me itutunö hadia nirasoinia. Itolo Elia enaʼö ifuli abölö. (1 Raz. 19:5-7) Ba gafuriata, si fao faʼasökhi dödö iʼogunaʼö waʼabölönia sahöli-höli dödö Yehowa ba wanolo Elia ba wangatulöʼö lala wangera-ngerania. Ifatunö khönia Yehowa wa so nasa 7.000 ndraono Gizaraʼeli sanimbagö wamosumange Mbaʼali. (1 Raz. 19:11-18) Moroi ba duma-duma nibeʼe Yehowa, iforomaʼö wa iʼomasiʼö Gelia.

7. Me no taʼila hewisa lala Yehowa ba wanolo Elia, hadia waʼaro dödö niʼokhögöda?

⁷ Hadia so zalua sameʼe khöu faʼabu dödö? Tatu terara sibai dödöda ba ginötö taʼila wa aboto ba dödö Yehowa hadia nirasoi Elia! Daʼö zangaroʼö tödöda wa aboto ba dödö Yehowa hadia ia waʼaombö-aombö dödöda. Iʼila hadia zoʼamböta ita, niʼera-erada hegöi nirasoida. (Zin. 103:14; 139:3, 4) Na taʼoʼö duma-duma Elia ba wangodaligö Yehowa, itolo ita ba wangasiwai abula dödöda.​—Zin. 55:23.

8. Hewisa Yehowa ba wanolo yaʼugö ba ginötö so waʼabu dödö?

⁸ Na abu dödömö, tola iʼasogö ba wangera-ngeramö wa lö irai tebulö zalua khömö irege örasoi waʼide-ide dödö. Na alua daʼö, törö tödöu wa itolo ndraʼugö Yehowa ba ginötö so waʼabu dödö. Hewisa wanolonia yaʼugö? Iʼandrö khömö enaʼö ötutunö khönia gabula dödömö hegöi nirasoimö. Ba hasambalö ibeʼe khömö wanolo. (Zin. 5:4; 1 Fet. 5:7) Andrö, moguna asese öʼohe ba wangandrö khö Yehowa sanandrösa ba gabula dödömö. Tatu manö, lö fahuhuo ia khömö simane nifaluania khö Gelia. Hizaʼi, iʼogunaʼö Daromalinia, Sura Niʼamoniʼö hegöi organisasinia. Na öbaso Zura Niʼamoniʼö tola terara dödömö ba tefarou dödömö. Ba laʼabölöʼö göi ndraʼugö ira talifusömö si sara lala wamati.​—Rom. 15:4; Heb. 10:24, 25.

9. Hewisa zi fahuwu khöda möi fanoloda?

⁹ Iwaʼö Yehowa khö Gelia enaʼö ibeʼe ösa halöwönia khö Gelisa. Daʼa lala nibeʼe Yehowa enaʼö so zi fahuwu si sökhi khö Gelia si tola manolo yaʼia enaʼö anau gölönia ba ginötö irasoi waʼide-ide dödö. Simanö göi, na tatutunö ba zi fahuwu khöda si tola tafaduhusi tödö sanandrösa ba nirasoida tola itolo ita ba wanaögö hadia nirasoida. (2 Raz. 2:2; Gamd. 17:17) Na örasoi wa lö hadöi niha sinangea öfaduhusi tödö ba wanutunö sanandrösa ba gabula dödö hegöi nirasoimö, ohe ba wangandrö khö Yehowa enaʼö itolo ndraʼugö ba wanöndra niha Keriso saro ba wamati si tola mameʼe khömö famarou dödö.

10. Hewisa ba zalua khö Gelia möi famarou dödöda, ba hewisa mbuʼusa li ba Yesaya 40:28, 29, ba wanolo yaʼita?

¹⁰ Itolo Elia Yehowa ba wanaögö abula dödönia hegöi ba wangabölöʼö yaʼia enaʼö lö faröi ia ba zi hauga fakhe ba wangai halöwö. Salua khö Gelia tobali famarou dödöda. Itaria, tola manö alua khöda abula dödö sabölö-bölö irege abu sibai dödöda ba marase ita. Na taʼodaligö Yehowa ibeʼe khöda waʼabölö enaʼö lö faröi ita ba wamosumange yaʼia.​—Baso Yesaya 40:28, 29.

11-13. Hadia lua-luania ba niha samosumange Lowalangi si datölu ba götö föna sanandrösa ba wangabu dödö nitaögöra?

¹¹ So göi niha tanö böʼö nisura ba Zura Niʼamoniʼö sanaögö abula dödö sabölö-bölö.  Duma-dumania, aila Khana börö me tebai moʼono ia, ba sindruhu-ndruhu lö sökhi wangoʼaya nibeʼe foʼomo ndrongania tanö böʼö khönia. (1 Zam. 1:2, 6) Abu sibai dödö Khana irege mege-ege ia ba tebai manga.​—1 Zam. 1:7, 10.

¹² Itaögö göi waʼabu dödö Razo Dawido. Angeragö gabula dödö salua khönia. Itegu-tegu manö ia tödönia börö me no oya zala si no ifalua. (Zin. 40:13) Ilawa ia ononia matua niʼomasiʼönia sotöi Abisalomi. Ba gafuriata, mate Abisalomi. (2 Zam. 15:13, 14; 18:33) Ba so samösa zi fahuwu khö Dawido si manga mbölinia. (2 Zam. 16:23–17:2; Zin. 55:13-15) Oya zinunö nisura Dawido sangoromaʼö waʼabu dödönia hegöi waʼafaduhu dödönia khö Yehowa.​—Zin. 38:6-11; 94:17-19.

¹³ Aefa daʼö, so waʼafökhö dödö khö zanura sinunö me iʼila lala waʼauri niha si lö sökhi. Yaʼia andre te ngaʼötö Gasafo moroi ba mado Lewi, ba sangai halöwö ia ba nahia ”niʼamoniʼö andrö khö Lowalangi”. Abu sibai dödö zanura sinunö andre, irege lö khönia faʼomuso dödö hegöi faʼatobönö. Ibörögö lö iʼandrö saohagölö ba howu-howu nitemania börö me ifosumange Lowalangi.​—Zin. 73:2-5, 7, 12-14, 16, 17, 21.

14-15. Hadia wamahaʼö si tola tahalö moroi ba duma-duma niha si datölu si so ba Zura Niʼamoniʼö sanandrösa ba wangandrö fanolo moroi khö Yehowa?

¹⁴ Datölu zamosumange Yehowa andre, laʼodaligö wanolo moroi khö Yehowa. Laʼohe ba wangandrö khö Yehowa sanandrösa ba waʼaombö dödöra. Lahaogö latutunö khönia hadia mbörö wa abu dödöra ba lö tebulö möi ira ba naha wamosumange Yehowa.​—1 Zam. 1:9, 10; Zin. 55:23; 73:17; 122:1.

¹⁵ Si fao faʼahakhö dödö itolo ira Yehowa.  So waʼahono dödö khö Khana. (1 Zam. 1:18) Isura Dawido, ”Oya ngawalö wamakao ba zatulö, ba iʼefaʼö ia Yehowa ba daʼö fefu.” (Zin. 34:20) Ba gafuriata, aboto ba dödö sanura zinunö wa no ’igogohe tangania kambölö’ Yehowa, sanuturu lalania si fao mene-mene faʼomasi. Ilau manunö, ”Ba khögu, ba faʼohahau dödö, na faböbö ndraʼo khö Lowalangi, khö Zoʼaya, Yehowa manötöna ndraʼo.” (Zin. 73:23, 24, 28) Hadia wamahaʼö si tola tahalö moroi ba duma-duma daʼa? Itaria, na alua khöda gabula dödö sabölö-bölö tola iʼasogö khöda waʼabu dödö. Hizaʼi, tola tataögö daʼö na taʼangerönusi hewisa wanolo Yehowa niha böʼö, taʼodaligö ia ba wangandrö ba taʼoʼö niʼandrönia khöda.​—Zin. 143:1, 4-8.

16-17. (a) Hana wa tebai taʼaröuʼö ita khö Yehowa hegöi ono mbanuania? (b) Hewisa enaʼö ifuli aro ita?

¹⁶ So wamahaʼö tanö böʼö sabölö moguna si tola tahalö moroi ba duma-duma niha si datölu andre. Ba ginötö alua gabula dödö, moguna böi taʼaröuʼö ita khö Yehowa hegöi ono mbanuania. (Gamd. 18:1) Imane Nancy sanaögö abula dödö börö me iröi ia woʼomonia, ”Asese lö omasido falukha mazui fahuhuo ba niha. Hizaʼi, me itugu  ufandröndröu ndraʼo khöra, itugu abu dödögu.” Itugu sökhi zalua khö Nancy ba ginötö iʼalui lala ba wanolo niha si göna abula dödö. Imane, ”Uhaogö ufondrondrongo na latutunö gabula dödöra. Na uʼangeragö zalua khöra, lö saʼae teʼosambuaʼö dödögu ba gabula dödögu.”

¹⁷ Tola ifuli aro ita na möi ita ba gangowuloa. Na taʼondrasi gangowuloa, no tabeʼe ginötö khö Yehowa ’ba wanolo yaʼita hegöi ba wondrara tödöda’. (Zin. 86:17) Ba gangowuloa, iʼogunaʼö Yehowa gehehania niʼamoniʼö, Taromalinia, hegöi ono mbanuania ba wangabölöʼö yaʼita. Aefa daʼö, tebeʼe khöda ginötö enaʼö tola ”tafarou dödö nawöda zamösana”. (Rom. 1:11, 12) Imane samösa dalifusöda ira alawe sotöi Sophia, ”Itolo ndraʼo Yehowa hegöi ira talifusöda ba wamati enaʼö anau gölögu. Moguna sibai khögu weʼamöi ba gangowuloa. Ba ginötö uʼodödögö weʼamöi manuriaigö hegöi ba gangowuloa, itugu aoha khögu ba wanaögö faʼabu dödö hegöi faʼaombö dödögu.”

18. Hadia wanolo nibeʼe Yehowa na ide-ide dödöda?

¹⁸ Ba ginötö tarasoi waʼide-ide dödö, moguna tatörö tödöda mbuʼusa li Yehowa wa ba zi so miföna iheta waʼabu dödö sagötö faʼara, ba ibeʼe göi khöda wanolo iadaʼa ba wanaögö yaʼia. Ibeʼe khöda ”waʼedöna ba faʼabölö” enaʼö anau gölöda ba wanaögö faʼide-ide dödö hegöi faʼafatö dödö.​—Fil. 2:13.

19. Hadia mbuʼusa li nibeʼe ba Roma 8:37-39?

¹⁹ Baso Roma 8:37-39. Ifaduhuʼö khöda sinenge sotöi Faulo wa lö hadöi si tola mamabali yaʼita moroi ba waʼomasi Lowalangi. Hewisa wanoloda ndra talifusöda si göna abula dödö? Ba wamahaʼö fönada itutunö hewisa lalada ba woloʼö duma-duma Yehowa ba wangoromaʼö faʼahakhö dödö hegöi ba wanolo ndra talifusöda ba ginötö alua khöra gabula dödö.